মুমিন অকলর স্বাধীনতা
৫
১ ও মুমিন অকল,
আল-মসীয়ে আমরারে স্বাধীন করছইন,
স্বাধীন হালতে রওয়ার লাগি।
এরদায় তুমরার স্বাধীনতারে ধরিয়া রাখো,
গুলামির লাগাম আর ফিন্দিও না।
২ হুনো,
আমি পাউলুছে তুমরারে কইরাম,
তুমরা যুদি অখনও মছলমানি কাম করাও,
তে আল-মসীর কুনু দামউ তো তুমরার গেছে নাই।
৩ আমি হকলর গেছে হিরবার অখান কইরাম,
যে জনরে মছলমানি করাইল অয়,
তার উপরে ফরজ অইযায় শরিয়তর তামাম হুকুম-আহকাম মানা।
৪ তুমরা যারা শরিয়ত আমল করিয়া দীনদার বনতায় চাইরায়,
তুমরা তো আল-মসীর গেছ থনে আলগ অইগেছো,
আল্লার রহমত থনে হরিগেছো।
৫ অইলে আমরারে দীনদার কইয়া কবুল করা অইবো,
ইমানে অউ নিচয়তা পাইয়া পাক রুহর বলে আমরা বার চাইরাম।
৬ ইছা আল-মসীর উম্মত বনিয়া হারলে মছলমানি কাম করাইলেও যেতা,
না করাইলেও অতা।
বরং মহব্বতর মাজদি যে ইমান জাইর অয়,
অউ ইমানউ অইলো আসল।
৭ তুমরা তো ভালা পথে চলাত আছলায়;
তে অউ হক পথে চলতে তুমরারে খেগিয়ে বাধা দিল?
৮ হুনো,
তুমরা অখন যে মতবাদ মানরায়,
যে আল্লায় তুমরারে পছন্দ করি আনছইন,
ই মতবাদ তো তান বাতাইল পথ নায়।
৯ জানো নি,
এক ফুটা চেনায় এক বালতি দুধরে বরবাদ করিলায়।
১০ তে তুমরার বেয়াপারে আমি মালিকর দরবারো অউ ভরসা করি,
তুমরা দুছরা কুনু মতবাদো যাইতায় নায়।
অইলে যেগিয়ে তুমরারে ছাতার,
হে যে-উ অয় না কেনে,
তার পাওনা সাজা হে পাইবো।
১১ ও ভাই অকল,
আমি যুদি অখনও অখান কই,
মানষে মছলমানি কাম করানি জরুর,
তে আমার উপরে কেনে অখনও জুলুম অর?
তে দুখ-কষ্টর সলিবর উপরে আল-মসীর মউতর কথা হুনলে যেতায় মুখ লুকাইন,
তারার মুখ লুকানি তো বন্দ অইগেলো অনে।
১২ এরদায় আমি চাইরাম,
তুমরার দিলো যেতায় গন্ডগোল লাগাইছইন,
অগুইন্তে তারার আস্তা নফছ কাটিয়া ফালাই দেউক।
গুনার গুলামি ছাড়ো, পাক রুহে খাটি অও
১৩ ও ভাই অকল,
আল্লায় তুমরারে পছন্দ করিয়া আনছইন আজাদ অওয়ার লাগি।
অইলে আজাদ বনিয়া তুমরার দিলর গুনার খাইশ পুরানিত লাগিও না,
বরং দিলর মহব্বতে একে-অইন্যর খেজমত করো।
১৪ কারন আস্তা শরিয়তরেউ একখানো করিয়া কওয়া অইছে,
“তুমার আরি-ফরিরে নিজর লাখান মায়া করিও।”
১৫ অইলে তুমরা যুদি একে-অইন্যে কাইজ্জা-ফসাদ আর রেশা-রেশি করো,
তে হুশিয়ার অইযাও!
ইতা করলে তো তুমরা একে-অইন্যরে বিনাশ করিলিবায়।
১৬ হুনো,
আমি তুমরারে কইরাম,
পাক রুহর বলে জিন্দেগি কাটাও,
তেউ দিলর অউ খাইশ মিটানির খিয়াল অইতো নায়।
১৭ অউ খাইশে যেতা কয়,
ইতা তো পাক রুহর বিপক্ষে,
আর পাক রুহে যেতা কইন ইতা বদ খাইশর বিপক্ষে।
বদ খাইশ আর পাক রুহ এরা একে-অইন্যর বিরুধি,
এরদায় নেক কামর নিয়ত করিয়াও তুমরা ইতা পুরা করো না।
১৮ আর তুমরা যুদি পাক রুহর বলে জিন্দেগি কাটাও,
তে তুমরা শরিয়তর গুলাম নায়।
১৯ দিলর বদ খাইশর কাম-কাজ তো খুলা-মেলাউ চিনা যায়,
ইতা অইলোগি জিনা,
নাপাকি,
বদমাইশি,
২০ দেবতা পুজা,
যাদু-টুনা,
দুশমনি,
কাইজ্জা-ফসাদ,
লোভ-লালছ,
গুছা,
নিজ-মতলবি,
অমিল,
দলাদলি,
২১ ইংসা,
মাতলামি,
হৈ-হুল্লা করি বজ্জাতি করা,
আর অউ নমুনার আরো বউত কাম।
তে আমি আগে যেলা হুশিয়ার করছলাম,
অখন হিরবার অউলা কইরাম,
দিলর অউ বদ খাইশর গুলামি যেরা করে,
আল্লার বাদশাইত তারার কুনু ঠাই নাই।
২২ অইলে পাক রুহে চলা জিন্দেগির ফল অইলো মহব্বত,
খুশি-বাসি,
শান্তি,
ছবর করা,
দয়ালু ভাব,
ভালা-মানষি করা,
হক-হালালি রওয়া,
২৩ নরম অওয়া আর নিজরে সামলাইয়া রাখা।
অউ নেক কামর বিরুধি কুনুজাত আইন নাই।
২৪ আর ইছা আল-মসীর আপন উম্মতে তো,
যারযির রিপুরে,
দিলর হকল বদ খাইশ সুদ্ধা ইছা আল-মসীর সলিবো কয়বর দিলাইছে।
২৫ অখন আমরা যুদি একিন করি পাক রুহর জরিয়ায় নয়া জিন্দেগি পাইছি,
তে আও,
আমরা পাক রুহর জিম্মায় জিন্দেগি কাটাই।
২৬ আমরা বেহুদা বড়াই-বেটাগিরি বাদ দেই,
একে-অইন্যরে ছাতানি আর ইংসা-ইংসি এক্কেরে ছাড়ি দেই।