ꠁꠍꠣꠄ ꠀꠐꠔꠤꠡ ꠛꠍꠞꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠟꠣ
৫
১ ꠁꠔꠣꠞ ꠛꠣꠖꠦ ꠁꠢꠥꠖꠤ ꠅꠇꠟꠞ ꠁꠖꠞ ꠡꠝꠄ ꠀꠁꠟꠦ ꠁꠍꠣ ꠎꠦꠞꠥꠎꠣꠟꠦꠝꠅ ꠉꠦꠟꠣꠉꠤ।
২ ꠎꠦꠞꠥꠎꠣꠟꠦꠝꠅ ꠝꠦꠠꠣ-ꠖꠞꠎꠣꠞ ꠇꠣꠘ꠆ꠖꠣꠔ ꠄꠇꠐꠣ ꠙꠥꠞꠇꠤ ꠀꠍꠤꠟ,
ꠅꠃ ꠙꠥꠞꠇꠤꠔ ꠍꠤꠠꠤ ꠛꠣꠘ꠆ꠖꠣ ꠙꠣꠌꠈꠣꠘ ꠊꠣꠐ ꠀꠍꠤꠟ,
ꠙꠣꠌꠅ ꠊꠣꠐꠞ ꠃꠙꠞꠦ ꠙꠣꠌꠈꠣꠘ ꠍꠣꠃꠘꠤ।
ꠁꠛꠞꠣꠘꠤ ꠜꠣꠡꠣꠄ ꠁ ꠙꠥꠞꠇꠤꠞ ꠘꠣꠝ ꠛꠣꠄꠔ-ꠍꠖꠣ।
৩ ꠅꠃ ꠊꠣꠐꠅ ꠛꠃꠔ ꠎꠣꠔꠞ ꠛꠦꠝꠣꠞꠤ ꠙꠠꠤ ꠞꠁꠔ।
ꠟꠥꠟꠣ-ꠟꠦꠋꠠꠣ,
ꠀꠘ꠆ꠖꠣ,
ꠀꠞ ꠛꠦꠝꠣꠞꠦ ꠎꠦꠞꠣꠞ ꠡꠞꠤꠟ ꠄꠇ꠆ꠇꠦꠛꠣꠞꠦ ꠢꠥꠇꠣꠁ ꠉꠦꠍꠦ,
ꠔꠣꠞꠣꠅ ꠅꠘꠅ ꠞꠁꠔ।
৪ ꠝꠣꠎꠦ ꠝꠣꠎꠦ ꠄꠇꠎꠘ ꠚꠤꠞꠤꠡ꠆ꠔꠣ ꠀꠁꠀ ꠅꠃ ꠙꠥꠞꠇꠤꠞ ꠙꠣꠘꠤ ꠟꠣꠠꠣꠁꠔꠣ,
ꠟꠣꠠꠣꠘꠤꠞ ꠛꠣꠖꠦꠃ ꠙꠄꠟꠣ ꠎꠦ ꠎꠘ ꠙꠣꠘꠤꠔ ꠟꠣꠝꠔ,
ꠔꠣꠞ ꠎꠔ ꠛꠠ ꠛꠦꠝꠣꠞ ꠅꠃꠇ ꠜꠣꠟꠣ ꠅꠁꠎꠤꠔ।
ꠄꠞꠖꠣꠄ ꠅꠃ ꠛꠦꠝꠣꠞꠤ ꠅꠇꠟꠦ ꠙꠣꠘꠤ ꠟꠣꠠꠣꠘꠤꠞ ꠀꠡꠣꠄ ꠅꠘꠅ ꠙꠠꠤ ꠞꠁꠔ।
৫ ꠄꠞꠣꠞ ꠝꠣꠎꠦ ꠅꠟꠣ ꠄꠇꠎꠘ ꠛꠦꠝꠣꠞꠤ ꠀꠍꠤꠟ,
ꠎꠦ ꠛꠦꠐꠣ ꠀꠐꠔꠤꠡ ꠛꠍꠞ ꠕꠣꠇꠤ ꠛꠦꠝꠣꠞ।
৬ ꠛꠃꠔ ꠖꠤꠘ ꠕꠣꠇꠤ ꠢꠦ ꠅꠘꠅ ꠙꠠꠤ ꠞꠁꠍꠦ ꠢꠥꠘꠤꠀ ꠁꠍꠣꠄ ꠔꠣꠞꠦ ꠎꠤꠇꠣꠁꠟꠣ,
“ꠇꠤꠔꠣ ꠛꠣ,
ꠔꠥꠝꠣꠞ ꠁꠌ꠆ꠍꠣ ꠘꠤ ꠔꠥꠝꠤ ꠜꠣꠟꠣ ꠅꠁꠎꠤꠔꠣꠄ?”
