ꠍꠥꠛꠦꠖꠣꠞ ꠇꠞꠘꠤꠟꠥꠍ ꠀꠞ ꠢꠎꠞꠔ ꠙꠤꠔꠞꠞ ꠖꠞꠡꠘ
১০
১ ꠇꠂꠍꠞꠤꠀ ꠡꠢꠞꠅ ꠇꠞꠘꠤꠟꠥꠍ ꠘꠣꠝꠦ ꠄꠇꠎꠘ ꠝꠣꠘꠥꠡ,
ꠁꠔꠣꠟꠤ ꠘꠣꠝꠞ ꠍꠤꠙꠣꠁ ꠖꠟꠞ ꠍꠥꠛꠦꠖꠣꠞ ꠀꠍꠟꠣ।
২ ꠔꠣꠁꠘ ꠄꠇꠎꠘ ꠙꠞꠦꠎꠉꠣꠞ ꠝꠣꠘꠥꠡ,
ꠔꠣꠘ ꠙꠞꠤꠛꠣꠞꠞ ꠢꠇꠟꠦꠅ ꠀꠟ꠆ꠟꠣꠞꠦ ꠒꠞꠣꠁꠔꠣ।
ꠔꠣꠁꠘ ꠉꠞꠤꠛ ꠅꠇꠟꠞꠦ ꠛꠃꠔ ꠐꠦꠇꠣ-ꠙꠄꠡꠣ ꠖꠣꠘ-ꠈꠄꠞꠣꠔ ꠀꠞ ꠢꠣꠝꠦꠡꠣ ꠀꠟ꠆ꠟꠣꠞ ꠉꠦꠍꠦ ꠖꠥꠀ ꠇꠞꠔꠣ।
৩ ꠄꠇꠖꠤꠘ ꠅꠘꠥꠝꠣꠘ ꠔꠤꠘꠐꠣꠞ ꠡꠝꠄ ꠔꠣꠁꠘ ꠄꠇ ꠍꠣꠚ ꠖꠞꠡꠘ ꠙꠣꠁꠟꠣ।
ꠖꠦꠈꠟꠣ,
ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠔꠣꠘ ꠉꠦꠍꠦ ꠀꠁꠀ ꠒꠣꠇꠤꠞꠣ,
“ꠇꠞꠘꠤꠟꠥꠍ!”
৪ ꠇꠞꠘꠤꠟꠥꠍꠦ ꠒꠞꠣꠁꠀ ꠢꠤ ꠚꠤꠞꠤꠡ꠆ꠔꠣꠞ ꠛꠣꠄ ꠌꠣꠁꠀ ꠇꠁꠟꠣ,
“ꠝꠣꠟꠤꠇ,
ꠇꠃꠇ꠆ꠇꠣ,
ꠢꠥꠘꠞꠣꠝ।”
ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠟꠣ,
“ꠔꠥꠝꠣꠞ ꠝꠥꠘꠣꠎꠣꠔ ꠀꠞ ꠉꠞꠤꠛ ꠅꠇꠟꠞꠦ ꠖꠣꠘꠞ ꠇꠕꠣ ꠛꠦꠢꠦꠡ꠆ꠔꠅ ꠙꠃꠍꠤꠍꠦ ꠀꠞ ꠀꠟ꠆ꠟꠣꠄ ꠁꠔꠣ ꠇꠛꠥꠟ ꠇꠞꠍꠂꠘ।
৫ ꠅꠈꠘ ꠔꠥꠝꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ,
ꠀꠞ ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠔꠣꠟ꠆ꠟꠣꠡ ꠇꠞꠣꠁ ꠀꠘꠣꠅ।
৬ ꠄꠁꠘ ꠖꠞꠤꠀꠞ ꠙꠣꠞꠅ ꠀꠞꠇ ꠍꠣꠁꠝꠘꠞ ꠛꠣꠠꠤꠔ ꠕꠣꠇꠂꠘ,
