২
১ ꠜꠣꠁ ꠅꠇꠟ,
ꠀꠟ꠆ꠟꠣꠞ ꠖꠦꠅꠀ ꠈꠥꠡ-ꠈꠛꠞꠤ ꠔꠥꠝꠞꠣꠞ ꠉꠦꠍꠦ ꠔꠛꠟꠤꠉ ꠇꠞꠣꠔ ꠉꠤꠀ ꠀꠝꠤ ꠔ ꠡꠥꠘ꠆ꠖꠞ ꠡꠥꠘ꠆ꠖꠞ ꠜꠣꠡꠣꠄ ꠝꠣꠔꠤꠍꠤ ꠘꠣ,
ꠛꠣ ꠛꠠ ꠇꠥꠘꠥ ꠀꠟꠤꠝ-ꠃꠟꠣꠝꠣꠞ ꠟꠣꠈꠣꠘ ꠛꠄꠀꠘ ꠇꠞꠍꠤ ꠘꠣ।
২ ꠀꠝꠤ ꠝꠘꠦ ꠝꠘꠦ ꠑꠤꠇ ꠇꠞꠍꠟꠣꠝ,
ꠔꠥꠝꠞꠣꠞ ꠟꠉꠦ ꠕꠣꠇꠣꠞ ꠇꠣꠟꠅ ꠀꠝꠤ ꠈꠣꠟꠤ ꠅꠃ ꠁꠍꠣ ꠀꠟ-ꠝꠍꠤꠞ ꠛꠤꠡꠄꠄ ꠝꠣꠔꠤꠝꠥ,
ꠎꠦ ꠁꠍꠣꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠣ ꠅꠁꠍꠦ,
ꠁꠔꠣ ꠍꠣꠠꠣ ꠀꠞ ꠇꠥꠘ꠆ꠔꠣ ꠝꠣꠔꠔꠣꠝ ꠘꠣꠄ।
৩ ꠀꠝꠤ ꠎꠦꠛꠟꠣ ꠔꠥꠝꠞꠣꠞ ꠟꠉꠦ ꠞꠁꠔꠣꠝ,
ꠅꠃ ꠡꠝꠄ ꠘꠤꠎꠞꠦ ꠇꠝꠎꠥꠞ ꠝꠘꠅ ꠇꠞꠔꠣꠝ ꠀꠞ ꠒꠞꠣꠁꠀ ꠇꠣꠙꠤꠔꠣꠝ।
৪ ꠀꠝꠣꠞ ꠔꠛꠟꠤꠉ ꠀꠞ ꠀꠝꠣꠞ ꠛꠄꠀꠘꠞ ꠝꠣꠎꠦ ꠝꠣꠘꠡꠞ ꠝꠘ ꠎꠂ ꠇꠞꠣꠞ ꠝꠔ ꠇꠥꠘꠥ ꠀꠈꠟ-ꠢꠦꠇꠝꠔ ꠀꠞ ꠎꠥꠇ꠆ꠔꠤ ꠀꠍꠤꠟ ꠘꠣ,
ꠈꠣꠟꠤ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠀꠞ ꠇꠥꠖꠞꠔꠤ ꠛꠟ ꠖꠦꠈꠣ ꠉꠦꠍꠤꠟ।
৫ ꠀꠝꠤ ꠌꠣꠁꠟꠣꠝ,
ꠔꠥꠝꠞꠣꠞ ꠁꠝꠣꠘ ꠝꠣꠘꠡꠞ ꠀꠈꠟ-ꠁꠟꠤꠝꠞ ꠃꠙꠞꠦ ꠜꠞꠡꠣ ꠘꠣ ꠇꠞꠤꠀ,
ꠈꠣꠟꠤ ꠀꠟ꠆ꠟꠣꠁ ꠛꠟꠞ ꠃꠙꠞꠦ ꠜꠞꠡꠣ ꠇꠞꠦ।
ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠖꠦꠅꠀ ꠀꠈꠟ
৬ ꠔꠣ-ꠅ ꠎꠦꠞꠣ ꠁꠝꠣꠘꠦ ꠇꠣꠝꠤꠟ,
