2. Allae manush foeda ḳorla
Hozrot Musa (a:) e leḳsoin:
(Tourat shorif, Foeda Nama 1:26-28)
26 Erbade Allae formaila, ao amrar surote amrar loge mil rakia manush banai. Tara doriar mas, asmanor faki, zanuar, maṭir maze buke solra zandar, ar asta duniair ufre bashshai ḳorouk.
27 Tain tan nizor surote manush foeda ḳorla, ekkere nizor moto ḳori foeda ḳorla, foeda ḳorla beṭa ar beṭi. 28 Ar tarare boroḳot nazil ḳoria ḳoila, tumitain folala oia baṛia duniai bori zao. Duniaire shashon ḳoro, ar doriar mas, asmanor faki, maṭir ufre solra hoḳol zandaror ufre bashshai ḳoro.
(Tourat shorif, Foeda Nama 2:4-25)
4 Ou oilo asman ar zomin foedar boean. Mabud Allae zebla asman ar zomin foeda ḳorsila, 5 i shomoe zominor ufre kunu zator gas-fala asil na ar kunu lota-fatao folise na, ḳaron tain zominor ufre meg disoin na, ar zomin abad ḳorar manusho asil na. 6 Ou shomoe maṭir mur taki fani uṭto ar zomin bizto. 7 Bade Mabud Allae feḳ maṭi dia manush banaia tar naḳor maze fu dia zan haraila. Ar ou manush zandar oilo. 8 Mabud Allae fubedi Adono eḳṭa bagan ḳorsila, hono tanor banail ou manushre raḳla. 9 Hikanor maṭit tain oulaḳan gas oḳol folaisla, zeta deḳte kub shundor ar folo ḳaite kub moza. Ar baganor mazḳano tain ‘zindegi-gas’ ar ‘neki-bodir aḳol deora gas’ namor duiṭa gaso raḳsila.
10 Hou bagano fani zugaia dito eḳ gang asil, zeḳṭa Adonor mazedi baroia sair bag oigesil. 11 Foela gangor nam asil Fishun, ikṭa asta Hobila deshor bitre dia gese. Ino shuna faoa zae, 12 ar ou deshor shuna kub ḳaṭi, ita saṛao hino meshḳe-ambor ar akik moni faoa zae. 13 Dui nombor gangor nam Zihun, ikṭa asta Kush deshor bitre dia gese. 14 Tin nombor gangor nam Dozla, ikṭa Ashiria deshor fube dia gese. Ar sair nombor gangor nam oilo Furat.
15 Bade Mabud Allae ou manushre Adon bagano raḳla, hino ḳet-ḳamar ar hefazot korar lagi. 16 Tain Adomre hukum dila, “Tumi tumar kushimoto i bagisar zekunu gasor fol ḳaitae farbae, 17 ḳali neki-bodir aḳolor gasor fol ḳaio na, zedin tumi ou gasor fol ḳaibae idin tumi morbae-u morbae.”
18 Erbade Mabud Allae ḳoila, “Manshor lagi eḳla taḳa bala nae. Ami tar laḳ eḳzon zuṛi banaimu.” 19 Ar Mabud Allae duniair hoḳol zandar ar asmanor hoḳol faki maṭidi banaia ou manshor samne anla, deḳla ein itare kita ḳoia ḍaḳoin, ar tain zare ze name ḍaḳla, tar ou nam oilo. 20 Adome hoḳol fala heman, asmanor faki, ar zongli zanuaror nam raḳla, itar maze tan lak kunu zuṛi millo na. 21 Erbade tain Adomor maze behushi gum anla. Ou gumor maze tan fainjoror eḳṭa aḍḍi kulia nia zagaṭa bond ḳori dila, 22 ar ou aḍḍi dia Mabud Allae eḳ beṭimanush banaia Adomor gese anla. 23 Tane dekia Adome ḳoila, “Oḳon oise, tai amar aḍḍir aḍḍi, gustor gust. Tair nam oibo nari, taire nor taki neoa.” 24 Erlagi beṭainte ma-bafore saṛia bour loge taḳba, tara duiozon eḳ shoril oiba. 25 Adom ar tan bibir shoril udam taḳto, ita kunu shorom asil na.
1. Ou boyanor maze kita-kiti fosond or?
2. Buzar lagi kita-kiti ḳoṭin mono or?
3. Ou boyan manshor befare amrare kita-kiti hikae?
4. Ou boyan Alla pakor befare amrare kita hikae?
5. Ou boyan ki laḳan manar lagi Allae sain?