ꠝꠥꠝꠤꠘ ꠅꠇꠟꠞ ꠡ꠆ꠛꠣꠗꠤꠘꠔꠣ
৫
১ ꠅ ꠝꠥꠝꠤꠘ ꠅꠇꠟ,
ꠀꠟ-ꠝꠍꠤꠄ ꠀꠝꠞꠣꠞꠦ ꠡ꠆ꠛꠣꠗꠤꠘ ꠇꠞꠍꠂꠘ,
ꠡ꠆ꠛꠣꠗꠤꠘ ꠢꠣꠟꠔꠦ ꠞꠅꠀꠞ ꠟꠣꠉꠤ।
ꠄꠞꠖꠣꠄ ꠔꠥꠝꠞꠣꠞ ꠡ꠆ꠛꠣꠗꠤꠘꠔꠣꠞꠦ ꠗꠞꠤꠀ ꠞꠣꠈꠅ,
ꠉꠥꠟꠣꠝꠤꠞ ꠟꠣꠉꠣꠝ ꠀꠞ ꠚꠤꠘ꠆ꠖꠤꠅ ꠘꠣ।
২ ꠢꠥꠘꠅ,
ꠀꠝꠤ ꠙꠣꠃꠟꠥꠍꠦ ꠔꠥꠝꠞꠣꠞꠦ ꠇꠁꠞꠣꠝ,
ꠔꠥꠝꠞꠣ ꠎꠥꠖꠤ ꠅꠈꠘꠅ ꠝꠍꠟꠝꠣꠘꠤ ꠇꠣꠝ ꠇꠞꠣꠅ,
ꠔꠦ ꠀꠟ-ꠝꠍꠤꠞ ꠇꠥꠘꠥ ꠖꠣꠝꠃ ꠔ ꠔꠥꠝꠞꠣꠞ ꠉꠦꠍꠦ ꠘꠣꠁ।
৩ ꠀꠝꠤ ꠢꠇꠟꠞ ꠉꠦꠍꠦ ꠢꠤꠞꠛꠣꠞ ꠅꠈꠣꠘ ꠇꠁꠞꠣꠝ,
ꠎꠦ ꠎꠘꠞꠦ ꠝꠍꠟꠝꠣꠘꠤ ꠇꠞꠣꠁꠟ ꠅꠄ,
ꠔꠣꠞ ꠃꠙꠞꠦ ꠚꠞꠎ ꠅꠁꠎꠣꠄ ꠡꠞꠤꠅꠔꠞ ꠔꠣꠝꠣꠝ ꠢꠥꠇꠥꠝ-ꠀꠢꠇꠣꠝ ꠝꠣꠘꠣ।
৪ ꠔꠥꠝꠞꠣ ꠎꠣꠞꠣ ꠡꠞꠤꠅꠔ ꠀꠝꠟ ꠇꠞꠤꠀ ꠖꠤꠘꠖꠣꠞ ꠛꠘꠔꠣꠄ ꠌꠣꠁꠞꠣꠄ,
ꠔꠥꠝꠞꠣ ꠔ ꠀꠟ-ꠝꠍꠤꠞ ꠉꠦꠍ ꠕꠘꠦ ꠀꠟꠉ ꠅꠁꠉꠦꠍ,
ꠀꠟ꠆ꠟꠣꠞ ꠞꠢꠝꠔ ꠕꠘꠦ ꠢꠞꠤꠉꠦꠍ।
৫ ꠅꠁꠟꠦ ꠀꠝꠞꠣꠞꠦ ꠖꠤꠘꠖꠣꠞ ꠇꠁꠀ ꠇꠛꠥꠟ ꠇꠞꠣ ꠅꠁꠛ,
ꠁꠝꠣꠘꠦ ꠅꠃ ꠘꠤꠌꠄꠅꠔꠣ ꠙꠣꠁꠀ ꠙꠣꠇ ꠞꠥꠢꠥꠞ ꠛꠟꠦ ꠀꠝꠞꠣ ꠛꠣꠞ ꠌꠣꠁꠞꠣꠝ।
৬ ꠁꠍꠣ ꠀꠟ-ꠝꠍꠤꠞ ꠃꠝ꠆ꠝꠔ ꠛꠘꠤꠀ ꠢꠣꠞꠟꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟꠦꠅ ꠎꠦꠔꠣ,
