ꠃꠝ꠆ꠝꠔ ꠅꠇꠟꠞꠦ ꠢꠎꠞꠔ ꠁꠍꠣꠞ ꠀꠈꠦꠞꠤ ꠔꠣꠟꠤꠝ (১৩:১-১৭:২৬)
ꠍꠣꠢꠣꠛꠤ ꠅꠇꠟꠞ ꠙꠣꠅ ꠗꠅꠀꠁꠟꠣ
১৩
১ ꠀꠎꠣꠖꠤ ꠁꠖꠞ ꠕꠥꠠꠣ ꠀꠉꠞ ꠊꠐꠘꠣ।
ꠁꠍꠣꠄ ꠛꠥꠎꠤꠟꠤꠟꠣ,
ꠔꠣꠁꠘ ꠁ ꠖꠥꠘꠤꠀ ꠍꠣꠠꠤꠀ ꠔꠣꠘ ꠉꠣꠁꠛꠤ ꠛꠣꠚꠞ ꠉꠦꠍꠦ ꠎꠣꠁꠛꠣꠞ ꠡꠝꠄ ꠀꠁꠌ꠆ꠍꠦ।
ꠖꠥꠘꠤꠀꠔ ꠎꠦꠞꠣ ꠔꠣꠘ ꠀꠙꠘ ꠝꠣꠘꠥꠡ ꠀꠍꠟꠣ,
ꠔꠣꠞꠣꠞꠦ ꠔꠣꠁꠘ ꠈꠥꠛ ꠝꠣꠄꠀ ꠇꠞꠔꠣ ꠀꠞ ꠢꠦꠡ ꠙꠞ꠆ꠎꠘ꠆ꠔ ꠅꠟꠣ ꠝꠣꠄꠀ ꠇꠞꠤꠀꠃ ꠉꠦꠍꠂꠘ।
২ ꠞꠣꠁꠔꠇꠥꠞ ꠈꠣꠘꠤꠔ ꠛꠁꠛꠣꠞ ꠀꠉꠞ ꠇꠕꠣ,
ꠢꠎꠞꠔ ꠁꠍꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛꠣꠞ ꠟꠣꠉꠤ,
ꠁꠛꠟꠤꠍꠦ ꠀꠁꠀ ꠍꠣꠁꠝꠘ ꠁꠡ꠆ꠇꠣꠞꠤꠀꠔꠞ ꠙꠥꠀ ꠁꠢꠥꠖꠣꠞ ꠝꠘꠅ ꠈꠣꠁꠡ ꠎꠣꠉꠣꠁ ꠖꠤꠟ।
৩ ꠁꠍꠣꠄ ꠎꠣꠘꠔꠣ,
ꠔꠣꠘ ꠉꠣꠁꠛꠤ ꠛꠣꠚ ꠀꠟ꠆ꠟꠣꠄ ꠔꠣꠘ ꠀꠔꠅ ꠢꠇꠟꠔꠣ ꠡꠙꠤ ꠖꠤꠍꠂꠘ,
ꠔꠣꠁꠘ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠂꠘ ꠀꠞ ꠔꠣꠘ ꠉꠦꠍꠦꠃ ꠚꠤꠞꠤꠀ ꠎꠣꠁꠞꠣ।
৪ ꠄꠞꠟꠣꠉꠤ ꠔꠣꠁꠘ ꠈꠣꠅꠀ ꠕꠣꠇꠤ ꠃꠑꠟꠣ ꠀꠞ ꠚꠤꠘ꠆ꠘꠞ ꠙꠣꠁꠘ꠆ꠎꠣꠛꠤ ꠈꠥꠟꠤꠀ ꠄꠇꠈꠣꠘ ꠉꠣꠝꠍꠣ ꠇꠝꠞꠅ ꠛꠣꠘ꠆ꠖꠤꠟꠣ।
৫ ꠛꠣꠖꠦ ꠔꠣꠁꠘ ꠉꠣꠝꠟꠣꠞ ꠝꠣꠎꠦ ꠙꠣꠘꠤ ꠟꠁꠀ ꠍꠣꠢꠣꠛꠤ ꠅꠇꠟꠞ ꠙꠣꠅ ꠗꠅꠀꠁ ꠖꠤꠟꠣ,
ꠀꠞ ꠇꠝꠞꠞ ꠉꠣꠝꠍꠣꠖꠤ ꠙꠣꠅ ꠚꠥꠍꠤꠀ ꠖꠦꠅꠀꠔ ꠟꠣꠉꠟꠣ।
৬ ꠅꠃ ꠟꠣꠈꠣꠘ ꠔꠣꠁꠘ ꠎꠦꠛꠟꠣ ꠍꠣꠁꠝꠘ-ꠙꠤꠔꠞꠞ ꠉꠦꠍꠦ ꠀꠁꠟꠣ,
ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠁꠔꠣ ꠇꠤꠔꠣ ꠇꠞꠂꠘ,
ꠀꠙꠘꠦ ꠀꠝꠣꠞ ꠙꠣꠅ ꠗꠅꠀꠁꠀ ꠖꠤꠔꠣ ꠘꠤ?”
