ꠀꠟ-ꠝꠍꠤꠞ ꠍꠣꠢꠣꠛꠤꠞ ꠎꠤꠘ꠆ꠖꠦꠉꠤꠞ ꠘꠝꠥꠘꠣ
৪
১ ꠀꠝꠞꠣꠞꠦ ꠖꠦꠈꠤꠀ ꠝꠣꠘꠡꠦ ꠛꠥꠎꠃꠇ,
ꠀꠝꠞꠣ ꠀꠟ-ꠝꠍꠤꠞ ꠈꠣꠖꠤꠝ,
ꠀꠟ꠆ꠟꠣꠁ ꠛꠣꠔꠥꠘꠤ ꠜꠣꠘ꠆ꠒꠣꠞꠞ ꠈꠣꠎꠣꠘ꠆ꠌꠤ।
২ ꠀꠞ ꠎꠦꠞꠣꠞ ꠃꠙꠞꠦ ꠜꠣꠘ꠆ꠒꠣꠞꠞ ꠈꠣꠎꠣꠘ꠆ꠌꠤꠞ ꠜꠣꠞ ꠖꠦꠅꠀ ꠅꠄ,
ꠔꠣꠞꠣ ꠔ ꠙꠞꠝꠣꠘ ꠖꠦꠈꠣꠘꠤ ꠟꠣꠉꠛ,
ꠔꠣꠞꠣ ꠢꠇ-ꠢꠣꠟꠣꠟ।
৩ ꠔꠦ ꠀꠝꠤ ꠢꠇ-ꠢꠣꠟꠣꠟ ꠇꠤ ꠘꠣ ꠁ ꠛꠤꠌꠣꠞ ꠔꠥꠝꠞꠣ ꠇꠞꠅ ꠛꠣ ꠀꠖꠣꠟꠔꠦꠃ ꠇꠞꠃꠇ,
ꠄꠔꠦ ꠀꠝꠣꠞ ꠇꠥꠘ꠆ꠔꠣ ꠎꠣꠄ ꠀꠄ ꠘꠣ।
ꠀꠝꠤ ꠔ ꠀꠝꠣꠞ ꠘꠤꠎꠞ ꠛꠤꠌꠣꠞꠃ ꠇꠞꠤ ꠘꠣ।
৪ ꠀꠝꠣꠞ ꠝꠘ ꠡꠣꠖꠣ ꠅꠁꠟꠦꠅ ꠙꠞꠝꠣꠘ ꠇꠞꠣ ꠎꠣꠞ ꠘꠣ ꠀꠝꠤ ꠘꠤꠞ꠆ꠖꠥꠡ।
ꠔꠦ ꠝꠣꠟꠤꠇ ꠁꠍꠣꠄꠃ ꠀꠝꠣꠞ ꠛꠤꠌꠣꠞ ꠇꠞꠛꠣ।
৫ ꠄꠞꠟꠣꠉꠤ ꠡꠑꠤꠇ ꠡꠝꠄꠅꠞ ꠀꠉ ꠙꠞ꠆ꠎꠘ꠆ꠔ,
ꠝꠣꠘꠤ ꠝꠣꠟꠤꠇ ꠁꠍꠣ ꠢꠤꠞꠛꠣꠞ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠔꠥꠝꠞꠣ ꠇꠥꠘꠥ ꠛꠤꠌꠣꠞ ꠇꠞꠤꠅ ꠘꠣ।
ꠀꠘ꠆ꠖꠣꠁꠞꠅ ꠎꠦꠔꠣ ꠟꠥꠇꠣꠁꠟ ꠀꠍꠦ,
ꠔꠣꠁꠘ ꠀꠁꠀ ꠁꠔꠣꠞꠦ ꠚꠞꠅ ꠀꠘꠛꠣ ꠀꠞ ꠝꠣꠘꠡꠞ ꠖꠤꠟꠞ ꠉꠥꠙꠘ ꠘꠤꠅꠔ ꠅꠇꠟ ꠎꠣꠁꠞ ꠇꠞꠛꠣ।
ꠢꠃ ꠡꠝꠄ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠢꠇꠟꠦ ꠎꠣꠞꠎꠤꠞ ꠙꠣꠅꠘꠣ ꠔꠣꠞꠤꠚ ꠙꠣꠁꠛꠣ।
৬ ꠜꠣꠁ ꠅꠇꠟ,
ꠔꠥꠝꠞꠣꠞ ꠜꠣꠟꠣꠁꠞ ꠟꠣꠉꠤ ꠀꠝꠤ ꠀꠝꠣꠞ ꠘꠤꠎꠞ ꠀꠞ ꠀꠙꠟ꠆ꠟꠍꠞ ꠃꠖꠣꠢꠞꠘ ꠖꠤꠀ ꠔꠥꠝꠞꠣꠞꠦ ꠇꠁꠟꠣꠝ,
