ꠙꠛꠤꠔ꠆ꠞ ꠁꠘ꠆ꠎꠤꠟ ꠡꠞꠤꠚ ꠌꠃꠔꠣ ꠍꠤꠙꠣꠞꠣ
ꠀꠟ-ꠢꠣꠘ꠆ꠘꠣꠘ
ꠀꠟ꠆ꠟꠣꠞ ꠇꠣꠟꠣꠝ ꠝꠣꠘꠥꠡ ꠍꠥꠞꠔꠦ ꠘꠣꠎꠤꠟ (১:১-১৮)
১
১ ꠙꠄꠟꠣꠃ ꠇꠣꠟꠣꠝ ꠀꠍꠟꠣ,
ꠇꠣꠟꠣꠝ ꠀꠟ꠆ꠟꠣꠞ ꠟꠉꠦ ꠀꠍꠟꠣ ꠀꠞ ꠅꠃ ꠇꠣꠟꠣꠝ ꠘꠤꠎꠦꠃ ꠀꠟ꠆ꠟꠣ ꠀꠍꠟꠣ।
২ ꠢꠇꠟ ꠙꠄꠟꠣ ꠅꠃ ꠇꠣꠟꠣꠝ ꠀꠟ꠆ꠟꠣꠞ ꠟꠉꠦ ꠀꠍꠟꠣ।
৩ ꠅꠃ ꠇꠣꠟꠣꠝꠞ ꠝꠣꠎꠖꠤ ꠢꠇ꠆ꠇꠟꠔꠣ ꠙꠄꠖꠣ ꠇꠞꠣ ꠅꠁꠍꠤꠟ,
ꠎꠔꠔꠣ ꠙꠄꠖꠣ ꠇꠞꠣ ꠅꠁꠍꠦ,
ꠄꠞ ꠇꠥꠘꠥꠔꠣꠃ ꠔꠣꠘꠞꠦ ꠍꠣꠠꠣ ꠙꠄꠖꠣ ꠅꠁꠍꠦ ꠘꠣ।
৪ ꠔꠣꠘ ꠝꠣꠎꠦ ꠎꠤꠘ꠆ꠖꠦꠉꠤ ꠀꠍꠤꠟ,
ꠢꠃ ꠎꠤꠘ꠆ꠖꠦꠉꠤꠃ ꠅꠁꠟ ꠝꠣꠘꠡꠞ ꠘꠥꠞ।
৫ ꠅꠃ ꠘꠥꠞ ꠀꠘ꠆ꠖꠣꠞꠤꠞ ꠝꠣꠎꠦ ꠎꠟꠦꠞ,
ꠅꠁꠟꠦ ꠀꠘ꠆ꠖꠣꠁꠞꠦ ꠁ ꠘꠥꠞꠞꠦ ꠇꠛꠎꠣ ꠇꠞꠔ ꠙꠣꠞꠍꠦ ꠘꠣ।
৬ ꠀꠟ꠆ꠟꠣꠄ ꠄꠢꠤꠀ ꠘꠣꠝꠞ ꠄꠇꠎꠘ ꠝꠣꠘꠡꠞꠦ ꠖꠥꠘꠤꠀꠔ ꠙꠣꠑꠣꠁꠟꠣ।
৭ ꠅꠃ ꠘꠥꠞꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠞ ꠟꠣꠉꠤ ꠔꠣꠘꠞꠦ ꠙꠣꠑꠣꠁꠟ ꠅꠁꠟ,
ꠎꠣꠔꠦ ꠔꠣꠘ ꠎꠛꠣꠘꠛꠘ꠆ꠖꠤ ꠢꠥꠘꠤꠀ ꠝꠣꠘꠡꠦ ꠁꠝꠣꠘ ꠀꠘꠦ।
৮ ꠔꠣꠁꠘ ꠘꠤꠎꠦ ꠢꠤ ꠘꠥꠞ ꠀꠍꠟꠣ ꠘꠣ,
ꠅꠁꠟꠦ ꠘꠥꠞꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠛꠣꠞ ꠟꠣꠉꠤ ꠖꠥꠘꠤꠀꠔ ꠀꠁꠍꠟꠣ।
৯ ꠀꠍꠟ ꠘꠥꠞ ꠅꠁꠟꠣ ꠢꠃ ꠎꠘ,
ꠎꠦꠁꠘ ꠢꠇ꠆ꠇꠟ ꠝꠣꠘꠡꠞꠦ ꠘꠥꠞ ꠖꠣꠘ ꠇꠞꠂꠘ,
ꠔꠣꠁꠘ ꠖꠥꠘꠤꠀꠔ ꠔꠡꠞꠤꠚ ꠀꠘꠞꠣ।
১০ ꠅꠃ ꠖꠥꠘꠤꠀꠔ ꠔꠣꠁꠘ ꠀꠍꠟꠣ,
ꠖꠥꠘꠤꠀ ꠔꠣꠘ ꠃꠍꠤꠟ꠆ꠟꠣꠄ ꠙꠄꠖꠣ ꠅꠁꠍꠦ,