৭ ꠔꠣꠁꠘ ꠇꠁꠟꠣ,
“ꠀꠝꠤ ꠎꠦꠔꠣ ꠇꠞꠤꠀꠞ,
ꠅꠈꠘ ꠔꠥꠝꠤ ꠁꠔꠣꠞ ꠝꠣꠘꠤ ꠛꠥꠎꠔꠣꠄ ꠘꠣꠄ,
ꠛꠣꠖꠦ ꠛꠥꠎꠛꠣꠄ।”
৮ ꠅꠃ ꠙꠤꠔꠞꠦ ꠔꠣꠘꠞꠦ ꠇꠁꠟꠣ,
“ꠎꠤ ꠘꠣ,
ꠀꠙꠘꠦ ꠇꠥꠘꠥꠝꠘ꠆ꠔꠦꠃ ꠀꠝꠣꠞ ꠙꠣꠅ ꠗꠅꠀꠁ ꠖꠤꠛꠣ ꠘꠣ।”
ꠁꠍꠣꠄ ꠇꠁꠟꠣ,
“ꠀꠝꠤ ꠎꠥꠖꠤ ꠔꠥꠝꠣꠞ ꠙꠣꠅ ꠗꠁꠀ ꠘꠣ ꠖꠦꠁ,
ꠔꠦ ꠔꠥꠝꠣꠞ ꠟꠉꠦ ꠀꠝꠣꠞ ꠇꠥꠘꠥ ꠈꠣꠔꠤꠞ ꠘꠣꠁ।”
৯ ꠔꠦꠃ ꠍꠣꠁꠝꠘ-ꠙꠤꠔꠞꠦ ꠇꠁꠟꠣ,
“ꠢꠥꠎꠥꠞ,
ꠔꠦ ꠈꠣꠟꠤ ꠙꠣꠅ ꠘꠣꠄ,
ꠀꠝꠣꠞ ꠝꠣꠕꠣ ꠀꠞ ꠀꠔꠅ ꠗꠅꠀꠁꠀ ꠖꠦꠃꠇ꠆ꠇꠣ”।
১০ ꠔꠣꠁꠘ ꠇꠁꠟꠣ,
“ꠎꠦ ꠝꠣꠘꠡꠦ ꠉꠥꠍꠟ ꠇꠞꠍꠦ,
ꠔꠣꠞ ꠙꠣꠅ ꠍꠣꠠꠣ ꠀꠞ ꠇꠥꠘ꠆ꠔꠣ ꠗꠅꠀꠞ ꠎꠞꠥꠞ ꠘꠣꠄ,
ꠔꠣꠞ ꠔ ꠢꠇꠟꠔꠣ ꠙꠞꠤꠡ꠆ꠇꠣꠞ ꠀꠍꠦ।
ꠔꠥꠝꠞꠣꠅ ꠘꠤꠌ꠆ꠌꠄ ꠙꠞꠤꠡ꠆ꠇꠣꠞ ꠀꠍ,
ꠅꠁꠟꠦ ꠢꠇꠟ ꠘꠣꠄ।”
১১ ꠀꠍꠟꠦ ꠖꠥꠡꠝꠘꠞ ꠀꠔꠅ ꠇꠦ ꠔꠣꠘꠞꠦ ꠗꠞꠣꠁ ꠖꠤꠛ,
ꠁꠈꠣꠘ ꠔꠣꠁꠘ ꠎꠣꠘꠔꠣ।
ꠄꠞꠖꠣꠄ ꠔꠣꠁꠘ ꠇꠁꠟꠣ,
“ꠔꠥꠝꠞꠣ ꠢꠇꠟ ꠙꠞꠤꠡ꠆ꠇꠣꠞ ꠘꠣꠄ।”
১২ ꠍꠣꠢꠣꠛꠤ ꠅꠇꠟꠞ ꠙꠣꠅ ꠗꠅꠀꠁꠀ ꠢꠣꠞꠟꠦ ꠁꠍꠣꠄ ꠔꠣꠘ ꠙꠣꠁꠘ꠆ꠎꠣꠛꠤ ꠚꠤꠘ꠆ꠖꠤꠀ ꠢꠤꠞꠛꠣꠞ ꠛꠁꠟꠣ ꠀꠞ ꠔꠣꠞꠣꠞꠦ ꠇꠁꠟꠣ,
“ꠀꠝꠤ ꠇꠤꠔꠣ ꠇꠞꠟꠣꠝ,
ꠔꠥꠝꠞꠣ ꠁꠔꠣ ꠛꠥꠎꠍ ꠘꠤ?