ꠎꠣꠔꠦ ꠔꠥꠝꠞꠣ ꠀꠝꠞꠣꠞ ꠉꠦꠍ ꠕꠣꠇꠤ ꠅꠃ ꠔꠣꠟꠤꠝ ꠘꠦꠅ,
ꠀꠍꠝꠣꠘꠤ ꠇꠤꠔꠣꠛꠅ ꠎꠦꠔꠣ ꠟꠦꠈꠣ ꠀꠍꠦ,
ꠁꠔꠣꠞ ꠛꠣꠞꠦ ꠎꠣꠅꠀ ꠑꠤꠇ ꠘꠣꠄ।
ꠔꠦ ꠔꠥꠝꠞꠣ ꠄꠇꠎꠘꠞꠦ ꠕꠁꠀ ꠀꠞꠦꠇꠎꠘꠞꠦ ꠟꠁꠀ ꠛꠠꠣꠁ ꠇꠞꠤꠅ ꠘꠣ।
৭ ꠇꠦꠃ ꠎꠣꠘꠥ ꠝꠘꠅ ꠘꠣ ꠇꠞꠦ ꠔꠥꠝꠤ ꠀꠟꠣꠖꠣ ꠇꠥꠘ꠆ꠔꠣ ꠛꠘꠤꠉꠦꠍ।
ꠔꠥꠝꠣꠞ ꠘꠤꠎꠞ ꠄꠝꠘ ꠇꠥꠘ ꠗꠘ ꠀꠍꠦ,
ꠎꠦꠔꠣ ꠔꠥꠝꠤ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠟꠤꠟ꠆ꠟꠣ ꠙꠣꠁꠍ ꠘꠣ?
ꠀꠞ ꠁꠔꠣ ꠎꠥꠖꠤ ꠟꠤꠟ꠆ꠟꠣ ꠙꠣꠁꠀ ꠕꠣꠇꠅ,
ꠔꠦ ꠟꠤꠟ꠆ꠟꠣ ꠙꠣꠁꠍ ꠘꠣ ꠇꠁꠀ ꠛꠦꠐꠣꠉꠤꠞꠤ ꠇꠞꠞꠣꠄ ꠇꠦꠘꠦ?
৮ ꠔꠥꠝꠞꠣꠞꠦ ꠖꠦꠈꠤꠀ ꠔ ꠝꠘꠅ ꠅꠞ,
ꠔꠥꠝꠞꠣ ꠀꠉꠦꠃ ꠢꠇ꠆ꠇꠟꠔꠣ ꠙꠣꠁꠀ ꠗꠘꠤ ꠅꠁꠉꠦꠍ,
ꠀꠝꠞꠣꠞꠦ ꠛꠣꠖ ꠖꠤꠀꠃ ꠔꠥꠝꠞꠣ ꠛꠣꠖꠡꠣ ꠛꠘꠤꠉꠦꠍ!
ꠔꠥꠝꠞꠣ ꠢꠣꠍꠣꠞꠞ ꠛꠣꠖꠡꠣ ꠅꠁꠟꠦ ꠜꠣꠟꠣꠃ ꠅꠁꠔ,
ꠀꠝꠞꠣꠅ ꠔꠥꠝꠞꠣꠞ ꠟꠉꠦ ꠛꠣꠖꠡꠣ ꠅꠁꠔꠣꠝ ꠙꠣꠞꠔꠣꠝ।
৯ ꠎꠥꠖ꠆ꠖ-ꠛꠘ꠆ꠖꠤ ꠅꠇꠟꠞꠦ ꠝꠣꠞꠤꠟꠤꠛꠣꠞ ꠘꠤꠅꠔꠦ,
ꠎꠥꠖ꠆ꠖꠞ ꠛꠤꠎꠂ ꠝꠤꠍꠤꠟꠞ ꠈꠞꠞ ꠇꠣꠔꠣꠞꠅ ꠎꠣꠞꠣꠞꠦ ꠞꠣꠈꠣ ꠅꠄ,
ꠀꠝꠣꠞ ꠝꠘꠅ ꠅꠄ ꠀꠟ꠆ꠟꠣꠄ ꠀꠝꠞꠣꠞ ꠟꠣꠈꠣꠘ ꠍꠣꠢꠣꠛꠤ ꠅꠇꠟꠞꠦꠅ ꠅꠟꠣ ꠢꠇꠟꠞ ꠈꠞꠦ ꠞꠣꠈꠍꠂꠘ।
ꠀꠝꠞꠣ ꠀꠡ꠆ꠔꠣ ꠎꠉꠔꠞ ꠉꠦꠍꠦ,
ꠢꠇꠟ ꠝꠣꠘꠡꠞ ꠉꠦꠍꠦ,
ꠀꠞ ꠚꠤꠞꠤꠡ꠆ꠔꠣ ꠅꠇꠟꠞ ꠉꠦꠍꠦꠅ ꠔꠣꠝꠡꠣꠞ ꠘꠣꠄꠅꠇ ꠛꠘꠤꠉꠦꠍꠤ।
১০ ꠀꠝꠞꠣ ꠔ ꠀꠟ-ꠝꠍꠤꠞ ꠟꠣꠉꠤ ꠛꠦꠀꠈꠟ ꠅꠁꠍꠤ,
ꠀꠞ ꠔꠥꠝꠞꠣ ꠛꠥꠟꠦ ꠀꠟ-ꠝꠍꠤꠞ ꠘꠣꠝꠦ ꠀꠈꠟꠖꠣꠞ ꠛꠘꠤꠉꠦꠍ।
ꠀꠝꠞꠣ ꠇꠝꠎꠥꠞ,
ꠔꠥꠝꠞꠣ ꠛꠟꠛꠣꠘ,
ꠔꠥꠝꠞꠣ ꠛꠥꠟꠦ ꠁꠎ꠆ꠎꠔꠤ ꠛꠘꠤꠉꠦꠍ,
ꠀꠝꠞꠣꠞ ꠔ ꠇꠥꠘꠥ ꠁꠎ꠆ꠎꠔ ꠘꠣꠁ।
১১ ꠀꠝꠞꠣ ꠅꠈꠘꠅ ꠙꠦꠐꠞ ꠜꠥꠇꠦ,
ꠙꠣꠘꠤꠞ ꠙꠤꠀꠍꠦ,
ꠇꠣꠙꠠ-ꠌꠥꠙꠠꠞ ꠅꠜꠣꠛꠦ ꠇꠡ꠆ꠐ ꠇꠞꠤꠀꠞ,
ꠛꠣꠠꠤ-ꠊꠞ ꠘꠣꠁ ꠇꠞꠤ ꠛꠂꠔꠟꠞ ꠟꠣꠈꠣꠘ ꠞꠁꠀꠞ ꠀꠞ ꠝꠣꠁꠞ-ꠗꠁꠞ ꠈꠣꠁꠀꠞ।
১২ ꠢꠣꠝꠦꠡꠣ ꠘꠤꠎꠞ ꠀꠔꠦ ꠝꠦꠘꠔ ꠇꠞꠤ ꠈꠣꠁꠀꠞ।
ꠝꠣꠘꠡꠞ ꠉꠣꠁꠟ-ꠝꠘ꠆ꠖ ꠢꠥꠘꠤꠀꠅ,
ꠔꠣꠞꠣꠞ ꠜꠣꠟꠣꠁ ꠌꠣꠁꠀꠞ,
ꠎꠥꠟꠥꠝ-ꠘꠤꠞ꠆ꠎꠣꠔꠘ,
ꠢꠥꠝꠇꠤ-ꠗꠣꠝꠇꠤꠞꠦ ꠍꠛꠞ ꠇꠞꠤꠀꠞ।
১৩ ꠛꠖꠘꠣꠝ-ꠉꠤꠛꠔ ꠡꠁꠎ꠆ꠎ ꠇꠞꠤ ꠇꠞꠤ,
ꠘꠞꠝ ꠡꠥꠞꠦ ꠔꠣꠞꠣꠞꠦ ꠛꠥꠎꠣꠁꠀꠞ।
ꠅꠈꠘ ꠙꠞ꠆ꠎꠘ꠆ꠔ ꠀꠝꠞꠣ ꠀꠡ꠆ꠔꠣ ꠎꠉꠔꠞ ꠈꠣꠍꠞꠣꠞ ꠟꠣꠈꠣꠘ,
ꠢꠇꠟꠔꠣꠞ ꠉꠦꠍꠦꠃ ꠎꠁꠘ꠆ꠎꠣꠟ ꠛꠘꠤꠉꠦꠍꠤ।
১৪ ꠢꠥꠘꠅ,
ꠔꠥꠝꠞꠣꠞꠦ ꠡꠞꠝ ꠖꠦꠅꠀꠞ ꠘꠤꠅꠔꠦ ꠁꠔꠣ ꠟꠦꠈꠞꠣꠝ ꠘꠣ,
ꠈꠣꠟꠤ ꠀꠝꠣꠞ ꠝꠣꠄꠀꠞ ꠀꠅꠟꠣꠖ ꠢꠤꠡꠣꠛꠦ ꠢꠥꠡꠤꠀꠞ ꠇꠞꠣꠞ ꠟꠣꠉꠤ ꠟꠦꠈꠞꠣꠝ।
১৫ ꠝꠘꠅ ꠞꠣꠈꠤꠅ,
ꠀꠟ-ꠝꠍꠤꠞ ꠛꠦꠙꠣꠞꠦ ꠔꠣꠟꠤꠝ ꠖꠦꠅꠀꠞ ꠟꠣꠉꠤ ꠔꠥꠝꠞꠣꠞ ꠀꠎꠣꠞ ꠀꠎꠣꠞ ꠃꠡ꠆ꠔꠣꠖ ꠕꠣꠇꠔꠣ ꠙꠣꠞꠂꠘ,
ꠅꠁꠟꠦ ꠔꠥꠝꠞꠣꠞ ꠛꠣꠚ ꠔ ꠅꠔ ꠎꠘ ꠘꠣꠄ।
ꠈꠥꠡ-ꠈꠛꠞꠤ ꠔꠛꠟꠤꠉꠞ ꠝꠣꠎꠖꠤ ꠁꠍꠣꠄꠁ ꠎꠤꠘ꠆ꠖꠦꠉꠤꠔ ꠄꠇꠝꠣꠔ꠆ꠞ ꠀꠝꠤꠃ ꠅꠁꠟꠣꠝ ꠔꠥꠝꠞꠣꠞ ꠛꠣꠚ।
১৬ ꠅꠈꠘ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀ ꠇꠁꠀꠞ,
