ꠡꠞꠤꠅꠔ ꠘꠣ ꠞꠢꠝꠔ?
৩
১ ꠅ ꠛꠦꠀꠈꠟ ꠉꠣꠟꠣꠔꠤ ꠅꠇꠟ,
ꠔꠥꠝꠞꠣꠞꠦ ꠇꠦꠉꠤꠄ ꠎꠣꠖꠥ ꠇꠞꠍꠦ?
ꠔꠥꠝꠞꠣꠞ ꠉꠦꠍꠦ ꠔ ꠈꠥꠟꠣ-ꠝꠦꠟꠣ ꠀꠞ ꠍꠣꠚ-ꠍꠚꠣ ꠔꠛꠟꠤꠉ ꠇꠞꠣ ꠅꠁꠍꠦ,
ꠁꠍꠣ ꠀꠟ-ꠝꠍꠤꠞꠦ ꠉꠣꠍꠅ ꠟꠐꠇꠣꠁꠀ ꠇꠣꠔꠟ ꠇꠞꠣ ꠅꠁꠍꠤꠟ।
২ ꠔꠦ ꠅꠈꠘ ꠀꠝꠤ ꠈꠣꠟꠤ ꠅꠃ ꠇꠕꠣꠈꠣꠘ ꠎꠣꠘꠔꠣꠝ ꠌꠣꠁꠞꠣꠝ,
ꠔꠥꠝꠞꠣ ꠎꠦ ꠙꠣꠇ ꠞꠥꠢꠥ ꠙꠣꠁꠍ,
ꠁꠐꠣ ꠇꠤꠔꠣ ꠝꠥꠍꠣꠞ ꠡꠞꠤꠅꠔ ꠀꠝꠟ ꠇꠞꠤꠀ ꠙꠣꠁꠍ ꠘꠤ?
ꠘꠣ ꠈꠥꠡ-ꠈꠛꠞꠤ ꠢꠥꠘꠤꠀ ꠁꠝꠣꠘ ꠀꠘꠣꠄ ꠙꠣꠁꠍ?
৩ ꠔꠥꠝꠞꠣ ꠇꠥꠘꠥ ꠅꠟꠣ ꠛꠦꠀꠈꠟ ꠘꠤ?
ꠙꠣꠇ ꠞꠥꠢꠥꠞ ꠛꠟꠦ ꠘꠄꠀ ꠎꠤꠘ꠆ꠖꠦꠉꠤ ꠡꠥꠞꠥ ꠇꠞꠤꠀ,
ꠅꠈꠘ ꠘꠤꠎꠞ ꠛꠟꠦ ꠇꠣꠝꠤꠀꠛ ꠅꠁꠔꠣꠄ ꠌꠣꠁꠞꠣꠄ?
৪ ꠔꠦ ꠈꠣꠝꠈꠣ ꠅꠔ ꠖꠥꠈ-ꠇꠡ꠆ꠐ ꠇꠞꠟꠣꠄ ꠘꠤ?
ꠀꠝꠤ ꠀꠡꠣ ꠇꠞꠤ ꠔꠥꠝꠞꠣꠞ ꠁ ꠇꠡ꠆ꠐ ꠝꠥꠐꠦꠃ ꠛꠦꠢꠥꠖꠣ ꠉꠦꠍꠦ ꠘꠣ।
৫ ꠀꠁꠌ꠆ꠍꠣ,
ꠀꠟ꠆ꠟꠣꠄ ꠔ ꠔꠥꠝꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠍꠂꠘ,
ꠀꠞ ꠔꠥꠝꠞꠣꠞ ꠝꠣꠎꠦ ꠛꠃꠔ ꠇꠦꠞꠣꠝꠔꠤ ꠇꠣꠝꠅ ꠇꠞꠍꠂꠘ।
ꠔꠦ ꠇꠅ ꠌꠣꠁꠘ,
ꠔꠣꠘ ꠡꠞꠤꠅꠔ ꠝꠣꠘꠣꠄ ꠔꠣꠁꠘ ꠁꠔꠣ ꠇꠞꠟꠣ ꠘꠤ?
