১ ꠅꠃ ꠝꠥꠘꠣꠎꠣꠔꠞ ꠛꠣꠖꠦ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠤꠖꠞꠥꠘ ꠘꠣꠝꠞ ꠄꠇ ꠙꠣꠠꠤꠀ ꠈꠣꠟ ꠙꠣꠞꠅꠁꠀ ꠉꠦꠟꠣ। ꠉꠤꠀ ꠔꠣꠞꠣꠞꠦ ꠟꠁꠀ ꠄꠇ ꠛꠣꠉꠣꠘꠞ ꠜꠤꠔꠞꠦ ꠢꠣꠝꠣꠁꠟꠣ। ২ ꠛꠦꠁꠝꠣꠘ ꠁꠢꠥꠖꠣꠄ ꠁ ꠎꠣꠉꠣ ꠌꠤꠘꠔ, ꠇꠣꠞꠘ ꠁꠍꠣꠄ ꠀꠉꠦ ꠛꠃꠔ ꠛꠣꠞ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠅꠘꠅ ꠛꠁꠍꠂꠘ।

৩ ꠄꠞꠝꠣꠎꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠅꠃ ꠁꠢꠥꠖꠣꠞ ꠟꠉꠦ ꠄꠇ ꠖꠟ ꠍꠤꠙꠣꠁ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠇꠄꠎꠘ ꠙꠥꠟꠤꠡ ꠙꠣꠑꠣꠁꠟꠣ। ꠁꠢꠥꠖꠣꠄ ꠔꠣꠞꠣꠞꠦ ꠟꠁꠀ ꠅꠘꠅ ꠀꠁꠟ, ꠅꠃ ꠡꠝꠄ ꠔꠣꠞꠣꠞ ꠀꠔꠅ ꠟꠦꠝ, ꠝꠥꠡꠣꠟ, ꠀꠞ ꠅꠡꠔ꠆ꠞ-ꠡꠡꠔ꠆ꠞ ꠀꠍꠤꠟ।

৪ ꠁꠍꠣꠄ ꠀꠉ ꠕꠣꠇꠤꠃ ꠢꠇꠟꠔꠣ ꠎꠣꠘꠔꠣ, ꠔꠣꠘ ꠃꠙꠞꠦ ꠇꠤꠔꠣ ꠊꠐꠛ। ꠄꠞꠟꠣꠉꠤ ꠔꠣꠁꠘ ꠀꠉꠥꠀꠁꠀ ꠀꠁꠀ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠇꠣꠞꠦ ꠔꠥꠇꠣꠁꠞꠣ?” ৫ ꠔꠣꠞꠣ ꠇꠁꠟꠣ, “ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦ।” ꠔꠣꠁꠘ ꠇꠁꠟꠣ, “ꠀꠝꠤꠃ ꠢꠦꠁꠘ।” ꠅꠃ ꠡꠝꠄ ꠛꠦꠁꠝꠣꠘ ꠁꠢꠥꠖꠣꠅ ꠔꠣꠞꠣꠞ ꠟꠉꠦ ꠀꠍꠤꠟ। ৬ ꠁꠍꠣꠄ ꠎꠦꠛꠟꠣ ꠇꠁꠟꠣ, “ꠀꠝꠤꠃ ꠢꠦꠁꠘ,” ꠁꠈꠣꠘ ꠢꠥꠘꠤꠀꠃ ꠔꠣꠞꠣ ꠈꠞꠦꠖꠤ ꠉꠤꠀ ꠝꠣꠐꠤꠔ ꠙꠠꠤꠉꠦꠟꠣ। ৭ ꠔꠣꠁꠘ ꠢꠤꠞꠛꠣꠞ ꠔꠣꠞꠣꠞꠦ ꠎꠤꠇꠣꠁꠟꠣ, “ꠀꠙꠘꠣꠞꠣ ꠇꠣꠞꠦ ꠌꠣꠁꠞꠣ?” ꠔꠣꠞꠣ ꠇꠁꠟꠣ, “ꠘꠣꠍꠣꠞꠔ ꠉꠣꠃꠞ ꠁꠍꠣꠞꠦ।” ৮ ꠔꠣꠁꠘ ꠇꠁꠟꠣ, “ꠀꠝꠤ ꠔ ꠇꠁꠟꠣꠝ, ꠀꠝꠤꠃ ꠢꠦꠁꠘ। ꠀꠙꠘꠣꠞꠣ ꠎꠥꠖꠤ ꠀꠝꠣꠞꠦꠃ ꠔꠥꠇꠣꠘꠤꠔ ꠀꠁꠘ, ꠔꠦ ꠀꠝꠣꠞ ꠟꠉꠞ ꠄꠞꠣꠞꠦ ꠍꠣꠠꠤ ꠖꠦꠃꠇ꠆ꠇꠣ।” ৯ ꠀꠍꠟꠦ ꠁꠟꠣ ꠊꠐꠟ, ꠎꠣꠔꠦ ꠁꠍꠣꠄ ꠀꠉꠦ ꠎꠦꠔꠣ ꠇꠁꠍꠟꠣ ꠅꠔꠣ ꠙꠥꠞꠣ ꠅꠄ। ꠔꠣꠁꠘ ꠇꠁꠍꠟꠣ, “ꠛꠣꠛꠣ, ꠔꠥꠝꠤ ꠎꠦꠞꠣꠞꠦ ꠀꠝꠣꠞ ꠀꠔꠅ ꠡꠙꠤꠍ, ꠄꠞꠣ ꠄꠇꠎꠘꠞꠦꠅ ꠀꠝꠤ ꠈꠥꠀꠁꠍꠤ ꠘꠣ।”

১০ ꠅꠃ ꠡꠝꠄ ꠍꠣꠁꠝꠘ-ꠙꠤꠔꠞꠞ ꠟꠉꠦ ꠄꠇꠈꠣꠘ ꠔꠟꠥꠀꠞ ꠀꠍꠤꠟ, ꠅꠈꠣꠘ ꠛꠣꠞ ꠇꠞꠤꠀ, ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝꠞ ꠒꠣꠁꠘ ꠇꠣꠘ ꠇꠣꠐꠤꠟꠤꠟꠣ। ꠁ ꠉꠥꠟꠣꠝꠞ ꠘꠣꠝ ꠀꠍꠤꠟ ꠝꠣꠟꠇꠥꠍ। ১১ ꠄꠞꠟꠣꠉꠤ ꠁꠍꠣꠄ ꠙꠤꠔꠞꠞꠦ ꠇꠁꠟꠣ, “ꠔꠥꠝꠣꠞ ꠔꠟꠥꠀꠞ ꠈꠣꠙꠅ ꠢꠣꠞꠣꠅ। ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠎꠦ ꠝꠍꠤꠛꠔꠞ ꠙꠤꠀꠟꠣ ꠖꠤꠍꠂꠘ, ꠁꠇꠐꠣꠞ ꠡ꠆ꠛꠣꠖ ꠀꠝꠤ ꠟꠁꠔꠣꠝ ꠘꠣ ꠘꠤ?”

১২ ꠅꠃ ꠡꠝꠄ ꠍꠤꠙꠣꠁ ꠅꠇꠟꠦ, ꠙꠞꠗꠣꠘ ꠍꠤꠙꠣꠁꠄ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠥꠟꠤꠡ ꠅꠇꠟꠦ ꠁꠍꠣꠞꠦ ꠗꠞꠤꠀ ꠛꠣꠘ꠆ꠖꠤꠟꠤꠟ। ১৩ ꠛꠣꠘ꠆ꠖꠤꠀ ꠙꠄꠟꠣ ꠔꠣꠞꠣ ꠢꠣꠘꠘꠞ ꠉꠦꠍꠦ ꠟꠁꠀ ꠉꠦꠟ। ꠁ ꠢꠣꠘꠘ ꠀꠍꠟꠣ ꠢꠃ ꠛꠍꠞꠞ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠢꠃꠞ। ১৪ ꠅꠃ ꠇꠣꠄꠀꠚꠣꠄ ꠀꠉꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠍꠟꠣ, “ꠀꠡ꠆ꠔꠣ ꠎꠣꠔꠤ ꠛꠤꠘꠣꠡ ꠅꠀꠞ ꠌꠣꠁꠔꠦ, ꠢꠇꠟꠞ ꠛꠖꠟꠣ ꠄꠇꠎꠘꠞ ꠝꠞꠘ ꠀꠞꠅ ꠜꠣꠟꠣ।”