১৩ ꠔꠥꠝꠞꠣ ꠀꠝꠣꠞꠦ ꠃꠡ꠆ꠔꠣꠖ ꠀꠞ ꠝꠣꠟꠤꠇ ꠇꠁꠀ ꠒꠣꠇꠅ,
ꠁꠈꠣꠘ ꠑꠤꠇꠃ,
ꠀꠝꠤꠃ ꠔꠥꠝꠞꠣꠞ ꠃꠡ꠆ꠔꠣꠖ ꠀꠞ ꠝꠣꠟꠤꠇ।
১৪ ꠀꠞ ꠀꠝꠤ ꠔꠥꠝꠞꠣꠞ ꠃꠡ꠆ꠔꠣꠖ ꠀꠞ ꠝꠣꠟꠤꠇ ꠅꠁꠀꠅ ꠎꠦꠛꠟꠣ ꠔꠥꠝꠞꠣꠞ ꠙꠣꠅ ꠗꠅꠀꠁꠀ ꠖꠤꠟꠣꠝ,
ꠔꠦ ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞ ꠙꠣꠅ ꠗꠅꠀꠁ ꠖꠦꠅꠀ ꠎꠞꠥꠞ।
১৫ ꠀꠝꠤ ꠁꠟꠣ ꠇꠞꠤꠀ ꠖꠦꠈꠣꠁꠟꠣꠝ,
ꠎꠣꠔꠦ ꠀꠝꠤ ꠎꠦꠟꠣ ꠇꠞꠟꠣꠝ ꠔꠥꠝꠞꠣꠅ ꠅꠟꠣ ꠇꠞꠅ।
১৬ ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ,
ꠉꠥꠟꠣꠝ ꠔꠣꠞ ꠝꠥꠘꠤꠛ ꠕꠣꠇꠤ ꠛꠠ ꠘꠣꠄ।
ꠀꠞ ꠎꠣꠞꠦ ꠙꠣꠑꠣꠘꠤ ꠅꠁꠍꠦ,
ꠢꠦ ꠔꠣꠞ ꠙꠣꠑꠣꠅꠞꠣ ꠕꠣꠇꠤ ꠛꠠ ꠘꠣꠄ।
১৭ ꠁꠔꠣ ꠎꠣꠘꠤꠀ ꠎꠥꠖꠤ ꠀꠝꠟ ꠇꠞꠅ,
ꠔꠦ ꠔꠥꠝꠞꠣ ꠗꠁꠘ꠆ꠘ।
১৮ “ꠀꠝꠤ ꠔꠥꠝꠞꠣ ꠢꠇꠟꠞ ꠛꠦꠙꠣꠞꠦ ꠇꠁꠞꠣꠝ ꠘꠣ।
ꠀꠝꠤ ꠎꠦꠞꠣꠞꠦ ꠙꠍꠘ꠆ꠖ ꠇꠞꠍꠤ ꠔꠣꠞꠣꠞꠦ ꠔ ꠌꠤꠘꠤ।
ꠢꠥꠘꠅ,
ꠀꠟ꠆ꠟꠣꠞ ꠇꠣꠟꠣꠝꠞ ꠀꠄꠀꠔ ꠔ ꠚꠟꠤꠔꠦ ꠅꠁꠛ,
ꠟꠦꠈꠣ ꠀꠍꠦ,
‘ꠀꠝꠣꠞ ꠟꠉꠦ ꠛꠁꠀ ꠎꠦꠉꠥꠄ ꠈꠣꠅꠀ-ꠖꠣꠅꠀ ꠇꠞꠦ,
ꠢꠉꠥꠄ ꠀꠝꠣꠞ ꠃꠙꠞꠦ ꠙꠣꠅ ꠔꠥꠟꠍꠦ।’
১৯ ꠁꠔꠣ ꠊꠐꠣꠞ ꠀꠉꠦꠃ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁ ꠖꠤꠟꠣꠝ,
