ꠎꠝꠣꠔꠦ ꠢꠎꠞꠔ ꠙꠣꠃꠟꠥꠍꠞꠦ ꠇꠛꠥꠟ ꠇꠞꠟꠣ
২
১ ꠌꠃꠖ꠆ꠖ ꠛꠞꠍ ꠛꠣꠖꠦ ꠛꠣꠞꠘꠣꠛꠣꠍꠞ ꠟꠉꠦ ꠅꠁꠀ ꠀꠝꠤ ꠢꠤꠞꠛꠣꠞ ꠎꠦꠞꠥꠎꠣꠟꠦꠝ ꠉꠦꠟꠣꠝ,
ꠅꠃ ꠡꠝꠄ ꠔꠤꠔꠣꠍꠞꠦꠅ ꠟꠉꠦ ꠘꠤꠟꠣꠝ।
২ ꠀꠟ꠆ꠟꠣꠁ ꠢꠥꠇꠥꠝꠦ ꠀꠝꠤ ꠢꠘꠅ ꠉꠦꠟꠣꠝ।
ꠉꠤꠀ ꠢꠘꠞ ꠜꠣꠁꠀꠂꠘꠞꠦ ꠇꠁꠟꠣꠝ,
ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠀꠝꠤ ꠇꠥꠘ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤ।
ꠅꠁꠟꠦ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠞꠦ ꠁꠔꠣ ꠘꠤꠞꠣꠟꠣꠄ ꠇꠁꠟꠣꠝ,
ꠀꠝꠣꠞ ꠌꠤꠘ꠆ꠔꠣ ꠀꠍꠤꠟ,
ꠀꠝꠣꠞ ꠅꠔ ꠖꠃꠠꠞ ꠇꠣꠝ ꠎꠣꠔꠦ ꠛꠦꠇꠣꠝꠣ ꠘꠣ ꠎꠣꠄ।
৩ ꠀꠝꠣꠞ ꠟꠉꠞ ꠜꠣꠁ ꠔꠤꠔꠣꠍ ꠅ-ꠁꠢꠥꠖꠤ ꠅꠁꠟꠦꠅ,
ꠔꠣꠘ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠟꠣꠉꠤ ꠄꠞꠣ ꠇꠥꠘꠥ ꠌꠣꠙ ꠖꠤꠍꠦ ꠘꠣ।
৪ ꠀꠍꠟꠦ ꠁꠝꠣꠘꠖꠣꠞ ꠖꠟꠞ ꠜꠤꠔꠞꠦ ꠇꠄꠎꠘ ꠝꠥꠘꠣꠚꠤꠇ ꠢꠣꠝꠣꠘꠤꠄ ꠅꠟꠣ ꠅꠁꠟ।
ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠣꠄ ꠀꠝꠞꠣ ꠎꠦ ꠡ꠆ꠛꠣꠗꠤꠘꠔꠣ ꠙꠣꠁꠍꠤ,
ꠅꠔꠣꠞ ꠈꠥꠔ ꠗꠞꠣꠞ ꠟꠣꠉꠤꠃ ꠄꠞꠣ ꠢꠣꠝꠣꠁꠍꠤꠟ,
ꠎꠣꠔꠦ ꠀꠝꠞꠣꠞꠦ ꠝꠥꠍꠣꠞ ꠡꠞꠤꠅꠔꠞ ꠉꠥꠟꠣꠝꠤꠔ ꠞꠣꠈꠔ ꠙꠣꠞꠦ।
৫ ꠅꠁꠟꠦ ꠀꠝꠞꠣ ꠄꠇ ꠙꠟꠇꠞ ꠟꠣꠉꠤꠅ ꠔꠣꠞꠣꠞ ꠉꠥꠟꠣꠝꠤ ꠝꠣꠘꠟꠣꠝ ꠘꠣ,