৭ ꠛꠦꠐꠣꠄ ꠇꠂꠟ,
“ꠢꠥꠎꠥꠞ,
ꠀꠝꠣꠞ ꠔ ꠁꠟꠣ ꠇꠦꠃ ꠘꠣꠁ,
ꠎꠦꠁꠘ ꠙꠣꠘꠤ ꠟꠣꠠꠣꠘꠤꠞ ꠟꠉꠦ ꠟꠉꠦꠃ ꠀꠝꠣꠞꠦ ꠙꠥꠞꠇꠤꠔ ꠟꠣꠝꠣꠁꠔ।
ꠀꠝꠤ ꠟꠣꠝꠔꠦ ꠟꠣꠝꠔꠦ ꠀꠞꠇ ꠎꠘ ꠉꠤꠀ ꠟꠣꠝꠤ ꠎꠣꠄ।”
৮ ꠁꠍꠣꠄ ꠄꠞꠦ ꠇꠁꠟꠣ,
“ꠔꠦ ꠃꠑꠅ,
ꠔꠥꠝꠣꠞ ꠛꠤꠍꠘꠣ ꠟꠁꠀ ꠀꠐꠣ-ꠌꠟꠣ ꠇꠞꠅ।”
৯ ꠟꠉꠦ ꠟꠉꠦꠃ ꠅꠃ ꠛꠦꠝꠣꠞꠤ ꠜꠣꠟꠣ ꠅꠁꠉꠦꠟ,
ꠀꠞ ꠔꠣꠞ ꠛꠤꠍꠘꠣ ꠔꠥꠟꠤꠀ ꠌꠟꠣ-ꠚꠤꠞꠣ ꠇꠞꠟ।
ꠢꠤ ꠖꠤꠘ ꠀꠍꠤꠟ ꠎꠥꠝ꠆ꠝꠣꠛꠣꠞ,
ꠎꠥꠝ꠆ꠝꠣꠛꠣꠞꠦ ꠇꠥꠘꠥꠎꠣꠔ ꠇꠣꠝ ꠇꠞꠣ ꠎꠣꠁꠎ ꠘꠣꠄ।
১০ ꠄꠞꠖꠣꠄ ꠁꠢꠥꠖꠤ ꠘꠦꠔꠣ ꠅꠇꠟꠦ ꠅꠃ ꠛꠦꠐꠣꠞꠦ ꠇꠁꠟꠣ,
“ꠀꠁꠎ ꠔ ꠎꠥꠝ꠆ꠝꠣꠛꠣꠞ,
ꠔꠦ ꠀꠁꠎ ꠔꠥꠝꠣꠞ ꠛꠤꠍꠘꠣ ꠔꠥꠟꠤꠀ ꠘꠦꠅꠀ ꠎꠣꠁꠎ ꠘꠣꠄ।”
১১ ꠅꠁꠟꠦ ꠢꠦ ꠇꠂꠟ,
“ꠎꠦꠁꠘ ꠀꠝꠣꠞꠦ ꠜꠣꠟꠣ ꠇꠞꠍꠂꠘ,
ꠔꠣꠁꠘꠃ ꠀꠝꠣꠞꠦ ꠇꠁꠟꠣ,
ꠃꠑꠅ,
ꠔꠥꠝꠣꠞ ꠛꠤꠍꠘꠣ ꠟꠁꠀ ꠀꠐꠣ-ꠌꠟꠣ ꠇꠞꠅ।”
১২ ꠔꠦꠃ ꠘꠦꠔꠣ ꠅꠇꠟꠦ ꠛꠦꠐꠣꠞꠦ ꠎꠤꠇꠣꠁꠟꠣ,
“ꠅꠃ ꠝꠣꠘꠥꠡꠉꠥ ꠇꠦꠉꠥ,
ꠎꠦꠉꠤꠄ ꠔꠥꠝꠣꠞꠦ ꠇꠁꠍꠦ,
ꠛꠤꠍꠘꠣ ꠟꠁꠀ ꠌꠟꠣ-ꠚꠤꠞꠣ ꠇꠞꠔꠣꠄ?”