ꠔꠦꠃ ꠊꠐꠣꠞ ꠛꠣꠖꠦ ꠔꠥꠝꠞꠣ ꠛꠥꠎꠛꠣꠄ,
ꠀꠝꠤꠃ ꠢꠦꠁꠘ।
২০ ꠀꠝꠤ ꠔꠥꠝꠞꠣꠞꠦ ꠢꠣꠍꠣꠃ ꠇꠁꠞꠣꠝ,
ꠀꠝꠤ ꠎꠣꠞꠦ ꠙꠣꠑꠣꠁ,
ꠔꠣꠞꠦ ꠎꠦ ꠎꠘꠦ ꠇꠛꠥꠟ ꠇꠞꠦ,
ꠢꠦ ꠀꠍꠟꠦ ꠀꠝꠣꠞꠦꠃ ꠇꠛꠥꠟ ꠇꠞꠦ।
ꠀꠞ ꠎꠦ ꠎꠘꠦ ꠀꠝꠣꠞꠦ ꠇꠛꠥꠟ ꠇꠞꠦ,
ꠢꠦ ꠔꠣꠘꠞꠦꠃ ꠇꠛꠥꠟ ꠇꠞꠦ,
ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।”
ꠛꠦꠁꠝꠣꠘ ꠁꠢꠥꠖꠣ
২১ ꠅꠈꠣꠘ ꠇꠁꠀ ꠢꠣꠞꠟꠦ ꠢꠎꠞꠔ ꠁꠍꠣꠞ ꠖꠤꠟ ꠙꠦꠞꠦꠡꠣꠘ ꠅꠁꠉꠦꠟ।
ꠔꠣꠁꠘ ꠈꠥꠟꠤꠀ ꠇꠁꠟꠣ,
“ꠀꠝꠤ ꠢꠇ ꠇꠕꠣ ꠇꠁꠞꠣꠝ,
ꠔꠥꠝꠞꠣꠞ ꠝꠣꠎꠞ ꠄꠇꠎꠘꠦꠃ ꠀꠝꠣꠞꠦ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠤꠛ।”
২২ ꠔꠣꠁꠘ ꠇꠣꠞ ꠇꠕꠣ ꠇꠁꠞꠣ,
ꠍꠣꠢꠣꠛꠤ ꠅꠇꠟꠦ ꠁꠈꠣꠘ ꠘꠣ ꠛꠥꠎꠣꠄ ꠄꠇꠦ-ꠅꠁꠘ꠆ꠘꠞ ꠛꠣꠄ ꠌꠣꠁ ꠞꠁꠟꠣ।
২৩ ꠄꠞꠣꠞ ꠝꠣꠎꠞ ꠎꠦ ꠍꠣꠢꠣꠛꠤꠞꠦ ꠁꠍꠣꠄ ꠝꠣꠄꠀ ꠇꠞꠔꠣ,
ꠄꠁꠘ ꠁꠍꠣꠞ ꠇꠥꠟꠅ ꠄꠟꠣꠁꠘ ꠖꠤꠀ ꠛꠅꠀꠔ ꠀꠍꠟꠣ।
২৪ ꠍꠣꠁꠝꠘ-ꠙꠤꠔꠞꠦ ꠄꠘꠞꠦ ꠁꠡꠣꠞꠣ ꠖꠤꠀ ꠇꠁꠟꠣ,
ꠔꠥꠝꠤ ꠎꠤꠇꠣꠅ,
ꠔꠣꠁꠘ ꠇꠣꠞ ꠇꠕꠣ ꠇꠁꠞꠣ।
২৫ ꠔꠦꠃ ꠅꠃ ꠍꠣꠢꠣꠛꠤꠄ ꠁꠍꠣꠞ ꠛꠣꠄ ꠏꠥꠇꠤꠀ ꠇꠁꠟꠣ,
“ꠢꠥꠎꠥꠞ,
ꠇꠦ ꠅꠃ ꠎꠘ?”
