ꠢꠎꠞꠔ ꠁꠍꠣ ꠞꠥꠢꠥꠟ꠆ꠟꠣꠞ ꠘꠥꠞꠣꠘꠤ ꠍꠥꠞꠔ
৯
১ ꠢꠎꠞꠔ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ,
ꠁꠘꠅ ꠁꠟꠣꠈꠣꠘ ꠇꠄꠎꠘ ꠀꠎꠤꠞ ꠀꠍꠂꠘ,
ꠎꠦꠞꠣ ꠀꠟ꠆ꠟꠣꠞ ꠛꠣꠖꠡꠣꠁꠞ ꠡꠣꠘ-ꠔꠎꠟ꠆ꠟꠤꠞꠦ ꠘꠤꠎꠞ ꠌꠃꠈꠦ ꠘꠣ ꠖꠦꠈꠣꠞ ꠀꠉꠦ ꠝꠃꠔ ꠅꠁꠔ ꠘꠣꠄ।”
২ ꠁꠈꠣꠘ ꠇꠅꠀꠞ ꠍꠄꠖꠤꠘ ꠛꠣꠖꠦ ꠔꠣꠁꠘ ꠈꠣꠟꠤ ꠢꠎꠞꠔ ꠙꠤꠔꠞ,
ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠞꠦ ꠟꠁꠀ ꠃꠌꠣ ꠄꠇ ꠙꠣꠠꠞ ꠃꠙꠞꠦ ꠃꠑꠤꠟꠣ।
ꠅꠃ ꠔꠤꠘꠅ ꠎꠘꠞ ꠌꠃꠈꠞ ꠍꠣꠝꠘꠦ ꠔꠣꠘ ꠘꠤꠎꠞ ꠍꠥꠞꠔ ꠛꠖꠟꠤ ꠉꠦꠟ।
৩ ꠔꠣꠘ ꠚꠤꠘ꠆ꠘꠞ ꠟꠦꠛꠣꠍ ꠅꠔ ꠛꠦꠡꠤ ꠗꠟꠣ ꠌꠇꠌꠇꠣ ꠅꠁꠟ ꠎꠦꠘ,
ꠖꠥꠘꠤꠀꠞ ꠇꠥꠘꠥ ꠗꠥꠙꠣꠄꠃ ꠁꠟꠣ ꠌꠇꠌꠇꠣ ꠇꠞꠤ ꠗꠅꠀꠞ ꠔꠣꠇ꠆ꠇꠔ ꠘꠣꠁ।
৪ ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠝꠥꠍꠣ ꠀꠞ ꠁꠟꠤꠀꠍ ꠘꠛꠤꠞꠦ ꠖꠦꠈꠟꠣ,
ꠄꠞꠣ ꠀꠁꠀ ꠢꠎꠞꠔ ꠁꠍꠣꠞ ꠟꠉꠦ ꠛꠣꠔꠌꠤꠔ ꠇꠞꠞꠣ।
৫ ꠔꠦꠃ ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠀꠝꠞꠣ ꠔ ꠅꠘꠅ ꠀꠍꠤ,
ꠈꠥꠛ ꠜꠣꠟꠣ ꠅꠁꠍꠦ।
ꠀꠝꠞꠣ ꠔꠤꠘꠈꠣꠘ ꠒꠦꠞꠣ-ꠊꠞ ꠔꠤꠀꠞ ꠇꠞꠤꠟꠣꠁ,
ꠄꠇꠈꠣꠘ ꠀꠙꠘꠣꠞ ꠟꠣꠉꠤ,
ꠄꠇꠈꠣꠘ ꠢꠎꠞꠔ ꠝꠥꠍꠣ ꠀꠞ ꠄꠇꠈꠣꠘ ꠁꠟꠤꠀꠍ ꠘꠛꠤꠞ ꠟꠣꠉꠤ।”
৬ ꠄꠞꠣ ꠈꠥꠛ ꠛꠦꠡꠤ ꠒꠞꠣꠁ ꠉꠦꠍꠟꠣ,
