ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠘꠣꠘꠣꠘ ꠟꠣꠈꠣꠘ ꠘꠤꠀꠝꠔ
১২
১ ꠅ ꠜꠣꠁ ꠅꠇꠟ,
ꠀꠝꠤ ꠌꠣꠁꠞꠣꠝ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠖꠣꠘ-ꠘꠤꠀꠝꠔꠞ ꠛꠦꠙꠣꠞꠦ ꠔꠥꠝꠞꠣꠞ ꠇꠥꠘ꠆ꠔꠣꠃ ꠅꠎꠣꠘꠣ ꠘꠣ ꠞꠃꠇ।
২ ꠔꠥꠝꠞꠣꠞ ꠎꠣꠘꠣ ꠀꠍꠦ,
ꠀꠉꠦ ꠎꠦꠛꠟꠣ ꠔꠥꠝꠞꠣ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣꠄ ꠘꠣ,
ꠢꠃ ꠡꠝꠄ ꠔꠥꠝꠞꠣꠞꠦ ꠅꠟꠣꠈꠣꠘ ꠖꠦꠛ-ꠖꠦꠛꠤꠞ ꠛꠣꠄ ꠐꠣꠘꠤꠀ ꠘꠦꠅꠀ ꠅꠁꠔ,
ꠎꠦꠔꠣꠄ ꠇꠥꠘ꠆ꠔꠣ ꠝꠣꠔꠤꠔ ꠙꠣꠞꠦ ꠘꠣ।
৩ ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠎꠣꠘꠣꠁꠞꠣꠝ,
ꠀꠟ꠆ꠟꠣꠞ ꠞꠥꠢꠥꠞ ꠛꠟꠦ ꠝꠣꠔꠤꠟꠦ ꠇꠥꠘꠥ ꠝꠣꠘꠡꠦ ꠁꠈꠣꠘ ꠇꠄ ꠘꠣ,
“ꠁꠍꠣꠞ ꠃꠙꠞꠦ ꠟꠣꠘ꠆ꠘꠔ ꠙꠠꠃꠇ।”
ꠀꠞ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠛꠟ ꠍꠣꠠꠣ ꠇꠦꠃ ꠇꠁꠔ-ꠅ ꠙꠣꠞꠦ ꠘꠣ,
“ꠢꠎꠞꠔ ꠁꠍꠣꠃ ꠝꠣꠟꠤꠇ।”
৪ ꠅꠃ ꠄꠇꠁ ꠙꠣꠇ ꠞꠥꠢꠥꠞ ꠘꠣꠘꠣꠘ ꠘꠝꠥꠘꠣꠞ ꠖꠣꠘ-ꠘꠤꠀꠝꠔ ꠀꠍꠦ।
৫ ꠀꠝꠞꠣ ꠘꠣꠘꠣꠘ ꠘꠤꠅꠝꠦ ꠄꠇꠁ ꠝꠣꠟꠤꠇꠞ ꠈꠦꠎꠝꠔ ꠇꠞꠤ।
৬ ꠀꠝꠞꠣ ꠙꠞꠔꠦꠇ ꠎꠘꠞꠦ ꠘꠣꠘꠣꠘ ꠘꠝꠥꠘꠣꠞ ꠇꠣꠝ-ꠇꠣꠎ ꠖꠦꠅꠀ ꠅꠁꠍꠦ,
