১ ꠛꠣꠖꠦ ꠝꠣꠛꠥꠖꠦ ꠚꠞꠝꠣꠁꠟꠣ, ২ “ꠅ ꠛꠘꠤ ꠁꠍꠞꠣꠁꠟ ꠅꠇꠟ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ। ꠝꠤꠡꠞ ꠖꠦꠡꠞ ꠉꠥꠟꠣꠝꠤ ꠕꠣꠇꠤ ꠀꠝꠤꠃ ꠔꠥꠝꠞꠣꠞꠦ ꠈꠣꠟꠣꠍ ꠇꠞꠤ ꠀꠘꠍꠤ।

৩ “ꠀꠝꠣꠞ ꠛꠖꠟꠣ ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠖꠦꠛꠔꠣ ꠝꠣꠘꠤꠅ ꠘꠣ।

৪ “ꠙꠥꠎꠣ ꠇꠞꠣꠞ ꠘꠤꠅꠔꠦ ꠔꠥꠝꠞꠣ ꠇꠥꠘꠥ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ, ꠀꠍꠝꠣꠘ, ꠎꠝꠤꠘ ꠛꠣ ꠙꠣꠘꠤꠞ ꠔꠟꠦ ꠎꠔꠔꠣ ꠀꠍꠦ, ꠁꠔꠣ ꠇꠥꠘꠥꠔꠣꠞ ꠍꠥꠞꠔꠦ ꠝꠥꠞ꠆ꠔꠤ ꠛꠣꠘꠣꠁꠅ ꠘꠣ। ৫ ꠔꠥꠝꠞꠣ ꠁꠔꠣꠞ ꠙꠥꠎꠣ ꠇꠞꠤꠅ ꠘꠣ, ꠁꠔꠣꠞ ꠡꠦꠛꠣ-ꠎꠔꠘ ꠇꠞꠤꠅ ꠘꠣ। ꠝꠘꠅ ꠞꠣꠈꠤꠅ, ꠀꠝꠤ ꠀꠟ꠆ꠟꠣꠃ ꠔꠥꠝꠞꠣꠞ ꠝꠣꠛꠥꠖ, ꠀꠝꠣꠞ ꠙꠣꠅꠘꠣ ꠄꠛꠣꠖꠔ ꠀꠝꠤ ꠌꠣꠁꠃ ꠌꠣꠁ। ꠢꠥꠘꠅ, ꠀꠝꠣꠞꠦ ꠎꠦꠞꠣ ꠝꠣꠘꠦ ꠘꠣ, ꠀꠝꠤ ꠔꠣꠞꠣꠞ ꠉꠥꠘꠣꠞ ꠡꠣꠎꠣ ꠖꠦꠁ, ꠔꠣꠞꠣꠞ ꠔꠤꠘ-ꠌꠣꠁꠞ ꠍꠤꠠꠤ ꠙꠞ꠆ꠎꠘ꠆ꠔ ꠡꠣꠎꠣ ꠖꠦꠁ। ৬ ꠅꠁꠟꠦ ꠎꠦꠞꠣ ꠀꠝꠣꠞ ꠀꠡꠤꠇ ꠛꠘꠤꠀ ꠀꠝꠣꠞ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠦ, ꠀꠝꠤ ꠔꠣꠞꠣꠞ ꠀꠎꠣꠞ ꠀꠎꠣꠞ ꠅꠀꠞꠤꠡ ꠙꠞ꠆ꠎꠘ꠆ꠔ ꠀꠝꠣꠞ ꠅꠛꠤꠞꠣꠝ ꠝꠣꠄꠀ-ꠝꠢꠛ꠆ꠛꠔ ꠖꠦꠈꠣꠁꠝꠥ।

৭ “ꠛꠦꠇꠣꠝꠣ ꠇꠥꠘꠥ ꠇꠣꠞꠘꠦ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝ ꠝꠥꠈꠅ ꠟꠁꠅ ꠘꠣ। ꠇꠦꠃ ꠎꠥꠖꠤ ꠈꠣꠝꠈꠣ ꠝꠣꠛꠥꠖꠞ ꠘꠣꠝ ꠟꠄ, ꠔꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠡꠣꠎꠣ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।