১৩ ꠅꠁꠟꠦ ꠅꠃ ꠛꠦꠐꠣꠄ ꠔ ꠎꠣꠘꠔ ꠘꠣ,
ꠔꠣꠁꠘ ꠇꠦ,
ꠢꠤ ꠎꠣꠉꠣꠔ ꠛꠃꠔ ꠝꠣꠘꠡꠦ ꠜꠤꠠ ꠇꠞꠤꠟꠤꠍꠂꠘ ꠖꠦꠈꠤꠀ,
ꠁꠍꠣ ꠢꠤꠘ ꠕꠘꠦ ꠉꠦꠍꠟꠣꠉꠤ।
১৪ ꠛꠣꠖꠦ ꠁꠍꠣꠄ ꠅꠃ ꠛꠦꠐꠣꠞꠦ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠙꠣꠁꠀ ꠇꠁꠟꠣ,
“ꠢꠥꠘꠅ,
ꠔꠥꠝꠤ ꠔ ꠛꠦꠝꠣꠞ ꠕꠣꠇꠤ ꠜꠣꠟꠣ ꠅꠁꠉꠦꠍ।
ꠔꠦ ꠀꠞ ꠇꠥꠘꠥ ꠉꠥꠘꠣ ꠇꠞꠤꠅ ꠘꠣ,
ꠎꠣꠔꠦ ꠔꠥꠝꠣꠞ ꠡꠞꠛꠘꠣꠡ ꠘꠣ ꠅꠄ।”
১৫ ꠔꠦꠃ ꠅꠃ ꠛꠦꠐꠣꠄ ꠉꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠇꠂꠟ,
ꠔꠣꠞꠦ ꠎꠦꠁꠘ ꠜꠣꠟꠣ ꠇꠞꠍꠂꠘ ꠄꠘ ꠘꠣꠝ ꠁꠍꠣ।
ꠢꠎꠞꠔ ꠁꠍꠣꠞ ꠀꠟ꠆ꠟꠣꠁ ꠄꠈꠔꠤꠀꠞ
১৬ ꠁꠍꠣꠄ ꠎꠥꠝ꠆ꠝꠣꠛꠣꠞꠦ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠄ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ।
১৭ ꠅꠁꠟꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠢꠥꠘꠅ,
ꠀꠝꠣꠞ ꠉꠣꠁꠛꠤ ꠛꠣꠚꠦ ꠢꠣꠝꠦꠡꠣ ꠇꠣꠝ ꠇꠞꠞꠣ ꠀꠞ ꠀꠝꠤꠅ ꠇꠞꠞꠣꠝ।”
১৮ ꠁꠈꠣꠘ ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠎꠣꠘꠦ ꠝꠣꠞꠣꠞ ꠟꠣꠉꠤ ꠀꠞꠅ ꠉꠞꠝ ꠅꠁꠀ ꠙꠕ ꠔꠥꠇꠣꠘꠤꠔ ꠞꠁꠟꠣ।
ꠔꠣꠞꠣ ꠝꠘꠅ ꠇꠞꠍꠤꠟ,
ꠔꠣꠁꠘ ꠈꠣꠟꠤ ꠎꠥꠝ꠆ꠝꠣꠛꠣꠞꠞ ꠘꠤꠅꠝ ꠜꠣꠋꠉꠤꠍꠂꠘ ꠘꠣ,
