পবিত্র ইঞ্জিল শরিফ ১৫ নম্বর ছিপারা
পয়লা তিমথি
১
১ আমি পাউলুছ তো আমরার তরানেআলা আল্লা পাক আর আমরার আশা-ভরসা হজরত ইছা আল-মসীর হুকুমে তান সাহাবি অইছি।
২ মুমিন হিসাবে আমার খাছ আওলাদ,
তিমথির গেছে লেখরাম।
গাইবি বাফ আল্লা পাকে আর আমরার মালিক ইছা আল-মসীয়ে তুমারে রহমত,
মেহেরবানি আর শান্তি দান করউক্কা।
ভন্ড মোল্লাইন্তর বেয়াপারে হুশিয়ারি
৩ ও তিমথি,
আমি মাকিদনিয়া দেশো যাওয়ার বালা তুমারে কইছলাম,
অখন হিরবার মিনতি করি কইরাম,
হুনো,
তুমি ইফিছ টাউনোউ রও,
রইয়া অনর অলা কিছু মোল্লাইন্তরে হুকুম দেও,
তারা যানু মানষরে আর ভুল তালিম না দেয়।
৪ তারারে কইও,
তারা যাতে বানোয়াট কিচ্ছা আর লাম্বা লাম্বা খান্দানর লিষ্টর বায় খিয়ালি না অইন।
ইতায় তো নানান নমুনার দলাদলির জনম দেয়,
আল্লার কামর কুনু ফায়দা অয় না,
আল্লাই ফায়দা মিলে খালি ইমানর মাজদি।
৫ বরং সঠিক তালিমর ফল অইলো,
মায়া-মহব্বত,
ইতা তো খাটি দিল,
পরিস্কার বিবেক আর হাছারর ইমান থাকি পয়দা অয়।
৬ অইলে কিছু মানষে ইতা বাদ দিয়া বানোয়াট মাত-কথার বায় মন দিলাইছে।
৭ তারা যুদিও নিজেউ নিজর মাতর মানি বুজে না,
আর যে বেয়াপার লইয়া বড় গলায় মাতের,
ই বেয়াপারেও ভালামন্তে জানে না,
তেবউ তারা মুছা নবীর বাতাইল শরিয়তর উস্তাদ অইতো চায়।
৮ আমরা জানি,
শরিয়ত ভালা জিনিস,
কেউ যুদি ঠিক মতো ইতা কামো লাগায়।
৯ আমরা তো জানি,
ই শরিয়ত কুনু পরেজগার মানষর লাগি দেওয়া অইছে না।
ইখান দেওয়া অইছে,
যেতায় আল্লার আইন মানইন না,
আল্লারে ডরাইন না,
নাফরমানি করইন,
গুনাগার,
খুনি,
নাপাক আর বে-দীন,
মা-বাফর খুনি,
১০-১১ জিনাকুর,
সমকামি,
বান্দি-গুলামর কারবারি,
মিছা মাতরা,
মিছা সাক্ষি দেওরা,
এক কথায় গুনগানে ধনি আল্লা পাকর মহান খুশ-খবরির তালিমর বিরুধি যেতা মানুষ,
অতার লাগিউ ই শরিয়ত দেওয়া অইছে।
আর অউ মহান খুশ-খবরি তবলিগর ভার তাইন আমারে দান করছইন।
মেহেরবানির লাগি শুকরিয়া
১২ হজরত ইছা আল-মসী,
যেইন আমরার মালিক,
তাইন আমারে বল যুগাইছইন,
আমারে হক-হালাল মনো করিয়া তান কামো বওয়াল করছইন,
এরলাগি আমি তান দরবারো শুকরিয়া জানাইরাম।
১৩ যুদিও আমি আগে আল-মসীর বদনাম গাইতাম,
তান মানষর উপরে জুলুম করতাম,
বদ-মিজাজ দেখাইতাম।
তা-ও তাইন আমারে রহমত দান করছইন,
কারন হউ সময় আমি ইমান আনছিলাম না।
১৪ আমরার মুনিবে আমারে কতো বড় মেহেরবানি করছইন,
ইছা আল-মসীর তরিকা কবুল করলে যে ইমান আর মহব্বত পয়দা অয়,
ইতা তো আমারে পুরাপুর দান করছইন।
১৫ আসলে ই কথা তো হক-খাটি আর ষোলআনা মানার লাখ,
গুনাগার অকলর জান বাচানির লাগিউ ইছা আল-মসীয়ে ই দুনিয়াত তশরিফ আনছিলা।
অউ গুনাগারর মাজে আমিউ পরধান।
১৬ অতার লাগিউ আল্লায় আমারে দয়া করছইন,
যাতে আমার মতো পরধান গুনাগারর মাজদি ইছা আল-মসীয়ে তান সীমা ছাড়া ছবরগারি দেখাইতা পারইন,
আর তান উপরে ইমান আনায় যেরা আখেরি জিন্দেগি পাইবা,
তারা যানু আমারে দেখিয়া আল্লাই পথ বুজইন।
১৭ যেইন চিরকালিন বাদশা,
যেইন নিরাকার,
একমাত্র আল্লা,
যান কুনু ক্ষয় নাই,
তান ইজ্জত আর গৌরব হর-হামেশা জারি রউক।
আমিন।
১৮ ও মায়ার পুত তিমথি,
তুমার বেয়াপারে আগে যেতা বাতুনি মাত মাতা অইছিল,
অউ মাফিক আমি তুমারে মিনত করি কইরাম,
তুমি ইতা মনো রাখিয়া আল-মসীর লাগি দিলে-জানে লাড়াই করাত রও।
১৯ এরলগে নিজর ইমান আর পরিস্কার বিবেকরে বাচাইও।
কুনু কুনু মানষে বিবেকর বুলি না মানিয়া,
নিজর ইমানরে নষ্ট করিলিছে।
২০ ই দলো আছইন,
হুমিনাছ আর ছিকন্দর।
এরলাগি আমি ইতারে ইবলিছর আতো সপি দিছি,
যাতে তারা বুজতা পারইন,
কুফুরি মাত মাতা ঠিক নায়।