ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ
ꠇꠤꠔꠣꠛ ꠡꠥꠔ꠆ꠞ
ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠇꠦꠘꠦ ꠟꠦꠈꠣ ꠅꠁꠍꠦ?
ꠅꠃ ꠛꠤꠡꠄꠄ ꠁꠘ꠆ꠎꠤꠟ ꠡꠞꠤꠚꠞ ꠌꠣꠁꠞ ꠘꠝ꠆ꠛꠞ ꠍꠤꠙꠣꠞꠣꠞ ২০ ꠞꠥꠇꠥꠞ ৩০-৩১ ꠀꠄꠀꠔꠅ ꠀꠍꠦ,
“ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞ ꠍꠣꠝꠘꠦ ꠀꠞꠅ ꠛꠃꠔ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠍꠂꠘ,
ꠁꠔꠣ ꠢꠇꠟꠔꠣ ꠔ ꠅꠃ ꠇꠤꠔꠣꠛꠅ ꠟꠦꠈꠣ ꠅꠁꠍꠦ ꠘꠣ।
ꠈꠣꠟꠤ ꠅꠃ ꠊꠐꠘꠣ ꠅꠇꠟ ꠟꠦꠈꠣ ꠅꠁꠍꠦ,
ꠎꠣꠔꠦ ꠅꠔꠣ ꠔꠤꠟꠣꠅꠔ ꠇꠞꠤꠀ ꠔꠥꠝꠞꠣ ꠁꠝꠣꠘ ꠀꠘꠅ,
ꠢꠎꠞꠔ ꠁꠍꠣꠃ ꠀꠟ꠆ꠟꠣ ꠙꠣꠇꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ,
ꠔꠣꠁꠘꠃ ꠁꠛꠘꠥꠟ꠆ꠟꠣ,
ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ,
ꠀꠞ ꠁꠝꠣꠘ ꠀꠘꠤꠀ ꠎꠣꠔꠦ ꠔꠣꠘ ꠃꠍꠤꠟ꠆ꠟꠣꠄ ꠔꠥꠝꠞꠣ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠅ।”
ꠢꠎꠞꠔ ꠁꠍꠣꠞ ꠎꠝꠣꠘꠣꠞ ꠢꠣꠟ-ꠢꠇꠤꠇꠔ
ꠢꠎꠞꠔ ꠁꠍꠣ ꠎꠦꠛꠟꠣ ꠁ ꠖꠥꠘꠤꠀꠔ ꠀꠍꠟꠣ,
ꠅꠃ ꠡꠝꠄ ꠔꠣꠁꠘ ꠛꠞ꠆ꠔꠝꠣꠘ ꠖꠥꠘꠤꠀꠞ ꠚꠤꠟꠤꠡ꠆ꠔꠤꠘ,
ꠁꠍꠞꠣꠁꠟ,
ꠎꠞ꠆ꠖꠣꠘ ꠀꠞ ꠟꠦꠛꠣꠘꠘ ꠖꠦꠡꠞ ꠘꠣꠘꠣꠘ ꠎꠣꠉꠣꠔ ꠀꠐꠤ ꠀꠐꠤ ꠉꠤꠀ ꠔꠛꠟꠤꠉ ꠇꠞꠔꠣ।
ꠔꠣꠁꠘ ꠁꠍꠞꠣꠁꠟ ꠖꠦꠡꠞ ꠃꠔ꠆ꠔꠞ ꠄꠟꠣꠇꠣꠞ ꠉꠣꠟꠤꠟ ꠀꠅꠞꠞ ꠇꠣꠘ꠆ꠖꠣꠔ ꠄꠇ ꠉꠣꠃꠔ ꠛꠡꠔ ꠇꠞꠔꠣ।
ꠢꠎꠞꠔ ꠁꠛ꠆ꠞꠣꠢꠤꠝ (ꠀ꠩) ꠀꠞ ꠢꠎꠞꠔ ꠝꠥꠍꠣ (ꠀ꠩)-ꠅꠞ ꠛꠃꠔ ꠎꠝꠣꠘꠣ ꠛꠣꠖꠦ ꠔꠣꠁꠘ ꠁ ꠖꠥꠘꠤꠀꠔ ꠀꠁꠍꠂꠘ।
ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣ ꠢꠎꠞꠔ ꠖꠣꠃꠖ (ꠀ꠩) ꠅꠁꠟꠣ ꠔꠣꠘ ꠙꠥꠞꠛ-ꠙꠥꠞꠥꠡ।
ꠛꠘꠤ ꠁꠍꠞꠣꠁꠟꠞ ꠖꠥꠍꠞꠣ ꠘꠣꠝ ꠀꠍꠤꠟ,
ꠁꠢꠥꠖꠤ ꠎꠣꠔꠤ।
ꠁꠢꠥꠖꠤ ꠝꠣꠘꠤ,
ꠀꠟ꠆ꠟꠣꠞ ꠔꠣꠞꠤꠚ ꠇꠞꠞꠣ ꠎꠘ।
ꠢꠎꠞꠔ ꠁꠍꠣ ꠅꠃ ꠁꠢꠥꠖꠤ ꠎꠣꠔꠤꠞ ꠝꠣꠎꠦ ꠎꠘꠝ ꠟꠁꠍꠂꠘ।
ꠢꠃ ꠡꠝꠄ ꠛꠘꠤ ꠁꠍꠞꠣꠁꠟ ꠍꠣꠠꠣ ꠀꠞ ꠇꠥꠘꠥ ꠎꠣꠔꠤꠄ ꠄꠇ ꠀꠟ꠆ꠟꠣ ꠝꠣꠘꠔꠣ ꠘꠣ,
ꠔꠣꠞꠣ ꠘꠣꠘꠣꠘ ꠘꠝꠥꠘꠣꠞ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠔꠣ।
ꠅꠁꠟꠦ ꠅꠁꠘ꠆ꠘ ꠎꠣꠔꠤ ꠕꠣꠇꠤꠅ ꠇꠥꠘꠥ ꠇꠥꠘꠥ ꠝꠣꠘꠡꠦ ꠄꠇ ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠍꠤꠟꠣ।
ꠢꠎꠞꠔ ꠝꠢꠣꠝ꠆ꠝꠖ (ꠍꠣ꠩) ꠅꠞ ꠅꠘꠥꠝꠣꠘ ৬০০ ꠛꠍꠞ ꠀꠉꠦ ꠢꠎꠞꠔ ꠁꠍꠣ ꠀꠟ-ꠝꠍꠤ ꠅꠃ ꠖꠥꠘꠤꠀꠔ ꠀꠍꠟꠣ।
ꠅꠃ ꠎꠝꠣꠘꠣꠔ ꠀꠡ꠆ꠔꠣ ꠖꠥꠘꠤꠀꠞ ꠝꠣꠘꠡꠞ ꠄꠛꠣꠖꠔ-ꠈꠣꠘꠣ,
ꠝꠣꠘꠤ ꠇꠣꠛꠣ ꠡꠞꠤꠚ ꠀꠍꠤꠟ ꠙꠛꠤꠔ꠆ꠞ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ,
ꠁꠐꠣ ꠅꠁꠟ ꠁꠍꠞꠣꠁꠟ-ꠚꠤꠟꠤꠡ꠆ꠔꠤꠘ ꠖꠦꠡꠞ ꠎꠦꠞꠥꠎꠣꠟꠦꠝ ꠐꠣꠃꠘꠅ।