ꠔꠣ-ꠅ ꠖꠥꠘꠤꠀꠞ ꠝꠣꠘꠡꠦ ꠔꠣꠘꠞꠦ ꠌꠤꠘꠟ ꠘꠣ।
১১ ꠔꠣꠁꠘ ꠘꠤꠎꠞ ꠎꠝꠤꠘꠅ ꠀꠁꠟꠣ,
ꠔꠣꠘ ꠘꠤꠎꠞ ꠝꠣꠘꠡꠦꠃ ꠔꠣꠘꠞꠦ ꠇꠛꠥꠟ ꠇꠞꠟ ꠘꠣ।
১২ ꠅꠁꠟꠦ ꠎꠔ ꠎꠘꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠤꠀ ꠔꠣꠘꠞꠦ ꠇꠛꠥꠟ ꠇꠞꠟꠣ,
ꠄꠞꠣ ꠙꠞꠔꠦꠇ ꠎꠘꠞꠦ ꠔꠣꠁꠘ ꠀꠟ꠆ꠟꠣꠞ ꠈꠣꠍ ꠀꠅꠟꠣꠖ,
ꠝꠣꠘꠤ ꠝꠣꠄꠀꠞ ꠎꠘ ꠛꠘꠣꠞ ꠄꠈꠔꠤꠀꠞ ꠖꠤꠟꠣ।
১৩ ꠀꠍꠟꠦ ꠅꠃ ꠎꠘ ꠅꠇꠟꠞ ꠎꠘꠝ ꠔ ꠝꠣꠘꠡꠞ ꠟꠃ ꠕꠣꠇꠤ ꠅꠁꠍꠦ ꠘꠣ,
ꠡꠞꠤꠟꠞ ꠈꠣꠁꠡ ꠛꠣ ꠝꠣꠘꠡꠞ ꠁꠌ꠆ꠍꠣꠄꠅ ꠅꠁꠍꠦ ꠘꠣ,
ꠁꠐꠣ ꠈꠣꠟꠤ ꠀꠟ꠆ꠟꠣ ꠕꠣꠇꠤꠃ ꠅꠁꠍꠦ।
১৪ ꠅꠃ ꠇꠣꠟꠣꠝꠃ ꠝꠣꠘꠥꠡ ꠍꠥꠞꠔꠦ ꠎꠘꠝ ꠟꠁꠟꠣ ꠀꠞ ꠀꠝꠞꠣꠞ ꠝꠣꠎꠦ ꠛꠡꠔꠤ ꠇꠞꠟꠣ।
ꠛꠣꠚꠞ ꠈꠣꠍ ꠀꠅꠟꠣꠖ ꠢꠤꠡꠣꠛꠦ ꠔꠣꠁꠘ ꠎꠦ ꠎꠣꠟꠣꠟ ꠀꠞ ꠝꠢꠤꠝꠣ ꠙꠣꠁꠍꠂꠘ,
ꠢꠃ ꠎꠣꠟꠣꠟ ꠀꠞ ꠝꠢꠤꠝꠣ ꠀꠝꠞꠣ ꠖꠦꠈꠍꠤ।
ꠔꠣꠁꠘ ꠔ ꠢꠇ ꠀꠞ ꠞꠢꠝꠔꠦ ꠡꠥꠟ꠆ꠟꠀꠘꠣ ꠇꠣꠝꠤꠟ।
১৫ ꠄꠢꠤꠀ ꠘꠛꠤꠄ ꠔꠣꠘ ꠛꠦꠙꠣꠞꠦ ꠛꠠ ꠉꠟꠣꠄ ꠡꠣꠇ꠆ꠇꠤ ꠖꠤꠟꠣ,
ꠇꠁꠟꠣ,
“ꠄꠁꠘꠃ ꠔ ꠢꠃ ꠎꠘ,
ꠎꠦꠘ ꠛꠦꠙꠣꠞꠦ ꠀꠝꠤ ꠀꠉꠦ ꠇꠁꠍꠟꠣꠝ,
ꠀꠝꠣꠞ ꠛꠣꠖꠦ ꠄꠇꠎꠘꠦ ꠔꠡꠞꠤꠚ ꠀꠘꠞꠣ,
ꠔꠣꠁꠘ ꠀꠝꠣ ꠕꠣꠇꠤꠅ ꠝꠢꠣꠘ, ꠀꠝꠣꠞ ꠛꠃꠔ ꠀꠉ ꠕꠣꠇꠤꠃ ꠔ ꠔꠣꠁꠘ ꠀꠍꠂꠘ।”
১৬ ꠔꠣꠁꠘ ꠡꠥꠟ꠆ꠟꠀꠘꠣ ꠇꠣꠝꠤꠟ ꠅꠀꠄ ꠀꠝꠞꠣ ꠢꠇꠟꠦ ꠞꠢꠝꠔꠞ ꠃꠙꠞꠦꠖꠤ ꠀꠞꠅ ꠞꠢꠝꠔ ꠙꠣꠁꠍꠤ।
১৭ ꠝꠥꠍꠣ ꠘꠛꠤꠞ ꠝꠣꠞꠚꠔꠦ ꠀꠟ꠆ꠟꠣꠄ ꠡꠞꠤꠅꠔ ꠖꠣꠘ ꠇꠞꠍꠤꠟꠣ,