৮ “ꠁꠀꠖ ꠇꠞꠤꠀ ꠎꠥꠝ꠆ꠝꠣꠛꠣꠞꠞꠦ ꠙꠛꠤꠔ꠆ꠞ ꠖꠤꠘ ꠝꠣꠘꠤꠅ। ৯ ꠢꠣꠙ꠆ꠔꠣꠔ ꠍꠄ ꠖꠤꠘ ꠔꠥꠝꠞꠣ ꠇꠣꠝ-ꠇꠣꠎ ꠇꠞꠤꠅ, ꠔꠥꠝꠞꠣꠞ ꠖꠞꠎꠣꠞꠤ ꠇꠣꠝ ꠡꠣꠞꠤꠅ। ১০ ꠅꠁꠟꠦ ꠡꠣꠔ ꠘꠝ꠆ꠛꠞ ꠖꠤꠘ ꠅꠁꠟ ꠎꠥꠝ꠆ꠝꠣꠛꠣꠞ, ꠔꠥꠝꠣꠞ ꠝꠣꠛꠥꠖ ꠀꠟ꠆ꠟꠣꠞ ꠘꠣꠝꠦ ꠎꠤꠞꠣꠁꠛꠣꠞ ꠖꠤꠘ। ꠁ ꠖꠤꠘ ꠔꠥꠝꠤ, ꠔꠥꠝꠣꠞ ꠙꠥꠀ-ꠙꠥꠠꠤꠘ, ꠔꠥꠝꠣꠞ ꠉꠥꠟꠣꠝ-ꠛꠣꠘ꠆ꠖꠤꠘ, ꠔꠥꠝꠣꠞ ꠙꠡꠥꠞ ꠙꠣꠟ, ꠔꠥꠝꠣꠞ ꠉꠣꠃꠔ ꠛꠣ ꠐꠣꠃꠘꠅ ꠞꠅꠞꠣ ꠝꠥꠍꠣꠚꠤꠞ ꠛꠣ ꠜꠤꠘ-ꠖꠦꠡꠤ, ꠇꠦꠃ ꠇꠥꠘꠥ ꠎꠣꠔꠞ ꠇꠣꠝ-ꠇꠣꠎ ꠇꠞꠤꠅ ꠘꠣ। ১১ ꠎꠣꠘꠅ ꠔ, ꠝꠣꠛꠥꠖꠦ ꠍꠄ ꠖꠤꠘꠦ ꠀꠍꠝꠣꠘ-ꠎꠝꠤꠘ, ꠖꠞꠤꠀ ꠀꠞ ꠄꠞꠣꠞ ꠝꠣꠎꠞ ꠢꠇꠟꠔꠣ ꠙꠄꠖꠣ ꠇꠞꠍꠂꠘ, ꠛꠣꠖꠦ ꠡꠣꠔ ꠘꠝ꠆ꠛꠞ ꠖꠤꠘ ꠎꠤꠞꠣꠁꠍꠂꠘ, ꠇꠥꠘꠥ ꠇꠣꠝ ꠇꠞꠍꠂꠘ ꠘꠣ। ꠅꠃ ꠖꠤꠘꠞꠦ ꠝꠣꠛꠥꠖꠦ ꠞꠢꠝꠔ ꠖꠤꠀ ꠙꠣꠇ ꠖꠤꠘ ꠇꠞꠍꠂꠘ।

১২ “ꠔꠥꠝꠞꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ। ꠔꠦꠃ ꠔꠥꠝꠞꠣꠞ ꠝꠣꠛꠥꠖ ꠀꠟ꠆ꠟꠣꠄ ꠎꠦ ꠖꠦꠡ ꠖꠤꠛꠣ, ꠢꠃ ꠖꠦꠡꠅ ꠔꠥꠝꠞꠣꠞ ꠢꠣꠄꠀꠔꠤ ꠛꠣꠠꠤꠛ।