ꠢꠤ ꠍꠣꠁꠝꠘꠦ ꠌꠣꠝꠠꠣꠞ ꠇꠣꠞꠛꠣꠞ ꠇꠞꠦ।”
৭ ꠎꠦ ꠚꠤꠞꠤꠡ꠆ꠔꠣꠄ ꠇꠞꠘꠤꠟꠥꠍꠞ ꠟꠉꠦ ꠛꠣꠔꠌꠤꠔ ꠇꠞꠍꠤꠟꠣ,
ꠔꠣꠁꠘ ꠎꠣꠅꠀꠞ ꠛꠣꠖꠦ ꠇꠞꠘꠤꠟꠥꠍꠦ ꠔꠣꠘ ꠛꠣꠠꠤꠞ ꠖꠥꠁꠎꠘ ꠇꠣꠝꠟꠣ ꠀꠞ ꠔꠣꠘ ꠡꠣꠁꠎ꠆ꠎꠇꠣꠞꠤ ꠄꠇꠎꠘ ꠙꠞꠦꠎꠉꠣꠞ ꠍꠤꠙꠣꠁꠞꠦ ꠒꠣꠇ ꠖꠤꠟꠣ।
৮ ꠔꠣꠁꠘ ꠄꠞꠣꠞꠦ ꠢꠇꠟꠔꠣ ꠛꠥꠎꠣꠁ ꠖꠤꠀ ꠎꠣꠚꠣ ꠡꠢꠞꠅ ꠙꠣꠑꠣꠁꠟꠣ।
৯ ꠛꠣꠖꠞ ꠖꠤꠘ ꠎꠦꠛꠟꠣ ꠢꠃ ꠝꠣꠘꠥꠡ ꠅꠇꠟ ꠎꠣꠁꠔꠦ ꠎꠣꠁꠔꠦ ꠎꠣꠚꠣ ꠡꠢꠞꠞ ꠇꠣꠍꠣꠔ ꠀꠁꠟꠣ,
ꠁ ꠡꠝꠄ ꠛꠦꠁꠟ ꠅꠘꠥꠝꠣꠘ ꠖꠥꠁꠚꠞ,
ꠙꠤꠔꠞꠦ ꠖꠥꠀ ꠇꠞꠣꠞ ꠟꠣꠉꠤ ꠢꠃ ꠡꠝꠄ ꠍꠣꠔꠅ ꠃꠑꠍꠂꠘ।
১০ ꠔꠣꠘ ꠈꠥꠛ ꠜꠥꠇ ꠟꠣꠉꠍꠤꠟ,
ꠔꠦꠃ ꠇꠥꠘ꠆ꠔꠣ ꠈꠣꠁꠔꠣ ꠌꠣꠁꠟꠣ ꠀꠞ ꠝꠣꠘꠡꠦ ꠈꠣꠘꠤ ꠔꠤꠀꠞ ꠇꠞꠞꠣ,
ꠅꠃ ꠡꠝꠄ ꠊꠥꠝꠦ ꠔꠣꠘ ꠃꠋꠉꠣꠘꠤ ꠀꠁꠟ।
১১ ꠅꠃ ꠢꠣꠟꠔꠅ ꠔꠣꠁꠘ ꠖꠦꠈꠟꠣ,
ꠀꠍꠝꠣꠘ ꠈꠥꠟꠤꠉꠦꠍꠦ ꠀꠞ ꠈꠥꠛ ꠛꠠ ꠌꠣꠖ꠆ꠖꠞꠞ ꠟꠣꠈꠣꠘ ꠄꠇ ꠌꠤꠎꠞ ꠌꠣꠁꠞ ꠇꠥꠘꠣꠔ ꠗꠞꠤꠀ ꠖꠥꠘꠤꠀꠔ ꠟꠣꠝꠣꠁ ꠖꠦꠅꠀ ꠅꠞ;
১২ ꠀꠞ ꠁ ꠌꠣꠖ꠆ꠖꠞꠞ ꠝꠣꠎꠦ ꠖꠥꠘꠤꠀꠞ ꠢꠇ꠆ꠇꠟ ꠎꠣꠔꠞ ꠙꠡꠥ,
ꠛꠥꠇꠦ ꠌꠟꠞꠣ ꠎꠣꠘꠖꠣꠞ ꠀꠞ ꠙꠣꠈꠤꠘ ꠀꠍꠦ।
১৩ ꠛꠣꠖꠦ ꠔꠣꠁꠘ ꠅꠃ ꠀꠅꠀꠎ ꠢꠥꠘꠟꠣ,
ꠇꠦ ꠎꠣꠘꠥ ꠔꠣꠘꠞꠦ ꠇꠞ,
ꠙꠤꠔꠞ,
ꠃꠑꠅ,
ꠝꠣꠞꠤꠀ ꠈꠣꠅ।
১৪ ꠙꠤꠔꠞꠦ ꠇꠁꠟꠣ,
ꠘꠣ,
ꠘꠣ,
ꠝꠣꠟꠤꠇ,
ꠇꠥꠘꠥꠝꠘ꠆ꠔꠦꠃ ꠘꠣ,
