৫
১ ভাইয়াইনরে,
কুন জমানাত কুন সময় কিতা ঘটিবো,
ইতা তুমরার গেছে লেখার জরুর নাই।
২ তুমরা নিজেউ তো ভালা করি জানো,
রাইতকুর বালা যেলা আখতাউ চুর আয়,
মালিক ইছা আইবার দিনও ঠিক অলাউ আইবো।
৩ ই জগতর মানষে যেবলা কইবা,
“হকলতা শান্তি অইগেছে,
কুনু ডর-ভয় নাই,”
অউ সময়,
বেটিন্তর হুরুতা অওয়ার বেদনা যেলা আখতাউ ধরে,
অউলা অতা মানষর সর্বনাশ আখতাউ অইবো।
তারা কুনুমন্তেউ রেহাই পাইতো নায়।
৪ ভাই অকল,
তুমরা কুনু আন্দারির মাজে বসত কররায় নি যেন,
হউ দিন আখতাউ চুরর লাখান তুমরার উপরে আইতো?
৫ তুমরা হকলউ তো আল্লার নুরর আর দিনর ফরর মানুষ।
আমরা তো আন্দারির বা রাইতর বালার মানুষ নায়।
৬ এরলাগি আও,
অইন্য মানষর লাখান আমরা না ঘুমাইয়া বরং হজাগ রই আর নিজরে সামলাইয়া রাখি।
৭ জানো তো,
যেরা ঘুমায়,
তারা রাইতর বালায়উ ঘুমায় আর যেরা মদখুর,
রাইত অইলে তারা মদ খাইয়া টাল অয়।
৮ অইলে আমরা তো দিনর ফরর মানুষ,
এরলাগি নিজরে সামলাইয়া রাখি।
আমরার বুক বাচানির লাগি ইমান আর মহব্বত দিয়া বুক গুরি,
আর মাথারে বাচানির লাগি আল্লাই নাজাতর আশারে সিপাইর কেপর লাখান মাথাত লাগাই।
৯ মনো রাখিও,
আল্লায় আমরারে সাজা দিবার লাগি ডাকিয়া আনছইন না,
বরং আমরার মালিক ইছা আল-মসীর উছিলায় নাজাত পাওয়ার লাগিউ ডাকিছইন।
১০ আর আল-মসীর মউত অইছে তো আমরার লাগিউ,
যাতে আমরা বাচি বা মরি,
তান লগেউ হামেশা জিন্দা রই।
১১ এরলাগিউ তুমরা অখন যেলা কররায়,
হামেশা অলা একে-অইন্যরে সাওস দেও আর গড়িয়া তুলো।
কুড়িয়ামি বাদ দিয়া নেক কাম করো
১২ তে ভাইয়াইন,
আমরা মিনত করিয়া কইয়ার,
তুমরার লাগি যেরা আটনি-খাটনি খাটইন,
মালিকর অইয়া তুমরারে চালাইন আর নছিয়ত করইন,
তুমরা এরারে ইজ্জত করিও।
১৩ তারা যেলা খেজমত কররা,
অতার বায় চাইয়া দিলর মহব্বতে তারারে খাছ ইজ্জত দিও।
আর তুমরা একে-অইন্যে মিলি-মিশি রইও।
১৪ ও ভাই অকল,
তুমরারে অউ নছিয়ত খান করিয়ার,
যেতা মানুষ কুড়িয়া,
তুমরা ইতারে হুশিয়ার করি দেও,
ডরালোক জনরে সাওস দেও,
কমজুর অকলরে সাইয্য করো,
আর ধৈর্য ধরিয়া হক্কলরে সইয্য করো।
১৫ খিয়াল রাখিও,
অইন্যায়র বদলা কেউ যানু অইন্যায় না করে।
তুমরা হামেশা একে-অইন্যর,
আর হকলরউ ভালাই করার চেষ্টা করিও।
১৬ হকল সময় খুশি-বাসি করাত রইও,
১৭ হামেশা দোয়া-মুনাজাত করিও
১৮ আর হকল হালতো আল্লার শুকরিয়া আদায় করিও।
কারন আল্লা পাকর খিয়াল অইলো,
হজরত ইছা আল-মসীর লগে ইমানে তুমরা অলাখান চলো।
১৯ পাক রুহরে দিলর ভিতর থাকি নিভাইও না।
২০ আর যেরা আল্লার অলি হিসাবে বাতুনি কইন,
তারার কথারে এলামি করিও না,
২১ বরং হকলতা যাচাই করি দেখিয়া,
ভালাখান ভিতরে হারাইও।
২২ আর হকল নমুনার নাফরমানি থাকি হরিয়া রইও।
২৩ শান্তি দেওরা আল্লায় নিজে তুমরারে পুরাপুর পাক-পবিত্র করউক্কা,
আমরার মালিক ইছা আল-মসীয়ে তশরিফ আনার কালো তুমরার আস্তা শরিল,
রুহ আর দিলরে পুরাপুর নিখুত রাখউক্কা।
২৪ আর তাইন নিচ্চিত অলাউ করবা।
জানো তো,
যেইন তুমরারে দাওত করি আনছইন,
তান উপরে পুরাপুর ভরসা করা যায়।
২৫ ও ভাইয়াইন,
আমরার লাগি দোয়া করিও।
২৬ তুমরা একে-অইন্যে পবিত্র গলাগলি করিও।
২৭ আমরার মালিকর নামে আমি তুমরারে অউ হুকুম দিয়ার,
অউ চিঠি খান পড়িয়া যানু হকল ভাইয়াইন্তরে হুনাইল অয়।
২৮ আমরার মালিক ইছা আল-মসীর রহমত তুমরার লগে রউক।
আমিন॥