ꠅꠁꠟꠦ ꠀꠟ꠆ꠟꠣ ꠙꠣꠇ ꠔ ꠄꠇꠎꠘꠃ,
ꠔꠣꠁꠘ ꠘꠣꠘꠣꠘ ꠃꠙꠣꠄꠄ ꠀꠝꠞꠣꠞ ꠝꠣꠎꠦ ꠇꠣꠝ ꠇꠞꠂꠘ।
৭ ꠢꠇꠟꠞ ꠚꠣꠄꠖꠣꠞ ꠟꠣꠉꠤ ꠅꠃ ꠙꠣꠇ ꠞꠥꠢꠥ ꠄꠇꠅ ꠎꠘꠞ ꠝꠣꠎꠦ ꠄꠇꠅ ꠘꠝꠥꠘꠣꠄ ꠎꠣꠁꠞ ꠅꠁꠘ।
৮ ꠅꠃ ꠙꠣꠇ ꠞꠥꠢꠥꠞ ꠛꠟꠦ ꠇꠥꠘꠥ ꠇꠥꠘꠥ ꠎꠘꠞꠦ ꠉꠤꠀꠘ-ꠛꠥꠖ꠆ꠖꠤꠞ ꠝꠣꠔ ꠝꠣꠔꠣ,
ꠀꠞ ꠇꠦꠃꠞꠞꠦ ꠀꠈꠟꠖꠣꠞꠤ ꠝꠣꠔ ꠝꠣꠔꠣꠞ ꠘꠤꠀꠝꠔ ꠖꠦꠅꠀ ꠅꠄ।
৯ ꠄꠇꠎꠘꠦ ꠅꠃ ꠞꠥꠢꠥꠞ ꠛꠟꠦ ꠉꠣꠁꠛꠤ ꠜꠞꠡꠣ ꠙꠣꠁꠘ,
ꠀꠞ ꠅꠃ ꠞꠥꠢꠥꠞ ꠛꠟꠦ ꠖꠥꠍꠞꠣ ꠎꠘꠦ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠈꠦꠝꠔꠣ ꠙꠣꠁꠘ,
১০ ꠇꠦꠃ ꠇꠦꠃ ꠇꠦꠞꠣꠝꠔꠤ ꠇꠣꠝ ꠇꠞꠣꠞ ꠈꠦꠝꠔꠣ,
ꠇꠦꠃ ꠇꠦꠃ ꠙꠤꠞꠣꠇꠤ ꠝꠣꠔꠣꠞ ꠈꠦꠝꠔꠣ,
ꠇꠦꠃ ꠇꠦꠃ ꠛꠣꠖ-ꠜꠣꠟꠣ ꠞꠥꠢꠥ ꠅꠇꠟ ꠀꠞ ꠎꠤꠘ-ꠜꠥꠔꠞꠦ ꠌꠤꠘꠣꠞ ꠈꠦꠝꠔꠣ,
ꠇꠦꠃ ꠇꠦꠃ ꠘꠣꠘꠣꠘ ꠘꠝꠥꠘꠣꠞ ꠉꠣꠁꠛꠤ ꠜꠣꠡꠣꠄ ꠝꠣꠔꠣꠞ ꠈꠦꠝꠔꠣ ꠀꠞ ꠇꠦꠃ ꠇꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠛꠣꠞ ꠈꠦꠝꠔꠣ ꠙꠣꠁꠘ।
১১ ꠁꠔꠣ ꠢꠇꠟ ꠇꠣꠝ ꠔ ꠅꠃ ꠄꠇꠁ ꠙꠣꠇ ꠞꠥꠢꠦ ꠇꠞꠂꠘ।
ꠅꠃ ꠖꠣꠘ-ꠘꠤꠀꠝꠔ ꠅꠇꠟ ꠔꠣꠘ ꠘꠤꠎꠞ ꠈꠥꠡꠤ ꠝꠣꠚꠤꠇ ꠙꠞꠔꠦꠇ ꠝꠥꠝꠤꠘꠞꠦ ꠛꠣꠐꠤꠀ ꠖꠦꠁꠘ।
ꠄꠇ ꠡꠞꠤꠟꠞ ꠝꠣꠎꠦ ꠛꠃꠔ ꠅꠋꠉ
১২ ꠅ ꠜꠣꠁꠀꠂꠘ ꠅꠇꠟ,
ꠄꠇ ꠡꠞꠤꠟꠞ ꠎꠦꠟꠣ ꠛꠃꠔ ꠅꠋꠉ ꠕꠣꠇꠦ,