ꠀꠝꠤ ꠇꠥꠘꠥ ꠡꠝꠄꠃ ꠘꠣꠙꠣꠇ ꠀꠞ ꠢꠣꠞꠣꠝ ꠇꠥꠘ꠆ꠔꠣ ꠈꠣꠁ ꠘꠣ।
১৫ ꠔꠣꠁꠘ ꠢꠤꠞꠛꠣꠞ ꠅꠃ ꠀꠅꠀꠎ ꠢꠥꠘꠟꠣ,
ꠀꠟ꠆ꠟꠣꠄ ꠎꠦꠔꠣ ꠢꠣꠟꠣꠟ ꠇꠞꠍꠂꠘ,
ꠁꠔꠣꠞꠦ ꠔꠥꠝꠤ ꠢꠣꠞꠣꠝ ꠇꠁꠅ ꠘꠣ।
১৬ ꠅꠃꠟꠣ ꠔꠤꠘꠛꠣꠞ ꠅꠀꠞ ꠛꠣꠖꠦ ꠢꠃ ꠌꠣꠖ꠆ꠖꠞꠈꠣꠘ ꠀꠍꠝꠣꠘꠅ ꠔꠥꠟꠤꠀ ꠘꠤꠟꠣꠉꠤ।
১৭ ꠙꠤꠔꠞꠦ ꠎꠦ ꠛꠣꠔꠥꠘꠤ ꠖꠞꠡꠘ ꠖꠦꠈꠟꠣ,
ꠄꠞ ꠝꠣꠘꠤ ꠇꠤꠔꠣ ꠅꠁꠔ ꠙꠣꠞꠦ ꠔꠣꠁꠘ ꠗꠤꠀꠘ ꠇꠞꠞꠣ,
ꠅꠃ ꠡꠝꠄ ꠇꠞꠘꠤꠟꠥꠍꠞ ꠙꠣꠑꠣꠁꠟ ꠢꠤ ꠝꠣꠘꠥꠡ ꠅꠇꠟ ꠍꠣꠁꠝꠘꠞ ꠛꠣꠠꠤ ꠔꠥꠇꠣꠁꠀ ꠙꠣꠁꠀ,
ꠛꠣꠠꠤꠞ ꠖꠥꠀꠞꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ।
১৮ ꠔꠣꠞꠣ ꠒꠣꠇꠤꠀ ꠎꠤꠇꠣꠁꠟꠣ,
“ꠍꠣꠁꠝꠘ ꠎꠦꠘꠞꠦ ꠙꠤꠔꠞ ꠇꠁꠀ ꠒꠣꠇꠂꠘ,
ꠔꠣꠁꠘ ꠁꠈꠣꠘꠅ ꠀꠍꠂꠘ ꠘꠤ?”
১৯ ꠙꠤꠔꠞꠦ ꠢꠃ ꠖꠞꠡꠘꠞ ꠇꠕꠣ ꠌꠤꠘ꠆ꠔꠣ ꠇꠞꠞꠣ,
ꠅꠃ ꠡꠝꠄ ꠙꠣꠇ ꠞꠥꠢꠦ ꠔꠣꠘꠞꠦ ꠇꠁꠟꠣ,
“ꠖꠦꠈꠅ,
ꠔꠤꠘꠎꠘ ꠝꠣꠘꠡꠦ ꠔꠥꠝꠣꠞꠦ ꠔꠥꠇꠣꠘꠤꠔ ꠀꠁꠍꠂꠘ।
২০ ꠔꠥꠝꠤ ꠟꠣꠝꠣꠔ ꠟꠣꠝꠅ ꠀꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠦꠅ,
ꠇꠥꠘꠥ ꠡꠘ꠆ꠖꠄ ꠇꠞꠤꠅ ꠘꠣ,
ꠔꠣꠞꠣꠞꠦ ꠀꠝꠤꠃ ꠙꠣꠑꠣꠁꠍꠤ।”
২১ ꠔꠦꠃ ꠙꠤꠔꠞ ꠟꠣꠝꠤꠀ ꠉꠤꠀ ꠔꠣꠞꠣꠞꠦ ꠇꠁꠟꠣ,
“ꠀꠙꠘꠣꠞꠣ ꠎꠣꠞꠦ ꠔꠥꠇꠣꠁꠞꠣ ꠀꠝꠤꠃ ꠢꠦꠁꠘ;
ꠇꠃꠇ꠆ꠇꠣ ꠌꠣꠁꠘ,
ꠇꠤꠔꠣꠟ꠆ꠟꠣꠉꠤ ꠀꠁꠍꠂꠘ?”
