ꠘꠄꠀ ꠙꠄꠖꠣ (২১:১-২২:২১)
ꠘꠄꠀ ꠀꠍꠝꠣꠘ ꠀꠞ ꠘꠄꠀ ꠎꠝꠤꠘ
২১
১ ꠛꠣꠖꠦ ꠀꠝꠤ ꠄꠇꠈꠣꠘ ꠘꠄꠀ ꠀꠍꠝꠣꠘ ꠀꠞ ꠘꠄꠀ ꠎꠝꠤꠘ ꠖꠦꠈꠟꠣꠝ।
ꠙꠄꠟꠣ ꠀꠍꠝꠣꠘ ꠀꠞ ꠙꠄꠟꠣ ꠎꠝꠤꠘ ꠝꠤꠟꠣꠁ ꠉꠦꠍꠦ,
ꠇꠥꠘꠥ ꠖꠞꠤꠀꠅ ꠀꠞ ꠞꠁꠟ ꠘꠣ।
২ ꠀꠝꠤ ꠖꠦꠈꠟꠣꠝ,
ꠢꠃ ꠙꠛꠤꠔ꠆ꠞ ꠐꠣꠃꠘ,
ꠝꠣꠘꠤ ꠘꠄꠀ ꠎꠦꠞꠥꠎꠣꠟꠦꠝ।
ꠁꠈꠣꠘ ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠕꠣꠇꠤ ꠟꠣꠝꠤꠀ ꠀꠞ।
ꠇꠥꠘꠥ ꠛꠤꠀꠞ ꠇꠁꠘꠣꠞꠦ ꠎꠦꠟꠣ ꠖꠣꠝꠣꠘ꠆ꠖꠞ ꠟꠣꠉꠤ ꠢꠣꠎꠣꠁꠟ ꠅꠄ,
ꠅꠃ ꠐꠣꠃꠘꠞꠦꠅ ꠅꠟꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁꠟ ꠅꠁꠍꠤꠟ।
৩ ꠛꠣꠖꠦ ꠀꠝꠤ ꠢꠥꠘꠟꠣꠝ,
ꠢꠃ ꠛꠦꠢꠦꠡ꠆ꠔꠞ ꠔꠈ꠆ꠔꠅ ꠕꠣꠇꠤ ꠄꠇꠎꠘꠦ ꠎꠥꠞꠦ ꠎꠥꠞꠦ ꠇꠁꠞꠣ,
“ꠅꠈꠘ ꠝꠣꠘꠡꠞ ꠝꠣꠎꠦ ꠞꠅꠀꠞ ꠟꠣꠉꠤ ꠀꠟ꠆ꠟꠣ ꠙꠣꠇꠞ ꠎꠣꠉꠣ ꠅꠁꠍꠦ।
ꠔꠣꠁꠘ ꠝꠣꠘꠡꠞ ꠟꠉꠦ ꠛꠡꠔ ꠇꠞꠛꠣ,
ꠀꠞ ꠔꠣꠞꠣ ꠅꠁꠛꠣ ꠔꠣꠘ ꠛꠘ꠆ꠖꠣ।
ꠔꠣꠁꠘ ꠡ꠆ꠛꠄꠅꠋ ꠔꠣꠞꠣꠞ ꠟꠉꠦ ꠞꠁꠛꠣ,
ꠔꠣꠞꠣꠞ ꠀꠟ꠆ꠟꠣ ꠅꠁꠛꠣ।
৪ ꠔꠣꠁꠘ ꠄꠞꠣꠞ ꠌꠈꠥꠞ ꠙꠣꠘꠤ ꠚꠥꠍꠤꠀ ꠖꠤꠛꠣ।
ꠀꠞ ꠇꠥꠘꠥ ꠝꠞꠘ ꠅꠁꠔ ꠘꠣꠄ,
ꠖꠥꠈ,
ꠇꠣꠘ꠆ꠖꠘ,
ꠇꠡ꠆ꠐ ꠀꠞ ꠞꠁꠔ ꠘꠣꠄ,
ꠀꠉꠞ ꠁꠔꠣ ꠢꠇꠟꠔꠣꠃ ꠡꠦꠡ ꠅꠁꠉꠦꠍꠦ।”
৫ ꠔꠈ꠆ꠔꠅ ꠎꠦꠁꠘ ꠛꠅꠀꠔ ꠀꠍꠟꠣ ꠔꠣꠁꠘ ꠇꠁꠟꠣ,
“ꠢꠥꠘꠅ,
ꠀꠝꠤ ꠢꠇ꠆ꠇꠟꠔꠣꠞꠦ ꠘꠄꠀ ꠇꠞꠤ ꠙꠄꠖꠣ ꠇꠞꠤꠀꠞ।”
ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠇꠁꠟꠣ,
“ꠀꠝꠣꠞ ꠅꠃ ꠇꠕꠣꠈꠣꠘ ꠟꠦꠈꠅ,
ꠇꠣꠞꠘ ꠁꠔꠣ ꠄꠇꠤꠘ ꠇꠞꠣꠞ ꠟꠣꠈ ꠢꠣꠍꠣ।”
৬ ꠔꠣꠁꠘ ꠀꠝꠣꠞꠦ ꠄꠅꠈꠣꠘ ꠇꠁꠟꠣ,
“ꠡꠦꠡ ꠅꠁꠉꠦꠍꠦ।
ꠀꠝꠤꠃ ꠀꠟꠤꠚ ꠀꠞ ꠁꠀ,
ꠀꠃꠀꠟ ꠀꠞ ꠀꠈꠦꠞ।
ꠢꠥꠘꠅ,
ꠎꠣꠞ ꠙꠣꠘꠤꠞ ꠙꠤꠀꠍꠦ ꠗꠞꠍꠦ,
ꠔꠣꠞꠦ ꠀꠝꠤ ꠀꠛꠦ-ꠢꠣꠄꠀꠔꠞ ꠎꠤꠘ꠆ꠖꠦꠉꠤ-ꠙꠣꠘꠤꠞ ꠏꠞꠘꠣ ꠕꠣꠇꠤ ꠛꠤꠘꠣ ꠙꠄꠡꠣꠄ ꠙꠣꠘꠤ ꠖꠤꠝꠥ।
৭ ꠎꠦ ꠎꠘ ꠎꠂꠁ ꠅꠁꠛ,
ꠢꠦ ꠁꠔꠣ ꠢꠇꠟꠔꠣꠞ ꠅꠗꠤꠇꠣꠞ ꠙꠣꠁꠛ।
ꠀꠝꠤ ꠅꠁꠝꠥ ꠔꠣꠞ ꠀꠟ꠆ꠟꠣ,
ꠀꠞ ꠢꠦ ꠅꠁꠛ ꠀꠝꠣꠞ ꠙꠥꠔ।
৮ ꠅꠁꠟꠦ ꠇꠣ-ꠙꠥꠞꠥꠡ,
ꠛꠦꠁꠝꠣꠘ,
ꠢꠣꠞꠣꠝꠇꠥꠞ,
ꠈꠥꠘꠤ,
ꠎꠤꠘꠣꠈꠥꠞ,
ꠎꠣꠖꠥꠉꠤꠞ,
ꠝꠥꠞ꠆ꠔꠤꠙꠥꠎꠣ ꠇꠞꠞꠣ,