ꠔꠣꠁꠘ ꠀꠟ꠆ꠟꠣ ꠙꠣꠇꠞꠦ ꠛꠣꠚ ꠒꠣꠇꠤꠀ ꠡꠤꠞꠤꠇꠤꠅ ꠇꠞꠍꠂꠘ।
১৯ ꠄꠞꠟꠣꠉꠤ ꠔꠣꠁꠘ ꠅꠃ ꠘꠦꠔꠣ ꠅꠇꠟꠞꠦ ꠇꠁꠟꠣ,
“ꠀꠝꠤ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ,
ꠙꠥꠔꠦ ꠔ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠔꠣ ꠙꠣꠞꠂꠘ ꠘꠣ,
ꠅꠁꠟꠦ ꠔꠣꠘ ꠛꠣꠚꠞꠦ ꠎꠦꠔꠣ ꠇꠣꠝ ꠇꠞꠣꠔ ꠖꠦꠈꠂꠘ,
ꠔꠣꠁꠘ ꠈꠣꠟꠤ ꠅꠔꠣꠃ ꠇꠞꠂꠘ,
ꠛꠣꠚꠦ ꠎꠦꠔꠣ ꠇꠞꠂꠘ,
ꠙꠥꠔꠦꠅ ꠔ ꠅꠔꠣ ꠇꠞꠂꠘ।
২০ ꠛꠣꠚꠦ ꠔꠣꠘ ꠙꠥꠔꠞꠦ ꠝꠣꠄꠀ ꠇꠞꠂꠘ ꠀꠞ ꠔꠣꠁꠘ ꠘꠤꠎꠦ ꠎꠦ ꠇꠣꠝ ꠇꠞꠂꠘ,
ꠁꠔꠣ ꠢꠇꠟꠔꠣꠃ ꠙꠥꠔꠞꠦ ꠖꠦꠈꠣꠁꠘ।
ꠀꠞ ꠁꠔꠣ ꠕꠣꠇꠤ ꠀꠞꠅ ꠛꠠ ꠛꠠ ꠇꠥꠖꠞꠔꠤ ꠇꠣꠝ ꠙꠥꠔꠞꠦ ꠖꠦꠈꠣꠁꠛꠣ,
ꠎꠦꠔꠣ ꠖꠦꠈꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠎꠤꠛꠣ।
২১ ꠛꠣꠚꠦ ꠎꠦꠟꠣ ꠝꠥꠞ꠆ꠖꠣꠞꠦ ꠎꠤꠘ꠆ꠖꠣ ꠇꠞꠤ ꠔꠥꠟꠂꠘ,
ꠙꠥꠔꠦꠅ ꠅꠃꠟꠣ ꠎꠦꠞꠣꠞꠦ ꠁꠌ꠆ꠍꠣ ꠎꠤꠘ꠆ꠖꠦꠉꠤ ꠖꠣꠘ ꠇꠞꠂꠘ।
২২ ꠛꠣꠚꠦ ꠇꠦꠃꠞꠞ ꠛꠤꠌꠣꠞꠅ ꠇꠞꠂꠘ ꠘꠣ,
ꠔꠣꠘ ꠢꠇꠟ ꠛꠤꠌꠣꠞꠞ ꠜꠣꠞ ꠙꠥꠔꠞ ꠀꠔꠅ ꠖꠤꠍꠂꠘ,
২৩ ꠎꠣꠔꠦ ꠛꠣꠚꠞꠦ ꠎꠦꠟꠣ ꠢꠇꠟꠦ ꠁꠎ꠆ꠎꠔ ꠇꠞꠦ,
ꠅꠃꠟꠣ ꠙꠥꠔꠞꠦꠅ ꠁꠎ꠆ꠎꠔ ꠇꠞꠦ।
ꠙꠥꠔꠞꠦ ꠎꠦ ꠁꠎ꠆ꠎꠔ ꠇꠞꠦ ꠘꠣ,
ꠢꠦ ꠀꠍꠟꠦ ꠢꠃ ꠛꠣꠚꠞꠦꠅ ꠁꠎ꠆ꠎꠔ ꠇꠞꠦ ꠘꠣ,
ꠎꠦꠁꠘ ꠁ ꠙꠥꠔꠞꠦ ꠛꠦꠎꠤꠍꠂꠘ।
