৪
১ ꠔꠥꠝꠞꠣ ꠎꠦꠞꠣ ꠝꠥꠘꠤꠛ,
ꠔꠥꠝꠞꠣꠞ ꠉꠥꠟꠣꠝ ꠅꠇꠟꠞ ꠟꠉꠦ ꠘꠤꠀꠄ ꠀꠞ ꠢꠇ ꠁꠘꠍꠣꠚ ꠇꠞꠤꠅ।
ꠝꠘꠅ ꠞꠣꠈꠤꠅ,
ꠛꠦꠢꠦꠡ꠆ꠔꠞ ꠝꠣꠎꠦ ꠔꠥꠝꠞꠣꠞꠅ ꠄꠇꠎꠘ ꠝꠥꠘꠤꠛ ꠀꠍꠂꠘ।
ꠀꠈꠦꠞꠤ ꠙꠞꠣꠝꠤꠡ
২ ꠔꠥꠝꠞꠣ ꠝꠘ ꠖꠤꠀ ꠡꠥꠇꠞꠤꠀ ꠀꠖꠣꠄ ꠇꠞꠤꠀ ꠖꠥꠀ ꠇꠞꠣꠔ ꠞꠁꠅ।
৩ ꠀꠝꠞꠣꠞ ꠟꠣꠉꠤꠅ ꠖꠥꠀ ꠇꠞꠤꠅ,
ꠎꠣꠔꠦ ꠀꠟ꠆ꠟꠣꠄ ꠀꠝꠞꠣꠞꠦ ꠀꠟ-ꠝꠍꠤꠞ ꠛꠦꠙꠣꠞꠦ ꠛꠣꠔꠥꠘꠤ ꠢꠇ ꠇꠣꠟꠣꠝ ꠔꠛꠟꠤꠉ ꠇꠞꠣꠞ ꠔꠃꠚꠤꠇ ꠖꠦꠁꠘ।
ꠅꠃ ꠛꠣꠔꠥꠘꠤ ꠢꠇ ꠇꠣꠟꠣꠝꠞ ꠟꠣꠉꠤꠃ ꠔ ꠀꠝꠣꠞꠦ ꠛꠘ꠆ꠖꠤ ꠇꠞꠣ ꠅꠁꠍꠦ।
৪ ꠖꠥꠀ ꠇꠞꠤꠅ,
ꠝꠣꠘꠡꠞꠦ ꠎꠦꠟꠣ ꠙꠞꠤꠡ꠆ꠇꠣꠞ ꠇꠞꠤ ꠛꠥꠎꠣꠘꠤ ꠎꠞꠥꠞ,
ꠀꠝꠤ ꠎꠣꠘꠥ ꠑꠤꠇ ꠅꠃꠟꠣ ꠛꠥꠎꠣꠁꠔꠣꠝ ꠙꠣꠞꠤ।
৫ ꠀꠟ-ꠝꠍꠤꠞ ꠔꠞꠤꠇꠣꠞ ꠛꠣꠁꠞꠞ ꠝꠣꠘꠡꠞ ꠟꠉꠦ ꠀꠈꠟ ꠈꠣꠐꠣꠁꠀ ꠌꠟꠤꠅ,
ꠀꠞ ꠔꠛꠟꠤꠉ ꠇꠞꠣꠞ ꠢꠇ꠆ꠇꠟ ꠡꠥꠎꠥꠉ ꠇꠣꠝꠅ ꠟꠣꠉꠣꠁꠅ।
৬ ꠔꠥꠝꠞꠣꠞ ꠝꠥꠈꠞ ꠎꠛꠣꠘ ꠢꠣꠝꠦꠡꠣ ꠝꠤꠑꠣ ꠀꠞ ꠞꠡꠣꠁꠟ ꠅꠃꠇ,
ꠎꠣꠔꠦ ꠇꠣꠞꠦ ꠇꠤꠟꠣ ꠎꠥꠀꠙ ꠖꠤꠔꠣꠄ,
ꠁꠔꠣ ꠔꠥꠝꠞꠣ ꠛꠥꠎꠅ।
ꠀꠈꠦꠞꠤ ꠝꠥꠘꠣꠎꠣꠔ ꠀꠞ ꠍꠣꠟꠣꠝ
৭ ꠀꠝꠞꠣꠞ ꠝꠣꠄꠀꠞ ꠜꠣꠁ,
ꠛꠤꠡ꠆ꠛꠣꠡꠤ ꠈꠣꠖꠤꠝ ꠀꠞ ꠝꠣꠟꠤꠇꠞ ꠈꠦꠎꠝꠔꠅ ꠀꠝꠞꠣꠞ ꠟꠉꠞ ꠔꠛꠟꠤꠉꠇꠣꠞꠤ ꠔꠥꠈꠤꠇ ꠜꠣꠁꠄ,
ꠀꠝꠣꠞ ꠛꠤꠡ꠆ꠔꠣꠞꠤꠔ ꠈꠛꠞꠣ-ꠈꠛꠞ ꠔꠥꠝꠞꠣꠞꠦ ꠎꠣꠘꠣꠁꠛꠣ।
৮ ꠔꠣꠘ ꠝꠣꠞꠚꠔꠦ ꠀꠝꠞꠣꠞ ꠢꠣꠟ-ꠢꠇꠤꠇꠔ ꠎꠣꠘꠛꠣꠄ,
