ꠝꠦꠠꠣꠞ ꠛꠣꠁꠌ꠆ꠌꠣ ꠀꠞ ꠘꠤꠈꠥꠔ ꠝꠣꠘꠥꠡ
১৪
১ ꠛꠣꠖꠦ ꠀꠝꠤ ꠌꠣꠁꠀ ꠖꠦꠈꠤ,
ꠢꠃ ꠝꠦꠠꠣꠞ ꠛꠣꠁꠌ꠆ꠌꠣ ꠎꠦꠞꠥꠎꠣꠟꠦꠝꠞ ꠙꠛꠤꠔ꠆ꠞ ꠍꠤꠅꠘ ꠙꠣꠠꠞ ꠃꠙꠞꠦ ꠃꠛꠣꠁ ꠞꠁꠍꠂꠘ।
ꠔꠣꠘ ꠟꠉꠦ ꠀꠍꠂꠘ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠝꠣꠘꠥꠡ।
ꠔꠣꠞꠣꠞ ꠇꠙꠣꠟꠞ ꠃꠙꠞꠦ ꠅꠃ ꠝꠦꠠꠣꠞ ꠛꠣꠁꠌ꠆ꠌꠣ ꠀꠞ ꠔꠣꠘ ꠉꠣꠁꠛꠤ ꠛꠣꠚꠞ ꠘꠣꠝ ꠟꠦꠈꠣ ꠀꠍꠦ।
২ ꠄꠞꠛꠣꠖꠦ ꠀꠝꠤ ꠛꠦꠢꠦꠡ꠆ꠔ ꠕꠣꠇꠤ ꠎꠥꠞꠦ ꠎꠥꠞꠦ ꠇꠟ-ꠇꠟꠣꠁꠀ ꠎꠣꠅꠀ ꠙꠣꠘꠤꠞ ꠚꠥꠔꠞ ꠀꠅꠀꠎ ꠀꠞ ꠎꠥꠞꠦ ꠑꠣꠐꠣ ꠙꠠꠣꠞ ꠡꠛ꠆ꠖꠞ ꠟꠣꠈꠣꠘ ꠄꠇ ꠀꠅꠀꠎ ꠢꠥꠘꠟꠣꠝ।
ꠀꠝꠣꠞ ꠝꠘꠅ ꠅꠁꠟ,
ꠇꠥꠘꠥ ꠡꠣꠞꠤꠘ꠆ꠖꠣ ꠛꠣꠎꠣꠅꠞꠣ ꠖꠟꠦ ꠡꠣꠞꠤꠘ꠆ꠖꠣ ꠛꠣꠎꠣꠁꠞꠣ।
৩ ꠄꠞꠣ ꠢꠃ ꠔꠈ꠆ꠔ,
ꠢꠃ ꠌꠣꠁꠞꠅ ꠎꠣꠘꠖꠣꠞ ꠀꠞ ꠢꠃ ꠝꠥꠞꠛ꠆ꠛꠤ ꠘꠦꠔꠣ ꠅꠇꠟꠞ ꠍꠣꠝꠘꠦ ꠄꠇ ꠘꠄꠀ ꠉꠎꠟ ꠉꠣꠁꠞꠣ।
ꠇꠥꠘꠥ ꠝꠣꠘꠡꠦ ꠁ ꠉꠎꠟ ꠢꠤꠇꠔ ꠙꠣꠞꠟ ꠘꠣ,
ꠈꠣꠟꠤ ꠖꠥꠘꠤꠀ ꠕꠣꠇꠤ ꠈꠣꠟꠣꠍ ꠇꠞꠤ ꠘꠦꠅꠀ ꠅꠃ ꠄꠇ ꠟꠣꠈ ꠌꠃꠌꠣꠟ꠆ꠟꠤꠡ ꠀꠎꠣꠞ ꠎꠘ ꠍꠣꠠꠣ।
৪ ꠄꠞꠣ ꠔ ꠢꠃ ꠝꠣꠘꠥꠡ,
ꠎꠦꠞꠣ ꠇꠥꠘꠥ ꠛꠦꠐꠤꠘ꠆ꠔꠞ ꠟꠉꠦ ꠎꠤꠘꠣ ꠇꠞꠤꠀ ꠘꠤꠎꠞ ꠇꠣꠄꠀꠞꠦ ꠘꠣꠙꠣꠇ ꠛꠣꠘꠣꠁꠍꠦ ꠘꠣ।
ꠅꠃ ꠝꠦꠠꠣꠞ ꠛꠣꠁꠌ꠆ꠌꠣ ꠎꠦ ꠎꠣꠉꠣꠔ ꠎꠣꠁꠘ,
ꠔꠣꠞꠣꠅ ꠄꠘ ꠈꠞꠦ ꠈꠞꠦ ꠞꠂꠘ।
