১১
১ ꠔꠦ ꠀꠝꠤ ꠎꠦꠟꠣ ꠀꠟ-ꠝꠍꠤꠞ ꠟꠣꠈꠣꠘ ꠌꠟꠤꠀꠞ,
ꠔꠥꠝꠞꠣꠅ ꠅꠃꠟꠣ ꠀꠝꠣꠞ ꠟꠣꠈꠣꠘ ꠌꠟꠅ।
ꠎꠝꠣꠔꠅ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ (১১:২-১৪:৪০)
ꠘꠤꠅꠝ ꠝꠣꠘꠤꠀ ꠄꠛꠣꠖꠔ ꠇꠞꠅ
২ ꠅ ꠜꠣꠁ ꠅꠇꠟ,
ꠔꠥꠝꠞꠣ ꠀꠝꠣꠞ ꠖꠦꠅꠀ ꠔꠣꠟꠤꠝ ꠝꠘꠅ ꠞꠣꠈꠤꠀ ꠌꠟꠞꠣꠄ,
ꠀꠞ ꠢꠇꠟ ꠛꠦꠙꠣꠞꠦꠃ ꠀꠝꠣꠞꠦ ꠁꠀꠖ ꠞꠣꠈꠞꠣꠄ,
ꠄꠞꠟꠣꠉꠤ ꠀꠝꠤ ꠔꠥꠝꠞꠣꠞ ꠔꠣꠞꠤꠚ ꠇꠞꠤꠀꠞ।
৩ ꠔꠦ ꠀꠝꠤ ꠌꠣꠁꠞꠣꠝ,
ꠔꠥꠝꠞꠣ ꠅꠈꠣꠘ ꠛꠥꠎꠅ,
ꠀꠟ-ꠝꠍꠤꠃ ꠅꠁꠟꠣ ꠢꠇꠟ ꠛꠦꠐꠣꠁꠘ꠆ꠔꠞ ꠝꠣꠕꠣ,
ꠛꠦꠐꠣꠁꠘ ꠅꠁꠟꠣ ꠛꠦꠐꠤꠘ꠆ꠔꠞ ꠝꠣꠕꠣ,
ꠀꠞ ꠀꠟ꠆ꠟꠣ ꠙꠣꠇ ꠅꠁꠟꠣ ꠀꠟ-ꠝꠍꠤꠞ ꠝꠣꠕꠣ।
৪ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠝꠄ ꠎꠦ ꠛꠦꠐꠣꠄ ꠝꠣꠕꠣ ꠉꠥꠞꠤꠀ ꠖꠥꠀ-ꠝꠥꠘꠣꠎꠣꠔ ꠇꠞꠦ,
ꠛꠣ ꠙꠤꠞꠣꠇꠤ ꠝꠣꠔꠦ,
ꠢꠦ ꠔ ꠔꠣꠞ ꠝꠣꠕꠣꠞꠦ ꠅꠡꠝ꠆ꠝꠣꠘ ꠇꠞꠦ।
৫ ꠅꠟꠣꠈꠣꠘ ꠎꠦ ꠛꠦꠐꠤꠄ ꠝꠣꠕꠣ ꠘꠣ ꠉꠥꠞꠤꠀ ꠖꠥꠀ-ꠝꠥꠘꠣꠎꠣꠔ ꠇꠞꠦ,
ꠛꠣ ꠙꠤꠞꠣꠇꠤ ꠝꠣꠔꠦ,
ꠅꠃ ꠛꠦꠐꠤꠄꠅ ꠔꠣꠁꠞ ꠝꠣꠕꠣꠞ ꠅꠡꠝ꠆ꠝꠣꠘ ꠇꠞꠦ,
ꠔꠣꠁ ꠝꠣꠕꠣ ꠇꠣꠝꠣꠁꠟ ꠛꠦꠐꠤꠘ꠆ꠔꠞ ꠟꠣꠈꠣꠘ ꠛꠘꠤꠎꠣꠄ।