২২ ꠔꠣꠞꠣ ꠇꠁꠟꠣ,
“ꠡ-ꠍꠤꠙꠣꠁꠞ ꠍꠥꠛꠦꠖꠣꠞ ꠇꠞꠘꠤꠟꠥꠍꠦ ꠀꠟ꠆ꠟꠣꠞ ꠚꠤꠞꠤꠡ꠆ꠔꠣꠞ ꠢꠥꠇꠥꠝ ꠙꠣꠁꠀ ꠀꠝꠞꠣꠞꠦ ꠙꠣꠑꠣꠁꠍꠂꠘ,
ꠔꠣꠁꠘ ꠄꠇꠎꠘ ꠙꠞꠦꠎꠉꠣꠞ ꠝꠣꠘꠥꠡ,
ꠀꠟ꠆ꠟꠣꠞ ꠢꠥꠇꠥꠝ ꠝꠣꠚꠤꠇ ꠌꠟꠂꠘ,
ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠈꠥꠛ ꠔꠣꠎꠤꠝ ꠇꠞꠂꠘ।
ꠚꠤꠞꠤꠡ꠆ꠔꠣꠄ ꠔꠣꠘꠞꠦ ꠇꠁꠍꠂꠘ,
ꠎꠣꠔꠦ ꠀꠙꠘꠣꠞꠦ ꠔꠣꠘ ꠛꠣꠠꠤꠔ ꠘꠦꠅꠀꠁꠀ ꠀꠙꠘꠣꠞ ꠘꠍꠤꠅꠔ ꠢꠥꠘꠂꠘ।”
২৩ ꠅꠃ ꠙꠤꠔꠞꠦ ꠔꠣꠞꠣꠞꠦ ꠜꠤꠔꠞꠦ ꠒꠣꠇꠤꠀ ꠘꠤꠀ,
ꠔꠣꠞꠣꠞ ꠝꠦꠝꠣꠘꠖꠣꠞꠤ ꠇꠞꠟꠣ।
ꠛꠣꠖꠞ ꠖꠤꠘ ꠃꠑꠤꠀ ꠙꠤꠔꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠤꠟꠣ,
ꠀꠞ ꠎꠣꠚꠣ ꠡꠢꠞꠞ ꠇꠄꠎꠘ ꠁꠝꠣꠘꠖꠣꠞꠅ ꠔꠣꠘ ꠟꠉꠦ ꠉꠦꠟꠣ।
২৪ ꠄꠞ ꠛꠣꠖꠞ ꠖꠤꠘ ꠔꠣꠞꠣ ꠇꠂꠍꠞꠤꠀꠔ ꠙꠃꠍꠟꠣ;
ꠅꠃ ꠡꠝꠄ ꠇꠞꠘꠤꠟꠥꠍꠦ ꠔꠣꠘ ꠈꠦꠡ-ꠇꠥꠐꠥꠝ ꠀꠞ ꠛꠘ꠆ꠖꠥ-ꠛꠣꠘ꠆ꠖꠛ ꠅꠇꠟꠞꠦ ꠖꠟꠣ ꠇꠞꠤꠀ ꠔꠣꠞꠣꠞ ꠛꠣꠞ ꠌꠣꠁꠞꠣ।
২৫ ꠀꠞ ꠙꠤꠔꠞ ꠉꠤꠀ ꠎꠦꠛꠟꠣ ꠊꠞꠅ ꠢꠣꠝꠣꠁꠟꠣ,
ꠁ ꠡꠝꠄ ꠇꠞꠘꠤꠟꠥꠍꠦ ꠔꠣꠘ ꠇꠣꠍꠣꠔ ꠉꠤꠀ ꠙꠣꠅꠔ ꠙꠠꠤꠀ ꠍꠁꠎꠖꠣ ꠇꠞꠟꠣ।
২৬ ꠅꠁꠟꠦ ꠙꠤꠔꠞꠦ ꠔꠣꠘꠞꠦ ꠔꠥꠟꠤꠀ ꠇꠁꠟꠣ,
“ꠃꠑꠃꠇ꠆ꠇꠣ,