ꠅꠟꠣ ꠛꠃꠔ ꠅꠋꠉ ꠝꠤꠟꠤꠀ ꠄꠇ ꠡꠞꠤꠟ ꠅꠄ,
ꠀꠟ-ꠝꠍꠤꠅ ꠔ ꠑꠤꠇ ꠅꠟꠣꠈꠣꠘ।
১৩ ꠀꠝꠞꠣ ꠛꠘꠤ ꠁꠍꠞꠣꠁꠟ ꠅꠁ ꠛꠣ ꠜꠤꠘ ꠎꠣꠔꠤ ꠅꠁ,
ꠀꠎꠣꠖ ꠛꠣ ꠉꠥꠟꠣꠝ ꠅꠁ,
ꠅꠃ ꠄꠇꠁ ꠙꠣꠇ ꠞꠥꠢꠦ ꠢꠇꠟꠞ ꠔꠞꠤꠇꠣꠛꠘ꠆ꠖꠤ ꠅꠁꠍꠦ ꠄꠇ ꠡꠞꠤꠟ ꠅꠀꠞ ꠟꠣꠉꠤ।
ꠢꠇꠟꠦꠃ ꠔ ꠅꠃ ꠄꠇꠁ ꠙꠣꠇ ꠞꠥꠢꠥ ꠙꠣꠁꠍꠤ।
১৪ ꠇꠥꠘꠥ ꠝꠣꠘꠡꠞ ꠡꠞꠤꠟꠞꠦ ꠈꠣꠟꠤ ꠄꠇ ꠅꠋꠉ ꠖꠤꠀ ꠛꠣꠘꠣꠁꠟ ꠅꠁꠍꠦ ꠘꠣ,
ꠛꠞꠋ ꠛꠃꠔ ꠅꠋꠉ ꠎꠥꠠꠣ ꠖꠦꠅꠀ ꠅꠁꠍꠦ।
১৫ ꠅꠈꠘ ꠙꠣꠅꠄ ꠎꠥꠖꠤ ꠇꠄ,
“ꠀꠝꠣꠞ ꠘꠣꠝ ꠔ ꠀꠔ ꠘꠣꠄ,
ꠔꠦ ꠀꠝꠤ ꠡꠞꠤꠟꠞ ꠅꠋꠉ-ꠅ ꠘꠣꠄ,”
ꠄꠞꠟꠣꠉꠤ ꠙꠣꠅ ꠎꠦꠘ ꠡꠞꠤꠟꠞ ꠅꠋꠉ ꠘꠣꠄ,
ꠁꠈꠣꠘ ꠔ ꠑꠤꠇ ꠘꠣꠄ।
১৬ ꠅꠃꠟꠣ ꠇꠣꠘꠦ ꠎꠥꠖꠤ ꠇꠄ,
“ꠀꠝꠣꠞ ꠘꠣꠝ ꠔ ꠌꠃꠈ ꠘꠣꠄ,
ꠔꠦ ꠀꠝꠤ ꠡꠞꠤꠟꠞ ꠅꠋꠉ-ꠅ ꠘꠣꠄ,”
ꠄꠞꠟꠣꠉꠤ ꠇꠣꠘ ꠎꠦꠘ ꠡꠞꠤꠟꠞ ꠅꠋꠉ ꠘꠣꠄ,
ꠁꠈꠣꠘ ꠔ ꠑꠤꠇ ꠘꠣꠄ।
১৭ ꠝꠣꠘꠡꠞ ꠀꠡ꠆ꠔꠣ ꠡꠞꠤꠟꠃ ꠎꠥꠖꠤ ꠌꠃꠈ ꠅꠁꠎꠤꠔ,
ꠔꠦ ꠢꠥꠘꠛꠣꠞ ꠈꠦꠝꠔꠣ ꠇꠁ ꠙꠣꠁꠟ ꠅꠘꠦ?
ꠀꠞ ꠎꠥꠖꠤ ꠡꠣꠞꠣ ꠡꠞꠤꠟꠃ ꠇꠣꠘ ꠅꠁꠎꠤꠔ,
ꠔꠦ ꠊꠦꠞꠣꠘ ꠢꠥꠋꠉꠤꠛꠣꠞ ꠈꠦꠝꠔꠣ ꠇꠁ ꠞꠁꠟ ꠅꠘꠦ?
১৮ ꠔꠦ ꠀꠟ꠆ꠟꠣꠄ ꠔꠣꠘ ꠈꠤꠀꠟ-ꠈꠥꠡꠤ ꠝꠣꠚꠤꠇ ꠡꠞꠤꠟꠞ ꠘꠣꠘꠣꠘ ꠅꠋꠉꠞꠦ ꠄꠇ ꠄꠇ ꠇꠞꠤ ꠢꠣꠎꠣꠁꠍꠂꠘ।
১৯ ꠢꠇꠟ ꠅꠋꠉ ꠎꠥꠖꠤ ꠄꠇꠟꠣꠈꠣꠘ ꠅꠁꠎꠤꠔ,
ꠔꠣꠁꠟꠦ ꠡꠞꠤꠟꠞ ꠇꠥꠘ ꠢꠣꠟꠔ ꠅꠁꠟ ꠅꠘꠦ?