৬ ꠇꠥꠘꠥ ꠛꠦꠐꠤꠄ ꠎꠥꠖꠤ ꠝꠣꠕꠣ ꠘꠣ ꠉꠥꠞꠦ,
ꠔꠦ ꠔꠣꠁꠞ ꠌꠥꠟ ꠇꠣꠝꠣꠁꠟꠣꠃꠇ।
ꠅꠁꠟꠦ ꠛꠦꠐꠤꠘ꠆ꠔꠞ ꠌꠥꠟ ꠇꠣꠝꠣꠘꠤ ꠡꠞꠝꠞ ꠛꠤꠡꠄ ꠝꠘꠅ ꠅꠁꠟꠦ,
ꠔꠣꠁꠞ ꠝꠣꠕꠣ ꠉꠥꠞꠤꠀ ꠞꠣꠈꠃꠇ।
৭ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠡꠝꠄ ꠝꠣꠕꠣ ꠉꠥꠞꠤꠀ ꠞꠣꠈꠣ ꠛꠦꠐꠣꠁꠘ꠆ꠔꠞ ꠟꠣꠉꠤ ꠑꠤꠇ ꠘꠣꠄ,
ꠀꠟ꠆ꠟꠣꠄ ꠔ ꠛꠦꠐꠣꠁꠘ꠆ꠔꠞꠦ ꠔꠣꠘ ꠘꠤꠎꠞ ꠍꠥꠞꠔꠦ ꠙꠄꠖꠣ ꠇꠞꠍꠂꠘ ꠀꠞ ꠛꠦꠐꠣꠁꠘ꠆ꠔꠞ ꠝꠣꠎꠖꠤꠃ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞ ꠅꠄ,
ꠅꠁꠟꠦ ꠛꠦꠐꠤꠘ꠆ꠔꠞ ꠝꠣꠎꠖꠤ ꠛꠦꠐꠣꠁꠘ꠆ꠔꠞ ꠝꠢꠤꠝꠣ ꠎꠣꠁꠞ ꠅꠄ।
৮ ꠙꠄꠟꠣ ꠛꠦꠐꠣ ꠝꠣꠘꠥꠡ ꠛꠣꠛꠣ ꠀꠖꠝ ꠔ ꠛꠦꠐꠤ ꠕꠣꠇꠤ ꠙꠄꠖꠣ ꠅꠁꠍꠂꠘ ꠘꠣ,
ꠅꠁꠟꠦ ꠙꠄꠟꠣ ꠛꠦꠐꠤ ꠝꠣꠘꠥꠡ ꠝꠣꠁ ꠢꠣꠅꠀ ꠘꠤꠌ꠆ꠌꠄ ꠛꠦꠐꠣ ꠕꠣꠇꠤꠃ ꠙꠄꠖꠣ ꠅꠁꠍꠂꠘ।
৯ ꠀꠞ ꠛꠦꠐꠤꠘ꠆ꠔꠞ ꠟꠣꠉꠤ ꠛꠦꠐꠣꠁꠘ ꠙꠄꠖꠣ ꠅꠁꠍꠂꠘ ꠘꠣ,
ꠛꠞꠋ ꠛꠦꠐꠣꠁꠘ꠆ꠔꠞ ꠟꠣꠉꠤꠃ ꠛꠦꠐꠤꠘ ꠙꠄꠖꠣ ꠅꠁꠍꠂꠘ।
১০ ꠅꠃ ꠔꠣꠟꠤꠝ ꠝꠣꠚꠤꠇ ꠚꠤꠞꠤꠡ꠆ꠔꠣ ꠅꠇꠟꠞ ꠇꠕꠣ ꠈꠤꠀꠟ ꠞꠣꠈꠤꠀ,
ꠔꠣꠛꠦꠖꠣꠞꠤ ꠝꠣꠘꠣꠞ ꠘꠤꠡꠣꠘꠣ ꠢꠤꠡꠣꠛꠦ ꠢꠇꠟ ꠛꠦꠐꠤꠘ꠆ꠔꠦ ꠝꠣꠕꠣ ꠉꠥꠞꠤꠀ ꠞꠣꠈꠣ ꠎꠞꠥꠞ।
১১ ꠔꠣ-ꠅ ꠝꠣꠟꠤꠇ ꠁꠍꠣꠞ ꠔꠞꠤꠇꠣꠞ ꠛꠦꠐꠤ ꠝꠣꠘꠡꠦ ꠊꠞꠞ ꠛꠦꠐꠣꠞ ꠃꠙꠞꠦ ꠜꠞꠡꠣ ꠇꠞꠂꠘ,
ꠀꠞ ꠛꠦꠐꠣꠄꠅ ꠅꠟꠣ ꠛꠦꠐꠤꠞ ꠃꠙꠞꠦ ꠜꠞꠡꠣ ꠇꠞꠂꠘ।
১২ ꠇꠣꠞꠘ,
ꠙꠄꠟꠣ ꠛꠦꠐꠣ ꠀꠖꠝ ꠕꠣꠇꠤ ꠎꠥꠖꠤꠅ ꠙꠄꠟꠣ ꠛꠦꠐꠤ ꠝꠣꠁ ꠢꠣꠅꠀ ꠙꠄꠖꠣ,
ꠔꠣ-ꠅ ꠛꠦꠐꠤꠘ ꠕꠣꠇꠤꠃ ꠢꠤꠞꠛꠣꠞ ꠛꠦꠐꠣꠁꠘ꠆ꠔꠞ ꠎꠘꠝ ꠅꠄ।
ꠀꠍꠟꠦ ꠢꠇ꠆ꠇꠟꠔꠣꠃ ꠔ ꠀꠟ꠆ꠟꠣꠞ ꠙꠄꠖꠣ।
১৩ ꠔꠥꠝꠞꠣ ꠘꠤꠎꠦꠃ ꠛꠤꠌꠣꠞ ꠇꠞꠤ ꠖꠦꠈꠅ,
ꠝꠣꠕꠣꠔ ꠇꠣꠙꠠ ꠘꠣ ꠖꠤꠀ ꠇꠥꠘꠥ ꠛꠦꠐꠤꠄ ꠖꠥꠀ-ꠝꠥꠘꠣꠎꠣꠔ ꠇꠞꠣ ꠑꠤꠇ ꠘꠤ?
১৪ ꠀꠞ ꠡꠝꠣꠎꠞ ꠢꠣꠟ-ꠌꠣꠟ ꠕꠣꠇꠤꠃ ꠔ ꠛꠥꠎꠣ ꠎꠣꠄ,
ꠛꠦꠐꠣꠁꠘ꠆ꠔꠞ ꠝꠣꠕꠣꠔ ꠟꠣꠝ꠆ꠛꠣ ꠌꠥꠟ ꠞꠣꠈꠣ ꠡꠞꠝꠞ ꠛꠦꠙꠣꠞ,
১৫ ꠅꠁꠟꠦ ꠛꠦꠐꠤꠘ꠆ꠔꠦ ꠟꠣꠝ꠆ꠛꠣ ꠌꠥꠟ ꠞꠣꠈꠟꠦ ꠔꠣꠞꠣꠞ ꠡꠥꠘꠣꠝ ꠛꠣꠠꠦ ꠘꠣ ꠘꠤ?
ꠘꠤꠎꠞꠦ ꠉꠥꠞꠤꠀ ꠞꠣꠈꠣꠞ ꠟꠣꠉꠤꠃ ꠔ ꠔꠣꠞꠣ ꠁ ꠟꠣꠝ꠆ꠛꠣ ꠌꠥꠟ ꠙꠣꠁꠍꠂꠘ।
১৬ ꠔꠦ ꠁꠔꠣ ꠟꠁꠀ ꠇꠦꠃ ꠔꠞ꠆ꠇ-ꠛꠤꠔꠞ꠆ꠇ ꠇꠞꠟꠦ,
ꠀꠝꠣꠞ ꠙꠞꠤꠡ꠆ꠇꠣꠞ ꠎꠥꠀꠙ ꠅꠁꠟ,
ꠁꠔꠣ ꠍꠣꠠꠣ ꠖꠥꠍꠞꠣ ꠇꠥꠘꠥ ꠘꠤꠅꠝ ꠀꠝꠞꠣꠞ ꠝꠣꠎꠦ ꠘꠣꠁ ꠀꠞ ꠀꠟ꠆ꠟꠣꠞ ꠎꠝꠣꠔꠞ ꠝꠣꠎꠦꠅ ꠘꠣꠁ।
ꠁꠍꠣ ꠀꠟ-ꠝꠍꠤꠞ ꠝꠦꠎꠛꠣꠘꠤꠞ ꠛꠦꠙꠣꠞꠦ
