ꠀꠟ꠆ꠟꠣꠞ ꠡꠤꠟ-ꠌꠣꠙ꠆ꠙꠠ ꠝꠣꠞꠣ ꠉꠥꠟꠣꠝ
৭
১ ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ,
ꠖꠥꠘꠤꠀꠞ ꠌꠣꠁꠞ ꠇꠥꠘꠣꠔ ꠌꠣꠁꠞꠎꠘ ꠚꠤꠞꠤꠡ꠆ꠔꠣ ꠃꠛꠣꠁ ꠞꠁꠍꠂꠘ।
ꠔꠣꠞꠣ ꠖꠥꠘꠤꠀꠔ,
ꠖꠞꠤꠀꠔ ꠀꠞ ꠢꠇꠟ ꠉꠣꠍ-ꠙꠣꠟꠣꠔ ꠛꠣꠔꠣꠡ ꠢꠣꠝꠣꠘꠤꠞ ꠖꠥꠀꠞ ꠛꠘ꠆ꠖ ꠇꠞꠣꠞ ꠟꠣꠉꠤ ꠃꠛꠣꠁꠍꠂꠘ।
২ ꠛꠣꠖꠦ ꠀꠝꠤ ꠖꠦꠈꠟꠣꠝ,
ꠙꠥꠛꠦ ꠕꠣꠇꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠃꠑꠤꠀ ꠀꠁꠞꠣ,
ꠎꠤꠘ꠆ꠖꠣ ꠀꠟ꠆ꠟꠣꠞ ꠡꠤꠟ-ꠌꠣꠙ꠆ꠙꠠ ꠔꠣꠘ ꠉꠦꠍꠦ ꠀꠍꠦ।
ꠔꠣꠁꠘ ꠀꠁꠀ ꠎꠦ ꠌꠣꠁꠞꠎꠘ ꠚꠤꠞꠤꠡ꠆ꠔꠣꠞꠦ ꠖꠥꠘꠤꠀ ꠀꠞ ꠖꠞꠤꠀꠞ ꠈꠦꠔꠤ ꠇꠞꠣꠞ ꠟꠣꠉꠤ ꠈꠦꠝꠔꠣ ꠖꠦꠅꠀ ꠅꠁꠍꠤꠟ,
ꠢꠃ ꠌꠣꠁꠞꠅ ꠚꠤꠞꠤꠡ꠆ꠔꠣꠞꠦ ꠎꠥꠞꠦ ꠎꠥꠞꠦ ꠒꠣꠇꠤꠀ ꠇꠁꠟꠣ,
৩ “ꠀꠝꠞꠣ ꠎꠔꠛꠁꠟ ꠀꠝꠞꠣꠞ ꠀꠟ꠆ꠟꠣꠞ ꠉꠥꠟꠣꠝ ꠅꠇꠟꠞ ꠇꠙꠣꠟꠅ ꠡꠤꠟ ꠘꠣ ꠝꠣꠞꠍꠤ,
ꠅꠔꠛꠁꠟ ꠔꠥꠝꠞꠣ ꠖꠥꠘꠤꠀꠞ,
ꠖꠞꠤꠀꠞ ꠛꠣ ꠉꠣꠍ-ꠙꠣꠟꠣꠞ ꠈꠦꠔꠤ ꠇꠞꠤꠅ ꠘꠣ।”
৪ ꠛꠣꠖꠦ ꠀꠝꠤ ꠢꠃ ꠡꠤꠟ-ꠌꠣꠙ꠆ꠙꠠ ꠝꠣꠞꠣ ꠝꠣꠘꠡꠞ ꠙꠞꠤꠝꠣꠘ ꠢꠥꠘꠟꠣꠝ।
ꠛꠘꠤ ꠁꠍꠞꠣꠁꠟꠞ ꠢꠇꠟ ꠈꠣꠘ꠆ꠖꠣꠘ ꠕꠣꠇꠤ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠎꠘꠞꠦ ꠡꠤꠟ ꠝꠣꠞꠣ ꠅꠁꠍꠦ।
৫ ꠄꠢꠥꠖꠣ ꠈꠣꠘ꠆ꠖꠣꠘꠞ ꠛꠣꠞꠅ ꠀꠎꠣꠞ ꠎꠘ ꠡꠤꠟ ꠝꠣꠞꠣ;
ꠞꠥꠛꠦꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠍꠣꠖꠥ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
৬ ꠀꠡꠤꠞ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠘꠙ꠆ꠔꠣꠟꠤ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠝꠣꠘꠡꠣ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
৭ ꠍꠣꠝꠣꠃꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠟꠦꠛꠤ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠁꠍꠣꠈꠞ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
৮ ꠍꠛꠥꠟꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠁꠃꠍꠥꠚ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ;
ꠛꠤꠘ-ꠁꠀꠝꠤꠘ ꠈꠣꠘ꠆ꠖꠣꠘ ꠕꠣꠇꠤ ꠛꠣꠞꠅ ꠀꠎꠣꠞ ꠎꠘ ꠡꠤꠟ ꠝꠣꠞꠣ।
ꠗꠟꠣ ꠟꠦꠛꠣꠍ ꠚꠤꠘ꠆ꠖꠣ ꠝꠣꠘꠡꠞ ꠝꠤꠍꠤꠟ
৯ ꠛꠣꠖꠦ ꠀꠝꠤ ꠖꠦꠈꠟꠣꠝ,
ꠙꠞꠔꠦꠇ ꠖꠦꠡ,
ꠢꠇꠟ ꠈꠣꠘ꠆ꠖꠣꠘ,
ꠢꠇꠟ ꠎꠣꠔꠤ ꠀꠞ ꠢꠇꠟ ꠎꠣꠔꠞ ꠛꠥꠟꠤꠄ ꠝꠣꠔꠞꠣ ꠛꠃꠔ ꠝꠣꠘꠥꠡ ꠖꠟꠣ ꠅꠁꠍꠂꠘ,
ꠄꠞꠣꠞꠦ ꠉꠘꠤꠀ ꠚꠥꠠꠣꠘꠤꠞ ꠡꠣꠁꠖ꠆ꠖ ꠇꠦꠃꠞꠞ ꠘꠣꠁ।
ꠄꠞꠣ ꠗꠟꠣ ꠟꠦꠛꠣꠍ ꠚꠤꠘ꠆ꠖꠤꠀ ꠈꠦꠎꠥꠞ ꠙꠣꠔꠣ ꠀꠔꠅ ꠟꠁꠀ,
ꠢꠃ ꠔꠈ꠆ꠔ ꠀꠞ ꠝꠦꠠꠣꠞ ꠛꠣꠁꠌ꠆ꠌꠣꠞ ꠍꠣꠝꠘꠦ ꠃꠛꠣꠁ ꠞꠁꠍꠂꠘ।
১০ ꠔꠣꠞꠣ ꠎꠥꠞꠦ ꠎꠥꠞꠦ ꠇꠁꠞꠣ,
“ꠀꠝꠞꠣꠞ ꠀꠟ꠆ꠟꠣ ꠎꠦꠁꠘ ꠔꠈ꠆ꠔꠅ ꠛꠅꠀꠔ ꠀꠍꠂꠘ,
ꠀꠞ ꠝꠦꠠꠣꠞ ꠛꠣꠁꠌ꠆ꠌꠣꠞ ꠀꠔꠅꠃ,
ꠉꠥꠘꠣꠞ ꠝꠣꠚꠤ ꠀꠞ ꠘꠣꠎꠣꠔ ꠀꠍꠦ।”
১১ ꠄꠞꠛꠣꠖꠦ ꠔꠣꠝꠣꠝ ꠚꠤꠞꠤꠡ꠆ꠔꠣ ꠅꠇꠟ,
ꠢꠃ ꠔꠈ꠆ꠔꠞ,
ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠀꠞ ꠌꠣꠁꠞꠅ ꠎꠣꠘꠖꠣꠞꠞ ꠌꠣꠁꠞꠅ ꠇꠣꠘ꠆ꠖꠣꠛꠣꠄ ꠃꠛꠣꠁꠟꠣ।
ꠔꠣꠞꠣ ꠔꠈ꠆ꠔꠞ ꠍꠣꠝꠘꠦ ꠍꠁꠎꠖꠣꠔ ꠙꠠꠤꠀ ꠇꠁꠟꠣ,
১২ “ꠀꠝꠤꠘ।
ꠔꠣꠞꠤꠚ,
ꠉꠃꠞꠛ,
ꠀꠈꠟ ꠀꠞ ꠡꠥꠇꠞꠤꠀ,
ꠁꠎ꠆ꠎꠔ,
ꠈꠦꠝꠔꠣ ꠀꠞ ꠛꠟ-ꠡꠇ꠆ꠔꠤ,
ꠎꠥꠉꠦ ꠎꠥꠉꠦ ꠀꠝꠞꠣꠞ ꠀꠟ꠆ꠟꠣꠞꠃ ꠅꠃꠇ।
ꠀꠝꠤꠘ।”
১৩ ꠛꠣꠖꠦ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠝꠣꠎꠞ ꠄꠇꠎꠘꠦ ꠀꠝꠣꠞꠦ ꠇꠁꠟꠣ,
“ꠛꠥꠎꠞꠣꠄ ꠘꠤ,
ꠗꠟꠣ ꠟꠦꠛꠣꠍ ꠚꠤꠘ꠆ꠖꠣ ꠅꠃ ꠝꠣꠘꠥꠡ ꠅꠇꠟ ꠇꠦ,
ꠄꠞꠣ ꠇꠥꠀꠁ ꠕꠣꠇꠤ ꠀꠁꠍꠂꠘ?”
