ꠄꠢꠥꠖꠤꠀ ꠀꠞ ꠡꠝꠞꠤꠀ ꠄꠟꠣꠇꠣꠔ ꠁꠍꠣꠄꠁ ꠎꠝꠣꠔ (৬:১-১২:২৫)
ꠡꠣꠔ ꠎꠘ ꠈꠣꠖꠤꠝꠖꠣꠞ
৬
১ ꠢꠤ ꠡꠝꠄ ꠃꠝ꠆ꠝꠔ ꠅꠇꠟꠞ ꠙꠞꠤꠝꠣꠘ ꠛꠣꠠꠔꠦꠃ ꠀꠍꠤꠟ,
ꠀꠞ ꠃꠝ꠆ꠝꠔ ꠅꠇꠟꠞ ꠝꠣꠎꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠁꠃꠘꠣꠘꠤ ꠜꠣꠡꠣꠄ ꠝꠣꠔꠔꠣ,
ꠔꠣꠞꠣ ꠁꠛꠞꠣꠘꠤ ꠜꠣꠡꠣꠄ ꠝꠣꠔꠞꠣ ꠁꠢꠥꠖꠤ ꠅꠇꠟꠞ ꠟꠉꠦ ꠇꠣꠁꠎ꠆ꠎꠣ ꠇꠞꠔꠣ ꠟꠣꠉꠟꠣ।
ꠔꠣꠞꠣ ꠖꠥꠡ ꠖꠦꠈꠣꠁꠟꠣ,
ꠙꠞꠔꠦꠇ ꠖꠤꠘ ꠈꠣꠘꠤ ꠛꠤꠟꠣꠘꠤꠞ ꠡꠝꠄ ꠔꠣꠞꠣꠞ ꠠꠣꠠꠤ ꠛꠦꠐꠤꠘ꠆ꠔꠦ ꠇꠥꠘ꠆ꠔꠣ ꠙꠣꠁꠘ ꠘꠣ।
২ ꠔꠦꠃ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠄ ꠢꠇꠟ ꠃꠝ꠆ꠝꠔꠞꠦ ꠄꠇ ꠎꠣꠉꠣꠔ ꠖꠟꠣ ꠇꠞꠤꠀ ꠇꠁꠟꠣ,
“ꠀꠝꠞꠣ ꠀꠟ꠆ꠟꠣꠞ ꠇꠣꠟꠣꠝꠞ ꠔꠛꠟꠤꠉ ꠛꠣꠖ ꠖꠤꠀ,
ꠈꠣꠘꠣ-ꠙꠤꠘꠣꠞ ꠛꠦꠙꠣꠞꠦ ꠛꠦꠡ꠆ꠔ ꠅꠀꠈꠣꠘ ꠑꠤꠇ ꠘꠣꠄ।
৩ ꠅꠁꠟꠦ ꠜꠣꠁ ꠅꠇꠟ,
ꠔꠥꠝꠞꠣꠞ ꠝꠣꠎ ꠕꠣꠇꠤ ꠅꠃꠟꠣ ꠡꠣꠔꠎꠘ ꠡꠥꠘꠣꠝ ꠀꠟꠣ ꠝꠣꠘꠡꠞꠦ ꠙꠍꠘ꠆ꠖ ꠇꠞꠅ,
ꠎꠦꠞꠣ ꠙꠣꠇ ꠞꠥꠢꠦ ꠀꠞ ꠢꠦꠇꠝꠔꠦ ꠙꠥꠞꠣ ꠇꠣꠝꠤꠀꠛ ꠀꠍꠦ,
ꠀꠝꠞꠣ ꠔꠣꠞꠣꠞ ꠃꠙꠞꠦ ꠁ ꠇꠣꠝꠞ ꠎꠤꠝ꠆ꠝꠣ ꠖꠤꠟꠣꠁꠝꠥ।
৪ ꠀꠞ ꠀꠝꠞꠣ ꠇꠣꠟꠣꠝꠞ ꠈꠦꠎꠝꠔ ꠀꠞ ꠖꠥꠀ ꠇꠞꠣꠞ ꠇꠣꠝꠅ ꠇꠣꠁꠝ ꠞꠁꠝꠥ।”
৫ ꠔꠦꠃ ꠢꠇ꠆ꠇꠟ ꠝꠣꠘꠥꠡ ꠡꠣꠘ꠆ꠔꠤ ꠅꠁꠟꠣ,
