গজবি সাতটা সীল-চাপ্পড় আর সাতটা শিংগা (৬:১-১১:১৯)
কিতাবর পয়লা ছয়টা সীল-চাপ্পড় খুলা
৬
১ বাদে আমি দেখলাম,
হউ মেড়ার বাইচ্চায় যেবলা সাতো সীল-চাপ্পড়র মাজ থাকি পয়লা সীল ভাংগিরা,
অউ সময় হউ চাইরো জানদারর মাজর একজনে ঠাঠা পড়ার আওয়াজর লাখান জুরে কইলা,
“আও।”
২ তেউ আমি চাইয়া দেখলাম,
ধলা একটা ঘোড়া,
এর উপরে যেইন ছওয়ার অইছইন তান আতো তীর-ধনুক আছে।
তান মাথাত তাজ লাগাইল অইলো,
তাইন জয় করার লাগি জয় করি করি রওয়ানা অইলা।
৩ আর তাইন যেবলা দুছরা সীল ভাংগিলা,
অউ সময় আমি দুছরা জানদারর আওয়াজ হুনলাম,
এইন কইলা,
“আও।”
৪ তেউ লাল চুরুক আরকটা ঘোড়া বার অইলো,
আর এর উপরে যেইন ছওয়ার অইছইন,
এনরে অউ খেমতা দেওয়া অইলো,
যাতে তাইন দুনিয়া থাকি হকল শান্তি কাড়িয়া নেইনগি,
মানষে একে-অইন্যরে খুন করইন,
এনরে বড় একখান তলোয়ারও দেওয়া অইলো।
৫ বাদে মেড়ার বাইচ্চায় যেবলা তিন নম্বর সীল ভাংগিলা,
অউ সময় আমি তিন নম্বর জানদারর আওয়াজ হুনলাম,
তাইন কইলা,
“আও।”
তেউ আমি দেখলাম,
একটা কালা ঘোড়া।
এর উপরে যেইন ছওয়ার অইছইন,
তান আতো একখান পাল্লা আছে।
৬ আর আমি হুনলাম,
হউ চাইর জন জানদারর মাজখান থাকি কেউ যানু কইরা,
“এক দিনারে খালি এক সের গম বা এক দিনারে তিন সের বার্লি মিলে।
অইলে তুমি জয়তুন আর আংগুর গাছর খেতি করিও না।”
৭ অউ মেড়ার বাইচ্চায় যেবলা চাইর নম্বর সীল ভাংগিলা,
অউ সময় আমি হুনলাম,
চাইর নম্বর জানদারে কইলা,
“আও।”
৮ তেউ আমি চাইয়া দেখলাম,
ছালি রংগর এক ঘোড়া,
অউ ঘোড়ার যেইন ছওয়ার,
এন নাম অইলো মউত আর তান খরে খরে কয়বরে আটের।
এরারে দুনিয়ার চাইর বাটর মাজর এক বাটর উপরে খেমতা দেওয়া অইলো,
যাতে তারা তলোয়ার দিয়া,
নিদান দিয়া,
গজবি মউত আর জংলি জানুয়ার দিয়া মানষর জান নেইন।
৯ বাদে তাইন যেবলা পাচ নম্বর সীল ভাংগিলা,
অউ সময় আমি দেখলাম,
কুরবানি খানার তলে অউ লাখান মানষর রুহ অকল আছে,
যেরারে আল্লার কালামর লাগি আর হজরত ইছার পক্ষে জবানবন্দি দেয়ার লাগি কাতল করা অইছে।
১০ এরা জুরে জুরে কইলা,
“ও পাক-পবিত্র হক্কানি মউলা,
আমরার কাতলর বিচার করতে আর বদলা লইতে,
তুমি দুনিয়ার মানষরে আর কতদিন সময় দিতায়?”
১১ তেউ এরা হকলরে ধলা লেবাছ দান করা অইলো,
আর কওয়া অইলো,
তারার লগর খেজমতগার আর তারার যতো ভাইয়াইনরে তারার নমুনায় কাতল করা অইবো,
এরার সংখ্যা পুরা না অওয়া পর্যন্ত,
আরো কিছু দিন বার চাইতে অইবো।
১২ বাদে আমি দেখলাম,
মেড়ার বাইচ্চায় ছয় নম্বর সীল ভাংগিলা,
অউ সময় খুব বড় ভৈছাল অইলো।
সুরুজর রং অইগেল কালা ছিয়াই আর ভরা চান্দর রং অইলো লউর লাখান লাল।
১৩ তুফান আইলে যেলা ডুমুর গাছ থাকি কাচা ফলও তুফানে ফালাই দেয়,
ঠিক অউলা আছমানর তেরা অকল খুলিয়া জমিনর উপরে পড়িগেল।
১৪ আস্তা আছমান দলা অইয়া কাগজর পুটলা লাখান বনিয়া গাইব অইগেল।
পাড়-পর্বত আর দ্বীপ অকলও যারযির জাগা থাকি হরিগেল।
১৫ আর দুনিয়ার হকল রাজা-বাদশাইন,
নামকরা জন,
সিপাইর পরধান,
জমিদার,
পয়লোয়ান,
গুলাম বা আজাদ পরতেক জনউ পাড়র গাতে গাতে,
পাথরর আওড়ে লুকাইলো।
১৬ তারা অউ পাড় আর পাথর অকলরে কইলো,
“আমরার উপরে আইয়া পড়ো,
যেইন তখতো বওয়াত আছইন তান চউখর ছামন থাকি আর মেড়ার বাইচ্চার গজব থাকি আমরারে লুকাও।
১৭ তারার গজবি হউ কিয়ামতর দিন তো আইচ্ছে,
অখন আর টিকিয়া থাকার সাইধ্য কার আছে?”