ꠝꠄ-ꠝꠥꠞꠛ꠆ꠛꠤꠞ ꠉꠦꠍ ꠕꠣꠇꠤ ꠙꠣꠅꠀ ꠞꠍꠥꠝꠔ
৭
১ ꠛꠣꠖꠦ ꠎꠦꠞꠥꠎꠣꠟꠦꠝ ꠕꠣꠇꠤ ꠇꠄꠎꠘ ꠝꠃꠟꠣꠘꠣ ꠀꠞ ꠚꠞꠤꠡꠤ ꠝꠎꠛꠞ ꠇꠤꠍꠥ ꠝꠣꠘꠥꠡ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠟꠣ।
২ ꠀꠁꠀ ꠖꠦꠈꠟꠣ,
ꠁꠍꠣꠞ ꠇꠄꠎꠘ ꠃꠝ꠆ꠝꠔꠦ ꠀꠔ ꠘꠣ ꠗꠁꠀ ꠄꠝꠘꠦꠃ ꠈꠣꠘꠤꠔ ꠛꠁꠉꠦꠍꠂꠘ।
৩ ꠀꠍꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠝꠣꠚꠤꠇ,
ꠢꠇ꠆ꠇꠟ ꠁꠢꠥꠖꠤ ꠀꠞ ꠚꠞꠤꠡꠤ ꠅꠇꠟꠦꠅ ꠅꠎꠥ ꠘꠣ ꠇꠞꠤꠀ ꠇꠥꠘꠥ ꠈꠣꠘꠤ ꠈꠣꠁꠘ ꠘꠣ।
৪ ꠛꠣꠎꠣꠞ-ꠀꠐ ꠕꠣꠇꠤ ꠇꠥꠘꠥ ꠎꠤꠘꠤꠡ ꠀꠘꠟꠦ ꠙꠣꠇ-ꠍꠣꠚ ꠘꠣ ꠇꠞꠤꠀ ꠝꠥꠈꠅ ꠖꠦꠁꠘ ꠘꠣ,
ꠕꠣꠟ-ꠛꠣꠡꠘ ꠗꠁꠀ ꠍꠣꠚ-ꠍꠥꠔꠞꠣ ꠇꠞꠣ,
ꠅꠃ ꠟꠣꠈꠣꠘ ꠛꠃꠔ ꠞꠤꠔꠤ-ꠞꠦꠅꠀꠎ ꠔꠣꠞꠣ ꠝꠣꠘꠦ।
৫ ꠄꠞꠖꠣꠄ ꠅꠃ ꠝꠃꠟꠣꠘꠣ ꠀꠞ ꠚꠞꠤꠡꠤ ꠅꠇꠟꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠀꠉꠞ ꠎꠝꠣꠘꠣꠞ ꠝꠃꠟꠣꠘꠣ ꠅꠇꠟꠞ ꠛꠣꠔꠣꠁꠟ ꠞꠍꠥꠝꠔ ꠇꠦꠘꠦ ꠝꠣꠘꠂꠘ ꠘꠣ?
ꠔꠣꠞꠣ ꠔ ꠘꠣꠙꠣꠇ ꠀꠔꠦ ꠈꠣꠘꠤ ꠈꠣꠁꠘ।”
৬ ꠔꠣꠁꠘ ꠎꠥꠀꠙ ꠖꠤꠟꠣ,
“ꠀꠙꠘꠣꠞꠣ ꠔ ꠜꠘ꠆ꠒ!