২৪ “ꠀꠝꠤ ꠀꠙꠘꠣꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ,
ꠎꠦ ꠎꠘꠦ ꠀꠝꠣꠞ ꠇꠣꠟꠣꠝ ꠢꠥꠘꠦ ꠀꠞ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ,
ꠢꠦ ꠔ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ।
ꠔꠣꠞꠦ ꠀꠞ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠔ ꠘꠣꠄ।
ꠢꠦ ꠔ ꠝꠃꠔ ꠕꠣꠇꠤ ꠎꠤꠘ꠆ꠖꠦꠉꠤꠔ ꠙꠣꠠꠤ ꠖꠤꠟꠣꠁꠍꠦ।
২৫ ꠀꠞ ꠀꠝꠤ ꠢꠣꠍꠣꠃ ꠇꠁꠞꠣꠝ,
ꠁꠟꠣ ꠄꠇ ꠎꠝꠣꠘꠣ ꠀꠁꠛ,
ꠛꠞꠋ ꠅꠈꠘꠃ ꠀꠁꠌ꠆ꠍꠦ,
ꠎꠦꠛꠟꠣ ꠝꠥꠞ꠆ꠖꠣ ꠅꠇꠟꠦ ꠀꠝꠤ ꠁꠛꠘꠥꠟ꠆ꠟꠣꠞ ꠉꠟꠣꠞ ꠀꠅꠀꠎ ꠢꠥꠘꠛꠣ,
ꠀꠞ ꠎꠣꠞꠣ ꠢꠥꠘꠛꠣ ꠔꠣꠞꠣ ꠎꠤꠘ꠆ꠖꠣ ꠅꠁꠛꠣ।
২৬ ꠁꠔꠣꠞ ꠇꠣꠞꠘ ꠅꠁꠟ,
ꠛꠣꠚ ꠘꠤꠎꠦ ꠎꠦꠟꠣ ꠎꠤꠘ꠆ꠖꠦꠉꠤꠞ ꠝꠣꠟꠤꠇ,
ꠔꠣꠘ ꠙꠥꠔꠞꠦꠅ ꠅꠃꠟꠣ ꠎꠤꠘ꠆ꠖꠦꠉꠤꠞ ꠝꠣꠟꠤꠇꠣꠘꠣ ꠖꠤꠍꠂꠘ।
২৭ ꠛꠣꠚꠦ ꠙꠥꠔꠞꠦ ꠝꠣꠘꠡꠞ ꠛꠤꠌꠣꠞ ꠇꠞꠣꠞ ꠄꠈꠔꠤꠀꠞ ꠖꠤꠍꠂꠘ,
ꠇꠣꠞꠘ ꠄꠁꠘꠃ ꠔ ꠛꠤꠘ-ꠀꠖꠝ।
২৮ ꠔꠦ ꠁꠔꠣ ꠢꠥꠘꠤꠀ ꠀꠙꠘꠣꠞꠣ ꠔꠣꠁꠎ꠆ꠎꠥꠛ ꠅꠁꠛꠣ ꠘꠣ,
ꠎꠣꠘꠂꠘ ꠘꠤ,
ꠅꠃꠟꠣ ꠡꠝꠄ ꠀꠁꠅꠞ,
ꠎꠦꠛꠟꠣ ꠀꠟ꠆ꠟꠣꠞ ꠙꠥꠔꠞ ꠉꠟꠣꠞ ꠀꠅꠀꠎ ꠢꠥꠘꠤꠀ ꠝꠥꠞ꠆ꠖꠣ ꠅꠇꠟ ꠇꠄꠛꠞ ꠕꠣꠇꠤ ꠛꠣꠞꠅꠁꠀ ꠀꠁꠛꠣ।
২৯ ꠀꠞ ꠎꠦꠞꠣ ꠘꠦꠇ ꠇꠣꠝ ꠇꠞꠍꠂꠘ,
ꠔꠣꠞꠣ ꠛꠦꠢꠦꠡ꠆ꠔꠤ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠃꠑꠛꠣ,