ꠛꠞ꠆ꠔꠝꠣꠘ ꠝꠖꠤꠘꠣ ꠡꠞꠤꠚ ꠕꠣꠇꠤ ৫০০ ꠝꠣꠁꠟ ꠃꠔꠞꠦ।
ꠅꠃ ꠄꠛꠣꠖꠔ-ꠈꠣꠘꠣꠞ ꠡꠤꠝꠣꠘꠣꠞ ꠜꠤꠔꠞꠦ ꠝꠥꠟ ꠇꠣꠛꠣ ꠊꠞ ꠛꠣ ꠢꠦꠞꠦꠝ ꠡꠞꠤꠚ ꠀꠍꠤꠟ,
ꠁꠈꠣꠘ ꠈꠥꠛ ꠙꠣꠇ-ꠙꠛꠤꠔ꠆ꠞ ꠊꠞ।
ꠁ ꠊꠞꠞ ꠝꠣꠙ ꠅꠁꠟ,
ꠟꠣꠝ꠆ꠛꠣꠄ ꠛꠤꠡ ꠀꠔ,
ꠙꠣꠡꠦ ꠛꠤꠡ ꠀꠔ,
ꠀꠞ ꠃꠌꠣꠅ ꠛꠤꠡ ꠀꠔ।
ꠛꠘꠤ ꠁꠍꠞꠣꠁꠟ ꠎꠣꠔꠤ ꠀꠞ ꠖꠥꠘꠤꠀꠞ ꠝꠣꠎꠞ ꠅꠁꠘ꠆ꠘ ꠎꠔ ꠝꠣꠘꠡꠦ ꠄꠇ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣ,
ꠔꠣꠞꠣ ꠢꠇꠟꠦ ꠅꠃ ꠊꠞꠞꠦ ꠇꠣꠛꠣ ꠡꠞꠤꠚ ꠝꠣꠘꠔꠣ,
ꠅꠃ ꠊꠞꠞ ꠝꠥꠈꠤ ꠅꠁꠀ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠔꠣ,
ꠅꠈꠣꠘꠃ ꠀꠍꠤꠟ ꠄꠞꠣꠞ ꠇꠤꠛꠟꠣ।
ꠢꠃ ꠎꠝꠣꠘꠣꠔ ꠛꠍꠞꠅ ꠔꠤꠘꠛꠣꠞ ꠁꠖ ꠅꠁꠔ।
ꠄꠞꠝꠣꠎꠞ ꠄꠇ ꠁꠖꠞ ꠘꠣꠝ ꠀꠍꠤꠟ ꠁꠖꠥꠟ ꠚꠦꠍꠣꠈ ꠛꠣ ꠀꠎꠣꠖꠤꠞ ꠁꠖ,
ꠛꠘꠤ ꠁꠍꠞꠣꠁꠟ ꠎꠣꠔꠤ ꠎꠣꠟꠤꠝ ꠚꠦꠞꠣꠃꠘꠞ ꠉꠥꠟꠣꠝꠤ ꠕꠣꠇꠤ ꠀꠎꠣꠖ ꠅꠁꠍꠟꠣ ꠇꠞꠤ,
ꠅꠃ ꠁꠖꠞ ꠘꠣꠝ ꠀꠎꠣꠖꠤꠞ ꠁꠖ।
ꠔꠦ ꠖꠥꠘꠤꠀꠞ ꠎꠔ ꠝꠣꠘꠡꠦ ꠄꠇ ꠀꠟ꠆ꠟꠣ ꠝꠣꠘꠔꠣ,
ꠔꠣꠞꠣ ꠢꠇꠟꠦꠃ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠢꠎ ꠇꠞꠣꠞ ꠘꠤꠅꠔꠦ ꠅꠃ ꠎꠦꠞꠥꠎꠣꠟꠦꠝꠅ ꠀꠁꠔꠣ।
ꠢꠎꠞ ꠡꠝꠄ ꠔꠣꠞꠣ ꠇꠣꠛꠣ ꠡꠞꠤꠚꠞ ꠇꠣꠘ꠆ꠖꠣꠔ ꠀꠟ꠆ꠟꠣꠞ ꠘꠣꠝꠦ ꠙꠡꠥ ꠇꠥꠞꠛꠣꠘꠤ ꠖꠤꠔꠣ।
ꠢꠎꠞꠔ ꠁꠍꠣ ꠀꠟ-ꠝꠍꠤ ꠀꠞ ꠔꠣꠘ ꠍꠣꠢꠣꠛꠤ ꠅꠇꠟꠅ ꠅꠃ ꠁꠖꠞ ꠡꠝꠄ ꠇꠣꠛꠣ ꠡꠞꠤꠚꠅ ꠀꠁꠔꠣ।
ꠅꠃ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠞ ꠢꠇꠟꠔꠣ ꠌꠟꠔ ꠁꠝꠣꠝ ꠍꠣꠛꠞ ꠢꠥꠇꠥꠝꠦ।
ꠁ ꠁꠝꠣꠝ ꠍꠣꠛ ꠅꠇꠟ ꠀꠍꠟꠣ ꠢꠎꠞꠔ ꠢꠣꠞꠥꠘ (ꠀ꠩)-ꠅꠞ ꠛꠋꠡꠗꠞ,
ꠀꠞ ꠈꠣꠖꠤꠝ ꠅꠇꠟ ꠀꠍꠟꠣ ꠢꠎꠞꠔ ꠢꠣꠞꠥꠘ (ꠀ꠩)-ꠅꠞ ꠛꠣꠚ-ꠖꠣꠖꠣꠞ ꠛꠋꠡꠞ ꠝꠣꠎꠞ ꠟꠦꠛꠤ ꠈꠣꠘ꠆ꠖꠣꠘꠞ ꠝꠣꠘꠥꠡ।
ꠛꠃꠔ ꠁꠝꠣꠝ ꠍꠣꠛ ꠀꠍꠟꠣ ꠍꠤꠖ꠆ꠖꠦꠇꠤꠀ ꠝꠎꠛꠞ।
ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠡꠦ ꠝꠘꠦ ꠇꠞꠔꠣ,
ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠜꠤꠔꠞꠦ ꠀꠁꠀ ꠄꠛꠣꠖꠔ-ꠛꠘ꠆ꠖꠦꠉꠤ,
ꠎꠤꠇꠤꠞ-ꠀꠎꠇꠣꠞ ꠀꠞ ꠇꠥꠞꠛꠣꠘꠤ ꠀꠖꠣꠄ ꠇꠞꠟꠦꠃ ꠎꠞꠥꠞꠤ ꠚꠞꠎ ꠀꠖꠣꠄ ꠅꠁꠎꠣꠄ।
ꠔꠣꠞꠣ ꠈꠣꠟꠤ ꠔꠃꠞꠣꠔ ꠡꠞꠤꠚ ꠍꠣꠠꠣ ꠀꠞ ꠇꠥꠘꠥ ꠇꠤꠔꠣꠛ ꠝꠣꠘꠔꠣ ꠘꠣ।
ꠅꠁꠟꠦ ꠀꠞꠇ ꠝꠎꠛꠞ ꠝꠣꠘꠥꠡꠅ ꠀꠍꠟꠣ,
ꠄꠞꠣ ꠅꠁꠟꠣ ꠚꠞꠤꠡꠤ ꠝꠎꠛ,
ꠔꠣꠞꠣ ꠀꠍꠝꠣꠘꠤ ꠢꠇꠟ ꠇꠤꠔꠣꠛ ꠝꠣꠘꠔꠣ।
ꠄꠞꠣ ꠄꠇꠤꠘ ꠇꠞꠔꠣ ꠡꠞꠤꠅꠔꠞ ꠙꠞꠔꠦꠇ ꠢꠥꠇꠥꠝ-ꠀꠢꠇꠣꠝ ꠝꠣꠘꠣ ꠎꠞꠥꠞ,
ꠀꠞ ꠝꠣꠘꠡꠞ ꠝꠘꠉꠠꠣ ꠛꠣꠘꠣꠁꠟ ꠞꠤꠔꠤ-ꠞꠦꠅꠀꠎꠅ ꠝꠣꠘꠣ ꠈꠥꠛ ꠎꠞꠥꠞ,
ꠁꠔꠣꠅ ꠚꠞꠎ।
ꠅꠃ ꠡꠝꠄ ꠢꠎꠞꠔ ꠁꠍꠣ ꠀꠟ-ꠝꠍꠤ ꠖꠥꠘꠤꠀꠔ ꠀꠁꠀ ꠎꠦꠛꠟꠣ ꠇꠁꠟꠣ,
ꠅꠃ ꠚꠞꠤꠡꠤ ꠀꠞ ꠍꠤꠖ꠆ꠖꠦꠇꠤꠀ ꠝꠎꠛꠞ ꠝꠣꠘꠡꠦ ꠀꠟ꠆ꠟꠣꠞ ꠖꠞꠛꠣꠞꠅ ꠘꠣꠚꠞꠝꠣꠘꠤ ꠇꠞꠞꠣ,
ꠔꠣꠞꠣ ꠟꠣꠘ꠆ꠘꠔꠤ।