ꠘꠣ ꠇꠞꠣꠁꠟꠦꠅ ꠅꠔꠣ।
ꠛꠞꠋ ꠝꠢꠛ꠆ꠛꠔꠞ ꠝꠣꠎꠖꠤ ꠎꠦ ꠁꠝꠣꠘ ꠎꠣꠁꠞ ꠅꠄ,
ꠅꠃ ꠁꠝꠣꠘꠃ ꠅꠁꠟ ꠀꠍꠟ।
৭ ꠔꠥꠝꠞꠣ ꠔ ꠜꠣꠟꠣ ꠙꠕꠦ ꠌꠟꠣꠔ ꠀꠍꠟꠣꠄ;
ꠔꠦ ꠅꠃ ꠢꠇ ꠙꠕꠦ ꠌꠟꠔꠦ ꠔꠥꠝꠞꠣꠞꠦ ꠇꠦꠉꠤꠄ ꠛꠣꠗꠣ ꠖꠤꠟ?
৮ ꠢꠥꠘꠅ,
ꠔꠥꠝꠞꠣ ꠅꠈꠘ ꠎꠦ ꠝꠔꠛꠣꠖ ꠝꠣꠘꠞꠣꠄ,
ꠎꠦ ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠤ ꠀꠘꠍꠂꠘ,
ꠁ ꠝꠔꠛꠣꠖ ꠔ ꠔꠣꠘ ꠛꠣꠔꠣꠁꠟ ꠙꠕ ꠘꠣꠄ।
৯ ꠎꠣꠘꠅ ꠘꠤ,
ꠄꠇ ꠚꠥꠐꠣ ꠌꠦꠘꠣꠄ ꠄꠇ ꠛꠣꠟꠔꠤ ꠖꠥꠗꠞꠦ ꠛꠞꠛꠣꠖ ꠇꠞꠤꠟꠣꠄ।
১০ ꠔꠦ ꠔꠥꠝꠞꠣꠞ ꠛꠦꠙꠣꠞꠦ ꠀꠝꠤ ꠝꠣꠟꠤꠇꠞ ꠖꠞꠛꠣꠞꠅ ꠅꠃ ꠜꠞꠡꠣ ꠇꠞꠤ,
ꠔꠥꠝꠞꠣ ꠖꠥꠍꠞꠣ ꠇꠥꠘꠥ ꠝꠔꠛꠣꠖꠅ ꠎꠣꠁꠔꠣꠄ ꠘꠣꠄ।
ꠅꠁꠟꠦ ꠎꠦꠉꠤꠄ ꠔꠥꠝꠞꠣꠞꠦ ꠍꠣꠔꠣꠞ,
ꠢꠦ ꠎꠦ-ꠃ ꠅꠄ ꠘꠣ ꠇꠦꠘꠦ,
ꠔꠣꠞ ꠙꠣꠅꠘꠣ ꠡꠣꠎꠣ ꠢꠦ ꠙꠣꠁꠛ।
১১ ꠅ ꠜꠣꠁ ꠅꠇꠟ,
ꠀꠝꠤ ꠎꠥꠖꠤ ꠅꠈꠘꠅ ꠅꠈꠣꠘ ꠇꠁ,
ꠝꠣꠘꠡꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤ ꠎꠞꠥꠞ,
ꠔꠦ ꠀꠝꠣꠞ ꠃꠙꠞꠦ ꠇꠦꠘꠦ ꠅꠈꠘꠅ ꠎꠥꠟꠥꠝ ꠅꠞ?
