ꠀꠈꠦꠞꠤ ꠡꠣꠔ ꠉꠎꠛ
১৫
১ ꠛꠣꠖꠦ ꠀꠝꠤ ꠛꠦꠢꠦꠡ꠆ꠔꠞ ꠝꠣꠎꠦ ꠀꠞꠇꠐꠣ ꠟꠤꠟꠣ-ꠈꠦꠟꠣ ꠖꠦꠈꠟꠣꠝ,
ꠁꠐꠣ ꠛꠠ ꠝꠢꠣꠘ ꠔꠣꠁꠎ꠆ꠎꠥꠛꠤ।
ꠀꠝꠤ ꠖꠦꠈꠟꠣꠝ,
ꠡꠣꠔꠎꠘ ꠚꠤꠞꠤꠡ꠆ꠔꠣ ꠀꠍꠂꠘ,
ꠄꠞꠣꠞ ꠀꠔꠅ ꠀꠈꠦꠞꠤ ꠡꠣꠔꠐꠣ ꠉꠎꠛ।
ꠁꠔꠣꠞꠦ ꠀꠈꠦꠞꠤ ꠉꠎꠛ ꠇꠅꠀꠞ ꠇꠣꠞꠘ ꠅꠁꠟ,
ꠅꠉꠥꠁꠘ ꠖꠤꠀ ꠀꠟ꠆ꠟꠣ ꠙꠣꠇꠞ ꠉꠥꠍꠣꠞ ꠡꠦꠡ ꠚꠄꠍꠣꠟꠣ ꠅꠁꠛ।
২ ꠛꠣꠖꠦ ꠀꠝꠤ ꠖꠦꠈꠟꠣꠝ,
ꠀꠉꠥꠁꠘꠀꠟꠣ ꠄꠇ ꠇꠣꠌꠞ ꠖꠞꠤꠀ,
ꠀꠞ ꠎꠔ ꠝꠣꠘꠡꠦ ꠢꠃ ꠎꠣꠘꠥꠀꠞ,
ꠔꠣꠞ ꠝꠥꠞ꠆ꠔꠤ ꠛꠣ ꠔꠣꠞ ꠘꠣꠝꠞ ꠘꠝ꠆ꠛꠞꠞ ꠃꠙꠞꠦ ꠎꠤꠔꠍꠂꠘ,
ꠔꠣꠞꠣꠞꠦꠅ ꠖꠦꠈꠟꠣꠝ।
ꠖꠦꠈꠟꠣꠝ,
ꠔꠣꠞꠣ ꠀꠟ꠆ꠟꠣꠞ ꠖꠦꠅꠀ ꠡꠣꠞꠤꠘ꠆ꠖꠣ ꠀꠔꠅ ꠟꠁꠀ ꠇꠣꠌꠞ ꠖꠞꠤꠀꠞ ꠙꠣꠞꠅ ꠃꠛꠣꠁ ꠞꠁꠍꠂꠘ।
৩ ꠔꠣꠞꠣ ꠀꠟ꠆ꠟꠣꠞ ꠛꠘ꠆ꠖꠣ ꠝꠥꠍꠣ ꠘꠛꠤꠞ ꠀꠞ ꠢꠃ ꠝꠦꠠꠣꠞ ꠛꠣꠁꠌ꠆ꠌꠣꠞ ꠅꠃ ꠇꠣꠅꠀꠟꠤ ꠉꠣꠁꠞꠣ,
“ꠅ ꠡꠞꠛ-ꠡꠇ꠆ꠔꠤꠝꠣꠘ ꠝꠣꠛꠥꠖ ꠀꠟ꠆ꠟꠣ,
ꠔꠥꠝꠣꠞ ꠟꠤꠟꠣ-ꠈꠦꠟꠣ ꠇꠔ ꠝꠢꠣꠘ ꠀꠞ ꠀꠌꠣꠘꠇ!
ꠅ ꠔꠣꠝꠣꠝ ꠎꠣꠔꠤꠞ ꠛꠣꠖꠡꠣ,
ꠇꠔ ꠢꠇ ꠀꠞ ꠡꠑꠤꠇ ꠔꠥꠝꠣꠞ ꠙꠕ!
৪ ꠅ ꠝꠣꠛꠥꠖ,
ꠔꠥꠝꠣꠞꠦ ꠒꠞꠣꠁꠔ ꠘꠣꠄ ꠇꠥꠘ ꠎꠘꠦ?