২০ ꠡꠞꠤꠟꠅ ꠛꠃꠔ ꠅꠋꠉ ꠀꠍꠦ,
ꠔꠣ-ꠅ ꠡꠞꠤꠟ ꠔ ꠄꠇꠐꠣꠃ।
২১ ꠌꠃꠈꠦ ꠀꠔꠞꠦ ꠇꠁꠔ ꠙꠣꠞꠦ ꠘꠣ,
“ꠔꠥꠝꠣꠞꠦ ꠀꠝꠣꠞ ꠖꠞꠇꠣꠞ ꠘꠣꠝ,”
ꠀꠞ ꠝꠣꠕꠣꠄ ꠖꠥꠁꠅ ꠙꠣꠅꠞꠦ ꠇꠁꠔ ꠙꠣꠞꠦ ꠘꠣ,
“ꠔꠥꠝꠞꠣꠞꠦ ꠀꠝꠣꠞ ꠖꠞꠇꠣꠞ ꠘꠣꠁ।”
২২ ꠀꠍꠟꠦ ꠡꠞꠤꠟꠞ ꠎꠦ ꠅꠋꠉꠞꠦ ꠇꠝꠎꠥꠞ ꠝꠘꠅ ꠅꠄ,
ꠅꠉꠥꠁꠘꠃ ꠛꠦꠡꠤ ꠖꠞꠇꠣꠞꠤ।
২৩ ꠡꠞꠤꠟꠞ ꠎꠦ ꠡꠞꠝꠞ ꠅꠋꠉꠞꠦ ꠀꠝꠞꠣ ꠢꠥꠞꠥ-ꠝꠥꠞꠥ ꠝꠘꠅ ꠇꠞꠤ,
ꠁꠔꠣꠞꠦ ꠀꠝꠞꠣ ꠛꠦꠡꠤ ꠖꠣꠝ ꠖꠦꠁ,
ꠝꠣꠘꠤ ꠎꠦ ꠅꠋꠉꠞꠦ ꠛꠣꠞꠦ ꠖꠦꠈꠣꠘꠤ ꠎꠣꠄ ꠘꠣ,
ꠁꠔꠣꠞꠦ ꠀꠝꠞꠣ ꠁꠎ꠆ꠎꠔ ꠇꠞꠤꠀ ꠉꠥꠞꠤꠀ ꠞꠣꠈꠤ।
২৪ ꠅꠁꠟꠦ ꠎꠦ ꠅꠋꠉꠞꠦ ꠛꠣꠞꠦ ꠖꠦꠈꠣꠘꠤ ꠎꠣꠄ,
ꠁꠔꠣꠞꠦ ꠉꠥꠞꠤꠀ ꠞꠣꠈꠣꠞ ꠖꠞꠇꠣꠞ ꠅꠄ ꠘꠣ।
ꠀꠍꠟꠦ ꠀꠟ꠆ꠟꠣꠄ ꠅꠃ ꠢꠥꠞꠥ-ꠝꠥꠞꠥ ꠀꠞ ꠇꠝꠎꠥꠞ ꠅꠋꠉꠞꠦ ꠛꠦꠡꠤ ꠁꠎ꠆ꠎꠔ ꠖꠤꠀ,
ꠢꠇꠟ ꠅꠋꠉꠞꠦ ꠎꠥꠠꠣ ꠟꠣꠉꠣꠁꠀ ꠄꠇ ꠡꠞꠤꠟ ꠛꠣꠘꠣꠁꠍꠂꠘ,
২৫ ꠎꠣꠔꠦ ꠡꠞꠤꠟ ꠜꠣꠉꠣ-ꠜꠣꠉꠤ ꠘꠣ ꠅꠄ,
ꠛꠞꠋ ꠄꠇ ꠅꠋꠉꠄ ꠀꠞꠇ ꠅꠋꠉꠞꠦ ꠘꠤꠎꠞ ꠟꠣꠈꠣꠘ ꠝꠘꠅ ꠇꠞꠦ।
২৬ ꠡꠞꠤꠟꠞ ꠄꠇ ꠅꠋꠉꠞ ꠎꠥꠖꠤ ꠇꠡ꠆ꠐ ꠅꠄ,
ꠔꠦ ꠡꠣꠞꠣ ꠡꠞꠤꠟꠦ ꠇꠡ꠆ꠐ ꠙꠣꠄ,
ꠀꠞ ꠄꠇ ꠅꠋꠉꠦ ꠁꠎ꠆ꠎꠔ ꠙꠣꠁꠟꠦ,
ꠀꠡ꠆ꠔꠣ ꠡꠞꠤꠟꠦ ꠈꠥꠡꠤ-ꠛꠣꠡꠤ ꠇꠞꠦ।
