১ ꠛꠍꠞ ꠉꠥꠎꠞꠤꠀ ꠛꠣꠖꠞ ꠛꠍꠞ ꠀꠁꠟ। ꠀꠞ ꠢꠥꠇꠘꠣꠞ ꠖꠤꠘꠅ ꠛꠣꠖꠡꠣ ꠅꠇꠟ ꠎꠦꠛꠟꠣ ꠎꠥꠖ꠆ꠖ ꠇꠞꠣꠞ ꠟꠣꠉꠤ ꠛꠣꠞ ꠅꠁꠘ, ꠅꠃ ꠡꠝꠄ ꠖꠣꠃꠖꠦꠅ ꠔꠣꠘ ꠙꠞꠗꠣꠘ ꠍꠤꠙꠣꠁ ꠎꠥꠀꠛꠞ ꠟꠉꠦ ꠀꠞꠅ ꠇꠝꠣꠘ꠆ꠒꠣꠞ ꠅꠇꠟ ꠖꠤꠀ, ꠛꠘꠤ ꠁꠍꠞꠣꠁꠟꠞ ꠢꠇꠟ ꠍꠤꠙꠣꠁꠞꠦ ꠎꠥꠖ꠆ꠖꠔ ꠙꠣꠑꠣꠁꠟꠣ। ꠅꠁꠟꠦ ꠔꠣꠁꠘ ꠎꠦꠞꠥꠎꠣꠟꠦꠝꠅ ꠞꠁꠟꠣ। ꠍꠤꠙꠣꠁ ꠖꠟ ꠉꠤꠀ ꠛꠘꠤ-ꠀꠝ꠆ꠝꠣꠘꠞꠦ ꠛꠤꠘꠣꠡ ꠇꠞꠤꠀ, ꠔꠣꠞꠣꠞ ꠞꠣꠛ꠆ꠛꠣ ꠐꠣꠃꠘꠞꠦ ꠛꠦꠞꠤꠟꠤꠟꠣ। ২ ꠄꠞꠝꠣꠎꠦ ꠄꠇꠖꠤꠘ ꠛꠤꠀꠟꠤ ꠛꠣꠟꠣ ꠊꠥꠝ ꠕꠣꠇꠤ ꠃꠑꠤꠀ, ꠖꠣꠃꠖꠦ ꠔꠣꠘ ꠞꠣꠎꠛꠣꠠꠤꠞ ꠍꠣꠖꠞ ꠃꠙꠞꠦ ꠃꠑꠤꠀ ꠀꠐꠣ-ꠃꠐꠤ ꠇꠞꠞꠣ। ꠅꠘ ꠕꠣꠇꠤ ꠀꠈꠔꠣ ꠌꠣꠁꠀ ꠖꠦꠈꠟꠣ, ꠄꠇꠎꠘ ꠛꠦꠐꠤ ꠝꠣꠘꠡꠦ ꠘꠣꠁꠞꠣ। ꠁ ꠛꠦꠐꠤ ꠝꠣꠘꠥꠡ ꠖꠦꠈꠔꠦ ꠈꠥꠛ ꠡꠥꠘ꠆ꠖꠞꠤ। ৩ ꠅꠃ ꠔꠣꠁꠘ ꠛꠦꠐꠤꠞ ꠘꠣꠝ-ꠑꠤꠇꠣꠘꠣ ꠎꠣꠘꠣꠔ ꠉꠥꠁꠀ ꠙꠣꠑꠣꠁꠟꠣ। ꠔꠦꠃ ꠄꠇꠎꠘꠦ ꠔꠣꠘꠦ ꠇꠂꠟ, “ꠁ ꠛꠦꠐꠤꠞ ꠘꠣꠝ ꠛꠣꠔꠍꠦꠛꠣ, ꠛꠣꠚꠞ ꠘꠣꠝ ꠁꠟꠤꠀꠝ। ꠎꠣꠝꠣꠁ ꠅꠁꠟꠣ ꠢꠤꠐ꠆ꠐꠤ ꠈꠣꠘ꠆ꠖꠣꠘꠞ ꠃꠞꠤꠀ।” ৪ ꠢꠇꠟꠔꠣ ꠢꠥꠘꠤꠀ ꠛꠦꠐꠤꠞꠦ ꠀꠘꠣꠞ ꠟꠣꠉꠤ ꠖꠣꠃꠖꠦ ꠝꠣꠘꠥꠡ ꠙꠣꠑꠣꠁꠟꠣ। ꠛꠦꠐꠤꠞꠦ ꠀꠘꠤꠀ ꠢꠣꠞꠟꠦ ꠔꠣꠁꠘ ꠅꠃ ꠛꠦꠐꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟꠣ। ꠅꠃ ꠡꠝꠄ ꠛꠦꠐꠤ ꠈꠣꠟꠤ ꠔꠣꠁꠞ ꠝꠣꠡꠤꠇ ꠛꠦꠐꠤꠀꠞꠣ ꠛꠦꠝꠣꠞ ꠕꠣꠇꠤ ꠙꠣꠇ-ꠍꠣꠚ ꠅꠁꠍꠦ। ꠝꠤꠟꠣ-ꠝꠤꠡꠣꠞ ꠛꠣꠖꠦ ꠛꠦꠐꠤ ꠔꠣꠁꠞ ꠛꠣꠠꠤꠔ ꠉꠦꠟꠉꠤ। ৫ ꠛꠣꠖꠦ ꠎꠦꠛꠟꠣ ꠛꠦꠐꠤꠄ ꠛꠥꠎꠤꠟꠤꠟ, ꠛꠦꠐꠤꠞ ꠙꠦꠐꠅ ꠢꠥꠞꠥꠔ꠆ꠔꠣ ꠀꠁꠍꠦ, ꠅꠃ ꠛꠦꠐꠤꠄ ꠖꠣꠃꠖꠞꠦ ꠈꠛꠞ ꠎꠣꠘꠣꠁꠟ। ৬ ꠖꠣꠃꠖꠦ ꠁ ꠈꠛꠞ ꠙꠣꠁꠀ ꠔꠣꠘ ꠙꠞꠗꠣꠘ ꠍꠤꠙꠣꠁ ꠎꠥꠀꠛꠞꠦ ꠢꠥꠇꠥꠝ ꠖꠤꠟꠣ, “ꠔꠥꠝꠤ ꠢꠤꠐ꠆ꠐꠤ ꠃꠞꠤꠀꠞꠦ ꠀꠝꠣꠞ ꠉꠦꠍꠦ ꠙꠣꠑꠣꠁ ꠖꠦꠅ।” ꠢꠥꠇꠥꠝ ꠙꠣꠁꠀ ꠎꠥꠀꠛꠦ ꠔꠣꠞꠦ ꠛꠣꠖꠡꠣꠞ ꠉꠦꠍꠦ ꠙꠣꠑꠣꠁ ꠖꠤꠟꠣ। ৭ ꠃꠞꠤꠀ ꠀꠁꠀ ꠢꠣꠞꠟꠦ ꠖꠣꠃꠖꠦ ꠔꠣꠞꠦ ꠎꠥꠖ꠆ꠖꠞ ꠈꠛꠞ-ꠀꠔꠞ ꠎꠤꠇꠣꠁꠟꠣ। ꠎꠥꠀꠛ ꠀꠞ ꠛꠣꠇꠤ ꠍꠤꠙꠣꠁ ꠅꠇꠟꠞ ꠜꠣꠟꠣ-ꠛꠥꠞꠣ ꠢꠥꠘꠟꠣ। ৮ ꠛꠣꠖꠦ ꠔꠣꠞꠦ ꠇꠁꠟꠣ, “ꠔꠥꠝꠤ ꠔꠥꠝꠣꠞ ꠛꠣꠠꠤꠔ ꠎꠣꠅꠉꠤ, ꠉꠤꠀ ꠝꠥꠈ-ꠀꠔ ꠗꠁꠀ ꠎꠤꠞꠣꠅ।” ꠢꠦ ꠛꠣꠞ ꠅꠁꠀ ꠉꠦꠟꠉꠤ, ꠔꠦꠃ ꠛꠣꠖꠡꠣꠄ ꠔꠣꠞ ꠛꠣꠠꠤꠔ ꠕꠥꠠꠣ ꠃꠙꠢꠣꠞ ꠙꠣꠑꠣꠁꠟꠣ। ৯ ꠅꠁꠟꠦ ꠢꠦ ꠛꠣꠞꠣꠁꠀ ꠔꠣꠞ ꠘꠤꠎꠞ ꠛꠣꠠꠤꠔ ꠘꠣ ꠉꠤꠀ, ꠛꠣꠖꠡꠣꠞ ꠛꠣꠠꠤꠞ ꠌꠣꠇꠞ-ꠛꠣꠇꠞꠞ ꠟꠉꠦ ꠞꠣꠎꠛꠣꠠꠤꠞ ꠛꠣꠞꠤꠘ꠆ꠖꠣꠔ ꠢꠥꠔꠤ ꠞꠁꠟ। ১০ ꠖꠣꠃꠖꠦ ꠁ ꠈꠛꠞ ꠙꠣꠁꠀ ꠃꠞꠤꠀꠞꠦ ꠎꠤꠇꠣꠁꠟꠣ, “ꠔꠥꠝꠤ ꠔ ꠎꠥꠖ꠆ꠖ ꠕꠣꠇꠤ ꠚꠤꠞꠔ ꠀꠁꠍ, ꠔꠦ ꠀꠞꠣꠝ ꠇꠞꠣꠞ ꠟꠣꠉꠤ ꠔꠥꠝꠣꠞ ꠛꠣꠠꠤꠔ ꠉꠦꠟꠣꠄ ꠘꠣ ꠇꠦꠘꠦ?” ১১ ꠢꠦ ꠎꠥꠀꠙ ꠖꠤꠟ “ꠢꠥꠎꠥꠞ, ꠀꠟ꠆ꠟꠣꠞ ꠡꠣꠢꠣꠖꠔ ꠡꠘ꠆ꠖꠥꠇꠞꠦ ꠟꠁꠀ ꠛꠘꠤ ꠁꠍꠞꠣꠁꠟ ꠀꠞ ꠄꠢꠥꠖꠣꠞ ꠍꠤꠙꠣꠁ ꠅꠇꠟ ꠔꠣꠝ꠆ꠛꠥꠞ ꠔꠟꠦ ꠞꠁꠞꠣ। ꠀꠝꠣꠞ ꠡꠦꠘꠣꠙꠔꠤ ꠍꠣꠛ ꠀꠞ ꠀꠙꠘꠣꠞ ꠢꠇꠟ ꠝꠣꠘꠥꠡ ꠛꠘ꠆ꠖꠞ ꠝꠣꠎꠦ ꠓꠦꠞꠣꠞ ꠔꠟꠦ ꠀꠍꠂꠘ। ꠔꠦ ꠅꠃ ꠢꠣꠟꠔꠅ ꠀꠝꠤ ꠇꠦꠝꠘꠦ ꠘꠤꠎꠞ ꠛꠣꠠꠤꠔ ꠉꠤꠀ ꠈꠣꠘꠣ-ꠖꠣꠘꠣ ꠈꠣꠁꠀ, ꠛꠃꠞ ꠟꠉꠦ ꠚꠥꠞ꠆ꠔꠤ ꠇꠞꠔꠣꠝ?” ১২ ꠅꠃ ꠖꠣꠃꠖꠦ ꠔꠣꠞꠦ ꠇꠁꠟꠣ, “ꠀꠁꠌ꠆ꠍꠣ, ꠀꠁꠎꠇꠥ ꠖꠤꠘ ꠔꠥꠝꠤ ꠅꠘꠅ ꠞꠅ, ꠇꠣꠁꠟ ꠀꠝꠤ ꠔꠥꠝꠣꠞꠦ ꠚꠤꠞꠔ ꠙꠣꠑꠣꠁ ꠖꠤꠝꠥ।” ꠔꠦꠃ ꠢꠦ ꠅꠃ ꠖꠤꠘ ꠀꠞ ꠄꠞ ꠛꠣꠖꠞ ꠖꠤꠘꠅ ꠎꠦꠞꠥꠎꠣꠟꠦꠝꠅ ꠞꠁꠟ। ১৩ ꠖꠣꠃꠖꠦ ꠔꠣꠞꠦ ꠔꠣꠘ ꠊꠞꠅ ꠖꠣꠅꠔ ꠈꠣꠅꠀꠁꠟꠣ, ꠈꠣꠁꠀ ꠢꠣꠞꠟꠦ ꠔꠣꠞꠦ ꠈꠥꠛ ꠘꠤꠡꠣ ꠀꠟꠣ ꠝꠖ ꠈꠣꠅꠀꠁꠀ ꠐꠣꠟ ꠛꠣꠘꠣꠁꠟꠣ। ꠅꠁꠟꠦ ꠞꠣꠁꠔ ꠅꠁꠟꠦ ꠢꠦ ꠛꠣꠖꠡꠣꠞ ꠌꠣꠇꠞ-ꠛꠣꠇꠞꠞ ꠟꠉꠦ ꠞꠁꠟ, ꠔꠣꠞ ꠘꠤꠎꠞ ꠛꠣꠠꠤꠔ ꠉꠦꠟ ꠘꠣ। ১৪ ꠛꠣꠖꠞ ꠖꠤꠘ ꠛꠤꠀꠘꠦ ꠛꠣꠖꠡꠣꠄ ꠔꠣꠘ ꠙꠞꠗꠣꠘ ꠍꠤꠙꠣꠁ ꠎꠥꠀꠛꠞ ꠉꠦꠍꠦ ꠄꠇ ꠌꠤꠑꠤ ꠟꠦꠈꠤꠀ, ꠃꠞꠤꠀꠞ ꠀꠔꠅ ꠖꠤꠀ ꠔꠣꠞꠦ ꠛꠤꠖꠣꠄ ꠖꠤꠟꠣꠁꠟꠣ। ১৫ ꠌꠤꠑꠤꠞ ꠝꠣꠎꠦ ꠔꠣꠁꠘ ꠟꠦꠈꠟꠣ, “ꠎꠦ ꠎꠣꠉꠣꠔ ꠈꠥꠛ ꠛꠦꠎꠥꠁꠔꠣ ꠎꠥꠖ꠆ꠖ ꠌꠟꠦꠞ, ꠅꠃ ꠃꠞꠤꠀꠞꠦ ꠢꠃ ꠎꠣꠉꠣꠔ ꠍꠤꠙꠣꠁ ꠅꠇꠟꠞ ꠍꠣꠝꠘꠞ ꠇꠣꠔꠣꠞꠅ ꠎꠥꠖ꠆ꠖꠔ ꠟꠣꠉꠣꠅ, ꠛꠣꠖꠦ ꠔꠥꠝꠞꠣ ꠈꠞꠦ ꠕꠣꠇꠤ ꠢꠞꠤ ꠎꠣꠁꠅ, ꠎꠣꠔꠦ ꠢꠦ ꠢꠘꠅ ꠝꠣꠞꠣ ꠎꠣꠄ।” ১৬ ꠄꠞꠖꠣꠄ ꠖꠥꠡꠝꠘꠞ ꠐꠣꠃꠘꠞꠦ ꠛꠦꠞꠣꠞ ꠡꠝꠄ, ꠎꠥꠀꠛꠦ ꠎꠣꠘꠤ-ꠢꠥꠘꠤ ꠃꠞꠤꠀꠞꠦ ꠅꠃꠟꠣ ꠄꠇ ꠎꠣꠉꠣꠔ ꠎꠥꠖ꠆ꠖꠔ ꠟꠣꠉꠣꠁꠟꠣ, ꠎꠦ ꠎꠣꠉꠣꠔ ꠖꠥꠡꠝꠘꠞ ꠙꠄꠟꠥꠀꠘ ꠍꠤꠙꠣꠁ ꠅꠇꠟ ꠟꠣꠠꠣꠁꠔ ꠀꠍꠤꠟ। ১৭ ꠛꠣꠖꠦ ꠐꠣꠃꠘꠞ ꠝꠣꠘꠥꠡ ꠛꠣꠞ ꠅꠁ ꠀꠁꠀ ꠎꠦꠛꠟꠣ ꠎꠥꠀꠛꠞ ꠟꠉꠦ ꠟꠣꠠꠣꠁ ꠟꠣꠉꠣꠁꠟꠣ, ꠅꠃ ꠡꠝꠄ ꠖꠣꠃꠖꠞ ꠇꠄꠎꠘ ꠍꠤꠙꠣꠁ ꠝꠣꠞꠣ ꠉꠦꠟꠣ, ꠄꠞꠣꠞ ꠟꠉꠦ ꠅꠃ ꠢꠤꠐ꠆ꠐꠤ ꠃꠞꠤꠀꠞꠅ ꠝꠃꠔ ꠅꠁꠉꠦꠟ। ১৮ ꠎꠥꠀꠛꠦ ꠈꠛꠞꠤꠀ ꠙꠣꠑꠣꠁꠀ ꠎꠥꠖ꠆ꠖꠞ ꠢꠇꠟ ꠈꠛꠞ ꠖꠣꠃꠖꠞꠦ ꠎꠣꠘꠣꠁꠟꠣ। ১৯-২০ ꠀꠞ ꠈꠛꠞꠤꠀꠞꠦ ꠢꠤꠇꠣꠁ ꠖꠤꠟꠣ, “ꠎꠥꠖ꠆ꠖꠞ ꠁ ꠈꠛꠞ ꠢꠥꠘꠤꠀ ꠛꠣꠖꠡꠣ ꠘꠣꠝꠖꠣꠞꠦ ꠉꠥꠍꠣꠄ ꠉꠞꠝ ꠅꠁꠀ ꠎꠥꠖꠤ ꠔꠥꠝꠣꠞꠦ ꠎꠤꠇꠣꠁꠘ, ꠟꠣꠠꠣꠁ ꠇꠞꠣꠞ ꠟꠣꠉꠤ ꠔꠥꠝꠞꠣ ꠐꠣꠃꠘꠞ ꠅꠔ ꠇꠣꠘ꠆ꠖꠣꠔ ꠉꠦꠟꠣꠄ ꠇꠦꠘꠦ? ꠅꠀꠟꠞ ꠃꠙꠞꠦ ꠕꠣꠇꠤ ꠢꠤꠔꠣꠄ ꠔꠤꠞ-ꠗꠘꠥꠇ ꠝꠣꠞꠛꠣ, ꠁꠈꠣꠘ ꠔꠥꠝꠞꠣ ꠛꠥꠎꠟꠣꠄ ꠘꠣ ꠘꠤ? ২১ ꠎꠣꠘꠅ ꠘꠣ ꠘꠤ, ꠎꠤꠞꠥꠛꠦꠡꠔꠞ ꠙꠥꠀ ꠀꠛꠤꠝꠣꠟꠤꠇꠞꠦ ꠇꠦꠉꠤꠄ ꠈꠥꠘ ꠇꠞꠍꠤꠟ? ꠔꠦꠛꠡ ꠄꠟꠣꠇꠣꠞ ꠄꠇ ꠛꠦꠐꠤꠄ ꠅꠀꠟꠞ ꠃꠙꠞꠦ ꠕꠣꠇꠤ, ꠔꠣꠁꠞ ꠙꠣꠐꠣꠞ ꠢꠤꠟꠖꠤ ꠁꠐꠣ ꠝꠣꠞꠍꠤꠟ, ꠀꠞ ꠔꠣꠘ ꠝꠃꠔ ꠅꠁꠍꠦ। ꠔꠦ ꠔꠥꠝꠞꠣ ꠅꠔ ꠇꠣꠘ꠆ꠖꠣꠔ ꠉꠦꠟꠣꠄ ꠇꠦꠘꠦ? ꠔꠣꠁꠘ ꠎꠥꠖꠤ ꠔꠥꠝꠣꠞꠦ ꠅꠃꠟꠣ ꠎꠤꠇꠣꠁꠘ, ꠔꠦ ꠔꠥꠝꠤ ꠇꠁꠅ, ꠔꠣꠘ ꠉꠥꠟꠣꠝ ꠢꠤꠐ꠆ꠐꠤ ꠃꠞꠤꠀꠅ ꠝꠣꠞꠣ ꠉꠦꠍꠦ।” ২২ ꠢꠃ ꠈꠛꠞꠤꠀ ꠞꠅꠀꠘꠣ ꠅꠁꠟ, ꠀꠞ ꠖꠣꠃꠖꠞ ꠖꠞꠛꠣꠞꠅ ꠉꠤꠀ ꠢꠣꠞꠟꠦ, ꠎꠥꠀꠛꠦ ꠎꠦꠟꠣ ꠢꠤꠇꠣꠁ ꠖꠤꠍꠟꠣ ꠅꠃꠟꠣ ꠇꠂꠟ। ২৩ ꠢꠦ ꠖꠣꠃꠖꠞꠦ ꠎꠣꠘꠣꠁꠟ, “ꠖꠥꠡꠝꠘꠞ ꠖꠟ ꠙꠄꠟꠣ ꠈꠥꠛ ꠡꠛꠟ ꠅꠁꠀ ꠛꠘ꠆ꠖꠞ ꠝꠣꠎꠦ ꠀꠝꠞꠣꠞ ꠟꠉꠦ ꠟꠣꠠꠣꠁꠔ ꠀꠁꠍꠤꠟ, ꠅꠁꠟꠦ ꠀꠝꠞꠣ ꠔꠣꠞꠣꠞꠦ ꠈꠦꠖꠣꠁ ꠈꠦꠖꠣꠁ ꠐꠣꠃꠘꠞ ꠉꠦꠁꠐ ꠙꠞ꠆ꠎꠘ꠆ꠔ ꠉꠦꠍꠟꠣꠝ। ২৪ ꠄꠔꠦ ꠔꠣꠞꠣꠞ ꠔꠤꠞ-ꠗꠘꠥꠇ ꠀꠟꠣꠁꠘ꠆ꠔꠦ ꠅꠀꠟꠞ ꠃꠙꠞꠦ ꠕꠣꠇꠤ ꠔꠤꠞ ꠝꠣꠞꠟꠣ। ꠅꠃ ꠔꠤꠞꠦ ꠛꠣꠖꠡꠣ ꠘꠣꠝꠖꠣꠞꠞ ꠇꠄꠎꠘ ꠍꠤꠙꠣꠁ ꠝꠣꠞꠣ ꠉꠦꠍꠂꠘ। ꠀꠙꠘꠣꠞ ꠉꠥꠟꠣꠝ ꠢꠤꠐ꠆ꠐꠤ ꠃꠞꠤꠀꠞꠅ ꠝꠃꠔ ꠅꠁꠉꠦꠍꠦ।” ২৫ ꠈꠛꠞ ꠢꠥꠘꠤꠀ ꠖꠣꠃꠖꠦ ꠔꠣꠞꠦ ꠇꠁꠟꠣ, “ꠔꠥꠝꠤ ꠉꠤꠀ ꠎꠥꠀꠛꠞꠦ ꠇꠁꠅ, ꠁꠔꠣꠞ ꠟꠣꠉꠤ ꠝꠘ ꠈꠣꠞꠣꠙ ꠇꠞꠔ ꠘꠣ, ꠎꠥꠖ꠆ꠖꠞ ꠡꠝꠄ ꠔꠟꠥꠀꠞꠦ ꠔ ꠇꠥꠘꠥ ꠀꠙꠘ-ꠙꠞ ꠌꠤꠘꠦ ꠘꠣ। ꠔꠦ ꠢꠦ ꠎꠣꠘꠥ ꠐꠣꠃꠘꠞ ꠛꠤꠞꠥꠖ꠆ꠖꠦ ꠀꠞꠅ ꠡꠛꠟ ꠅꠁꠀ ꠎꠥꠖ꠆ꠖ ꠇꠞꠤꠀ ꠐꠣꠃꠘꠞꠦ ꠄꠇ꠆ꠇꠦꠞꠦ ꠛꠤꠘꠣꠡ ꠇꠞꠤꠟꠣꠄ। ꠔꠥꠝꠤ ꠎꠥꠀꠛꠞꠦ ꠅꠈꠣꠘ ꠇꠁꠀ ꠔꠣꠞ ꠜꠤꠔꠞꠦ ꠛꠟ ꠛꠣꠠꠣꠁꠅ।” ২৬ ꠁꠛꠣꠄ ꠃꠞꠤꠀꠞ ꠛꠃꠄ ꠎꠣꠝꠣꠁ ꠝꠞꠣꠞ ꠈꠛꠞ ꠢꠥꠘꠤꠀ ꠇꠣꠘ꠆ꠖꠣ-ꠇꠣꠐꠤ, ꠀꠞ ꠝꠣꠔ꠆ꠔꠝ ꠇꠞꠟ। ২৭ ꠛꠦꠐꠤꠞ ꠇꠣꠘ꠆ꠖꠣ-ꠇꠣꠐꠤ ꠢꠇꠟꠔꠣ ꠡꠦꠡ ꠅꠁꠀ ꠢꠣꠞꠟꠦ, ꠖꠣꠃꠖꠦ ꠔꠣꠁꠞꠦ ꠔꠣꠘ ꠞꠣꠎꠛꠣꠠꠤꠔ ꠀꠘꠣꠁꠟꠣ। ꠔꠣꠁꠘ ꠛꠦꠐꠤꠞꠦ ꠢꠣꠋꠉꠣ ꠇꠞꠟꠣ, ꠛꠣꠖꠦ ꠛꠦꠐꠤꠞ ꠊꠞꠅ ꠄꠇ ꠙꠥꠀ ꠙꠄꠖꠣ ꠅꠁꠟ। ꠅꠁꠟꠦ ꠖꠣꠃꠖꠞ ꠁ ꠇꠣꠝꠞ ꠟꠣꠉꠤ ꠝꠣꠛꠥꠖ ꠔꠣꠘ ꠃꠙꠞꠦ ꠘꠣꠞꠣꠎ ꠅꠁꠉꠦꠟꠣ।