ꠎꠣꠔꠦ ꠈꠥꠡ-ꠈꠛꠞꠤꠞ ꠢꠇꠤꠇꠔꠤ ꠔꠥꠝꠞꠣꠞ ꠉꠦꠍꠦ ꠇꠣꠁꠝ ꠞꠄ।
৬ ꠀꠞ ꠎꠝꠣꠔꠞ ꠘꠣꠝ-ꠒꠣꠇꠤ ꠎꠘ ꠅꠇꠟꠞ ꠟꠉꠦ ꠀꠝꠤ ꠝꠣꠔꠤꠟꠣꠝ,
ꠄꠞꠣ ꠎꠦꠁꠘꠃ ꠅꠁꠘ ꠘꠣ ꠇꠦꠘꠦ,
ꠁꠔꠣꠄ ꠀꠝꠣꠞ ꠇꠥꠘ꠆ꠔꠣꠃ ꠎꠣꠄ ꠀꠄ ꠘꠣ,
ꠀꠟ꠆ꠟꠣꠄ ꠔ ꠝꠥꠈ ꠌꠣꠁꠀ ꠝꠍꠟꠝꠣꠘꠤ ꠇꠞꠂꠘ ꠘꠣ।
ꠄꠞꠣ ꠔ ꠀꠝꠣꠞꠦ ꠘꠄꠀ ꠇꠥꠘ꠆ꠔꠣ ꠖꠤꠍꠂꠘ ꠘꠣ,
৭ ꠛꠞꠋ ꠔꠣꠞꠣ ꠛꠥꠎꠤꠟꠤꠟꠣ,
ꠁꠢꠥꠖꠤ ꠡꠝꠣꠎꠞ ꠉꠦꠍꠦ ꠈꠥꠡ-ꠈꠛꠞꠤ ꠔꠛꠟꠤꠉꠅ ꠙꠤꠔꠞꠞꠦ ꠎꠦꠟꠣ ꠖꠣꠄꠁꠔ꠆ꠔ ꠖꠦꠅꠀ ꠅꠁꠍꠤꠟ,
ꠅꠃ ꠟꠣꠈꠣꠘ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ ꠔꠛꠟꠤꠉꠞ ꠖꠣꠄꠁꠔ꠆ꠔ ꠀꠝꠣꠞꠦ ꠖꠦꠅꠀ ꠅꠁꠍꠦ।
৮ ꠔꠣꠞꠣ ꠅꠈꠣꠘ ꠖꠦꠈꠟꠣ,
ꠁꠢꠥꠖꠤ ꠅꠇꠟꠞ ꠉꠦꠍꠦ ꠍꠣꠢꠣꠛꠤ-ꠇꠣꠝꠅ ꠙꠤꠔꠞꠞꠦ ꠎꠦꠁꠘ ꠌꠣꠟꠣꠁꠍꠂꠘ,
ꠢꠃ ꠀꠟ꠆ꠟꠣꠄꠃ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠝꠣꠎꠦ ꠍꠣꠢꠣꠛꠤ-ꠇꠣꠝꠅ ꠀꠝꠣꠞꠦ ꠌꠣꠟꠣꠁꠍꠂꠘ।
৯ ꠅꠈꠣꠘ ꠖꠦꠈꠤꠀ ꠎꠝꠣꠔꠞ ꠉꠁꠘ꠆ꠘ-ꠝꠣꠁꠘ꠆ꠘ ꠝꠥꠞꠛ꠆ꠛꠤ,
ꠝꠣꠘꠤ ꠁꠀꠇꠥꠛ,
ꠙꠤꠔꠞ ꠀꠞ ꠢꠣꠘ꠆ꠘꠣꠘꠦ ꠛꠥꠎꠤꠟꠤꠟꠣ,
ꠀꠟ꠆ꠟꠣꠞ ꠔꠞꠚ ꠕꠘꠦ ꠀꠝꠤ ꠈꠣꠍ ꠞꠢꠝꠔ ꠙꠣꠁꠍꠤ।
ꠔꠦꠃ ꠔꠣꠞꠣꠅ ꠀꠝꠞꠣꠞ ꠟꠉꠦ ꠄꠇꠝꠔ ꠀꠍꠂꠘ ꠅꠈꠣꠘ ꠖꠦꠈꠣꠁꠔꠣ ꠇꠞꠤ,
ꠀꠝꠣꠞ ꠀꠞ ꠛꠣꠞꠘꠣꠛꠣꠍꠞ ꠟꠉꠦ ꠔꠣꠞꠣꠞ ꠀꠔ ꠝꠤꠟꠣꠁꠟꠣ।
ꠀꠞ ꠅꠃ ꠝꠣꠔꠦ ꠞꠣꠎꠤ ꠅꠁꠟꠣ,
ꠀꠝꠞꠣ ꠔꠛꠟꠤꠉ ꠇꠞꠝꠥ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞ ꠉꠦꠍꠦ,