ꠀꠝꠤ ꠘꠤꠎꠦꠅ ꠔ ꠄꠇꠎꠘ ꠝꠣꠘꠥꠡ।”
২৭ ꠛꠣꠖꠦ ꠇꠞꠘꠤꠟꠥꠍꠞ ꠟꠉꠦ ꠝꠣꠔꠤ ꠝꠣꠔꠤ ꠜꠤꠔꠞꠦ ꠢꠣꠝꠣꠁꠀ ꠙꠤꠔꠞꠦ ꠖꠦꠈꠟꠣ,
ꠛꠃꠔ ꠝꠣꠘꠥꠡ ꠖꠟꠣ ꠅꠁꠞꠁꠍꠦ।
২৮ ꠅꠃ ꠔꠣꠁꠘ ꠇꠁꠟꠣ,
“ꠀꠙꠘꠣꠞꠣ ꠔ ꠎꠣꠘꠂꠘ,
ꠄꠇꠎꠘ ꠁꠢꠥꠖꠤ ꠝꠣꠘꠡꠦ ꠇꠥꠘꠥ ꠅ-ꠁꠢꠥꠖꠤꠞ ꠇꠣꠍꠣꠔ ꠎꠣꠅꠀ ꠛꠣ ꠝꠤꠟꠣ-ꠝꠤꠡꠣ ꠇꠞꠣ ꠀꠝꠞꠣꠞ ꠡꠞꠤꠅꠔꠞ ꠘꠣꠎꠣꠁꠎ।
ꠅꠁꠟꠦ ꠀꠟ꠆ꠟꠣꠄ ꠀꠝꠣꠞꠦ ꠖꠦꠈꠣꠁꠍꠂꠘ ꠎꠦꠘ,
ꠇꠥꠘꠥ ꠝꠣꠘꠡꠞꠦ ꠘꠣꠙꠣꠇ ꠛꠣ ꠅꠙꠛꠤꠔ꠆ꠞ ꠇꠅꠀ ꠀꠝꠣꠞ ꠟꠣꠉꠤ ꠘꠣꠎꠣꠁꠎ।
২৯ ꠄꠞꠟꠣꠉꠤ ꠀꠙꠘꠣꠞꠣ ꠎꠦꠛꠟꠣ ꠀꠝꠣꠞꠦ ꠈꠛꠞ ꠖꠤꠍꠂꠘ,
ꠔꠦ ꠀꠝꠤ ꠇꠥꠘꠥ ꠅꠝꠔ ꠘꠣ ꠇꠞꠤꠀꠃ ꠀꠁꠍꠤ।
ꠅꠈꠘ ꠀꠝꠤ ꠀꠙꠘꠣꠞꠣꠞꠦ ꠎꠤꠇꠣꠁꠞꠣꠝ,
ꠀꠝꠣꠞꠦ ꠇꠤꠔꠣꠟ꠆ꠟꠣꠉꠤ ꠀꠘꠣꠁꠍꠂꠘ?”
৩০ ꠇꠞꠘꠤꠟꠥꠍꠦ ꠎꠥꠀꠙ ꠖꠤꠟꠣ,
“ꠀꠁꠎ ꠕꠣꠇꠤ ꠌꠣꠁꠞ ꠖꠤꠘ ꠀꠉꠦ ꠅꠝꠘ ꠛꠣꠟꠣ ꠝꠣꠘꠤ ꠔꠤꠘꠐꠣꠞ ꠡꠝꠄ ꠀꠝꠤ ꠀꠝꠣꠞ ꠊꠞꠅ ꠖꠥꠀ ꠇꠞꠣꠔ ꠀꠍꠟꠣꠝ,
ꠅꠃ ꠡꠝꠄ ꠌꠝꠇꠣꠁꠟ ꠇꠣꠙꠠ ꠚꠤꠘ꠆ꠖꠣ ꠄꠇ ꠛꠦꠐꠣ ꠝꠣꠘꠥꠡ ꠀꠝꠣꠞ ꠍꠣꠝꠘꠦ ꠀꠁꠀ ꠃꠛꠣꠁꠟꠣ,
৩১ ꠔꠣꠁꠘ ꠇꠁꠟꠣ,
ꠇꠞꠘꠤꠟꠥꠍ,
ꠀꠟ꠆ꠟꠣꠄ ꠔꠥꠝꠣꠞ ꠖꠥꠀ ꠇꠛꠥꠟ ꠇꠞꠍꠂꠘ।
ꠀꠞ ꠔꠥꠝꠣꠞ ꠖꠣꠘ-ꠈꠄꠞꠣꠔꠅ ꠇꠛꠥꠟ ꠇꠞꠍꠂꠘ।
৩২ ꠅꠈꠘ ꠔꠥꠝꠤ ꠎꠣꠚꠣ ꠡꠢꠞꠅ ꠝꠣꠘꠥꠡ ꠙꠣꠑꠣꠅ ꠀꠞ ꠍꠣꠁꠝꠘ ꠃꠞꠚꠦ ꠙꠤꠔꠞꠞꠦ ꠀꠘꠣꠅ।