১৭ ꠅꠈꠘ ꠀꠝꠤ ꠎꠦ ꠛꠦꠙꠣꠞꠦ ꠙꠞꠣꠝꠤꠡ ꠖꠤꠔꠣꠝ ꠌꠣꠁꠞꠣꠝ,
ꠁ ꠛꠦꠙꠣꠞꠦ ꠔ ꠔꠥꠝꠞꠣ ꠝꠥꠐꠦꠃ ꠔꠣꠞꠤꠚ ꠙꠣꠅꠀꠞ ꠎꠥꠇꠣ ꠘꠣꠄ।
ꠔꠥꠝꠞꠣ ꠎꠝꠣꠔꠅ ꠎꠦꠟꠣ ꠡꠞꠤꠇ ꠅꠅ,
ꠁꠔꠣꠄ ꠔꠥꠝꠞꠣꠞ ꠇꠥꠘꠥ ꠚꠣꠄꠖꠣ ꠅꠄ ꠘꠣ,
ꠛꠞꠋ ꠈꠦꠔꠤ ꠅꠄ।
১৮ ꠀꠝꠤ ꠢꠥꠘꠤꠀꠞ,
ꠔꠥꠝꠞꠣ ꠎꠦꠛꠟꠣ ꠎꠝꠣꠔꠅ ꠡꠞꠤꠇ ꠅꠅ,
ꠅꠃ ꠡꠝꠄ ꠔꠥꠝꠞꠣꠞ ꠝꠣꠎꠦ ꠖꠟꠣꠖꠟꠤ ꠕꠣꠇꠦ,
ꠀꠞ ꠁꠔꠣ ꠇꠤꠍꠥ ꠀꠝꠤ ꠛꠤꠡ꠆ꠛꠣꠡꠅ ꠇꠞꠤ।
১৯ ꠀꠍꠟꠦ ꠔ ꠔꠥꠝꠞꠣꠞ ꠝꠣꠎꠦ ꠝꠔꠞ ꠅꠝꠤꠟ ꠕꠣꠇꠛꠃ,
ꠎꠣꠔꠦ ꠔꠥꠝꠞꠣꠞ ꠝꠣꠎꠞ ꠈꠣꠐꠤ ꠘꠤꠈꠥꠔ ꠝꠣꠘꠡꠞ ꠙꠞꠤꠌꠄ ꠝꠤꠟꠦ।
২০ ꠢꠥꠘꠅ,
ꠔꠥꠝꠞꠣ ꠎꠦꠛꠟꠣ ꠄꠇꠈꠣꠘꠅ ꠝꠤꠟꠤꠀ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠅ,
ꠅꠃ ꠡꠝꠄ ꠔ ꠀꠟ-ꠝꠍꠤꠞ ꠝꠦꠎꠛꠣꠘꠤꠞ ꠘꠤꠅꠔꠦ ꠈꠣꠘꠤ ꠛꠤꠟꠣꠘꠤ ꠅꠄ ꠘꠣ।
২১ ꠇꠣꠞꠘ ꠔꠥꠝꠞꠣ ꠄꠇꠎꠘꠦ ꠀꠞꠇ ꠎꠘꠞ ꠛꠣꠄ ꠈꠤꠀꠟ ꠘꠣ ꠇꠞꠤꠀꠃ ꠈꠣꠘꠤ ꠈꠣꠁꠟꠣꠅ।
ꠔꠥꠝꠞꠣꠞ ꠄꠇꠎꠘꠞ ꠙꠦꠐꠅ ꠜꠥꠇ ꠕꠣꠇꠦ,
ꠀꠞ ꠀꠞꠇ ꠎꠘ ꠈꠣꠁꠀ ꠐꠣꠟ ꠅꠁꠎꠣꠄ।
২২ ꠈꠣꠘꠣ-ꠙꠤꠘꠣ ꠈꠣꠁꠛꠣꠞ ꠟꠣꠉꠤ ꠔꠥꠝꠞꠣꠞ ꠇꠥꠘꠥ ꠊꠞ-ꠛꠣꠠꠤ ꠘꠣꠁ ꠘꠤ?
ꠔꠥꠝꠞꠣ ꠁꠌ꠆ꠍꠣ ꠇꠞꠤꠀ ꠀꠟ꠆ꠟꠣꠞ ꠎꠝꠣꠔꠞꠦ ꠄꠟꠣꠝꠤ ꠇꠞꠞꠣꠄ ꠘꠤ?