ꠢꠎꠞꠔ ꠁꠡꠣꠄꠀ ꠘꠛꠤꠄ ꠀꠙꠘꠣꠁꠘ꠆ꠔꠞ ꠛꠦꠙꠣꠞꠦ ꠑꠤꠇꠃ ꠇꠁꠍꠂꠘ,
ꠁꠔꠣ ꠝꠣꠘꠡꠦ ꠝꠥꠈ ꠖꠤꠀ ꠈꠣꠟꠤ ꠀꠝꠣꠞꠦ ꠁꠎ꠆ꠎꠔ ꠇꠞꠦ,
ꠅꠁꠟꠦ ꠔꠣꠞꠣꠞ ꠖꠤꠟ ꠀꠝꠣ ꠕꠘꠦ ꠛꠃꠔ ꠖꠥꠞꠁ।
৭ ꠔꠣꠞꠣ ꠢꠥꠖꠣꠞ ꠈꠣꠝꠈꠣ ꠀꠝꠣꠞ ꠄꠛꠣꠖꠔ ꠇꠞꠦ,
ꠔꠣꠞꠣꠞ ꠔꠣꠟꠤꠝ ꠅꠇꠟ ꠔ
ꠝꠣꠘꠡꠞ ꠛꠣꠘꠣꠁꠟ ꠝꠘꠉꠠꠣ ꠡꠞꠤꠅꠔ।
৮ ꠔꠦ ꠀꠙꠘꠣꠞꠣ ꠔ ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ-ꠀꠢꠇꠣꠝ ꠛꠣꠖ ꠖꠤꠀ,
ꠝꠣꠘꠡꠞ ꠛꠣꠘꠣꠁꠟ ꠞꠍꠥꠝꠔ ꠀꠝꠟ ꠇꠞꠞꠣ।”
৯ ꠁꠍꠣꠄ ꠔꠣꠞꠣꠞꠦ ꠀꠞꠅ ꠇꠁꠟꠣ,
“ꠀꠟ꠆ꠟꠣꠞ ꠖꠦꠅꠀ ꠢꠥꠇꠥꠝ ꠛꠣꠖ ꠖꠤꠀ,
ꠘꠤꠎꠞ ꠝꠘꠉꠠꠣ ꠞꠍꠥꠝꠔ ꠇꠣꠁꠝ ꠇꠞꠣꠞ ꠗꠣꠘ꠆ꠖꠣ ꠔ ꠀꠙꠘꠣꠞꠣ ꠈꠥꠛ ꠜꠣꠟꠣ ꠇꠞꠤꠃ ꠎꠣꠘꠂꠘ।
১০ ꠎꠦꠟꠣ ꠢꠎꠞꠔ ꠝꠥꠍꠣꠄ ꠇꠁꠍꠂꠘ,
ꠝꠣ-ꠛꠣꠛꠣꠞꠦ ꠁꠎ꠆ꠎꠔ ꠇꠞꠤꠅ,
ꠎꠦ ꠝꠣꠘꠡꠦ ꠀꠙꠘ ꠝꠣ-ꠛꠣꠚꠞ ꠛꠖꠘꠣꠝ ꠉꠣꠄ,
ꠔꠣꠞꠦ ꠇꠣꠔꠟ ꠇꠞꠣ ꠅꠁꠛ।
১১ ꠅꠁꠟꠦ ꠀꠙꠘꠣꠞꠣ ꠝꠣꠘꠡꠞꠦ ꠔꠣꠟꠤꠝ ꠖꠤꠞꠣ,
ꠇꠥꠘꠥ ꠝꠣꠘꠡꠦ ꠎꠥꠖꠤ ꠔꠣꠞ ꠝꠣ-ꠛꠣꠚꠞꠦ ꠇꠁꠟꠣꠄ,
ꠀꠝꠣꠞ ꠎꠦꠔꠣ ꠍꠣꠝꠣꠘꠣ ꠖꠤꠀ ꠀꠙꠘꠣꠁꠘ꠆ꠔꠞ ꠈꠦꠎꠝꠔ ꠇꠞꠔꠣꠝ ꠀꠍꠤꠟ,
ꠁꠔꠣ ꠀꠟ꠆ꠟꠣꠞ ꠘꠣꠝꠦ ꠟꠤꠟ꠆ꠟꠣ ꠖꠤꠟꠣꠁꠍꠤ,
১২ ꠔꠦ ꠔꠣꠞ ꠝꠣ-ꠛꠣꠚꠞ ꠟꠣꠉꠤ ꠀꠞ ꠇꠥꠘ꠆ꠔꠣꠃ ꠇꠞꠣ ꠟꠣꠉꠦ ꠘꠣ।