ꠅꠁꠟꠦ ꠁꠍꠣ ꠀꠟ-ꠝꠍꠤꠞ ꠝꠣꠞꠚꠔꠦ ꠢꠇ ꠀꠞ ꠞꠢꠝꠔ ꠀꠁꠍꠦ।
১৮ ꠀꠟ꠆ꠟꠣꠞꠦ ꠔ ꠇꠦꠃ ꠇꠥꠘꠥꠖꠤꠘ ꠖꠦꠈꠍꠦ ꠘꠣ।
ꠔꠣꠘ ꠟꠉꠦ ꠞꠅꠞꠣ ꠢꠃ ꠄꠇꠝꠣꠔ꠆ꠞ ꠙꠥꠔ,
ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘ,
ꠎꠦꠁꠘ ꠡ꠆ꠛꠄꠅꠋ ꠝꠃꠟꠣ,
ꠔꠣꠁꠘꠃ ꠀꠟ꠆ꠟꠣꠞꠦ ꠎꠣꠁꠞ ꠇꠞꠍꠂꠘ।
ꠢꠎꠞꠔ ꠄꠢꠤꠀ (ꠀ꠩) ꠀꠞ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠙꠄꠟꠣ ꠃꠝ꠆ꠝꠔ (১:১৯-৫১)
ꠢꠎꠞꠔ ꠄꠢꠤꠀ ꠘꠛꠤꠞ ꠙꠞꠤꠌꠄ
১৯ ꠁꠢꠥꠖꠤ ꠘꠦꠔꠣ ꠅꠇꠟꠦ ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠎꠦꠛꠟꠣ ꠇꠄꠎꠘ ꠁꠝꠣꠝ ꠀꠞ ꠟꠦꠛꠤ ꠡꠝꠣꠎꠞ ꠇꠤꠍꠥ ꠝꠣꠘꠡꠞꠦ ꠄꠢꠤꠀ ꠘꠛꠤꠞ ꠉꠦꠍꠦ ꠙꠣꠑꠣꠁꠟꠣ,
ꠅꠃ ꠡꠝꠄ ꠄꠢꠤꠀꠄ ꠄꠞꠣꠞ ꠉꠦꠍꠦ ꠡꠣꠇ꠆ꠇꠤ ꠖꠤꠟꠣ।
ꠔꠣꠞꠣ ꠎꠦꠛꠟꠣ ꠎꠤꠇꠣꠁꠟꠣ,
“ꠍꠣꠛ,
ꠀꠙꠘꠦ ꠀꠍꠟꠦ ꠇꠦ?”
২০ ꠄꠢꠤꠀ ꠘꠛꠤꠄ ꠇꠥꠘ꠆ꠔꠣ ꠘꠣ ꠟꠥꠇꠣꠁꠀ ꠡ꠆ꠛꠤꠇꠣꠞ ꠅꠁꠀ ꠇꠁꠟꠣ,
“ꠀꠝꠤ ꠔ ꠀꠟ-ꠝꠍꠤ ꠘꠣꠄ।”
২১ ꠔꠦꠃ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ,
“ꠔꠦ ꠀꠙꠘꠦ ꠇꠦ?
ꠀꠙꠘꠦ ꠁꠟꠤꠀꠍ ꠘꠛꠤ ꠘꠤ?”
ꠔꠣꠁꠘ ꠇꠁꠟꠣ,
“ꠘꠣ,
ꠀꠝꠤ ꠁꠟꠤꠀꠍ ꠘꠣꠄ।”
ꠅꠃ ꠔꠣꠞꠣ ꠎꠤꠇꠣꠁꠟꠣ,
“ꠔꠦ ꠀꠙꠘꠦ ꠇꠤꠔꠣ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤ ꠘꠤ?”
