থিষলনিকি টাউনো হজরত পাউলুছর আগর ছফর
২
১ ভাই অকল,
তুমরা তো নিজেউ জানো,
তুমরার গেছে আমরার যাওয়া খান বেকামা গেছে না।
২ তুমরা এওখানও জানো,
এর আগে আমরা ফিলিপি টাউনো জুলুম-মছিবতো পড়ছলাম আর বেইজ্জত অইছলাম।
বাদে তুমরার অনোও বউত বাধা-নিষেধ কাটাইয়া আমরা আল্লাই সাওসে সাওসি অইয়া দিলে-জানে তান খুশ-খবরি খুলা-মেলা তবলিগ করছিলাম।
৩ আমরার দাওত তো কুনু ভুল তালিম থাকি নায়,
কুনু বদ নিয়তেও নায় বা কুনু টগা-টগির নিয়তেও নায়।
৪ খালি আল্লায় আমরারে যোইগ্য মনো করিয়া যেলা খুশ-খবরি তবলিগর দায়িত্ব দিছইন,
আমরা অলাউ তবলিগ কররাম।
কুনু মানষরে খুশ করার নিয়তে আমরা ইতা কইরাম না,
খালি যেইন আমরার দিলরে যাচাই করিয়া দেখইন,
হউ আল্লারে খুশ করার লাগিউ তবলিগ কররাম।
৫ তুমরা তো জানো,
আমরা কুনু সময়উ কেউরর গেছে তেল-মালিশ করিয়া কথা মাতছি না,
আর কুনু লোভ-লালছো পড়িয়া ধান্দাবাজির কামও করছি না,
এক আল্লাউ ইতার সাক্ষি।
৬ কুনু মানষর গেছ থাকি ইজ্জত পাইতে আশা করছি না,
তুমরার গেছ থাকিও না,
বা বাইরা মানষর গেছ থাকিও না।
৭ আমরা ইচ্ছা করলে তো আল-মসীর সাহাবি হিসাবে তুমরার উপরে দাবি খাটাইতাম পারলাম অনে।
অইলে এর বদলা,
মাʼয় যেলা নিজর হুরুতাইনরে যয়-যতন করইন,
তুমরার লগে থাকার সময় আমরাও অলা নরম বেবহার করছি।
৮ তুমরার লাগি খুব বেশি মায়া-মহব্বত অওয়ায়,
খালি আল্লাই খুশ-খবরি তবলিগ নায়,
আমরার নিজর জান দিতেও রাজি আছলাম।
জানো তো,
তুমরা অইলায় আমরার খুব মায়ার মানুষ।
৯ ভাইয়াইনরে,
আসলে তো আমরার মেনত আর আটনি-খাটনির কথা,
নিচ্চয় তুমরার মনো আছে।
আল্লাই খুশ-খবরি তবলিগর ফাকে ফাকে আমরা দিনে-রাইতে রুজি-রুজগার করছি,
যাতে আমরার খরচা-পাতি তুমরা কেউরর লাগি বোঝা না অয়।
১০ আর তুমরা যেরা ইমান আনছো,
তুমরার লগে তো আমরার আচার-বেবহার আছিল পবিত্র,
হক আর নিখুত।
তুমরাউ ইতার সাক্ষি,
আর আল্লা পাকও সাক্ষি আছইন।
১১ তুমরা তো জানো,
বাফে যেলা নিজর পরতেক আওলাদরে উত্সাহ,
সান্তনা আর মজবুত পরামিশ দেইন,
আমরাও তুমরা হকলরে অউলা পরামিশ দিতাম,
১২ যাতে আল্লার বন্দা হিসাবে তুমরা উপযুক্ত অইয়া চলো।
আল্লায় তুমরারে দাওত দিরা,
তান নিজর বাদশাই আর গৌরবর ভাগি অওয়ার লাগি।
১৩ মনো রাখিও,
আমরা হামেশা আল্লার শুকরিয়া আদায় কররাম,
কারন আমরার গেছ থাকি আল্লার কালাম হুনিয়া তুমরা যেবলা ইমান আনছিলায়,
হউ সময় কুনু মানষর মুখর কথা নায়,
বরং আল্লার কালাম হিসাবেউ তুমরা ইতা কবুল করছিলায়,
আর হাছাউ ইতা আল্লার কালাম।
তুমরা যেরা ইমান আনছো,
হউ কালামেউ তুমরার দিলো কাম করের।
১৪ ভাই অকল,
হজরত ইছার তরিকায় চলরা আল্লার যতো জমাত অকল এহুদিয়া জিলাত আছে,
তুমরার হাল-হকিকত তো তারার লাখানউ।
কারন তারা যেলা নিজর ইহুদি জাতির আতো দুখ-মছিবত পাইছইন,
তুমরাও অউলা নিজর জাতির মানষর গেছ থাকি দুখ-মছিবত পাইছো।
১৫ মনো রাখিও,
ইহুদি অকলে হজরত ইছা আর নবী অকলরে কাতল করছিল,
তারা আমরার উপরেও জুলুম করছে।
তে আল্লা পাক তারার উপরে খুশি নায়,
হকল মানষর লগেও তারার দুশমনি ভাব আছে।
১৬ তারা আমরারে নিষেধ দিরা,
যাতে ভিন-ধর্মী মানষর গেছে আমরা আল্লাই নাজাতর খুশ-খবরি তবলিগ না করি।
অউ লাখান তারা যারযির গুনার বোঝা বড় কররা।
এরলাগি তারার উপরে আল্লার খাড়া গজব লামছে।
থিষলনিকির মুমিনরে হিরবার দেখার খিয়াল
১৭ ও ভাই অকল,
মনর দিক থাকি না অইলেও,
শরিলর দিক থাকি তো আমরা থুড়া দিনর লাগি,
তুমরার গেছ থাকি হরাইল আছি।
এরলাগি আমরার খুব খিয়াল আছে,
যাতে তুমরার মুখ খান হিরবার দেখতাম পারি।
১৮ আমরা হকলউ,
খাছ করি আমি পাউলুছে বার বার চেষ্টা করছি তুমরার গেছে আইতাম।
অইলে শয়তানে আমরারে আটকাইলিছে।
১৯ হাছাউ আমরার মালিক ইছায় যেবলা তশরিফ আনবা,
অউ সময় তান ছামনে আমরার আশা,
আনন্দ আর গৌরবর জয়র মালা হিসাবে কিতা পাইমু?
ইতা তো তুমরাউ নায় নি?
২০ আসলে তুমরাউ আমরার গৌরব,
তুমরাউ আমরার আনন্দ।