ꠢꠎꠞꠔ ꠁꠍꠣꠞ ꠀꠙꠘ ꠜꠣꠁꠀꠂꠘ
৭
১ ꠄꠞꠛꠣꠖ ꠕꠣꠇꠤ ꠢꠎꠞꠔ ꠁꠍꠣ ꠉꠣꠟꠤꠟ ꠎꠤꠟꠣꠞ ꠜꠤꠔꠞꠦꠃ ꠌꠟꠣ-ꠚꠤꠞꠣ ꠇꠞꠟꠣ।
ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠤꠔ ꠌꠣꠁꠍꠤꠟ,
ꠄꠞꠟꠣꠉꠤ ꠔꠣꠁꠘ ꠀꠞ ꠄꠢꠥꠖꠤꠀ ꠎꠤꠟꠣꠔ ꠎꠣꠁꠔꠣ ꠌꠣꠁꠟꠣ ꠘꠣ।
২ ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠒꠦꠞꠣ-ꠊꠞꠞ ꠁꠖꠞ ꠖꠤꠘ ꠊꠘꠣꠁ ꠀꠁꠍꠤꠟ।
৩ ꠄꠞꠟꠣꠉꠤ ꠁꠍꠣꠞ ꠜꠣꠁꠀꠂꠘ꠆ꠔꠦ ꠔꠣꠘꠞꠦ ꠇꠁꠟꠣ,
“ꠔꠥꠝꠤ ꠁꠘ ꠕꠘꠦ ꠄꠢꠥꠖꠤꠀ ꠎꠤꠟꠣꠔ ꠎꠣꠅꠉꠤ,
ꠔꠦꠃ ꠔꠥꠝꠤ ꠎꠦꠔꠣ ꠇꠣꠝ ꠇꠞꠍ,
ꠅꠔꠣ ꠔꠥꠝꠣꠞ ꠃꠝ꠆ꠝꠔ ꠅꠇꠟꠦꠅ ꠖꠦꠈꠛꠣ।
৪ ꠇꠦꠃ ꠎꠥꠖꠤ ꠘꠤꠎꠞꠦ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠔ ꠌꠣꠄ,
ꠔꠦ ꠢꠦ ꠟꠥꠇꠣꠁꠀ ꠇꠥꠘ꠆ꠔꠣ ꠇꠞꠦ ꠘꠣ।
ꠔꠥꠝꠤꠅ ꠎꠦꠛꠟꠣ ꠅꠝꠘ ꠇꠣꠝ ꠇꠞꠞꠣꠄ,
ꠔꠦ ꠘꠤꠎꠞꠦ ꠝꠣꠘꠡꠞ ꠉꠦꠍꠦ ꠎꠣꠁꠞ ꠇꠞꠅ।”
৫ ꠀꠍꠟꠦ ꠁꠍꠣꠞ ꠜꠣꠁꠀꠂꠘ꠆ꠔꠦꠅ ꠔꠣꠘ ꠃꠙꠞꠦ ꠁꠝꠣꠘ ꠀꠘꠍꠂꠘ ꠘꠣ।
৬ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠀꠝꠣꠞ ꠡꠝꠄ ꠅꠈꠘꠅ ꠅꠁꠍꠦ ꠘꠣ,
ꠅꠁꠟꠦ ꠔꠥꠝꠞꠣꠞ ꠔ ꠡꠝꠄ ꠅꠡꠝꠄ ꠇꠥꠘ꠆ꠔꠣ ꠘꠣꠁ।
৭ ꠖꠥꠘꠤꠀꠞ ꠝꠣꠘꠡꠦ ꠔꠥꠝꠞꠣꠞꠦ ꠊꠤꠘ꠆ꠘꠣꠁꠔ ꠘꠣꠄ,
ꠅꠁꠟꠦ ꠀꠝꠣꠞꠦ ꠊꠤꠘ ꠇꠞꠦ।
ꠀꠝꠤ ꠔ ꠔꠣꠞꠣꠞ ꠛꠦꠙꠣꠞꠦ ꠇꠁꠀꠞ,