ꠔꠣꠁꠘ ꠔꠥꠝꠞꠣꠞꠦ ꠡꠣꠅꠡ ꠖꠤꠛꠣ।
ꠄꠞꠟꠣꠉꠤ ꠀꠝꠤ ꠔꠣꠘꠞꠦ ꠔꠥꠝꠞꠣꠞ ꠉꠦꠍꠦ ꠙꠣꠑꠣꠁꠟꠣꠝ।
৯ ꠔꠥꠈꠤꠇꠞ ꠟꠉꠦ ꠀꠝꠞꠣꠞ ꠝꠣꠄꠀꠞ ꠁꠝꠣꠘꠖꠣꠞ ꠜꠣꠁ ꠅꠘꠤꠍꠤꠝꠞꠦꠅ ꠙꠣꠑꠣꠁꠟꠣꠝ।
ꠄꠁꠘ ꠔ ꠔꠥꠝꠞꠣꠞꠃ ꠄꠇꠎꠘ।
ꠔꠣꠞꠣ ꠁꠘꠞ ꠢꠇꠟ ꠈꠛꠞ-ꠀꠘ꠆ꠔꠞ ꠔꠥꠝꠞꠣꠞꠦ ꠎꠣꠘꠣꠁꠛꠣ।
১০ ꠀꠝꠣꠞ ꠟꠉꠞ ꠛꠘ꠆ꠖꠤ ꠜꠣꠁ ꠀꠞꠤꠡ꠆ꠔꠣꠇꠥꠍ ꠀꠞ ꠛꠣꠞꠘꠣꠛꠣꠍꠞ ꠇꠥꠐꠥꠝ ꠝꠣꠞ꠆ꠇꠥꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ।
ꠅꠃ ꠝꠣꠞ꠆ꠇꠥꠍꠞ ꠛꠦꠙꠣꠞꠦ ꠔꠥꠝꠞꠣ ꠔ ꠀꠉ ꠕꠣꠇꠤꠃ ꠈꠛꠞ ꠙꠣꠁꠍ,
ꠔꠣꠁꠘ ꠎꠥꠖꠤ ꠔꠥꠝꠞꠣꠞ ꠉꠦꠍꠦ ꠎꠣꠁꠘ,
ꠔꠦ ꠈꠥꠡꠤ ꠝꠘꠦ ꠔꠣꠘꠞꠦ ꠇꠛꠥꠟ ꠇꠞꠤꠅ।
১১ ꠀꠞ ꠁꠍꠣ ꠃꠞꠚꠦ ꠁꠃꠍꠔꠥꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ।
ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠁꠢꠥꠖꠤ ꠅꠇꠟꠞ ꠝꠣꠎꠦ ꠈꠣꠟꠤ ꠅꠃ ꠔꠤꠘ ꠎꠘꠦꠃ ꠀꠝꠣꠞ ꠟꠉꠦ ꠇꠣꠝ ꠇꠞꠂꠘ,
ꠔꠣꠞꠣ ꠀꠝꠣꠞꠦ ꠛꠃꠔ ꠡꠣꠅꠡ ꠖꠤꠍꠂꠘ।
১২ ꠀꠛꠥ-ꠚꠣꠞꠣꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ,
ꠔꠣꠁꠘ ꠔ ꠔꠥꠝꠞꠣꠞ ꠀꠙꠘ ꠝꠣꠘꠥꠡ ꠀꠞ ꠁꠍꠣ ꠀꠟ-ꠝꠍꠤꠞ ꠉꠥꠟꠣꠝ।