ꠔꠦ ꠖꠥꠈ-ꠇꠡ꠆ꠐꠞ ꠍꠟꠤꠛꠞ ꠃꠙꠞꠦ ꠀꠟ-ꠝꠍꠤꠞ ꠝꠃꠔꠞ ꠇꠕꠣ ꠢꠥꠘꠟꠦ ꠎꠦꠔꠣꠄ ꠝꠥꠈ ꠟꠥꠇꠣꠁꠘ,
ꠔꠣꠞꠣꠞ ꠝꠥꠈ ꠟꠥꠇꠣꠘꠤ ꠔ ꠛꠘ꠆ꠖ ꠅꠁꠉꠦꠟ ꠅꠘꠦ।
১২ ꠄꠞꠖꠣꠄ ꠀꠝꠤ ꠌꠣꠁꠞꠣꠝ,
ꠔꠥꠝꠞꠣꠞ ꠖꠤꠟꠅ ꠎꠦꠔꠣꠄ ꠉꠘ꠆ꠒꠉꠥꠟ ꠟꠣꠉꠣꠁꠍꠂꠘ,
ꠅꠉꠥꠁꠘ꠆ꠔꠦ ꠔꠣꠞꠣꠞ ꠀꠡ꠆ꠔꠣ ꠘꠚꠍ ꠇꠣꠐꠤꠀ ꠚꠣꠟꠣꠁ ꠖꠦꠃꠇ।
ꠉꠥꠘꠣꠞ ꠉꠥꠟꠣꠝꠤ ꠍꠣꠠꠅ, ꠙꠣꠇ ꠞꠥꠢꠦ ꠈꠣꠐꠤ ꠅꠅ
১৩ ꠅ ꠜꠣꠁ ꠅꠇꠟ,
ꠀꠟ꠆ꠟꠣꠄ ꠔꠥꠝꠞꠣꠞꠦ ꠙꠍꠘ꠆ꠖ ꠇꠞꠤꠀ ꠀꠘꠍꠂꠘ ꠀꠎꠣꠖ ꠅꠀꠞ ꠟꠣꠉꠤ।
ꠅꠁꠟꠦ ꠀꠎꠣꠖ ꠛꠘꠤꠀ ꠔꠥꠝꠞꠣꠞ ꠖꠤꠟꠞ ꠉꠥꠘꠣꠞ ꠈꠣꠁꠡ ꠙꠥꠞꠣꠘꠤꠔ ꠟꠣꠉꠤꠅ ꠘꠣ,
ꠛꠞꠋ ꠖꠤꠟꠞ ꠝꠢꠛ꠆ꠛꠔꠦ ꠄꠇꠦ-ꠅꠁꠘ꠆ꠘꠞ ꠈꠦꠎꠝꠔ ꠇꠞꠅ।
১৪ ꠇꠣꠞꠘ ꠀꠡ꠆ꠔꠣ ꠡꠞꠤꠅꠔꠞꠦꠃ ꠄꠇꠈꠣꠘꠅ ꠇꠞꠤꠀ ꠇꠅꠀ ꠅꠁꠍꠦ,
“ꠔꠥꠝꠣꠞ ꠀꠞꠤ-ꠚꠞꠤꠞꠦ ꠘꠤꠎꠞ ꠟꠣꠈꠣꠘ ꠝꠣꠄꠀ ꠇꠞꠤꠅ।”
১৫ ꠅꠁꠟꠦ ꠔꠥꠝꠞꠣ ꠎꠥꠖꠤ ꠄꠇꠦ-ꠅꠁꠘ꠆ꠘꠦ ꠇꠣꠁꠎ꠆ꠎꠣ-ꠚꠍꠣꠖ ꠀꠞ ꠞꠦꠡꠣ-ꠞꠦꠡꠤ ꠇꠞꠅ,
ꠔꠦ ꠢꠥꠡꠤꠀꠞ ꠅꠁꠎꠣꠅ!