ꠔꠣꠞꠣꠞ ꠢꠇꠟ ꠇꠣꠝꠃ ꠈꠣꠞꠣꠙ।
৮ ꠔꠦ ꠔꠥꠝꠞꠣ ꠎꠣꠅꠉꠤ,
ꠉꠤꠀ ꠁꠖ ꠇꠞꠅ।
ꠀꠝꠣꠞ ꠡꠝꠄ ꠅꠈꠘꠅ ꠙꠥꠞꠣ ꠅꠁꠍꠦ ꠘꠣ,
ꠄꠞꠟꠣꠉꠤ ꠀꠝꠤ ꠅꠈꠘ ꠎꠣꠁꠔꠣꠝ ꠘꠣꠄ।”
৯ ꠅꠈꠣꠘ ꠇꠁꠀ ꠔꠣꠁꠘ ꠉꠣꠟꠤꠟ ꠎꠤꠟꠣꠔ ꠞꠁꠉꠦꠟꠣ।
১০ ꠔꠣꠘ ꠜꠣꠁꠀꠂꠘ ꠁꠖꠞ ꠝꠣꠢꠚꠤꠟꠅ ꠉꠤꠀ ꠢꠣꠞꠟꠦ ꠔꠣꠁꠘꠅ ꠉꠦꠟꠣ,
ꠅꠁꠟꠦ ꠈꠥꠟꠣ-ꠝꠦꠟꠣ ꠘꠣ ꠉꠤꠀ ꠟꠥꠇꠣꠁꠀ ꠉꠦꠟꠣ।
১১ ꠁꠖꠞ ꠇꠣꠟꠅ ꠁꠢꠥꠖꠤ ꠘꠦꠔꠣ ꠅꠇꠟꠦ ꠔꠣꠘ ꠔꠣꠟ꠆ꠟꠣꠡ ꠇꠞꠣꠔ ꠞꠁꠟꠣ,
ꠀꠞ ꠇꠁꠟꠣ,
“ꠢꠃ ꠝꠣꠘꠥꠡꠐꠣ ꠇꠥꠀꠁ।”
১২ ꠜꠤꠠꠞ ꠝꠣꠎꠦ ꠁꠍꠣꠞ ꠛꠦꠙꠣꠞꠦ ꠝꠣꠘꠡꠦ ꠝꠣꠔꠣ-ꠝꠣꠔꠤ ꠇꠞꠟꠣ।
ꠇꠦꠃ ꠇꠦꠃ ꠇꠂꠟ,
“ꠄꠁꠘ ꠔ ꠛꠠ ꠜꠣꠟꠣ ꠝꠣꠘꠥꠡ।”
ꠀꠞ ꠇꠦꠃ ꠇꠦꠃ ꠇꠂꠟ,
“ꠘꠣ,
ꠘꠣ,
ꠢꠦ ꠔ ꠝꠣꠘꠡꠞꠦ ꠛꠦ-ꠙꠕꠤ ꠛꠣꠘꠣꠁꠟꠣꠞ।”
১৩ ꠅꠁꠟꠦ ꠁꠢꠥꠖꠤ ꠘꠦꠔꠣ ꠅꠇꠟꠞꠦ ꠒꠞꠣꠁꠀ,
ꠝꠥꠈ ꠈꠥꠟꠤꠀ ꠔꠣꠘ ꠛꠦꠙꠣꠞꠦ ꠇꠦꠃ ꠇꠥꠘ꠆ꠔꠣ ꠝꠣꠔꠤꠟ ꠘꠣ।
ꠁꠖꠞ ꠡꠝꠄ ꠢꠎꠞꠔ ꠁꠍꠣꠞ ꠔꠣꠟꠤꠝ
১৪ ꠅꠃ ꠁꠖꠞ ꠝꠣꠎꠣꠝꠣꠎꠤ ꠡꠝꠄ ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠇꠣꠛꠣ ꠡꠞꠤꠚꠅ ꠉꠤꠀ ꠔꠣꠟꠤꠝ ꠖꠤꠟꠣ।
১৫ ꠔꠣꠘ ꠔꠣꠟꠤꠝ ꠢꠥꠘꠤꠀ ꠔꠣꠁꠎ꠆ꠎꠥꠛ ꠅꠁꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠇꠁꠟꠣ,
“ꠁ ꠝꠣꠘꠡꠦ ꠝꠣꠖ꠆ꠞꠣꠍꠣꠔ ꠘꠣ ꠙꠠꠤꠀ ꠅꠔ ꠁꠟꠤꠝ ꠙꠣꠁꠟ ꠇꠤꠟꠣ?”
১৬ ꠁꠍꠣꠄ ꠎꠥꠀꠙ ꠖꠤꠟꠣ,
“ꠀꠝꠤ ꠎꠦ ꠔꠣꠟꠤꠝ ꠖꠦꠁ,
ꠁꠔꠣ ꠀꠝꠣꠞ ꠘꠤꠎꠞ ꠘꠣꠄ,
ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ,
ꠁꠔꠣ ꠔ ꠔꠣꠘꠃ ꠔꠣꠟꠤꠝ।
১৭ ꠇꠦꠃ ꠎꠥꠖꠤ ꠔꠣꠘ ꠝꠞ꠆ꠎꠤ ꠎꠥꠉꠣꠁꠀ ꠌꠟꠔ ꠌꠣꠄ,
ꠔꠦ ꠢꠦ ꠛꠥꠎꠛ,
ꠁ ꠔꠣꠟꠤꠝ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠦ,
ꠘꠣ ꠀꠝꠣꠞ ꠝꠥꠈ ꠕꠣꠇꠤ ꠖꠤꠞꠣꠝ।
১৮ ꠎꠦ ꠎꠘꠦ ꠘꠤꠎꠞ ꠝꠘ ꠕꠣꠇꠤ ꠝꠣꠔꠦ,
ꠢꠦ ꠈꠣꠟꠤ ꠘꠤꠎꠞ ꠔꠣꠞꠤꠚ ꠙꠣꠁꠔ ꠌꠣꠄ।
ꠅꠁꠟꠦ ꠎꠦ ꠎꠘꠦ ꠔꠣꠞꠦ ꠙꠣꠑꠣꠘꠦꠀꠟꠣ ꠝꠣꠟꠤꠇꠞ ꠔꠣꠞꠤꠚ ꠇꠞꠣꠞ ꠌꠦꠡ꠆ꠐꠣ ꠇꠞꠦ,
ꠢꠦ ꠢꠣꠝꠦꠡꠣ ꠢꠇ-ꠢꠣꠟꠣꠟ ꠕꠣꠇꠦ,
ꠔꠣꠞ ꠝꠘꠅ ꠇꠥꠘꠥ ꠗꠥꠇꠣꠛꠣꠎꠤ ꠘꠣꠁ।
১৯ “ꠔꠥꠝꠞꠣ ꠇꠥꠘꠥ ꠝꠥꠍꠣ ꠘꠛꠤꠞ ꠡꠞꠤꠅꠔ ꠙꠣꠁꠍ ꠘꠣ ꠘꠤ?
ꠅꠁꠟꠦ ꠔꠥꠝꠞꠣ ꠄꠇꠎꠘꠦꠅ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠝꠣꠘꠞꠣꠄ ꠘꠣ।
ꠔꠦ ꠔꠥꠝꠞꠣ ꠇꠦꠘꠦ ꠀꠝꠣꠞꠦ ꠝꠣꠞꠤꠟꠤꠔꠣꠄ ꠌꠣꠁꠞꠣꠄ?”
২০ ꠔꠦꠃ ꠔꠣꠞꠣ ꠇꠁꠟꠣ,
“ꠔꠥꠝꠣꠞꠦ ꠜꠥꠔꠦ ꠙꠣꠁꠍꠦ,
ꠔꠥꠝꠣꠞꠦ ꠇꠦ ꠝꠣꠞꠔ ꠌꠣꠞ?”