১৩ ꠅꠃ ꠟꠣꠈꠣꠘ ꠀꠙꠘꠣꠞꠣꠞ ꠛꠣꠚ-ꠖꠣꠖꠣꠞ ꠝꠘꠉꠠꠣ ꠘꠤꠅꠝ ꠖꠤꠀ ꠀꠟ꠆ꠟꠣꠞ ꠇꠣꠟꠣꠝ ꠛꠣꠔꠤꠟ ꠇꠞꠤꠟꠤꠍꠂꠘ।
ꠁꠈꠣꠘ ꠛꠣꠖꠦꠅ ꠀꠙꠘꠣꠞꠣ ꠅꠃꠟꠣ ꠀꠞꠅ ꠛꠃꠔ ꠇꠣꠝ ꠇꠞꠞꠣ।”
১৪ ꠛꠣꠖꠦ ꠁꠍꠣꠄ ꠝꠣꠘꠡꠞꠦ ꠔꠣꠘ ꠇꠣꠘ꠆ꠖꠣꠔ ꠘꠤꠀ ꠇꠁꠟꠣ,
“ꠀꠙꠘꠣꠞꠣ ꠢꠇꠟꠦ ꠀꠝꠣꠞ ꠇꠕꠣ ꠈꠤꠀꠟ ꠇꠞꠤ ꠢꠥꠘꠃꠇ꠆ꠇꠣ ꠀꠞ ꠛꠥꠎꠃꠇ꠆ꠇꠣ।
১৫-১৬ ꠛꠣꠁꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠜꠤꠔꠞꠦ ꠢꠣꠝꠣꠄ,
ꠁꠔꠣꠄ ꠔ ꠔꠣꠞꠦ ꠘꠣꠙꠣꠇ ꠛꠣꠘꠣꠄ ꠘꠣ।
ꠛꠞꠋ ꠝꠣꠘꠡꠞ ꠜꠤꠔꠞꠦ ꠕꠣꠇꠤ ꠎꠦꠔꠣ ꠛꠣꠞꠅꠄ,
ꠅꠔꠣꠄꠃ ꠔꠣꠞꠦ ꠘꠣꠙꠣꠇ ꠛꠣꠘꠣꠄ।”
১৭ ꠛꠄꠀꠘ ꠛꠣꠖꠦ ꠔꠣꠁꠘ ꠝꠣꠘꠡꠞ ꠉꠦꠍ ꠕꠣꠇꠤ ꠢꠞꠤꠀ ꠉꠤꠀ ꠊꠞꠅ ꠢꠣꠝꠣꠁꠟꠣ,
ꠔꠦꠃ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠄꠞ ꠝꠣꠘꠤ ꠎꠤꠇꠣꠁꠟꠣ।
১৮ ꠁꠍꠣꠄ ꠇꠁꠟꠣ,
“ꠔꠥꠝꠞꠣ ꠇꠤꠔꠣ ꠅꠃꠟꠣꠃ ꠛꠦꠀꠇ꠆ꠇꠟ ꠘꠤ?
ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠛꠣꠞꠦ ꠕꠣꠇꠤ ꠎꠦꠔꠣ ꠎꠤꠘꠤꠡ ꠝꠣꠘꠡꠞ ꠜꠤꠔꠞꠦ ꠢꠣꠝꠣꠄ,
ꠁꠔꠣꠄ ꠝꠣꠘꠡꠞꠦ ꠘꠣꠙꠣꠇ ꠇꠞꠔ ꠙꠣꠞꠦ ꠘꠣ।
১৯ ꠁꠔꠣ ꠔ ꠔꠣꠞ ꠖꠤꠟꠞ ꠜꠤꠔꠞꠦ ꠢꠣꠝꠣꠄ ꠘꠣ,