ꠅꠁꠟꠦ ꠎꠦꠞꠣ ꠘꠣꠚꠞꠝꠣꠘꠤꠞ ꠝꠣꠎꠦ ꠎꠤꠘ꠆ꠖꠦꠉꠤ ꠇꠣꠐꠣꠁꠍꠦ,
ꠔꠣꠞꠣ ꠃꠑꠛꠣ ꠡꠣꠎꠣ ꠙꠣꠅꠀꠞ ꠟꠣꠉꠤ।
৩০ “ꠀꠝꠤ ꠔ ꠘꠤꠎꠦ ꠘꠤꠎꠦ ꠇꠥꠘ꠆ꠔꠣ ꠇꠞꠔꠣꠝ ꠙꠣꠞꠤ ꠘꠣ,
ꠀꠝꠤ ꠎꠦꠟꠣ ꠢꠥꠘꠤ ꠅꠟꠣ ꠛꠤꠌꠣꠞ ꠇꠞꠤ।
ꠀꠝꠤ ꠢꠇ ꠛꠤꠌꠣꠞ ꠇꠞꠤ,
ꠇꠣꠞꠘ ꠀꠝꠤ ꠀꠝꠣꠞ ꠘꠤꠎꠞ ꠁꠌ꠆ꠍꠣꠄ ꠇꠣꠝ ꠇꠞꠔꠣꠝ ꠌꠣꠁ ꠘꠣ,
ꠈꠣꠟꠤ ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ ꠔꠣꠘ ꠝꠞ꠆ꠎꠤ ꠙꠥꠞꠣ ꠇꠞꠔꠣꠝ ꠌꠣꠁ।
ꠘꠤꠎꠞ ꠛꠦꠙꠣꠞꠦ ꠢꠎꠞꠔ ꠁꠍꠣ
৩১ “ꠀꠝꠤ ꠎꠥꠖꠤ ꠘꠤꠎꠞ ꠛꠦꠙꠣꠞꠦ ꠘꠤꠎꠦ ꠡꠣꠇ꠆ꠇꠤ ꠖꠦꠁ,
ꠔꠦ ꠁ ꠡꠣꠇ꠆ꠇꠤ ꠡꠑꠤꠇ ꠘꠣꠄ।
৩২ ꠅꠁꠟꠦ ꠖꠥꠍꠞꠣ ꠎꠘꠦꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠞꠣ,
ꠀꠞ ꠀꠝꠤ ꠎꠣꠘꠤ,
ꠔꠣꠁꠘ ꠎꠦ ꠡꠣꠇ꠆ꠇꠤ ꠖꠤꠞꠣ,
ꠁꠔꠣ ꠢꠣꠍꠣ।
৩৩ ꠀꠙꠘꠣꠞꠣ ꠔ ꠄꠢꠤꠀ ꠘꠛꠤꠞ ꠉꠦꠍꠦ ꠈꠛꠞꠤꠀ ꠙꠣꠑꠣꠁꠀ ꠎꠤꠇꠣꠁꠍꠂꠘ,
ꠔꠣꠁꠘꠅ ꠢꠇꠞ ꠙꠇ꠆ꠇꠦ ꠡꠣꠇ꠆ꠇꠤ ꠖꠤꠍꠂꠘ।
৩৪ ꠀꠞ ꠀꠝꠤ ꠇꠥꠘꠥ ꠝꠣꠘꠡꠞ ꠡꠣꠇ꠆ꠇꠤꠞ ꠃꠙꠞꠦ ꠜꠞꠡꠣ ꠇꠞꠤ ꠘꠣ,
ꠅꠁꠟꠦ ꠀꠙꠘꠣꠞꠣ ꠎꠣꠔꠦ ꠘꠣꠎꠣꠔ ꠙꠣꠁꠀ ꠎꠣꠘ ꠛꠣꠌꠣꠁꠔꠣ ꠙꠣꠞꠂꠘ,
ꠄꠞꠖꠣꠄ ꠁꠔꠣ ꠇꠁꠞꠣꠝ।
৩৫ ꠢꠎꠞꠔ ꠄꠢꠤꠀꠃ ꠀꠍꠟꠣ ꠢꠃ ꠎꠣꠟꠣꠁꠟ ꠝꠥꠡꠣꠟ,
ꠎꠦ ꠝꠥꠡꠣꠟꠦ ꠚꠞ ꠖꠤꠍꠤꠟ।
ꠀꠙꠘꠣꠞꠣꠅ ꠕꠥꠠꠣ ꠇꠄꠖꠤꠘ ꠅꠃ ꠝꠥꠡꠣꠟꠞ ꠚꠞꠞ ꠝꠣꠎꠦ ꠈꠥꠡꠤ ꠇꠞꠔꠦ ꠞꠣꠎꠤ ꠅꠁꠍꠟꠣ।