ꠄꠞꠖꠣꠄ ꠇꠤꠔꠣ ꠝꠣꠔꠤꠔꠣ ꠇꠥꠘꠥ ꠔꠣꠟ ꠙꠣꠁꠟꠣ ꠘꠣ।
৭ ꠅꠃ ꠡꠝꠄ ꠉꠣꠁꠛꠤ ꠄꠇ ꠝꠦꠊꠞ ꠐꠥꠇꠞꠣꠄ ꠀꠁꠀ ꠄꠞꠣꠞꠦ ꠉꠥꠞꠤꠟꠤꠟ,
ꠀꠞ ꠅꠃ ꠐꠥꠇꠞꠣ ꠕꠣꠇꠤ ꠉꠣꠁꠛꠤ ꠀꠅꠀꠎ ꠅꠁꠟ,
“ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ,
ꠔꠥꠝꠞꠣ ꠄꠘ ꠘꠍꠤꠅꠔ ꠢꠥꠘꠅ।”
৮ ꠑꠤꠇ ꠅꠃ ꠡꠝꠄ ꠔꠣꠞꠣ ꠌꠣꠁꠞꠅꠛꠣꠄ ꠌꠣꠁꠀ ꠈꠣꠟꠤ ꠁꠍꠣ ꠍꠣꠠꠣ ꠀꠞ ꠇꠦꠃꠞꠞꠦ ꠁꠘꠅ ꠖꠦꠈꠟꠣ ꠘꠣ।
৯ ꠛꠣꠖꠦ ꠙꠣꠠ ꠕꠣꠇꠤ ꠟꠣꠝꠤꠀ ꠀꠁꠛꠣꠞ ꠛꠣꠟꠣ ꠁꠍꠣꠄ ꠄꠞꠣꠞꠦ ꠢꠥꠇꠥꠝ ꠖꠤꠟꠣ,
“ꠀꠁꠎ ꠎꠦꠔꠣ ꠖꠦꠈꠟꠣꠄ,
ꠀꠝꠤ ꠛꠤꠘ-ꠀꠖꠝ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”
১০ ꠄꠞꠣ ꠔꠣꠘ ꠢꠥꠇꠥꠝ ꠝꠣꠘꠟꠣ,
ꠅꠁꠟꠦ ꠝꠞꠣ ꠕꠣꠇꠤ ꠎꠤꠘ꠆ꠖꠣ ꠅꠀꠞ ꠜꠦꠖ ꠇꠤꠔꠣ ꠅꠈꠣꠘ ꠘꠣ ꠛꠥꠎꠣꠄ,
ꠔꠣꠞꠣ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ।
১১ ꠛꠣꠖꠦ ꠁꠍꠣꠞ ꠉꠦꠍꠦ ꠀꠞꠎ ꠇꠞꠟꠣ,
“ꠢꠥꠎꠥꠞ,
ꠝꠃꠟꠣꠘꠣ ꠅꠇꠟꠦ ꠇꠦꠘꠦ ꠇꠂꠘ,
ꠢꠎꠞꠔ ꠁꠟꠤꠀꠍ ꠘꠛꠤꠄ ꠙꠄꠟꠣ ꠔꠡꠞꠤꠚ ꠀꠘꠣ ꠎꠞꠥꠞ?”
১২ ꠔꠣꠁꠘ ꠇꠁꠟꠣ,
“ꠁꠈꠣꠘ ꠢꠣꠍꠣ ꠇꠕꠣ,
ꠙꠄꠟꠣ ꠢꠎꠞꠔ ꠁꠟꠤꠀꠍꠦ ꠀꠁꠀ ꠢꠇ꠆ꠇꠟꠔꠣ ꠀꠉꠞ ꠢꠣꠟꠔꠅ ꠚꠤꠞꠣꠁ ꠀꠘꠛꠣ।
ꠅꠁꠟꠦ ꠛꠤꠘ-ꠀꠖꠝꠞ ꠛꠦꠙꠣꠞꠦ ꠀꠟ꠆ꠟꠣꠞ ꠇꠣꠟꠣꠝꠅ ꠇꠦꠘꠦ ꠟꠦꠈꠣ ꠅꠁꠍꠦ,
ꠔꠣꠁꠘ ꠈꠥꠛ ꠖꠥꠈ-ꠝꠍꠤꠛꠔ ꠙꠥꠀꠘꠤ ꠟꠣꠉꠛ,
ꠝꠣꠘꠡꠦ ꠔꠣꠘꠞꠦ ꠇꠛꠥꠟ ꠇꠞꠔꠣ ꠘꠣꠄ?