ꠔꠣꠞꠣꠞ ꠉꠦꠍꠦ ꠀꠝꠞꠣ ꠀꠈꠟꠞ ꠝꠣꠔ ꠝꠣꠔꠤ।
ꠅꠁꠟꠦ ꠅꠃ ꠀꠈꠟ ꠔ ꠁ ꠎꠉꠔꠞ ꠘꠣꠄ ꠛꠣ ꠎꠉꠔꠞ ꠘꠦꠔꠣ ꠅꠇꠟꠞ ꠟꠣꠈꠣꠘꠅ ꠘꠣꠄ,
ꠔꠣꠞꠣ ꠔ ꠛꠞꠛꠣꠖ ꠅꠀꠞ ꠙꠕꠤ।
৭ ꠀꠍꠟꠦ ꠀꠝꠞꠣ ꠈꠣꠟꠤ ꠀꠟ꠆ꠟꠣꠁ ꠀꠈꠟ-ꠢꠦꠇꠝꠔꠞ ꠛꠣꠔꠥꠘꠤ ꠉꠥꠙꠘ ꠛꠦꠙꠣꠞꠦ ꠝꠣꠔꠤ।
ꠅꠃ ꠛꠣꠔꠥꠘꠤ ꠛꠦꠙꠣꠞ ꠔ ꠖꠥꠘꠤꠀ ꠙꠄꠖꠣ ꠇꠞꠣꠞ ꠀꠉꠦꠃ ꠀꠟ꠆ꠟꠣꠄ ꠔꠣꠘ ꠘꠤꠎꠞ ꠝꠞ꠆ꠎꠤꠄ ꠑꠤꠇ ꠇꠞꠤꠀ ꠞꠣꠈꠍꠂꠘ,
ꠎꠣꠔꠦ ꠀꠝꠞꠣ ꠔꠣꠘ ꠉꠃꠞꠛꠞ ꠜꠣꠉꠤ ꠅꠁ।
৮ ꠅꠁꠟꠦ ꠅꠃ ꠎꠉꠔꠞ ꠘꠦꠔꠣ ꠅꠇꠟꠦ ꠁꠔꠣ ꠛꠥꠎꠞꠣ ꠘꠣ।
ꠁꠔꠣ ꠛꠥꠎꠟꠦ ꠔꠣꠞꠣ,
ꠢꠃ ꠉꠃꠞꠛꠞ ꠗꠘ ꠀꠝꠞꠣꠞ ꠝꠣꠟꠤꠇ ꠁꠍꠣꠞꠦ ꠍꠟꠤꠛꠞ ꠃꠙꠞꠦ ꠟꠐꠇꠣꠁꠀ ꠝꠣꠞꠟ ꠘꠣ ꠅꠘꠦ।
৯ ꠅꠁꠟꠦ ꠀꠝꠞꠣ ꠎꠣꠘꠤ,
ꠀꠟ꠆ꠟꠣꠞ ꠇꠣꠟꠣꠝꠦ ꠇꠄ,
ꠎꠣꠞꠣ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠂꠘ,
ꠔꠣꠞꠣꠞ ꠟꠣꠉꠤ ꠔꠣꠁꠘ ꠎꠦꠔꠣ ꠞꠣꠈꠍꠂꠘ,
ꠁꠔꠣ ꠇꠦꠃ ꠌꠃꠈꠦ ꠖꠦꠈꠍꠦ ꠘꠣ,
ꠇꠣꠘꠦꠅ ꠢꠥꠘꠍꠦ ꠘꠣ,
ꠖꠤꠟꠞ ꠝꠣꠎꠦ ꠇꠥꠘꠥꠖꠤꠘ ꠌꠤꠘ꠆ꠔꠣꠅ ꠇꠞꠍꠦ ꠘꠣ।
১০ ꠁꠔꠣ ꠅꠈꠘ ꠔꠣꠘ ꠙꠣꠇ ꠞꠥꠢꠥꠞ ꠝꠣꠎꠖꠤ ꠀꠝꠞꠣꠞ ꠉꠦꠍꠦ ꠎꠣꠁꠞ ꠇꠞꠍꠂꠘ।
ꠙꠣꠇ ꠞꠥꠢꠥꠞ ꠅꠎꠣꠘꠣ ꠇꠥꠘ꠆ꠔꠣꠃ ꠘꠣꠁ,
ꠔꠣꠁꠘ ꠀꠟ꠆ꠟꠣꠞ ꠢꠇꠟ ꠛꠣꠔꠥꠘꠤ ꠛꠦꠙꠣꠞꠅ ꠎꠣꠘꠂꠘ।
১১ ꠝꠣꠘꠡꠞ ꠝꠣꠎꠦ ꠅꠟꠣ ꠇꠦꠃ ꠀꠍꠦ ꠘꠤ,
ꠎꠦꠞꠣ ꠄꠇꠎꠘꠦ ꠀꠞꠇ ꠎꠘꠞ ꠝꠘꠞ ꠈꠛꠞ ꠎꠣꠘꠂꠘ?
ꠈꠣꠟꠤ ꠘꠤꠎꠞ ꠞꠥꠢꠦꠃ ꠔꠣꠞ ꠝꠘꠞ ꠈꠛꠞ ꠎꠣꠘꠦ।
ꠑꠤꠇ ꠅꠃ ꠟꠣꠈꠣꠘ,
ꠀꠟ꠆ꠟꠣꠞ ꠙꠣꠇ ꠞꠥꠢꠥ ꠍꠣꠠꠣ ꠖꠥꠍꠞꠣ ꠇꠦꠃ ꠔꠣꠘ ꠉꠣꠁꠛꠤ ꠛꠦꠙꠣꠞ ꠎꠣꠘꠦ ꠘꠣ।
১২ ꠀꠞ ꠀꠝꠞꠣ ꠔ ꠖꠥꠘꠤꠀꠛꠤ ꠞꠥꠢꠥ ꠙꠣꠁꠍꠤ ꠘꠣ,
ꠛꠞꠋ ꠀꠟ꠆ꠟꠣꠞ ꠔꠞꠚ ꠕꠣꠇꠤ ꠔꠣꠘ ꠞꠥꠢꠥ ꠙꠣꠁꠍꠤ,
ꠄꠞꠟꠣꠉꠤ ꠔꠣꠘ ꠖꠦꠅꠀ ꠘꠤꠀꠝꠔ ꠅꠇꠟ ꠀꠝꠞꠣ ꠌꠤꠘꠤ।
১৩ ꠀꠞ ꠅꠃ ꠘꠤꠀꠝꠔꠞ ꠛꠦꠙꠣꠞꠦꠃ ꠀꠝꠞꠣ ꠇꠁ,
ꠁꠔꠣ ꠇꠅꠀꠞ ꠡꠝꠄ ꠀꠝꠞꠣ ꠝꠣꠘꠡꠞ ꠀꠈꠟ ꠛꠦꠛꠢꠣꠞ ꠇꠞꠤ ꠘꠣ,
ꠈꠣꠟꠤ ꠙꠣꠇ ꠞꠥꠢꠥꠞ ꠝꠣꠎꠖꠤ ꠔꠣꠟꠤꠝ ꠙꠣꠁꠀ ꠇꠁꠛ ꠞꠥꠢꠣꠘꠤ ꠢꠇꠤꠇꠔꠞꠦ ꠎꠣꠁꠞ ꠇꠞꠣꠞ ꠟꠣꠉꠤ,
ꠀꠝꠞꠣ ꠞꠥꠢꠣꠘꠤ ꠝꠣꠔ ꠝꠣꠔꠤ।
১৪ ꠎꠦ ꠝꠣꠘꠥꠡ ꠞꠥꠢꠣꠘꠤ ꠝꠘꠜꠣꠛꠞ ꠘꠣꠄ,
ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠝꠣꠎꠖꠤ ꠎꠦꠔꠣ ꠝꠤꠟꠦ ꠢꠦ ꠁꠔꠣꠞꠦ ꠇꠛꠥꠟ ꠇꠞꠦ ꠘꠣ,
ꠇꠣꠞꠘ ꠔꠣꠞ ꠉꠦꠍꠦ ꠁꠔꠣ ꠛꠦꠇꠣꠝꠣ।
ꠁꠔꠣ ꠛꠦꠙꠣꠞ ꠢꠦ ꠛꠥꠎꠦꠅ ꠘꠣ,
ꠇꠣꠞꠘ ꠁꠔꠣ ꠞꠥꠢꠣꠘꠤ ꠎꠉꠔꠞ ꠛꠦꠙꠣꠞ,
ꠈꠣꠟꠤ ꠞꠥꠢꠖꠤ ꠎꠣꠌꠣꠁ ꠇꠞꠣ ꠎꠣꠄ।
১৫ ꠎꠦ ꠎꠘꠞ ꠝꠣꠎꠦ ꠙꠣꠇ ꠞꠥꠢꠥ ꠀꠍꠦ,
ꠢꠦ ꠢꠇ꠆ꠇꠟꠔꠣ ꠎꠣꠌꠣꠁ ꠇꠞꠤꠀ ꠖꠦꠈꠦ,
ꠔꠣꠞꠦ ꠇꠦꠃ ꠎꠣꠌꠣꠁ ꠇꠞꠔ ꠙꠣꠞꠦ ꠘꠣ।
১৬ ꠎꠦꠟꠣ ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
ꠝꠣꠛꠥꠖꠞ ꠝꠘ ꠇꠦꠉꠤꠄ ꠛꠥꠎꠔ ꠙꠣꠞꠍꠦ,
ꠔꠣꠘꠞꠦ ꠙꠞꠣꠝꠤꠡ ꠖꠤꠛꠣꠞ ꠡꠣꠁꠖ꠆ꠖ ꠇꠣꠞ?
ꠅꠁꠟꠦ ꠀꠟ-ꠝꠍꠤꠞ ꠝꠘ ꠀꠝꠞꠣꠞ ꠖꠤꠟꠅ ꠕꠣꠇꠣꠄ,
ꠀꠝꠞꠣ ꠁꠔꠣ ꠛꠥꠎꠞꠣꠝ।