ꠘꠣ ꠈꠥꠡ-ꠈꠛꠞꠤ ꠢꠥꠘꠤꠀ ꠔꠥꠝꠞꠣ ꠁꠝꠣꠘ ꠀꠘꠣꠄ ꠁꠔꠣ ꠇꠞꠍꠂꠘ?
৬ ꠁꠛ꠆ꠞꠣꠢꠤꠝ ꠘꠛꠤꠞ ꠛꠦꠙꠣꠞꠈꠣꠘ ꠖꠦꠈꠅ,
ꠀꠟ꠆ꠟꠣꠞ ꠇꠣꠟꠣꠝꠅ ꠀꠍꠦ,
“ꠁꠛ꠆ꠞꠣꠢꠤꠝꠦ ꠀꠟ꠆ꠟꠣꠞ ꠅꠀꠖꠣꠄ ꠁꠝꠣꠘ ꠀꠘꠣꠄ,
ꠀꠟ꠆ꠟꠣꠄ ꠔꠣꠘꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠟꠣ।”
৭ ꠄꠞꠖꠣꠄ ꠔꠥꠝꠞꠣꠅ ꠡꠝꠎꠤꠟꠣꠅ,
ꠎꠦꠞꠣ ꠁꠝꠣꠘ ꠀꠘꠦ,
ꠔꠣꠞꠣꠃ ꠁꠛ꠆ꠞꠣꠢꠤꠝꠞ ꠀꠍꠟ ꠀꠅꠟꠣꠖ।
৮ ꠀꠍꠝꠣꠘꠤ ꠇꠤꠔꠣꠛꠅ ꠀꠉꠦꠃ ꠛꠣꠔꠣꠁꠟ ꠅꠁꠍꠦ,
ꠀꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠟꠦꠃ ꠔ ꠔꠣꠁꠘ ꠅꠁꠘ꠆ꠘꠣꠁꠘ꠆ꠘ ꠎꠣꠔꠤꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ।
ꠁꠛ꠆ꠞꠣꠢꠤꠝꠞ ꠉꠦꠍꠦ ꠅꠃ ꠀꠄꠀꠔꠞ ꠈꠥꠡ-ꠈꠛꠞꠤ ꠀꠉꠦꠃ ꠎꠣꠘꠣꠁꠟ ꠅꠁꠍꠤꠟ,
“ꠔꠥꠝꠣꠞ ꠃꠍꠤꠟ꠆ꠟꠣꠄ ꠖꠥꠘꠤꠀꠞ ꠔꠣꠝꠣꠝ ꠎꠣꠔꠤꠄ ꠛꠞꠇꠔ ꠙꠣꠁꠛꠣ।”
৯ ꠔꠦ ꠛꠥꠎꠣ ꠎꠣꠄ,
ꠀꠟ꠆ꠟꠣꠞ ꠅꠀꠖꠣꠄ ꠁꠝꠣꠘ ꠀꠘꠣꠄ ꠁꠛ꠆ꠞꠣꠢꠤꠝꠦ ꠎꠦꠟꠣ ꠛꠞꠇꠔ ꠙꠣꠁꠍꠂꠘ,
ꠔꠣꠘ ꠛꠣꠖꠦ ꠎꠦꠞꠣ ꠁꠝꠣꠘ ꠀꠘꠛꠣ ꠔꠣꠞꠣꠅ ꠅꠟꠣ ꠛꠞꠇꠔ ꠙꠣꠁꠛꠣ।
১০ ꠀꠍꠝꠣꠘꠤ ꠇꠤꠔꠣꠛꠦ ꠇꠄ,