ꠀꠟ꠆ꠟꠣ ꠀꠞ ꠝꠦꠠꠣꠞ ꠛꠣꠁꠌ꠆ꠌꠣꠞ ꠘꠣꠝꠦ ꠈꠦꠔꠞ ꠙꠄꠟꠣ ꠚꠡꠟ ꠢꠤꠡꠣꠛꠦ ꠄꠞꠣꠞꠦ ꠎꠉꠔꠞ ꠝꠣꠘꠡꠞ ꠉꠦꠍ ꠕꠣꠇꠤ ꠈꠣꠟꠣꠍ ꠇꠞꠣ ꠅꠁꠍꠤꠟ।
৫ ꠄꠞꠣ ꠇꠥꠘꠥꠖꠤꠘꠅ ꠝꠤꠍꠣ ꠝꠣꠔ ꠝꠣꠔꠤꠍꠂꠘ ꠘꠣ,
ꠄꠞꠣ ꠡꠥꠟ꠆ꠟꠀꠘꠣ ꠘꠤꠈꠥꠔ।
ꠀꠈꠦꠞꠤ ꠡꠣꠔꠐꠣ ꠉꠎꠛ (১৪:৬-১৬:২১)
ꠔꠤꠘꠎꠘ ꠚꠤꠞꠤꠡ꠆ꠔꠣ
৬ ꠛꠣꠖꠦ ꠀꠝꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠖꠦꠈꠟꠣꠝ,
ꠄꠁꠘ ꠀꠍꠝꠣꠘꠞ ꠝꠣꠎꠦꠖꠤ ꠃꠠꠤꠞꠣ।
ꠖꠥꠘꠤꠀꠔ ꠛꠡꠔ ꠇꠞꠞꠣ ꠙꠞꠔꠦꠇ ꠖꠦꠡ,
ꠙꠞꠔꠦꠇ ꠈꠣꠘ꠆ꠖꠣꠘ,
ꠙꠞꠔꠦꠇ ꠜꠣꠡꠣꠄ ꠝꠣꠔꠞꠣ ꠀꠞ ꠙꠞꠔꠦꠇ ꠎꠣꠔꠤꠞ ꠝꠣꠘꠡꠞ ꠟꠣꠉꠤ ꠌꠤꠞꠇꠣꠟꠤꠘ ꠈꠥꠡꠤꠞ ꠈꠛꠞ ꠔꠣꠘ ꠉꠦꠍꠦ ꠀꠍꠦ।
৭ ꠔꠣꠁꠘ ꠎꠥꠞꠦ ꠎꠥꠞꠦ ꠄꠟꠣꠘ ꠇꠞꠟꠣ,
“ꠀꠟ꠆ꠟꠣ ꠙꠣꠇꠞꠦ ꠒꠞꠣꠅ,
ꠔꠣꠘ ꠁꠎ꠆ꠎꠔ-ꠔꠣꠞꠤꠚ ꠇꠞꠅ,
ꠔꠣꠘ ꠛꠤꠌꠣꠞꠞ ꠡꠝꠄ ꠀꠁꠌ꠆ꠍꠦ।
ꠎꠦꠁꠘ ꠀꠍꠝꠣꠘ-ꠎꠝꠤꠘ,
ꠖꠞꠤꠀ ꠀꠞ ꠈꠣꠟ-ꠛꠤꠟ,
ꠉꠣꠋ ꠅꠇꠟ ꠙꠄꠖꠣ ꠇꠞꠍꠂꠘ,
ꠔꠣꠘ ꠄꠛꠣꠖꠔ ꠇꠞꠅ।”
৮ ꠛꠣꠖꠦ ꠔꠣꠘ ꠈꠞꠦ ꠈꠞꠦ ꠖꠥꠍꠞꠣ ꠚꠤꠞꠤꠡ꠆ꠔꠣ ꠀꠁꠀ ꠇꠁꠟꠣ,
“ꠛꠤꠘꠣꠡ ꠅꠁꠉꠦꠟ,
ꠛꠤꠘꠣꠡ ꠅꠁꠉꠦꠟ,
ꠢꠃ ꠘꠣꠝꠇꠞꠣ ꠛꠣꠛꠤꠟ ꠐꠣꠃꠘ ꠛꠤꠘꠣꠡ ꠅꠁꠉꠦꠟ।
ꠎꠦ ꠐꠣꠃꠘꠦ ꠔꠣꠁꠞ ꠎꠤꠘꠣꠞ ꠇꠣꠝꠞ ꠇꠠꠣ ꠘꠤꠡꠣ-ꠙꠣꠘꠤ ꠢꠇꠟ ꠎꠣꠔꠤꠞꠦ ꠈꠣꠅꠀꠁꠍꠦ,