২১ ꠁꠍꠣꠄ ꠔꠣꠞꠣꠞꠦ ꠇꠁꠟꠣ,
“ꠀꠝꠤ ꠈꠣꠟꠤ ꠄꠇꠈꠣꠘ ꠇꠣꠝ ꠇꠞꠟꠣꠝ,
ꠀꠞ ꠔꠥꠝꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣꠄ।
২২ ꠢꠎꠞꠔ ꠝꠥꠍꠣꠄ ꠔ ꠔꠥꠝꠞꠣꠞꠦ ꠝꠍꠟꠝꠣꠘꠤ ꠇꠣꠝ ꠇꠞꠣꠘꠤꠞ ꠘꠤꠅꠝ ꠖꠤꠍꠟꠣ,
ꠀꠞ ꠎꠥꠝ꠆ꠝꠣꠛꠣꠞꠦꠅ ꠔꠥꠝꠞꠣ ꠅꠃ ꠇꠣꠝ ꠇꠞꠣꠅ।
ꠀꠍꠟꠦ,
ꠁ ꠘꠤꠅꠝ ꠝꠥꠍꠣ ꠘꠛꠤꠞ ꠉꠦꠍ ꠕꠣꠇꠤ ꠀꠁꠍꠦ ꠘꠣ,
ꠛꠞꠋ ꠀꠉꠞ ꠝꠄ-ꠝꠥꠞꠛ꠆ꠛꠤꠞ ꠉꠦꠍ ꠕꠣꠇꠤꠃ ꠀꠁꠍꠦ।
২৩ ꠑꠤꠇ ꠀꠍꠦ,
ꠝꠥꠍꠣ ꠘꠛꠤꠞ ꠘꠤꠅꠝ ꠌꠣꠟꠥ ꠞꠣꠈꠣꠞ ꠟꠣꠉꠤ ꠎꠥꠝ꠆ꠝꠣꠛꠣꠞꠦꠅ ꠎꠥꠖꠤ ꠝꠍꠟꠝꠣꠘꠤ ꠇꠣꠝ ꠇꠞꠣꠁꠟ ꠎꠣꠄ,
ꠔꠦ ꠀꠝꠤ ꠎꠥꠝ꠆ꠝꠣꠛꠣꠞꠦ ꠄꠇꠎꠘ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠍꠤ ꠖꠦꠈꠤꠀ ꠀꠝꠣꠞ ꠃꠙꠞꠦ ꠉꠥꠍꠣ ꠇꠞꠞꠣꠄ ꠇꠦꠘꠦ?
২৪ ꠢꠇ-ꠁꠘꠍꠣꠚ ꠇꠞꠅ,
ꠈꠣꠟꠤ ꠛꠣꠞꠉꠣꠟꠣ ꠖꠦꠈꠤꠀ ꠛꠤꠌꠣꠞ ꠇꠞꠤꠅ ꠘꠣ।”
ꠀꠟ-ꠝꠍꠤ ꠇꠦ?
২৫ ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘꠞ ꠇꠤꠍꠥ ꠝꠣꠘꠡꠦ ꠇꠂꠟ,
“ꠘꠦꠔꠣ ꠅꠇꠟꠦ ꠎꠣꠞꠦ ꠝꠣꠞꠤꠟꠔꠣ ꠌꠣꠁꠞꠣ,
ꠅꠉꠥ ꠇꠤꠔꠣ ꠢꠃ ꠝꠣꠘꠥꠡ ꠘꠣꠄ ꠘꠤ?
২৬ ꠔꠦ ꠢꠦ ꠔ ꠖꠦꠈꠤ ꠈꠥꠟꠣ-ꠝꠦꠟꠣ ꠝꠣꠔꠦꠞ,
ꠔꠣ-ꠅ ꠔꠣꠞꠣ ꠖꠦꠈꠤ ꠇꠥꠘ꠆ꠔꠣ ꠇꠁꠞꠣ ꠘꠣ।
ꠔꠣꠁꠟꠦ ꠔꠣꠞꠣ ꠇꠤꠔꠣ ꠢꠣꠍꠣ ꠇꠕꠣ ꠛꠥꠎꠤꠟꠤꠍꠂꠘ ꠘꠤ,
ꠅꠃ ꠝꠣꠘꠥꠡꠃ ꠀꠟ-ꠝꠍꠤ?
