ভন্ড উস্তাদ
২
১ মনো রাখিও,
বনি ইছরাইলর মাজে যেলা ভন্ড নবী অকল আছলা,
তুমরার মাজেও অউলা ভন্ড উস্তাদ অকল থাকবা।
তারা লুকাই-লুকাই অমন ভুল তালিম দিবো,
যে তালিমে মানষরে বিনাশ করে আর যে মালিকে তারারে আজাদ করার লাগি খরিদ করছইন,
অউ মালিকরে পর্যন্ত তারা অস্বীকার করব।
অলাখান খুব জলদি তারা নিজর উপরে বিনাশ ডাকিয়া আনবো।
২ তারার দেখা-দেখি বউত মানুষ খবিছি পথে যাইবো,
তারার লাগিউ ইছায়ী হক তরিকার বদনাম অইবো।
৩ লোভ-লালছ করিয়া ছল-চতুরির মাত মাতিয়া,
নিজর লাভর আশায় তারা তুমরারে কামো লাগাইব।
তারার পাওনা সাজা তো বউত দিন থাকি বার চার,
তারার বিনাশও বেশি দেরি নায়।
৪ এমনকি আগর ফিরিস্তা অকলে যেবলা গুনা করছলা,
অউ সময় আল্লায় তারারে রেহাই দিছইন না,
বরং দোজখর আন্দাইরর গাতো ফালাইয়া তারার বিচার করার লাগি রাখছইন।
৫ আর তাইন হউ আগর দুনিয়ারেও রেহাই দিছইন না,
বরং অউ বে-দীন অকলরে বইন্যার পানিদি মারছইন।
অইলে নুহ নবী আর অইন্য সাত জনরে তাইন বাচাইছইন।
কারন নুহ নবীয়ে পরেজগারির কথা তবলিগ করতা।
৬ আর আল্লায় ছাদুম আর আমুরা টাউনরে আগুইন দিয়া জালাইয়া ছালি করিয়া,
অনর মানষরে সাজা দিছলা।
অউ নমুনায় তাইন দেখাইছলা,
বে-দীন অকলর দশা কিলাখান অয়।
৭ তা-ও লুত নবীরে তাইন বাচাইছইন।
এইন তো পরেজগার মানুষ আছলা,
হিনর নাফরমান অকলর বেসামাল ভাব দেখিয়া তাইন খুব কষ্ট পাইতা।
৮ দিন দিন তারার আকাম-কুকাম আর কথাবার্তা হুনতা।
শরিয়তর বিপক্ষে তারার নাফরমানি দেখিয়া,
অউ পরেজগার জনর মনো খুব দুখ লাগতো।
৯-১০ অতা থাকি দেখা যার,
আল্লায় তো পরেজগার মানষরে পরিক্ষার মাজ থাকিও বাচাইতা পারইন।
অইলে যেরা বে-দীনি কাম করে,
খাছ করি যেরা খবিছি করে,
কুনু শাসন মানে না,
তারারে সাজা দেওয়াটা কিয়ামত পর্যন্ত রাখতাও পারইন।
ই ভন্ড উস্তাদ অকল খুব বদ-সাওসি।
তারা নিজর ইচ্ছামতো চলে আর বাতুনি সর্দার অকলর বদনাম গাইতে ডরায় না।
১১ ফিরিস্তা অকল শক্তি আর খেমতায় এরা থাকি বউত বড় অইলেও,
অউ বাতুনি সর্দারর বিপক্ষে মাবুদর দরবারো বদনাম গাইয়া কুনু নালিশ দেইন না।
১২ বেআখল জংলি জানুয়ার অকলে না বুজিয়া যেলা নিজর খুশিয়ে চলে আর ধরা খাইয়া মরে,
অউ ভন্ড উস্তাদ অকলও অতার লাখান।
তারা যেতা বুজে না,
অতারও বদনাম গায়।
এরলাগি অউ জংলি জানুয়ারর লাখান তারার বিনাশ আছে,
১৩ খারাপির বদলা বাবত তারার লাগিও খারাপি আছে।
দিনর বেলায়ও মউজ-ফুর্তি করিয়া মদ খাইতে তারার ভালা লাগে।
তারা তো তুমরার খানির থালর থু আর গু।
তারা যেবলা তুমরার লগে বইয়া মেজবানি খায়,
অউ সময় তারা ভন্ডামি করতে খুব আরাম পায়।
১৪ তারার চউখ জিনায় ভরা,
গুনার কাম কুনু সময় বন্দ করে না।
অস্থির মানষরে বে-পথে টানিয়া নেয়।
তারার মন লোভ-লালছর উস্তাদ।
ইগুইন তো লান্নতি!
১৫ তারা বালাম বিন বাউরর লাখান ছহি পথ ছাড়িয়া বে-পথে গেছেগি।
অউ ভন্ড পীর বালাম তো হারাম কামাই-রুজগারর পাগল আছিল,
১৬ অইলে অলা বদ কামর লাগি হে বোবা গাধার ধমক খাইছে।
অউ গাধায় মানুষ বুলিয়ে মাতিয়া তার পাগলামিত বাধা দিছে।
১৭ ইতা মানুষ তো পানির হুকনা কুয়ার লাখান আর বাতাসর কুড়ুল্লার লাখান।
তারার লাগি গইন আন্দাইর জমা রাখা আছে।
১৮ তারা বড় বড় বেকামা মাত মাতে।
আর যেরা থুড়া আগে কু-পথ ছাড়িয়া জান বাচানির লাগি বাগিছইন,
অতা মানষরে শরিলর খাইশে চলিয়া বদমাইশি করার ইন্ধন দেয়।
১৯ হউ ভন্ড উস্তাদ অকলে কছম খাইয়া কয় মানষরে আজাদ করতো,
অইলে তারা নিজেউ নফরতি কামর গুলাম।
জানো তো,
কেউ যুদি কুন্তার গেছে আরিযায়,
তে হে ইতার গুলাম।
২০ তে আমরার মালিক আর তরানেআলা ইছা আল-মসীরে চিনিয়া হারি জগতর খারাপি থাকি হরিয়া আইয়াও,
কেউ যুদি হিরবার গিয়া অউ খারাপির জালো আটকায়,
তে তারার পয়লা দশা থাকি হেশ দশা আরো মন্দ।
২১ পরেজগারির পথ চিনার বাদেও তারার গেছে সমজাইল অউ পবিত্র হুকুমর উল্টা গেছে,
এর থাকি আরো ভালা আছিল ই পথ না চিনা।
২২ তারার বেয়াপারে অউ ছিল্লেখউ সঠিক,
“কুকরে নিজর বমি ফিরিয়া খায়,”
আর “শুয়ররে নাওয়াইলেও ফেকো পড়িয়া গড়িয়ায়।”