ꠅꠁꠟꠦ ꠔꠣꠞꠣ ꠔꠛꠟꠤꠉ ꠇꠞꠛꠣ ꠁꠢꠥꠖꠤ ꠡꠝꠣꠎꠞ ꠉꠦꠍꠦ।
১০ ꠔꠣꠞꠣ ꠈꠣꠟꠤ ꠄꠇꠈꠣꠘ ꠀꠛꠖꠣꠞ ꠇꠞꠟꠣ,
ꠀꠝꠞꠣ ꠎꠣꠘꠥ ꠎꠝꠣꠔꠞ ꠉꠞꠤꠛ ꠅꠇꠟꠞ ꠛꠣꠄ ꠈꠤꠀꠟ ꠞꠣꠈꠤ।
ꠀꠍꠟꠦ ꠀꠝꠣꠞꠅ ꠅꠟꠣ ꠇꠞꠣꠞ ꠈꠥꠛ ꠁꠌ꠆ꠍꠣ ꠀꠍꠤꠟ।
ꠢꠎꠞꠔ ꠙꠣꠃꠟꠥꠍ ꠀꠞ ꠙꠤꠔꠞꠦ ꠅꠝꠤꠟ
১১ ꠛꠣꠖꠦ ꠙꠤꠔꠞ ꠀꠘ꠆ꠔꠤꠅꠈꠤꠀ ꠐꠣꠃꠘꠅ ꠀꠁꠟꠣ।
ꠄꠞꠝꠣꠎꠦ ꠔꠣꠁꠘ ꠄꠇ ꠛꠠ ꠅꠁꠘ꠆ꠘꠣꠄ ꠇꠞꠣꠄ ꠀꠝꠤ ꠔꠣꠘ ꠝꠥꠈꠞ ꠍꠣꠝꠘꠦꠃ ꠀꠙꠔ꠆ꠔꠤ ꠎꠣꠘꠣꠁꠟꠣꠝ।
১২ ꠅꠃ ꠡꠝꠄ ꠁꠢꠥꠖꠤ ꠕꠣꠇꠤ ꠝꠥꠝꠤꠘ ꠅꠀ ꠄꠇꠖꠟ ꠝꠣꠘꠡꠦ ꠚꠔꠥꠀ ꠖꠤꠔꠣ,
ꠅꠁꠘ꠆ꠘꠣꠁꠘ꠆ꠘ ꠎꠣꠔꠤ ꠕꠣꠇꠤ ꠎꠦꠞꠣ ꠁꠍꠣꠞ ꠃꠝ꠆ꠝꠔ ꠅꠄ,
ꠔꠣꠞꠣꠞ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠎꠞꠥꠞ।
ꠅꠃ ꠚꠔꠥꠀ ꠖꠟꠞ ꠇꠤꠍꠥ ꠝꠣꠘꠥꠡ ꠍꠣꠢꠣꠛꠤ ꠁꠀꠇꠥꠛꠞ ꠉꠦꠍ ꠕꠣꠇꠤ ꠀꠁꠛꠣꠞ ꠀꠉꠦ ꠙꠤꠔꠞꠦ ꠅꠁꠘ꠆ꠘ ꠎꠣꠔꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠤ ꠈꠣꠘꠣ-ꠖꠣꠘꠣ ꠈꠣꠁꠔꠣ।
ꠁꠐꠣ ꠔ ꠈꠥꠛ ꠜꠣꠟꠣ।
ꠅꠁꠟꠦ ꠄꠞꠣ ꠀꠅꠀꠄ ꠄꠞꠣꠞ ꠒꠞꠦ ꠔꠣꠁꠘ ꠅꠃ ꠜꠣꠟꠣ ꠇꠣꠝ ꠛꠘ꠆ꠖ ꠇꠞꠤꠟ꠆ꠟꠣ।
ꠅꠇꠐꠣꠃ ꠛꠠ ꠅꠁꠘ꠆ꠘꠣꠄ।
১৩ ꠀꠘ꠆ꠔꠤꠅꠈꠤꠀꠞ ꠀꠞꠅ ꠛꠃꠔ ꠁꠢꠥꠖꠤ ꠝꠥꠝꠤꠘꠦꠅ ꠙꠤꠔꠞꠞ ꠟꠉꠦ ꠅꠃ ꠜꠘ꠆ꠒꠣꠝꠤꠔ ꠡꠣꠝꠤꠟ ꠅꠁꠟꠣ।
ꠢꠦꠡ-ꠝꠦꠡ ꠛꠣꠞꠘꠣꠛꠣꠍꠅ ꠔꠣꠞꠣꠞ ꠟꠉꠦ ꠜꠥꠟ ꠙꠕꠦ ꠙꠣꠅ ꠖꠤꠟꠣꠁꠟꠣ।
১৪ ꠅꠁꠟꠦ ꠀꠝꠤ ꠎꠦꠛꠟꠣ ꠖꠦꠈꠟꠣꠝ,