২৬ ꠁꠍꠣꠄ ꠎꠥꠀꠙ ꠖꠤꠟꠣ,
“ꠅꠃ ꠞꠥꠐꠤꠞ ꠐꠥꠇꠞꠣ ꠛꠃꠟꠅ ꠜꠤꠎꠣꠁꠀ ꠎꠣꠞꠦ ꠖꠤꠝꠥ,
ꠢꠦ-ꠃ ꠅꠃ ꠎꠘ।”
ꠀꠞ ꠅꠃ ꠞꠥꠐꠤ ꠔꠣꠁꠘ ꠍꠣꠁꠝꠘ ꠁꠡ꠆ꠇꠣꠞꠤꠀꠔꠞ ꠙꠥꠀ ꠁꠢꠥꠖꠣꠞꠦ ꠖꠤꠟꠣ।
২৭ ꠞꠥꠐꠤꠞ ꠐꠥꠇꠞꠣ ꠟꠅꠀꠞ ꠟꠉꠦ ꠟꠉꠦꠃ ꠁꠛꠟꠤꠍ ꠁꠢꠥꠖꠣꠞ ꠜꠤꠔꠞꠦ ꠢꠣꠝꠣꠁꠟ।
ꠁꠍꠣꠄ ꠔꠣꠞꠦ ꠇꠁꠟꠣ,
“ꠎꠦꠔꠣ ꠇꠞꠔꠣꠄ ꠌꠣꠅ,
ꠎꠟꠖꠤ ꠇꠞꠤꠟꠣꠅ।”
২৮ ꠁꠍꠣꠞ ꠟꠉꠦ ꠎꠣꠞꠣ ꠈꠣꠅꠀꠔ ꠛꠁꠍꠟꠣ,
ꠔꠣꠞꠣ ꠇꠦꠃ ꠛꠥꠎꠟꠣ ꠘꠣ,
ꠔꠣꠁꠘ ꠁꠢꠥꠖꠣꠞꠦ ꠇꠦꠘꠦ ꠁꠈꠣꠘ ꠇꠁꠍꠂꠘ।
২৯ ꠇꠦꠃ ꠇꠦꠃ ꠝꠘꠅ ꠇꠞꠟ,
ꠁꠖꠞ ꠛꠣꠎꠣꠞ ꠇꠞꠣꠞ ꠟꠣꠉꠤ ꠁꠍꠣꠄ ꠁꠢꠥꠖꠣꠞꠦ ꠅꠈꠣꠘ ꠇꠁꠍꠂꠘ ꠛꠣ ꠉꠞꠤꠛ ꠅꠇꠟꠞꠦ ꠇꠥꠘ꠆ꠔꠣ ꠖꠦꠅꠀꠞ ꠇꠕꠣ ꠇꠁꠍꠂꠘ,
ꠇꠣꠞꠘ ꠐꠦꠇꠣꠞ ꠕꠟꠤ ꠔ ꠁꠢꠥꠖꠣꠞ ꠉꠦꠍꠦꠃ ꠕꠣꠇꠔ।
৩০ ꠞꠥꠐꠤꠞ ꠐꠥꠇꠞꠣ ꠟꠅꠀꠞ ꠟꠉꠦ ꠟꠉꠦ ꠁꠢꠥꠖꠣ ꠛꠣꠞꠅꠁꠀ ꠉꠦꠟꠉꠤ।
ꠁ ꠡꠝꠄ ꠞꠣꠁꠔ ꠀꠍꠤꠟ।
ꠘꠄꠀ ꠢꠥꠇꠥꠝ
৩১ ꠁꠢꠥꠖꠣ ꠛꠣꠞꠦ ꠉꠤꠀ ꠢꠣꠞꠟꠦ ꠁꠍꠣꠄ ꠇꠁꠟꠣ,
“ꠛꠤꠘ-ꠀꠖꠝꠞ ꠝꠢꠤꠝꠣ ꠎꠣꠁꠞ ꠇꠞꠣꠞ ꠡꠝꠄ ꠀꠁꠌ꠆ꠍꠦ,
ꠔꠣꠘ ꠝꠣꠎꠖꠤ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠁꠛ।
৩২ ꠀꠞ ꠀꠟ꠆ꠟꠣꠞ ꠝꠢꠤꠝꠣ ꠎꠦꠛꠟꠣ ꠔꠣꠘ ꠝꠣꠎꠖꠤ ꠎꠣꠁꠞ ꠅꠁꠛ,
ꠅꠃ ꠡꠝꠄ ꠀꠟ꠆ꠟꠣꠄꠅ ꠘꠤꠎꠞ ꠝꠣꠎꠦ ꠛꠤꠘ-ꠀꠖꠝꠞ ꠝꠢꠤꠝꠣ ꠎꠣꠁꠞ ꠇꠞꠛꠣ,
ꠁꠔꠣ ꠔꠣꠁꠘ ꠈꠥꠛ ꠎꠟꠖꠤꠃ ꠇꠞꠛꠣ।
৩৩ ꠅ ꠀꠅꠟꠣꠖ ꠅꠇꠟ,
ꠀꠝꠤ ꠀꠞ ꠛꠦꠡꠤ ꠖꠤꠘ ꠔꠥꠝꠞꠣꠞ ꠉꠦꠍꠦ ꠞꠁꠔꠣꠝ ꠘꠣꠄ।
ꠔꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠀꠉꠦ ꠎꠦꠟꠣ ꠇꠁꠍꠟꠣꠝ,