ꠔꠣꠁ ꠛꠤꠘꠣꠡ ꠅꠁꠉꠦꠟ।”
৯ ꠛꠣꠖꠦ ꠔꠤꠘ ꠘꠝ꠆ꠛꠞ ꠚꠤꠞꠤꠡ꠆ꠔꠣ ꠄꠞꠣꠞ ꠈꠞꠦ ꠈꠞꠦ ꠀꠁꠀ ꠎꠥꠞ ꠉꠟꠣꠄ ꠇꠁꠟꠣ,
“ꠇꠥꠘꠥ ꠝꠣꠘꠡꠦ ꠎꠥꠖꠤ ꠅꠃ ꠎꠣꠘꠥꠀꠞ ꠀꠞ ꠅꠉꠥꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠦ,
ꠅꠉꠥꠞ ꠡꠤꠟ ꠔꠣꠞ ꠀꠔꠅ ꠛꠣ ꠇꠙꠣꠟꠅ ꠟꠣꠉꠣꠄ,
১০ ꠔꠦ ꠢꠦ-ꠅ ꠀꠟ꠆ꠟꠣꠁ ꠉꠎꠛꠤ ꠘꠤꠡꠣ-ꠙꠣꠘꠤ ꠈꠣꠁꠔꠦ ꠅꠁꠛ।
ꠅꠃ ꠘꠤꠡꠣꠞ ꠟꠉꠦ ꠇꠥꠘꠥꠎꠣꠔ ꠙꠣꠘꠤ ꠘꠣ ꠝꠤꠡꠣꠁꠀ ꠀꠟ꠆ꠟꠣꠁ ꠉꠎꠛꠤ ꠛꠣꠐꠤꠔ ꠜꠞꠣ ꠅꠁꠍꠦ।
ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠅꠇꠟ ꠀꠞ ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣꠞ ꠍꠣꠝꠘꠦ,
ꠀꠉꠥꠁꠘ ꠀꠞ ꠉꠘ꠆ꠖꠇ ꠖꠤꠀ ꠁ ꠝꠣꠘꠡꠞꠦ ꠡꠣꠎꠣ ꠖꠦꠅꠀ ꠅꠁꠛ।
১১ ꠎꠦ ꠀꠉꠥꠘꠤꠔ ꠁꠔꠣꠞꠦ ꠎꠣꠟꠣꠁꠟ ꠅꠁꠛ,
ꠁ ꠀꠉꠥꠘꠤꠞ ꠗꠥꠝꠣ ꠇꠥꠘꠥꠖꠤꠘ ꠛꠘ꠆ꠖ ꠅꠁꠔ ꠘꠣꠄ।
ꠎꠦ ꠝꠣꠘꠡꠦ ꠅꠃ ꠎꠣꠘꠥꠀꠞ ꠀꠞ ꠔꠣꠞ ꠝꠥꠞ꠆ꠔꠤꠞ ꠙꠥꠎꠣ ꠇꠞꠛ,
ꠅꠉꠥꠞ ꠘꠣꠝꠞ ꠢꠃ ꠡꠤꠟ ꠟꠣꠉꠣꠁꠛ,
ꠢꠦ ꠖꠤꠘ-ꠞꠣꠁꠔ ꠇꠥꠘꠥ ꠡꠝꠄꠃ ꠀꠎꠣꠛ ꠕꠣꠇꠤ ꠞꠦꠢꠣꠁ ꠙꠣꠁꠔ ꠘꠣꠄ।”
১২ ꠄꠞꠟꠣꠉꠤ ꠎꠦꠞꠣ ꠀꠟ꠆ꠟꠣꠞ ꠢꠥꠇꠥꠝ ꠝꠣꠘꠦ ꠀꠞ ꠢꠎꠞꠔ ꠁꠍꠣꠞ ꠔꠞꠤꠇꠣꠞ ꠁꠝꠣꠘꠦ ꠝꠎꠛꠥꠔ ꠞꠄ,