ꠀꠞ ꠢꠇꠟ ꠘꠝꠥꠘꠣꠞ ꠝꠤꠍꠣ ꠝꠣꠔꠞꠣ ꠅꠇꠟ ꠎꠣꠟꠣꠁꠟ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠣꠔꠅ ꠞꠁꠛꠣ।
ꠄꠞ ꠘꠣꠝꠃ ꠅꠁꠟ ꠖꠥꠍꠞꠣꠛꠣꠞꠞ ꠝꠃꠔ।”
ꠘꠄꠀ ꠎꠦꠞꠥꠎꠣꠟꠦꠝ ꠐꠣꠃꠘ
৯ ꠢꠃ ꠎꠦ ꠡꠣꠔꠎꠘ ꠚꠤꠞꠤꠡ꠆ꠔꠣꠞ ꠀꠔꠅ ꠀꠈꠦꠞꠤ ꠡꠣꠔꠅ ꠉꠎꠛ ꠜꠞꠣ ꠡꠣꠔꠐꠣ ꠛꠣꠐꠤ ꠀꠍꠤꠟ,
ꠄꠞꠣꠞ ꠝꠣꠎꠞ ꠄꠇꠎꠘꠦ ꠀꠝꠣꠞ ꠇꠣꠘ꠆ꠖꠣꠔ ꠀꠁꠀ ꠇꠁꠟꠣ,
“ꠀꠅ,
ꠀꠝꠤ ꠔꠥꠝꠣꠞꠦ ꠇꠁꠘꠣ-ꠛꠦꠐꠤ ꠖꠦꠈꠣꠁꠝꠥ,
ꠝꠣꠘꠤ ꠝꠦꠠꠣꠞ ꠛꠣꠁꠌ꠆ꠌꠣꠞ ꠛꠃꠞꠦ ꠖꠦꠈꠣꠁꠝꠥ।”
১০ ꠛꠣꠖꠦ ꠢꠃ ꠚꠤꠞꠤꠡ꠆ꠔꠣꠄ ꠞꠥꠢꠣꠘꠤ ꠢꠣꠟꠔꠦ ꠀꠝꠣꠞꠦ ꠛꠠ ꠄꠇ ꠃꠌꠣ ꠙꠣꠠꠞ ꠃꠙꠞꠦ ꠟꠁꠀ ꠉꠦꠟꠣ।
ꠘꠤꠀ ꠀꠟ꠆ꠟꠣꠞ ꠝꠢꠤꠝꠣꠄ ꠌꠇꠌꠇꠣ ꠎꠦ ꠙꠛꠤꠔ꠆ꠞ ꠎꠦꠞꠥꠎꠣꠟꠦꠝ ꠐꠣꠃꠘ,
ꠛꠦꠢꠦꠡ꠆ꠔꠞ ꠝꠣꠎ ꠕꠣꠇꠤ ꠀꠞ ꠀꠟ꠆ꠟꠣꠞ ꠖꠞꠛꠣꠞꠅ ꠕꠣꠇꠤ ꠟꠣꠝꠤꠀ ꠀꠅꠀꠔ ꠀꠍꠤꠟ,
ꠅꠃ ꠚꠤꠞꠤꠡ꠆ꠔꠣꠄ ꠀꠝꠣꠞꠦ ꠅꠔꠣ ꠖꠦꠈꠣꠁꠟꠣ।
১১ ꠁ ꠐꠣꠃꠘꠞ ꠞꠋ ꠈꠥꠛ ꠖꠣꠝꠤ ꠝꠘꠤ-ꠝꠥꠇ꠆ꠔꠣꠞ ꠟꠣꠈꠣꠘ ꠌꠇꠌꠇꠣ,
ꠚꠐꠤꠇꠞ ꠉꠟꠣꠡꠞ ꠘꠝꠥꠘꠣꠄ ꠖꠣꠝꠤ ꠢꠤꠞꠣꠞ ꠟꠣꠈꠣꠘ।