১৪ ꠀꠝꠤ ꠔꠣꠘꠞꠦ ꠇꠁꠟꠣꠝ,
“ꠅ ꠝꠣꠟꠤꠇ,
ꠁꠔꠣ ꠔ ꠀꠙꠘꠦꠃ ꠎꠣꠘꠂꠘ।”
ꠔꠦꠃ ꠔꠣꠁꠘ ꠇꠁꠟꠣ,
“ꠄꠞꠣ ꠅꠁꠟꠣ ꠢꠃ ꠎꠘ ꠅꠇꠟ,
ꠎꠦꠞꠣ ꠢꠃ ꠝꠢꠣ ꠝꠍꠤꠛꠔꠞ ꠝꠣꠎ ꠕꠣꠇꠤ ꠀꠁꠍꠦ।
ꠔꠣꠞꠣꠞ ꠟꠦꠛꠣꠍꠞꠦ ꠝꠦꠠꠣꠞ ꠛꠣꠁꠌ꠆ꠌꠣꠞ ꠟꠃꠖꠤ ꠗꠁꠀ ꠗꠟꠣ ꠛꠣꠘꠣꠁꠍꠦ।
১৫ ꠄꠞꠟꠣꠉꠤ ꠄꠞꠣ ꠀꠟ꠆ꠟꠣꠞ ꠔꠈ꠆ꠔꠞ ꠍꠣꠝꠘꠦ ꠀꠍꠦ;
ꠔꠣꠞꠣ ꠖꠤꠘ-ꠞꠣꠁꠔ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣꠞ ꠝꠣꠎꠦ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠞꠣ।
ꠀꠞ ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠂꠘ,
ꠔꠣꠁꠘ ꠘꠤꠎꠦ ꠄꠞꠣꠞ ꠃꠙꠞꠦ ꠔꠣꠝ꠆ꠛꠥ ꠐꠣꠘꠣꠁ ꠖꠤꠛꠣ।
১৬ ꠄꠞꠣꠞ ꠀꠞ ꠇꠥꠘꠥꠖꠤꠘ ꠜꠥꠈ ꠟꠣꠉꠔ ꠘꠣꠄ,
ꠙꠣꠘꠤꠞ ꠙꠤꠀꠍꠦ ꠗꠞꠔ ꠘꠣꠄ;
ꠡꠥꠞꠥꠎꠞ ꠔꠦꠎ ꠄꠞꠣꠞ ꠉꠔꠞꠅ ꠟꠣꠉꠔ ꠘꠣꠄ,
ꠇꠥꠘꠥ ꠉꠞꠝꠅ ꠟꠣꠉꠔ ꠘꠣꠄ।
১৭ ꠔꠈ꠆ꠔꠞ ꠝꠣꠎꠞ ꠝꠦꠠꠣꠞ ꠛꠣꠁꠌ꠆ꠌꠣꠄꠃ ꠄꠞꠣꠞ ꠞꠣꠈꠣꠟꠤ ꠇꠞꠛꠣ।
ꠔꠣꠁꠘ ꠄꠞꠣꠞꠦ ꠀꠛꠦ-ꠢꠣꠄꠀꠔꠞ
ꠎꠤꠘ꠆ꠖꠦꠉꠤ-ꠙꠣꠘꠤꠞ ꠏꠞꠘꠣꠞ ꠉꠦꠍꠦ ꠟꠁꠀ ꠎꠣꠁꠛꠣ,
ꠀꠞ ꠀꠟ꠆ꠟꠣꠄ ꠄꠞꠣꠞ ꠌꠃꠈꠞ ꠙꠣꠘꠤ ꠚꠥꠍꠤꠀ ꠖꠤꠛꠣ।”