ꠔꠥꠝꠞꠣ ꠀꠝꠣꠞꠦ ꠔꠣꠟ꠆ꠟꠣꠡ ꠇꠞꠛꠣꠄ,
ꠅꠁꠟꠦ ꠀꠝꠤ ꠎꠦꠈꠣꠘꠅ ꠎꠣꠁꠝꠥ ꠔꠥꠝꠞꠣ ꠢꠤꠘꠅ ꠎꠣꠁꠔꠣꠄ ꠙꠣꠞꠔꠣꠄ ꠘꠣꠄ,
ꠅꠈꠘ ꠅꠃ ꠇꠕꠣ ꠔꠥꠝꠞꠣꠞꠦꠅ ꠇꠁꠞꠣꠝ।
৩৪ ꠀꠝꠤ ꠔꠥꠝꠞꠣꠞꠦ ꠄꠇꠈꠣꠘ ꠘꠄꠀ ꠢꠥꠇꠥꠝ ꠖꠤꠞꠣꠝ,
ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠤꠅ।
ꠀꠝꠤ ꠎꠦꠟꠣ ꠔꠥꠝꠞꠣꠞꠦ ꠝꠣꠄꠀ ꠇꠞꠍꠤ,
ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠤꠅ।
৩৫ ꠔꠥꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠞꠦ ꠝꠣꠄꠀ ꠇꠞꠅ,
ꠔꠦ ꠢꠇꠟꠦ ꠛꠥꠎꠛ ꠔꠥꠝꠞꠣ ꠀꠝꠣꠞ ꠃꠝ꠆ꠝꠔ।”
ꠍꠣꠢꠣꠛꠤ ꠙꠤꠔꠞꠞ ꠅꠡ꠆ꠛꠤꠇꠣꠞꠞ ꠇꠕꠣ
৩৬ ꠍꠣꠁꠝꠘ-ꠙꠤꠔꠞꠦ ꠁꠍꠣꠞꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦ ꠇꠥꠀꠁ ꠎꠣꠁꠞꠣ?”
ꠔꠣꠁꠘ ꠇꠁꠟꠣ,
“ꠀꠝꠤ ꠎꠦꠘꠅ ꠎꠣꠁꠞꠣꠝ,
ꠔꠥꠝꠞꠣ ꠅꠈꠘ ꠀꠝꠣꠞ ꠟꠉꠦ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ,
ꠅꠁꠟꠦ ꠛꠣꠖꠦ ꠀꠁꠛꠣꠄ।”
৩৭ ꠙꠤꠔꠞꠦ ꠇꠁꠟꠣ,
“ꠅꠈꠘ ꠇꠦꠘꠦ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ?
ꠀꠙꠘꠣꠞ ꠟꠣꠉꠤ ꠀꠝꠤ ꠀꠝꠣꠞ ꠎꠣꠘꠅ ꠛꠤꠟꠣꠁ ꠖꠤꠝꠥ।”
৩৮ ꠅꠃ ꠡꠝꠄ ꠁꠍꠣꠄ ꠇꠁꠟꠣ,
“ꠀꠝꠣꠞ ꠟꠣꠉꠤ ꠢꠣꠍꠣꠃ ꠔꠥꠝꠣꠞ ꠎꠣꠘ ꠖꠤꠛꠣꠄ ꠘꠤ?
ꠔꠦ ꠢꠣꠍꠣ ꠇꠕꠣ ꠀꠝꠤ ꠔꠥꠝꠣꠞꠦ ꠇꠁꠞꠣꠝ,
ꠝꠥꠞꠉꠣꠄ ꠛꠣꠋ ꠖꠤꠛꠣꠞ ꠀꠉꠦꠃ,
ꠔꠥꠝꠤ ꠔꠤꠘꠛꠣꠞ ꠇꠁꠛꠣꠄ,
ꠔꠥꠝꠤ ꠀꠝꠣꠞꠦ ꠌꠤꠘꠅ ꠘꠣ।”