ꠔꠣꠁꠘ ꠎꠥꠀꠙ ꠖꠤꠟꠣ,
“ꠎꠤ ꠘꠣ।”
২২ ꠔꠣꠞꠣ ꠢꠤꠞꠛꠣꠞ ꠔꠣꠘꠞꠦ ꠎꠤꠇꠣꠁꠟꠣ,
“ꠔꠣꠁꠟꠦ ꠀꠙꠘꠦ ꠇꠦ?
ꠀꠝꠞꠣꠞꠦ ꠎꠦꠞꠣ ꠙꠣꠑꠣꠁꠍꠂꠘ,
ꠀꠝꠞꠣ ꠚꠤꠞꠤꠀ ꠉꠤꠀ ꠇꠤꠔꠣ ꠇꠁꠔꠣꠝ,
ꠀꠙꠘꠣꠞ ꠘꠤꠎꠞ ꠙꠞꠤꠌꠄ ꠇꠤꠔꠣ?”
২৩ ꠄꠢꠤꠀꠄ ꠎꠥꠀꠙ ꠖꠤꠟꠣ,
“ꠀꠝꠤ ꠅꠁꠟꠣꠝ ꠢꠃ ꠀꠅꠀꠎ,
ꠎꠦꠘ ꠛꠦꠙꠣꠞꠦ ꠢꠎꠞꠔ ꠁꠡꠣꠄꠀ ꠘꠛꠤꠄ ꠛꠣꠔꠣꠁ ꠉꠦꠍꠂꠘ,
ꠝꠞꠥꠜꠥꠝꠤꠞ ꠝꠣꠎꠦ ꠎꠥꠞꠦ ꠎꠥꠞꠦ ꠄꠇꠎꠘꠦ ꠄꠟꠣꠘ ꠇꠞꠞꠣ,
ꠔꠥꠝꠞꠣ ꠝꠣꠟꠤꠇꠞ ꠙꠕ ꠍꠢꠤ ꠇꠞꠅ।”
২৪ ꠄꠢꠤꠀ ꠘꠛꠤꠞ ꠉꠦꠍꠦ ꠎꠦꠞꠣꠞꠦ ꠙꠣꠑꠣꠁꠟ ꠅꠁꠍꠤꠟ,
ꠄꠞꠣ ꠀꠍꠟꠣ ꠚꠞꠤꠡꠤ ꠡꠝꠣꠎꠞ ꠝꠣꠘꠥꠡ।
২৫ ꠔꠣꠞꠣ ꠔꠣꠘꠞꠦ ꠎꠤꠇꠣꠁꠟꠣ,
“ꠀꠙꠘꠦ ꠎꠦꠛꠟꠣ ꠀꠟ-ꠝꠍꠤꠅ ꠘꠣꠄ,
ꠁꠟꠤꠀꠍ ꠘꠛꠤꠅ ꠘꠣꠄ ꠛꠣ ꠀꠉꠞ ꠎꠝꠣꠘꠣꠞ ꠢꠃ ꠘꠛꠤꠅ ꠘꠣꠄ,
ꠔꠦ ꠀꠙꠘꠦ ꠇꠦꠘꠦ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠖꠤꠞꠣ?”
২৬ ꠄꠢꠤꠀ ꠘꠛꠤꠄ ꠔꠣꠞꠣꠞꠦ ꠎꠥꠀꠙ ꠖꠤꠟꠣ,
“ꠀꠝꠤ ꠔ ꠝꠣꠘꠡꠞꠦ ꠙꠣꠘꠤ ꠖꠤꠀ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣꠝ,
ꠅꠁꠟꠦ ꠀꠙꠘꠣꠞꠣꠞ ꠝꠣꠎꠦ ꠅꠃꠟꠣ ꠄꠇ ꠛꠥꠎꠥꠞ꠆ꠉ ꠎꠘ ꠀꠍꠂꠘ,
ꠎꠦꠘꠞꠦ ꠀꠙꠘꠣꠞꠣ ꠌꠤꠘꠂꠘ ꠘꠣ।
২৭ ꠁ ꠛꠥꠎꠥꠞ꠆ꠉ ꠢꠃ ꠎꠘ,
ꠎꠦꠁꠘ ꠀꠝꠣꠞ ꠛꠣꠖꠦ ꠔꠡꠞꠤꠚ ꠀꠘꠣꠞ ꠇꠕꠣ ꠀꠍꠤꠟ।
ꠔꠣꠘ ꠙꠣꠅꠞ ꠎꠥꠔꠣꠞ ꠚꠤꠔꠣꠉꠦꠍꠣ ꠈꠥꠟꠣꠞ ꠟꠣꠈꠅ ꠀꠝꠤ ꠘꠣꠄ।”