ꠀꠟ꠆ꠟꠣꠞ ꠅꠃ ꠙꠣꠇ ꠛꠘ꠆ꠖꠣ ꠅꠇꠟꠦ ꠁ ꠢꠣꠟꠔꠞ ꠝꠣꠎꠦ ꠍꠛꠞ ꠕꠣꠇꠣ ꠎꠞꠥꠞ।
১৩ ꠛꠣꠖꠦ ꠀꠝꠤ ꠢꠥꠘꠟꠣꠝ,
ꠛꠦꠢꠦꠡ꠆ꠔ ꠕꠣꠇꠤ ꠄꠇꠎꠘꠦ ꠇꠁꠞꠣ,
“ꠅꠃ ꠀꠄꠀꠔ ꠟꠦꠈꠅ,
ꠅꠈꠘ ꠕꠣꠇꠤ ꠝꠣꠟꠤꠇꠞ ꠔꠞꠤꠇꠣꠔ ꠞꠁꠀ ꠎꠔ ꠎꠘꠞ ꠎꠣꠘ ꠎꠣꠁꠛ,
ꠄꠞꠣꠃ ꠘꠦꠇ-ꠇꠙꠣꠟꠤ।”
ꠙꠣꠇ ꠞꠥꠢꠦ ꠅꠃ ꠡꠣꠇ꠆ꠇꠤ ꠖꠤꠞꠣ,
“ꠘꠤꠌ꠆ꠌꠄ ꠄꠞꠣꠃ ꠘꠦꠇ-ꠇꠙꠣꠟꠤ।
ꠔꠣꠞꠣꠞ ꠇꠣꠝ-ꠇꠣꠎ ꠕꠣꠇꠤ ꠔꠣꠞꠣ ꠞꠦꠢꠣꠁ ꠙꠣꠁꠛꠣ,
ꠇꠣꠞꠘ ꠔꠣꠞꠣꠞ ꠇꠣꠝꠞ ꠚꠟ ꠔꠣꠞꠣꠞ ꠟꠉꠦ ꠟꠉꠦ ꠞꠁꠛ।”
ꠖꠥꠘꠤꠀꠞ ꠚꠡꠟ ꠇꠣꠐꠣ
১৪ ꠛꠣꠖꠦ ꠀꠝꠤ ꠌꠣꠁꠀ ꠖꠦꠈꠟꠣꠝ,
ꠗꠟꠣ ꠄꠇ ꠝꠦꠊꠞ ꠌꠣꠇꠣ,
ꠅꠃ ꠌꠣꠇꠣꠞ ꠃꠙꠞꠦ ꠛꠤꠘ-ꠀꠖꠝꠞ ꠟꠣꠈꠣꠘ ꠇꠦꠃ ꠄꠇꠎꠘ ꠛꠅꠀꠔ ꠀꠍꠂꠘ।
ꠔꠣꠘ ꠝꠣꠕꠣꠔ ꠡꠥꠘꠣꠞ ꠔꠣꠎ ꠀꠞ ꠀꠔꠅ ꠀꠍꠤꠟ ꠗꠣꠞꠣꠁꠟ ꠇꠣꠌꠤ।
১৫ ꠛꠣꠖꠦ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠛꠦꠢꠦꠡ꠆ꠔꠤ ꠄꠛꠣꠖꠔ ꠈꠣꠘꠣ ꠕꠣꠇꠤ ꠛꠣꠞꠅꠁꠀ ꠀꠁꠟꠣ,
ꠀꠞ ꠎꠦꠁꠘ ꠝꠦꠊꠞ ꠃꠙꠞꠦ ꠛꠅꠀꠔ ꠀꠍꠟꠣ ꠔꠣꠘꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ,
“ꠖꠥꠘꠤꠀꠞ ꠚꠡꠟ ꠇꠣꠐꠤꠛꠣꠞ ꠡꠝꠄ ꠅꠁꠍꠦ,
ꠚꠡꠟ ꠙꠥꠞꠣꠙꠥꠞ ꠙꠣꠇꠤ ꠉꠦꠍꠦ,
ꠀꠙꠘꠣꠞ ꠇꠣꠌꠤ ꠟꠣꠉꠣꠃꠇ꠆ꠇꠣ ꠀꠞ ꠚꠡꠟ ꠇꠣꠐꠃꠇ꠆ꠇꠣ।”
