ꠙꠛꠤꠔ꠆ꠞ ꠀꠍꠝꠣꠘꠤ ꠇꠤꠔꠣꠛꠞ ꠅꠃ ꠍꠣꠢꠣꠛꠤ ꠘꠣꠝꠣ ꠍꠤꠙꠣꠞꠣꠞ ꠝꠣꠎꠦ ꠀꠝꠞꠣ ꠙꠣꠁꠝꠥ,

ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠀꠞ ꠃꠝ꠆ꠝꠔ ꠅꠇꠟ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠛꠟꠦ ꠙꠄꠟꠣ ꠎꠦꠞꠥꠎꠣꠟꠦꠝ ꠐꠣꠃꠘ,

ꠛꠣꠖꠦ ꠛꠞ꠆ꠔꠝꠣꠘ ꠚꠤꠟꠤꠡ꠆ꠔꠤꠘ ꠖꠦꠡꠞ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣ,

ꠢꠦꠡꠦ ꠄꠡꠤꠀ ꠀꠞ ꠁꠃꠞꠥꠙ ꠝꠢꠣꠖꠦꠡꠞ ꠛꠃꠔ ꠎꠣꠉꠣ ꠅꠁꠀ ꠞꠥꠝꠣꠘ ꠛꠣꠖꠡꠣꠁꠞ ꠞꠣꠎꠗꠣꠘꠤ ꠞꠥꠝ ꠐꠣꠃꠘ ꠙꠞ꠆ꠎꠘ꠆ꠔ ꠀꠁꠀ ꠇꠤꠟꠣ ꠀꠟ꠆ꠟꠣꠁ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠂꠘ,

ꠀꠞ ꠇꠤꠟꠣ ꠅꠃ ꠢꠇꠟ ꠎꠣꠉꠣꠔ ꠘꠄꠀ ꠘꠄꠀ ꠁꠍꠣꠁ ꠎꠝꠣꠔ ꠎꠘꠝꠤꠍꠦ।

ꠅꠃ ꠍꠤꠙꠣꠞꠣꠔ ꠀꠍꠦ,

ꠔꠛꠟꠤꠉ ꠇꠣꠝꠞ ꠍꠚꠞꠅ ꠛꠣꠞꠅꠁꠀ ꠍꠣꠢꠣꠛꠤ ꠅꠇꠟꠦ ꠀꠞ ꠢꠎꠞꠔ ꠁꠍꠣꠞ ꠃꠝ꠆ꠝꠔ ꠅꠇꠟꠦ ꠇꠔ ꠛꠦꠡꠤ ꠎꠥꠟꠥꠝ-ꠝꠍꠤꠛꠔ ꠙꠣꠁꠍꠂꠘ,

