ꠔꠛꠟꠤꠉ ꠇꠣꠝ ꠅꠁꠟ ꠀꠟ꠆ꠟꠣꠁ ꠈꠦꠎꠝꠔ
৩
১ ꠜꠣꠁ ꠅꠇꠟ,
ꠞꠥꠢꠣꠘꠤꠇ ꠎꠘꠞ ꠟꠉꠦ ꠎꠦꠟꠣꠈꠣꠘ ꠝꠣꠔꠣ ꠃꠌꠤꠔ,
ꠀꠝꠤ ꠔꠥꠝꠞꠣꠞ ꠟꠉꠦ ꠁꠟꠣ ꠝꠣꠔꠔꠣꠝ ꠙꠣꠞꠍꠤ ꠘꠣ।
ꠛꠞꠋ ꠖꠥꠘꠤꠀꠛꠤ ꠝꠣꠘꠡꠞ ꠟꠉꠦ ꠎꠦꠟꠣ ꠝꠣꠔꠣ ꠃꠌꠤꠔ,
ꠔꠥꠝꠞꠣꠞ ꠟꠉꠦ ꠅꠟꠣꠃ ꠝꠣꠔꠤꠍꠤ।
ꠔꠥꠝꠞꠣ ꠔ ꠁꠍꠣꠄꠁ ꠔꠞꠤꠇꠣꠔ ꠄꠇ꠆ꠇꠦꠞꠦ ꠢꠥꠞꠥꠔ꠆ꠔꠣꠂꠘ꠆ꠔꠞ ꠟꠣꠈꠣꠘ,
ꠄꠞꠟꠣꠉꠤꠃ ꠅꠃꠟꠣ ꠝꠣꠔꠤꠟꠣꠝ।
২ ꠙꠄꠟꠣ ꠀꠝꠤ ꠔꠥꠝꠞꠣꠞꠦ ꠡꠇ꠆ꠔ ꠈꠣꠘꠤ ꠘꠣ ꠖꠤꠀ ꠈꠣꠟꠤ ꠖꠥꠗ ꠈꠣꠛꠣꠁꠍꠟꠣꠝ,
ꠢꠤ ꠡꠝꠄ ꠡꠇ꠆ꠔ ꠈꠣꠘꠤ ꠈꠣꠅꠀꠞ ꠎꠥꠇꠣ ꠀꠍꠟꠣꠄ ꠘꠣ,
ꠀꠞ ꠅꠔ ꠖꠤꠘ ꠛꠣꠖꠦꠅ ꠔꠥꠝꠞꠣ ꠁ ꠛꠦꠙꠣꠞꠦ ꠢꠥꠞꠥꠔ꠆ꠔꠣ ꠞꠁꠍ।
৩ ꠇꠣꠞꠘ ꠔꠥꠝꠞꠣ ꠅꠈꠘꠅ ꠖꠥꠘꠤꠀꠛꠤ ꠞꠇ꠆ꠔ-ꠝꠣꠋꠡꠦ ꠌꠟꠞꠣꠄ।
ꠔꠥꠝꠞꠣꠞ ꠝꠣꠎꠦ ꠅꠈꠘꠅ ꠁꠋꠡꠣ,
ꠇꠣꠁꠎ꠆ꠎꠣ-ꠚꠍꠣꠖ ꠟꠣꠉꠣꠁꠟꠃ ꠀꠍꠦ।
ꠔꠦ ꠔꠥꠝꠞꠣ ꠞꠇ꠆ꠔ-ꠝꠣꠋꠡꠞ ꠛꠡꠦ ꠞꠁꠍ ꠘꠣ ꠘꠤ?
৪ ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠦꠛꠟꠣ ꠇꠄ,
ꠢꠦ ꠙꠣꠃꠟꠥꠍꠞ ꠖꠟꠞ,
ꠇꠦꠃ ꠇꠄ ꠀꠙꠟ꠆ꠟꠍꠞ ꠖꠟꠞ,
ꠔꠦ ꠔꠥꠝꠞꠣ ꠖꠥꠘꠤꠀꠛꠤ ꠝꠣꠘꠡꠞ ꠟꠣꠈꠣꠘ ꠘꠣꠄ ꠘꠤ?
৫ ꠀꠙꠟ꠆ꠟꠍ ꠇꠦ?