ꠔꠣꠁꠘ ꠖꠞꠤꠀꠞ ꠙꠣꠞꠅ ꠍꠣꠁꠝꠘ ꠘꠣꠝꠞ ꠄꠇ ꠌꠣꠝꠠꠣꠞ ꠇꠣꠞꠛꠣꠞꠤꠞ ꠛꠣꠠꠤꠔ ꠀꠍꠂꠘ।
৩৩ ꠄꠞꠟꠣꠉꠤ ꠀꠝꠤ ꠎꠟꠖꠤ ꠇꠞꠤ ꠀꠙꠘꠣꠞꠦ ꠀꠘꠣꠔ ꠝꠣꠘꠥꠡ ꠙꠣꠑꠣꠁꠟꠣꠝ।
ꠀꠙꠘꠦ ꠔꠡꠞꠤꠚ ꠀꠘꠍꠂꠘ ꠖꠦꠈꠤꠀ ꠈꠥꠛ ꠈꠥꠡꠤ ꠅꠁꠟꠣꠝ।
ꠅꠈꠘ ꠀꠝꠞꠣ ꠢꠇꠟ ꠀꠟ꠆ꠟꠣꠞ ꠍꠣꠝꠘꠦ ꠀꠎꠤꠞ ꠀꠍꠤ,
ꠀꠟ꠆ꠟꠣꠄ ꠀꠙꠘꠣꠞꠦ ꠎꠦꠔꠣ ꠢꠥꠇꠥꠝ ꠇꠞꠍꠂꠘ,
ꠀꠝꠞꠣ ꠢꠇ꠆ꠇꠟꠔꠣ ꠎꠣꠘꠝꠥ।”
ꠛꠤꠗꠞ꠆ꠝꠤꠞ ꠖꠤꠟꠅ ꠢꠎꠞꠔ ꠙꠤꠔꠞꠞ ꠘꠍꠤꠅꠔꠞ ꠚꠟ
৩৪ ꠔꠦꠃ ꠙꠤꠔꠞꠦ ꠎꠛꠣꠘ ꠈꠥꠟꠤꠀ ꠇꠁꠟꠣ,
“ꠀꠝꠤ ꠅꠈꠘ ꠢꠣꠍꠣꠞꠞ ꠛꠥꠎꠟꠣꠝ,
ꠀꠟ꠆ꠟꠣꠞ ꠘꠎꠞꠅ ꠢꠇꠟꠃ ꠢꠝꠣꠘ।
৩৫ ꠢꠇꠟ ꠎꠣꠔꠤꠞ ꠝꠣꠎꠦ ꠎꠦꠞꠣ ꠔꠣꠘꠞꠦ ꠒꠞꠣꠄ ꠀꠞ ꠔꠣꠘ ꠢꠥꠇꠥꠝ ꠝꠣꠘꠤꠀ ꠌꠟꠦ,
ꠔꠣꠞꠣꠞꠦ ꠔꠣꠁꠘ ꠇꠛꠥꠟ ꠇꠞꠂꠘ।
৩৬ ꠀꠙꠘꠣꠞꠣ ꠔ ꠎꠣꠘꠂꠘ,
ꠔꠣꠁꠘ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠈꠥꠡꠤꠞ ꠄꠇꠈꠣꠘ ꠈꠛꠞ ꠎꠣꠘꠣꠁꠍꠂꠘ।
ꠢꠎꠞꠔ ꠁꠍꠣ ꠀꠟ-ꠝꠍꠤ,
ꠎꠦꠁꠘ ꠢꠇꠟꠞ ꠝꠣꠟꠤꠇ,
ꠔꠣꠘ ꠃꠍꠤꠟ꠆ꠟꠣꠄ ꠡꠣꠘ꠆ꠔꠤ ꠙꠣꠅꠀ ꠎꠣꠄ।
৩৭ ꠝꠣꠘꠡꠞ ꠟꠣꠉꠤ ꠔꠃꠛꠣꠞ ꠉꠥꠍꠟ ꠇꠞꠣ ꠎꠞꠥꠞ,
ꠄꠢꠤꠀꠄ ꠁꠈꠣꠘ ꠔꠛꠟꠤꠉ ꠇꠞꠣꠞ ꠛꠣꠖꠦꠃ ꠉꠣꠟꠤꠟ ꠕꠣꠇꠤ ꠀꠡ꠆ꠔꠣ ꠄꠢꠥꠖꠤꠀ ꠎꠥꠠꠤ ꠎꠦꠔꠣ ꠊꠐꠍꠤꠟ,