২৭ ꠀꠞ ꠀꠝꠞꠣ ꠔ ꠎꠣꠘꠤ,
ꠅꠉꠥ ꠇꠥꠀꠁ ꠕꠣꠇꠤ ꠀꠁꠍꠦ।
ꠅꠁꠟꠦ ꠀꠟ-ꠝꠍꠤ ꠎꠦꠛꠟꠣ ꠀꠁꠛꠣ,
ꠅꠃ ꠡꠝꠄ ꠇꠦꠃ ꠎꠣꠘꠔ ꠘꠣꠄ,
ꠔꠣꠁꠘ ꠇꠥꠀꠁ ꠕꠣꠇꠤ ꠀꠁꠍꠂꠘ।”
২৮ ꠄꠞꠛꠣꠖꠦ ꠁꠍꠣꠄ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠔꠣꠟꠤꠝ ꠖꠦꠅꠀꠞ ꠡꠝꠄ ꠎꠥꠞꠦ ꠎꠥꠞꠦ ꠛꠄꠀꠘ ꠇꠞꠟꠣ,
“ꠀꠙꠘꠣꠞꠣ ꠀꠝꠣꠞꠦꠅ ꠌꠤꠘꠂꠘ,
ꠀꠞ ꠀꠝꠤ ꠇꠥꠀꠁ ꠕꠣꠇꠤ ꠀꠁꠍꠤ ꠁꠈꠣꠘꠅ ꠎꠣꠘꠂꠘ।
ꠢꠥꠘꠃꠇ꠆ꠇꠣ,
ꠀꠝꠤ ꠘꠤꠎ ꠕꠣꠇꠤ ꠀꠁꠍꠤ ꠘꠣ,
ꠢꠇ ꠀꠟ꠆ꠟꠣ ꠙꠣꠇꠦꠃ ꠀꠝꠣꠞꠦ ꠙꠣꠑꠣꠁꠍꠂꠘ।
২৯ ꠀꠙꠘꠣꠞꠣ ꠔꠣꠘꠞꠦ ꠌꠤꠘꠂꠘ ꠘꠣ,
ꠅꠁꠟꠦ ꠀꠝꠤ ꠌꠤꠘꠤ।
ꠇꠣꠞꠘ ꠀꠝꠤ ꠔꠣꠘ ꠉꠦꠍ ꠕꠣꠇꠤꠃ ꠀꠁꠍꠤ ꠀꠞ ꠔꠣꠁꠘꠃ ꠀꠝꠣꠞꠦ ꠙꠣꠑꠣꠁꠍꠂꠘ।”
৩০ ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠁꠍꠣꠞꠦ ꠗꠞꠤꠟꠤꠔ ꠌꠣꠁꠟ,
ꠅꠁꠟꠦ ꠔꠣꠘ ꠡꠝꠄ ꠙꠥꠞꠣ ꠅꠁꠍꠦ ꠘꠣ ꠉꠔꠤꠇꠦ ꠇꠦꠃ ꠔꠣꠘ ꠉꠔꠞꠅ ꠀꠔ ꠔꠥꠟꠟ ꠘꠣ।
৩১ ꠀꠞ ꠄꠞꠣꠞ ꠝꠣꠎꠞ ꠛꠃꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠤꠀ ꠇꠂꠟ,
“ꠄꠁꠘ ꠔ ꠛꠃꠔ ꠇꠦꠞꠣꠝꠔꠤ ꠖꠦꠈꠣꠁꠍꠂꠘ,
ꠀꠟ-ꠝꠍꠤ ꠀꠁꠀ ꠇꠥꠘꠥ ꠄꠞ ꠌꠣꠁꠔꠦ ꠛꠦꠡꠤ ꠇꠦꠞꠣꠝꠔꠤ ꠖꠦꠈꠣꠁꠛꠣ ꠘꠤ?”