২৮ ꠎꠞ꠆ꠖꠣꠘ ꠉꠣꠋꠉꠞ ꠀꠞꠇ ꠙꠣꠞꠅ ꠛꠣꠄꠔ-ꠀꠘꠤꠀ ꠉꠣꠃꠔ,
ꠄꠢꠤꠀ ꠘꠛꠤ ꠎꠦ ꠎꠣꠉꠣꠔ ꠈꠣꠘꠅ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠔ ꠀꠍꠟꠣ,
ꠢꠃ ꠎꠣꠉꠣꠔ ꠅꠃ ꠍꠅꠀꠟ-ꠎꠥꠀꠙ ꠅꠁꠟ।
ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣ
২৯ ꠛꠣꠖꠞ ꠖꠤꠘ ꠄꠢꠤꠀ ꠘꠛꠤꠄ ꠖꠦꠈꠟꠣ ꠢꠥꠎꠥꠞ ꠁꠍꠣ ꠔꠣꠘ ꠉꠦꠍꠦ ꠀꠁꠞꠣ,
ꠖꠦꠈꠤꠀ ꠇꠁꠟꠣ,
“ꠅꠃ ꠖꠦꠈꠞꠣꠄ ꠘꠤ ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣ,
ꠎꠦꠘ ꠃꠍꠤꠟ꠆ꠟꠣꠄ ꠢꠇ꠆ꠇꠟ ꠝꠣꠘꠡꠞ ꠉꠥꠘꠣꠞ ꠝꠣꠚꠤ ꠅꠄ।
৩০ ꠄꠁꠘ ꠅꠁꠟꠣ ꠢꠃ ꠎꠘ,
ꠎꠦꠘ ꠛꠦꠙꠣꠞꠦ ꠀꠝꠤ ꠀꠉꠦ ꠇꠁꠍꠟꠣꠝ,
ꠀꠝꠣꠞ ꠛꠣꠖꠦ ꠄꠇꠎꠘꠦ ꠔꠡꠞꠤꠚ ꠀꠘꠞꠣ,
ꠀꠍꠟꠦ ꠔꠣꠁꠘ ꠀꠝꠣꠞ ꠀꠉ ꠕꠣꠇꠤꠃ ꠀꠍꠂꠘ,
ꠀꠞ ꠔꠣꠁꠘ ꠀꠝꠣ ꠕꠣꠇꠤꠅ ꠁꠎ꠆ꠎꠔꠤ ꠎꠘ।
৩১ ꠀꠉꠦ ꠔ ꠀꠝꠤ ꠔꠣꠘꠞꠦ ꠌꠤꠘꠔꠣꠝ ꠘꠣ,
ꠅꠁꠟꠦ ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠔꠣꠁꠘ ꠎꠣꠔꠦ ꠙꠞꠤꠌꠤꠔꠤ ꠙꠣꠁꠘ,
ꠅꠔꠣꠞ ꠟꠣꠉꠤ ꠀꠝꠤ ꠀꠉꠦ ꠀꠁꠀ ꠝꠣꠘꠡꠞꠦ ꠙꠣꠘꠤꠖꠤ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣꠝ।”
৩২ ꠛꠣꠖꠦ ꠄꠢꠤꠀ ꠘꠛꠤꠄ ꠅꠃ ꠡꠣꠇ꠆ꠇꠤ ꠖꠤꠟꠣ,
ꠇꠁꠟꠣ,
“ꠀꠝꠤ ꠖꠦꠈꠟꠣꠝ ꠇꠂꠔꠞꠞ ꠍꠥꠞꠔꠦ ꠙꠣꠇ ꠞꠥꠢꠥ ꠀꠍꠝꠣꠘ ꠕꠣꠇꠤ ꠟꠣꠝꠤꠀ ꠀꠁꠟꠣ,