ꠀꠞ ꠎꠦꠞꠣꠞ ꠈꠣꠘꠤꠞ ꠇꠥꠘ꠆ꠔꠣ ꠘꠣꠁ,
ꠔꠣꠞꠣꠞꠦ ꠡꠞꠝ ꠖꠤꠞꠣꠄ ꠘꠤ?
ꠅꠈꠘ ꠀꠝꠤ ꠀꠞ ꠇꠤꠔꠣ ꠇꠁꠔꠣꠝ?
ꠔꠥꠝꠞꠣꠞ ꠔꠣꠞꠤꠚ ꠇꠞꠔꠣꠝ ꠘꠤ?
ꠘꠣꠃꠎꠥꠛꠤꠟ꠆ꠟꠣ!
২৩ ꠀꠍꠟꠦ ꠀꠝꠤ ꠝꠣꠟꠤꠇ ꠁꠍꠣꠞ ꠉꠦꠍ ꠕꠣꠇꠤ ꠎꠦ ꠔꠣꠟꠤꠝ ꠙꠣꠁꠍꠤ,
ꠅꠃ ꠔꠣꠟꠤꠝꠃ ꠀꠝꠤ ꠔꠥꠝꠞꠣꠞꠦ ꠖꠤꠍꠤ।
ꠝꠣꠟꠤꠇ ꠁꠍꠣꠞꠦ ꠎꠦ ꠞꠣꠁꠔ ꠖꠥꠡꠝꠘꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠍꠤꠟ,
ꠢꠃ ꠞꠣꠁꠔ ꠔꠣꠁꠘ ꠈꠣꠘꠤꠞ ꠞꠥꠐꠤ ꠀꠔꠅ ꠟꠁꠟꠣ,
২৪ ꠀꠞ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ,
ꠛꠣꠖꠦ ꠅꠃ ꠞꠥꠐꠤ ꠐꠥꠇꠞꠣꠁꠀ ꠇꠁꠟꠣ,
“ꠁꠔꠣ ꠔ ꠀꠝꠣꠞ ꠡꠞꠤꠟ,
ꠅꠃ ꠡꠞꠤꠟ ꠔꠥꠝꠞꠣꠞ ꠟꠣꠉꠤ ꠛꠤꠟꠣꠁ ꠖꠦꠅꠀ ꠅꠞ,
ꠔꠦ ꠀꠝꠣꠞꠦ ꠝꠘꠅ ꠞꠣꠈꠣꠞ ꠟꠣꠉꠤ ꠅꠃꠟꠣ ꠇꠞꠤꠅ।”
২৫ ꠅꠟꠣ ꠈꠣꠅꠀꠞ ꠛꠣꠖꠦ ꠔꠣꠁꠘ ꠡꠞꠛꠔꠞ ꠙꠤꠀꠟꠣ ꠟꠁꠀ ꠇꠁꠟꠣ,
“ꠀꠝꠣꠞ ꠟꠃꠞ ꠎꠞꠤꠀꠄ ꠀꠟ꠆ꠟꠣꠞ ꠟꠉꠦ ꠝꠤꠟꠘꠞ ꠎꠦ ꠘꠄꠀ ꠃꠍꠤꠟ꠆ꠟꠣ ꠇꠣꠁꠝ ꠅꠁꠛ,
ꠅꠃ ꠙꠤꠀꠟꠣ ꠅꠁꠟ ꠄꠞ ꠘꠤꠡꠣꠘꠣ।
ꠔꠥꠝꠞꠣ ꠅꠃ ꠙꠤꠀꠟꠣ ꠕꠣꠇꠤ ꠈꠣꠅꠀꠞ ꠡꠝꠄ ꠀꠝꠣꠞꠦ ꠁꠀꠖ ꠇꠞꠣꠞ ꠟꠣꠉꠤ ꠢꠣꠝꠦꠡꠣ ꠅꠟꠣ ꠇꠞꠤꠅ।”
২৬ ꠔꠦ ꠔꠥꠝꠞꠣ ꠎꠔꠛꠣꠞ ꠅꠃ ꠞꠥꠐꠤ ꠈꠣꠁꠛꠣꠄ ꠀꠞ ꠅꠃ ꠙꠤꠀꠟꠣꠞ ꠡꠞꠛꠔ ꠈꠣꠁꠛꠣꠄ,