ꠁꠈꠣꠘ ꠢꠥꠘꠤꠀ ꠔꠣꠞꠣ ꠈꠥꠛ ꠉꠥꠍꠣ ꠅꠁꠟꠣ।
ꠄꠞꠟꠣꠉꠤꠃ ꠔꠣꠞꠣ ꠢꠇꠟꠦ ꠌꠣꠁꠟꠣ,
ꠔꠣꠘꠞꠦ ꠇꠣꠔꠟ ꠇꠞꠤꠟꠔꠣ।
ꠅꠃ ꠡꠝꠄ ꠝꠤꠒꠤꠟ-ꠁꠡ꠆ꠐ ꠄꠟꠣꠇꠣꠞ ꠛꠃꠔ ꠖꠦꠡ,
ꠀꠚ꠆ꠞꠤꠇꠣ ꠝꠢꠣꠖꠦꠡꠞ ꠃꠔ꠆ꠔꠞ ꠄꠟꠣꠇꠣꠞ ꠛꠃꠔ ꠖꠦꠡ,
ꠀꠞ ꠁꠃꠞꠥꠙꠞ ꠛꠃꠔ ꠖꠦꠡꠅ ꠀꠍꠤꠟ ꠞꠥꠝꠣꠘ ꠛꠣꠖꠡꠣ ꠇꠂꠍꠞꠞ ꠖꠈꠟꠦ।
ꠄꠞꠝꠣꠎꠦ ꠇꠥꠘꠥ ꠇꠥꠘꠥ ꠖꠦꠡꠅ ꠘꠤꠎꠞ ꠞꠣꠎꠣ ꠀꠍꠟꠣ,
ꠅꠁꠟꠦ ꠄꠞꠣꠅ ꠛꠣꠖꠡꠣꠞ ꠢꠥꠇꠥꠝꠦ ꠌꠟꠔꠣ।
ꠅꠃꠟꠣ ꠚꠤꠟꠤꠡ꠆ꠔꠤꠘ ꠖꠦꠡꠞ ꠝꠣꠎꠦꠅ ꠖꠥꠁ ꠟꠣꠈꠣꠘ ꠡꠣꠡꠘ ꠀꠍꠤꠟ।
ꠃꠔ꠆ꠔꠞ ꠄꠟꠣꠇꠣ ꠀꠍꠤꠟ ꠉꠣꠟꠤꠟ ꠎꠤꠟꠣ,
ꠀꠞ ꠖꠇ꠆ꠇꠤꠘ ꠄꠟꠣꠇꠣ ꠄꠢꠥꠖꠤꠀ ꠎꠤꠟꠣ।
ꠅꠃ ꠄꠢꠥꠖꠤꠀꠞ ꠜꠤꠔꠞꠦ ꠀꠍꠤꠟ ꠎꠦꠞꠥꠎꠣꠟꠦꠝ ꠐꠣꠃꠘ।
ꠅꠁꠟꠦ ꠄꠢꠥꠖꠤꠀ ꠎꠤꠟꠣꠞ ꠞꠣꠎꠣꠄ ꠈꠣꠞꠣꠙ ꠇꠣꠝ ꠀꠞ ꠖꠥꠞꠘꠤꠔꠤ ꠇꠞꠣꠄ ꠛꠣꠖꠡꠣ ꠇꠂꠍꠞꠦ ꠅꠃ ꠞꠣꠎꠣꠞꠦ ꠢꠞꠣꠁꠀ,
ꠔꠣꠁꠘ ꠘꠤꠎꠦ ꠡꠞꠣꠡꠞꠤ ꠅꠃ ꠎꠤꠟꠣꠅ ꠌꠣꠟꠣꠁꠔꠣ।
ꠅꠃ ꠄꠟꠣꠇꠣ ꠙꠤꠟꠣꠔ ꠘꠣꠝꠞ ꠄꠇ ꠞꠥꠝꠣꠘ ꠢꠣꠇꠤꠝꠞ ꠎꠤꠝ꠆ꠝꠣꠄ ꠌꠟꠔ।
ꠞꠥꠝꠣꠘ ꠅꠇꠟꠦ ꠄꠇ ꠀꠟ꠆ꠟꠣ ꠝꠣꠘꠔꠣ ꠘꠣ,
ꠔꠣꠞꠣ ꠘꠣꠘꠣꠘ ꠖꠦꠛ-ꠖꠦꠛꠤꠞ ꠙꠥꠎꠣ ꠇꠞꠔꠣ।
ꠄꠢꠥꠖꠤꠀ ꠎꠤꠟꠣꠞ ꠃꠔ꠆ꠔꠞ ꠉꠣꠟꠣꠔ ꠀꠍꠤꠟ ꠡꠝꠞꠤꠀ ꠄꠟꠣꠇꠣ।
ꠡꠝꠞꠤꠀꠞ ꠝꠣꠘꠡꠦꠅ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠔꠣ।
ꠅꠁꠟꠦ ꠔꠣꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠀꠁꠔꠣ ꠘꠣ।
ꠔꠣꠞꠣꠞ ꠘꠤꠎꠞ ꠀꠟꠣꠖꠣ ꠄꠛꠣꠖꠔ-ꠈꠣꠘꠣ ꠀꠍꠤꠟ,
ꠢꠃ ꠄꠛꠣꠖꠔ-ꠈꠣꠘꠣꠞꠦ ꠔꠣꠞꠣꠞ ꠇꠣꠛꠣ ꠡꠞꠤꠚ ꠝꠣꠘꠔꠣ।
ꠄꠞꠖꠣꠄ ꠁꠢꠥꠖꠤ ꠀꠞ ꠡꠝꠞꠤꠀ ꠝꠣꠘꠡꠞ ꠝꠣꠎꠦ ꠈꠥꠛ ꠖꠥꠡꠝꠘꠤ ꠀꠍꠤꠟ।
ꠁꠘ꠆ꠎꠤꠟ ꠝꠣꠘꠤ ꠇꠤꠔꠣ?
ꠁꠘ꠆ꠎꠤꠟ ꠅꠁꠟꠉꠤ ꠀꠞꠛꠤ ꠜꠣꠡꠣꠄ ꠌꠣꠟꠥ ꠅꠀ ꠄꠇꠐꠣ ꠉ꠆ꠞꠤꠇ ꠡꠛ꠆ꠖ,
‘ꠄꠞ-ꠀꠘ꠆ꠎꠦꠟ’,
ꠝꠥꠟ ꠡꠛ꠆ꠖꠞ ꠝꠣꠘꠤ ꠅꠁꠟ,
ꠈꠥꠡ-ꠈꠛꠞꠤ ꠛꠣ ꠈꠥꠡꠤꠞ ꠈꠛꠞ।
ꠀꠟ꠆ꠟꠣꠔꠣꠟꠣꠄ ꠝꠣꠘꠡꠞꠦ ꠈꠥꠡꠤꠞ ꠈꠛꠞ ꠎꠣꠘꠣꠁꠍꠂꠘ ꠢꠎꠞꠔ ꠁꠍꠣꠞ ꠛꠦꠙꠣꠞꠦ।
ꠢꠎꠞꠔ ꠁꠍꠣꠄ ꠔꠣꠘ ꠙꠍꠘ꠆ꠖ ꠝꠣꠚꠤꠇ ꠛꠣꠞꠅꠎꠘ ꠍꠣꠢꠣꠛꠤ ꠛꠣꠍꠤꠟꠣ। ꠅꠃ ꠍꠣꠢꠣꠛꠤ ꠅꠇꠟꠦ ꠘꠤꠎꠞ ꠇꠣꠘꠦ ꠔꠣꠘ ꠔꠣꠟꠤꠝ ꠢꠥꠘꠟꠣ। ꠘꠤꠎꠞ ꠌꠃꠈꠦ ꠔꠣꠘ ꠎꠤꠘ꠆ꠖꠦꠉꠤ, ꠇꠦꠞꠣꠝꠔꠤ ꠇꠣꠝ, ꠔꠣꠘ ꠝꠃꠔ ꠀꠞ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠣ ꠖꠦꠈꠟꠣ। ꠔꠣꠁꠘ ꠄꠞꠣꠞꠦ ꠁꠔꠣꠞ ꠀꠍꠟ ꠜꠦꠖ ꠛꠥꠎꠣꠁꠟꠣ, ꠅꠃ ꠜꠦꠖ ꠅꠁꠟꠉꠤ ꠀꠟ꠆ꠟꠣ ꠙꠣꠇꠦ ꠔ ꠔꠣꠘꠞꠦ ꠛꠦꠎꠤꠍꠂꠘ, ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠤꠞ ꠝꠣꠎ ꠕꠣꠇꠤ ꠄꠇꠖꠟ ꠝꠣꠘꠡꠞꠦ ꠉꠥꠘꠣ-ꠘꠣꠚꠞꠝꠣꠘꠤ ꠕꠣꠇꠤ ꠛꠣꠌꠣꠁꠀ ꠀꠟ꠆ꠟꠣꠞ ꠈꠣꠍ ꠛꠘ꠆ꠖꠣ ꠢꠤꠡꠣꠛꠦ ꠀꠟꠉ ꠇꠞꠔꠣ, ꠄꠞꠣꠃ ꠀꠟ꠆ꠟꠣ ꠙꠣꠇꠞ ꠖꠤꠖꠣꠞ ꠢꠣꠍꠤꠟ ꠇꠞꠛꠣ। ꠄꠞꠣꠃ ꠅꠁꠟꠣ ꠛꠦꠢꠦꠡ꠆ꠔꠤ ꠛꠣꠖꠡꠣꠁ ꠛꠣ ꠀꠟ꠆ꠟꠣꠞ ꠛꠣꠖꠡꠣꠁꠞ ꠙ꠆ꠞꠎꠣ। ꠀꠞ ꠎꠔ ꠝꠣꠘꠥꠡ ꠅꠃ ꠛꠣꠖꠡꠣꠁꠔ ꠢꠣꠝꠣꠁꠔ ꠘꠣꠄ, ꠔꠣꠞꠣ ꠅꠁꠟꠣ ꠀꠘ꠆ꠖꠣꠁꠞꠞ ꠛꠣꠖꠡꠣꠁꠞ ꠙ꠆ꠞꠎꠣ ꠝꠣꠘꠤ ꠁꠛꠟꠤꠍꠞ ꠙ꠆ꠞꠎꠣ।