ꠔꠣꠞꠣ ꠙꠣꠇ ꠞꠥꠢꠥ ꠀꠞ ꠁꠝꠣꠘꠦ ꠇꠣꠝꠤꠟ ꠡ꠆ꠔꠤꠚꠣꠘꠞꠦ ꠙꠍꠘ꠆ꠖ ꠇꠞꠟꠣ,
ꠔꠣꠘ ꠟꠉꠦ ꠚꠤꠟꠤꠚ,
ꠚꠈꠞ,
ꠘꠤꠇꠣꠘꠞ,
ꠔꠤꠝꠥꠘ,
ꠙꠣꠞ꠆ꠝꠤꠘꠣ ꠀꠞ ꠀꠘ꠆ꠔꠤꠅꠈꠤꠀ ꠐꠣꠃꠘꠞ ꠘꠄꠀ ꠁꠢꠥꠖꠤ ꠘꠤꠇꠥꠟꠣꠄꠞꠦ ꠛꠣꠍꠤꠀ ꠘꠤꠟꠣ।
৬ ꠛꠣꠖꠦ ꠔꠣꠞꠣ ꠅꠃ ꠡꠣꠔ ꠎꠘꠞꠦ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠟꠁꠀ ꠀꠁꠟꠦ,
ꠍꠣꠢꠣꠛꠤ ꠅꠇꠟꠦ ꠖꠥꠀ ꠇꠞꠤꠀ ꠔꠣꠞꠣꠞ ꠃꠙꠞꠦ ꠀꠔ ꠞꠣꠈꠟꠣ।
৭ ꠀꠞ ꠀꠟ꠆ꠟꠣꠞ ꠇꠣꠟꠣꠝ ꠍꠤꠔ꠆ꠞꠤꠀ ꠌꠣꠁꠞꠅꠛꠣꠄ ꠙꠃꠍꠤꠉꠦꠟ,
ꠔꠦꠃ ꠎꠦꠞꠥꠎꠣꠟꠦꠝꠅ ꠃꠝ꠆ꠝꠔꠞ ꠙꠞꠤꠝꠣꠘ ꠈꠥꠛ ꠎꠟꠖꠤ ꠇꠞꠤ ꠛꠣꠠꠔ ꠟꠣꠉꠟ,
ꠁꠢꠥꠖꠤ ꠁꠝꠣꠝ ꠅꠇꠟꠞ ꠝꠣꠎꠦꠅ ꠛꠃꠔ ꠎꠘꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠣ।
ꠢꠎꠞꠔ ꠡ꠆ꠔꠤꠚꠣꠘꠞ ꠢꠣꠟꠔ
৮ ꠡ꠆ꠔꠤꠚꠣꠘ ꠀꠟ꠆ꠟꠣꠞ ꠞꠢꠝꠔ ꠀꠞ ꠢꠤꠝ꠆ꠝꠔꠦ ꠇꠣꠝꠤꠟ ꠅꠁꠀ,
ꠝꠣꠘꠡꠞ ꠝꠣꠎꠦ ꠛꠃꠔ ꠇꠦꠞꠣꠝꠔꠤ ꠀꠞ ꠝꠥꠎꠦꠎꠣ ꠇꠣꠝ ꠇꠞꠔꠣ ꠟꠣꠉꠟꠣ।
৯ ꠁꠢꠥꠖꠤꠞ ꠎꠦ ꠝꠍꠤꠖꠞꠦ ꠀꠎꠣꠖ-ꠅꠀ ꠉꠥꠟꠣꠝ ꠅꠇꠟꠞ ꠝꠍꠤꠖ ꠒꠣꠇꠣ ꠅꠁꠔ,
ꠢꠃ ꠝꠍꠤꠖꠞ ꠇꠄꠎꠘ ꠝꠣꠘꠥꠡ,
ꠇꠥꠘꠥ ꠇꠥꠘꠥ ꠇꠥꠞꠤꠘꠤ,
ꠀꠟꠦꠇꠎꠣꠘ꠆ꠖ꠆ꠞꠤꠀ,
ꠇꠤꠟꠤꠇꠤꠀ ꠀꠞ ꠀꠍꠤꠀ ꠖꠦꠡꠞ ꠇꠤꠍꠥ ꠝꠣꠘꠡꠦ ꠡ꠆ꠔꠤꠚꠣꠘꠞ ꠟꠉꠦ ꠇꠣꠁꠎ꠆ꠎꠣ-ꠔꠞ꠆ꠇ ꠇꠞꠣꠔ ꠟꠣꠉꠟꠣ।
