একে-অইন্যর আছান করো
৬
১ ও ভাই অকল,
জমাতর কেউ যুদি আখতা কুনু গুনার ফান্দো পড়িযায়,
তে তুমরা যেরা পাক রুহে জিন্দেগি কাটাইরায়,
তুমরা তারে তুলিয়া আনিও।
আর খুব নরম দিলে ই কাম করিও,
নিজর বেয়াপারেও হুশিয়ার রইও,
যাতে নিজেও ফান্দো না পড়ো।
২ তুমরা একে-অইন্যর ভার বও,
তেউ আল-মসীর নিয়ম পুরাপুর মানা অইবো।
৩ কুন্তা না বনিয়াও যে মানষে নিজর বড়াই-বাহাদুরি দেখায়,
হে তো নিজেউ নিজরে টগায়।
৪ তে পরতেক মানষে যারযির আমল-খাইছলত পরিক্ষা করউক।
তেউ অইন্যর লগে নিজর তুলনা না করিয়া,
তার নিজর কামর লাগি বড়াই করতো পারবো।
৫ পরতেক জনেউ নিজর গাইট নিজে বও।
৬ হুনো,
যে জনরে আল্লার কালাম হিকাইল অয়,
হে তার উস্তাদর ভালাইর লাগি খেজমত করউক।
৭ ভাই অকল,
তুমরা বে-পথি বনিও না,
আল্লার লগে তো ঠাট্টা-মশকরা চলে না।
যেইন যেলা খেত করবায়,
এইন অলা ফসল পাইবায়।
৮ দিলর অউ বদ খাইশরে খুশ করার লাগি খেত করলে,
ই খেত থাকি গজব মিলবো।
অইলে পাক রুহরে খুশ রাখার লাগি খেত করলে,
ই পাক রুহ থাকি আখেরি জিন্দেগি মিলবো।
৯ নেক কাম করাত লাগিয়া আমরা যানু নিরাশ না অই।
হামেশা লাগিয়া রইলে ঠিক সময়ে এর ফসল পাইমু।
১০ সুযোগ পাইলেউ আমরা যানু হকল মানষর,
খাছ করি আল্লার পরিবারর মানষর আছান করি।
আখেরি নছিয়ত
১১ দেখরায় নি,
কত মোটা মোটা হরফে আমি নিজর আতে তুমরার গেছে লেখছি!
১২ যেগুইন্তে তারার নিজর ভালা-মানষি জাইর করতো চায়,
অতায় তুমরারে মছলমানি কাম করানির লাগি তাগিদ দের।
আল-মসীর সলিবর লাগি যাতে তারার উপরে কুনু জুলুম না অয়,
জুলুম থাকি বাচার লাগি তারা ইতা করের।
১৩ হুনো,
মছলমানি কাম যেতায় করাইছইন,
অতায়ও তো শরিয়তর বরখেলাফ করইন।
অইলে এরবাদেও তারা তুমরারে মছলমানি করাইতো চায়,
যাতে তারা বড়াই করিয়া কইতো পারে তুমরাও তারার দলো আছো।
১৪ অইলে আমি কইরাম,
খালি ইছা আল-মসীর সলিব ছাড়া দুছরা কুনু বেয়াপারেউ আমি বড়াই করি না।
অউ সলিবর মাজদিউ ই দুনিয়া আমার গেছে মরিগেছে,
আর আমিও দুনিয়ার চখুত মরিগেছি।
১৫ এরদায় মছলমানি কাম করাইলেও যেতা,
না করাইলেও অতা।
আল-মসীর জরিয়ায় হিরবার নয়া পয়দা অওয়াউ অইলো আসল বেয়াপার।
১৬ আর অউ ইমানে যেরা জিন্দেগি কাটায়,
মানি খাটি আল্লার বন্দারে, তাইন রহম আর শান্তি দান করউক্কা।
১৭ হেশ-মেশ কইরাম,
হজরত ইছার লাগি মাইর খাইয়া কত নমুনার জখম আমার নিজর শরিলো লইয়া চক্কর দিয়ার।
তে আমারে কেউ দুখ দিও না।
১৮ ভাই অকল,
আমরার মুনিব ইছা আল-মসীর রহমত তুমরার দিলো কাইম রউক।
আমিন॥