Dua ḳorar kaeda-ḳanun
11
1 Eḳdin huzur Isae kunu eḳ zagat dua ḳorat asla.
Dua shesh oia harle tan eḳ sahabie ḳoila,
“Huzur,
Ehia nobie to tan sahabire dua ḳora hikaita,
te afneo amrare dua ḳora hikaukka.”
2 Isae erare ḳoila,
“Dua ḳorar shomoe tumra oula ḳoio,
O asmani baba,
tumar nam fobitro ḳoia mana ouk,
duniat tumar bashshai ḳaim ouk.
3 Amrar forteḳ dinor rizek fortidin zugai dio;
4 Baba,
amrar tamam gunare maf ḳoria dilao,
zela amra-o mafi dilaisi amrar oforadi oḳolre;
ar forikka taki hefazot ḳoro amrare.”
5 Bade Isae tarare ḳoila,
“Dorilao,
ada raitkur bala tumrar kunu dustor baṛit gia ḳoilae,
dust,
amare tinḳan ruṭi ḳoroz deo.
6 Amar eḳ bondu fotedi zaoar bala aḳtau amar baṛit uṭsoin.
Oḳon tane kita ḳaoaitam,
amar goro to kunta nai.
7 Teu duste goro tone zuaf dila,
ami dorza bond ḳoria amar huruttain loia hutiroisi,
amare ḳoshṭo dio na.
Oḳon uṭia kunta ditam fartam nae.
8 Oile ami ḳoiram,
ou duste uṭia bondu hishabe kunta dite na saileo,
tumi bar bar minot ḳorle he uṭbou.
Uṭia tumi zeta sairae,
ita ṭiku dibo.
9 “Te ami tumrare ḳoiram,
tumra sao,
teu deoa oibo.
Talash ḳoro,
teu faibae.
Duaro ṭuka deo,
tumrar lagi duar kula oibo.
10 Zara sae,
tarau to fae.
Ze tallash ḳore he fae.
Ze duaro ṭuka dey,
tar lagi duar kula oe.
11 Tumrar maze ila kunu baf ase ni,
zar fute ruṭi saile tare maṭi dibo,
mas saile haf dibo,
12 ba enḍa saile bisa dibo?
13 Te tumra naforman oia-o zudi tumrar huruttainre bala bala siz ditae zano,
te zara behesti bafor gese saibo,
tain nichoe tarare Pak Ruh dan ḳorbau.”
Hozrot Isae kun bole keramoti deḳain
14 Eḳdin eḳ beṭar log takia Isae eḳ buba zinnat saṛaila.
Zinnate saṛar bade hi beṭar zoban kuligelo,
mat-ḳota matilo.
Ita dekia manush taijjub bonigela.
15 Oile kunu kunu manshe ḳoilo,
“I beṭae zinor bashsha Bel-Sobulor bole zin saṛae.”
16 Aro ḳoieḳ zone tanre forikka ḳorar niote,
tan ator kunu keramoti deḳto sailo.
17 Isae tarar dilor bab buzilila.
Buzia ḳoila,
“Kunu raijjo nize nize bag oigele,
i raijjo binash oizae.
Oula kunu foribaro zebla bibad lagizae,
i foribaro ar ṭike na.
18 Te zinnat zudi tar nizor bifokke lagizae,
taile tar raijjo ḳemne ṭikbo?
Tumra to ḳoirae,
ami Bel-Sobulor bole zinnat saṛai.
19 Kub bala ḳota,
ami zudi Bel-Sobulor bole zinnat saṛai,
te tumrar manshe kitadi saṛae?
Tumrar mator bisar tumrar mansheu ḳorbo.
20 Oile ami zudi Allai kudrote zinnat saṛai,
te to Allar bashshai tumrar nozdik aichche.
21 “Huno,
kunu bolala manshe ostro-shostro loia tar baṛi fahara dile,
tar samana nirafod taḳe.
22 Oile tar taki zobordost aroḳzon aia hamla ḳoria tare arailile,
he zeta ostro-shostror boṛai ḳorsil,
i ostro-o ḳaṛia nibogi.
Tar hoḳol mal-samanao luṭia nia baṭilibo.
23 “Te ze zon amar fokke nae,
he to amar bifokko.
Ze amar oia ḳam na ḳore,
he to amar birudde ḳam ḳore.
24 “Kunu zine zebla eḳ bemarir log saṛia zaegi,
gia boshot ḳorar lagi morubumit gura-guri ḳore.
Bade kunuḳano roibar zaga na faia mone mone ḳoe,
Dur!
Ami zen taki aisi onou hirbar zaigi.
25 Firot aia hari deḳe,
hi zaga shundor ḳori hazai-faṛai toa.
26 Ou he gia tar taki aro bod shatgu zin loge ḳori ane.
Ania ono hamaia basha banae.
Erdae ou bemarir dosha foela taki heshe aro ḳaraf oe.”
27 Isae ota boean ḳorra,
aḳtau biṛor maz taki eḳ beṭie zure zure ḳoilo,
“Huzur,
ze maʼe afnare feṭo loisoin ar dud ḳaoaisoin,
ein boṛo ḳofali ma.”
28 Isae ḳoila,
“Ikan hasa ḳota,
oile er saiteo boṛo ḳofali tara,
zara Allar kalam hune,
hunia ola amol ḳore.”
