Ummotor lagi Hozrot Isar zoruri talim (18:1–35)
Behesti bashshait boṛo ḳe?
18
1 Ou shomoe sahabi oḳole Isar ḳandat aia zikaila,
“Huzur,
behesti bashshair maze hokkol taki boṛo ḳe?”
2 Teu Isae eḳ huruttare ḍakia ania tarar maze uba ḳorai ḳoila,
3 “Ami tumrare hasau ḳoiram,
tumra zudi mon firaia ou huruttar laḳan na o,
te kunumonte-u behesti bashshait hamaitae fartae nae.
4 Ze zone nizore ou huruttar laḳan huru mono ḳore,
behesti bashshait he-u hoḳol taki dami.
5 Ar ze zone amar lagi ou huruttar laḳan kunu sabalre ḳobul ḳore,
he amare-u ḳobul ḳore.
Gunar ḳam taki hushiar roa
6 “Huno,
amar torikar ou huru-muru eḳzonre zegie gunar fote ṭania ney,
ogur lagi aro bala oilo one,
ogur golat fattor bandia doriat falai deoa.
7 Haere dunia,
gunar fote neoar lagi tumar maze ḳoto uskani ase!
Uskani to aibou aibo.
Oile lannot hou zonor ufre,
zegie guna ḳoranir lagi uskani dey.
8 tumar at ba fao zudi tumare gunar fote ṭane,
te i at-fao ḳaṭia falai deo.
duio at-fao loia duzoḳo zola taki,
atur oia-o behesto zaoa tumar lagi bala.
9 Tumar souke zudi tumare gunar fote ṭane,
te i souk tulia falai deo.
Duio souk loia duzoḳo zola taki,
ḳana oia-o aḳer faoa tumar lagi bala.
10 “Huno,
ami ḳoiram,
tumra ou huruttar laḳan kunu sabalreo elami ḳorio na.
Tarar firista oḳole behestor maze hor-hamesha amar behesti baf Alla Pakor muk deḳra.
11 Zano ni,
zera be-fote gesegi,
erare basanir lagiu ami Bin-Adom i duniat aisi.
12 “Mono ḳoro,
kunu manshor eḳ-shogu meṛa ase,
er mazor egu meṛa arai gele he baki nirannobboiṭa bondo toia,
hou arail ogu tukanit zae na ni?
13 Ami tumrare hasau ḳoiram,
he zudi ikṭa tukaia fae,
te ze nirannobboigu arsil na,
oguin toia zegu ari gesil,
ogur lagiu he kub kushi-bashi ḳore.
14 Ṭik ou laḳan,
tumrar behesti baf Allae-o sain na,
ou huruttaintor mazor egu huruttao binash ouk.
Oforadire buzao
15 “Tumar kunu baie zudi tumar gese dush ḳorilae,
te he zebla niralae taḳe,
ou shomoe tumi eḳla gia tare buzaio.
Tumar buz zudi manilae,
te ou bair loge tumar baiali basaililae.
16 Oile he zudi tumar buz na mane,
te aro dui-eḳzon mazor manush loia zaio.
Gia tarar samne tare buzaio.
Teu Musar shoriotor ou hukum fura oibo,
‘Dui-tinzon shakkir ḳotae zekunu befar forman oe.’
17 Erar buzo zudi he na mane,
te tar befare zomato nalish deo.
Zomator ḳota zudi manilae te bala,
ar na manle tare bidormi ba gushkur toshildar mono ḳoria,
tare tar fote saṛi deo.
18 Te ami tumrare hasa ḳota ḳoiram,
ou duniait tumra zetare nazaiz ḳoibae,
ita Allar dorbaro nazaiz oizibo,
ar tumra zetare zaiz ḳoibae,
Allar dorbaro-o ita zaiz oibo.
19 “Huno,
ami tumrare aro ḳoiram,
tumrar mazor duizon zudi eḳmot oia kunu befare dua ḳore,
te amar behesti baf Allae ou dua ḳobul ḳorba.
20 Amar name ze zagat dui ba tin zon zoma oe,
hou zagat amio azir taki.”
Maf ḳorar befare talim
21 Ou shomoe Fitore aia Isare ḳoila,
“Huzur,
amar baie zudi amar gese bar bar dush ḳore,
te ami ḳotobar tare maf ḳortam?
Shatbar ni?”
22 Isae ḳoila,
“Ḳali shatbar nae,
ami ḳoiram,
tare shottoir gun shatbar maf ḳorio.
23 “Huno,
behesti bashshai ola eḳ bashshar laḳan,
zein tan uzir-naziror gese hishab-nikash saila.
24 Bashshae hishab loat boile erar mazor ola eḳzonre tan samne ana oilo,
bashshae er gese laḳ laḳ ṭeḳa faona asla.
25 Ou faona firot dibar ḳemota er nai.
Erdae bashshae hukum dila,
he shudda tar bou,
fua-fuṛin gulam hishabe biki ḳaia,
hoḳol shoe-shompotti besia tan faona adae ḳorar lagi.
26 Ou hukum hunia he bashshar faot doria ḳandia ḳoilo,
‘Huzur,
amare tuṛa shuzug deukka,
ami afnar hoḳol faona dilaimu.’
27 Ou tain doya ḳoria tare saṛi dila,
ar hoḳol dena maf ḳori dilaila.
28 “Bade he bare gia tar logor aroḳ saḳrianre failo.
Ou zonor gese he eḳ-sho ṭeḳa faona asil.
Faia tare golat ṭifa mari doria ḳoilo,
‘Oi,
tui amar faona ṭeḳa de.’
29 Hou zone tar fao-o foṛi minot ḳori ḳoilo,
‘Amare tuṛa shuzug deo,
ami tumar hoḳol faona dilaimu.’
30 Oile he er ḳota manlo na.
Tar ṭeḳa na deoa forzonto tare zelo harai toilo.
31 “Ita dekia tar logor uzir-nazir oḳol kub bezar oila.
Tara gia ita bashshare zanaila.
32 Bashshae hou saḳrianre anaia ḳoila,
‘Haere naforman,
tumi amare minot ḳorae ami tumar hoḳol dena maf ḳori dilaislam.
33 Te ami zela tumare doya ḳorslam,
tumio oula tumar logor saḳrianre doya ḳora usit asil na ni?’
34 Bade bashshae gusa ḳoria tare zelo haraila,
tan faona adae oar ag forzonto zelor zollad sifaie tare ḳoṛaḳoṛi shaza dila.
35 “Ṭik ou laḳan,
tumrao zudi tumrar baire dil taki maf ḳori na deo,
te amar behesti baf Allae-o tumrare oula shaza diba.”