১৩ ꠀꠝꠤ ꠔꠥꠝꠞꠣꠞꠦ ꠇꠁꠀꠞ,
ꠁꠟꠤꠀꠍ ꠘꠛꠤꠞ ꠛꠦꠙꠣꠞꠦ ꠙꠣꠇ ꠇꠤꠔꠣꠛꠅ ꠎꠦꠟꠣ ꠟꠦꠈꠣ ꠀꠍꠦ,
ꠅꠟꠣꠈꠣꠘꠃ ꠔꠣꠁꠘ ꠀꠁꠍꠟꠣ।
ꠝꠣꠘꠡꠦꠅ ꠔꠣꠘ ꠟꠉꠦ ꠎꠦꠔꠣ ꠝꠘꠅ ꠟꠄ ꠅꠔꠣ ꠇꠞꠍꠦ।”
ꠎꠤꠘꠞ ꠀꠍꠞ ꠀꠟꠣ ꠙꠥꠀꠞꠦ ꠜꠣꠟꠣ ꠇꠞꠣ
১৪ ꠁꠍꠣꠄ ꠅꠃ ꠔꠤꠘꠅ ꠎꠘꠞꠦ ꠟꠁꠀ ꠙꠣꠠ ꠕꠘꠦ ꠟꠣꠝꠤꠀ ꠛꠣꠇꠤ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠀ ꠖꠦꠈꠟꠣ,
ꠛꠃꠔ ꠝꠣꠘꠥꠡ ꠀꠁꠀ ꠌꠣꠁꠞꠅꠛꠣꠄ ꠖꠟꠣ ꠅꠁꠍꠂꠘ,
ꠀꠞ ꠇꠄꠎꠘ ꠝꠃꠟꠣꠘꠣꠄ ꠄꠞꠣꠞ ꠟꠉꠦ ꠔꠞ꠆ꠇꠣ-ꠔꠞ꠆ꠇꠤ ꠇꠞꠞꠣ।
১৫ ꠁꠍꠣꠞꠦ ꠖꠦꠈꠤꠀꠃ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠀ,
ꠖꠃꠠꠣꠁꠀ ꠀꠁꠀ ꠔꠣꠘꠞꠦ ꠍꠣꠟꠣꠝ ꠇꠞꠟꠣ।
১৬ ꠔꠣꠁꠘ ꠅꠃ ꠝꠃꠟꠣꠘꠣ ꠅꠇꠟꠞꠦ ꠎꠤꠇꠣꠁꠟꠣ,
“ꠀꠙꠘꠣꠞꠣ ꠇꠤꠔꠣ ꠟꠁꠀ ꠄꠞꠣꠞ ꠟꠉꠦ ꠔꠞ꠆ꠇ ꠇꠞꠞꠣ?”