ꠀꠁꠀ ꠄꠘ ꠃꠙꠞꠦ ꠀꠎꠤꠟꠣ।
৩৩ ꠀꠝꠤ ꠔ ꠔꠣꠘꠞꠦ ꠌꠤꠘꠔꠣꠝ ꠘꠣ,
ꠅꠁꠟꠦ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠞ ꠟꠣꠉꠤ ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ,
ꠔꠣꠁꠘ ꠀꠝꠣꠞꠦ ꠛꠣꠔꠣꠁ ꠖꠤꠍꠂꠘ ꠎꠦꠘ,
ꠀꠟ꠆ꠟꠣꠁ ꠙꠣꠇ ꠞꠥꠢꠥꠞꠦ ꠎꠣꠞ ꠃꠙꠞꠦ ꠟꠣꠝꠤꠀ ꠀꠁꠔꠦ ꠖꠦꠈꠛꠣꠄ,
ꠄꠁꠘꠃ ꠢꠃ ꠎꠘ,
ꠎꠦꠁꠘ ꠝꠣꠘꠡꠞꠦ ꠙꠣꠇ ꠞꠥꠢꠥꠖꠤ ꠔꠞꠤꠇꠣꠛꠘ꠆ꠖꠤ ꠖꠤꠛꠣ।
৩৪ ꠔꠦ ꠀꠝꠤ ꠁꠔꠣ ꠖꠦꠈꠟꠣꠝ,
ꠖꠦꠈꠤꠀ ꠢꠣꠞꠤ ꠡꠣꠇ꠆ꠇꠤ ꠖꠤꠞꠣꠝ,
ꠄꠁꠘꠃ ꠁꠛꠘꠥꠟ꠆ꠟꠣ,
ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।”
ꠢꠎꠞꠔ ꠁꠍꠣꠞ ꠙꠄꠟꠣ ꠍꠣꠢꠣꠛꠤ
৩৫ ꠛꠣꠖꠞ ꠖꠤꠘ ꠄꠢꠤꠀ ꠘꠛꠤ ꠀꠞ ꠔꠣꠘ ꠖꠥꠁꠎꠘ ꠃꠝ꠆ꠝꠔ ꠢꠤꠞꠛꠣꠞ ꠢꠃ ꠎꠣꠉꠣꠔ ꠀꠁꠟꠣ।
৩৬ ꠅꠃ ꠡꠝꠄ ꠢꠎꠞꠔ ꠁꠍꠣ ꠀꠐꠤꠀ ꠎꠣꠁꠞꠣ,
ꠔꠣꠘꠞꠦ ꠖꠦꠈꠤꠀ ꠄꠢꠤꠀꠄ ꠇꠁꠟꠣ,
“ꠅꠃ ꠖꠦꠈꠞꠣꠄ ꠘꠤ ꠀꠟ꠆ꠟꠣꠁ ꠝꠦꠠꠣꠞ ꠛꠣꠁꠌ꠆ꠌꠣ।”
৩৭ ꠄꠢꠤꠀ ꠘꠛꠤꠞ ꠅꠃ ꠇꠕꠣ ꠢꠥꠘꠤꠀ ꠢꠃ ꠖꠥꠁꠅꠎꠘ ꠁꠍꠣꠞ ꠈꠞꠦ ꠈꠞꠦ ꠞꠅꠀꠘꠣ ꠅꠁꠉꠦꠟꠣ।
৩৮ ꠁꠍꠣꠄ ꠈꠞꠦꠖꠤ ꠚꠤꠞꠤꠀ ꠄꠞꠣꠞꠦ ꠖꠦꠈꠟꠣ,
ꠖꠦꠈꠤꠀ ꠇꠁꠟꠣ,
“ꠇꠤꠔꠣ ꠛꠣ,
ꠔꠥꠝꠞꠣ ꠇꠤꠔꠣ ꠌꠣꠅ?”
ꠔꠣꠞꠣ ꠎꠥꠀꠙ ꠖꠤꠟꠣ,
“ꠞꠛ꠆ꠛꠤ,
(ꠝꠣꠘꠤ ꠃꠡ꠆ꠔꠣꠖ),
ꠀꠙꠘꠦ ꠇꠥꠀꠁ ꠕꠣꠇꠂꠘ?”