১৫ ꠅꠃ ꠡꠝꠄ ꠙꠤꠔꠞ ꠀꠞ ꠀꠞꠇ ꠎꠘ ꠍꠣꠢꠣꠛꠤ ꠁꠍꠣꠞ ꠈꠞꠦ ꠈꠞꠦ ꠉꠦꠟꠣ। ꠅꠃ ꠍꠣꠢꠣꠛꠤꠞꠦ ꠙꠞꠗꠣꠘ ꠁꠝꠣꠝꠦ ꠌꠤꠘꠔꠣ। ꠄꠁꠘ ꠁꠍꠣꠞ ꠟꠉꠦ ꠅꠁꠀ ꠙꠞꠗꠣꠘ ꠁꠝꠣꠝꠞ ꠛꠣꠠꠤꠞ ꠃꠑꠣꠘꠅ ꠢꠣꠝꠣꠁꠟꠣ। ১৬ ꠅꠁꠟꠦ ꠙꠤꠔꠞ ꠛꠣꠁꠞꠦ ꠉꠦꠁꠐꠞ ꠉꠦꠍꠦ ꠃꠛꠣꠁ ꠞꠁꠟꠣ। ꠔꠦꠃ ꠙꠞꠗꠣꠘ ꠁꠝꠣꠝꠞ ꠙꠞꠤꠌꠤꠔ ꠁꠍꠣꠞ ꠅꠃ ꠍꠣꠢꠣꠛꠤ ꠛꠣꠞꠦ ꠉꠤꠀ ꠙꠣꠞꠣꠖꠣꠞ ꠛꠦꠐꠤꠞꠦ ꠇꠁꠀ ꠙꠤꠔꠞꠞꠦ ꠜꠤꠔꠞꠦ ꠀꠘꠣꠁꠟꠣ। ১৭ ꠅꠃ ꠛꠦꠐꠤꠄ ꠙꠤꠔꠞꠞꠦ ꠇꠂꠟ, “ꠔꠥꠝꠤꠅ ꠄꠘ ꠝꠥꠞꠤꠖ ꠘꠤ?” ꠙꠤꠔꠞꠦ ꠇꠁꠟꠣ, “ꠘꠣ, ꠘꠣ, ꠀꠝꠤ ꠘꠣꠄ।” ১৮ ꠅꠃ ꠡꠝꠄ ꠈꠥꠛ ꠡꠤꠔ ꠙꠠꠍꠤꠟ, ꠄꠞꠖꠣꠄ ꠍꠤꠙꠣꠁ ꠀꠞ ꠉꠥꠟꠣꠝ ꠅꠇꠟꠦ ꠃꠑꠣꠘꠅ ꠀꠋꠞꠣꠖꠤ ꠀꠉꠥꠁꠘ ꠗꠞꠣꠁꠀ ꠀꠉꠥꠁꠘ ꠔꠣꠛꠣꠘꠤꠔ ꠟꠣꠉꠟꠣ। ꠙꠤꠔꠞꠦꠅ ꠔꠣꠞꠣꠞ ꠗꠣꠞꠅ ꠃꠛꠣꠁꠀ ꠀꠉꠥꠁꠘ ꠔꠣꠛꠣꠁꠟꠣ।

১৯ ꠅꠃ ꠡꠝꠄ ꠙꠞꠗꠣꠘ ꠁꠝꠣꠝꠦ ꠁꠍꠣꠞꠦ ꠔꠣꠘ ꠃꠝ꠆ꠝꠔ ꠀꠞ ꠔꠣꠘ ꠔꠣꠟꠤꠝꠞ ꠛꠦꠙꠣꠞꠦ ꠎꠤꠇꠣꠁꠟꠣ। ২০ ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠝꠣꠘꠡꠞ ꠍꠣꠝꠘꠦ ꠈꠥꠟꠣ-ꠝꠦꠟꠣ ꠝꠣꠔꠤꠍꠤ। ꠁꠢꠥꠖꠤ ꠅꠇꠟ ꠎꠦꠈꠣꠘꠅ ꠎꠝꠣ ꠅꠁꠘ, ꠅꠔꠣ ꠝꠍꠤꠖꠅ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠦꠡꠣ ꠔꠣꠟꠤꠝ ꠖꠤꠍꠤ। ꠀꠝꠤ ꠔ ꠟꠥꠇꠣꠁꠀ ꠇꠥꠘ꠆ꠔꠣ ꠇꠁꠍꠤ ꠘꠣ। ২১ ꠔꠦ ꠀꠝꠣꠞꠦ ꠀꠞ ꠇꠦꠘꠦ ꠎꠤꠇꠣꠁꠞꠣ? ꠀꠝꠣꠞ ꠔꠣꠟꠤꠝ ꠎꠦꠞꠣ ꠢꠥꠘꠍꠦ, ꠔꠣꠞꠣꠞꠦꠃ ꠎꠤꠇꠣꠃꠇ꠆ꠇꠣ। ꠀꠝꠤ ꠎꠦ ꠔꠣꠟꠤꠝ ꠖꠤꠍꠤ, ꠁꠔꠣ ꠔꠣꠞꠣꠞ ꠎꠣꠘꠣ ꠀꠍꠦ।” ২২ ꠁꠍꠣꠞ ꠁ ꠎꠥꠀꠙ ꠢꠥꠘꠤꠀ, ꠇꠣꠘ꠆ꠖꠣꠔ ꠎꠦ ꠍꠤꠙꠣꠁ ꠅꠇꠟ ꠃꠛꠣ ꠀꠍꠟꠣ, ꠄꠞꠣ ꠄꠇꠎꠘꠦ ꠔꠣꠘꠞꠦ ꠌꠠ ꠝꠣꠞꠤꠀ ꠇꠂꠟ, “ꠔꠥꠁ ꠙꠞꠗꠣꠘ ꠁꠝꠣꠝꠞꠦ ꠅꠟꠣ ꠎꠥꠀꠙ ꠖꠤꠞꠦ ꠘꠤ?” ২৩ ꠔꠣꠁꠘ ꠇꠁꠟꠣ, “ꠀꠝꠤ ꠎꠥꠖꠤ ꠛꠣꠖ ꠇꠥꠘ꠆ꠔꠣ ꠇꠁꠀ ꠕꠣꠇꠤ ꠔꠦ ꠇꠃꠇ꠆ꠇꠣ, ꠀꠞ ꠜꠣꠟꠣ ꠝꠣꠔ ꠝꠣꠔꠤꠟꠦ ꠀꠝꠣꠞꠦ ꠝꠣꠞꠞꠣ ꠇꠦꠘꠦ?” ২৪ ꠅꠃ ꠡꠝꠄ ꠢꠣꠘꠘꠦ ꠛꠣꠘ꠆ꠖꠣ ꠢꠣꠟꠔꠦ ꠁꠍꠣꠞꠦ ꠙꠞꠗꠣꠘ ꠁꠝꠣꠝ ꠇꠣꠄꠀꠚꠣꠞ ꠉꠦꠍꠦ ꠙꠣꠑꠣꠁ ꠖꠤꠟꠣ।

২৫ ꠍꠣꠢꠣꠛꠤ ꠍꠣꠁꠝꠘ-ꠙꠤꠔꠞꠦ ꠎꠦꠛꠟꠣ ꠀꠉꠥꠁꠘ ꠔꠣꠛꠣꠁꠞꠣ, ꠅꠃ ꠡꠝꠄ ꠝꠣꠘꠡꠦ ꠔꠣꠘꠞꠦ ꠇꠂꠟ, “ꠔꠥꠝꠤꠅ ꠔꠣꠞ ꠟꠉꠞ ꠄꠇꠎꠘ ꠍꠣꠢꠣꠛꠤ ꠘꠤ?” ꠙꠤꠔꠞꠦ ꠖꠥꠍꠞꠣꠛꠣꠞ ꠅꠡ꠆ꠛꠤꠇꠣꠞ ꠇꠞꠤ ꠇꠁꠟꠣ, “ꠘꠣ, ꠘꠣ, ꠀꠝꠤ ꠘꠣꠄ।” ২৬ ꠙꠤꠔꠞꠦ ꠎꠣꠞ ꠇꠣꠘ ꠇꠣꠐꠤꠍꠟꠣ, ꠔꠣꠞ ꠄꠇ ꠇꠥꠐꠥꠝ ꠀꠍꠤꠟ ꠙꠞꠗꠣꠘ ꠁꠝꠣꠝꠞ ꠉꠥꠟꠣꠝ। ꠢꠦ ꠇꠂꠟ, “ꠀꠝꠤ ꠛꠣꠉꠣꠘꠞ ꠜꠤꠔꠞꠦ ꠅꠉꠥꠞ ꠟꠉꠦ ꠔꠥꠝꠣꠞꠦꠅ ꠖꠦꠈꠟꠣꠝ ꠘꠣ ꠘꠤ?” ২৭ ꠙꠤꠔꠞꠦ ꠢꠤꠞꠛꠣꠞ ꠅꠡ꠆ꠛꠤꠇꠣꠞ ꠇꠞꠟꠣ, ꠀꠞ ꠟꠉꠦ ꠟꠉꠦꠃ ꠝꠥꠞꠉꠣꠄ ꠛꠣꠋ ꠖꠤꠟꠣꠁꠟ।

২৮ ꠁꠢꠥꠖꠤ ꠘꠦꠔꠣ ꠅꠇꠟꠦ ꠛꠤꠀꠘꠦ ꠁꠍꠣꠞꠦ ꠇꠣꠄꠀꠚꠣꠞ ꠉꠦꠍ ꠕꠣꠇꠤ, ꠞꠥꠝꠣꠘ ꠛꠣꠖꠡꠣꠞ ꠙꠞꠗꠣꠘ ꠢꠣꠇꠤꠝ ꠙꠤꠟꠣꠔꠞ ꠐꠋꠉꠤꠔ ꠟꠁꠀ ꠉꠦꠟꠣ। ꠅꠁꠟꠦ ꠔꠣꠞꠣ ꠛꠣꠠꠤꠞ ꠜꠤꠔꠞꠦ ꠢꠣꠝꠣꠁꠟꠣ ꠘꠣ, ꠎꠣꠔꠦ ꠛꠦ-ꠖꠤꠘ ꠢꠣꠇꠤꠝꠞ ꠛꠣꠠꠤꠔ ꠢꠣꠝꠣꠁꠀ ꠘꠣꠙꠣꠇ ꠘꠣ ꠅꠁꠘ, ꠛꠞꠋ ꠙꠣꠇ-ꠍꠣꠚ ꠞꠁꠀ ꠀꠎꠣꠖꠤ ꠁꠖꠞ ꠈꠣꠘꠤ ꠈꠣꠁꠔꠣ ꠙꠣꠞꠂꠘ। ২৯ ꠄꠞꠟꠣꠉꠤ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔ ꠛꠣꠞꠦ ꠀꠁꠀ ꠎꠤꠇꠣꠁꠟꠣ, “ꠁ ꠛꠦꠐꠣꠞ ꠛꠤꠞꠥꠖ꠆ꠖꠦ ꠔꠥꠝꠞꠣꠞ ꠘꠣꠟꠤꠡ ꠇꠤꠔꠣ?” ৩০ ꠔꠣꠞꠣ ꠇꠁꠟꠣ, “ꠢꠦ ꠅꠙꠞꠣꠗ ꠘꠣ ꠇꠞꠟꠦ ꠔ ꠀꠙꠘꠣꠞ ꠉꠦꠍꠦ ꠀꠘꠟꠣꠝ ꠘꠣ ꠅꠘꠦ।” ৩১ ꠙꠤꠟꠣꠔꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔꠣꠞꠦ ꠟꠁꠀ ꠎꠣꠅꠉꠤ, ꠉꠤꠀ ꠔꠥꠝꠞꠣꠞ ꠡꠞꠤꠅꠔ ꠝꠣꠚꠤꠇ ꠛꠤꠌꠣꠞ ꠇꠞꠤꠟꠣꠅ।” ꠁꠈꠣꠘ ꠢꠥꠘꠤꠀ ꠔꠣꠞꠣ ꠙꠤꠟꠣꠔꠞꠦ ꠇꠁꠟꠣ, “ꠇꠥꠘꠥ ꠝꠣꠘꠡꠞꠦ ꠎꠣꠘꠦ ꠝꠣꠞꠣꠞ ꠝꠔ ꠡꠣꠎꠣ ꠖꠦꠅꠀꠞ ꠈꠦꠝꠔꠣ ꠀꠝꠞꠣꠞ ꠀꠔꠅ ꠘꠣꠁ, ꠈꠣꠟꠤ ꠞꠥꠝꠣꠘ ꠅꠇꠟꠞ ꠀꠔꠅ ꠀꠍꠦ।” ৩২ ꠘꠤꠎꠞ ꠝꠃꠔ ꠇꠤꠟꠣꠘ ꠅꠁꠛ, ꠁꠍꠣꠄ ꠁꠈꠣꠘ ꠀꠉꠦꠃ ꠇꠁꠍꠂꠘ। ꠔꠦ ꠁꠔꠣ ꠅꠁꠟ, ꠎꠣꠔꠦ ꠔꠣꠘ ꠅꠃ ꠇꠕꠣ ꠚꠟꠦ।

৩৩ ꠔꠦꠃ ꠙꠤꠟꠣꠔ ꠢꠤꠞꠛꠣꠞ ꠐꠋꠉꠤꠞ ꠜꠤꠔꠞꠦ ꠢꠣꠝꠣꠁꠟꠣ ꠀꠞ ꠁꠍꠣꠞꠦ ꠒꠣꠇ ꠖꠤꠀ ꠇꠁꠟꠣ, “ꠅꠛꠣ, ꠔꠥꠝꠤ ꠇꠤꠔꠣ ꠁꠢꠥꠖꠤ ꠅꠇꠟꠞ ꠛꠣꠖꠡꠣ ꠘꠤ?” ৩৪ ꠔꠣꠁꠘ ꠎꠥꠀꠙ ꠖꠤꠟꠣ, “ꠀꠙꠘꠦ ꠘꠤꠎꠦ ꠅꠃ ꠇꠕꠣ ꠇꠁꠞꠣ, ꠘꠣ ꠝꠣꠘꠡꠦ ꠀꠝꠣꠞ ꠛꠦꠙꠣꠞꠦ ꠀꠙꠘꠣꠞꠦ ꠇꠁꠍꠦ?” ৩৫ ꠙꠤꠟꠣꠔꠦ ꠎꠥꠀꠙ ꠖꠤꠟꠣ, “ꠀꠝꠤ ꠇꠤꠔꠣ ꠁꠢꠥꠖꠤ ꠘꠤ? ꠔꠥꠝꠣꠞ ꠘꠤꠎꠞ ꠎꠣꠔꠤꠞ ꠝꠣꠘꠡꠦ ꠀꠞ ꠛꠠ ꠁꠝꠣꠝ ꠅꠇꠟꠦ ꠔꠥꠝꠣꠞꠦ ꠀꠝꠣꠞ ꠀꠔꠅ ꠖꠤꠍꠦ। ꠇꠅ, ꠔꠥꠝꠤ ꠇꠤꠔꠣ ꠇꠞꠍ?” ৩৬ ꠁꠍꠣꠄ ꠇꠁꠟꠣ, “ꠀꠝꠣꠞ ꠛꠣꠖꠡꠣꠁ ꠁ ꠖꠥꠘꠤꠀꠞ ꠘꠣꠄ। ꠀꠝꠣꠞ ꠛꠣꠖꠡꠣꠁ ꠎꠥꠖꠤ ꠅꠃ ꠖꠥꠘꠤꠀꠞ ꠅꠁꠔ, ꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞ ꠀꠔꠅ ꠀꠝꠤ ꠘꠣ ꠙꠠꠣꠞ ꠟꠣꠉꠤ ꠀꠝꠣꠞ ꠝꠣꠘꠡꠦ ꠟꠣꠠꠣꠁ ꠇꠞꠟ ꠅꠘꠦ, ꠅꠁꠟꠦ ꠀꠝꠣꠞ ꠛꠣꠖꠡꠣꠁ ꠔ ꠁꠘꠞ ꠘꠣꠄ।” ৩৭ ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠎꠤꠇꠣꠁꠟꠣ, “ꠔꠣꠁꠟꠦ ꠔꠥꠝꠤ ꠇꠤꠔꠣ ꠛꠣꠖꠡꠣ ꠘꠤ?” ꠁꠍꠣꠄ ꠇꠁꠟꠣ, “ꠀꠙꠘꠦꠃ ꠔ ꠇꠁꠞꠣ, ꠀꠝꠤ ꠛꠣꠖꠡꠣ। ꠢꠥꠘꠃꠇ꠆ꠇꠣ, ꠢꠇꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠦꠅꠀꠞ ꠟꠣꠉꠤ ꠀꠝꠤ ꠖꠥꠘꠤꠀꠔ ꠀꠁꠍꠤ। ꠎꠣꠞꠣ ꠢꠇꠞ ꠟꠉꠦ ꠀꠍꠦ, ꠔꠣꠞꠣ ꠀꠝꠣꠞ ꠇꠕꠣ ꠢꠥꠘꠦ।”