“ꠎꠦ ꠝꠣꠘꠡꠦ ꠡꠞꠤꠅꠔꠞ ꠇꠤꠔꠣꠛꠅ ꠟꠦꠈꠣ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠀꠝꠟ ꠘꠣ ꠇꠞꠦ,
ꠢꠦ ꠟꠣꠘ꠆ꠘꠔꠤ।”
ꠅꠘ ꠕꠣꠇꠤ ꠛꠥꠎꠣ ꠎꠣꠄ,
ꠎꠦꠞꠣ ꠡꠞꠤꠅꠔ ꠝꠣꠘꠣꠞ ꠃꠙꠞꠦ ꠜꠞꠡꠣ ꠇꠞꠦ,
ꠔꠣꠞꠣ ꠢꠇꠟꠞ ꠃꠙꠞꠦꠃ ꠁ ꠟꠣꠘ꠆ꠘꠔ ꠀꠍꠦ।
১১ ꠀꠟ꠆ꠟꠣꠞ ꠇꠣꠟꠣꠝꠦ ꠛꠣꠔꠣꠄ,
“ꠖꠤꠘꠖꠣꠞ ꠇꠁꠀ ꠎꠣꠞꠦ ꠇꠛꠥꠟ ꠇꠞꠣ ꠅꠄ,
ꠢꠦ ꠔꠣꠞ ꠁꠝꠣꠘꠞ ꠎꠞꠤꠀꠄ ꠎꠤꠘ꠆ꠖꠦꠉꠤ ꠙꠣꠁꠛ।”
ꠄꠞꠖꠣꠄ ꠛꠥꠎꠣ ꠎꠣꠄ,
ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠟꠦꠅ ꠀꠟ꠆ꠟꠣꠄ ꠇꠦꠃꠞꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠂꠘ ꠘꠣ।
১২ ꠅꠁꠟꠦ ꠡꠞꠤꠅꠔꠦ ꠇꠄ,
“ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠚꠤꠇ ꠎꠦ ꠝꠣꠘꠥꠡ ꠌꠟꠦ,
ꠢꠦ ꠡꠞꠤꠅꠔꠞ ꠝꠣꠎꠖꠤꠃ ꠎꠤꠘ꠆ꠖꠦꠉꠤ ꠇꠣꠐꠣꠁꠛ।”
ꠔꠦ ꠔ ꠛꠥꠎꠣ ꠎꠣꠄ,
ꠡꠞꠤꠅꠔꠦ ꠁꠝꠣꠘꠞ ꠃꠙꠞꠦ ꠜꠞꠡꠣ ꠇꠞꠦ ꠘꠣ।
১৩ ꠡꠞꠤꠅꠔꠞ ꠛꠞꠈꠦꠟꠣꠚ ꠇꠞꠣꠄ ꠀꠝꠞꠣꠞ ꠃꠙꠞꠦ ꠎꠦ ꠟꠣꠘ꠆ꠘꠔ ꠀꠍꠤꠟ,
ꠅꠃ ꠟꠣꠘ꠆ꠘꠔ ꠀꠟ-ꠝꠍꠤꠄ ꠔꠣꠘ ꠘꠤꠎꠞ ꠇꠣꠘ꠆ꠖꠅ ꠘꠤꠀ ꠀꠝꠞꠣꠞꠦ ꠀꠎꠣꠖ ꠇꠞꠍꠂꠘ।
ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠀꠍꠦ,
“ꠉꠣꠍꠅ ꠟꠐꠇꠣꠁꠀ ꠎꠣꠞꠦ ꠇꠣꠔꠟ ꠇꠞꠣ ꠅꠄ,
ꠢꠦ ꠟꠣꠘ꠆ꠘꠔꠤ।”
১৪ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝ ꠘꠛꠤꠞꠦ ꠎꠦ ꠛꠞꠇꠔ ꠖꠣꠘ ꠇꠞꠍꠂꠘ,
ꠁꠍꠣ ꠀꠟ-ꠝꠍꠤꠞ ꠎꠞꠤꠀꠄ ꠅꠃ ꠛꠞꠇꠔ ꠎꠣꠔꠦ ꠅꠁꠘ꠆ꠘ ꠎꠣꠔꠤ ꠅꠇꠟꠦꠅ ꠙꠣꠁꠘ,
ꠀꠞ ꠀꠝꠞꠣꠅ ꠎꠣꠔꠦ ꠁꠝꠣꠘꠞ ꠝꠣꠎꠖꠤ ꠅꠀꠖꠣ ꠇꠞꠣ ꠢꠃ ꠙꠣꠇ ꠞꠥꠢꠥ ꠙꠣꠁ,
ꠅꠔꠣꠞ ꠖꠣꠄꠃ ꠀꠟ-ꠝꠍꠤꠄ ꠁ ꠟꠣꠘ꠆ꠘꠔ ꠘꠤꠎꠞ ꠇꠣꠘ꠆ꠖꠅ ꠘꠤꠍꠂꠘ।
ꠡꠞꠤꠅꠔ ꠀꠞ ꠅꠀꠖꠣ
১৫ ꠅ ꠜꠣꠁ ꠅꠇꠟ,
ꠀꠝꠤ ꠖꠥꠘꠤꠀꠛꠤ ꠇꠕꠣꠖꠤ ꠛꠥꠎꠣꠁ ꠖꠤꠞꠣꠝ।
ꠖꠥꠁ ꠙꠇ꠆ꠇ ꠝꠣꠘꠡꠞ ꠝꠣꠎꠦ ꠎꠦꠛꠟꠣ ꠇꠥꠘꠥ ꠌꠥꠇ꠆ꠔꠤ ꠙꠣꠇꠣ-ꠙꠥꠇ꠆ꠔ ꠅꠁꠎꠣꠄ,
ꠅꠃ ꠌꠥꠇ꠆ꠔꠤ ꠄꠇ ꠙꠇ꠆ꠇꠄ ꠀꠞ ꠛꠣꠔꠤꠟ ꠇꠞꠔ ꠙꠣꠞꠦ ꠘꠣ,
ꠛꠣ ꠄꠞ ꠝꠣꠎꠦ ꠘꠄꠀ ꠇꠥꠘ꠆ꠔꠣ ꠟꠣꠉꠣꠁꠔ-ꠅ ꠙꠣꠞꠦ ꠘꠣ।
১৬ ꠔꠦ ꠁꠛ꠆ꠞꠣꠢꠤꠝ ꠘꠛꠤ ꠀꠞ ꠔꠣꠘ ꠀꠅꠟꠣꠖꠞ ꠟꠉꠦ ꠀꠟ꠆ꠟꠣꠄ ꠎꠦ ꠅꠀꠖꠣ ꠇꠞꠍꠟꠣ,
ꠀꠟ꠆ꠟꠣꠞ ꠇꠣꠟꠣꠝꠅ ꠔ ꠇꠅꠀ ꠅꠁꠍꠦ ꠘꠣ,
“ꠀꠅꠟꠣꠖ ꠅꠇꠟꠞ ꠟꠉꠦ” ꠝꠣꠘꠤ ꠛꠃꠔ ꠀꠅꠟꠣꠖꠞ ꠟꠉꠦ।
ꠛꠞꠋ ꠇꠅꠀ ꠅꠁꠍꠦ ꠈꠣꠟꠤ “ꠔꠥꠝꠣꠞ ꠀꠅꠟꠣꠖꠞ ꠟꠉꠦ” ꠝꠣꠘꠤ ꠄꠇ ꠀꠅꠟꠣꠖꠞ ꠟꠉꠦ,