ꠇꠥꠘ ꠎꠘꠦ ꠔꠥꠝꠣꠞ ꠘꠣꠝꠞ ꠔꠣꠞꠤꠚ ꠇꠞꠔ ꠘꠣꠄ?
ꠈꠣꠟꠤ ꠔꠥꠝꠤꠃ ꠔ ꠙꠣꠇ-ꠙꠛꠤꠔ꠆ꠞ,
ꠔꠣꠝꠣꠝ ꠎꠣꠔꠤꠞ ꠀꠁꠛ ꠔꠥꠝꠣꠞ ꠖꠞꠛꠣꠞꠅ,
ꠢꠇ꠆ꠇꠟꠦꠃ ꠔꠥꠝꠣꠞ ꠄꠛꠣꠖꠔ ꠇꠞꠛ,
ꠔꠥꠝꠣꠞ ꠢꠇ ꠛꠤꠌꠣꠞ ꠔ ꠎꠣꠁꠞ ꠅꠁꠉꠦꠍꠦ।”
৫ ꠄꠞꠛꠣꠖꠦ ꠀꠝꠤ ꠖꠦꠈꠟꠣꠝ,
ꠛꠦꠢꠦꠡ꠆ꠔꠞ ꠢꠃ ꠡꠣꠢꠣꠖꠔ ꠔꠣꠝ꠆ꠛꠥꠞ ꠜꠤꠔꠞꠞ ꠙꠛꠤꠔ꠆ꠞ ꠇꠣꠛꠣ ꠊꠞꠈꠣꠘ ꠈꠥꠟꠣ ꠅꠁꠟ।
৬ ꠅꠃ ꠡꠝꠄ ꠢꠃ ꠡꠣꠔꠎꠘ ꠚꠤꠞꠤꠡ꠆ꠔꠣꠄ ꠡꠣꠔꠐꠣ ꠉꠎꠛ ꠟꠁꠀ ꠇꠣꠛꠣ ꠊꠞ ꠕꠣꠇꠤ ꠛꠣꠞꠅꠁꠀ ꠀꠁꠟꠣ।
ꠔꠣꠞꠣꠞ ꠚꠤꠘ꠆ꠘꠞ ꠟꠦꠛꠣꠍ ꠀꠍꠤꠟ ꠌꠇꠌꠇꠣ ꠙꠞꠤꠡ꠆ꠇꠣꠞ ꠀꠞ ꠛꠥꠇꠥꠔ ꠀꠍꠤꠟ ꠡꠥꠘꠣꠟꠤ ꠙꠐ꠆ꠐꠤ।
৭ ꠢꠃ ꠌꠣꠁꠞꠎꠘ ꠎꠣꠘꠖꠣꠞꠞ ꠄꠇꠎꠘꠦ ꠅꠃ ꠡꠣꠔꠅ ꠚꠤꠞꠤꠡ꠆ꠔꠣꠞꠦ ꠡꠣꠔꠐꠣ ꠡꠥꠘꠣꠞ ꠛꠣꠐꠤ ꠖꠤꠟꠣ।
ꠁ ꠡꠣꠔꠅ ꠛꠣꠐꠤ ꠜꠞꠣ ꠀꠍꠤꠟ ꠈꠣꠟꠤ ꠀꠟ꠆ꠟꠣ ꠙꠣꠇꠞ ꠉꠥꠍꠣ,
ꠎꠦꠁꠘ ꠎꠥꠉꠦ ꠎꠥꠉꠦ ꠢꠞ-ꠢꠣꠝꠦꠡꠣ ꠎꠤꠘ꠆ꠖꠣ ꠀꠍꠂꠘ।
৮ ꠀꠟ꠆ꠟꠣꠞ ꠇꠥꠖꠞꠔꠤ ꠝꠢꠤꠝꠣ ꠕꠣꠇꠤ ꠎꠦ ꠗꠥꠝꠣ ꠛꠣꠞꠅꠘꠤꠔ ꠀꠍꠤꠟ,
ꠅꠃ ꠗꠥꠝꠣꠄ ꠀꠡ꠆ꠔꠣ ꠊꠞ ꠜꠞꠤ ꠉꠦꠟ।
ꠀꠞ ꠅꠃ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠡꠣꠔꠐꠣ ꠉꠎꠛ ꠘꠣ ꠚꠥꠞꠣꠘꠤ ꠙꠞ꠆ꠎꠘ꠆ꠔ ꠇꠦꠃ ꠉꠤꠀ ꠇꠣꠛꠣ ꠊꠞꠅ ꠢꠣꠝꠣꠁꠔ ꠙꠣꠞꠟ ꠘꠣ।