ꠁꠔꠣ ꠢꠇꠟꠔꠣꠃ ꠀꠙꠘꠣꠞꠣ ꠢꠥꠘꠍꠂꠘ।
৩৮ ꠀꠟ꠆ꠟꠣꠄ ꠘꠣꠍꠣꠞꠔꠞ ꠁꠍꠣꠞꠦ ꠙꠣꠇ ꠞꠥꠢꠥ ꠀꠞ ꠇꠥꠖꠞꠔꠦ ꠇꠤꠟꠣ ꠈꠣꠍ ꠈꠟꠤꠚꠣ ꠛꠣꠘꠣꠁꠍꠟꠣ;
ꠔꠣꠁꠘ ꠜꠣꠟꠣ ꠇꠣꠝ ꠇꠞꠤ ꠇꠞꠤ ꠍꠚꠞ ꠇꠞꠔꠣ,
ꠀꠞ ꠎꠤꠘꠦ ꠗꠞꠣ ꠛꠦꠝꠣꠞꠤ ꠅꠇꠟꠞꠦ ꠜꠣꠟꠣ ꠇꠞꠔꠣ,
ꠀꠟ꠆ꠟꠣ ꠙꠣꠇ ꠔ ꠔꠣꠘ ꠟꠉꠦ ꠀꠍꠟꠣ।
৩৯ ꠔꠣꠁꠘ ꠁꠢꠥꠖꠤ ꠅꠇꠟꠞ ꠎꠝꠤꠘꠅ ꠀꠞ ꠎꠦꠞꠥꠎꠣꠟꠦꠝꠅ ꠎꠦꠔꠣ ꠇꠞꠍꠤꠟꠣ,
ꠀꠝꠞꠣ ꠁꠔꠣ ꠢꠇꠟꠔꠣꠞ ꠡꠣꠇ꠆ꠇꠤ;
ꠀꠞ ꠝꠣꠘꠡꠦ ꠔꠣꠘꠞꠦ ꠉꠣꠍꠅ ꠟꠐꠇꠣꠁꠀ ꠝꠣꠞꠟ।
৪০ ꠀꠟ꠆ꠟꠣꠄ ꠔꠣꠘꠞꠦ ꠔꠤꠘ ꠖꠤꠘ ꠛꠣꠖꠦ ꠎꠤꠘ꠆ꠖꠣ ꠇꠞꠤ ꠃꠑꠣꠁꠟꠣ,
ꠀꠞ ꠝꠣꠘꠡꠦꠅ ꠔꠣꠘꠞꠦ ꠖꠦꠈꠟꠣ।
৪১ ꠔꠣ-ꠅ ꠢꠇ꠆ꠇꠟꠦ ꠔꠣꠘꠦ ꠖꠦꠈꠣꠞ ꠘꠍꠤꠛ ꠅꠁꠍꠦ ꠘꠣ,
ꠈꠣꠟꠤ ꠀꠟ꠆ꠟꠣꠄ ꠎꠦꠞꠣꠞꠦ ꠀꠉꠦ ꠙꠍꠘ꠆ꠖ ꠇꠞꠍꠤꠟꠣ,
ꠢꠃ ꠡꠣꠇ꠆ꠇꠤ ꠅꠇꠟꠞꠦ,
ꠝꠣꠘꠤ ꠀꠝꠞꠣꠞꠦ ꠖꠦꠈꠣꠁꠟꠣ,
ꠀꠞ ꠝꠥꠞ꠆ꠖꠣ ꠕꠣꠇꠤ ꠔꠣꠁꠘ ꠎꠤꠘ꠆ꠖꠣ ꠅꠁꠀ ꠃꠑꠣꠞ ꠛꠣꠖꠦ ꠀꠝꠞꠣ ꠔꠣꠘ ꠟꠉꠦ ꠈꠣꠘꠣ-ꠙꠤꠘꠣꠅ ꠈꠣꠁꠍꠤ।
৪২ ꠔꠣꠁꠘ ꠀꠝꠞꠣꠞꠦ ꠢꠥꠇꠥꠝ ꠖꠤꠍꠂꠘ,
ꠀꠝꠞꠣ ꠎꠣꠘꠥ ꠁꠢꠥꠖꠤ ꠅꠇꠟꠞ ꠉꠦꠍꠦ ꠔꠛꠟꠤꠉ ꠇꠞꠤ ꠀꠞ ꠡꠣꠇ꠆ꠇꠤ ꠖꠦꠁ ꠎꠦꠘ,
ꠔꠣꠘꠞꠦꠃ ꠀꠟ꠆ꠟꠣꠄ ꠎꠤꠘ꠆ꠖꠣ ꠀꠞ ꠝꠥꠞ꠆ꠖꠣ ꠅꠇꠟꠞ ꠢꠣꠇꠤꠝ ꠛꠣꠘꠣꠁ ꠙꠣꠑꠣꠁꠍꠂꠘ।