ꠀꠞ ꠙꠣꠃꠟꠥꠍꠃ ꠛꠣ ꠇꠦ?
ꠀꠝꠞꠣ ꠔ ꠡꠣꠝꠣꠁꠘ꠆ꠘ ꠈꠦꠎꠝꠔꠇꠣꠞꠤ,
ꠀꠝꠞꠣꠞ ꠝꠣꠎꠖꠤ ꠔꠥꠝꠞꠣ ꠁꠝꠣꠘꠞ ꠙꠕꠦ ꠀꠁꠍ।
ꠀꠟ꠆ꠟꠣꠄꠃ ꠀꠝꠞꠣꠞꠦ ꠎꠣꠞꠎꠤꠞ ꠁ ꠖꠣꠄꠁꠔ꠆ꠔ ꠖꠤꠍꠂꠘ।
৬ ꠀꠝꠤ ꠛꠤꠌ ꠟꠣꠉꠣꠁꠍꠤ,
ꠀꠙꠟ꠆ꠟꠍꠦ ꠙꠣꠘꠤ ꠖꠤꠍꠂꠘ,
ꠀꠞ ꠀꠟ꠆ꠟꠣꠄ ꠁꠔꠣꠞꠦ ꠛꠠ ꠇꠞꠍꠂꠘ।
৭ ꠄꠞꠟꠣꠉꠤ ꠎꠦꠁꠘ ꠛꠤꠌ ꠟꠣꠉꠣꠁꠘ ꠀꠞ ꠎꠦꠁꠘ ꠙꠣꠘꠤ ꠖꠦꠁꠘ,
ꠄꠞꠣ ꠀꠍꠟꠦ ꠇꠥꠘ꠆ꠔꠣꠃ ꠘꠣꠄ,
ꠅꠁꠟꠦ ꠎꠦꠁꠘ ꠁꠔꠣꠞꠦ ꠛꠠ ꠇꠞꠤ ꠔꠥꠟꠂꠘ,
ꠔꠣꠁꠘꠃ ꠢꠇ꠆ꠇꠟꠔꠣ।
৮ ꠛꠤꠌ ꠟꠣꠉꠣꠅꠞꠣ ꠀꠞ ꠙꠣꠘꠤ ꠖꠦꠅꠞꠣꠞ ꠄꠇꠁ ꠃꠖ꠆ꠖꠦꠡ꠆ꠡ।
ꠄꠞꠣ ꠙꠞꠔꠦꠇꠦ ꠎꠣꠞꠎꠤꠞ ꠝꠦꠘꠔ ꠝꠣꠚꠤꠇ ꠇꠣꠝꠞ ꠚꠟ ꠙꠣꠁꠛꠣ।
৯ ꠅꠁꠟꠦ ꠀꠝꠞꠣ ꠖꠥꠁꠅꠎꠘꠦꠃ ꠀꠟ꠆ꠟꠣꠞ ꠇꠣꠝ ꠇꠞꠤꠀꠞ।
ꠔꠥꠝꠞꠣ ꠀꠟ꠆ꠟꠣꠞꠃ ꠈꠦꠔ,
ꠔꠣꠘ ꠛꠣꠘꠣꠁꠟ ꠛꠤꠟꠒꠤꠋ।
১০ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠎꠦ ꠈꠣꠍ ꠞꠢꠝꠔ ꠀꠝꠤ ꠙꠣꠁꠍꠤ,
ꠅꠃ ꠞꠢꠝꠔꠞ ꠛꠟꠦꠃ ꠀꠝꠤ ꠀꠈꠟꠖꠣꠞ ꠞꠣꠎ-ꠝꠦꠡ꠆ꠔꠞꠤꠞ ꠟꠣꠈꠣꠘ ꠁꠀꠘ ꠈꠥꠐꠤ ꠉꠣꠠꠍꠤ।
ꠀꠞ ꠅꠃ ꠈꠥꠐꠤꠞ ꠃꠙꠞꠦ ꠅꠁꠘ꠆ꠘ ꠎꠘꠦ ꠛꠤꠟꠒꠤꠋ ꠛꠣꠘꠣꠁꠞꠣ।
ꠅꠁꠟꠦ ꠇꠦ ꠇꠤꠟꠣ ꠛꠣꠘꠣꠁꠞꠣ,