৩৬ “ꠅꠁꠟꠦ ꠄꠢꠤꠀ ꠘꠛꠤꠞ ꠡꠣꠇ꠆ꠇꠤ ꠔꠘꠦꠅ ꠀꠞꠅ ꠛꠠ ꠡꠣꠇ꠆ꠇꠤ ꠀꠝꠣꠞ ꠀꠍꠦ,
ꠇꠣꠞꠘ ꠀꠝꠣꠞ ꠉꠣꠁꠛꠤ ꠛꠣꠚꠦ ꠎꠦ ꠇꠣꠝꠞ ꠟꠣꠉꠤ ꠀꠝꠣꠞꠦ ꠙꠣꠑꠣꠁꠍꠂꠘ,
ꠀꠝꠤ ꠅꠔꠣꠃ ꠇꠞꠞꠣꠝ।
ꠀꠞ ꠅꠃ ꠇꠣꠝꠞ ꠡꠣꠇ꠆ꠇꠤꠄꠃ ꠛꠥꠎꠣ ꠎꠣꠄ,
ꠀꠝꠣꠞꠦ ꠀꠝꠣꠞ ꠉꠣꠁꠛꠤ ꠛꠣꠚꠦ ꠛꠦꠎꠤꠍꠂꠘ।
৩৭ ꠔꠣꠁꠘꠃ ꠔ ꠢꠃ ꠛꠣꠛꠣ,
ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ,
ꠔꠣꠁꠘ ꠘꠤꠎꠦꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠤꠍꠂꠘ।
ꠀꠙꠘꠣꠞꠣ ꠇꠥꠘꠥ ꠡꠝꠄ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠍꠂꠘ ꠘꠣ,
ꠀꠞ ꠔꠣꠘꠞꠦ ꠖꠦꠈꠍꠂꠘꠅ ꠘꠣ।
৩৮ ꠄꠍꠣꠠꠣ ꠔꠣꠘ ꠇꠣꠟꠣꠝ ꠔ ꠀꠙꠘꠣꠞꠣꠞ ꠖꠤꠟꠅ ꠞꠄ ꠘꠣ,
ꠇꠣꠞꠘ ꠔꠣꠁꠘ ꠎꠣꠞꠦ ꠙꠣꠑꠣꠁꠍꠂꠘ,
ꠄꠘ ꠃꠙꠞꠦ ꠀꠙꠘꠣꠞꠣ ꠁꠝꠣꠘ ꠀꠘꠂꠘ ꠘꠣ।
৩৯ “ꠀꠙꠘꠣꠞꠣ ꠔ ꠈꠥꠛ ꠝꠘ ꠖꠤꠀ ꠀꠍꠝꠣꠘꠤ ꠇꠤꠔꠣꠛ ꠔꠤꠟꠣꠅꠔ ꠇꠞꠂꠘ,
ꠝꠘꠅ ꠇꠞꠂꠘ ꠁꠔꠣ ꠔꠤꠟꠣꠅꠔ ꠇꠞꠟꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠛꠣ।
ꠅꠁꠟꠦ ꠅꠃ ꠇꠤꠔꠣꠛꠦꠃ ꠔ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠄ।
৪০ ꠄꠞꠛꠣꠖꠦꠅ ꠀꠙꠘꠣꠞꠣ ꠎꠤꠘ꠆ꠖꠦꠉꠤ ꠙꠣꠅꠀꠞ ꠟꠣꠉꠤ ꠀꠝꠣꠞ ꠉꠦꠍꠦ ꠀꠁꠔꠣ ꠌꠣꠁꠘ ꠘꠣ।