ꠁꠔꠣ ꠇꠞꠟꠦ ꠔ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠞꠦ ꠛꠤꠘꠣꠡ ꠇꠞꠤꠟꠤꠛꠣꠄ।
১৬ ꠢꠥꠘꠅ,
ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠙꠣꠇ ꠞꠥꠢꠥꠞ ꠛꠟꠦ ꠎꠤꠘ꠆ꠖꠦꠉꠤ ꠇꠣꠐꠣꠅ,
ꠔꠦꠃ ꠖꠤꠟꠞ ꠅꠃ ꠈꠣꠁꠡ ꠝꠤꠐꠣꠘꠤꠞ ꠈꠤꠀꠟ ꠅꠁꠔ ꠘꠣꠄ।
১৭ ꠅꠃ ꠈꠣꠁꠡꠦ ꠎꠦꠔꠣ ꠇꠄ,
ꠁꠔꠣ ꠔ ꠙꠣꠇ ꠞꠥꠢꠥꠞ ꠛꠤꠙꠇ꠆ꠇꠦ,
ꠀꠞ ꠙꠣꠇ ꠞꠥꠢꠦ ꠎꠦꠔꠣ ꠇꠂꠘ ꠁꠔꠣ ꠛꠖ ꠈꠣꠁꠡꠞ ꠛꠤꠙꠇ꠆ꠇꠦ।
ꠛꠖ ꠈꠣꠁꠡ ꠀꠞ ꠙꠣꠇ ꠞꠥꠢꠥ ꠄꠞꠣ ꠄꠇꠦ-ꠅꠁꠘ꠆ꠘꠞ ꠛꠤꠞꠥꠗꠤ,
ꠄꠞꠖꠣꠄ ꠘꠦꠇ ꠇꠣꠝꠞ ꠘꠤꠅꠔ ꠇꠞꠤꠀꠅ ꠔꠥꠝꠞꠣ ꠁꠔꠣ ꠙꠥꠞꠣ ꠇꠞꠅ ꠘꠣ।
১৮ ꠀꠞ ꠔꠥꠝꠞꠣ ꠎꠥꠖꠤ ꠙꠣꠇ ꠞꠥꠢꠥꠞ ꠛꠟꠦ ꠎꠤꠘ꠆ꠖꠦꠉꠤ ꠇꠣꠐꠣꠅ,
ꠔꠦ ꠔꠥꠝꠞꠣ ꠡꠞꠤꠅꠔꠞ ꠉꠥꠟꠣꠝ ꠘꠣꠄ।
১৯ ꠖꠤꠟꠞ ꠛꠖ ꠈꠣꠁꠡꠞ ꠇꠣꠝ-ꠇꠣꠎ ꠔ ꠈꠥꠟꠣ-ꠝꠦꠟꠣꠃ ꠌꠤꠘꠣ ꠎꠣꠄ,
ꠁꠔꠣ ꠅꠁꠟꠉꠤ ꠎꠤꠘꠣ,
ꠘꠣꠙꠣꠇꠤ,
ꠛꠖꠝꠣꠁꠡꠤ,
২০ ꠖꠦꠛꠔꠣ ꠙꠥꠎꠣ,
ꠎꠣꠖꠥ-ꠐꠥꠘꠣ,
ꠖꠥꠡꠝꠘꠤ,
ꠇꠣꠁꠎ꠆ꠎꠣ-ꠚꠍꠣꠖ,
ꠟꠥꠜ-ꠟꠣꠟꠌ,
ꠉꠥꠍꠣ,
ꠘꠤꠎ-ꠝꠔꠟꠛꠤ,
ꠅꠝꠤꠟ,
ꠖꠟꠣꠖꠟꠤ,
২১ ꠁꠋꠡꠣ,
ꠝꠣꠔꠟꠣꠝꠤ,