Hozrot Iunus nobir alamot
29 Bade aro bout manush Hozrot Isar gese aila.
Tain erare ḳoila,
“I zomanar manush to naforman.
Tara ḳali keramoti tukae,
oile Iunus nobir alamot saṛa dusra kunu keramoti tarare deḳail oito nae.
30 Iunus nobi nize nizeu zela Ninob ṭaunor manshor gese eḳ alamot oisla,
Bin-Adomo oula i zomanar manshor gese nizeu alamot oiba.
31 Ruz kiamotor din douknor deshor rani uṭia ou zomanar manshor dush zair ḳorba.
Ḳaron Bashsha Sulaimanor aḳolor ḳota hunar niote tain duniar hesh mata taki aisla.
Oile oḳon to Sulaiman takio aro mohan eḳzon ono asoin.
32 Kiamotor din Ninob ṭaunor murda oḳol uṭia i zomanar manshor dush zair ḳorba.
Ḳaron Iunus nobir toblig hunia tara touba ḳorsila.
Oile oḳon to Iunus takio aro mohan eḳzon ino asoin,
ta-o manshe touba ḳorer na.
Souk bala zar, dil bala tar
33 “Kunu manshe to lem zalaia hari sokir tole ba ṭukrir tole toe na,
borong gasar ufreu toe,
zate goror manshe for deḳe.
34 Tumar souku oilo tumar ḳaear batti.
Souk zudi bala oe,
te tumar asta shorilo for oibo.
Ar souk karaf oile,
tumar shorilo andarit roibo.
35 Te kial rakio,
tumar dilo ze nur ase,
ita andair oizar ki na?
36 Tumar asta shorilo zudi for taḳe,
kunu ongo andair na taḳe,
te leme zela tar nizor teze tumare for dey,
oula i nureo tumar asta shorilre for ḳorilibo.”
Dilre fak-fakiza raḳa zorur
37 Isae boean ḳorra ou shomoe Forishi dolor eḳzone tanre ḳaibar daot dila.
Tain gia en goror bitre ḳanit boila.
38 Forishie deḳla,
ḳaoat boibar ḳalo Isae Ihudi niom mafik at doisoin na,
ou tain taijjub bonigela.
39 Teu Isae tanre ḳoila,
“Hunoukka,
afnara Forishi oḳole to bashon-bortonor bair gala kub shundor ḳoroin,
oile afnarar bitre to naformani ar lalose bora.
40 O be-aḳolor dol,
zein bargala banaisoin,
tainu kita bitor galao banaisoin na ni?
41 Erlagi afnarar bitre zeta ase,
ota age allar oaste lilla-sodga deukka.
Teu deḳbane,
afnarar hoḳolta-u pak-saf oizibo.
42 “Haere Forishi oḳol,
lannot tumrare,
tumra ḳali tejfata,
fodina fata ar hokkol hag-torḳarir dosh baṭor eḳ baṭ Allar name zoḳat deo,
oile Allar mohobbot ar hok insafor bae tumrar kunu kialu nai.
Ashole ou foelata manar loge loge badortao amol ḳora forz.
43 O lannoti Forishi oḳol!
Mosido hamaia samonor ḳataro boa,
ar bazar-aṭo gia salam faite tumra kub fosond ḳoro.
44 Lannot tumrar ufre,
tumra oilae o-sina ḳoeboror laḳan.
Manshe na sinia er ufredi aṭa-fira ḳore.”
45 Ikan hunia eḳzon alime Isare ḳoila,
“Huzur,
oḳan ḳoia to afne amrareo beijjot ḳorra.”
46 Isae ḳoila,
“Nichoe,
afnarao lannoti,
afnara manshor ḳando bar buzai ḳoria dein,
oile tarar asanor lagi angulṭao laṛoin na.
47 “Haere lannoti oḳol,
tumra nobi oḳolor rouzare shundor ḳoria pakka ḳoro,
oile tumrar moe-murobbieu to erare ḳatol ḳorsla.
48 Ota dekiau buza zae,
tumra tumrar moe-murobbir ḳamor shakki oirae,
tumrao ola oirae.
Tara nobi oḳolre ḳatol ḳorsil,
ar tumra hou nobir rouzare pakka ḳorrae.
49 Erdae Alla Pakeo tan nizor morzie ḳoila,
ami tarar gese amar nobi-rosul bezimu,
erar ḳeurore tara zulum ḳorbo,
ar ḳeurore ḳatol ḳorbo.
50 Ete duniar foela taki oḳon forzonto zoto nobire ḳatol ḳora oise,
era hokkolor dayi oiba ou zomanar manush.
51 Hunoukka,
ami afnaintore ḳoiram,
foela Adomor fut Habilor kun taki shuru ḳoria,
nobi Zakariar kun forzonto hoḳol lour shaza ou zomanar manshor ges taki adae ḳora oibo.
Nobi Zakariare to Zeruzalemor fobitro kaba shorifor kurbani ḳana,
ar ḳas pak zagar mazḳano ḳatol ḳora oise.
52 Haere lannoti alim oḳol,
tumra manshoreo Allar fot sinairae na,
nizeo Allar bashshait hamairae na,
ar zera hamaito sae,
tarareo bada dirae.”
53-54 Boean bade Isa ikan taki roana dilaila.
Teu alim ar Forishi oḳole mizaz gorom ḳoria Isare fando falaita ḳori kusai-faṛai matila.
Nanan nomunar soal ḳoria tanre aṭḳanir shuzug tukaila.