ꠈꠥꠡ-ꠈꠛꠞꠤꠞ ꠢꠇꠤꠇꠔꠞ ꠟꠉꠦ ꠔꠣꠞꠣꠞ ꠇꠣꠝ-ꠇꠣꠎ ꠝꠤꠟꠦꠞ ꠘꠣ,
ꠅꠃ ꠢꠇꠟꠞ ꠍꠣꠝꠘꠦ ꠙꠤꠔꠞꠞꠦ ꠇꠁꠟꠣꠝ,
“ꠀꠙꠘꠦ ꠁꠢꠥꠖꠤ ꠅꠁꠀꠅ ꠎꠥꠖꠤ ꠁꠢꠥꠖꠤ ꠘꠤꠅꠝ ꠛꠣꠖ ꠖꠤꠀ ꠅꠁꠘ꠆ꠘ ꠎꠣꠔꠤꠞ ꠟꠣꠈꠣꠘ ꠌꠟꠂꠘ,
ꠔꠦ ꠅꠁꠘ꠆ꠘ ꠎꠣꠔꠤꠞꠦ ꠇꠦꠘꠦ ꠅꠈꠘ ꠁꠢꠥꠖꠤ ꠘꠤꠅꠝ ꠝꠣꠘꠣꠞ ꠔꠣꠉꠤꠖ ꠖꠤꠞꠣ?
১৫ ꠀꠙꠘꠦ-ꠀꠝꠤ ꠖꠥꠁꠅꠎꠘꠃ ꠔ ꠁꠢꠥꠖꠤ,
ꠘꠣꠚꠞꠝꠣꠘ ꠅ-ꠁꠢꠥꠖꠤ ꠇꠥꠟꠅ ꠎꠘꠝꠤꠍꠤ ꠘꠣ।
১৬ ꠄꠞꠛꠣꠖꠦꠅ ꠔ ꠀꠝꠞꠣ ꠎꠣꠘꠤ,
ꠝꠥꠍꠣꠞ ꠡꠞꠤꠅꠔ ꠀꠝꠟ ꠇꠞꠟꠦꠅ ꠀꠟ꠆ꠟꠣꠄ ꠝꠣꠘꠡꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ ꠘꠣ,
ꠈꠣꠟꠤ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ।
ꠄꠞꠖꠣꠄꠃ ꠀꠝꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠤ,
ꠎꠣꠔꠦ ꠡꠞꠤꠅꠔꠞ ꠀꠝꠟꠦ ꠘꠣꠄ,
ꠅꠁꠟꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ।
ꠇꠣꠞꠘ ꠡꠞꠤꠅꠔ ꠀꠝꠟ ꠇꠞꠟꠦꠅ ꠇꠥꠘꠥ ꠝꠣꠘꠡꠞꠦ ꠖꠤꠘꠖꠣꠞ ꠇꠁꠀ ꠉꠘꠣ ꠅꠁꠔ ꠘꠣꠄ।
১৭ ꠅꠁꠟꠦ ꠅꠈꠘ ꠀꠝꠞꠣ ꠀꠟ-ꠝꠍꠤꠞ ꠔꠞꠤꠇꠣꠄ ꠖꠤꠘꠖꠣꠞ ꠛꠘꠔꠣꠝ ꠌꠣꠁꠞꠣꠝ ꠇꠞꠤ,
ꠁꠢꠥꠖꠤ ꠡꠞꠣꠞ ꠘꠤꠅꠝ-ꠇꠣꠘꠥꠘ ꠛꠣꠖ ꠖꠤꠟꠣꠁꠍꠤ।
ꠄꠔꠦ ꠎꠥꠖꠤ ꠇꠥꠘꠥ ꠇꠥꠘꠥ ꠎꠘꠦ ꠀꠝꠞꠣꠞꠦ ꠘꠣꠚꠞꠝꠣꠘ ꠇꠂꠘ,
ꠔꠦ ꠇꠤꠔꠣ ꠛꠥꠎꠣ ꠎꠣꠄ,
ꠀꠟ-ꠝꠍꠤꠄ ꠇꠥꠘꠥ ꠉꠥꠘꠣꠞ ꠈꠦꠎꠝꠔ ꠇꠞꠂꠘ ꠘꠤ?