ꠝꠣꠟꠤꠇ ꠁꠍꠣ ꠢꠤꠞꠛꠣꠞ ꠘꠣ ꠀꠅꠀ ꠙꠞ꠆ꠎꠘ꠆ꠔ ꠅꠔꠛꠣꠞꠃ ꠔꠣꠘ ꠝꠃꠔꠞ ꠇꠕꠣ ꠄꠟꠣꠘ ꠇꠞꠞꠣꠄ।
২৭ ꠄꠞꠟꠣꠉꠤ ꠈꠣꠝ-ꠈꠦꠀꠟꠤ ꠇꠞꠤꠀ ꠇꠦꠃ ꠎꠥꠖꠤ ꠁ ꠞꠥꠐꠤ ꠈꠣꠄ ꠀꠞ ꠙꠤꠀꠟꠣꠞ ꠡꠞꠛꠔ ꠈꠣꠄ,
ꠔꠦ ꠢꠦ ꠝꠣꠟꠤꠇ ꠁꠍꠣꠞ ꠡꠞꠤꠟ ꠀꠞ ꠟꠃꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠤꠀ ꠖꠥꠡꠤ ꠛꠘꠤꠎꠣꠄ।
২৮ ꠅꠃ ꠞꠥꠐꠤ ꠈꠣꠁꠛꠣꠞ ꠀꠉꠦ ꠀꠞ ꠙꠤꠀꠟꠣꠞ ꠡꠞꠛꠔ ꠈꠣꠁꠛꠣꠞ ꠀꠉꠦ,
ꠝꠣꠘꠡꠦ ꠘꠤꠎꠞꠦ ꠎꠣꠌꠣꠁ ꠇꠞꠤ ꠖꠦꠈꠃꠇ।
২৯ ꠇꠣꠞꠘ ꠁꠔꠣ ꠈꠣꠅꠀꠞ ꠡꠝꠄ ꠢꠦ ꠎꠥꠖꠤ ꠝꠣꠟꠤꠇ ꠁꠍꠣꠞ ꠡꠞꠤꠟꠞ ꠛꠦꠙꠣꠞꠦ ꠘꠣ ꠛꠥꠎꠦ,
ꠔꠦ ꠁꠔꠣ ꠈꠣꠁꠀ ꠢꠦ ꠘꠤꠎꠞ ꠃꠙꠞꠦ ꠉꠎꠛ ꠒꠣꠇꠤꠀ ꠀꠘꠦ।
৩০ ꠅꠔꠣꠞ ꠟꠣꠉꠤꠃ ꠔꠥꠝꠞꠣꠞ ꠝꠣꠎꠞ ꠛꠃꠔ ꠝꠣꠘꠥꠡ ꠇꠝꠎꠥꠞ ꠀꠞ ꠛꠦꠝꠣꠞꠤ ꠀꠍꠂꠘ,
ꠄꠝꠘꠇꠤ ꠇꠦꠃ ꠇꠦꠃ ꠝꠞꠍꠂꠘ।
৩১ ꠀꠝꠞꠣ ꠘꠤꠎꠞ ꠛꠤꠌꠣꠞ ꠘꠤꠎꠦ ꠇꠞꠤꠟ꠆ꠟꠦ,
ꠝꠣꠟꠤꠇꠞ ꠀꠔꠞ ꠛꠤꠌꠣꠞ ꠕꠣꠇꠤ ꠞꠦꠢꠣꠁ ꠙꠣꠁꠝꠥ।
৩২ ꠅꠁꠟꠦ ꠝꠣꠟꠤꠇꠦ ꠎꠦꠛꠟꠣ ꠀꠝꠞꠣꠞ ꠛꠤꠌꠣꠞ ꠇꠞꠂꠘ,
ꠅꠃ ꠡꠝꠄ ꠔꠣꠁꠘ ꠀꠝꠞꠣꠞꠦ ꠡꠣꠡꠘ ꠇꠞꠂꠘ,
ꠎꠣꠔꠦ ꠖꠥꠘꠤꠀꠞ ꠢꠇꠟꠞ ꠟꠉꠦ ꠀꠈꠦꠞꠣꠔꠞ ꠖꠤꠘ ꠀꠝꠞꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠘꠣ ꠅꠄ।