১২ ꠢꠃ ꠐꠣꠃꠘꠅ ꠛꠠ ꠄꠇꠈꠣꠘ ꠃꠌꠣ ꠅꠀꠟ ꠀꠍꠤꠟ,
ꠅꠃ ꠅꠀꠟꠅ ꠛꠣꠞꠅꠈꠣꠘ ꠉꠦꠁꠐ ꠀꠍꠤꠟ,
ꠛꠣꠞꠅ ꠉꠦꠁꠐꠅ ꠛꠣꠞꠅꠎꠘ ꠚꠤꠞꠤꠡ꠆ꠔꠣ ꠀꠍꠟꠣ।
ꠅꠃ ꠉꠦꠁꠐꠞ ꠃꠙꠞꠦ ꠛꠘꠤ ꠁꠍꠞꠣꠁꠟꠞ ꠛꠣꠞꠅ ꠈꠣꠘ꠆ꠖꠣꠘꠞ ꠘꠣꠝ ꠟꠦꠈꠣ।
১৩ ꠁ ꠉꠦꠁꠐꠞ ꠔꠤꠘꠈꠣꠘ ꠙꠥꠛꠦꠖꠤ,
ꠔꠤꠘꠈꠣꠘ ꠃꠔꠞꠦꠖꠤ,
ꠔꠤꠘꠈꠣꠘ ꠖꠃꠇꠘꠦꠖꠤ ꠀꠞ ꠔꠤꠘꠈꠣꠘ ꠙꠁꠌꠝꠦꠖꠤ ꠀꠍꠤꠟ।
১৪ ꠁ ꠐꠣꠃꠘꠞ ꠅꠀꠟꠞ ꠛꠣꠞꠅꠐꠣ ꠙꠤꠟꠣꠞ ꠀꠍꠤꠟ,
ꠁꠔꠣꠞ ꠃꠙꠞꠦ ꠝꠦꠠꠣꠞ ꠛꠣꠁꠌ꠆ꠌꠣꠞ ꠛꠣꠞꠅꠎꠘ ꠍꠣꠢꠣꠛꠤꠞ ꠛꠣꠞꠅꠈꠣꠘ ꠘꠣꠝ ꠟꠦꠈꠣ।
১৫ ꠀꠝꠣꠞ ꠟꠉꠦ ꠎꠦꠁꠘ ꠛꠣꠔꠌꠤꠔ ꠇꠞꠣꠔ ꠀꠍꠟꠣ ꠔꠣꠘ ꠀꠔꠅ ꠡꠥꠘꠣꠞ ꠄꠇꠐꠣ ꠘꠟ ꠀꠍꠤꠟ,
ꠎꠣꠔꠦ ꠔꠣꠁꠘ ꠅꠃ ꠐꠣꠃꠘ,
ꠐꠣꠃꠘꠞ ꠉꠦꠁꠐ ꠀꠞ ꠅꠀꠟ ꠝꠣꠙꠤꠔꠣ ꠙꠣꠞꠂꠘ।
১৬ ꠁ ꠐꠣꠃꠘ ꠀꠍꠤꠟ ꠌꠣꠁꠞꠇꠥꠘꠤ ꠉꠥꠟ,
ꠟꠣꠝ꠆ꠛꠣꠄ ꠀꠞ ꠚꠣꠠꠦ ꠡꠝꠣꠘ।
ꠛꠣꠖꠦ ꠔꠣꠁꠘ ꠅꠃ ꠘꠟꠖꠤ ꠐꠣꠃꠘꠈꠣꠘ ꠝꠣꠙꠤꠟꠦ,
ꠁꠈꠣꠘ ꠟꠣꠝ꠆ꠛꠣ,
ꠚꠣꠠ ꠀꠞ ꠃꠌꠣꠄ ꠅꠁꠟ ꠛꠣꠞꠅ ꠀꠎꠣꠞ ꠡ꠆ꠔꠣꠖꠤꠀ (ꠅꠘꠥꠝꠣꠘ ꠖꠦꠠ ꠀꠎꠣꠞ ꠝꠣꠁꠟ)।
১৭ ꠛꠣꠖꠦ ꠔꠣꠁꠘ ꠅꠀꠟ ꠝꠣꠙꠤꠟꠣ,