ꠈꠣꠟꠤ ꠙꠦꠐꠞ ꠝꠣꠎꠦ ꠢꠣꠝꠣꠄ,
ꠀꠞ ꠙꠦꠐ ꠕꠣꠇꠤ ꠢꠤꠞꠛꠣꠞ ꠛꠣꠞꠅꠁ ꠎꠣꠄ।”
ꠁꠍꠣꠄ ꠅꠃ ꠔꠣꠟꠤꠝ ꠖꠤꠀ ꠛꠥꠎꠣꠁꠟꠣ,
ꠇꠥꠘꠥꠎꠣꠔ ꠈꠣꠘꠤꠃ ꠘꠣꠙꠣꠇ ꠘꠣꠄ।
২০ ꠔꠣꠁꠘ ꠇꠁꠟꠣ,
“ꠝꠣꠘꠡꠞ ꠜꠤꠔꠞꠦ ꠕꠣꠇꠤ ꠎꠦꠔꠣ ꠛꠣꠞꠅꠄ,
ꠅꠔꠣꠄꠃ ꠝꠣꠘꠡꠞꠦ ꠘꠣꠙꠣꠇ ꠇꠞꠦ।
২১ ꠝꠣꠘꠡꠞ ꠖꠤꠟ ꠕꠣꠇꠤꠃ ꠔ ꠢꠇꠟ ꠘꠝꠥꠘꠣꠞ ꠇꠥ-ꠌꠤꠘ꠆ꠔꠣ ꠀꠄ;
ꠎꠤꠘꠣ,
ꠌꠥꠞꠤ,
ꠈꠥꠘ,
২২ ꠟꠥꠜ-ꠟꠣꠟꠌ,
ꠙꠞꠞ ꠈꠦꠔꠤ ꠇꠞꠣꠞ ꠗꠣꠘ꠆ꠖꠣ,
ꠍꠟ-ꠌꠔꠥꠞꠤ,
ꠛꠖꠝꠣꠁꠡꠤ,
ꠛꠖ-ꠘꠎꠞ,
ꠁꠋꠡꠣ-ꠘꠤꠘ꠆ꠖꠣ,
ꠛꠠꠣꠁ-ꠛꠦꠐꠣꠉꠤꠞꠤ ꠀꠞ ꠡꠄꠔꠣꠘꠤ ꠛꠣꠞꠅꠄ।
২৩ ꠅꠃ ꠔꠣꠝꠣꠝ ꠘꠣꠚꠞꠝꠣꠘꠤ ꠝꠣꠘꠡꠞ ꠖꠤꠟ ꠕꠣꠇꠤ ꠛꠣꠞꠅꠁꠀ ꠔꠣꠞꠣꠞꠦ ꠘꠣꠙꠣꠇ ꠛꠣꠘꠣꠄ।”
ꠉꠣꠟꠤꠟ ꠎꠤꠟꠣꠞ ꠛꠣꠞꠦ ꠢꠎꠞꠔ ꠁꠍꠣꠞ ꠝꠥꠎꠦꠎꠣ (৭:২৪-১০:৫২)
ꠛꠤꠗꠞ꠆ꠝꠤ ꠛꠦꠐꠤꠞ ꠁꠝꠣꠘꠞ ꠛꠟ
২৪ ꠛꠣꠖꠦ ꠁꠍꠣ ꠅꠃ ꠄꠟꠣꠇꠣ ꠕꠘꠦ ꠡꠤꠞꠤꠀ ꠖꠦꠡꠞ ꠡꠥꠞ ꠐꠣꠃꠘꠞ ꠇꠣꠘ꠆ꠖꠣꠔ ꠔꠡꠞꠤꠚ ꠘꠤꠟꠣꠉꠤ।
ꠅꠘꠅ ꠀꠁꠀ ꠔꠣꠁꠘ ꠄꠇ ꠊꠞꠞ ꠜꠤꠔꠞꠦ ꠟꠥꠇꠣꠁ ꠞꠁꠟꠣ,
ꠌꠣꠁꠟꠣ ꠝꠣꠘꠡꠦ ꠎꠣꠘꠥ ꠘꠣ ꠎꠣꠘꠂꠘ ꠔꠣꠁꠘ ꠀꠁꠍꠂꠘ ꠇꠞꠤ।
ꠅꠁꠟꠦ ꠔꠣꠘ ꠈꠛꠞ ꠞꠐꠤ ꠉꠦꠟ।
২৫ ꠢꠘꠅ ꠄꠇ ꠛꠦꠐꠤ ꠝꠣꠘꠡꠞ ꠙꠥꠠꠤꠞꠦ ꠜꠥꠔꠦ ꠗꠞꠣꠄ,