১৭ ꠜꠤꠠꠞ ꠝꠣꠎ ꠕꠣꠇꠤ ꠄꠇꠎꠘꠦ ꠇꠂꠟ,
“ꠍꠣꠛ,
ꠀꠝꠣꠞ ꠙꠥꠀꠉꠥꠞꠦ ꠟꠁꠀ ꠀꠙꠘꠣꠞ ꠉꠦꠍꠦ ꠀꠁꠍꠟꠣꠝ,
ꠅꠉꠥꠞꠦ ꠛꠥꠛꠣ ꠎꠤꠘꠦ ꠀꠍꠞ ꠇꠞꠍꠦ।
১৮ ꠅꠃ ꠎꠤꠘꠦ ꠔꠣꠞꠦ ꠎꠦꠛꠟꠣꠃ ꠗꠞꠦ,
ꠔꠣꠞꠦ ꠀꠍꠣꠠ ꠝꠣꠞꠤꠀ ꠝꠣꠐꠤꠔ ꠚꠣꠟꠣꠄ।
ꠔꠣꠞ ꠝꠥꠈ ꠕꠣꠇꠤ ꠚꠦꠘꠣ ꠛꠣꠞꠅꠄ,
ꠖꠣꠔꠅ ꠇꠛꠐ ꠟꠣꠉꠤꠀ ꠒꠣꠐ꠆ꠐꠣ ꠅꠁꠎꠣꠄ।
ꠀꠝꠤ ꠔꠣꠞꠦ ꠟꠁꠀ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠀꠁꠍꠟꠣꠝ,
ꠅꠁꠟꠦ ꠄꠞꠣ ꠙꠣꠞꠍꠂꠘ ꠘꠣ।”
১৯ ꠔꠦꠃ ꠁꠍꠣꠄ ꠇꠁꠟꠣ,
“ꠢꠣꠄꠞꠦ ꠛꠦꠁꠝꠣꠘ ꠅꠇꠟ!
ꠀꠝꠤ ꠀꠞ ꠇꠄꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ,
ꠔꠥꠝꠞꠣꠞ ꠎꠣꠟꠣ ꠇꠄꠖꠤꠘ ꠡꠁꠎ꠆ꠎ ꠇꠞꠝꠥ?
ꠀꠁꠌ꠆ꠍꠣ,
ꠙꠥꠀꠞꠦ ꠅꠘꠅ ꠀꠘꠅ।”
২০ ꠝꠣꠘꠡꠦ ꠙꠥꠀꠞꠦ ꠔꠣꠘ ꠉꠦꠍꠦ ꠀꠘꠟꠣ।
ꠔꠣꠘꠦ ꠖꠦꠈꠤꠀꠃ ꠎꠤꠘꠦ ꠔꠣꠞꠦ ꠈꠥꠛ ꠎꠣꠔꠤꠀ ꠗꠞꠟ।
ꠙꠥꠀꠄ ꠝꠣꠐꠤꠔ ꠙꠠꠤꠀ ꠝꠥꠈꠞ ꠚꠦꠘꠣ ꠛꠣꠞ ꠇꠞꠤ ꠉꠠꠣ-ꠉꠠꠤ ꠟꠣꠉꠣꠁꠟ।
২১ ꠁꠍꠣꠄ ꠔꠣꠞ ꠛꠣꠚꠞꠦ ꠎꠤꠇꠣꠁꠟꠣ,
“ꠔꠣꠞ ꠁ ꠖꠡꠣ ꠇꠔꠖꠤꠘ ꠕꠣꠇꠤ?”
ꠛꠦꠐꠣꠄ ꠇꠂꠟ,
“ꠢꠥꠞꠥꠝꠣꠘ ꠕꠣꠇꠤꠃ।
২২ ꠀꠞ ꠁ ꠎꠤꠘꠦ ꠔꠣꠞꠦ ꠝꠣꠞꠤꠟꠤꠔ ꠇꠞꠤ ꠛꠃꠔ ꠛꠣꠞ ꠔꠣꠞꠦ ꠀꠉꠥꠘꠤꠔ ꠀꠞ ꠙꠣꠘꠤꠔ ꠚꠣꠟꠣꠁꠍꠦ।
ꠅꠈꠘ ꠀꠙꠘꠦ ꠎꠥꠖꠤ ꠙꠣꠞꠂꠘ,
ꠔꠦ ꠀꠝꠞꠣꠞꠦ ꠖꠄꠀ ꠇꠞꠃꠇ꠆ꠇꠣ।”
২৩ ꠁꠍꠣꠄ ꠇꠁꠟꠣ,
“ꠎꠥꠖꠤ ꠙꠣꠞꠂꠘ,
ꠁ ꠇꠕꠣꠞ ꠝꠣꠘꠤ ꠇꠤꠔꠣ?