ꠁ ꠛꠦꠙꠣꠞꠦ ꠔꠣꠞꠣ ꠢꠥꠡꠤꠀꠞ ꠅꠃꠇ।
১১ ꠎꠦ ꠁꠀꠘ ꠈꠥꠐꠤ ꠀꠉꠦꠃ ꠉꠣꠠꠣ ꠅꠁꠉꠦꠍꠦ,
ꠝꠣꠟꠤꠇ ꠁꠍꠣ ꠀꠟ-ꠝꠍꠤꠃ ꠅꠁꠟꠣ ꠢꠃ ꠈꠥꠐꠤ,
ꠁꠇꠐꠣ ꠛꠣꠖ ꠖꠤꠀ ꠀꠞ ꠇꠥꠘꠥ ꠘꠄꠀ ꠈꠥꠐꠤ ꠇꠦꠃ ꠉꠣꠠꠔ ꠙꠣꠞꠔ ꠘꠣꠄ।
১২ ꠅꠈꠘ ꠁ ꠈꠥꠐꠤꠞ ꠃꠙꠞꠦ ꠡꠥꠘꠣ,
ꠞꠥꠙꠣ,
ꠖꠣꠝꠤ ꠙꠣꠔ꠆ꠔꠞ,
ꠟꠣꠇꠠꠤ ꠀꠞ ꠍꠘ ꠖꠤꠀ ꠇꠦꠃ ꠎꠥꠖꠤ ꠊꠞ ꠛꠣꠘꠣꠄ,
১৩ ꠔꠦ ꠇꠦ ꠇꠤꠟꠣ ꠛꠣꠘꠣꠁꠍꠂꠘ,
ꠁꠔꠣ ꠜꠣꠟꠣ ꠇꠞꠤ ꠖꠦꠈꠣ ꠎꠣꠁꠛ।
ꠞꠥꠎ ꠢꠣꠡꠞꠞ ꠖꠤꠘ ꠁꠔꠣ ꠎꠣꠁꠞ ꠅꠁꠛ,
ꠢꠃ ꠖꠤꠘ ꠅꠉ꠆ꠘꠤ-ꠙꠞꠤꠇ꠆ꠇꠣꠞ ꠝꠣꠎꠖꠤ ꠁꠔꠣ ꠈꠥꠟꠣ-ꠝꠦꠟꠣ ꠅꠁꠛ।
১৪ ꠎꠦꠁꠘ ꠎꠦꠔꠣ ꠛꠣꠘꠣꠁꠍꠂꠘ,
ꠁꠔꠣ ꠎꠥꠖꠤ ꠐꠤꠇꠤꠀ ꠞꠄ,
ꠔꠦ ꠄꠁꠘ ꠙꠥꠞꠥꠡ꠆ꠇꠣꠞ ꠙꠣꠁꠛꠣ।
১৫ ꠅꠁꠟꠦ ꠁꠔꠣ ꠎꠟꠤ ꠉꠦꠟꠦ ꠙꠥꠞꠥꠡ꠆ꠇꠣꠞ ꠕꠣꠇꠤ ꠛꠣꠖ ꠙꠠꠛ,
ꠔꠣ-ꠅ ꠔꠣꠞ ꠘꠤꠎꠞ ꠎꠣꠘ ꠛꠣꠌꠤꠛ।
ꠔꠣꠞꠦ ꠖꠦꠈꠟꠦ ꠛꠥꠎꠣ ꠎꠣꠁꠛ,
ꠢꠦ ꠀꠉꠥꠁꠘꠞ ꠝꠣꠎꠖꠤ ꠙꠣꠠꠤ ꠖꠤꠀ ꠀꠁꠍꠦ।
১৬ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠔꠥꠝꠞꠣ ꠅꠁꠟꠣꠄ ꠀꠟ꠆ꠟꠣꠞ ꠇꠣꠛꠣ ꠊꠞ,
ꠔꠥꠝꠞꠣꠞ ꠝꠣꠎꠦ ꠔꠣꠘ ꠙꠣꠇ ꠞꠥꠢꠥ ꠛꠡꠔ ꠇꠞꠂꠘ?