ꠄꠁꠘ ꠢꠣꠝꠦꠡꠣ ꠔꠥꠝꠞꠣꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠝꠥꠘꠣꠎꠣꠔ ꠇꠞꠞꠣ,
ꠔꠥꠝꠞꠣ ꠎꠣꠔꠦ ꠇꠣꠝꠤꠟ ꠅꠅ,
ꠀꠞ ꠀꠟ꠆ꠟꠣꠞ ꠝꠞ꠆ꠎꠤ-ꠝꠥꠘꠡꠣ ꠛꠥꠎꠤꠀ ꠝꠎꠛꠥꠔ ꠅꠁꠀ ꠃꠛꠣꠅ।
১৩ ꠔꠣꠘ ꠛꠦꠙꠣꠞꠦ ꠀꠝꠤ ꠅꠃ ꠡꠣꠇ꠆ꠇꠤ ꠖꠤꠔꠣꠝ ꠙꠣꠞꠤ,
ꠔꠥꠝꠞꠣꠞ ꠟꠣꠉꠤ ꠀꠞ ꠟꠣꠅꠖꠤꠇꠦꠀ,
ꠢꠤꠅꠞꠣꠙꠟꠤ ꠐꠣꠃꠘꠞ ꠝꠣꠘꠡꠞ ꠟꠣꠉꠤꠅ ꠀꠛꠥ-ꠚꠣꠞꠣꠍꠦ ꠈꠥꠛ ꠝꠦꠘꠔ ꠇꠞꠂꠘ।
১৪ ꠀꠝꠞꠣꠞ ꠝꠣꠄꠀꠞ ꠇꠛꠤꠞꠣꠎ ꠟꠥꠇ ꠀꠞ ꠜꠣꠁ ꠖꠤꠝꠣꠍꠦꠅ ꠔꠥꠝꠞꠣꠞꠦ ꠍꠣꠟꠣꠝ ꠖꠤꠍꠂꠘ।
১৫ ꠟꠣꠅꠖꠤꠇꠦꠀꠞ ꠁꠝꠣꠘꠖꠣꠞ ꠜꠣꠁ ꠅꠇꠟꠞꠦ,
ꠀꠞ ꠘꠤꠝꠥꠚꠣ ꠀꠞ ꠔꠣꠘ ꠛꠣꠠꠤꠞ ꠎꠝꠣꠔꠞ ꠢꠇꠟꠞ ꠉꠦꠍꠦꠅ ꠍꠣꠟꠣꠝ ꠎꠣꠘꠣꠁꠅ।
১৬ ꠔꠥꠝꠞꠣ ꠅꠃ ꠌꠤꠑꠤꠈꠣꠘ ꠙꠠꠤꠀ ꠢꠣꠞꠟꠦ ꠟꠣꠅꠖꠤꠇꠦꠀꠞ ꠎꠝꠣꠔꠞ ꠝꠣꠘꠡꠞꠦ ꠙꠠꠣꠞ ꠟꠣꠉꠤ ꠖꠤꠅ ꠀꠞ ꠟꠣꠅꠖꠤꠇꠦꠀ ꠎꠝꠣꠔꠞꠦ ꠖꠥꠍꠞꠣ ꠎꠦ ꠌꠤꠑꠤ ꠖꠦꠅꠀ ꠅꠁꠍꠦ,
ꠅꠃ ꠌꠤꠑꠤꠅ ꠔꠥꠝꠞꠣ ꠙꠠꠤꠅ।
১৭ ꠀꠞ꠆ꠈꠤꠙꠣꠍꠞꠦ ꠅꠈꠣꠘ ꠇꠁꠅ,
“ꠝꠣꠟꠤꠇꠞ ꠈꠦꠎꠝꠔꠅ ꠔꠥꠝꠣꠞꠦ ꠎꠦ ꠇꠣꠝ ꠖꠦꠅꠀ ꠅꠁꠍꠦ,
ꠅꠃ ꠇꠣꠝ ꠡꠦꠡ ꠇꠞꠣꠞ ꠘꠤꠅꠔꠦ ꠝꠘ ꠖꠤꠀ ꠇꠣꠝ ꠇꠞꠅ।”
১৮ ꠀꠝꠤ ꠙꠣꠃꠟꠥꠍꠦ ꠘꠤꠎꠞ ꠀꠔꠦ ꠅꠃ ꠍꠣꠟꠣꠝꠞ ꠇꠕꠣ ꠟꠦꠈꠟꠣꠝ।
ꠝꠘꠅ ꠞꠣꠈꠤꠅ,
ꠀꠝꠤ ꠎꠦꠟꠅ ꠛꠘ꠆ꠖꠤ ꠀꠍꠤ।
ꠀꠟ꠆ꠟꠣꠄ ꠔꠥꠝꠞꠣ ꠢꠇꠟꠞ ꠃꠙꠞꠦ ꠞꠢꠝꠔ ꠘꠣꠎꠤꠟ ꠇꠞꠃꠇ꠆ꠇꠣ।
ꠀꠝꠤꠘ॥