ꠎꠦ ꠄꠇꠤꠘ ꠇꠞꠦ ꠔꠣꠞ ꠟꠣꠉꠤ ꠢꠇ꠆ꠇꠟꠔꠣꠃ ꠅꠄ।”
২৪ ꠅꠃ ꠛꠦꠐꠣꠄ ꠎꠥꠞꠦ ꠎꠥꠞꠦ ꠇꠂꠟ,
“ꠢꠥꠎꠥꠞ,
ꠀꠝꠤ ꠄꠇꠤꠘ ꠇꠞꠍꠤ।
ꠀꠝꠣꠞ ꠁꠝꠣꠘꠞ ꠇꠝꠎꠥꠞꠤ ꠢꠞꠣꠁ ꠖꠦꠃꠇ꠆ꠇꠣ।”
২৫ ꠀꠞꠅ ꠛꠃꠔ ꠝꠣꠘꠥꠡ ꠖꠃꠠꠣꠁꠀ ꠔꠣꠘ ꠉꠦꠍꠦ ꠀꠁꠞꠣ ꠖꠦꠈꠤꠀ,
ꠔꠣꠁꠘ ꠎꠤꠘꠞꠦ ꠗꠣꠝꠇꠤ ꠝꠣꠞꠤ ꠇꠁꠟꠣ,
“ꠅꠂ ꠈꠣꠟꠥꠀ ꠀꠞ ꠛꠥꠛꠣ ꠎꠤꠘ,
ꠀꠝꠤ ꠢꠥꠇꠥꠝ ꠖꠤꠀꠞ,
ꠄꠞ ꠉꠦꠍ ꠕꠣꠇꠤ ꠛꠣꠞꠅꠁ ꠎꠣ।
ꠔꠣꠞꠦ ꠀꠞ ꠇꠥꠘꠥꠖꠤꠘ ꠗꠞꠤꠍ ꠘꠣ।”
২৬ ꠁꠈꠣꠘ ꠢꠥꠘꠤꠀ ꠎꠤꠘꠦ ꠔꠣꠞꠦ ꠈꠥꠛ ꠎꠥꠞꠦ ꠌꠤꠇ ꠖꠤꠀ ꠎꠣꠔꠣ ꠝꠣꠞꠤ ꠍꠣꠠꠤꠀ ꠉꠦꠟꠉꠤ।
ꠔꠦꠃ ꠁ ꠙꠥꠀ ꠝꠥꠞ꠆ꠖꠣꠞ ꠟꠣꠈꠣꠘ ꠝꠣꠐꠤꠔ ꠙꠠꠤ ꠞꠁꠍꠦ ꠖꠦꠈꠤꠀ ꠝꠣꠘꠡꠦ ꠇꠁꠟꠣ,
“ꠄ ꠔ ꠝꠣꠞꠣ ꠉꠦꠍꠦ।”
২৭ ꠅꠁꠟꠦ ꠁꠍꠣꠄ ꠔꠣꠞꠦ ꠀꠔꠅ ꠗꠞꠤ ꠔꠥꠟꠔꠦꠃ ꠢꠦ ꠃꠛꠣꠁ ꠉꠦꠟ।
২৮ ꠛꠣꠖꠦ ꠔꠣꠁꠘ ꠊꠞꠅ ꠢꠣꠝꠣꠁꠀ ꠢꠣꠞꠟꠦ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠘꠤꠞꠣꠟꠣꠄ ꠎꠤꠇꠣꠁꠟꠣ,
“ꠢꠥꠎꠥꠞ,
ꠀꠝꠞꠣ ꠙꠣꠞꠟꠣꠝ ꠘꠣ ꠇꠦꠘꠦ?”