১৬ ꠔꠦꠃ ꠅꠃ ꠝꠦꠊꠞ ꠌꠣꠇꠣꠞ ꠃꠙꠞꠦ ꠎꠦꠁꠘ ꠛꠅꠀꠔ ꠀꠍꠟꠣ,
ꠄꠁꠘ ꠖꠥꠘꠤꠀꠔ ꠔꠣꠘ ꠇꠣꠌꠤ ꠟꠣꠉꠣꠁꠟꠣ ꠀꠞ ꠖꠥꠘꠤꠀꠞ ꠚꠡꠟ ꠇꠣꠐꠣ ꠅꠁꠟ।
১৭ ꠛꠣꠖꠦ ꠛꠦꠢꠦꠡ꠆ꠔꠞ ꠄꠛꠣꠖꠔ ꠈꠣꠘꠣ ꠕꠣꠇꠤ ꠀꠞꠇ ꠎꠘ ꠚꠤꠞꠤꠡ꠆ꠔꠣ ꠛꠣꠞꠅꠁꠀ ꠀꠁꠟꠣ,
ꠔꠣꠘ ꠉꠦꠍꠦꠅ ꠄꠇꠈꠣꠘ ꠗꠣꠞꠣꠁꠟ ꠇꠣꠌꠤ ꠀꠍꠤꠟ।
১৮ ꠄꠞꠛꠣꠖꠦ ꠇꠥꠞꠛꠣꠘꠤ ꠈꠣꠘꠣꠞ ꠉꠦꠍ ꠕꠣꠇꠤ ꠄꠇꠎꠘ ꠚꠤꠞꠤꠡ꠆ꠔꠣ ꠛꠣꠞꠅꠁꠀ ꠀꠁꠟꠣ,
ꠔꠣꠘ ꠈꠦꠝꠔꠣ ꠀꠍꠤꠟ ꠀꠉꠥꠘꠤꠞ ꠃꠙꠞꠦ।
ꠀꠁꠀ ꠔꠣꠁꠘ ꠎꠥꠞꠦ ꠎꠥꠞꠦ ꠢꠃ ꠇꠣꠌꠤꠀꠟꠣ ꠚꠤꠞꠤꠡ꠆ꠔꠣꠞꠦ ꠒꠣꠇꠤꠀ ꠇꠁꠟꠣ,
“ꠔꠥꠝꠣꠞ ꠗꠣꠞꠣꠁꠟ ꠇꠣꠌꠤꠈꠣꠘ ꠟꠣꠉꠣꠅ ꠀꠞ ꠖꠥꠘꠤꠀꠞ ꠀꠋꠉꠥꠞ ꠉꠣꠍ ꠕꠣꠇꠤ ꠀꠋꠉꠥꠞꠞ ꠍꠠꠤꠘ ꠇꠣꠐꠤꠀ ꠖꠟꠣ ꠇꠞꠅ,
ꠁꠔꠣ ꠔ ꠙꠣꠇꠤ ꠉꠦꠍꠦ।”
১৯ ꠔꠦꠃ ꠢꠃ ꠚꠤꠞꠤꠡ꠆ꠔꠣꠄ ꠖꠥꠘꠤꠀꠔ ꠔꠣꠘ ꠇꠣꠌꠤ ꠟꠣꠉꠣꠁꠟꠣ ꠀꠞ ꠖꠥꠘꠤꠀꠞ ꠀꠋꠉꠥꠞ ꠉꠣꠍꠞ ꠢꠇꠟ ꠀꠋꠉꠥꠞ ꠖꠟꠣ ꠇꠞꠤꠀ,
ꠀꠋꠉꠥꠞ ꠝꠣꠠꠣꠞ ꠉꠣꠔꠅ ꠚꠣꠟꠣꠁꠟꠣ।
ꠅꠃ ꠉꠣꠔ ꠅꠁꠟ ꠀꠟ꠆ꠟꠣꠞ ꠉꠎꠛꠞ ꠝꠢꠣ ꠉꠣꠔ।
২০ ꠐꠣꠃꠘꠞ ꠛꠣꠞꠦ ꠀꠋꠉꠥꠞ ꠝꠣꠠꠣꠞ ꠉꠣꠔꠅ ꠁ ꠀꠋꠉꠥꠞ ꠝꠣꠠꠤꠀ ꠢꠣꠞꠟꠦ,
ꠁꠔꠣ ꠕꠣꠇꠤ ꠟꠃ ꠛꠣꠞꠅꠁꠟ,
ꠁ ꠟꠃꠞ ꠛꠁꠘ꠆ꠘꠣꠄ ꠊꠥꠠꠣꠁꠘ꠆ꠔꠞ ꠟꠣꠉꠣꠝ ꠙꠞ꠆ꠎꠘ꠆ꠔ ꠀꠁꠀ ꠍꠁꠟ।
ꠟꠃꠄ ꠄꠇ ꠀꠎꠣꠞ ꠍꠄꠡ ꠡ꠆ꠔꠣꠖꠤꠀ (ꠅꠘꠥꠝꠣꠘ ꠖꠥꠁꠡ ꠝꠣꠁꠟ) ꠎꠣꠉꠣ ꠒꠥꠛꠤ ꠉꠦꠟ।