ꠅꠃ ꠛꠄꠀꠘꠤ ꠟꠦꠈꠣꠞ ꠟꠣꠉꠤ ꠀꠟ꠆ꠟꠣ ꠙꠣꠇꠦ ꠌꠣꠁꠞꠎꠘ ꠈꠣꠍ ꠝꠣꠘꠡꠞꠦ ꠙꠍꠘ꠆ꠖ ꠇꠞꠤꠀ,
ꠄꠞꠣꠞ ꠖꠤꠟꠞ ꠝꠣꠎꠦ ꠔꠣꠘ ꠘꠤꠎꠞ ꠙꠛꠤꠔ꠆ꠞ ꠞꠥꠢ ꠖꠤꠀ ꠄꠞꠣꠞꠦ ꠇꠣꠝꠤꠟ ꠛꠣꠘꠣꠁꠍꠂꠘ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠟꠉꠦ ꠎꠦ ꠛꠣꠞꠅꠎꠘ ꠍꠣꠢꠣꠛꠤ ꠀꠍꠟꠣ,
ꠅꠃ ꠌꠣꠁꠞꠅ ꠎꠘꠦ ꠄꠞꠣꠞ ꠉꠦꠍ ꠕꠣꠇꠤ ꠢꠇꠟꠔꠣ ꠢꠥꠘꠤꠀ ꠔꠣꠞꠣꠞ ꠎꠛꠣꠘꠛꠘ꠆ꠖꠤ ꠝꠣꠚꠤꠇ ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠟꠦꠈꠍꠂꠘ,
ꠢꠎꠞꠔ ꠁꠍꠣꠞ ꠔꠣꠟꠤꠝ-ꠘꠍꠤꠅꠔ ꠀꠞ ꠔꠣꠘ ꠇꠦꠞꠣꠝꠔꠤ ꠇꠣꠝ-ꠇꠣꠎ,
ꠔꠣꠘ ꠝꠃꠔ ꠀꠞ ꠝꠃꠔꠞ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠣ।
ꠄꠍꠣꠠꠣ ꠍꠣꠢꠣꠛꠤ ꠘꠣꠝꠣ ꠘꠣꠝꠞ ꠍꠤꠙꠣꠞꠣꠔ,
ꠙꠄꠟꠣ ꠎꠝꠣꠘꠣꠞ ꠁꠍꠣꠄꠁ ꠎꠝꠣꠔꠞ ꠁꠔꠤꠢꠣꠡ ꠎꠣꠘꠣ ꠎꠣꠄ।
ꠛꠣꠖꠦ ꠢꠎꠞꠔ ꠙꠣꠃꠟꠥꠍ (ꠞꠣ꠩) ꠀꠞ ꠅꠁꠘ꠆ꠘ ꠍꠣꠢꠣꠛꠤ ꠅꠇꠟꠞ ꠟꠦꠈꠣ ꠀꠞꠅ ꠄꠇꠥꠁꠡꠈꠣꠘ ꠍꠤꠙꠣꠞꠣ,
ꠌꠤꠑꠤꠞ ꠘꠝꠥꠘꠣꠄ ꠢꠃ ꠀꠝꠟꠞ ꠝꠥꠝꠤꠘ ꠅꠇꠟ ꠀꠞ ꠎꠝꠣꠔꠞ ꠟꠣꠉꠤ ꠎꠞꠥꠞꠤ ꠔꠣꠟꠤꠝ ꠟꠦꠈꠣ ꠅꠄ।
ꠢꠇꠟ ꠢꠦꠡꠦ ꠍꠣꠢꠣꠛꠤ ꠢꠎꠞꠔ ꠢꠣꠘ꠆ꠘꠣꠘꠞ (ꠞꠣ꠩) ꠖꠞꠡꠘ ꠢꠤꠡꠣꠛꠦ ꠎꠣꠁꠞꠣ ꠇꠣꠟꠣꠝ ꠘꠣꠝꠞ ꠍꠤꠙꠣꠞꠣ ꠀꠍꠦ,
ꠔꠣꠁꠘ ꠢꠎꠞꠔ ꠁꠍꠣꠞ ꠝꠣꠞꠚꠔꠦ ꠖꠞꠡꠘ ꠙꠣꠁꠟꠣ,
ꠖꠥꠘꠤꠀꠞ ꠀꠈꠦꠞꠤ ꠎꠝꠣꠘꠣ ꠀꠞ ꠇꠤꠀꠝꠔꠞ ꠘꠣꠘꠣꠘ ꠘꠝꠥꠘꠣꠞ ꠀꠉꠣꠝ ꠈꠛꠞ।
ꠔꠦ ꠢꠇꠟꠔꠣꠄ ꠝꠥꠐ ꠡꠣꠔꠣꠁꠡ ꠍꠤꠙꠣꠞꠣ ꠀꠍꠦ।
ꠁꠔꠣ ꠢꠥꠘꠟꠦ ꠝꠣꠘꠡꠦ ꠛꠥꠎꠛꠣ,
ꠇꠥꠘ ꠙꠕꠦ ꠌꠟꠟꠦ ꠎꠣꠘ ꠛꠣꠌꠤꠛ।
ꠀꠟ꠆ꠟꠣ ꠙꠣꠇꠦ ꠅꠃ ꠈꠛꠞ ꠛꠣꠔꠣꠁꠍꠂꠘ,
ꠁꠛꠟꠤꠍꠞ ꠉꠥꠟꠣꠝꠤ ꠕꠣꠇꠤ ꠛꠣꠌꠣꠞ ꠟꠣꠉꠤ ꠇꠥꠘ ꠙꠕꠦ ꠌꠟꠣ ꠎꠞꠥꠞ।
ꠁꠛꠟꠤꠍꠞ ꠚꠣꠘ꠆ꠖꠅ ꠕꠣꠇꠤ,
ꠝꠣꠘꠤ ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠛꠣꠌꠤꠛꠣꠞ ꠅꠃ ꠎꠦ ꠈꠛꠞ ꠀꠟ꠆ꠟꠣ ꠙꠣꠇꠦ ꠎꠣꠘꠣꠁꠍꠂꠘ,
ꠄꠞ ꠘꠣꠝꠃ ꠅꠁꠟ ꠈꠥꠡ-ꠈꠛꠞꠤ ꠛꠣ ꠁꠘ꠆ꠎꠤꠟ ꠡꠞꠤꠚ।
ꠅꠃ ꠈꠥꠡꠤꠞ ꠈꠛꠞ ꠅꠁꠟ,
ꠀꠟ꠆ꠟꠣꠔꠣꠟꠣꠄ ꠝꠣꠘꠥꠡ ꠎꠣꠔꠤꠞꠦ ꠛꠣꠌꠣꠘꠤꠞ ꠟꠣꠉꠤ ꠢꠎꠞꠔ ꠁꠍꠣ ꠀꠟ-ꠝꠍꠤꠞꠦ ꠅꠃ ꠖꠥꠘꠤꠀꠔ ꠛꠦꠎꠤꠍꠂꠘ।
ꠔꠣꠁꠘꠃ ꠅꠁꠟꠣ ꠖꠥꠘꠤꠀꠞ ꠝꠣꠘꠡꠞ ꠘꠣꠎꠣꠔꠞ ꠇꠣꠘ꠆ꠒꠣꠞꠤ।
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠘꠣꠝ-ꠃꠙꠣꠗꠤ
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠛꠃꠔ ꠘꠣꠝ-ꠃꠙꠣꠗꠤ ꠀꠍꠤꠟ,
ꠅꠃ ꠘꠣꠝ ꠅꠇꠟ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠦ ꠔꠣꠘꠞꠦ ꠖꠤꠍꠟꠣ।
ꠄꠞ ꠝꠣꠎꠞ ꠇꠤꠍꠥ ꠘꠣꠝ ꠀꠞ ꠄꠞ ꠝꠣꠘꠤ ꠅꠁꠟ,
১) ꠀꠟ-ꠝꠍꠤ
ꠁ ꠘꠣꠝꠞ ꠝꠣꠘꠤ ꠅꠁꠟ,
ꠈꠥꠛ ꠝꠥꠟ꠆ꠟꠛꠣꠘ ꠈꠥꠡꠛꠄꠀꠟꠣ ꠙꠛꠤꠔ꠆ꠞ ꠀꠔꠞ ꠖꠤꠀ ꠈꠦꠟꠣꠚꠔꠤ ꠙꠣꠅꠀ ꠎꠘ।
ꠁꠔꠣ ꠇꠤꠟꠣ ꠅꠄ?