ꠁꠍꠣꠄ ꠔꠡꠞꠤꠚ ꠀꠘꠍꠂꠘ ꠢꠥꠘꠤꠀ ꠅꠃ ꠛꠦꠐꠤꠄ,
ꠎꠟꠖꠤ ꠇꠞꠤ ꠀꠁꠀ ꠔꠣꠘ ꠙꠣꠅꠔ ꠙꠠꠟ।
২৬ ꠁ ꠛꠦꠐꠤꠞ ꠛꠣꠠꠤ ꠡꠤꠞꠤꠀ ꠖꠦꠡꠞ ꠚꠂꠘꠤꠇꠤꠀ ꠄꠟꠣꠇꠣꠔ,
ꠅꠁꠟꠦ ꠝꠣꠔꠤꠔ ꠁꠃꠘꠣꠘꠤ ꠜꠣꠡꠣꠄ।
ꠔꠣꠁ ꠁꠍꠣꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠤꠀ ꠇꠂꠟ,
“ꠢꠥꠎꠥꠞ,
ꠜꠥꠔꠞ ꠇꠛꠎꠣ ꠕꠣꠇꠤ ꠀꠝꠣꠞ ꠙꠥꠠꠤꠉꠥꠞꠦ ꠛꠣꠌꠣꠃꠇ꠆ꠇꠣ।”
২৭ ꠁꠍꠣꠄ ꠇꠁꠟꠣ,
“ꠀꠉꠦ ꠘꠤꠎꠞ ꠢꠥꠞꠥꠔ꠆ꠔꠣꠂꠘ꠆ꠔꠦ ꠙꠦꠐ ꠜꠞꠤ ꠈꠣꠃꠇ꠆ꠇꠣ,
ꠘꠤꠎꠞ ꠍꠣꠛꠣꠟꠞ ꠈꠣꠘꠤ ꠇꠥꠇꠞꠞ ꠍꠣꠝꠘꠦ ꠚꠣꠟꠣꠘꠤ ꠑꠤꠇ ꠘꠣꠄ।”
২৮ ꠛꠦꠐꠤꠄ ꠇꠂꠟ,
“ꠎꠤꠅꠄ ꠢꠥꠎꠥꠞ,
ꠀꠙꠘꠣꠞ ꠇꠕꠣꠃ ꠑꠤꠇ,
ꠅꠁꠟꠦ ꠘꠤꠎꠞ ꠍꠣꠛꠣꠟꠞ ꠈꠣꠘꠤꠞ ꠎꠦꠔꠣ ꠉꠥꠠꠣ-ꠉꠣꠠꠣ ꠉꠣꠟꠣꠛꠣꠄ ꠙꠠꠦ,
ꠁꠔꠣ ꠔ ꠇꠥꠇꠞꠦ ꠈꠣꠄ।”
২৯ ꠔꠣꠁꠘ ꠇꠁꠟꠣ,
“ꠔꠥꠝꠤ ꠔ ꠈꠣꠐꠤ ꠝꠣꠔꠃ ꠝꠣꠔꠍ।
ꠔꠦ ꠎꠣꠅ,
ꠉꠤꠀ ꠖꠦꠈꠅ,
ꠜꠥꠔꠦ ꠔꠥꠝꠣꠞ ꠙꠥꠠꠤꠞꠦ ꠍꠣꠠꠤꠀ ꠉꠦꠍꠦꠉꠤ।”
৩০ ꠢꠣꠍꠣꠃ ꠛꠦꠐꠤꠄ ꠛꠣꠠꠤꠔ ꠉꠤꠀ ꠖꠦꠈꠟ,
ꠔꠣꠁꠞ ꠙꠥꠠꠤ ꠜꠣꠟꠣ ꠅꠁꠀ ꠛꠤꠍꠘꠣꠔ ꠢꠥꠔꠤꠞꠁꠍꠦ।
ꠈꠣꠟꠥꠀ ꠔꠥꠔꠟꠣ ꠛꠦꠐꠣꠞꠦ ꠡꠤꠚꠣ ꠇꠞꠣ
৩১ ꠛꠣꠖꠦ ꠁꠍꠣꠄ ꠡꠥꠞ ꠄꠟꠣꠇꠣ ꠕꠘꠦ ꠍꠤꠖꠘ ꠐꠣꠃꠘ ꠅꠁꠀ,
ꠉꠣꠟꠤꠟ ꠀꠅꠞꠞ ꠢꠙꠣꠞꠅ ꠖꠤꠇꠣꠙꠟꠤ ꠄꠟꠣꠇꠣꠔ ꠀꠁꠟꠣ।