২৭ ꠔꠦ ꠔꠥꠝꠞꠣꠃ ꠅꠁꠟꠣꠄ ꠀꠟ-ꠝꠍꠤꠞ ꠡꠞꠤꠟ,
ꠔꠥꠝꠞꠣ ꠄꠇꠅ ꠎꠘ ꠅꠃ ꠡꠞꠤꠟꠞ ꠄꠇꠅ ꠅꠋꠉ।
২৮ ꠎꠣꠘꠅ ꠘꠤ,
ꠀꠟ꠆ꠟꠣꠄ ꠔ ꠎꠝꠣꠔꠞ ꠜꠤꠔꠞꠦ ꠙꠄꠟꠣ ꠍꠣꠢꠣꠛꠤ,
ꠛꠣꠖꠦ ꠙꠤꠞꠣꠇꠤ ꠝꠣꠔ ꠝꠣꠔꠞꠣ,
ꠛꠣꠖꠦ ꠃꠡ꠆ꠔꠣꠖ ꠅꠇꠟ ꠛꠅꠀꠁꠟ ꠇꠞꠍꠂꠘ।
ꠄꠞꠛꠣꠖꠦ ꠛꠅꠀꠁꠟ ꠇꠞꠍꠂꠘ ꠎꠦꠞꠣ ꠇꠦꠞꠣꠝꠔꠤ ꠇꠣꠝ ꠇꠞꠞꠣ,
ꠛꠦꠝꠣꠞ ꠜꠣꠟꠣ ꠇꠞꠞꠣ,
ꠡꠣꠁꠎ꠆ꠎ-ꠡꠢꠣꠄꠔꠣ ꠇꠞꠞꠣ,
ꠁꠍꠣꠄꠁ ꠎꠝꠣꠔꠞꠦ ꠌꠣꠟꠣꠅꠞꠣ ꠀꠞ ꠘꠣꠘꠣꠘ ꠉꠣꠁꠛꠤ ꠜꠣꠡꠣꠄ ꠝꠣꠔꠞꠣ ꠎꠘ।
২৯ ꠔꠦ ꠄꠞꠣ ꠢꠇꠟꠦꠃ ꠇꠥꠘꠥ ꠍꠣꠢꠣꠛꠤ ꠙꠖ ꠙꠣꠁꠍꠂꠘ ꠘꠤ?
ꠢꠇꠟꠦꠃ ꠙꠤꠞꠣꠇꠤ ꠝꠣꠔꠂꠘ ꠘꠤ?
ꠢꠇꠟꠃ ꠃꠡ꠆ꠔꠣꠖ ꠘꠤ?
ꠀꠞ ꠢꠇꠟꠦ ꠇꠥꠘꠥ ꠇꠦꠞꠣꠝꠔꠤ ꠇꠣꠝ ꠇꠞꠣꠞ ꠈꠦꠝꠔꠣ ꠙꠣꠁꠍꠂꠘ ꠘꠤ?
৩০ ꠢꠇꠟꠦ ꠇꠥꠘꠥ ꠛꠦꠝꠣꠞ ꠡꠤꠚꠣ ꠇꠞꠔꠣ ꠙꠣꠞꠂꠘ ꠘꠤ?
ꠢꠇꠟꠦꠃ ꠉꠣꠁꠛꠤ ꠜꠣꠡꠣꠄ ꠝꠣꠔꠂꠘ ꠘꠤ?
ꠢꠇꠟꠦꠃ ꠁꠔꠣꠞ ꠝꠣꠘꠤ ꠛꠥꠎꠣꠁꠀ ꠖꠤꠔꠣ ꠙꠣꠞꠂꠘ ꠘꠤ?
ꠘꠤꠌ꠆ꠌꠄ ꠘꠣ।
৩১ ꠔꠣ-ꠅ ꠀꠝꠤ ꠇꠁꠞꠣꠝ,
ꠔꠥꠝꠞꠣ ꠢꠇꠟ ꠕꠣꠇꠤ ꠖꠣꠝꠤ ꠘꠤꠀꠝꠔ ꠅꠇꠟ ꠙꠣꠅꠀꠞ ꠟꠣꠉꠤ ꠀꠡꠤꠇ ꠅꠅ।
ꠀꠞ ꠈꠤꠀꠟ ꠇꠞꠅ,
ꠅꠈꠘ ꠀꠝꠤ ꠔꠥꠝꠞꠣꠞꠦ ꠀꠞꠅ ꠜꠣꠟꠣ ꠄꠇꠈꠣꠘ ꠙꠕ ꠖꠦꠈꠣꠁꠞꠣꠝ।