ꠘꠤꠎꠞ ꠎꠣꠔꠤ ꠕꠣꠇꠤ,

ꠜꠤꠘ ꠎꠣꠔꠤ ꠕꠣꠇꠤ ꠀꠞ ꠘꠣꠘꠣꠘ ꠘꠝꠥꠘꠣꠞ ꠝꠥꠞ꠆ꠔꠤ-ꠙꠥꠎꠣꠞꠤꠞ ꠉꠦꠍ ꠕꠣꠇꠤ ꠅꠃ ꠖꠥꠈ-ꠝꠍꠤꠛꠔ,

ꠎꠦꠟ-ꠎꠥꠟꠥꠝ,

ꠌꠣꠛꠥꠇꠞ ꠝꠣꠁꠞ ꠡꠁꠎ꠆ꠎ ꠇꠞꠍꠂꠘ।

ꠔꠣ-ꠅ ꠔꠣꠞꠣ ꠔꠛꠟꠤꠉ ꠇꠣꠝ ꠇꠞꠍꠂꠘ ꠀꠞ ꠀꠟ꠆ꠟꠣ ꠙꠣꠇꠦ ꠔꠣꠞꠣꠞꠦ ꠢꠣꠝꠦꠡꠣ ꠇꠔ ꠛꠠ ꠛꠠ ꠡꠣꠁꠎ꠆ꠎ ꠇꠞꠍꠂꠘ,

ꠔꠣꠞꠣꠞ ꠝꠣꠎꠖꠤ ꠘꠣꠘꠣꠘ ꠘꠝꠥꠘꠣꠞ ꠇꠦꠞꠣꠝꠔꠤ ꠎꠣꠁꠞ ꠅꠁꠍꠦ।

ꠄꠞꠟꠣꠉꠤ ꠝꠣꠘꠥꠡ ꠖꠟꠦ ꠖꠟꠦ ꠀꠁꠀ ꠁꠝꠣꠘ ꠀꠘꠍꠦ।

ꠀꠝꠞꠣ ꠅꠃ ꠍꠤꠙꠣꠞꠣꠞ ১ ꠞꠥꠇꠥ ৪ ꠀꠄꠀꠔꠅ ꠙꠣꠁꠝꠥ,

ꠢꠎꠞꠔ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠇꠁꠞꠣ,

“ꠙꠣꠇ ꠞꠥꠢꠥ ꠔꠥꠝꠞꠣꠞ ꠃꠙꠞꠦ ꠇꠣꠁꠝ ꠅꠁꠀ ꠢꠣꠞꠟꠦ ꠔꠥꠝꠞꠣ ꠉꠣꠁꠛꠤ ꠛꠟ ꠙꠣꠁꠛꠣꠄ,

ꠅꠃ ꠛꠟꠦ ꠎꠦꠞꠥꠎꠣꠟꠦꠝ,

ꠀꠡ꠆ꠔꠣ ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣ,

ꠀꠞ ꠖꠥꠘꠤꠀꠞ ꠢꠦꠡ ꠡꠤꠝꠣꠘꠣ ꠙꠞ꠆ꠎꠘ꠆ꠔ ꠀꠝꠣꠞ ꠡꠣꠇ꠆ꠇꠤ ꠅꠁꠛꠣꠄ।”

ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠅꠃ ꠍꠣꠢꠣꠛꠤ ꠘꠣꠝꠣ ꠍꠤꠙꠣꠞꠣ ꠟꠦꠈꠍꠂꠘ ꠢꠎꠞꠔ ꠟꠥꠇ (ꠞ:)।

ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠕꠣꠇꠤ ꠎꠣꠘꠣ ꠎꠣꠄ,

ꠢꠎꠞꠔ ꠟꠥꠇꠞ ꠙꠦꠡꠣ ꠀꠍꠤꠟ ꠢꠦꠇꠤꠝꠤ ꠒꠣꠇ꠆ꠔꠞ।

ꠔꠣꠁꠘ ꠢꠎꠞꠔ ꠁꠍꠣꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠞ ꠈꠦꠎꠝꠔꠅ ꠞꠁꠀ ꠘꠣꠘꠣꠘ ꠖꠦꠡꠞ ꠘꠣꠘꠣꠘ ꠎꠣꠔꠤꠞ ꠉꠦꠍꠦ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠔꠣ।

ꠢꠎꠞꠔ ꠁꠍꠣ ꠖꠥꠘꠤꠀ ꠕꠣꠇꠤ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ꠅꠘꠥꠝꠣꠘ ৩০ ꠛꠍꠞ ꠛꠣꠖꠦ ꠅꠃ ꠍꠤꠙꠣꠞꠣ ꠇꠤꠔꠣꠛ ꠀꠇꠣꠞꠦ ꠟꠦꠈꠣ ꠅꠁꠍꠦ।

ꠅꠃ ꠍꠣꠢꠣꠛꠤ ꠘꠣꠝꠣ ꠍꠤꠙꠣꠞꠣ ꠅꠁꠟ ꠢꠎꠞꠔ ꠟꠥꠇꠞ ꠟꠦꠈꠣ ꠖꠥꠁ ꠘꠝ꠆ꠛꠞ ꠍꠤꠙꠣꠞꠣ,

ꠄꠞ ꠀꠉꠦ ꠔꠣꠁꠘ ꠀꠟ-ꠟꠥꠇ ꠘꠣꠝꠞ ꠍꠤꠙꠣꠞꠣ ꠟꠦꠈꠍꠟꠣ।