৩৯ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠀꠅ ꠘꠣ,
ꠀꠁꠀ ꠖꠦꠈꠤꠀ ꠎꠣꠅ।”
ꠔꠦꠃ ꠔꠣꠞꠣ ꠔꠣꠘ ꠟꠉꠦ ꠉꠦꠟꠣ,
ꠉꠤꠀ ꠖꠦꠈꠟꠣ ꠔꠣꠁꠘ ꠇꠥꠘ ꠎꠣꠉꠣꠔ ꠕꠣꠇꠂꠘ,
ꠀꠞ ꠔꠣꠞꠣꠅ ꠀꠡ꠆ꠔꠣ ꠖꠤꠘ ꠔꠣꠘ ꠟꠉꠦ ꠞꠁꠟꠣ।
ꠅꠃ ꠡꠝꠄ ꠀꠍꠞꠞ ꠅꠇ꠆ꠔ ꠀꠁꠌ꠆ꠍꠦ।
৪০ ꠄꠢꠤꠀ ꠘꠛꠤꠞ ꠇꠕꠣ ꠢꠥꠘꠤꠀ ꠎꠦ ꠖꠥꠁꠎꠘ ꠁꠍꠣꠞ ꠈꠞꠦ ꠈꠞꠦ ꠉꠦꠍꠟꠣ,
ꠄꠞꠣꠞ ꠄꠇꠎꠘꠞ ꠘꠣꠝ ꠅꠁꠟ ꠀꠘ꠆ꠖ꠆ꠞꠤꠀꠍ,
ꠄꠘ ꠜꠣꠁꠞ ꠘꠣꠝ ꠍꠣꠁꠝꠘ-ꠙꠤꠔꠞ।
৪১ ꠅꠃ ꠀꠘ꠆ꠖ꠆ꠞꠤꠀꠍꠦ ꠙꠄꠟꠣ ꠔꠣꠘ ꠜꠣꠁ ꠍꠣꠁꠝꠘꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ ꠇꠁꠟꠣ,
“ꠜꠣꠁꠍꠣꠛ ꠢꠥꠘꠍ ꠘꠤ,
ꠀꠝꠞꠣ ꠔ ꠀꠟ-ꠝꠍꠤꠞꠦ ꠖꠦꠈꠍꠤ।”
ꠀꠟ-ꠝꠍꠤꠞ ꠝꠣꠘꠤ ꠅꠁꠟ ꠀꠟ꠆ꠟꠣꠞ ꠈꠦꠟꠣꠚꠔꠤ ꠙꠣꠅꠀ ꠎꠘ।
৪২ ꠀꠘ꠆ꠖ꠆ꠞꠤꠀꠍꠦ ꠍꠣꠁꠝꠘꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟꠣ।
ꠁꠍꠣꠄ ꠍꠣꠁꠝꠘꠞ ꠛꠣꠄ ꠌꠣꠁꠀ ꠇꠁꠟꠣ,
“ꠔꠥꠝꠤ ꠔ ꠍꠣꠁꠝꠘ ꠛꠤꠘ ꠁꠃꠢꠣꠘ꠆ꠘꠣ,
ꠅꠁꠟꠦ ꠅꠈꠘ ꠕꠣꠇꠤ ꠔꠥꠝꠣꠞꠦ ꠇꠂꠚꠣ ꠘꠣꠝꠦ ꠒꠣꠇꠣ ꠅꠁꠛ।”
ꠇꠂꠚꠣ ꠝꠣꠘꠤ ꠙꠤꠔꠞ,
ꠛꠣ ꠙꠣꠔ꠆ꠔꠞ।
৪৩ ꠛꠣꠖꠞ ꠖꠤꠘ ꠁꠍꠣꠄ ꠘꠤꠅꠔ ꠇꠞꠟꠣ,
ꠉꠣꠟꠤꠟ ꠎꠤꠟꠣꠔ ꠎꠣꠁꠔꠣꠉꠤ।
ꠅꠃ ꠡꠝꠄ ꠔꠣꠁꠘ ꠚꠤꠟꠤꠚꠞꠦ ꠖꠦꠈꠟꠣ,
ꠖꠦꠈꠤꠀ ꠇꠁꠟꠣ,
“ꠅ ꠚꠤꠟꠤꠚ ꠀꠅ,
ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠅ।”
৪৪ ꠚꠤꠟꠤꠚ ꠀꠍꠟꠣ ꠛꠣꠄꠔ-ꠍꠄꠖꠣ ꠉꠣꠃꠞ ꠝꠣꠘꠥꠡ।
ꠀꠘ꠆ꠖ꠆ꠞꠤꠀꠍ ꠀꠞ ꠙꠤꠔꠞꠞ ꠛꠣꠠꠤꠅ ꠀꠍꠤꠟ ꠅꠃ ꠉꠣꠃꠔ।
৪৫ ꠚꠤꠟꠤꠚꠦ ꠘꠕꠘꠦꠟꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ ꠇꠁꠟꠣ,
“ꠝꠥꠍꠣ ꠘꠛꠤꠞ ꠔꠃꠞꠣꠔ ꠇꠤꠔꠣꠛꠅ ꠀꠞ ꠀꠍꠝꠣꠘꠤ ꠘꠛꠤ ꠅꠇꠟꠞ ꠍꠢꠤꠚꠣꠔ ꠎꠦꠘ ꠇꠕꠣ ꠟꠦꠈꠣ ꠀꠍꠦ,
ꠀꠝꠞꠣ ꠔ ꠔꠣꠘꠞꠦ ꠖꠦꠈꠍꠤ।
ꠔꠣꠁꠘ ꠔ ꠘꠣꠍꠣꠞꠔ ꠉꠣꠃꠞ ꠁꠍꠣ,
ꠔꠣꠘ ꠛꠣꠚꠞ ꠘꠣꠝ ꠁꠃꠍꠥꠚ।”
৪৬ ꠁꠈꠣꠘ ꠢꠥꠘꠤꠀ ꠘꠕꠘꠦꠟꠦ ꠚꠤꠟꠤꠚꠞꠦ ꠇꠁꠟꠣ,
“ꠗꠥꠔ!
