Firaki mat ar gaibi bashae mator tofat
14
1 Erlagi O bai oḳol,
tumrao mohobbotor lagi ashik o,
Pak Ruhur deoa dan-niamotor lagi kiali o,
ḳas ḳori firaki matibar ḳemota faite kiali o.
2 Ḳaron ze manshe gaibi kunu bashae mate,
he ita manshor loge mater na,
Allar logeu mater.
Tar mator basha kunu manshe buze na,
he ḳali Pak Ruhur bole batuni buli ḳoe.
3 Oile zein firaki matoin,
ein manshor gese-u matoin,
en mate manshor zindegire goṛia tule,
manshor dilo asha ar shantona zugae.
4 Te ze zone gaibi bashae mate,
he ḳali nizore goṛia tule,
oile zein firaki matoin,
ein to Allar zomatre goṛia tuloin.
5 Erlagi ami sairam,
tumra hoḳoleu gaibi bashae mato,
oile aro beshi sairam,
tumra hoḳole firaki mat mato.
Mono rakio,
kunu manshe zudi gaibi bashae mate,
ar mator bade zomator manshore goṛia tular lagi dusra ḳeu itar mani buzaia na dey,
te hou zein firaki matoin einu boṛo.
6 Baiainre,
ami zudi tumrar gese aia ḳali gaibi kunu bashae mati,
oile er mazdi Allar batuni munshar ḳota,
aḳol-hekmotor ḳota,
firaki kunu mat ba kitabi nosiot na zanai,
te amaredi tumrar kunu faeda oibo ni?
7 Mone ḳoro,
bashi,
sharinda,
ar zeta baiddo-bazonar bitre kunu zan nai,
ita zudi ganor shoṭik shur-tal na mania baze,
te ou bazonat kita bazer,
manshe ita ḳemne buzbo?
8 Zuddot zaoar lagi fouzi shingae zudi forishkar aoaz na dey,
te kunu sifai reḍi oibo ni?
9 Olaḳan tumi zebla ozana bashae mato,
te tumi kita ḳoirae,
tara ḳemne buzbo?
Tumar i mat ḳali batashor loge matrae ni?
10 I duniat nanan zator buli ase,
ita kunuṭau mani saṛa nae.
11 Ar ami zudi ou buli na buzi,
te ze zone matira,
tan gese to ami bideshi manshor laḳan,
ar taino amar gese bideshi.
12 Ikan to tumrar belaeo ṭik.
Tumra zebla Pak Ruhur deoa dan-niamotor lagi kiali oirae,
te ze niamot dia zomatre goṛia tula zae,
ou niamot faoar lagiu beshi sesṭa ḳorio.
13 Erlagi ze manshe gaibi bashae mate,
he Allar gese mangouk,
zate itar mani buzaia dito fare.
14 Ami zudi gaibi bashae dua ḳori,
te ashole amar ruhe dua ḳorer,
amar nizor mone kunta ḳorer na.
15 Oḳon ami kita ḳortam?
Ami ruh dia dua ḳortam,
ar buddi diao ḳortam.
Ami ruh dia git-gozol gaimu,
buddi diao git-gozol gaimu.
16 Ar tumi zudi ḳali ruh dia shukria adae ḳoro,
te mozlisor manshe kila amin ḳoito?
Tara to buzeru na tumi kita ḳoirae,
tara to osina zonor laḳan roila.
17 Tumi hoeto ṭik babeu shukria adae ḳorrae,
oile ou manshore to goṛia tula or na.
18 Ami Alla Pakor shukria adae ḳori,
ḳaron ami gaibi bashae tumrar saite bout beshi mati.
19 Ta-o zomator mahfilor maze gaibi bashae azar azar ḳotar bodla,
manshor talimor lagi ami aḳol ḳaṭaia ḳali fasḳan ḳota ḳoimu.
20 Baiainre,
tumrar aḳol-buddi huruttar laḳan na oia boeosko manshor laḳan ouk.
Oile ingsha-nindar befare tumrar mon masum baichchar laḳan ouk.
21 Asmani kitabo ase,
Osina bashae matra manushdi,
bideshi manshor mukdi,
ami ou zatir loge matimu.
Ta-o amar mat tara hunto nae,
ikan ami Mabude ḳoiram.
22 Te buza zae,
gaibi bashae mata imandar oḳolor lagi kunu nishana nae,
borong o-imandar oḳolor lagi ita eḳṭa nishana.
Ar firaki mat mata o-imandaror lagi kunu nishana nae,
oile imandaror lagi to ita eḳṭa nishana.
23 Zomator hoḳol manush eḳ zagat milar bade,
hoḳole zudi eḳloge gaibi bashae mate,
ar ou shomoe zomator bairor ba o-imandar kunu manush ino ae,
te tara tumrare fagol ḳoiba na ni?
24 Ar hoḳole zudi firaki matoin,
omon shomoe kunu o-imandar aia ino hamae,
te ou hoḳolor mator mazdi he nizor gunar halot buzilibo,
ou mat hunae tar nizor bisar nize ḳorbo.
25 Tar monor lukail bishoe kula-mela oibo,
teu he soizdat foṛia Allar gourob-tarif ḳoria ḳoibo,
“Afnarar maze nichchoe Alla Pak azir asoin.”
Isaei zomator niom-ḳanun mana
26 Baiainre,
kita oito?
Tumra zebla eḳ zagat zomato dola o,
ou shomoe ḳeu git-gozol gain,
ḳeu nosiot ḳoroin,
ḳeu batuni befare ḳoin,
ḳeu gaibi bashae matoin,
ar keu itar mani buzaia dein.
Te zein zetau ḳoroin na ḳene,
ita zanu zomatre goṛia tular niote oe.
27 Ḳeu zudi gaibi bashae kunta mate,
te ekozon ḳori dui-tinzone matouk ar eḳzone itar mani buzaia deuk.
28 Mani buzai dibar ḳeu na taḳle,
tara zomato sufsaf taḳouk,
ḳali nize nize Allar loge matouk.
29 Ar firaki matra oḳole ola dui-tinzone matouk ar baki hoḳole zasai-basai ḳorouk.
30 Oile zomato zera boat asoin,
tara ḳeuror gese zudi kunu ohi ba batuni ḳobor nazil oe,
te zein boean ḳorra,
tain nirai oizaukka.
31 Olaḳan tumra hoḳoleu eḳ ek kori firaki matio,
zate hunra oḳole talim ar utshaho fae.
32 Firaki matrar ruh to tarar nizor boshe taḳe,
33 Alla Pake nichchoe gulmal fosond ḳoroin na,
borong shanti fosond ḳoroin.
34 Allar pak bonda oḳolor hoḳol zomator niom-ḳanun oilo,
zomator maze beṭi manush nirai roa usit,
gof-shof ḳora tarar lagi ṭik nae.
Shoriotor niom mafik tara odinta manouk.
35 Tara kunu talim zanar kiali oile baṛit gia nizor zamair ges taki zanouk.
Ḳaron zomator maze beṭinte gof-shof ḳora shorom.
36 Aichcha ḳo sain,
Allar kalam kunu tumrar ges taki baroise ni?
Ḳali tumrar gese-u aise ni?
37 Mono rakio,
kunu manshe zudi nizore fir-dorbesh ba batuni ḳemota-ala mono ḳore,
te he ikan buzilauk,
ami tumrar gese zeta leḳlam,
ita hokkoltau malik Isar hukum.
38 Ar keu ita na manle,
tareo mainno ḳora oito nae.