ꠢꠂ-ꠢꠥꠟ꠆ꠟꠣ ꠇꠞꠤ ꠛꠎ꠆ꠎꠣꠔꠤ ꠇꠞꠣ,
ꠀꠞ ꠅꠃ ꠘꠝꠥꠘꠣꠞ ꠀꠞꠅ ꠛꠃꠔ ꠇꠣꠝ।
ꠔꠦ ꠀꠝꠤ ꠀꠉꠦ ꠎꠦꠟꠣ ꠢꠥꠡꠤꠀꠞ ꠇꠞꠍꠟꠣꠝ,
ꠅꠈꠘ ꠢꠤꠞꠛꠣꠞ ꠅꠃꠟꠣ ꠇꠁꠞꠣꠝ,
ꠖꠤꠟꠞ ꠅꠃ ꠛꠖ ꠈꠣꠁꠡꠞ ꠉꠥꠟꠣꠝꠤ ꠎꠦꠞꠣ ꠇꠞꠦ,
ꠀꠟ꠆ꠟꠣꠞ ꠛꠣꠖꠡꠣꠁꠔ ꠔꠣꠞꠣꠞ ꠇꠥꠘꠥ ꠑꠣꠁ ꠘꠣꠁ।
২২ ꠅꠁꠟꠦ ꠙꠣꠇ ꠞꠥꠢꠦ ꠌꠟꠣ ꠎꠤꠘ꠆ꠖꠦꠉꠤꠞ ꠚꠟ ꠅꠁꠟ ꠝꠢꠛ꠆ꠛꠔ,
ꠈꠥꠡꠤ-ꠛꠣꠡꠤ,
ꠡꠣꠘ꠆ꠔꠤ,
ꠍꠛꠞ ꠇꠞꠣ,
ꠖꠄꠀꠟꠥ ꠜꠣꠛ,
ꠜꠣꠟꠣ-ꠝꠣꠘꠡꠤ ꠇꠞꠣ,
ꠢꠇ-ꠢꠣꠟꠣꠟꠤ ꠞꠅꠀ,
২৩ ꠘꠞꠝ ꠅꠀ ꠀꠞ ꠘꠤꠎꠞꠦ ꠡꠣꠝꠟꠣꠁꠀ ꠞꠣꠈꠣ।
ꠅꠃ ꠘꠦꠇ ꠇꠣꠝꠞ ꠛꠤꠞꠥꠗꠤ ꠇꠥꠘꠥꠎꠣꠔ ꠀꠁꠘ ꠘꠣꠁ।
২৪ ꠀꠞ ꠁꠍꠣ ꠀꠟ-ꠝꠍꠤꠞ ꠀꠙꠘ ꠃꠝ꠆ꠝꠔꠦ ꠔ,
ꠎꠣꠞꠎꠤꠞ ꠞꠤꠙꠥꠞꠦ,
ꠖꠤꠟꠞ ꠢꠇꠟ ꠛꠖ ꠈꠣꠁꠡ ꠡꠥꠖ꠆ꠖꠣ ꠁꠍꠣ ꠀꠟ-ꠝꠍꠤꠞ ꠍꠟꠤꠛꠅ ꠇꠄꠛꠞ ꠖꠤꠟꠣꠁꠍꠦ।
২৫ ꠅꠈꠘ ꠀꠝꠞꠣ ꠎꠥꠖꠤ ꠄꠇꠤꠘ ꠇꠞꠤ ꠙꠣꠇ ꠞꠥꠢꠥꠞ ꠎꠞꠤꠀꠄ ꠘꠄꠀ ꠎꠤꠘ꠆ꠖꠦꠉꠤ ꠙꠣꠁꠍꠤ,
ꠔꠦ ꠀꠅ,
ꠀꠝꠞꠣ ꠙꠣꠇ ꠞꠥꠢꠥꠞ ꠎꠤꠝ꠆ꠝꠣꠄ ꠎꠤꠘ꠆ꠖꠦꠉꠤ ꠇꠣꠐꠣꠁ।
২৬ ꠀꠝꠞꠣ ꠛꠦꠢꠥꠖꠣ ꠛꠠꠣꠁ-ꠛꠦꠐꠣꠉꠤꠞꠤ ꠛꠣꠖ ꠖꠦꠁ,
ꠄꠇꠦ-ꠅꠁꠘ꠆ꠘꠞꠦ ꠍꠣꠔꠣꠘꠤ ꠀꠞ ꠁꠋꠡꠣ-ꠁꠋꠡꠤ ꠄꠇ꠆ꠇꠦꠞꠦ ꠍꠣꠠꠤ ꠖꠦꠁ।