ꠘꠣꠍꠣꠞꠔ ꠕꠣꠇꠤ ꠜꠣꠟꠣ ꠇꠥꠘ꠆ꠔꠣ ꠛꠣꠞꠅꠄ ꠘꠤ?”
ꠚꠤꠟꠤꠚꠦ ꠇꠁꠟꠣ,
“ꠔꠦ ꠀꠁꠀ ꠖꠦꠈꠅ।”
৪৭ ꠁꠍꠣꠄ ꠖꠦꠈꠟꠣ,
ꠘꠕꠘꠦꠟ ꠔꠣꠘ ꠉꠦꠍꠦ ꠀꠁꠞꠣ,
ꠖꠦꠈꠤꠀ ꠇꠁꠟꠣ,
“ꠅꠃ ꠖꠦꠈꠞꠣꠄ ꠘꠤ ꠄꠇꠎꠘ ꠈꠣꠐꠤ ꠛꠘꠤ ꠁꠍꠞꠣꠁꠟꠤ।
ꠔꠣꠞ ꠝꠣꠎꠦ ꠇꠥꠘꠥ ꠗꠥꠘ꠆ꠖꠥꠞ-ꠝꠥꠘ꠆ꠖꠥꠞ ꠘꠣꠁ।”
৪৮ ꠔꠦꠃ ꠘꠕꠘꠦꠟꠦ ꠁꠍꠣꠞꠦ ꠎꠤꠇꠣꠁꠟꠣ,
“ꠀꠙꠘꠦ ꠀꠝꠣꠞꠦ ꠇꠦꠝꠘꠦ ꠌꠤꠘꠟꠣ?”
ꠁꠍꠣꠄ ꠎꠥꠀꠙ ꠖꠤꠟꠣ,
“ꠢꠥꠘꠅ,
ꠔꠥꠝꠣꠞꠦ ꠒꠣꠇꠤꠛꠣꠞ ꠀꠉꠦ ꠔꠥꠝꠤ ꠎꠦꠛꠟꠣ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠀꠍꠟꠣꠄ,
ꠢꠃ ꠡꠝꠄ ꠀꠝꠤ ꠔꠥꠝꠣꠞꠦ ꠖꠦꠈꠍꠤ।”
৪৯ ꠁꠈꠣꠘ ꠢꠥꠘꠤꠀ ꠘꠕꠘꠦꠟꠦ ꠁꠍꠣꠞꠦ ꠇꠁꠟꠣ,
“ꠢꠥꠎꠥꠞ,
ꠀꠙꠘꠦꠃ ꠔ ꠁꠛꠘꠥꠟ꠆ꠟꠣ,
ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।
ꠀꠙꠘꠦꠃ ꠛꠘꠤ ꠁꠍꠞꠣꠁꠟꠞ ꠛꠣꠖꠡꠣ।”
৫০ ꠁꠍꠣꠄ ꠔꠣꠘꠞꠦ ꠇꠁꠟꠣ,
“ꠔꠥꠝꠣꠞꠦ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠖꠦꠈꠍꠤ ꠅꠈꠣꠘ ꠇꠅꠀꠄ ꠔꠥꠝꠤ ꠁꠝꠣꠘ ꠀꠘꠟꠣꠄ ꠘꠤ?
ꠢꠥꠘꠅ,
ꠄꠞ ꠕꠣꠇꠤꠅ ꠀꠞꠅ ꠛꠃꠔ ꠛꠠ ꠛꠠ ꠇꠦꠞꠣꠝꠔꠤ ꠔꠥꠝꠤ ꠖꠦꠈꠛꠣꠄꠘꠦ।”
৫১ ꠛꠣꠖꠦ ꠁꠍꠣꠄ ꠇꠁꠟꠣ,
“ꠀꠝꠤ ꠔꠥꠝꠞꠣꠞꠦ ꠢꠇ ꠇꠕꠣ ꠇꠁꠞꠣꠝ,
ꠔꠥꠝꠞꠣ ꠖꠦꠈꠛꠣꠄ ꠛꠦꠢꠦꠡ꠆ꠔ ꠈꠥꠟꠤꠉꠦꠍꠦ,
ꠀꠞ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣ ꠅꠇꠟ ꠀꠝꠤ ꠛꠤꠘ-ꠀꠖꠝꠞ ꠃꠙꠞꠦ ꠃꠑꠣ-ꠟꠣꠝꠣ ꠇꠞꠞꠣ।”