১ ꠛꠣꠖꠦ ꠝꠣꠛꠥꠖꠦ ꠢꠃ ꠎꠝꠣꠘꠣꠞ ꠘꠛꠤ ꠘꠣꠕꠣꠘꠞꠦ ꠖꠣꠃꠖꠞ ꠉꠦꠍꠦ ꠙꠣꠑꠣꠁꠟꠣ। ꠔꠣꠁꠘ ꠀꠁꠀ ꠖꠣꠃꠖꠞꠦ ꠇꠁꠟꠣ, “ꠛꠣꠖꠡꠣ ꠘꠣꠝꠖꠣꠞ, ꠇꠥꠘꠥ ꠄꠇ ꠐꠣꠃꠘꠅ ꠖꠥꠁꠎꠘ ꠝꠣꠘꠥꠡ ꠀꠍꠤꠟ, ꠄꠞꠣꠞ ꠄꠇꠎꠘ ꠈꠥꠛ ꠗꠘꠤ, ꠅꠁꠘ꠆ꠘ ꠎꠘ ꠈꠥꠛ ꠉꠞꠤꠛ। ২ ꠗꠘꠤ ꠎꠘꠞ ꠛꠃꠔ ꠉꠞꠥ-ꠍꠣꠉꠟ ꠀꠍꠤꠟ। ৩ ꠅꠁꠟꠦ ꠁ ꠉꠞꠤꠛ ꠛꠦꠐꠣꠞ ꠈꠣꠟꠤ ꠄꠉꠥ ꠍꠣꠉꠤ ꠛꠣꠁꠌ꠆ꠌꠣ ꠍꠣꠠꠣ, ꠀꠞ ꠇꠥꠘ꠆ꠔꠣꠃ ꠀꠍꠤꠟ ꠘꠣ। ꠛꠦꠐꠣꠄ ꠅꠃ ꠛꠣꠁꠌ꠆ꠌꠣꠉꠥꠞꠦ ꠟꠁꠀ ꠀꠘꠤꠀ ꠙꠣꠟꠤꠔꠣ। ꠛꠣꠁꠌ꠆ꠌꠣꠉꠥ ꠛꠦꠐꠣ ꠀꠞ ꠔꠣꠞ ꠢꠥꠞꠥꠔ꠆ꠔꠣ-ꠝꠥꠞꠥꠔ꠆ꠔꠣꠞ ꠟꠉꠦ ꠟꠉꠦ ꠞꠁꠀ ꠀꠡ꠆ꠔꠦ ꠀꠡ꠆ꠔꠦ ꠛꠠ ꠅꠀ ꠗꠞꠟ। ꠁ ꠉꠞꠤꠛ ꠛꠦꠐꠣꠄ ꠎꠦꠔꠣ ꠈꠣꠁꠔ, ꠔꠣꠞ ꠍꠣꠉꠤ ꠛꠣꠁꠌ꠆ꠌꠣꠄꠅ ꠅꠔꠣ ꠈꠣꠁꠔ, ꠛꠦꠐꠣꠞ ꠈꠣꠅꠀꠞ ꠝꠉ ꠕꠣꠇꠤ ꠛꠣꠁꠌ꠆ꠌꠣꠄꠅ ꠙꠣꠘꠤ ꠈꠣꠁꠔ। ꠀꠞ ꠛꠦꠐꠣꠞ ꠇꠣꠘ꠆ꠖꠣꠔ ꠢꠥꠔꠤꠔ। ꠛꠣꠁꠌ꠆ꠌꠣꠉꠥꠞꠦ ꠛꠦꠐꠣꠄ ꠘꠤꠎꠞ ꠙꠥꠠꠤꠞ ꠟꠣꠈꠣꠘ ꠀꠖꠞ ꠇꠞꠔ। ৪ ꠄꠞꠛꠣꠖꠦ ꠇꠤꠔꠣ ꠅꠁꠟ, ꠄꠇꠖꠤꠘ ꠢꠃ ꠗꠘꠤ ꠛꠦꠐꠣꠞ ꠛꠣꠠꠤꠔ ꠄꠇ ꠝꠦꠝꠣꠘ ꠀꠁꠟ। ꠄꠔꠦ ꠗꠘꠤ ꠛꠦꠐꠣꠄ ꠔꠣꠞ ꠝꠦꠝꠣꠘꠞ ꠈꠣꠘꠤꠞ ꠟꠣꠉꠤ ꠘꠤꠎꠞ ꠇꠥꠘꠥ ꠉꠞꠥ ꠛꠣ ꠍꠣꠉꠟ ꠎꠛꠅ ꠘꠣ ꠇꠞꠤꠀ, ꠢꠦ ꠅꠃ ꠉꠞꠤꠛ ꠛꠦꠐꠣꠞ ꠛꠇꠞꠤꠞ ꠛꠣꠁꠌ꠆ꠌꠣꠉꠥ ꠀꠘꠤꠀ ꠝꠦꠝꠣꠘꠞ ꠈꠣꠘꠤ ꠎꠥꠁꠔ ꠇꠞꠟ।” ৫ ꠁꠈꠣꠘ ꠢꠥꠘꠤꠀ ꠖꠣꠃꠖꠦ ꠢꠃ ꠗꠘꠤ ꠛꠦꠐꠣꠞ ꠃꠙꠞꠦ ꠉꠥꠍꠣꠄ ꠎꠟꠤ-ꠙꠥꠠꠤ ꠃꠑꠟꠣ। ꠔꠣꠁꠘ ꠘꠣꠕꠣꠘ ꠘꠛꠤꠞꠦ ꠇꠁꠟꠣ, “ꠀꠝꠤ ꠀꠟ꠆ꠟꠣꠞ ꠇꠍꠝ ꠈꠣꠁꠀ ꠇꠁꠀꠞ, ꠁ ꠇꠣꠝ ꠎꠦꠉꠤꠄ ꠇꠞꠍꠦ ꠔꠣꠞꠦ ꠇꠣꠔꠟ ꠇꠞꠣ ꠎꠞꠥꠞ। ৬ ꠢꠦ ꠁ ꠙꠣꠡꠣꠘꠤ ꠇꠣꠝ ꠇꠞꠍꠦ ꠇꠞꠤ, ꠔꠣꠞꠦ ꠌꠣꠁꠞ ꠛꠇꠞꠤꠞ ꠖꠣꠝ ꠖꠤꠔꠦ ꠅꠁꠛ।” ৭ ꠅꠃꠉꠤ ꠘꠣꠕꠣꠘ ꠘꠛꠤꠄ ꠖꠣꠃꠖꠞꠦ ꠇꠁꠟꠣ, “ꠀꠙꠘꠦꠃ ꠔ ꠢꠃ ꠎꠘ। ꠛꠘꠤ ꠁꠍꠞꠣꠁꠟꠞ ꠝꠣꠛꠥꠖ ꠀꠟ꠆ꠟꠣꠄ ꠛꠣꠔꠣꠁꠍꠂꠘ, ꠀꠝꠤ ꠁꠍꠞꠣꠁꠟ ꠖꠦꠡꠞ ꠞꠣꠎ-ꠉꠖꠤꠔ ꠔꠥꠝꠣꠞꠦ ꠈꠦꠟꠣꠚꠔꠤ ꠖꠤꠍꠤ। ꠛꠣꠖꠡꠣ ꠔꠣꠟꠥꠔꠞ ꠀꠔ ꠕꠣꠇꠤ ꠔꠥꠝꠣꠞꠦ ꠛꠣꠌꠣꠁꠍꠤ। ৮ ꠔꠥꠝꠣꠞ ꠝꠥꠘꠤꠛꠞ ꠢꠇꠟ ꠍꠣꠝꠣꠘꠣ ꠀꠝꠤ ꠔꠥꠝꠣꠞꠦ ꠖꠤꠍꠤ, ꠔꠣꠞ ꠛꠤꠛꠤꠘ꠆ꠔꠞꠦꠅ ꠀꠝꠤ ꠔꠥꠝꠣꠞ ꠀꠔꠅ ꠖꠤꠍꠤ। ꠁꠍꠞꠣꠁꠟ ꠀꠞ ꠄꠢꠥꠖꠣꠞ ꠢꠇꠟ ꠉꠥꠡ꠆ꠐꠤꠞ ꠎꠤꠝ꠆ꠝꠣꠄ ꠀꠝꠤ ꠔꠥꠝꠣꠞꠦ ꠡꠝꠎꠣꠁꠍꠤ। ꠀꠞ ꠁꠔꠣ ꠢꠇꠟꠔꠣꠄꠅ ꠎꠥꠖꠤ ꠔꠥꠝꠣꠞ ꠝꠘ ꠘꠣ ꠜꠞꠔ, ꠔꠦ ꠀꠝꠤ ꠔꠥꠝꠣꠞꠦ ꠀꠞꠅ ꠛꠦꠡ ꠇꠞꠤ ꠖꠤꠟꠣꠝ ꠅꠘꠦ। ৯ ꠅꠁꠟꠦ ꠝꠣꠛꠥꠖꠞ ꠘꠎꠞꠅ ꠎꠦ ꠎꠤꠘꠤꠡ ꠈꠣꠞꠣꠙ, ꠔꠥꠝꠤ ꠇꠦꠘꠦ ꠁ ꠇꠣꠝ ꠇꠞꠤꠀ ꠔꠣꠘ ꠢꠥꠇꠥꠝꠞꠦ ꠔꠥꠌ꠆ꠍ ꠇꠞꠟꠣꠄ? ꠔꠥꠝꠤ ꠔ ꠢꠤꠐ꠆ꠐꠤ ꠃꠞꠤꠀꠞꠦ ꠈꠥꠘ ꠇꠞꠍ, ꠔꠣꠞ ꠛꠤꠛꠤꠞꠦ ꠘꠤꠎꠞ ꠛꠃ ꠛꠣꠘꠣꠁꠍ, ꠀꠞ ꠛꠘꠤ-ꠀꠝ꠆ꠝꠣꠘꠞ ꠀꠔꠣꠘꠦ ꠔꠥꠝꠤ ꠔꠣꠞꠦ ꠝꠣꠞꠣꠁꠍ। ১০ ꠔꠥꠝꠤ ꠔ ꠀꠝꠣꠞꠦ ꠔꠥꠌ꠆ꠍ ꠇꠞꠍ। ꠢꠤꠐ꠆ꠐꠤ ꠃꠞꠤꠀꠞ ꠛꠤꠛꠤꠞꠦ ꠘꠤꠎꠞ ꠛꠃ ꠛꠣꠘꠣꠁꠍ। ꠄꠞꠖꠣꠄ ꠔꠥꠝꠣꠞ ꠙꠞꠤꠛꠣꠞꠅ ꠇꠥꠘꠥꠖꠤꠘ ꠈꠥꠘ-ꠈꠣꠞꠣꠙꠤ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ। ১১ ꠝꠣꠛꠥꠖꠦ ꠀꠞꠅ ꠇꠁꠍꠂꠘ, ꠀꠝꠤ ꠔꠥꠝꠣꠞ ꠙꠞꠤꠛꠣꠞ ꠕꠣꠇꠤꠃ, ꠔꠥꠝꠣꠞ ꠟꠣꠉꠤ ꠝꠍꠤꠛꠔ ꠙꠄꠖꠣ ꠇꠞꠝꠥ। ꠔꠥꠝꠣꠞ ꠌꠈꠥꠞ ꠍꠣꠝꠘꠦ ꠔꠥꠝꠣꠞ ꠛꠤꠛꠤꠘ꠆ꠔꠞꠦ ꠘꠤꠀ, ꠔꠥꠝꠣꠞ ꠀꠙꠘ ꠝꠣꠘꠡꠞ ꠀꠔꠅ ꠖꠤꠝꠥ। ꠢꠦ ꠢꠇ꠆ꠇꠟꠞ ꠍꠣꠝꠘꠦ ꠔꠥꠝꠣꠞ ꠛꠤꠛꠤꠘ ꠟꠁꠀ ꠢꠥꠔꠤꠛ। ১২ ꠔꠥꠝꠤ ꠔ ꠁꠔꠣ ꠇꠞꠍ ꠟꠥꠇꠣꠁꠀ, ꠅꠁꠟꠦ ꠀꠝꠤ ꠇꠞꠝꠥ ꠢꠇꠟꠞ ꠍꠣꠝꠘꠦ, ꠔꠣꠝꠣꠝ ꠛꠘꠤ ꠁꠍꠞꠣꠁꠟꠞ ꠌꠃꠈꠞ ꠍꠣꠝꠘꠦ। ১৩ ꠅꠃ ꠖꠣꠃꠖꠦ ꠘꠣꠕꠣꠘ ꠘꠛꠤꠞꠦ ꠇꠁꠟꠣ, “ꠀꠝꠤ ꠔ ꠝꠣꠛꠥꠖꠞ ꠖꠞꠛꠣꠞꠅ ꠘꠣꠚꠞꠝꠣꠘꠤ ꠇꠞꠤꠟꠤꠍꠤ।” ꠔꠦꠃ ꠘꠣꠕꠣꠘꠦ ꠇꠁꠟꠣ, “ꠀꠁꠌ꠆ꠍꠣ, ꠝꠣꠛꠥꠖꠦ ꠀꠙꠘꠣꠞ ꠉꠥꠘꠣꠞ ꠝꠣꠚꠤ ꠖꠤꠍꠂꠘ, ꠀꠙꠘꠦ ꠅꠈꠘ ꠝꠞꠔꠣ ꠘꠣꠄ। ১৪ ꠅꠁꠟꠦ ꠀꠙꠘꠦ ꠁ ꠇꠣꠝ ꠇꠞꠤꠀ ꠝꠣꠛꠥꠖꠞ ꠖꠥꠡꠝꠘ ꠅꠇꠟꠞꠦ, ꠇꠥꠚꠥꠞꠤ ꠇꠞꠣꠞ ꠛꠃꠔ ꠛꠠ ꠡꠥꠎꠥꠉ ꠇꠞꠤ ꠖꠤꠍꠂꠘ। ꠄꠞꠖꠣꠄ ꠀꠙꠘꠣꠞ ꠎꠦ ꠙꠥꠀ ꠙꠄꠖꠣ ꠅꠁꠍꠦ, ꠢꠦ ꠘꠤꠌ꠆ꠌꠤꠔ ꠝꠣꠞꠣ ꠎꠣꠁꠛ।” ১৫ ꠅꠈꠣꠘ ꠇꠁꠀ ꠘꠣꠕꠣꠘ ꠘꠛꠤ ꠘꠤꠎꠞ ꠛꠣꠠꠤꠔ ꠉꠦꠟꠣꠉꠤ। ꠃꠞꠤꠀꠞ ꠛꠃꠞ ꠊꠞꠅ ꠖꠣꠃꠖꠞ ꠎꠦ ꠙꠥꠀ ꠙꠄꠖꠣ ꠅꠁꠍꠤꠟ, ꠝꠣꠛꠥꠖꠞ ꠉꠎꠛꠦ ꠔꠣꠞ ꠛꠦꠎꠥꠁꠔꠣ ꠛꠦꠝꠣꠞ ꠅꠁꠟ। ১৬ ꠔꠦꠃ ꠖꠣꠃꠖꠦ ꠙꠥꠀꠞ ꠟꠣꠉꠤ ꠀꠟ꠆ꠟꠣꠞ ꠖꠞꠛꠣꠞꠅ ꠚꠞꠤꠀꠖ ꠇꠞꠟꠣ। ꠔꠣꠁꠘ ꠞꠥꠎꠣ ꠞꠣꠈꠟꠣ, ꠘꠤꠎꠞ ꠊꠞꠞ ꠝꠣꠐꠤꠔ ꠢꠥꠔꠤꠀ ꠙꠥꠞꠣ ꠞꠣꠁꠔ ꠇꠣꠐꠣꠁꠟꠣ। ১৭ ꠔꠣꠘ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠔꠣꠘꠦ ꠝꠣꠐꠤ ꠕꠣꠇꠤ ꠃꠑꠣꠞ ꠟꠣꠉꠤ ꠝꠤꠘꠔ-ꠇꠣꠎ꠆ꠎꠤ ꠇꠞꠟꠣ, ꠅꠁꠟꠦ ꠔꠣꠁꠘ ꠁꠔꠣ ꠝꠣꠘꠟꠣ ꠘꠣ। ꠔꠣꠞꠣꠞ ꠟꠉꠦ ꠇꠥꠘꠥ ꠈꠣꠘꠣ-ꠙꠤꠘꠣꠅ ꠈꠣꠁꠟꠣ ꠘꠣ। ১৮ ꠛꠦꠝꠣꠞꠞ ꠡꠣꠔ ꠖꠤꠘꠞ ꠖꠤꠘ ꠙꠥꠀꠉꠥ ꠝꠣꠞꠣ ꠉꠦꠟ। ꠅꠁꠟꠦ ꠔꠣꠞ ꠝꠞꠣꠞ ꠈꠛꠞꠅ ꠃꠎꠤꠞ-ꠘꠣꠎꠤꠞ ꠅꠇꠟꠦ ꠛꠣꠖꠡꠣꠞꠦ ꠎꠣꠘꠣꠁꠔꠦ ꠡꠣꠅꠡ ꠙꠣꠁꠟꠣ ꠘꠣ। ꠔꠣꠞꠣ ꠝꠣꠔꠣ-ꠝꠣꠔꠤ ꠇꠞꠟꠣ, “ꠙꠥꠀꠉꠥ ꠎꠤꠔꠣ ꠕꠣꠇꠔꠦꠃ ꠔꠣꠁꠘ ꠀꠝꠞꠣꠞ ꠇꠕꠣ ꠢꠥꠘꠍꠂꠘ ꠘꠣ। ꠔꠦ ꠅꠈꠘ ꠀꠝꠞꠣ ꠇꠤꠟꠣ ꠝꠞꠣꠞ ꠈꠛꠞ ꠎꠣꠘꠣꠁꠔꠣꠝ? ꠁꠈꠣꠘ ꠢꠥꠘꠤꠀ ꠔꠣꠁꠘ ꠎꠥꠖꠤ ꠘꠤꠎꠞ ꠇꠥꠘꠥ ꠈꠦꠔꠤ ꠇꠞꠤꠟꠣꠁꠘ?” ১৯ ꠔꠣꠞꠣꠞ ꠁ ꠇꠣꠘꠣ-ꠇꠣꠘꠤꠞ ꠜꠣꠛ ꠖꠦꠈꠤꠀ ꠖꠣꠃꠖꠦ ꠛꠥꠎꠤꠟꠤꠟꠣ, ꠙꠥꠀꠉꠥ ꠝꠞꠤ ꠉꠦꠍꠦ। ꠔꠣꠁꠘ ꠎꠤꠇꠣꠁꠟꠣ, “ꠇꠤꠔꠣ ꠛꠣ, ꠢꠦ ꠘꠣꠁ ꠘꠤ?” ꠔꠣꠞꠣ ꠇꠁꠟꠣ, “ꠎꠤꠅꠄ ꠢꠥꠎꠥꠞ, ꠔꠣꠁꠘ ꠖꠥꠘꠤꠀ ꠕꠣꠇꠤ ꠉꠦꠍꠂꠘꠉꠤ।” ২০ ꠅꠃ ꠖꠣꠃꠖ ꠝꠣꠐꠤ ꠕꠣꠇꠤ ꠃꠑꠤꠀ ꠘꠣꠁꠀ-ꠗꠁꠀ ꠔꠦꠟ-ꠙꠣꠘꠤ ꠝꠣꠈꠤꠟꠣ। ꠀꠞ ꠇꠣꠙꠠ-ꠌꠥꠙꠠ ꠛꠖꠟꠣꠁꠀ, ꠝꠣꠛꠥꠖꠞ ꠊꠞꠅ ꠉꠤꠀ ꠍꠁꠎꠖꠣꠔ ꠙꠠꠤꠀ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠟꠣ। ꠛꠣꠖꠦ ꠘꠤꠎꠞ ꠊꠞꠅ ꠀꠁꠀ ꠈꠣꠘꠤ ꠀꠘꠣꠞ ꠢꠥꠇꠥꠝ ꠖꠤꠟꠣ। ꠀꠞ ꠈꠣꠘꠤ ꠖꠦꠅꠀ ꠅꠁꠟꠦ ꠈꠣꠘꠣ-ꠖꠣꠘꠣ ꠈꠣꠁꠟꠣ। ২১ ꠅꠃ ꠔꠣꠘ ꠃꠎꠤꠞ-ꠘꠣꠎꠤꠞꠦ ꠀꠁꠀ ꠎꠤꠇꠣꠁꠟꠣ, “ꠛꠣꠖꠡꠣ ꠘꠣꠝꠖꠣꠞ, ꠀꠙꠘ ꠁꠔꠣ ꠇꠞꠟꠣ ꠇꠦꠘꠦ? ꠙꠥꠀꠉꠥ ꠎꠤꠔꠣ ꠕꠣꠇꠔꠦ ꠀꠙꠘꠦ ꠞꠥꠎꠣ ꠞꠣꠈꠤꠀ ꠇꠣꠘ꠆ꠖꠣ-ꠇꠣꠐꠤ ꠇꠞꠟꠣ, ꠅꠁꠟꠦ ꠢꠦ ꠝꠞꠣꠞ ꠛꠣꠖꠦ ꠀꠙꠘꠦ ꠃꠑꠤꠀ ꠈꠣꠘꠣ-ꠖꠣꠘꠣ ꠈꠣꠁꠟꠣ।” ২২ ꠔꠣꠁꠘ ꠎꠥꠀꠙ ꠖꠤꠟꠣ, “ꠢꠦ ꠎꠤꠔꠣ ꠕꠣꠇꠔꠦ ꠀꠝꠤ ꠞꠥꠎꠣ ꠞꠁꠀ ꠇꠣꠘ꠆ꠖꠣ-ꠇꠣꠐꠤ ꠇꠞꠟꠣꠝ, ꠝꠘꠅ ꠇꠞꠟꠣꠝ, ꠝꠣꠛꠥꠖꠦ ꠎꠥꠖꠤ ꠀꠝꠣꠞꠦ ꠞꠢꠝ ꠇꠞꠂꠘ, ꠀꠞ ꠢꠦ ꠢꠣꠄꠀꠔꠦ ꠛꠣꠌꠦ। ২৩ ꠅꠁꠟꠦ ꠅꠈꠘ ꠎꠦꠛꠟꠣ ꠖꠦꠈꠟꠣꠝ ꠢꠦ ꠝꠣꠞꠣꠃ ꠉꠦꠍꠦ, ꠔꠦ ꠀꠞ ꠇꠦꠘꠦ ꠞꠥꠎꠣ ꠞꠣꠈꠔꠣꠝ? ꠀꠝꠤ ꠀꠞ ꠔꠣꠞꠦ ꠚꠤꠞꠣꠁ ꠀꠘꠔꠣꠝ ꠙꠣꠞꠝꠥ ꠘꠤ? ꠛꠞꠋ ꠀꠝꠣꠞꠦꠃ ꠔꠣꠞ ꠉꠦꠍꠦ ꠎꠣꠁꠔꠦ ꠅꠁꠛ। ꠢꠦ ꠔ ꠀꠞ ꠚꠤꠞꠔ ꠀꠁꠔ ꠘꠣꠄ।” ২৪-২৫ ꠖꠣꠃꠖꠦ ꠔꠣꠘ ꠛꠤꠛꠤ ꠛꠣꠔꠍꠦꠛꠣꠞꠦ ꠡꠝꠥꠎ ꠖꠤꠟꠣ, ꠔꠣꠁꠘ ꠢꠤꠞꠛꠣꠞ ꠛꠤꠛꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠟꠣ। ꠔꠦꠃ ꠔꠣꠘ ꠀꠞꠇ ꠙꠥꠀ ꠅꠁꠟ। ꠔꠣꠁꠘ ꠁ ꠙꠥꠀꠞ ꠘꠣꠝ ꠕꠁꠟꠣ ꠍꠥꠟꠣꠁꠝꠣꠘ। ꠅꠁꠟꠦ ꠝꠣꠛꠥꠖꠦ ꠍꠥꠟꠣꠁꠝꠣꠘꠞꠦ ꠝꠢꠛ꠆ꠛꠔ ꠇꠞꠤꠀ, ꠔꠣꠁꠘ ꠘꠣꠕꠣꠘ ꠘꠛꠤꠞꠦ ꠙꠣꠑꠣꠁꠀ ꠇꠅꠀꠁꠟꠣ, ꠁ ꠙꠥꠀꠞ ꠘꠣꠝ ꠕꠅ, ꠁꠀꠖꠤꠖꠤꠀ।