মুমিন অকলরে ছালাম জানানি
১৬
১ তে অখন আমরার বইন ফৈবি বিবিরে পাঠাইরাম,
তাইন অইলা কিংক্রিয়া টাউনর ইছায়ী জমাতর খাদিম,
তান বেয়াপারে কইয়ার,
২ আল্লার বন্দা অকলরে যেলা আপন করা জরুর,
মালিক ইছার নামে এনরেও অলা আপন মনো করিও।
তাইন তো আমারে আর আরো বউত মানষরে সাইয্য করছইন,
এরলাগি যেকুনু বেয়াপারে সাইয্য চাইলে,
তুমরা তানরে সাইয্য করিও।
৩ আমার লগে অইয়া আল-মসীর লাগি যেরা কাম করছইন,
অউ ফিছকিলা আর আকিলরে আমার ছালাম জানাইও।
৪ আমার জান বাচানির লাগি,
তারা নিজরে মউতর আতো সপি দিছলা।
খালি আমি নায়,
ভিন জাতির মাজর হকল জমাতউ তারার গেছে রিনি।
৫ অখন তারার বাড়ির জমাতো আইয়া যেরা শরিক অইন,
এরা হকলরেউ আমার ছালাম জানাইও।
তুরস্কর আছিয়া এলাকাত হকল পয়লা যেইন আল-মসীরে কবুল করছলা,
হউ আপিনিতুছ ভাইরে ছালাম জানাইও,
এইন আমার মায়ার মানুষ।
৬ আর হউ মরিয়ম বিবিরেও ছালাম জানাইও,
যেইন তুমরার লাগি বউত মেনত করছইন।
৭ আমার নিজর জাতির মানুষ আন্দ্রনিকুছ আর জুনিয়ারেও ছালাম জানাইও,
এরা তো আমার লগে অইয়া জেল খাটিছইন।
আল-মসীর সাহাবি অকলর গেছে এরা খুব ইজ্জতি জন,
এরা আমার আগে ইমান আনছইন।
৮ আমার মায়ার মুমিন ভাই আমফিলুছরে ছালাম জানাইও।
৯ আমরার লগর তবলিগকারি উরবান ভাইরে,
আর আমার মায়ার দুস্ত স্তাখিছরেও ছালাম কইও।
১০ আল-মসীর পরিক্ষাত পাশ করা সিপাই আফিলিছ ভাইরেও ছালাম দিও।
ভাই আরিস্তাবুলর বাড়ির হক্কলরে ছালাম জানাইও।
১১ আমার জাতির ভাই হেরোদুনরে ছালাম দিও।
মরহুম নাকিছুছর বাড়ির যেরা মালিক ইছার উম্মত অইছইন,
তারারেও ছালাম জানাইও।
১২ তুরফানা আর তুরফাছা বিবিরেও ছালাম দিও।
অউ বেটিন্তে মালিক ইছার লাগি বড় মেনত কররা।
মায়ার বইন ফার্ছিয়ারেও ছালাম কইও,
মালিকর লাগি তাইনও বউত মেনত করছইন।
১৩ মালিক ইছার পছন্দর মানুষ রউফ ভাইরে ছালাম দিও,
তান আম্মারেও ছালাম কইও,
ই বেটি তো আমারও মা।
১৪ ছিংকিরাত,
ফিলিগুন,
হার্মিছ,
ফাতরুব,
হের্মাছ আর তারার লগে যতো ইমানদার বন্দা আছইন,
এরা হকলরে ছালাম জানাইও।
১৫ ভাই ফিলাগি,
জুলিয়া বিবি,
নিরিয়াছ আর তান বইনরে,
আর অলিম্পাছরে ছালাম কইও,
আল্লার যতো বন্দা তারার লগে আছইন এরা হকলরে ছালাম দিও।
১৬ হুনো,
তুমরা একে-অইন্যে পবিত্র গলাগলি করিও।
আল-মসীর হকল জমাতর ভাই-বনিন্তে তুমরারে ছালাম জানাইরা।
হজরত পাউলুছর (রাঃ) বিদায়ি নছিয়ত
১৭ ও ভাই অকল,
তুমরারে মিনত করি কইরাম,
আগে যেতা তালিম পাইছো,
অউ তালিমর উল্টা তালিম দিয়া যেগুইন্তে দলাদলি আর বাধা-বিঘ্নর জনম দেইন,
অতার বায় নজর রাখিও,
তুমরা ইতার গেছ থাকি হরিয়া রইও।
১৮ কারন ইতায় আমরার মালিক আল-মসীর গুলামি না করিয়া,
তারার পেটর গুলামি করে।
মিঠা-মিঠা মাত মাতিয়া আর তেল মালিশ করিয়া সরল-সুজা মানষরে বে-পথি বানায়।
১৯ আর তুমরা যেন আল্লার হুকুম মাফিক চলরায়,
ইতা তো হকলেউ জানে,
ই খবর হুনিয়া আমিও খুব খুশি অইছি।
তে আমি চাইরাম,
তুমরা নেক পথে কামিল অও,
বদ পথ থাকি বাচিয়া রও।
২০ শান্তি দেওরা আল্লায় ইবলিছ-শয়তানরে খুব জলদি করি তুমরার পাওর তলে ফালাই পিষাইবা।
আমরার মালিক ইছা আল-মসীর রহম-নিয়ামত তুমরার উপরে জারি রউক।
২১ আমার লগে খুশ-খবরি তবলিগ করইন যে তিমথি ভাই,
এইন তুমরারে ছালাম জানাইরা।
আমার জাতি ভাই লুকিয়াছ,
জাছুন আর ছুপাতছেও তুমরারে ছালাম কইরা।
২২ হজরত পাউলুছর বুলি হুনিয়া আমি তর্তিউছ মহরিরে লেখরাম,
মালিক ইছার নামে আমিও তুমরারে ছালাম জানাইরাম।
২৩-২৪ আমি পাউলুছ আর জমাতর হকলরে যেইন মেহমানদারি করইন,
হউ গউছ ভাইয়ে তুমরারে ছালাম জানাইরা।
অউ টাউনর সরকারি কেশিয়ার ইরাস্তাছ ভাইয়ে আর মুমিন ভাই কুয়াতুছে তুমরারে ছালাম জানাইরা।
২৫ আল-হামদুলিল্লা,
আমি পাউলুছে ইছা আল-মসীর বেয়াপারে যে খুশ-খবরি তবলিগ করি,
আল্লা পাকর খেমতা আছে অউ খুশ-খবরির উছিলায় তুমরারে ইমানে থির রাখা।
মনো রাখিও,
বউত জমানা ধরি আল্লায় তান ই বাতুনি মুনশার কথা লুকাই রাখছিলা,
২৬ অইলে অখন ইতা দুনিয়ার হকল জাতির গেছে জাইর অর।
চিরকালিন জিন্দা আল্লার হুকুমে,
আগর জমানার নবী অকলে যেতা লেখিয়া রাখছিলা,
অতা জাইর অর,
যাতে তারা আল-মসীর উপরে ইমান আনিয়া আল্লা পাকর বাইধ্য অইন।
এরলাগি অউ খুশ-খবরি অখন তবলিগ করা অর।
২৭ তাইনউ একমাত্র আল্লা,
তাইনউ আখলদার,
যুগে যুগে চিরকাল ইছা আল-মসীর মাজদি তান তারিফ অউক।
আমিন॥