পবিত্র ইঞ্জিল শরিফ ১২ নম্বর ছিপারা
আল-কলোছিয়া
হজরত পাউলুছর ছালাম, শুকরিয়া আর মুনাজাত
১
১-২ আমি পাউলুছ,
আল্লা পাকর মর্জিয়ে হজরত ইছা আল-মসীর একজন সাহাবি।
কলোছি টাউনর মাজে আল-মসীর তরিকার পাক বন্দা আর মুমিন অকলর গেছে আমি আর ভাই তিমথিয়ে অউ ছহিফা খান লেখরাম।
আমরার গাইবি বাফ আল্লা পাকে তুমরার উপরে রহমত আর শান্তি নাজিল করউক্কা।
৩-৪ হজরত ইছা আল-মসীর উপরে তুমরার ইমান আর আল্লার পাক বন্দা অকলরে মায়া করার কথা আমরা হুনছি।
এরলাগি যেবলাউ তুমরার লাগি দোয়া করি,
অউ সময় আমরার মালিক ইছা আল-মসীর গাইবি বাফ আল্লা পাকর শুকরিয়া আদায় করি।
৫ তুমরা আগে যে খুশ-খবরি মানি আল্লার হক কালাম পাইছো,
অউ কালাম হুনিয়াউ তুমরার মনো এক আশা জন্মিছে।
অউ আশা থাকিউ তুমরার ইমান আর মায়া পয়দা অইছে।
আর তুমরা আশা কররায় যে ছামান পাইতায়,
ইতা তো বেহেস্তো রাখা আছে।
৬ ই খুশ-খবরি দুনিয়ার হকল বায় ছিতরিয়া ভালা ফলআলা অইয়া দিন দিন বাড়ের।
যে দিন থনে তুমরা অউ খুশ-খবরি আর আল্লার রহমতর বেয়াপারে পুরাপুর হুনছো,
অউ দিন থনেউ ইতায় তুমরার ভিতরেও পুরাপুর কাম করের।
৭ অউ খুশ-খবরির কথা তুমরা আমার লগর মায়ার ভাই আবু-ফারাছর গেছে হুনছো।
তাইন তুমরার তরফ থাকি আল-মসীর একজন হক খেজমতকারি।
৮ পাক রুহর বলে তুমরার দিলর মাজে যে মায়া পয়দা অইছে,
অউ বেয়াপারে আবু-ফারাছে আমরারে জানাইছইন।
৯ এরলাগি তুমরার বেয়াপারে হুনার বাদ থাকিউ আমরা হামেশা তুমরার লাগি দোয়া করি।
রুহানি ইলিম আর বুদ্ধি দিয়া তুমরা যানু আল্লার মুনশা পুরাপুর বুজতায় পারো।
১০ আমরা আল্লার দরবারো অউ দোয়াউ কররাম,
তুমরা যাতে হকল বেয়াপারে আল-মসীর মর্জি যুগাইয়া চলো আর তান উপযুক্ত উম্মতর লাখান জিন্দেগি কাটাও।
হক কাম করি করি ফলবান অও,
আর আল্লা পাকরে আরো ভালা করি চিনো।
১১ আল্লায় তান মহা কুদরতি বলে হকল নমুনার বল দিয়া তুমরারে বলবান করউক্কা।
বালা-মছিবতো পড়লেও খুশি-বাসি রইয়া ছবর করার তৌফিক দেউক্কা।
১২ আর হকল সময় বেহেস্তি বাফ আল্লা পাকর শুকরিয়া জানাও।
আল্লার পাক বন্দা অকলে নুরর বাদশাইত যে অধিকার পাইবা,
ইতার ভাগি অওয়ার লাগি তো তাইনউ তুমরারে উপযুক্ত বানাইছইন।
১৩ তাইনউ আমরারে আন্দাইরর বাদশাই থাকি উদ্ধার করিয়া,
তান খাছ মায়ার জনর বাদশাইত আনছইন।
১৪ অউ মায়ার জনর উপরে ইমান আনায় আমরা রেহাই পাইছি,
মানি গুনা থাকি মাফি পাইছি।
আল-মসীউ হক্কলতার পরধান
১৫ অউ মায়ার জনউ অইলা,
বাতুনি আল্লার জাহিরি ছুরত;
হক্কলতা পয়দা করার আগে তাইন আছলা,
