জমাতর নানান মানষর দায়িত্ব
২
১ তীতাছ হুনো,
তুমি মানষরে অলাখান তালিম দেও,
যাতে তুমার মাতর মাজে নিখুত হক তালিম থাকে।
২ জমাতর মুরব্বি বেটাইনরে কও,
তারা যানু হামেশা নিজরে সামলাইয়া রাখইন,
ইজ্জতি বনইন,
ভালা বিচার-বিবেক খাটাইন।
তারার যানু খাটি ইমান,
মায়া-মহব্বত আর ছবর থাকে।
৩ অলাখান মুরব্বি বেটিন্তরেও কও,
তারা যানু পরেজগারির আদব-কায়দা মানিয়া চলইন আর নেকির ভাব হিকাইন।
অইন্যর বদনাম গাওয়া,
বা নিশাখুর বনা তারার লাগি ঠিক নায়।
৪ তেউ তারা জুয়ান পুড়িন্তরে হিকাইতা পারবা,
যাতে তারার জামাই আর পুয়া-পুড়িনরে মহব্বত করইন,
৫ নিজরে সামলাইয়া রাখইন,
সতী রইন,
ভালা সংসারি অইন,
দয়ালু অইন,
আর জামাইর বাইধ্য থাকইন।
তেউ আল্লার কালামর বদনাম করার সুযোগ কেউ পাইতো নায়।
৬ অলাখান জুয়ান পুয়াইন্তরেও উপদেশ দেও,
যাতে তারা নিজরে সামলাইয়া রাখইন।
৭ তুমি তারার গেছে হকল নমুনার নেক কামর নিশানা অও।
হক নিয়তে আর দায়-দায়িত্ব লইয়া তালিম দেও।
৮ কেউ যানু তুমার জবানর কুনু দুষ না পায়।
তুমার অউলা চাল-চলন দেখিয়া দুশমন অকল শরমিন্দা অইবা আর আমরার বদনাম করার কুনু খুত পাইতা নায়।
৯ তুমি চাকর অকলরে কও,
তারা যানু হক্কল বেয়াপারে মুনিবর বাইধ্য রইন,
মুনিবর মন যুগাইয়া চলইন,
তারার মুখর উপরে বেয়াদবি মাত না মাতইন।
১০ মুনিবর মাল-ছামানা চুরি না করইন,
বরং নিজর হক-হালালির পরমান দেখাইয়া হারি,
আমরার তরানেআলা আল্লার বেয়াপারে যে তালিম আছে,
অউ তালিমরে হক্কল নমুনায় সুন্দর করি হাজাইন।
১১ জানো তো,
আল্লার যে রহমতর উছিলায় হকলর নাজাত মিলে,
ইতা অখন দুনিয়াত জাইর অইগেছে।
১২ অউ রহমতেউ আমরারে তালিম দিরা,
যাতে আমরা বে-দীনি কাম-কাজ থাকি আর দুনিয়ার হকল বদ খাইশ থাকি দুরই রইয়া,
ই জগতো নিজরে সামলাইয়া রাখি,
আর নেক পথে রইয়া পরেজগার জিন্দেগি কাটাই।
১৩ এরলগে আমরার দিলর পরম আশা পুরনর লাগি বার চাই,
আল্লাতালা আর তরানেআলা ইছা আল-মসীর শান-মহিমা জাইর অওয়ার খুশি-বাসি পুরনর লাগি বার চাই।
১৪ ইছা আল-মসীয়ে তো আমরারে বাচানির লাগি তান নিজর জান কুরবানি দিলাইছইন,
যাতে হকল গুনা থাকি আমরারে খালাছ করি আনতা পারইন,
আর অউ লাখান একদল মানষরে পাক-পবিত্র করইন,
যেরা খালি তান নিজর অইবা,
যেরা নেক কামর আশিক অইবা।
১৫ তুমি পুরাপুর বল খাটাইয়া অতা বেয়াপারে তালিম দেও,
মানষরে নছিয়ত করো আর তারার দুষ-কছুরি দেখাইয়া দেও।
তুমারে হেয় করার সুযোগ কেউররে দিও না।