৩২ ꠅꠘꠅ ꠀꠁꠀ ꠢꠣꠞꠟꠦ ꠝꠣꠘꠡꠦ ꠄꠇ ꠈꠣꠟꠥꠀ ꠔꠥꠔꠟꠣ ꠛꠦꠐꠣꠞꠦ ꠔꠣꠘ ꠉꠦꠍꠦ ꠀꠘꠤꠀ ꠝꠤꠘꠔ ꠟꠣꠉꠣꠁꠟꠣ,
ꠔꠣꠞꠦ ꠀꠔꠣꠁ ꠖꠤꠛꠣꠞ ꠟꠣꠉꠤ।
৩৩ ꠔꠣꠁꠘ ꠄꠞꠦ ꠝꠣꠘꠡꠞ ꠜꠤꠠ ꠕꠘꠦ ꠛꠣꠞꠦ ꠘꠤꠞꠣꠁ ꠎꠣꠉꠣꠔ ꠘꠤꠀ,
ꠔꠣꠞ ꠖꠥꠁꠅ ꠇꠣꠘꠅ ꠔꠣꠘ ꠀꠔꠞ ꠀꠋꠉꠥꠁꠟ ꠢꠣꠞꠣꠁꠟꠣ,
ꠔꠣꠘ ꠝꠥꠈꠞ ꠍꠦꠚ ꠟꠣꠉꠣꠁꠀ ꠔꠣꠞ ꠎꠤꠚꠞꠣ ꠀꠔꠣꠁ ꠖꠤꠟꠣ।
৩৪ ꠀꠞ ꠃꠙꠞꠦ ꠀꠍꠝꠣꠘꠦꠖꠤ ꠌꠣꠁꠀ ꠟꠣꠝ꠆ꠛꠣ ꠇꠞꠤ ꠡꠣꠡ ꠚꠣꠟꠣꠁꠀ ꠇꠁꠟꠣ,
“ꠁꠚꠚꠣꠔꠣ,”
ꠝꠣꠘꠤ,
“ꠈꠥꠟꠤ ꠎꠣꠃꠇ।”
৩৫ ꠟꠉꠦ ꠟꠉꠦꠃ ꠛꠦꠐꠣꠞ ꠇꠣꠘ ꠈꠥꠟꠤꠉꠦꠟ।
ꠔꠥꠔꠟꠣꠝꠤ ꠍꠣꠠꠤ ꠉꠦꠟ,
ꠢꠦ ꠙꠞꠤꠡ꠆ꠇꠣꠞ ꠝꠣꠔꠣ ꠗꠞꠟ।
৩৬ ꠢꠦꠡꠦ ꠔꠣꠁꠘ ꠄꠞꠣꠞꠦ ꠢꠥꠇꠥꠝ ꠖꠤꠟꠣ,
“ꠈꠛꠞꠖꠣꠞ,
ꠔꠥꠝꠞꠣ ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
ꠅꠁꠟꠦ ꠔꠣꠁꠘ ꠎꠔ ꠛꠦꠡꠤ ꠘꠣ ꠇꠞꠟꠣ,
ꠔꠣꠞꠣ ꠅꠔ ꠛꠦꠡ ꠇꠞꠤ ꠁꠔꠣ ꠞꠐꠣꠁꠟ।
৩৭ ꠔꠣꠞꠣ ꠀꠌꠣꠘꠇ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ,
“ꠄꠁꠘ ꠔ ꠢꠇꠟ ꠇꠣꠝꠃ ꠈꠥꠛ ꠘꠤꠈꠥꠔ ꠇꠞꠤ ꠇꠞꠂꠘ।
ꠖꠦꠈꠞꠣꠄ ꠘꠤ,
ꠔꠣꠁꠘ ꠈꠣꠟꠥꠀꠞꠦ ꠢꠥꠘꠣꠞ ꠡꠇ꠆ꠔꠤ,
ꠀꠞ ꠛꠥꠛꠣꠞꠦ ꠝꠣꠔꠤꠛꠣꠞ ꠔꠣꠇ꠆ꠇꠔ ꠖꠤꠍꠂꠘ।”