ꠁ ꠅꠀꠟ ꠀꠍꠤꠟ ꠄꠇ-ꠡ ꠌꠃꠌꠣꠟ꠆ꠟꠤꠡ ꠀꠔ ꠃꠌꠣ।
ꠝꠣꠘꠡꠞ ꠀꠔꠞ ꠝꠣꠙꠞ ꠟꠣꠈꠣꠘ ꠁ ꠚꠤꠞꠤꠡ꠆ꠔꠣꠄꠅ ꠝꠣꠙꠤꠟꠣ।
১৮ ꠁ ꠅꠀꠟꠈꠣꠘ ꠢꠤꠞꠣꠖꠤ ꠛꠣꠘꠣꠁꠟ,
ꠀꠞ ꠁ ꠐꠣꠃꠘ ꠀꠍꠤꠟ ꠚꠐꠤꠇꠞ ꠉꠟꠣꠡꠞ ꠟꠣꠈꠣꠘ ꠈꠣꠐꠤ ꠡꠥꠘꠣꠖꠤ ꠛꠣꠘꠣꠁꠟ।
১৯ ꠐꠣꠃꠘꠞ ꠅꠀꠟꠞ ꠙꠤꠟꠣꠞ ꠅꠇꠟꠞ ꠝꠣꠎꠦ ꠖꠣꠝꠤ ꠖꠣꠝꠤ ꠝꠘꠤ-ꠝꠥꠇ꠆ꠔꠣ ꠟꠣꠉꠣꠁꠟ ꠀꠍꠤꠟ।
ꠙꠄꠟꠣ ꠙꠤꠟꠣꠞ ꠢꠤꠞꠣꠞ,
ꠖꠥꠍꠞꠣꠐꠣ ꠀꠇꠤꠇ ꠝꠘꠤꠞ,
ꠔꠤꠘ ꠘꠝ꠆ꠛꠞꠐꠣ ꠔꠣꠝꠣ ꠝꠘꠤ,
ꠌꠣꠁꠞ ꠘꠝ꠆ꠛꠞꠐꠣ ꠙꠣꠘ꠆ꠘꠣ ꠝꠘꠤ,
২০ ꠙꠣꠌ ꠘꠝ꠆ꠛꠞꠐꠣ ꠡꠥꠞꠥꠎ ꠝꠘꠤ,
ꠍꠄ ꠘꠝ꠆ꠛꠞꠐꠣ ꠁꠀꠇꠥꠔ ꠝꠘꠤ,
ꠡꠣꠔ ꠘꠝ꠆ꠛꠞꠐꠣ ꠟꠤꠟ ꠝꠘꠤ,
ꠀꠐ ꠘꠝ꠆ꠛꠞꠐꠣ ꠛꠂꠖꠥꠞ꠆ꠎ ꠝꠘꠤ,
ꠘꠄ ꠘꠝ꠆ꠛꠞꠐꠣ ꠙꠤꠔ ꠝꠘꠤ,
ꠖꠡ ꠘꠝ꠆ꠛꠞꠐꠣ ꠃꠙꠟ ꠝꠘꠤ,
ꠄꠉꠣꠞꠅ ꠘꠝ꠆ꠛꠞꠐꠣ ꠚꠤꠞꠥꠎ ꠝꠘꠤ,
ꠀꠞ ꠛꠣꠞꠅ ꠘꠝ꠆ꠛꠞꠐꠣ ꠙꠖ꠆ꠖꠞꠣꠉ ꠝꠘꠤ।
২১ ꠛꠣꠞꠅꠈꠣꠘ ꠉꠦꠁꠐ ꠛꠣꠞꠅꠐꠣ ꠝꠥꠇ꠆ꠔꠣꠖꠤ ꠛꠣꠘꠣꠁꠟ।
ꠙꠞꠔꠦꠇ ꠉꠦꠁꠐ ꠀꠍꠤꠟ ꠄꠇꠅꠐꠣ ꠖꠣꠝꠤ ꠝꠥꠇ꠆ꠔꠣꠞ।
ꠐꠣꠃꠘꠞ ꠞꠣꠡ꠆ꠔꠣ ꠀꠍꠤꠟ ꠚꠐꠤꠇꠞ ꠉꠟꠣꠡꠞ ꠟꠣꠈꠣꠘ ꠈꠣꠐꠤ ꠡꠥꠘꠣꠖꠤ ꠛꠣꠘꠣꠁꠟ।