৩২ ꠁꠔꠣ ꠟꠁꠀ ꠝꠣꠘꠡꠦ ꠇꠣꠘꠣ-ꠇꠣꠘꠤ ꠇꠞꠞꠣ,
ꠁꠈꠣꠘ ꠚꠞꠤꠡꠤ ꠅꠇꠟꠦ ꠢꠥꠘꠟꠣ।
ꠢꠥꠘꠤꠀ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠁꠍꠣꠞꠦ ꠗꠞꠣꠞ ꠟꠣꠉꠤ ꠇꠄꠎꠘ ꠙꠣꠞꠣꠖꠣꠞ-ꠍꠤꠙꠣꠁ ꠙꠣꠑꠣꠁꠟꠣ।
৩৩ ꠁꠍꠣꠄ ꠇꠁꠟꠣ,
“ꠢꠥꠘꠅ,
ꠀꠝꠤ ꠀꠞ ꠛꠦꠡꠤ ꠖꠤꠘ ꠔꠥꠝꠞꠣꠞ ꠝꠣꠎꠦ ꠘꠣꠄ।
ꠀꠝꠤ ꠔ ꠔꠣꠘ ꠉꠦꠍꠦ ꠎꠣꠁꠝꠥꠉꠤ,
ꠎꠦꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ।
৩৪ ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠀ ꠙꠣꠁꠔꠣꠄ ꠘꠣꠄ,
ꠀꠞ ꠀꠝꠤ ꠎꠦ ꠎꠣꠉꠣꠔ ꠞꠁꠝꠥ,
ꠔꠥꠝꠞꠣ ꠇꠦꠃ ꠢꠤꠘꠅ ꠀꠁꠔꠣꠄꠅ ꠙꠣꠞꠔꠣꠄ ꠘꠣꠄ।”
৩৫ ꠢꠎꠞꠔ ꠁꠍꠣꠞ ꠁꠔꠣ ꠝꠣꠔ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ,
“ꠢꠦ ꠇꠥꠀꠁ ꠎꠣꠁꠛꠉꠤ,
ꠎꠦꠈꠣꠘꠅ ꠀꠝꠞꠣ ꠔꠣꠞꠦ ꠔꠥꠇꠣꠁꠀ ꠙꠣꠁꠔꠣꠝ ꠘꠣꠄ?
ꠢꠦ ꠇꠤꠔꠣ ꠁꠃꠘꠣꠘꠤ ꠅꠇꠟꠞ ꠖꠦꠡꠅ ꠎꠦꠔꠣ ꠁꠢꠥꠖꠤ ꠀꠍꠂꠘ,
ꠢꠘꠅ ꠞꠁꠀ ꠁꠃꠘꠣꠘꠤ ꠅꠔꠣꠞꠦꠅ ꠔꠣꠟꠤꠝ ꠖꠤꠛ ꠘꠤ?
৩৬ ꠢꠦ ꠔ ꠇꠂꠟ,
ꠔꠥꠝꠞꠣ ꠀꠝꠣꠞꠦ ꠔꠥꠇꠣꠁꠀ ꠙꠣꠁꠔꠣꠄ ꠘꠣꠄ,
ꠀꠞ ꠀꠝꠤ ꠎꠦꠈꠣꠘꠅ ꠎꠣꠁꠝꠥ,
ꠔꠥꠝꠞꠣ ꠢꠤꠘꠅ ꠀꠁꠔꠣꠄ ꠙꠣꠞꠔꠣꠄ ꠘꠣꠄ।
ꠔꠣꠞ ꠁ ꠝꠣꠔꠞ ꠝꠣꠘꠤ ꠇꠤꠔꠣ?”