ꠀꠝꠤ ꠎꠦꠟꠣ ꠌꠟꠤ,
ꠔꠥꠝꠞꠣꠅ ꠅꠟꠣ ꠌꠟꠅ।
১৭ ꠅꠃ ꠘꠤꠅꠔꠦ ꠀꠝꠤ ꠔꠤꠝꠕꠤꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ,
ꠝꠣꠟꠤꠇꠞ ꠘꠣꠝꠦ ꠄꠁꠘ ꠔ ꠀꠝꠣꠞ ꠝꠣꠄꠀꠞ ꠢꠇ-ꠢꠣꠟꠣꠟ ꠙꠥꠔ।
ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞꠦ ꠀꠝꠤ ꠇꠤꠟꠣ ꠝꠣꠘꠤꠀ ꠌꠟꠤꠀꠞ,
ꠀꠞ ꠢꠇꠟ ꠎꠣꠉꠣꠞ ꠢꠇꠟ ꠎꠝꠣꠔꠅ ꠇꠤꠟꠣ ꠔꠣꠟꠤꠝ ꠖꠤꠀꠞ,
ꠁꠔꠣ ꠔꠣꠁꠘ ꠝꠘꠅ ꠇꠞꠣꠁ ꠖꠤꠛꠣ।
১৮ ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠝꠘꠅ ꠇꠞꠦꠞ,
ꠀꠝꠤ ꠀꠞ ꠔꠥꠝꠞꠣꠞ ꠉꠦꠍꠦ ꠀꠁꠔꠣꠝ ꠘꠣꠄ,
ꠄꠞꠟꠣꠉꠤ ꠔꠣꠞꠣ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠞꠣ।
১৯ ꠁꠘꠡꠣꠟ꠆ꠟꠣ ꠀꠝꠤ ꠈꠥꠛ ꠎꠟꠖꠤꠃ ꠀꠁꠝꠥ।
ꠎꠦꠔꠣꠄ ꠛꠠꠣꠁ-ꠛꠦꠐꠣꠉꠤꠞꠤ ꠖꠦꠈꠣꠁꠞꠣ,
ꠔꠣꠞꠣꠞ ꠝꠣꠔ ꠢꠥꠘꠣꠔ ꠘꠣꠄ,
ꠈꠣꠟꠤ ꠔꠣꠞꠣꠞ ꠝꠥꠟ ꠈꠦꠝꠔꠣ ꠖꠦꠈꠣꠔ ꠀꠁꠝꠥ।
২০ ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠝꠣꠔ-ꠇꠕꠣꠞ ꠛꠦꠙꠣꠞ ꠘꠣꠄ,
ꠁꠔꠣ ꠅꠁꠟ ꠇꠥꠖꠞꠔꠤ ꠈꠦꠝꠔꠣꠞ ꠛꠦꠙꠣꠞ।
২১ ꠔꠥꠝꠞꠣꠞ ꠁꠌ꠆ꠍꠣ ꠇꠤꠔꠣ?
ꠀꠝꠤ ꠔꠥꠝꠞꠣꠞ ꠉꠦꠍꠦ ꠇꠤꠔꠣ ꠟꠁꠀ ꠀꠁꠔꠣꠝ?
ꠍꠤꠋꠟꠣ ꠟꠁꠀ ꠘꠤ,
ꠘꠣ ꠝꠣꠄꠀ-ꠝꠝꠔꠣ ꠀꠞ ꠘꠞꠝ ꠝꠤꠎꠣꠎ?