ꠀꠞ ꠅꠃ ꠀꠅꠟꠣꠖꠃ ꠅꠁꠟꠣ ꠀꠟ-ꠝꠍꠤ।
১৭ ꠀꠝꠤ ꠇꠁꠔꠣꠝ ꠌꠣꠁꠞꠣꠝ,
ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞ ꠀꠝꠟꠅ ꠅꠀꠖꠣꠞ ꠝꠣꠎꠖꠤ ꠎꠦ ꠘꠤꠅꠝ ꠛꠅꠀꠁꠟ ꠇꠞꠍꠟꠣ,
ꠄꠞ ꠌꠣꠁꠞꠡ ꠔꠤꠡ ꠛꠞꠍ ꠛꠣꠖꠦ ꠡꠞꠤꠅꠔ ꠖꠦꠅꠀ ꠅꠁꠍꠤꠟ।
ꠅꠃ ꠡꠞꠤꠅꠔ ꠀꠅꠀꠄ ꠀꠉꠞ ꠢꠃ ꠅꠀꠖꠣꠞ ꠘꠤꠅꠝ ꠔ ꠛꠣꠔꠤꠟ ꠇꠞꠔ ꠙꠣꠞꠦ ꠘꠣ।
ꠔꠦ ꠔ ꠔꠣꠘ ꠅꠀꠖꠣ ꠎꠣꠞꠤ ꠞꠁꠟ।
১৮ ꠀꠞ ꠀꠟ꠆ꠟꠣꠞ ꠛꠞꠇꠔ ꠙꠣꠅꠀ ꠎꠥꠖꠤ ꠡꠞꠤꠅꠔ ꠀꠝꠟꠞ ꠃꠙꠞꠦ ꠘꠤꠞꠜꠞ ꠇꠞꠔ,
ꠔꠦ ꠅꠀꠖꠣꠞ ꠃꠙꠞꠦ ꠘꠤꠞꠜꠞ ꠞꠁꠟ ꠘꠣ ꠅꠘꠦ।
ꠅꠁꠟꠦ ꠀꠟ꠆ꠟꠣꠄ ꠅꠀꠖꠣꠞ ꠝꠣꠎꠖꠤꠃ ꠁꠛ꠆ꠞꠣꠢꠤꠝꠞꠦ ꠛꠞꠇꠔ ꠖꠣꠘ ꠇꠞꠍꠟꠣ।
১৯ ꠔꠦ ꠇꠁꠛꠣ,
ꠡꠞꠤꠅꠔ ꠇꠦꠘꠦ ꠖꠦꠅꠀ ꠅꠁꠍꠤꠟ?
ꠝꠣꠘꠡꠦ ꠉꠥꠘꠣꠞ ꠇꠣꠝ ꠘꠣ ꠍꠣꠠꠣꠄ,
ꠀꠟ꠆ꠟꠣꠞ ꠔꠞꠚ ꠕꠣꠇꠤ ꠅꠀꠖꠣꠞ ꠟꠉꠦ ꠡꠞꠤꠅꠔꠅ ꠡꠣꠝꠤꠟ ꠇꠞꠍꠟꠣ।
ꠀꠞ ꠁꠛ꠆ꠞꠣꠢꠤꠝꠞ ꠎꠦ ꠀꠅꠟꠣꠖꠞ ꠛꠦꠙꠣꠞꠦ ꠀꠟ꠆ꠟꠣꠄ ꠅꠀꠖꠣ ꠇꠞꠍꠟꠣ,
ꠅꠃ ꠎꠘꠦ ꠔꠡꠞꠤꠚ ꠘꠣ ꠀꠘꠣ ꠙꠞ꠆ꠎꠘ꠆ꠔ ꠁ ꠡꠞꠤꠅꠔ ꠛꠅꠀꠁꠟ ꠀꠍꠤꠟ।
ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞ ꠎꠞꠤꠀꠄ ꠝꠥꠍꠣ ꠘꠛꠤꠞ ꠉꠦꠍꠦ ꠁ ꠡꠞꠤꠅꠔ ꠘꠣꠎꠤꠟ ꠅꠁꠍꠤꠟ।