৩৭ ꠁꠖꠞ ꠀꠈꠦꠞꠤ ꠖꠤꠘ ꠢꠎꠞꠔ ꠁꠍꠣ ꠃꠛꠣꠁꠀ ꠎꠥꠞꠦ ꠎꠥꠞꠦ ꠛꠄꠀꠘ ꠇꠞꠟꠣ,
“ꠇꠥꠘꠥ ꠝꠣꠘꠡꠞ ꠙꠤꠀꠍꠦ ꠗꠞꠟꠦ,
ꠢꠦ ꠀꠝꠣꠞ ꠉꠦꠍꠦ ꠀꠁꠀ ꠙꠣꠘꠤ ꠈꠣꠃꠇ।
৩৮ ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ,
ꠙꠣꠇ ꠇꠤꠔꠣꠛꠞ ꠀꠄꠀꠔ ꠝꠣꠚꠤꠇ ꠔꠣꠞ ꠖꠤꠟ ꠕꠣꠇꠤ ꠎꠤꠘ꠆ꠖꠣ ꠙꠣꠘꠤꠞ ꠉꠣꠋ ꠛꠣꠞꠅꠁꠛ।”
৩৯ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠤꠀ ꠎꠦꠞꠣ ꠙꠣꠇ ꠞꠥꠢꠥꠞꠦ ꠙꠣꠁꠛꠣ,
ꠢꠃ ꠙꠣꠇ ꠞꠥꠢꠥꠞ ꠛꠦꠙꠣꠞꠦ ꠔꠣꠁꠘ ꠅꠃ ꠇꠕꠣ ꠇꠁꠟꠣ।
ꠔꠣꠞꠣꠞ ꠉꠦꠍꠦ ꠙꠣꠇ ꠞꠥꠢꠥꠞꠦ ꠅꠈꠘꠅ ꠖꠦꠅꠀ ꠅꠁꠍꠦ ꠘꠣ,
ꠇꠣꠞꠘ ꠁꠍꠣꠄ ꠔꠣꠘ ꠝꠢꠤꠝꠣ ꠅꠈꠘꠅ ꠢꠣꠍꠤꠟ ꠇꠞꠍꠂꠘ ꠘꠣ।
ꠢꠎꠞꠔ ꠁꠍꠣꠞꠦ ꠟꠁꠀ ꠖꠟꠣꠖꠟꠤ
৪০ ꠁꠔꠣ ꠢꠥꠘꠤꠀ ꠇꠤꠍꠥ ꠝꠣꠘꠡꠦ ꠇꠂꠟ,
“ꠀꠍꠟꠦ ꠄꠁꠘꠃ ꠢꠃ ꠅꠀꠖꠣ ꠇꠞꠣ ꠘꠛꠤ”
৪১ ꠀꠞ ꠇꠄꠎꠘꠦ ꠇꠂꠟ,
“ꠄꠁꠘꠃ ꠀꠟ-ꠝꠍꠤ।”
ꠅꠁꠟꠦ ꠇꠦꠃ ꠇꠦꠃ ꠇꠂꠟ,
“ꠀꠟ-ꠝꠍꠤ ꠇꠥꠘꠥ ꠉꠣꠟꠤꠟ ꠎꠤꠟꠣ ꠕꠣꠇꠤ ꠀꠁꠛꠣ ꠘꠤ?
৪২ ꠙꠣꠇ ꠇꠤꠔꠣꠛꠦ ꠔ ꠛꠣꠔꠣꠄ,
ꠀꠟ-ꠝꠍꠤꠄ ꠎꠘꠝ ꠟꠁꠛꠣ ꠖꠣꠃꠖ ꠘꠛꠤꠞ ꠛꠋꠡꠔ,
ꠖꠣꠃꠖ ꠘꠛꠤꠞ ꠛꠦꠕꠦꠟꠢꠣꠝ ꠉꠣꠃꠔ।”
৪৩ ꠅꠃ ꠟꠣꠈꠣꠘ ꠁꠍꠣꠞꠦ ꠟꠁꠀ ꠝꠣꠘꠡꠞ ꠝꠣꠎꠦ ꠖꠟꠣꠖꠟꠤ ꠟꠣꠉꠤꠉꠦꠟ।
৪৪ ꠄꠞꠝꠣꠎꠦ ꠇꠄꠎꠘꠦ ꠔꠣꠘꠞꠦ ꠗꠞꠤꠟꠤꠔ ꠌꠣꠁꠟ,
ꠅꠁꠟꠦ ꠇꠦꠃ ꠔꠣꠘ ꠉꠔꠞꠅ ꠀꠔ ꠔꠥꠟꠟ ꠘꠣ।
৪৫ ꠁꠍꠣꠞꠦ ꠗꠞꠣꠞ ꠟꠣꠉꠤ ꠎꠦ ꠙꠣꠞꠣꠖꠣꠞ-ꠍꠤꠙꠣꠁ ꠅꠇꠟꠞꠦ ꠙꠣꠑꠣꠘꠤ ꠅꠁꠍꠤꠟ,
ꠔꠣꠞꠣ ꠚꠤꠞꠔ ꠀꠁꠟꠦ ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠎꠤꠇꠣꠁꠟꠣ,
“ꠔꠣꠞꠦ ꠗꠞꠤꠀ ꠀꠘꠟꠣꠄ ꠘꠣ ꠇꠦꠘꠦ?”