২২ ꠁ ꠐꠣꠃꠘꠅ ꠀꠝꠤ ꠇꠥꠘꠥ ꠄꠛꠣꠖꠔ ꠈꠣꠘꠣ ꠖꠦꠈꠟꠣꠝ ꠘꠣ,
ꠡꠞꠛ-ꠡꠇ꠆ꠔꠤꠝꠣꠘ ꠀꠟ꠆ꠟꠣ ꠝꠣꠛꠥꠖ ꠀꠞ ꠝꠦꠠꠣꠞ ꠛꠣꠁꠌ꠆ꠌꠣꠃ ꠀꠍꠟꠣ ꠁꠘꠞ ꠄꠛꠣꠖꠔ ꠈꠣꠘꠣ
২৩ ꠁ ꠐꠣꠃꠘꠞꠦ ꠚꠞ ꠇꠞꠣꠞ ꠟꠣꠉꠤ ꠇꠥꠘꠥ ꠌꠣꠘ-ꠡꠥꠞꠥꠎꠞ ꠎꠞꠥꠞ ꠘꠣꠁ।
ꠀꠟ꠆ꠟꠣꠞ ꠘꠥꠞꠞ ꠝꠢꠤꠝꠣꠄ ꠚꠞ ꠖꠦꠄ,
ꠀꠞ ꠝꠦꠠꠣꠞ ꠛꠣꠁꠌ꠆ꠌꠣꠃ ꠅꠁꠟꠣ ꠁꠘꠞ ꠛꠣꠔ꠆ꠔꠤ।
২৪ ꠢꠇꠟ ꠎꠣꠔꠤꠞ ꠝꠣꠘꠥꠡ ꠅꠃ ꠘꠥꠞꠞ ꠚꠞꠦ ꠌꠟꠣ-ꠚꠤꠞꠣ ꠇꠞꠛꠣ,
ꠖꠥꠘꠤꠀꠞ ꠛꠣꠖꠡꠣ ꠅꠇꠟꠦ ꠔꠣꠞꠣꠞ ꠎꠣꠇ-ꠎꠝꠇ ꠟꠁꠀ ꠅꠃ ꠐꠣꠃꠘꠅ ꠀꠁꠛꠣ।
২৫ ꠖꠤꠘꠞ ꠛꠣꠟꠣ ꠇꠥꠘꠥ ꠡꠝꠄꠃ ꠁ ꠐꠣꠃꠘꠞ ꠉꠦꠁꠐ ꠛꠘ꠆ꠖ ꠅꠁꠔ ꠘꠣꠄ,
ꠀꠞ ꠢꠤꠘꠅ ꠇꠥꠘꠥ ꠞꠣꠁꠔ ꠅꠁꠔ ꠘꠣꠄ।
২৬ ꠔꠣꠝꠣꠝ ꠎꠣꠔꠤꠞ ꠁꠎ꠆ꠎꠔ ꠀꠞ ꠉꠃꠞꠛ ꠅꠘꠅ ꠀꠘꠣ ꠅꠁꠛ।
২৭ ꠘꠣꠙꠣꠇ ꠇꠥꠘꠥ ꠌꠤꠎ,
ꠢꠣꠞꠣꠝꠇꠥꠞ ꠛꠣ ꠝꠤꠍꠣ ꠝꠣꠔꠞꠣ ꠇꠥꠘꠥ ꠝꠣꠘꠥꠡ,
ꠇꠥꠘꠥꠖꠤꠘꠅ ꠁꠘꠅ ꠢꠣꠝꠣꠁꠔ ꠙꠣꠞꠔ ꠘꠣꠄ।
ꠈꠣꠟꠤ ꠝꠦꠠꠣꠞ ꠛꠣꠁꠌ꠆ꠌꠣꠞ ꠎꠤꠘ꠆ꠖꠦꠉꠤ ꠈꠣꠔꠣꠞ ꠝꠣꠎꠦ ꠎꠦꠞꠣꠞ ꠘꠣꠝ ꠟꠦꠈꠣ ꠀꠍꠦ,
ꠔꠣꠞꠣꠃ ꠢꠣꠝꠣꠁꠛꠣ।