২৯ ꠔꠣꠁꠘ ꠎꠥꠀꠙ ꠖꠤꠟꠣ,
“ꠖꠥꠀ ꠘꠣ ꠇꠞꠟꠦ ꠀꠞ ꠇꠥꠘꠥꠝꠘ꠆ꠔꠦꠃ ꠁ ꠟꠣꠈꠣꠘ ꠎꠤꠘ ꠍꠣꠠꠣꠁꠟ ꠎꠣꠄ ꠘꠣ।”
ꠖꠥꠍꠞꠣꠛꠣꠞ ꠘꠤꠎꠞ ꠝꠃꠔꠞ ꠀꠉꠣꠝ ꠈꠛꠞ
৩০ ꠛꠣꠖꠦ ꠢꠇꠟꠦ ꠝꠤꠟꠤ ꠁ ꠎꠣꠉꠣ ꠍꠣꠠꠤꠀ ꠉꠣꠟꠤꠟ ꠎꠤꠟꠣꠞ ꠝꠣꠎꠦꠖꠤ ꠞꠅꠀꠘꠣ ꠅꠁꠟꠣ।
ꠌꠣꠁꠟꠣ,
ꠝꠣꠘꠡꠦ ꠎꠣꠘꠥ ꠁꠔꠣ ꠘꠣ ꠎꠣꠘꠂꠘ।
৩১ ꠅꠃ ꠡꠝꠄ ꠔ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠔꠣꠟꠤꠝ ꠖꠦꠅꠀꠔ ꠀꠍꠟꠣ,
ꠔꠣꠁꠘ ꠇꠁꠟꠣ,
“ꠀꠝꠤ ꠛꠤꠘ-ꠀꠖꠝꠞꠦ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ,
ꠇꠣꠔꠟ ꠇꠞꠣ ꠅꠁꠛ,
ꠀꠞ ꠝꠃꠔꠞ ꠔꠤꠘ ꠖꠤꠘ ꠛꠣꠖꠦ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।”
৩২ ꠍꠣꠢꠣꠛꠤ ꠅꠇꠟꠦ ꠔꠣꠘ ꠁ ꠔꠣꠟꠤꠝꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ,
ꠀꠞ ꠔꠣꠘ ꠉꠦꠍꠦ ꠎꠤꠇꠣꠘꠤꠞꠅ ꠡꠣꠅꠡ ꠙꠣꠁꠟꠣ ꠘꠣ।
ꠖꠣꠝꠤ ꠝꠣꠘꠥꠡ ꠇꠦ?
৩৩ ꠛꠣꠖꠦ ꠁꠍꠣꠄ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠇꠚꠞꠘꠣꠃꠝ ꠐꠣꠃꠘꠅ ꠀꠁꠟꠣ।
ꠀꠁꠀ ꠊꠞꠅ ꠢꠣꠝꠣꠁꠀ ꠄꠞꠣꠞꠦ ꠎꠤꠇꠣꠁꠟꠣ,
“ꠙꠕꠅ ꠔꠥꠝꠞꠣ ꠇꠤꠔꠣ ꠟꠁꠀ ꠔꠞ꠆ꠇ ꠇꠞꠟꠣꠄ?”