১৩ “ꠈꠥꠘ ꠇꠞꠤꠅ ꠘꠣ।

১৪ “ꠎꠤꠘꠣ ꠇꠞꠤꠅ ꠘꠣ।

১৫ “ꠌꠥꠞꠤ ꠇꠞꠤꠅ ꠘꠣ।

১৬ “ꠇꠦꠃꠞꠞ ꠛꠤꠞꠥꠖ꠆ꠖꠦ ꠝꠤꠍꠣ ꠡꠣꠇ꠆ꠇꠤ ꠖꠤꠅ ꠘꠣ।

১৭ “ꠅꠁꠘ꠆ꠘ ꠝꠣꠘꠡꠞ ꠊꠞ-ꠖꠥꠀꠞꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ, ꠔꠣꠞ ꠛꠃ, ꠉꠥꠟꠣꠝ-ꠛꠣꠘ꠆ꠖꠤ, ꠉꠞꠥ-ꠉꠣꠗꠣ, ꠛꠣ ꠇꠥꠘꠥ ꠇꠤꠌ꠆ꠍꠥꠞ ꠛꠣꠄ ꠟꠣꠟꠌ ꠇꠞꠤꠅ ꠘꠣ।”

১৮ ꠛꠘꠤ ꠁꠍꠞꠣꠁꠟꠦ ꠎꠦꠛꠟꠣ ꠙꠣꠠ ꠕꠣꠇꠤ ꠝꠦꠊꠞ ꠒꠣꠇ, ꠎꠤꠟꠇꠣꠘꠤ, ꠡꠤꠋꠉꠣꠞ ꠀꠅꠀꠎ, ꠀꠞ ꠗꠥꠝꠣ ꠛꠣꠞꠅꠘꠤꠔ ꠖꠦꠈꠟꠣ, ꠖꠦꠈꠤꠀ ꠔꠣꠞꠣ ꠖꠥꠞꠁ ꠕꠣꠇꠤꠃ ꠒꠞꠣꠁꠀ ꠇꠣꠙꠣ ꠗꠞꠟꠣ। ১৯ ꠔꠣꠞꠣ ꠝꠥꠍꠣꠞꠦ ꠇꠁꠟꠣ, “ꠀꠙꠘꠦꠃ ꠀꠝꠞꠣꠞ ꠟꠉꠦ ꠝꠣꠔꠃꠇ꠆ꠇꠣ, ꠀꠝꠞꠣ ꠢꠥꠘꠝꠥ; ꠅꠁꠟꠦ ꠀꠟ꠆ꠟꠣꠄ ꠀꠝꠞꠣꠞ ꠟꠉꠦ ꠛꠣꠔꠌꠤꠔ ꠇꠞꠟꠦ ꠔ ꠀꠝꠞꠣ ꠝꠞꠤꠎꠤꠝꠥ।”

২০ ꠝꠥꠍꠣꠄ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣ ꠒꠞꠣꠁꠅ ꠘꠣ। ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠞꠤꠇ꠆ꠇꠣꠔ ꠚꠣꠟꠣꠁꠍꠂꠘ, ꠎꠣꠔꠦ ꠔꠥꠝꠞꠣꠞ ꠎꠣꠘꠅ ꠀꠟ꠆ꠟꠣꠞ ꠒꠞ ꠢꠣꠝꠣꠄ, ꠒꠞꠣꠁꠀ ꠔꠥꠝꠞꠣ ꠉꠥꠘꠣ ꠕꠣꠇꠤ ꠛꠣꠌꠤꠀ ꠞꠅ। ꠄꠞꠟꠣꠉꠤꠃ ꠔꠣꠁꠘ ꠘꠤꠎꠦ ꠖꠤꠖꠣꠞ ꠖꠤꠍꠂꠘ।”

২১ ꠢꠇꠟ ꠝꠣꠘꠥꠡ ꠖꠥꠞꠁ ꠃꠛꠣꠁ ꠞꠁꠟꠣ, ꠀꠞ ꠝꠥꠍꠣ ꠀꠟ꠆ꠟꠣꠞ ꠢꠃ ꠝꠦꠊꠞ ꠇꠣꠟꠘꠤꠞ ꠀꠘ꠆ꠖꠣꠞꠤꠞ ꠝꠣꠎꠦ ꠢꠣꠝꠣꠁꠟꠣ।