আর পয়দা অওয়া হক্কলতার মাজে তাইনউ পরধান।
১৬ আছমান-জমিনর মাজে দেখা আর আ-দেখা যততা আছে,
ইতা বাদশাই অউক বা বাহাদুরি,
শাসন কিবা খেমতা অউক,
হক্কলতাউ তান আতর পয়দা।
ইতা তো খালি তান লাগিউ পয়দা করা অইছে।
১৭ হক্কলতার পয়লা তাইন আছলা আর তান মাজদিয়াউ হকলতা টিকিয়া আছে।
১৮ তাইনউ তান শরিলর মাথা,
মানি জমাতর মাথা।
তাইনউ হক্কলতার পয়লা,
আর তাইনউ পয়লা মুর্দা থাকি জিন্দা অইছইন,
যাতে হকল বেয়াপারে তাইনউ পরধান অইতা পারইন।
১৯ আল্লায় চাইলা,
তান আল্লাই গুনর হক্কলতা যানু আল-মসীর মাজে থাকে।
২০ আর দুনিয়াত বা বেহেস্তো যেনোউ অয় না কেনে,
অউ আল-মসীর মাজদিয়া যানু হক্কলতার লগে তান মিলন অয়।
তাইন চাইলা,
সলিবর উপরে আল-মসীর কুরবানির লউর বদলা শান্তি কাইমর মাজদি অউ মিলন অউক।
২১ তুমরা তো এক সময় আল্লার গেছ থাকি দুরই আছলায়,
আর তান বেয়াপারে তুমরার দিলো দুশমনি ভাব আছিল।
ইতা তুমরার বদ কামর মাজদি জাইর অইছে।
২২ অইলে আল-মসীর জান কুরবানির মাজদি আল্লায় তুমরারেও তান লগে মিলন ঘটাইছইন,
যাতে তুমরারে পাক-পবিত্র,
নিখুত আর নি-অপরাধি হালতে তান ছামনে আজির করতা পারইন।
২৩ তে আল-মসীর বেয়াপারে খুশ-খবরি থাকি যে নিচ্চিত আশা তুমরা পাইছো,
খালি অউ আশার উপরে ইমানে থির রইও,
ইন থাকি লড়িও না।
তুমরা তো জানো,
ই খুশ-খবরি হারা দুনিয়াত তবলিগ করা অইছে,
আমি পাউলুছও অউ খুশ-খবরি তবলিগর খাদিম অইছি।
জমাতর লাগি হজরত পাউলুছর কাম
২৪ তুমরার লাগি আমি দুখ-মছিবত সইয্য করায় খুব আনন্দ পাইরাম।
জানো তো,
আল-মসীর শরিল মানি জমাতর লাগি তান যে দুখ-মছিবত অখনও বাকি আছে,
ইতা অখন আমার শরিল দিয়া পুরা করিয়ার।
২৫ আল্লা পাকে তান পবিত্র কালাম তুমরার গেছে পুরাপুর তবলিগ করার ভার আমারে দিছইন,
গতিকেউ আমি জমাতর একজন খেজমতকারি অইছি।
২৬ আল্লার কালামর যে বাতুনি বেয়াপার আগর জমানার মানষর গেছে যুগ যুগ ধরি লুকাইল আছিল,
ইতা অখন তান পাক বন্দা অকলর গেছে জাইর করা অইছে।
২৭ আল্লায় চাইছইন,
ভিন জাতি অকলর গেছেও তান বাতুনি মুনশার গৌরব যে কিতা,
ইতা যেনু তান হকল বন্দা অকলে জানতা পারইন।
আসলে আল-মসী তুমরার দিলো আছইন,
গতিকে তুমরা গৌরব পাওয়ার আশা পাইছো।
২৮ আর অউ আল-মসীর বেয়াপারে আমরা তবলিগ করিয়ার,
আল্লার দেওয়া আখল-হেকমত দিয়া মানষরে হুশিয়ার করিয়ার আর তালিম দিয়ার যাতে আল-মসীর তরিকাত পুরাপুর কামিল হালতে তারারে আল্লার দরবারো আজির করতাম পারি।
২৯ অউ নিয়তে আল্লার যে কুদরতি বল আমার মাজে কাম করের,
অউ কুদরতি বলেউ আমি দিলে-জানে মেনত করিয়ার।