1 Bade Mabude Abramre formaila, “Tumi tumar nizor desh, ḳesh-kuṭum, ar babaiti biṭa-maṭi saṛia ami ze desh deḳaimu hou desho zao. 2 Tumar maz taki ami bout boṛo eḳ zati foeda ḳormu. Tumare rohom-boroḳot dimu. Ami tumare boṛo izzoti banaimu, ar tumar usillae asta duniar manshe rohom-boroḳot faiba. 3 Ar huno, tumare zara dua diba, ami tarare rohom-boroḳot dimu, oile zara tumare boddua diba, tarare ami lannot dimu. Duniair hoḳol zatie tumar usillae rohom-boroḳot faiba.”

4 Mabudor hukum moto-u Abram baroigela, tan batiza Luto tan loge gela. Haran ṭaun falaia zaoar shomoe Abramor boeosh asil fosottir boros. 5 Tan bibi Sara ar batiza Lutre loia tain baroila. Hoḳol mal-samana loia ar ze gulam oḳolre tain-tain Haran elaḳat faisla tarare loia Kenan desho zaoar lagi roana dila. Heshe hono gia fousla. 6 Kenanor mazedi zaite zaite Abram Shikimo aia Murir elon gasor gese ziraila. I shomoe Kenani oḳol hou desho boshot korta. 7 Mabude Abramre dorshon dia ḳoila, i deshḳan ami tumar oarishre dilaimu. Abramre zein deḳa dila, hou Mabudor name tain hono ek kurbani ḳana banaila. 8 Hon taki tain Betel ṭaunor fubedi faṛi elaḳat aguai gela, gia foisme Betel fube oe ṭaunor mazḳano tain tambu gaṛila. Mabudor name tain ino ek kurbani ḳana banaila ar Mabudor nam loila.

1 I goṭona oḳlor bade ohir maze Mabudor ḳalam Abramor gese nazil oilo. Tain ḳoila, “O Abram, ḍoraio na, ami-u tumar hefazotḳari, tumar bout boṛo furushkar.” 2 Abrame ḳoila, “O Mabud Moula, amare kita ditae? Ami to niaoladi. Ami morar bade Dameskor Eliezer amar shompottir malik oibo. 3 Tumi to amare kunu aolad dilae na, erlagi amar baṛir gulam amar oarish oibo.” 4 Ou Mabude Abramre ḳoila, “Na, he nae, tumar nizor bour aolad-u tumar oarish oibo.” 5 Mabude Abramre bare ania ḳoila, “Asmanor bae sao, ar farle ou tera oḳol gonia fuṛao, tumar bongshor oarish oula behishab oibo.” 6 Abrame Mabudor ou oadare ekin ḳorla, ar Mabude hou ekinre dindari ḳam hishabe ḳobul ḳorla.

1 Abramor nirannobboi borosor shomoe Mabude hirbar tanre didar ḳoila, “Ami shorbo-shoktiman Alla. Tumi amar deoa foto takia kamil o. 2 Ami tumar-amar maze chukti ḳaim ḳormu ar tumar oarish kub beshi baṛai dimu.” 3 Teu Abram soizdat foṛla, ar Allae tan loge batchit kori ḳoila, 4 “Tumar loge ami oada ḳaim ḳoriar, tumi bout zatir mul baf oibae. 5 Tumare ar Abram [mani, boṛo baf] ḳoia ḍaḳa oito nae, oḳon taki tumar nam oilo Ibrahim [mani, bout zatir baf], ami tumare bout zatir mul baf banailam. 6 Ami tumare bout folala ḳormu, ar tumar maz tone bout zati ar bashsha oḳol foeda ḳormu. 7 Ami tumar ar tumar oarishor for oarish oḳolor loge ze chukti ḳaim ḳormu, ikṭa hor-hamesha boail taḳbo, er zoriae ami tumar ar tumar oarishor for oarish oḳolor Alla oimu.