আল-মার্কুছ ছিপারার মুল তালিম অইলো,

হজরত ইছা আল-মসীর কামর খেমতা।

আল্লা পাকে তানরে খেমতা দিছইন,

ইবলিছ-শয়তানর হকল লাখান খেমতা আর বল-শক্তির উপরে।

তান খেমতা আছিল বেমারি অকলর বেমার ভালা করা,

জিন-ভুত খেদানি,

প্রকৃতি মানি হাওয়া-বাতাস আর পয়দা করা হকলতার উপরে,

আর হায়াত-মউতর উপরেও।

আল্লায় তানরে অউ খেমতাও দিছইন,

যেরা তৌবা করিয়া তান উপরে ইমান আনে,

তাইন এরার গুনা মাফ করতা পারইন।

আল-মার্কুছ ছিপারার ১০ রুকু ৪৫ আয়াতো হজরত ইছায় কইরা,

“মনো রাখিও,

আমি বিন-আদম খেজমত পাওয়াত আইছি না,

আইছি তো খেজমত করাত।

আর বউত মানষর জান বাচানির লাগি নিজর জান বিলাই দেওয়াত আইছি।”

আল্লা পাকর হুকুমে অউ ছিপারা লেখছইন,

হজরত ইছা আল-মসীর সাহাবি হজরত পিতরর (রাঃ) খাদিম হজরত মার্কুছ (রঃ)।

ইতিহাস থাকি জানা মতে,

হজরত মার্কুছে আল্লার হুকুম পাইয়া তান উস্তাদ হজরত পিতরর মুখ থাকি বয়ানি হুনিয়া অউ ছিপারা লেখছইন।

হজরত ইছায় বেহেস্তো তশরিফ নেওয়ার অনুমান ২০-৩০ বছরর মাজে ইখান কিতাব আকারে লেখা অইছে।