ꠀꠟ꠆ꠟꠣ ꠙꠣꠇꠦ ꠢꠎꠞꠔ ꠡꠣꠝꠥꠄꠟ (ꠀ꠩) ꠘꠛꠤꠞꠦ ꠢꠥꠇꠥꠝ ꠖꠤꠟꠣ,
ꠅꠃ ꠢꠥꠇꠥꠝ ꠙꠣꠁꠀ ꠔꠣꠁꠘ ꠅꠃ ꠟꠣꠈꠣꠘ ꠙꠛꠤꠔ꠆ꠞ ꠀꠔꠞ ꠘꠤꠀ ꠢꠎꠞꠔ ꠖꠣꠃꠖ (ꠀ꠩) ꠘꠛꠤꠞ ꠝꠣꠕꠣꠔ ꠝꠣꠈꠣꠁꠀ ꠈꠦꠟꠣꠚꠔꠤ ꠖꠤꠍꠟꠣ,
ꠔꠦꠃ ꠖꠣꠃꠖ ꠘꠛꠤ ꠛꠘꠤ ꠁꠍꠞꠣꠁꠟ ꠎꠣꠔꠤꠞ ꠛꠣꠖꠡꠣ ꠅꠁꠍꠟꠣ।
ꠅꠃ ꠘꠝꠥꠘꠣꠄ ꠀꠟ꠆ꠟꠣ ꠙꠣꠇꠦ ꠔꠣꠘ ꠙꠛꠤꠔ꠆ꠞ ꠞꠥꠢ ꠝꠥꠛꠣꠞꠇ ꠖꠤꠀ ꠢꠎꠞꠔ ꠁꠍꠣ ꠀꠟ-ꠝꠍꠤꠞꠦ ꠈꠦꠟꠣꠚꠔꠤ ꠖꠤꠟꠣ,
ꠎꠣꠔꠦ ꠔꠣꠁꠘ ꠅꠃ ꠖꠥꠘꠤꠀꠔ ꠄꠇ ꠘꠄꠀ ꠎꠣꠔꠤ ꠇꠣꠁꠝ ꠇꠞꠂꠘ।
ꠅꠃ ꠘꠄꠀ ꠎꠣꠔꠤꠞ ꠅꠁꠟ ꠀꠟ꠆ꠟꠣꠞ ꠛꠣꠖꠡꠣꠁ।
ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠅꠃ ꠛꠣꠖꠡꠣꠁꠞ ꠝꠣꠟꠤꠇ।
২) ꠁꠛꠘꠥꠟ꠆ꠟꠣ,
ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ
ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚꠞ ꠝꠥꠟ ꠉ꠆ꠞꠤꠇ ꠜꠣꠡꠣꠄ ꠟꠦꠈꠣ ꠀꠍꠦ ꠈꠖꠣꠞ ꠙꠥꠔ,
ꠁ ꠙꠥꠔ ꠡꠛ꠆ꠖ ꠅꠁꠟ ꠙꠣꠇ ꠇꠤꠔꠣꠛꠞ ꠜꠣꠡꠣꠄ ꠄꠇꠐꠣ ꠞꠥꠙꠇ ꠡꠛ꠆ꠖ।
ꠀꠝꠞꠣ ꠔ ꠎꠣꠘꠤ ꠀꠟ꠆ꠟꠣ ꠄꠇ, ꠔꠣꠁꠘ ꠎꠘꠝ ꠟꠂꠘꠅ ꠘꠣ, ꠎꠘꠝ ꠖꠦꠁꠘꠅ ꠘꠣ। ꠅꠁꠟꠦ ꠁ ꠙꠥꠔ ꠡꠛ꠆ꠖ ꠎꠦ ꠄꠇꠐꠣ ꠞꠥꠙꠇ ꠡꠛ꠆ꠖ ꠁꠐꠣ ꠀꠝꠞꠣꠞ ꠡꠝꠣꠎꠞ ꠛꠃꠔꠦ ꠎꠣꠘꠂꠘ ꠘꠣ ꠉꠔꠤꠇꠦ, ꠁ ꠔꠞꠎꠝꠣꠞ ꠝꠣꠎꠦ ꠢꠎꠞꠔ ꠁꠍꠣꠞꠦ ꠙꠥꠔ ꠘꠣ ꠇꠁꠀ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ ꠇꠁꠍꠤ। ꠀꠍꠟꠦ ꠁꠇꠐꠣ ꠙꠥꠞꠣꠙꠥꠞ ꠉꠣꠁꠛꠤ ꠄꠇꠐꠣ ꠃꠙꠣꠗꠤ, ꠄꠞ ꠡꠑꠤꠇ ꠅꠞ꠆ꠕ ꠀꠡ꠆ꠔꠣ ꠁꠘ꠆ꠎꠤꠟ ꠇꠤꠔꠣꠛ ꠝꠘ ꠖꠤꠀ ꠘꠣ ꠙꠠꠤꠟꠦ ꠛꠥꠎꠣ ꠈꠥꠛ ꠇꠑꠤꠘ। ꠔꠛꠥꠅ ꠕꠥꠠꠣ ꠛꠥꠎꠣꠁꠔꠣꠝ ꠌꠣꠁꠞꠣꠝ।
ꠀꠟ꠆ꠟꠣꠞ ꠇꠣꠝ-ꠇꠣꠎ ꠀꠞ ꠈꠦꠝꠔꠣ ꠎꠣꠞꠣꠞ ꠝꠣꠎꠖꠤꠀ ꠁ ꠖꠥꠘꠤꠀꠔ ꠎꠣꠞꠤ ꠅꠄ ꠛꠣ ꠛꠅꠀꠁꠟ ꠇꠞꠣ ꠅꠄ,
ꠄꠞꠣꠞꠦ ꠔ ꠔꠣꠘ ꠙꠥꠔ ꠇꠁꠀ ꠒꠣꠇꠣ ꠅꠄ।
ꠔꠦ ꠢꠎꠞꠔ ꠀꠖꠝ (ꠀ꠩)-ꠞꠦ ꠀꠟ꠆ꠟꠣꠄ ꠄꠈꠔꠤꠀꠞ ꠖꠤꠍꠟꠣ ꠀꠟ꠆ꠟꠣꠞ ꠙꠄꠖꠣ ꠇꠞꠣ ꠡꠛ ꠎꠣꠘꠖꠣꠞꠞ ꠃꠙꠞꠦ ꠞꠣꠎꠔ꠆ꠔ ꠇꠞꠣꠞ ꠟꠣꠉꠤ,
ꠉꠔꠤꠇꠦ ꠄꠘꠞꠦ ꠔꠣꠘ ꠙꠥꠔ ꠇꠅꠀ ꠅꠁꠍꠦ;
ꠀꠞ ꠚꠤꠞꠤꠡ꠆ꠔꠣ ꠅꠇꠟꠦ ꠀꠟ꠆ꠟꠣꠞ ꠘꠣꠝꠦ ꠢꠄꠔ ꠇꠥꠘꠥ ꠘꠣꠚꠞꠝꠣꠘ ꠎꠣꠔꠤꠞ ꠃꠙꠞꠦ ꠀꠟ꠆ꠟꠣꠁ ꠉꠎꠛ ꠓꠣꠟꠂꠘ,
ꠘꠣꠄ ꠔ ꠀꠞꠇ ꠎꠣꠔꠤꠞꠦ ꠢꠦꠚꠣꠎꠔ ꠇꠞꠂꠘ,
ꠄꠞꠖꠣꠄ ꠙꠣꠇ ꠇꠤꠔꠣꠛꠞ ꠞꠥꠙꠇ ꠜꠣꠡꠣꠄ ꠄꠞꠣꠞꠦꠅ ꠈꠖꠣꠞ ꠙꠥꠔ ꠇꠁꠀ ꠒꠣꠇꠣ ꠅꠁꠔ।
ꠄꠞꠣ ꠅꠁꠟꠣꠉꠤ ꠀꠟ꠆ꠟꠣꠞ ꠝꠣꠄꠀꠞ ꠈꠟꠤꠚꠣ ꠅꠇꠟ,