১৭ ꠇꠦꠃ ꠎꠥꠖꠤ ꠀꠟ꠆ꠟꠣꠞ ꠇꠣꠛꠣ ꠊꠞ ꠛꠤꠘꠣꠡ ꠇꠞꠦ,
ꠔꠦ ꠀꠟ꠆ꠟꠣꠄꠅ ꠔꠣꠞꠦ ꠛꠤꠘꠣꠡ ꠇꠞꠛꠣ।
ꠇꠣꠞꠘ ꠔꠣꠘ ꠕꠣꠇꠣꠞ ꠊꠞ ꠅꠁꠟ ꠙꠛꠤꠔ꠆ꠞ,
ꠀꠞ ꠔꠥꠝꠞꠣꠃ ꠅꠁꠟꠣꠄ ꠢꠃ ꠊꠞ।
১৮ ꠔꠥꠝꠞꠣ ꠇꠦꠃ ꠘꠤꠎꠞꠦ ꠚꠣꠇꠤ ꠖꠤꠅ ꠘꠣ।
ꠔꠥꠝꠞꠣꠞ ꠝꠣꠎꠞ ꠇꠦꠃ ꠎꠥꠖꠤ ꠖꠥꠘꠤꠀꠞ ꠀꠈꠟ-ꠁꠟꠤꠝꠦ ꠘꠤꠎꠞꠦ ꠀꠈꠟꠖꠣꠞ ꠝꠘꠅ ꠇꠞꠦ,
ꠔꠦ ꠢꠦ ꠛꠦꠀꠈꠟ ꠛꠘꠃꠇ ꠎꠣꠔꠦ ꠀꠍꠟ ꠀꠈꠟꠖꠣꠞ ꠅꠁꠔ ꠙꠣꠞꠦ।
১৯ ꠇꠣꠞꠘ ꠁ ꠎꠉꠔꠞ ꠀꠈꠟ-ꠛꠥꠖ꠆ꠖꠤ,
ꠀꠟ꠆ꠟꠣꠞ ꠘꠎꠞꠅ ꠈꠣꠟꠤ ꠛꠦꠀꠈꠟꠤ।
ꠀꠍꠝꠣꠘꠤ ꠇꠤꠔꠣꠛꠅ ꠀꠍꠦ,
“ꠀꠟ꠆ꠟꠣꠄ ꠀꠈꠟꠖꠣꠞ ꠅꠇꠟꠞꠦ ꠔꠣꠞꠣꠞ ꠌꠣꠟꠣꠇꠤꠔ ꠗꠞꠂꠘ।”
২০ ꠀꠞꠇ ꠀꠄꠀꠔꠅ ꠀꠍꠦ,
“ꠀꠈꠟꠖꠣꠞ ꠅꠇꠟꠞ ꠢꠇꠟ ꠌꠤꠘ꠆ꠔꠣꠃ ꠛꠦꠇꠣꠝꠣ,
ꠁꠔꠣ ꠔ ꠝꠣꠛꠥꠖꠦ ꠎꠣꠘꠂꠘ।”
২১ ꠄꠞꠟꠣꠉꠤ ꠀꠝꠣꠞ ꠇꠕꠣ ꠅꠁꠟ,
ꠢꠇ꠆ꠇꠟꠔꠣꠃ ꠔ ꠔꠥꠝꠞꠣꠞ,
ꠔꠦ ꠔꠥꠝꠞꠣ ꠇꠥꠘꠥ ꠝꠣꠘꠡꠞꠦ ꠟꠁꠀ ꠛꠠꠣꠁ ꠇꠞꠤꠅ ꠘꠣ।
২২ ꠙꠣꠃꠟꠥꠍ,
ꠀꠙꠟ꠆ꠟꠍ,
ꠙꠤꠔꠞ,
ꠁ ꠖꠥꠘꠤꠀ,
ꠎꠤꠘ꠆ꠖꠦꠉꠤ,
ꠝꠃꠔ,
ꠛꠞ꠆ꠔꠝꠣꠘ,
ꠜꠛꠤꠡꠔ,
ꠢꠇ꠆ꠇꠟꠔꠣꠃ ꠔꠥꠝꠞꠣꠞ।
২৩ ꠔꠥꠝꠞꠣ ꠅꠁꠟꠣꠄ ꠀꠟ-ꠝꠍꠤꠞ,
ꠀꠞ ꠀꠟ-ꠝꠍꠤ ꠅꠁꠟꠣ ꠀꠟ꠆ꠟꠣꠞ।