পবিত্র ইঞ্জিল শরিফ ৯ নম্বর ছিপারা
আল-গালাতিয়া
আল্লাই খুশ-খবরি খালি একটাউ
১
১ আমি পাউলুছ,
ইছা আল-মসীর একজন সাহাবি।
আমি কুনু মানষর হুকুম-পরামিশে বা কুনু মানষর উছিলায় সাহাবি অইছি না।
খালি ইছা আল-মসী আর আমরার গাইবি বাফ আল্লা,
যেইন আল-মসীরে মুর্দা থাকি জিন্দা করি তুলছইন,
এরার গেছ থাকিউ খেলাফতি পাইছি।
২ আমি আর আমার লগর হকল মুমিন ভাইয়াইন্তে মিলিয়া,
গালাতিয়া দেশর ইছায়ী জমাত অকলর গেছে অউ ছহিফা খান লেখরাম।
৩ আমরার গাইবি বাফ আল্লা পাকে আর ইছা আল-মসীয়ে তুমরারে রহমত আর শান্তি দান করউক্কা।
৪ আমরার গাইবি বাফ আল্লা পাকর মুনশায়,
হউ ইছায় আমরার গুনার মাফির লাগি নিজর পবিত্র জান কুরবানি দিছইন,
যাতে অউ খারাপ জমানার আত থাকি আমরারে বাচাইতা পারইন।
৫ আল্লা পাকর তারিফ হর-হামেশা জারি রউক।
আমিন।
৬ আমি বড় তাইজ্জুব অইগেছি,
আল-মসীর রহমে যেইন ডাকিয়া আনিয়া তুমরারে নিজর বন্দা বানাইছইন,
তানে ছাড়িয়া তুমরা কিলা অতো জলদি আরক নমুনার খুশ-খবরির বায় ফিরিগেলায়।
৭ আসলে তো ইটা কুনু খুশ-খবরিউ নায়।
অইলে কয়জন মানুষ আছে,
যেতায় তুমরার ইমান লইয়া খেইড় খেলাইরা,
তারা আল-মসীর খুশ-খবরিরে উল্টা-পাল্টা করিলতা চাইরা।
৮ হুনো,
আমরা যে খুশ-খবরি তুমরার গেছে তবলিগ করছি,
অউ খুশ-খবরি ছাড়া দুছরা কুনু খুশ-খবরি যুদি তুমরার গেছে তবলিগ করা অয়,
ইতা যুদি আমরা নিজেউ করি,
বা আছমানি কুনু ফিরিস্তায় আইয়া করইন,
তে অগুর উপরে লান্নত পড়উক।
৯ আমি আগে যেমনে কইছি,
অখন হিরবার অউলা কইরাম,
আগর যে খুশ-খবরি তুমরা মানছো,
ইতা ছাড়া দুছরা কুনু খুশ-খবরি কেউ তুমরার গেছে তবলিগ করলে,
অগুর উপরে লান্নত পড়উক।
১০ ইতা করিয়া আমি কার গেছ থাকি তারিফ পাইতাম চাইয়ার,
কুনু মানষর গেছ থাকি না আল্লার গেছ থাকি?
আমি কুনু মানষরে খুশ করার চেষ্টা করিয়ার নি?
আমি যুদি অখনও মানষরে খুশ করার চেষ্টা করতাম,
তে আমি আল-মসীর খাদিম অইলাম না অনে।
হজরত পাউলুছ কিলা সাহাবি অইলা
১১ ও ভাইছাব অকল,
আপনারা জানিয়া রাখউক্কা,
আমি যে খুশ-খবরি তবলিগ করছি,
ইতা তো কুনু মানষর বানাইল মতবাদ নায়।
১২ আমি ইতা কুনু মানষর গেছ থাকি পাইছি না,
কেউ আমারে ইতা হিকাইছেও না।
খালি ইছা আল-মসীয়ে নিজে আমার গেছে ইতা জাইর করছইন।
১৩ আমি আগে যেবলা ইহুদি ধর্ম মানতাম,
হউ সময় আমার চাল-চলন কিলা আছিল ইতা তো তুমরা হুনছো।
আমি আল্লার জমাত অকলরে কত বেশি জুলুম করতাম,
আর ইতারে বিনাশ করার চেষ্টাত আছলাম,
এওতা তুমরা জানো।
১৪ আমার বাফ-দাদার গেছ থাকি পাওয়া শরা-রছুমত মানাতও আমি খুব খিয়ালি আছলাম।
এরদায় আমার বয়সি ইহুদি অকলর মাজে আল্লা-বিল্লা করাত আমি বউত আগুয়াইল আছলাম।
১৫ অইলে আল্লায় তো আমার মাʼর পেটো থাকতেউ আমারে পছন্দ করছইন,
তাইনউ নিজর রহমতে আমারে দাওত দিছইন।
তান মুনশা আছিল,
১৬ আমি তান খাছ মায়ার জনর দিদার পাইয়া,
অইন্যান্য জাতির গেছে খুশ-খবরি তবলিগ করি।
তে অউ দিদার পাইয়াও আমি কুনু আদম জাতর লগে পরামিশ করছি না।
১৭ আর আমার আগর কুনু সাহাবির লগে মুলাকাত করার লাগি আমি জেরুজালেম টাউন খানোও গেছি না।
বরং আমি আরব দেশো গেছলামগি,
গিয়া ঘুরি-ফিরি হিরবার দামেস্ক টাউনো আইছি।
১৮ এর তিন বরছ বাদে সাহাবি পিতরর লগে মুলাকাত করার নিয়তে জেরুজালেম গেছলাম,
গিয়া তান অনো পনরো দিন আছলাম।
১৯ অউ সময় হজরত ইছার ভাই সাহাবি ইয়াকুব ছাড়া,
দুছরা কুনু সাহাবির লগে আমার দেখা অইছে না।
২০ এক আল্লা সাক্ষি আছইন,
আমি অউ যেতা লেখলাম,
এর একটা হরফও মিছা নায়।
মনো রাখবা,
অউ খুশ-খবরি তো কুনু মানষর গেছ থাকি পাইছি না,
খালি ইছা আল-মসীয়ে নিজে আমার গেছে জাইর করছইন।
২১ বাদে আমি সিরিয়া আর কিলিকিয়া দেশর বউত জাগাত গেছলাম।
২২ অউ সময় এহুদিয়া জিলার ইছায়ী জমাত অকলেও আমারে চিনতা না।
২৩ তারা খালি অউ খবর হুনছিলা,
“আগে যে বেটায় আমরার উপরে জুলুম করতো,
আর ইছার নামরে দুনিয়া থাকি তুড়িলিতো চাইছিল,
অখন হউ বেটায় আল-মসীর ইমানর খুশ-খবরি তবলিগ করের।”
২৪ আমি ইমান আনিয়া বদলি যাওয়ায়,
তারা আল্লার শুকুর-তারিফ করতা।