৪৩ ꠢꠇꠟ ꠘꠛꠤꠄꠅ ꠔꠣꠘ ꠛꠦꠙꠣꠞꠦ ꠅꠃꠟꠣ ꠡꠣꠇ꠆ꠇꠤ ꠖꠤꠍꠂꠘ ꠎꠦꠘ,
ꠎꠦꠞꠣ ꠔꠣꠘ ꠃꠙꠞꠦ ꠁꠝꠣꠘ ꠀꠘꠦ,
ꠔꠣꠞꠣ ꠢꠇꠟꠦꠃ ꠔꠣꠘ ꠘꠣꠝꠞ ꠃꠍꠤꠟ꠆ꠟꠣꠄ ꠉꠥꠘꠣꠞ ꠝꠣꠚꠤ ꠙꠣꠄ।”
৪৪ ꠙꠤꠔꠞꠦ ꠛꠄꠀꠘ ꠇꠞꠞꠣ,
ꠁ ꠡꠝꠄ ꠎꠦꠞꠣ ꠔꠣꠘ ꠛꠄꠀꠘ ꠢꠥꠘꠣꠔ ꠀꠍꠤꠟ,
ꠔꠣꠞꠣ ꠢꠇꠟꠞ ꠃꠙꠞꠦ ꠀꠟ꠆ꠟꠣꠁ ꠙꠣꠇ ꠞꠥꠢꠥ ꠘꠣꠎꠤꠟ ꠅꠁꠟ।
৪৫ ꠀꠞ ꠙꠤꠔꠞꠞ ꠟꠉꠦ ꠅꠁꠀ ꠝꠍꠟꠝꠣꠘꠤ ꠇꠞꠣꠁꠟ ꠎꠦꠔꠣ ꠁꠝꠣꠘꠖꠣꠞ ꠅꠇꠟ ꠀꠁꠍꠟꠣ,
ꠔꠣꠞꠣ ꠁꠔꠣ ꠖꠦꠈꠤꠀ ꠌꠝꠇꠤꠀ ꠃꠑꠟꠣ,
ꠇꠣꠞꠘ ꠅ-ꠁꠢꠥꠖꠤ ꠅꠇꠟꠞ ꠃꠙꠞꠦꠅ ꠙꠣꠇ ꠞꠥꠢꠥ ꠛꠞ꠆ꠡꠤꠍꠂꠘ।
৪৬ ꠔꠣꠞꠣ ꠖꠦꠈꠟꠣ,
ꠅꠃ ꠅ-ꠁꠢꠥꠖꠤ ꠅꠇꠟꠦ ꠘꠣꠘꠣꠘ ꠉꠣꠁꠛꠤ ꠜꠣꠡꠣꠄ ꠝꠣꠔꠤꠞꠣ,
ꠀꠞ ꠀꠟ꠆ꠟꠣꠞ ꠔꠣꠞꠤꠚ ꠇꠞꠞꠣ।
৪৭ ꠔꠦꠃ ꠙꠤꠔꠞꠦ ꠇꠁꠟꠣ,
“ꠅꠃ ꠎꠦꠔꠣ ꠝꠣꠘꠡꠦ ꠀꠝꠞꠣꠞ ꠟꠣꠈꠣꠘ ꠙꠣꠇ ꠞꠥꠢꠥ ꠢꠣꠍꠤꠟ ꠇꠞꠍꠂꠘ,
ꠄꠞꠣ ꠙꠣꠘꠤꠔ ꠔꠃꠛꠣꠞ ꠉꠥꠍꠟ ꠇꠞꠔꠦ ꠇꠤꠔꠣ ꠇꠦꠃ ꠛꠣꠗꠣ ꠖꠤꠔ ꠙꠣꠞꠛ ꠘꠤ?”
৪৮ ꠛꠣꠖꠦ ꠔꠣꠁꠘ ꠄꠞꠣꠞꠦ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠃꠛꠣꠞ ꠉꠥꠍꠟ ꠇꠞꠣꠞ ꠢꠥꠇꠥꠝ ꠖꠤꠟꠣ।
ꠀꠞ ꠔꠣꠞꠣ ꠙꠤꠔꠞꠞꠦ ꠝꠤꠘꠔ ꠇꠞꠟꠣ,
ꠔꠣꠞꠣꠞ ꠉꠦꠍꠦ ꠇꠄꠈꠣꠘ ꠖꠤꠘ ꠞꠅꠀꠞ ꠟꠣꠉꠤ।