৩৪ ꠄꠞꠣ ꠝꠥꠈ ꠛꠘ꠆ꠖ ꠇꠞꠤ ꠛꠁꠞꠁꠟꠣ।
ꠀꠍꠟꠦ ꠙꠕꠅ ꠔꠣꠞꠣ ꠔꠞ꠆ꠇ ꠇꠞꠍꠟꠣ,
ꠔꠣꠞꠣꠞ ꠝꠣꠎꠦ ꠇꠦ ꠢꠇꠟ ꠕꠣꠇꠤ ꠖꠣꠝꠤ ꠝꠣꠘꠥꠡ।
৩৫ ꠁꠍꠣ ꠛꠁꠉꠦꠟꠣ,
ꠛꠁꠀ ꠄꠞꠣ ꠛꠣꠞꠅꠎꠘꠞꠦ ꠔꠣꠘ ꠗꠣꠞꠅ ꠘꠤꠀ ꠇꠁꠟꠣ,
“ꠇꠦꠃ ꠎꠥꠖꠤ ꠖꠣꠝꠤ ꠝꠣꠘꠥꠡ ꠅꠁꠔ ꠌꠣꠄ,
ꠔꠦ ꠢꠦ ꠢꠇꠟꠞ ꠈꠞꠦ ꠞꠁꠔꠦ ꠅꠁꠛ।
ꠀꠞ ꠢꠇꠟꠞ ꠈꠦꠎꠝꠔ ꠇꠞꠣ ꠟꠣꠉꠛ।”
৩৬ ꠛꠣꠖꠦ ꠄꠇ ꠢꠥꠞꠥꠔ꠆ꠔꠣꠞꠦ ꠀꠘꠤꠀ ꠄꠞꠣꠞ ꠍꠣꠝꠘꠦ ꠃꠛꠣ ꠇꠞꠣꠁꠟꠣ।
ꠔꠣꠞꠦ ꠇꠥꠟꠅ ꠟꠁꠀ ꠇꠁꠟꠣ,
৩৭ “ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ,
ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ।
ꠀꠞ ꠀꠝꠣꠞꠦ ꠎꠦ ꠇꠛꠥꠟ ꠇꠞꠦ,
ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ,
ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ ꠔꠣꠘꠞꠦꠅ ꠇꠛꠥꠟ ꠇꠞꠟ।”
৩৮ ꠔꠣꠘ ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠇꠁꠟꠣ,
“ꠢꠥꠎꠥꠞ,
ꠀꠝꠞꠣ ꠄꠇ ꠛꠦꠐꠣꠞꠦ ꠖꠦꠈꠍꠤ,
ꠢꠦ ꠀꠙꠘꠣꠞ ꠘꠣꠝ ꠟꠁꠀ ꠎꠤꠘ꠆ꠘꠣꠔ ꠍꠣꠠꠣꠄ।
ꠖꠦꠈꠤꠀ ꠀꠝꠞꠣ ꠔꠣꠞꠦ ꠘꠤꠡꠦꠗ ꠇꠞꠍꠤ,
ꠢꠦ ꠔ ꠀꠝꠞꠣꠞ ꠔꠞꠤꠇꠣꠞ ꠝꠣꠘꠥꠡ ꠘꠣꠄ।”
৩৯ ꠔꠣꠁꠘ ꠇꠁꠟꠣ,
“ꠄꠞꠦ ꠘꠤꠡꠦꠗ ꠇꠞꠤꠅ ꠘꠣ।
ꠀꠝꠣꠞ ꠘꠣꠝ ꠟꠁꠀ ꠇꠦꠃ ꠇꠦꠞꠣꠝꠔꠤ ꠖꠦꠈꠣꠘꠤꠞ ꠛꠣꠖꠦ,
ꠢꠦ ꠅꠔ ꠎꠟꠖꠤ ꠀꠝꠣꠞ ꠉꠤꠛꠔ ꠉꠣꠁꠔ ꠙꠣꠞꠔ ꠘꠣꠄ।
৪০ ꠎꠦꠞꠣ ꠀꠝꠞꠣꠞ ꠛꠤꠙꠇ꠆ꠇꠦ ꠘꠣꠄ,
ꠔꠣꠞꠣ ꠔ ꠀꠝꠞꠣꠞ ꠙꠇ꠆ꠇꠦ।
৪১ ꠢꠥꠘꠅ,
ꠀꠝꠤ ꠢꠣꠍꠣ ꠇꠕꠣ ꠇꠁꠀꠞ,
ꠀꠟ-ꠝꠍꠤꠞ ꠔꠞꠤꠇꠣꠞ ꠝꠣꠘꠥꠡ ꠅꠀꠞ ꠈꠣꠔꠤꠞꠦ,