ꠀꠟ꠆ꠟꠣꠞ ꠘꠣꠝꠦ ꠀꠟ꠆ꠟꠣꠁ ꠄꠈꠔꠤꠀꠞ ꠌꠣꠟꠣꠁꠘ।
ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚꠞ ꠀꠟ-ꠝꠕꠤ ꠍꠤꠙꠣꠞꠣꠞ ২৮ ꠞꠥꠇꠥꠞ ১৮ ꠀꠄꠀꠔꠅ ꠢꠎꠞꠔ ꠁꠍꠣꠄ ꠇꠁꠞꠣ,
“ꠛꠦꠢꠦꠡ꠆ꠔ ꠀꠞ ꠖꠥꠘꠤꠀꠞ ꠢꠇ꠆ꠇꠟ ꠈꠦꠝꠔꠣ ꠀꠝꠣꠞꠦ ꠖꠦꠅꠀ ꠅꠁꠍꠦ।”
ꠀꠞ ꠀꠟ-ꠢꠣꠘ꠆ꠘꠣꠘ ꠍꠤꠙꠣꠞꠣꠞ ১৪ ꠞꠥꠇꠥꠞ ১০ ꠀꠄꠀꠔꠅ ꠇꠁꠍꠂꠘ,
“ꠔꠥꠝꠤ ꠄꠇꠤꠘ ꠇꠞꠅ ꠘꠣ ꠘꠤ,
ꠀꠝꠤ ꠉꠣꠁꠛꠤ ꠛꠣꠚꠞ ꠝꠣꠎꠦ ꠀꠍꠤ,
ꠀꠞ ꠉꠣꠁꠛꠤ ꠛꠣꠚꠅ ꠀꠝꠣꠞ ꠝꠣꠎꠦ ꠀꠍꠂꠘ?
ꠀꠝꠤ ꠔꠥꠝꠞꠣꠞꠦ ꠎꠦꠔꠣ ꠇꠁ,
ꠁꠔꠣ ꠀꠝꠣꠞ ꠘꠤꠎꠞ ꠝꠥꠈꠞ ꠛꠥꠟꠤ ꠘꠣꠄ,
ꠎꠦ ꠉꠣꠁꠛꠤ ꠛꠣꠚ ꠀꠝꠣꠞ ꠜꠤꠔꠞꠦ ꠀꠍꠂꠘ,
ꠔꠣꠁꠘꠃ ꠔꠣꠘ ꠘꠤꠎꠞ ꠇꠣꠝ ꠌꠣꠟꠣꠁꠞꠣ।”
ꠔꠦ ꠢꠎꠞꠔ ꠁꠍꠣ ꠀꠟ-ꠝꠍꠤ ꠅꠁꠟꠣ ꠀꠟ꠆ꠟꠣ ꠙꠣꠇꠞ ꠈꠥꠛ ꠊꠘꠤꠡ꠆ꠐ ꠝꠣꠄꠀꠞ ꠎꠘ,
ꠀꠟ꠆ꠟꠣꠄ ꠔꠣꠘꠞꠦ ꠁꠎ꠆ꠎꠔ,
ꠈꠦꠝꠔꠣ ꠀꠞ ꠅꠗꠤꠇꠣꠞ ꠖꠤꠍꠂꠘ ꠢꠇꠟ ꠕꠣꠇꠤ ꠛꠦꠡꠤ।
ꠔꠣꠁꠘ ꠅꠁꠟꠣ ꠢꠇꠟ ꠕꠣꠇꠤ ꠀꠟꠣꠖꠣ,
ꠔꠣꠁꠘ ꠔꠡꠞꠤꠚ ꠀꠘꠍꠂꠘ ꠀꠟ꠆ꠟꠣꠞ ꠀꠞꠡ ꠕꠣꠇꠤ ꠀꠞ ꠅꠈꠘꠅ ꠀꠟ꠆ꠟꠣ ꠙꠣꠇꠞ ꠗꠣꠞꠅ ꠀꠍꠂꠘ,
ꠔꠣꠘ ꠡ꠆ꠛꠜꠣꠛ-ꠌꠞꠤꠔ꠆ꠞ ꠅꠁꠟ ꠙꠥꠞꠣꠙꠥꠞ ꠀꠟ꠆ꠟꠣꠁ ꠜꠣꠛ।
ꠀꠟ꠆ꠟꠣꠁ ꠇꠥꠖꠞꠔꠤ ꠈꠦꠝꠔꠣ ꠈꠣꠐꠣꠁꠍꠂꠘ ꠢꠣꠄꠀꠔ-ꠝꠃꠔ,
ꠞꠤꠎꠦꠇ-ꠖꠃꠟꠔ ꠀꠞ ꠉꠥꠘꠣ ꠝꠣꠚꠤꠞ ꠛꠦꠙꠣꠞꠦ।
ꠄꠞꠟꠣꠉꠤꠃ ꠀꠟ꠆ꠟꠣꠄ ꠔꠣꠘꠞꠦ ꠁꠎ꠆ꠎꠔ ꠇꠞꠤꠀ ꠉ꠆ꠞꠤꠇ ꠜꠣꠡꠣꠞ ꠞꠥꠙꠇ ꠛꠥꠟꠤꠄ ꠈꠖꠣꠞ ꠙꠥꠔ ꠇꠁꠀ ꠃꠙꠣꠗꠤ ꠖꠤꠍꠂꠘ,
ꠀꠞꠛꠤ ꠜꠣꠡꠣꠄ ꠇꠅꠀ ꠅꠄ ꠁꠛꠘꠥꠟ꠆ꠟꠣ।
৩) ꠛꠤꠘ-ꠀꠖꠝ
ꠢꠎꠞꠔ ꠁꠍꠣꠄ ꠘꠤꠎꠦ ꠘꠤꠎꠞ ꠘꠣꠝ ꠇꠁꠔꠣ ꠛꠤꠘ-ꠀꠖꠝ।
ꠅꠁꠘ꠆ꠘ ꠇꠦꠃ ꠔꠣꠘꠞꠦ ꠁ ꠘꠣꠝꠦ ꠒꠣꠇꠤꠔ ꠘꠣ।
ꠔꠣꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠛꠃꠔ ꠀꠉꠦ ꠢꠎꠞꠔ ꠖꠣꠘꠤꠀꠟ (ꠀ꠩) ꠘꠣꠝꠦ ꠄꠇꠎꠘ ꠘꠛꠤ ꠀꠍꠟꠣ।
ꠅꠃ ꠖꠣꠘꠤꠀꠟ ꠘꠛꠤꠞ ꠍꠢꠤꠚꠣꠞ ꠝꠣꠎꠦ ꠟꠦꠈꠣ ꠀꠍꠦ,
ꠛꠦꠢꠦꠡ꠆ꠔꠤ ꠄꠇ ꠙꠛꠤꠔ꠆ꠞ ꠎꠘ ꠅꠃ ꠖꠥꠘꠤꠀꠔ ꠔꠡꠞꠤꠚ ꠀꠘꠛꠣ,
ꠄꠁꠘ ꠝꠣꠘꠡꠞ ꠟꠣꠈꠣꠘ ꠍꠥꠞꠔ ꠗꠞꠤꠀ ꠀꠁꠛꠣ,
ꠄꠁꠘꠃ ꠛꠤꠘ-ꠀꠖꠝ।
ꠙꠛꠤꠔ꠆ꠞ ꠇꠤꠔꠣꠛꠥꠟ ꠝꠥꠇꠣꠖ꠆ꠖꠍ,
ꠖꠣꠘꠤꠀꠟ ꠍꠤꠙꠣꠞꠣꠞ ৭ ꠞꠥꠇꠥ ১৪ ꠀꠄꠀꠔꠅ ꠀꠍꠦ,
“ꠅꠃ ꠛꠤꠘ-ꠀꠖꠝꠞ ꠀꠔꠅ ꠈꠦꠝꠔꠣ,
ꠁꠎ꠆ꠎꠔ ꠀꠞ ꠞꠣꠎꠔ꠆ꠔ ꠇꠞꠣꠞ ꠄꠈꠔꠤꠀꠞ ꠖꠦꠅꠀ ꠅꠁꠟ,
ꠎꠣꠔꠦ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤ,
ꠖꠦꠡ ꠀꠞ ꠘꠣꠘꠣꠘ ꠜꠣꠡꠣꠄ ꠝꠣꠔꠞꠣ ꠝꠣꠘꠡꠦ ꠔꠣꠘ ꠈꠦꠎꠝꠔ ꠇꠞꠂꠘ।
ꠔꠣꠘ ꠛꠣꠖꠡꠣꠁ ꠌꠤꠞꠡ꠆ꠕꠣꠄꠁ,
ꠇꠥꠘꠥꠖꠤꠘ ꠚꠥꠠꠣꠁꠔ ꠘꠣꠄ ꠛꠣ ꠛꠤꠘꠣꠡꠅ ꠅꠁꠔ ꠘꠣꠄ।”
ꠢꠎꠞꠔ ꠁꠍꠣꠃ ꠅꠁꠟꠣ ꠢꠃ ꠈꠦꠝꠔꠣꠀꠟꠣ ꠛꠤꠘ-ꠀꠖꠝ।
৪) ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣ
ꠀꠟ-ꠢꠣꠘ꠆ꠘꠣꠘ ꠍꠤꠙꠣꠞꠣꠞ ১ ꠞꠥꠇꠥ ২৯ ꠀꠄꠀꠔꠅ ꠀꠍꠦ,
ꠄꠢꠤꠀ (ꠀ꠩) ꠘꠛꠤꠄ ꠢꠎꠞꠔ ꠁꠍꠣꠞ ꠛꠣꠄ ꠁꠡꠣꠞꠣ ꠇꠞꠤ ꠇꠁꠍꠟꠣ,
“ꠅꠃ ꠖꠦꠈꠞꠣꠄ ꠘꠤ ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣ,
ꠎꠦꠘ ꠃꠍꠤꠟ꠆ꠟꠣꠄ ꠢꠇ꠆ꠇꠟ ꠝꠣꠘꠡꠞ ꠉꠥꠘꠣꠞ ꠝꠣꠚꠤ ꠅꠄ।”
ꠀꠍꠟꠦ ꠝꠦꠠꠣ ꠔ ꠝꠦꠠꠣꠃ,
ꠇꠥꠘꠥ ꠝꠣꠘꠥꠡ ꠘꠣꠄ।
ꠔꠦ ꠁꠍꠣꠞꠦ ꠇꠦꠘꠦ ꠝꠦꠠꠣ ꠇꠁꠀ ꠒꠣꠇꠣ ꠅꠄ?
ꠇꠣꠞꠘ ꠅꠁꠟ,
ꠛꠃꠔ ꠎꠝꠣꠘꠣ ꠀꠉꠦ,
ꠛꠘꠤ ꠁꠍꠞꠣꠁꠟ ꠎꠣꠔꠤ ꠎꠦꠛꠟꠣ ꠝꠤꠡꠞ ꠖꠦꠡꠅ ꠉꠥꠟꠣꠝ ꠀꠍꠟꠣ,
ꠄꠇꠖꠤꠘ ꠀꠟ꠆ꠟꠣꠄ ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠔꠣꠞꠣꠞꠦ ꠢꠥꠇꠥꠝ ꠖꠤꠟꠣ,
ꠙꠞꠔꠦꠇ ꠊꠞꠅ ꠄꠇ ꠄꠇ ꠝꠦꠠꠣ ꠇꠥꠞꠛꠣꠘꠤ ꠇꠞꠤꠀ ꠄꠞ ꠟꠃ ꠊꠞꠞ ꠖꠥꠀꠞꠞ ꠌꠃꠇꠣꠑꠅ ꠟꠣꠉꠣꠘꠤꠞ ꠟꠣꠉꠤ,
ꠎꠣꠔꠦ ꠔꠣꠞꠣ ꠘꠣ ꠝꠞꠂꠘ।
ꠎꠔ ꠊꠞꠞ ꠌꠃꠇꠣꠑꠅ ꠟꠃ ꠀꠍꠤꠟ ꠘꠣ,
ꠝꠣꠘꠤ ꠎꠣꠟꠤꠝ ꠚꠦꠞꠣꠃꠘ ꠀꠞ ꠝꠤꠡꠞꠤ ꠅꠇꠟꠞ ꠊꠞꠣꠁꠘ꠆ꠔꠅ,
ꠁ ꠢꠇ꠆ꠇꠟ ꠊꠞꠞ ꠛꠠ ꠙꠥꠀꠂꠘ ꠢꠃ ꠖꠤꠘꠃ ꠀꠗꠣ ꠞꠣꠁꠔꠇꠥꠞ ꠡꠝꠄ ꠝꠞꠤꠉꠦꠟ।
ꠔꠦꠃ ꠚꠦꠞꠣꠃꠘ ꠎꠟꠖꠤ ꠇꠞꠤ ꠃꠑꠤꠀ ꠛꠘꠤ ꠁꠍꠞꠣꠁꠟꠞꠦ ꠍꠣꠠꠤ ꠖꠤꠟ ꠀꠞ ꠄꠞꠣ ꠝꠤꠡꠞ ꠖꠦꠡ ꠕꠣꠇꠤ ꠀꠎꠣꠖ ꠅꠁꠀ ꠛꠣꠞꠅꠁꠀ ꠉꠦꠟꠣ।
ꠢꠎꠞꠔ ꠄꠢꠤꠀꠄ ꠔ ꠎꠣꠘꠔꠣ,
ꠛꠘꠤ ꠁꠍꠞꠣꠁꠟꠦ ꠎꠦꠟꠣ ꠝꠦꠠꠣ ꠇꠥꠞꠛꠣꠘꠤ ꠖꠤꠀ ꠝꠃꠔ ꠕꠣꠇꠤ ꠀꠞ ꠚꠦꠞꠣꠃꠘꠞ ꠉꠥꠟꠣꠝꠤ ꠕꠣꠇꠤ ꠞꠦꠢꠣꠁ ꠙꠣꠁꠍꠟꠣ,
ꠑꠤꠇ ꠅꠃꠟꠣ ꠁꠍꠣ ꠀꠟ-ꠝꠍꠤꠞ ꠎꠣꠘ ꠇꠥꠞꠛꠣꠘꠤꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠢꠇꠟ ꠎꠣꠔꠤꠞ ꠝꠣꠘꠡꠦ ꠁꠛꠟꠤꠍꠞ ꠀꠔ ꠕꠣꠇꠤ ꠀꠞ ꠉꠥꠘꠣꠞ ꠉꠥꠟꠣꠝꠤ ꠕꠣꠇꠤ ꠞꠦꠢꠣꠁ ꠙꠣꠁꠛꠣ।
ꠇꠥꠘꠥ ꠇꠥꠘꠥ ꠝꠣꠘꠡꠞ ꠗꠣꠞꠘꠣ,
ꠢꠎꠞꠔ ꠁꠍꠣꠞ ꠝꠃꠔ ꠅꠁꠍꠦ ꠘꠣ,
ꠔꠣꠁꠘ ꠡꠞꠣꠡꠞꠤ ꠎꠤꠘ꠆ꠖꠣ ꠢꠣꠟꠔꠦ ꠛꠦꠢꠦꠡ꠆ꠔꠅ ꠉꠦꠍꠂꠘ।
ꠅꠁꠟꠦ ꠢꠣꠍꠣꠃ ꠔꠣꠘ ꠝꠃꠔ ꠅꠁꠍꠦ,
ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ।