৩৮ ꠙꠤꠟꠣꠔꠦ ꠔꠣꠘꠞꠦ ꠇꠁꠟꠣ, “ꠔꠦ ꠢꠇꠈꠣꠘ ꠇꠤꠔꠣ?” ꠅꠈꠣꠘ ꠇꠁꠀ ꠔꠣꠁꠘ ꠢꠤꠞꠛꠣꠞ ꠛꠣꠞꠦ ꠉꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠀꠝꠤ ꠔ ꠄꠞ ꠇꠥꠘꠥ ꠖꠥꠡ ꠙꠣꠁꠍꠤ ꠘꠣ। ৩৯ ꠅꠁꠟꠦ ꠔꠥꠝꠞꠣꠞ ꠔ ꠄꠇꠐꠣ ꠞꠦꠅꠀꠎ ꠀꠍꠦ, ꠀꠎꠣꠖꠤ ꠁꠖꠞ ꠡꠝꠄ ꠀꠝꠤ ꠄꠇꠎꠘ ꠇꠄꠅꠖꠤꠞꠦ ꠈꠣꠟꠣꠍ ꠖꠦꠁ। ꠔꠦ ꠔꠥꠝꠞꠣ ꠌꠣꠅ ꠘꠤ, ꠀꠝꠤ ꠁꠢꠥꠖꠤꠞ ꠅꠃ ꠛꠣꠖꠡꠣꠞꠦ ꠍꠣꠠꠤ ꠖꠤꠔꠣꠝ?” ৪০ ꠁꠈꠣꠘ ꠢꠥꠘꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠂꠟ, “ꠘꠣ, ꠘꠣ, ꠄꠞꠦ ꠘꠣ, ꠛꠣꠞꠣꠛ꠆ꠛꠣꠞꠦ ꠍꠣꠠꠤ ꠖꠦꠃꠇ꠆ꠇꠣ।” ꠅꠃ ꠛꠣꠞꠣꠛ꠆ꠛꠣ ꠀꠍꠤꠟ ꠄꠇ ꠒꠣꠇꠣꠁꠔ।

১ ꠛꠣꠖꠦ ꠞꠥꠝꠣꠘ ꠢꠣꠇꠤꠝ ꠙꠤꠟꠣꠔꠦ ꠁꠍꠣꠞꠦ ꠌꠣꠛꠥꠇ ꠝꠣꠞꠣꠞ ꠢꠥꠇꠥꠝ ꠖꠤꠟꠣ। ২ ꠀꠞ ꠍꠤꠙꠣꠁ ꠅꠇꠟꠦ ꠉꠍꠣ-ꠇꠣꠐꠣ ꠖꠤꠀ ꠄꠇ ꠝꠥꠇꠥꠐ ꠛꠣꠘꠣꠁꠀ ꠔꠣꠘ ꠝꠣꠕꠣꠔ ꠖꠤꠟ, ꠀꠞ ꠛꠣꠁꠋꠉꠘꠤ ꠞꠋꠉꠞ ꠛꠣꠖꠡꠣꠁ ꠟꠦꠛꠣꠍ ꠚꠤꠘ꠆ꠖꠣꠁꠟ। ৩ ꠛꠣꠖꠦ ꠔꠣꠞꠣ ꠔꠣꠘ ꠍꠣꠝꠘꠦ ꠀꠁꠀ ꠇꠂꠟ, “ꠅ ꠁꠢꠥꠖꠤꠞ ꠛꠣꠖꠡꠣ, ꠝꠣꠞꠢꠣꠛꠣ!” ꠅꠈꠣꠘ ꠇꠁꠀ ꠇꠁꠀ ꠔꠣꠞꠣ ꠔꠣꠘ ꠉꠣꠟꠅ ꠌꠠꠣꠁꠟ। ৪ ꠔꠦꠃ ꠙꠤꠟꠣꠔ ꠢꠤꠞꠛꠣꠞ ꠛꠣꠞꠦ ꠀꠁꠀ ꠇꠁꠟꠣ, “ꠢꠥꠘꠅ, ꠀꠝꠤ ꠄꠞꠦ ꠔꠥꠝꠞꠣꠞ ꠉꠦꠍꠦ ꠛꠣꠞ ꠇꠞꠤꠀ ꠀꠘꠤꠀꠞ, ꠔꠦꠃ ꠔꠥꠝꠞꠣ ꠛꠥꠎꠛꠣꠄ, ꠀꠝꠤ ꠄꠞ ꠇꠥꠘꠥ ꠖꠥꠡꠃ ꠙꠣꠁꠞꠣꠝ ꠘꠣ।” ৫ ꠢꠃ ꠉꠍꠣ-ꠇꠣꠐꠣꠞ ꠝꠥꠇꠥꠐ ꠀꠞ ꠛꠣꠁꠋꠉꠘꠤ ꠟꠦꠛꠣꠍ ꠚꠤꠘ꠆ꠖꠣ ꠢꠣꠟꠔꠦ ꠁꠍꠣ ꠛꠣꠞꠅꠁꠀ ꠀꠁꠟꠣ, ꠀꠞ ꠙꠤꠟꠣꠔꠦ ꠇꠁꠟꠣ, “ꠅꠃ ꠖꠦꠈꠅ, ꠢꠃ ꠝꠣꠘꠥꠡ।” ৬ ꠁꠍꠣꠞꠦ ꠖꠦꠈꠤꠀ ꠛꠠ ꠁꠝꠣꠝ ꠀꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠙꠥꠟꠤꠡ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠔꠣꠞꠦ ꠍꠟꠤꠛꠅ ꠖꠦꠅ, ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠀꠝꠤ ꠔ ꠔꠣꠞ ꠇꠥꠘꠥ ꠖꠥꠡ ꠙꠣꠁꠍꠤ ꠘꠣ, ꠔꠦ ꠔꠥꠝꠞꠣꠃ ꠔꠣꠞꠦ ꠘꠤꠀ ꠍꠟꠤꠛꠅ ꠉꠣꠕꠤꠟꠣꠅ।” (ꠁ ꠍꠟꠤꠛ ꠅꠁꠟ ꠟꠣꠇꠠꠤꠖꠤ ꠛꠣꠘꠣꠁꠟ, ꠝꠣꠘꠡꠞꠦ ꠟꠐꠇꠣꠁꠀ ꠝꠣꠞꠣꠞ ꠄꠇ ꠎꠤꠘꠤꠡ।) ৭ ꠁꠢꠥꠖꠤ ꠘꠦꠔꠣ ꠅꠇꠟꠦ ꠙꠤꠟꠣꠔꠞꠦ ꠇꠁꠟꠣ, “ꠀꠝꠞꠣꠞ ꠡꠞꠤꠅꠔ ꠝꠣꠚꠤꠇ ꠔꠣꠞ ꠝꠞꠘ ꠅꠀ ꠃꠌꠤꠔ, ꠇꠣꠞꠘ ꠢꠦ ꠘꠤꠎꠞꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ ꠇꠁꠍꠦ।”

৮ ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠀꠞꠅ ꠛꠦꠡꠤ ꠒꠞꠣꠁ ꠉꠦꠟꠣ। ৯ ꠔꠣꠁꠘ ꠢꠤꠞꠛꠣꠞ ꠐꠋꠉꠤ-ꠊꠞꠞ ꠜꠤꠔꠞꠦ ꠢꠣꠝꠣꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠔꠥꠝꠤ ꠇꠥꠀꠁ ꠕꠣꠇꠤ ꠀꠁꠍ?” ꠅꠁꠟꠦ ꠁꠍꠣꠄ ꠇꠥꠘꠥ ꠎꠥꠀꠙ ꠖꠤꠟꠣ ꠘꠣ। ১০ ꠄꠞꠖꠣꠄ ꠙꠤꠟꠣꠔꠦ ꠁꠍꠣꠞꠦ ꠇꠁꠟꠣ, “ꠔꠥꠝꠤ ꠀꠝꠣꠞ ꠝꠣꠔꠞ ꠇꠥꠘꠥ ꠎꠥꠀꠙ ꠖꠤꠔꠣꠄ ꠘꠣ ꠘꠤ? ꠔꠥꠝꠤ ꠎꠣꠘꠅ ꠘꠤ, ꠔꠥꠝꠣꠞꠦ ꠈꠣꠟꠣꠍ ꠖꠤꠛꠣꠞ ꠛꠣ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠈꠦꠝꠔꠣ ꠀꠝꠣꠞ ꠀꠍꠦ?” ১১ ꠔꠦꠃ ꠁꠍꠣꠄ ꠇꠁꠟꠣ, “ꠃꠙꠞꠦ ꠕꠣꠇꠤ ꠀꠙꠘꠣꠞꠦ ꠈꠦꠝꠔꠣ ꠘꠣ ꠖꠦꠅꠀ ꠅꠁꠟꠦ, ꠀꠝꠣꠞ ꠃꠙꠞꠦ ꠀꠙꠘꠣꠞ ꠇꠥꠘꠥ ꠈꠦꠝꠔꠣꠃ ꠕꠣꠇꠔ ꠘꠣ। ꠄꠞꠟꠣꠉꠤ ꠎꠦ ꠝꠣꠘꠡꠦ ꠀꠝꠣꠞꠦ ꠀꠙꠘꠣꠞ ꠀꠔꠅ ꠗꠞꠣꠁ ꠖꠤꠍꠦ, ꠢꠦ-ꠃ ꠛꠠ ꠉꠥꠘꠣꠉꠣꠞ।” ১২ ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠈꠣꠟꠣꠍ ꠖꠤꠟꠣꠁꠔꠣ ꠌꠣꠁꠟꠣ, ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠦ ꠌꠤꠟ꠆ꠟꠣꠁꠀ ꠇꠁꠟꠣ, “ꠀꠙꠘꠦ ꠎꠥꠖꠤ ꠄꠞꠦ ꠈꠣꠟꠣꠍ ꠖꠤꠟꠣꠁꠘ, ꠔꠦ ꠀꠙꠘꠦ ꠞꠥꠝꠣꠘ ꠛꠣꠖꠡꠣꠞ ꠖꠥꠡ꠆ꠔ ꠘꠣꠄ। ꠎꠦ ꠝꠣꠘꠡꠦ ꠘꠤꠎꠞꠦ ꠛꠣꠖꠡꠣ ꠇꠁꠀ ꠖꠣꠛꠤ ꠇꠞꠦ, ꠢꠦ ꠔ ꠞꠥꠝꠣꠘ ꠛꠣꠖꠡꠣꠞ ꠖꠥꠡꠝꠘ।”

১৩ ꠁꠈꠣꠘ ꠢꠥꠘꠤꠀ ꠙꠤꠟꠣꠔꠦ ꠁꠍꠣꠞꠦ ꠛꠣꠞ ꠇꠞꠤ ꠀꠘꠟꠣ ꠀꠞ ꠙꠣꠔ꠆ꠔꠞꠖꠤ-ꠛꠣꠘ꠆ꠖꠣ ꠘꠣꠝꠞ ꠄꠇ ꠃꠑꠣꠘꠅ ꠛꠤꠌꠣꠞꠞ ꠀꠡꠘꠅ ꠛꠁꠟꠣ। ꠁꠛꠞꠣꠘꠤ ꠜꠣꠡꠣꠄ ꠁ ꠃꠑꠣꠘꠞꠦ ꠉꠣꠛ꠆ꠛꠣꠕꠣ ꠇꠅꠀ ꠅꠄ। ১৪ ꠁ ꠖꠤꠘ ꠀꠍꠤꠟ ꠀꠎꠣꠖꠤ ꠁꠖꠞ ꠀꠄꠅꠎꠘꠞ ꠖꠤꠘ। ꠅꠃ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ ꠅꠁꠉꠦꠍꠦ। ꠙꠤꠟꠣꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠁꠟꠣ, “ꠅꠃ ꠖꠦꠈꠅ, ꠔꠥꠝꠞꠣꠞ ꠛꠣꠖꠡꠣ।” ১৫ ꠁꠍꠣꠞꠦ ꠖꠦꠈꠤꠀ ꠔꠣꠞꠣ ꠌꠤꠟ꠆ꠟꠣꠁꠀ ꠇꠂꠟ, “ꠅꠉꠥꠞꠦ ꠢꠞꠣꠅ, ꠢꠞꠣꠅ, ꠔꠣꠞꠦ ꠍꠟꠤꠛꠅ ꠖꠦꠅ।” ꠙꠤꠟꠣꠔꠦ ꠇꠁꠟꠣ, “ꠔꠥꠝꠞꠣꠞ ꠛꠣꠖꠡꠣꠞꠦ ꠀꠝꠤ ꠍꠟꠤꠛꠅ ꠖꠤꠟꠣꠁꠔꠣꠝ ꠘꠤ?” ꠛꠠ ꠁꠝꠣꠝ ꠅꠇꠟꠦ ꠇꠁꠟꠣ, “ꠈꠣꠟꠤ ꠞꠥꠝꠣꠘ ꠛꠣꠖꠡꠣ ꠍꠣꠠꠣ, ꠀꠝꠞꠣꠞ ꠀꠞ ꠇꠥꠘꠥ ꠛꠣꠖꠡꠣ ꠘꠣꠁ।” ১৬ ꠔꠦꠃ ꠢꠣꠇꠤꠝ ꠙꠤꠟꠣꠔꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣꠞ ꠟꠣꠉꠤ ꠁꠍꠣꠞꠦ ꠔꠣꠞꠣꠞ ꠀꠔꠅ ꠡꠝꠎꠣꠁ ꠖꠤꠟꠣ, ꠀꠞ ꠍꠤꠙꠣꠁ ꠅꠇꠟꠦ ꠔꠣꠘꠞꠦ ꠟꠁꠀ ꠉꠦꠟꠣ।