৪১ “ꠀꠝꠤ ꠔ ꠝꠣꠘꠡꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠅꠀꠞ ꠀꠡꠣꠄ ꠀꠁꠍꠤ ꠘꠣ,
৪২ ꠅꠁꠟꠦ ꠀꠝꠤ ꠎꠣꠘꠤ,
ꠀꠟ꠆ꠟꠣꠞ ꠛꠣꠄ ꠀꠙꠘꠣꠞꠣꠞ ꠇꠥꠘꠥ ꠝꠢꠛ꠆ꠛꠔ ꠘꠣꠁ,
ꠀꠝꠤ ꠔ ꠀꠙꠘꠣꠞꠣꠞꠦ ꠌꠤꠘꠤ।
৪৩ ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠘꠣꠝ ꠟꠁꠀ ꠀꠁꠍꠤ,
ꠔꠣ-ꠅ ꠀꠙꠘꠣꠞꠣ ꠀꠝꠣꠞꠦ ꠄꠇꠤꠘ ꠇꠞꠞꠣ ꠘꠣ।
ꠅꠁꠟꠦ ꠖꠥꠍꠞꠣ ꠇꠦꠃ ꠎꠥꠖꠤ ꠔꠣꠞ ꠘꠤꠎꠞ ꠘꠣꠝꠦ ꠀꠄ,
ꠔꠦ ꠔꠣꠞꠦ ꠀꠙꠘꠣꠞꠣ ꠄꠇꠤꠘ ꠇꠞꠛꠣ।
৪৪ ꠀꠙꠘꠣꠞꠣ ꠄꠇꠦ-ꠅꠁꠘ꠆ꠘꠞ ꠉꠦꠍ ꠕꠣꠇꠤ ꠔꠣꠞꠤꠚ ꠙꠣꠁꠔꠣ ꠌꠣꠁꠘ,
ꠅꠁꠟꠦ ꠎꠦ ꠔꠣꠞꠤꠚ ꠀꠟ꠆ꠟꠣꠞ ꠉꠦꠍ ꠕꠘꠦ ꠙꠣꠅꠀ ꠎꠣꠄ,
ꠁꠔꠣꠞ ꠟꠣꠉꠤ ꠇꠥꠘꠥ ꠌꠦꠡ꠆ꠐꠣ ꠇꠞꠂꠘ ꠘꠣ।
ꠔꠦ ꠀꠙꠘꠣꠞꠣ ꠇꠦꠝꠘꠦ ꠄꠇꠤꠘ ꠇꠞꠛꠣ?
৪৫ ꠀꠙꠘꠣꠞꠣ ꠝꠘꠅ ꠇꠞꠛꠣ ꠘꠣ,
ꠀꠝꠤ ꠀꠝꠣꠞ ꠛꠣꠛꠣꠞ ꠉꠦꠍꠦ ꠀꠙꠘꠣꠁꠘ꠆ꠔꠞꠦ ꠖꠥꠡꠤ ꠛꠣꠘꠣꠁꠝꠥ।
ꠅꠁꠟꠦ ꠎꠦ ꠝꠥꠍꠣ ꠘꠛꠤꠞ ꠃꠙꠞꠦ ꠀꠙꠘꠣꠞꠣ ꠜꠞꠡꠣ ꠇꠞꠤ ꠀꠍꠂꠘ,
ꠢꠃ ꠝꠥꠍꠣꠄꠃ ꠀꠙꠘꠣꠁꠘ꠆ꠔꠞꠦ ꠖꠥꠡꠤ ꠇꠁꠞꠣ।
৪৬ ꠀꠙꠘꠣꠞꠣ ꠎꠥꠖꠤ ꠝꠥꠍꠣ ꠘꠛꠤꠞꠦ ꠄꠇꠤꠘ ꠇꠞꠔꠣ,
ꠔꠦ ꠀꠝꠣꠞꠦꠅ ꠄꠇꠤꠘ ꠇꠞꠟꠣ ꠅꠘꠦ,
ꠁ ꠝꠥꠍꠣ ꠘꠛꠤꠄ ꠔ ꠀꠝꠣꠞ ꠛꠦꠙꠣꠞꠦꠃ ꠟꠦꠈꠍꠂꠘ।
৪৭ ꠅꠁꠟꠦ ꠀꠙꠘꠣꠞꠣ ꠎꠦꠛꠟꠣ ꠔꠣꠘ ꠟꠦꠈꠣꠞꠦꠃ ꠄꠇꠤꠘ ꠇꠞꠂꠘ ꠘꠣ,
ꠔꠦ ꠀꠝꠣꠞ ꠝꠥꠈꠞ ꠇꠕꠣꠞꠦ ꠇꠤꠟꠣ ꠄꠇꠤꠘ ꠇꠞꠛꠣ?”