ꠙꠛꠤꠔ꠆ꠞ ꠇꠥꠞꠣꠘ ꠡꠞꠤꠚꠞ ꠍꠥꠞꠣ ꠘꠤꠍꠣꠞ ১৫৭ ꠀꠄꠀꠔꠅ ꠀꠍꠦ,
“ꠔꠣꠞꠣ (ꠝꠣꠘꠤ ꠁꠢꠥꠖꠤ ꠘꠦꠔꠣ ꠅꠇꠟꠦ) ꠛꠠꠣꠁ ꠇꠞꠤ ꠇꠂꠟ,
ꠀꠝꠞꠣ ꠝꠞꠤꠅꠝꠞ ꠙꠥꠔ ꠁꠍꠣ ꠀꠟ-ꠝꠍꠤꠞꠦ ꠎꠣꠘꠦ ꠝꠣꠞꠤꠟꠤꠍꠤ;
ꠇꠤꠘ꠆ꠔꠥ ꠀꠍꠟꠦ ꠔꠣꠞꠣ ꠔꠣꠘꠞꠦ ꠇꠣꠔꠟ ꠇꠞꠟ ꠘꠣ।”
ꠇꠥꠞꠣꠘ ꠡꠞꠤꠚꠞ ꠅꠃ ꠀꠄꠀꠔ ꠔ ꠄꠇ꠆ꠇꠦꠞꠦ ꠢꠣꠍꠣ,
ꠇꠣꠞꠘ ꠢꠎꠞꠔ ꠁꠍꠣꠄ ꠘꠤꠎꠦ ꠇꠁꠍꠟꠣ,
ꠁꠘ꠆ꠎꠤꠟ ꠡꠞꠤꠚꠞ ꠀꠟ-ꠢꠣꠘ꠆ꠘꠣꠘ ꠍꠤꠙꠣꠞꠣꠞ ১০ ꠞꠥꠇꠥ ১৮ ꠀꠄꠀꠔꠅ,
“ꠀꠝꠣꠞ ꠎꠣꠘ ꠇꠦꠃ ꠀꠝꠣꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠤꠔ ꠘꠣꠄ,
ꠅꠁꠟꠦ ꠀꠝꠤ ꠘꠤꠎꠦꠃ ꠎꠣꠘ ꠛꠤꠟꠣꠁꠝꠥ।
ꠝꠘꠅ ꠞꠣꠈꠤꠅ,
ꠎꠣꠘ ꠖꠦꠅꠀꠞ ꠈꠦꠝꠔꠣ ꠎꠦꠟꠣ ꠀꠝꠣꠞ ꠀꠍꠦ,
ꠅꠃꠟꠣ ꠚꠤꠞꠔ ꠘꠦꠅꠀꠞ ꠈꠦꠝꠔꠣꠅ ꠀꠍꠦ।”
ꠀꠞ ꠀꠟ-ꠝꠣꠞ꠆ꠇꠥꠍ ꠍꠤꠙꠣꠞꠣꠞ ১০ ꠞꠥꠇꠥ ৪৫ ꠀꠄꠀꠔꠅ ꠔꠣꠁꠘ ꠇꠁꠍꠟꠣ,
“ꠀꠝꠤ ꠛꠤꠘ-ꠀꠖꠝꠦ ꠛꠃꠔ ꠝꠣꠘꠡꠞ ꠎꠣꠘ ꠛꠣꠌꠣꠘꠤꠞ ꠟꠣꠉꠤ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠅꠀꠔ ꠀꠁꠍꠤ।”
ꠔꠦ ꠄꠞꠟꠣꠉꠤꠃ ꠢꠎꠞꠔ ꠁꠍꠣꠞꠦ ꠇꠥꠞꠛꠣꠘꠤꠞ ꠝꠦꠠꠣꠞ ꠟꠉꠦ ꠔꠥꠟꠘꠣ ꠇꠞꠣ ꠅꠁꠍꠦ।
ꠀꠈꠦꠞꠤ ꠇꠕꠣ
ꠔꠦ ꠅꠃ ꠇꠤꠔꠣꠛ ꠔꠤꠟꠣꠅꠔ ꠇꠞꠞꠣ,
ꠢꠇꠟ ꠜꠣꠁ-ꠛꠤꠞꠣꠖꠞꠞꠦ ꠇꠁꠞꠣꠝ,
ꠀꠝꠞꠣ ꠎꠦꠞꠣ ꠄꠇ ꠀꠟ꠆ꠟꠣ ꠝꠣꠘꠤ,
ꠄꠇ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤ।
ꠀꠟ꠆ꠟꠣꠞ ꠈꠥꠡꠤꠄ ꠘꠤꠎꠞ ꠈꠥꠡꠤ ꠀꠞ ꠀꠟ꠆ꠟꠣꠞ ꠛꠦꠎꠣꠞꠦ ꠘꠤꠎꠞ ꠛꠦꠎꠣꠞꠤ ꠝꠘꠅ ꠇꠞꠤ,
ꠀꠟ꠆ꠟꠣꠞ ꠃꠙꠞꠦꠃ ꠀꠝꠞꠣꠞ ꠎꠤꠘ꠆ꠖꠦꠉꠤꠞ ꠉꠔꠤ,
ꠁꠈꠣꠘ ꠖꠤꠟꠦ-ꠎꠣꠘꠦ ꠄꠇꠤꠘ ꠇꠞꠤ।
ꠀꠃꠇ꠆ꠇꠣ ꠀꠝꠞꠣ ꠖꠤꠟꠞ ꠈꠣꠟꠤꠍ-ꠍꠢꠤ ꠘꠤꠅꠔꠦ ꠁꠎ꠆ꠎꠔ ꠀꠞ ꠔꠣꠎꠤꠝ ꠇꠞꠤꠀ ꠝꠢꠣꠘ ꠀꠟ꠆ꠟꠣ ꠞꠣꠛ꠆ꠛꠥꠟ ꠀꠟꠣꠝꠤꠘꠞ ꠅꠃ ꠙꠛꠤꠔ꠆ꠞ ꠀꠍꠝꠣꠘꠤ ꠇꠤꠔꠣꠛ ꠅꠇꠟ ꠔꠤꠟꠣꠅꠔ ꠇꠞꠤ।
ꠄꠞ ꠛꠣꠔꠣꠁꠟ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠇꠞꠤ।
ꠔꠦꠃ ꠖꠥꠘꠤꠀ ꠀꠞ ꠀꠈꠦꠞꠣꠔꠅ ꠀꠝꠞꠣ ꠡꠞꠝꠤꠘ꠆ꠖꠣ ꠅꠁꠔꠣꠝ ꠘꠣꠄ।
ꠀꠝꠞꠣ ꠀꠡꠣ ꠇꠞꠤ,
ꠀꠙꠘꠣꠞꠣ ꠀꠟ꠆ꠟꠣ ꠙꠣꠇꠞ ꠇꠣꠟꠣꠝꠞꠦ ꠁꠎ꠆ꠎꠔ ꠖꠤꠛꠣ।
ꠝꠢꠣꠘ ꠝꠣꠛꠥꠖ ꠀꠟ꠆ꠟꠣꠄ ꠀꠝꠞꠣ ꠢꠇꠟꠞ ꠖꠤꠟꠞ ꠖꠥꠀꠞ ꠈꠥꠟꠤꠀ ꠖꠦꠃꠇ꠆ꠇꠣ,
ꠔꠣꠘ ꠇꠣꠟꠣꠝ ꠎꠣꠘꠤꠀ-ꠛꠥꠎꠤꠀ ꠀꠝꠟ ꠇꠞꠣꠞ ꠔꠃꠚꠤꠇ ꠖꠦꠃꠇ꠆ꠇꠣ।
ꠔꠣꠘ ꠀꠡꠤꠇ ꠅꠇꠟꠞ ꠃꠙꠞꠦ ꠔꠣꠘ ꠈꠣꠍ ꠞꠢꠝꠔ ꠀꠞ ꠛꠞꠇꠔ ꠘꠣꠎꠤꠟ ꠇꠞꠃꠇ꠆ꠇꠣ।
ꠀꠝꠤꠘ॥