ꠇꠦꠃ ꠎꠥꠖꠤ ꠔꠥꠝꠞꠣꠞꠦ ꠄꠇ ꠉꠦꠟꠣꠡ ꠙꠣꠘꠤ ꠈꠣꠅꠀꠄ,
ꠔꠦ ꠢꠦ ꠄꠞ ꠙꠥꠞꠥꠡ꠆ꠇꠣꠞ ꠙꠣꠁꠛꠃ ꠙꠣꠁꠛ।
ꠞꠤꠙꠥ ꠕꠣꠇꠤ ꠢꠥꠡꠤꠀꠞ ꠞꠅꠀ
৪২ “ꠀꠞ ꠀꠝꠣꠞ ꠔꠞꠤꠇꠣꠞ ꠅꠃ ꠢꠥꠞꠥ-ꠝꠥꠞꠥ ꠄꠇꠎꠘꠞꠦ ꠎꠥꠖꠤ ꠇꠦꠃ ꠔꠣꠞ ꠁꠝꠣꠘꠞ ꠙꠕꠦ ꠛꠣꠗꠣ ꠖꠦꠄ,
ꠔꠦ ꠄꠞ ꠌꠣꠁꠔꠦ ꠔꠣꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠛ,
ꠔꠣꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ।
৪৩ ꠔꠥꠝꠣꠞ ꠀꠔ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ,
ꠔꠦ ꠀꠔ ꠇꠣꠐꠤꠀ ꠚꠣꠟꠣꠁ ꠖꠦꠅ।
৪৪ ꠖꠥꠁꠅ ꠀꠔ ꠟꠁꠀ ꠎꠣꠢꠣꠘ꠆ꠘꠣꠝꠤ ꠅꠀ ꠕꠣꠇꠤ,
ꠄꠇ ꠀꠔ ꠟꠁꠀ ꠎꠣꠘ꠆ꠘꠣꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
ꠎꠣꠢꠣꠘ꠆ꠘꠝꠞ ꠀꠉꠥꠁꠘ ꠔ ꠇꠥꠘꠥꠖꠤꠘ ꠘꠤꠜꠦ ꠘꠣ।
৪৫ ꠔꠥꠝꠣꠞ ꠙꠣꠅ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ,
ꠔꠦ ꠙꠣꠅ ꠇꠣꠐꠤꠀ ꠚꠣꠟꠣꠁ ꠖꠦꠅ।
ꠖꠥꠁꠅ ꠙꠣꠅ ꠟꠁꠀ ꠎꠣꠢꠣꠘ꠆ꠘꠝꠅ ꠎꠟꠣ ꠕꠣꠇꠤ,
ꠟꠦꠋꠠꠣ ꠅꠁꠀ ꠎꠣꠘ꠆ꠘꠣꠔꠅ ꠎꠣꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
৪৬-৪৭ ꠔꠥꠝꠣꠞ ꠌꠃꠈ ꠎꠥꠖꠤ ꠔꠥꠝꠣꠞ ꠞꠤꠙꠥ ꠅꠁꠎꠣꠄ,
ꠔꠦ ꠌꠃꠈ ꠔꠥꠟꠤꠀ ꠚꠣꠟꠣꠁ ꠖꠦꠅ।
ꠖꠥꠁꠅ ꠌꠃꠈ ꠟꠁꠀ ꠎꠣꠢꠣꠘ꠆ꠘꠝꠅ ꠎꠟꠣ ꠕꠣꠇꠤ,
ꠇꠣꠘꠣ ꠅꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠔ ꠖꠣꠈꠤꠟ ꠅꠀ ꠔꠥꠝꠣꠞ ꠟꠣꠉꠤ ꠜꠣꠟꠣ।
৪৮ ꠁ ꠎꠣꠢꠣꠘ꠆ꠘꠝꠞ ꠛꠤꠌ꠆ꠍꠥ ꠅꠇꠟ ꠝꠞꠦ ꠘꠣ,
ꠀꠞ ꠢꠤꠘꠞ ꠀꠉꠥꠁꠘꠅ ꠇꠥꠘꠥꠖꠤꠘ ꠘꠤꠜꠦ ꠘꠣ।