ꠅꠃ ꠝꠥꠍꠣꠃ ꠀꠍꠟꠣ ꠀꠟ꠆ꠟꠣ ꠀꠞ ꠝꠣꠘꠡꠞ ꠝꠣꠎꠦ ꠡꠣꠚꠣꠄꠀꠔꠇꠣꠞꠤ,
ꠝꠣꠘꠤ ꠝꠣꠎꠞ ꠝꠣꠘꠥꠡ।
২০ ꠅꠁꠟꠦ ꠈꠣꠟꠤ ꠄꠇꠙꠇ꠆ꠇ ꠕꠣꠇꠟꠦ ꠔ ꠝꠣꠎꠞ ꠝꠣꠘꠡꠞ ꠎꠞꠥꠞ ꠀꠍꠤꠟ ꠘꠣ;
ꠀꠞ ꠀꠟ꠆ꠟꠣ ꠔ ꠄꠇꠎꠘꠃ।
ꠔꠣꠁꠘ ꠁꠛ꠆ꠞꠣꠢꠤꠝꠞ ꠟꠉꠦ ꠅꠀꠖꠣꠞ ꠇꠣꠟꠅ ꠇꠥꠘꠥ ꠝꠣꠎꠞ ꠎꠘ ꠟꠣꠉꠍꠦ ꠘꠣ।
২১ ꠔꠦ ꠡꠞꠤꠅꠔ ꠇꠥꠘꠥ ꠀꠟ꠆ꠟꠣꠞ ꠅꠀꠖꠣ ꠅꠇꠟꠞ ꠃꠟꠐꠣ ꠘꠤ?
ꠘꠤꠌꠄ ꠘꠣ।
ꠀꠟ꠆ꠟꠣꠄ ꠎꠥꠖꠤ ꠅꠃ ꠟꠣꠈꠣꠘ ꠡꠞꠤꠅꠔ ꠖꠣꠘ ꠇꠞꠔꠣ,
ꠎꠦꠔꠣꠄ ꠀꠈꠦꠞꠤ ꠎꠤꠘ꠆ꠖꠦꠉꠤ ꠝꠤꠟꠦ,
ꠔꠦ ꠡꠞꠤꠅꠔ ꠝꠣꠘꠤꠀꠃ ꠝꠣꠘꠥꠡ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠁꠉꠦꠟ ꠅꠘꠦ।
২২ ꠅꠁꠟꠦ ꠀꠍꠝꠣꠘꠤ ꠇꠤꠔꠣꠛꠦ ꠛꠣꠔꠣꠄ,
ꠔꠣꠝꠣꠝ ꠝꠣꠘꠥꠡꠃ ꠉꠥꠘꠣꠞ ꠇꠛꠎꠣꠄ ꠛꠘ꠆ꠖꠤ,
ꠔꠣꠞꠣ ꠎꠣꠘꠥ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠤꠀ,
ꠁꠝꠣꠘꠞ ꠎꠞꠤꠀꠄ ꠅꠀꠖꠣ ꠇꠞꠣ ꠢꠃ ꠛꠞꠇꠔ ꠙꠣꠁꠘ।
২৩ ꠁꠝꠣꠘ ꠀꠅꠀꠞ ꠀꠉꠦ ꠡꠞꠤꠅꠔꠦ ꠀꠝꠞꠣꠞꠦ ꠙꠣꠞꠣ ꠖꠤꠍꠤꠟ।
ꠁꠝꠣꠘ ꠎꠣꠁꠞ ꠘꠣ ꠅꠀ ꠙꠞ꠆ꠎꠘ꠆ꠔ ꠅꠃ ꠡꠞꠤꠅꠔꠦꠃ ꠀꠝꠞꠣꠞꠦ ꠛꠣꠘ꠆ꠖꠤꠀ ꠞꠣꠈꠍꠤꠟ।