১০ ꠅꠁꠟꠦ ꠡ꠆ꠔꠤꠚꠣꠘꠦ ꠙꠣꠇ ꠞꠥꠢꠥꠞ ꠛꠟꠦ ꠈꠥꠛ ꠀꠈꠟꠖꠣꠞ ꠝꠣꠘꠡꠞ ꠟꠣꠈꠣꠘ ꠔꠣꠞꠣꠞ ꠟꠉꠦ ꠝꠣꠔꠣꠄ,
ꠔꠣꠞꠣ ꠔꠣꠘ ꠟꠉꠦ ꠝꠣꠔꠤꠀ ꠇꠥꠟꠣꠁꠔ ꠙꠣꠞꠍꠤꠟ ꠘꠣ।
১১ ꠔꠦꠃ ꠔꠣꠞꠣ ꠇꠄꠎꠘ ꠛꠣꠎꠦ ꠝꠣꠘꠡꠞꠦ ꠊꠥꠡ ꠖꠤꠀ ꠅꠈꠣꠘ ꠢꠤꠇꠣꠁ ꠖꠤꠟ,
“ꠔꠥꠝꠞꠣ ꠇꠁꠅ,
ꠀꠝꠞꠣ ꠢꠥꠘꠍꠤ ꠅꠃ ꠛꠦꠐꠣꠄ ꠢꠎꠞꠔ ꠝꠥꠍꠣ ꠀꠞ ꠀꠟ꠆ꠟꠣꠞ ꠛꠤꠞꠥꠖ꠆ꠖꠦ ꠇꠥꠚꠥꠞꠤ ꠝꠣꠔ ꠝꠣꠔꠦꠞ।”
১২ ꠅꠔꠣ ꠇꠞꠤ ꠔꠣꠞꠣ ꠝꠣꠘꠡꠞꠦ,
ꠝꠥꠞꠛ꠆ꠛꠤ ꠅꠇꠟꠞꠦ,
ꠀꠞ ꠀꠟꠤꠝ ꠡꠝꠣꠎꠞꠦ ꠡ꠆ꠔꠤꠚꠣꠘꠞ ꠛꠤꠞꠥꠖ꠆ꠖꠦ ꠛꠤꠉꠠꠣꠁꠟ,
ꠀꠞ ꠔꠣꠘꠞꠦ ꠎꠛꠞꠖꠡ꠆ꠔꠤ ꠇꠞꠤ ꠗꠞꠤꠀ ꠖꠦꠡꠞ ꠚꠔꠥꠀ ꠇꠝꠤꠐꠤꠞ ꠍꠣꠝꠘꠦ ꠛꠤꠌꠣꠞꠅ ꠀꠘꠟ।
১৩ ꠀꠞ ꠝꠤꠍꠣ ꠡꠣꠇ꠆ꠇꠤ ꠅꠇꠟꠦ ꠇꠁꠟꠣ,
“ꠅꠃ ꠛꠦꠐꠣꠄ ꠢꠣꠝꠦꠡꠣ ꠝꠥꠍꠣꠞ ꠡꠞꠤꠅꠔꠞ ꠛꠤꠞꠥꠖ꠆ꠖꠦ ꠀꠞ ꠅꠃ ꠙꠛꠤꠔ꠆ꠞ ꠝꠥꠇꠣꠝꠞ ꠛꠤꠞꠥꠖ꠆ꠖꠦꠅ ꠝꠣꠔꠦ।
১৪ ꠀꠝꠞꠣ ꠢꠥꠘꠍꠤ ꠢꠦ ꠇꠞ,
ꠢꠃ ꠘꠣꠍꠣꠞꠔꠞ ꠁꠍꠣꠄ ꠁ ꠛꠣꠄꠔꠥꠟ-ꠝꠥꠇꠣꠖ꠆ꠖꠍ ꠜꠣꠋꠉꠤꠟꠤꠛ ꠀꠞ ꠝꠥꠍꠣ ꠘꠛꠤꠄ ꠀꠝꠞꠣꠞ ꠟꠣꠉꠤ ꠎꠦ ꠡꠞꠤꠅꠔ ꠕꠁꠀ ꠉꠦꠍꠂꠘ,
ꠁꠔꠣ ꠛꠖꠟꠣꠁꠟꠤꠛ।”
১৫ ꠁ ꠡꠝꠄ ꠎꠦꠞꠣ ꠚꠔꠥꠀ ꠇꠝꠤꠐꠤꠔ ꠛꠅꠀꠔ ꠀꠍꠟꠣ ꠔꠣꠞꠣ ꠢꠇꠟꠦ ꠗꠤꠀꠘ ꠗꠞꠤ ꠡ꠆ꠔꠤꠚꠣꠘꠞ ꠛꠣꠄ ꠌꠣꠁꠀ ꠖꠦꠈꠟꠣ,
ꠔꠣꠘ ꠝꠥꠈ ꠚꠤꠞꠤꠡ꠆ꠔꠣꠞ ꠝꠥꠈꠞ ꠟꠣꠈꠣꠘ ꠅꠁꠉꠦꠍꠦ।