ꠘꠣꠃꠎꠥꠛꠤꠟ꠆ꠟꠣ,
ꠘꠤꠌꠄ ꠘꠣ।
১৮ ꠀꠝꠤ ꠘꠤꠎꠦ ꠎꠦꠔꠣ ꠛꠣꠖ ꠖꠤꠟꠣꠁꠍꠤ,
ꠅꠔꠣ ꠎꠥꠖꠤ ꠢꠤꠞꠛꠣꠞ ꠇꠞꠤ,
ꠔꠦ ꠔ ꠘꠤꠎꠦꠃ ꠘꠤꠎꠞꠦ ꠖꠥꠡꠤ ꠙꠞꠝꠣꠘ ꠇꠞꠤꠀꠞ।
১৯ ꠡꠞꠤꠅꠔꠞ ꠘꠤꠅꠝꠦ ꠡꠞꠤꠅꠔꠞ ꠀꠔꠅꠃ ꠀꠝꠣꠞ ꠝꠃꠔ ꠅꠁꠉꠦꠍꠦ,
ꠎꠣꠔꠦ ꠀꠟ꠆ꠟꠣꠞ ꠔꠣꠞꠤꠚꠞ ꠟꠣꠉꠤ ꠀꠝꠤ ꠎꠤꠘ꠆ꠖꠣ ꠞꠁ।
২০ ꠔꠦ ꠗꠞꠤꠟꠣꠅ,
ꠀꠝꠣꠞꠦ ꠀꠟ-ꠝꠍꠤꠞ ꠟꠉꠦ ꠉꠣꠍꠅ ꠟꠐꠇꠣꠁꠀ ꠇꠣꠔꠟ ꠇꠞꠣ ꠅꠁꠍꠦ।
ꠀꠝꠤ ꠀꠞ ꠎꠤꠘ꠆ꠖꠣ ꠘꠣꠄ,
ꠀꠝꠣꠞ ꠇꠣꠄꠀꠞ ꠝꠣꠎꠦ ꠀꠟ-ꠝꠍꠤꠃ ꠎꠤꠘ꠆ꠖꠣ ꠀꠍꠂꠘ।
ꠅꠃ ꠇꠣꠄꠀꠄ ꠅꠈꠘ ꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠞꠣꠝ,
ꠁꠐꠣ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘꠞ ꠛꠟꠦ ꠇꠣꠐꠣꠁꠞꠣꠝ।
ꠔꠣꠁꠘ ꠀꠝꠣꠞꠦ ꠝꠢꠛ꠆ꠛꠔ ꠇꠞꠤꠀ,
ꠀꠝꠣꠞꠦ ꠔꠞꠣꠘꠤꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
২১ ꠀꠟ꠆ꠟꠣ ꠙꠣꠇꠞ ꠁ ꠞꠢꠝꠔ ꠀꠝꠤ ꠛꠤꠚꠟ ꠅꠁꠔꠦ ꠖꠤꠔꠣꠝ ꠘꠣꠄ।
ꠡꠞꠤꠅꠔ ꠀꠝꠟ ꠇꠞꠤꠀ ꠎꠥꠖꠤ ꠝꠣꠘꠥꠡ ꠖꠤꠘꠖꠣꠞ ꠛꠘꠤꠎꠤꠔ,
ꠔꠦ ꠀꠟ-ꠝꠍꠤ ꠈꠣꠝꠈꠣ ꠇꠥꠞꠛꠣꠘꠤ ꠅꠁꠟꠣ ꠘꠤ?