২৪ ꠄꠞꠖꠣꠄ ꠛꠥꠎꠣ ꠎꠣꠄ,
ꠀꠟ-ꠝꠍꠤꠞ ꠉꠦꠍꠦ ꠙꠃꠍꠣꠘꠤꠞ ꠀꠉꠦ ꠅꠃ ꠡꠞꠤꠅꠔꠦꠃ ꠅꠔꠖꠤꠘ ꠀꠝꠞꠣꠞꠦ ꠌꠣꠟꠣꠁꠍꠦ,
ꠎꠣꠔꠦ ꠁꠝꠣꠘꠞ ꠎꠞꠤꠀꠄ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠣ ꠅꠄ।
২৫ ꠅꠁꠟꠦ ꠅꠈꠘ ꠁꠝꠣꠘ ꠇꠣꠁꠝ ꠅꠀꠄ,
ꠀꠝꠞꠣ ꠀꠞ ꠌꠣꠟꠇꠖꠣꠞ ꠡꠞꠤꠅꠔꠞ ꠔꠟꠥꠀ ꠘꠣꠄ।
ꠀꠟ꠆ꠟꠣꠞ ꠘꠥꠞꠞ ꠀꠅꠟꠣꠖ
২৬ ꠁꠍꠣ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠣꠄ ꠔꠥꠝꠞꠣ ꠢꠇ꠆ꠇꠟ ꠅꠈꠘ ꠀꠟ꠆ꠟꠣꠞ ꠀꠅꠟꠣꠖ ꠛꠘꠤꠉꠦꠍ।
২৭ ꠔꠥꠝꠞꠣ ꠎꠣꠞꠣ ꠀꠟ-ꠝꠍꠤꠞ ꠔꠞꠤꠇꠣ ꠇꠛꠥꠟ ꠇꠞꠍ,
ꠔꠥꠝꠞꠣ ꠔ ꠚꠤꠘ꠆ꠘꠞ ꠘꠄꠀ ꠇꠣꠙꠠꠞ ꠟꠣꠈꠣꠘ ꠀꠟ-ꠝꠍꠤꠞ ꠜꠤꠔꠞꠦ ꠢꠣꠝꠣꠁꠉꠦꠍ।
২৮ ꠁꠢꠥꠖꠤ ꠀꠞ ꠅ-ꠁꠢꠥꠖꠤ,
ꠉꠥꠟꠣꠝ ꠀꠞ ꠀꠎꠣꠖ,
ꠛꠦꠐꠤꠘ ꠀꠞ ꠛꠦꠐꠣꠁꠘ꠆ꠔꠞ ꠝꠣꠎꠦ ꠅꠈꠘ ꠇꠥꠘꠥ ꠔꠚꠣꠔ ꠘꠣꠁ।
ꠁꠍꠣ ꠀꠟ-ꠝꠍꠤꠞ ꠟꠉꠦ ꠝꠤꠡꠤ ꠎꠣꠅꠀꠄ ꠔꠥꠝꠞꠣ ꠢꠇꠟꠃ ꠔ ꠄꠇ ꠅꠁꠉꠦꠍ।
২৯ ꠔꠥꠝꠞꠣ ꠎꠦꠛꠟꠣ ꠀꠟ-ꠝꠍꠤꠞ ꠎꠘ ꠅꠁꠉꠦꠍ,
ꠔꠦ ꠔ ꠁꠛ꠆ꠞꠣꠢꠤꠝꠞ ꠀꠅꠟꠣꠖꠅ ꠅꠁꠍ,
ꠀꠞ ꠀꠟ꠆ꠟꠣꠄ ꠁꠛ꠆ꠞꠣꠢꠤꠝꠞꠦ ꠎꠦꠔꠣ ꠖꠤꠛꠣ ꠇꠞꠤ ꠅꠀꠖꠣ ꠇꠞꠍꠟꠣ,
ꠔꠥꠝꠞꠣꠅ ꠅꠔꠣꠞ ꠜꠣꠉꠤ ꠛꠘꠤꠉꠦꠍ।