৪৬ ꠄꠞꠣ ꠇꠁꠟꠣ,
“ꠁ ꠝꠣꠘꠡꠦ ꠎꠦꠟꠣ ꠝꠣꠔ ꠝꠣꠔꠦ,
ꠁꠟꠣ ꠝꠣꠔ ꠇꠦꠃ ꠇꠥꠘꠥꠖꠤꠘ ꠝꠣꠔꠤꠍꠦ ꠘꠣ।”
৪৭ ꠔꠦꠃ ꠚꠞꠤꠡꠤ ꠅꠇꠟꠦ ꠍꠤꠙꠣꠁ ꠅꠇꠟꠞꠦ ꠇꠁꠟꠣ,
“ꠢꠦ ꠔꠥꠝꠞꠣꠞꠦꠅ ꠐꠉꠤꠟꠤꠟ ꠘꠤ?
৪৮ ꠖꠦꠈꠍ ꠘꠤ,
ꠘꠦꠔꠣ ꠛꠣ ꠚꠞꠤꠡꠤ ꠡꠝꠣꠎꠞ ꠇꠦꠃ ꠔꠣꠞ ꠃꠙꠞꠦ ꠁꠝꠣꠘ ꠀꠘꠍꠦ ꠘꠤ?
৪৯ ꠈꠣꠟꠤ ꠅꠃ ꠎꠦꠔꠣꠄ ꠡꠞꠤꠅꠔꠞ ꠇꠥꠘ꠆ꠔꠣꠃ ꠎꠣꠘꠂꠘ ꠘꠣ,
ꠅꠔꠣꠃ ꠔ।
ꠁꠔꠣꠞ ꠃꠙꠞꠦ ꠟꠣꠘ꠆ꠘꠔ ꠀꠍꠦ।”
৫০ ꠚꠞꠤꠡꠤ ꠅꠇꠟꠞ ꠝꠣꠎꠦ ꠄꠇꠎꠘꠞ ꠘꠣꠝ ꠀꠍꠤꠟ ꠝꠃꠟꠣꠘꠣ ꠘꠤꠇꠖꠤꠝ,
ꠄꠁꠘ ꠀꠉꠦ ꠁꠍꠣꠞ ꠉꠦꠍꠦ ꠉꠦꠍꠟꠣ।
৫১ ꠘꠤꠇꠖꠤꠝꠦ ꠇꠁꠟꠣ,
“ꠇꠦꠃꠞꠞ ꠝꠥꠈꠞ ꠇꠕꠣ ꠘꠣ ꠢꠥꠘꠤꠀ ꠛꠣ ꠔꠣꠞ ꠅꠙꠞꠣꠗ ꠘꠣ ꠎꠣꠘꠤꠀ,
ꠔꠣꠞꠦ ꠡꠣꠎꠣ ꠖꠦꠅꠀꠞ ꠘꠤꠅꠝ ꠇꠥꠘꠥ ꠀꠝꠞꠣꠞ ꠡꠞꠤꠅꠔꠅ ꠀꠍꠦ ꠘꠤ?”
৫২-৫৩ ꠁꠈꠣꠘ ꠢꠥꠘꠤꠀ ꠚꠞꠤꠡꠤ ꠅꠇꠟꠦ ꠘꠤꠇꠖꠤꠝꠞꠦ ꠇꠁꠟꠣ,
“ꠔꠥꠝꠤꠅ ꠇꠤꠔꠣ ꠉꠣꠟꠤꠟ ꠎꠤꠟꠣꠞ ꠝꠣꠘꠥꠡ ꠘꠤ?
ꠙꠣꠇ ꠇꠤꠔꠣꠛꠅ ꠌꠣꠁꠀ ꠖꠦꠈꠅ ꠘꠣ,
ꠉꠣꠟꠤꠟꠅ ꠇꠥꠘꠥ ꠘꠛꠤꠞ ꠎꠘꠝ ꠅꠄ ꠘꠣ।”