ꠁꠇꠘꠤꠅ ꠐꠣꠃꠘꠅ ꠔꠛꠟꠤꠉ
১৪
১ ꠁꠇꠘꠤꠅ ꠐꠣꠃꠘꠅ ꠀꠁꠀꠅ ꠅꠃ ꠟꠣꠈꠣꠘ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍ ꠁꠢꠥꠖꠤꠞ ꠝꠍꠤꠖꠅ ꠉꠤꠀ ꠢꠣꠝꠣꠁꠟꠣ,
ꠢꠣꠝꠣꠁꠀ ꠔꠣꠞꠣ ꠅꠝꠘ ꠟꠣꠈꠣꠘ ꠔꠛꠟꠤꠉ ꠇꠞꠟꠣ,
ꠁꠔꠣ ꠢꠥꠘꠤꠀ ꠛꠃꠔ ꠁꠢꠥꠖꠤ ꠀꠞ ꠅ-ꠁꠢꠥꠖꠤ ꠅꠇꠟꠦ ꠁꠝꠣꠘ ꠀꠘꠟꠣ।
২ ꠅꠁꠟꠦ ꠎꠦꠔꠣ ꠁꠢꠥꠖꠤꠄ ꠁꠝꠣꠘ ꠀꠘꠟꠣ ꠘꠣ,
ꠔꠣꠞꠣ ꠅ-ꠁꠢꠥꠖꠤ ꠅꠇꠟꠞꠦ ꠃꠍꠇꠣꠁ ꠖꠤꠀ,
ꠝꠥꠝꠤꠘ ꠅꠇꠟꠞ ꠛꠣꠄ ꠛꠤꠉꠠꠣꠁꠟꠣ।
৩ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍ ꠢꠤ ꠐꠣꠃꠘꠅ ꠛꠃꠔ ꠖꠤꠘ ꠞꠁꠟꠣ,
ꠔꠣꠞꠣ ꠡꠣꠅꠡ ꠇꠞꠤꠀ ꠝꠣꠟꠤꠇꠞ ꠛꠦꠙꠣꠞꠦ ꠔꠛꠟꠤꠉ ꠇꠞꠟꠣ।
ꠀꠞ ꠝꠣꠟꠤꠇꠦꠅ ꠔꠣꠘ ꠞꠢꠝꠔꠞ ꠇꠣꠟꠣꠝꠞ ꠙꠇ꠆ꠇꠦ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍꠞ ꠝꠣꠎꠖꠤ,
ꠛꠃꠔ ꠝꠥꠎꠦꠎꠣ ꠀꠞ ꠇꠦꠞꠣꠝꠔꠤ ꠅꠇꠟ ꠎꠣꠁꠞ ꠇꠞꠣꠁꠟꠣ।
৪ ꠛꠣꠖꠦ ꠀꠡ꠆ꠔꠣ ꠐꠣꠃꠘꠞ ꠝꠣꠘꠥꠡ ꠖꠥꠁ ꠖꠟ ꠅꠁꠉꠦꠟ,
ꠄꠇ ꠖꠟ ꠁꠢꠥꠖꠤ ꠅꠇꠟꠞ ꠙꠇ꠆ꠇꠦ,
ꠀꠞꠇ ꠖꠟ ꠍꠣꠢꠣꠛꠤ ꠅꠇꠟꠞ ꠙꠇ꠆ꠇꠦ।
৫ ꠅꠁꠟꠦ ꠁꠢꠥꠖꠤ ꠀꠞ ꠅ-ꠁꠢꠥꠖꠤ ꠇꠤꠍꠥ ꠝꠣꠘꠡꠦ ꠔꠣꠞꠣꠞ ꠘꠦꠔꠣ ꠅꠇꠟꠞ ꠟꠉꠦ ꠝꠤꠟꠤꠀ,
ꠛꠣꠞꠘꠣꠛꠣꠍ ꠀꠞ ꠙꠣꠃꠟꠥꠍꠞꠦ ꠝꠣꠁꠞ-ꠗꠁꠞ ꠀꠞ ꠙꠣꠔ꠆ꠔꠞ ꠝꠣꠞꠣꠞ ꠚꠘ꠆ꠖꠤ ꠇꠞꠟꠣ।
৬ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍꠦ ꠁꠔꠣ ꠐꠦꠞ ꠙꠣꠁꠀ ꠟꠥꠇꠣꠄꠘꠤꠀ ꠖꠦꠡꠞ ꠟꠥꠡꠔ꠆ꠞꠣ ꠀꠞ ꠖꠞꠛꠤ ꠡꠢꠞꠅ,
ꠀꠞ ꠄꠞ ꠇꠣꠘ꠆ꠖꠣ-ꠇꠣꠍꠣꠔ ꠜꠣꠉꠤꠀ ꠞꠁꠟꠣ;
৭ ꠔꠣꠞꠣ ꠢꠘꠅ ꠁꠘ꠆ꠎꠤꠟꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ।
৮ ꠟꠥꠡꠔ꠆ꠞꠣ ꠐꠣꠃꠘꠅ ꠄꠇꠎꠘ ꠝꠣꠘꠥꠡ ꠛꠅꠀꠔ ꠕꠣꠇꠔ,
ꠔꠣꠞ ꠙꠣꠅꠔ ꠇꠥꠘꠥ ꠛꠟ ꠀꠍꠤꠟ ꠘꠣ,
ꠢꠦ ꠝꠣʼꠞ ꠙꠦꠐ ꠕꠣꠇꠤꠃ ꠟꠦꠋꠠꠣ,
ꠇꠥꠘꠥꠖꠤꠘꠅ ꠀꠐꠔ ꠙꠣꠞꠍꠦ ꠘꠣ।
৯ ꠢꠦ ꠙꠣꠃꠟꠥꠍꠞ ꠛꠄꠀꠘ ꠢꠥꠘꠣꠔ ꠀꠍꠤꠟ;
ꠙꠣꠃꠟꠥꠍꠦ ꠔꠣꠞ ꠛꠣꠄ ꠗꠤꠀꠘ ꠇꠞꠤ ꠌꠣꠁꠟꠣ,
ꠀꠞ ꠜꠣꠟꠣ ꠅꠀꠞ ꠟꠣꠉꠤ ꠔꠣꠞ ꠁꠝꠣꠘ ꠀꠍꠦ ꠛꠥꠎꠤꠀ,
১০ ꠔꠣꠞꠦ ꠎꠥꠞꠦ ꠒꠣꠇꠖꠤ ꠇꠁꠟꠣ,
“ꠔꠥꠝꠣꠞ ꠙꠣꠅꠔ ꠜꠞꠖꠤ ꠡꠤꠖꠣ ꠅꠁꠀ ꠃꠛꠣꠅ!”
ꠔꠦꠃ ꠟꠉꠦ ꠟꠉꠦꠃ ꠝꠣꠘꠥꠡꠉꠥ ꠚꠣꠟꠖꠤ ꠃꠑꠤꠀ ꠀꠐꠔ ꠟꠣꠉꠟ।
১১ ꠙꠣꠃꠟꠥꠍꠞ ꠁ ꠇꠦꠞꠣꠝꠔꠤ ꠖꠦꠈꠤꠀ ꠝꠣꠘꠡꠦ ꠟꠥꠇꠣꠄꠘꠤꠀ ꠜꠣꠡꠣꠄ ꠌꠤꠟ꠆ꠟꠣꠁꠀ ꠇꠂꠟ,
“ꠖꠦꠛꠔꠣ ꠅꠇꠟꠦ ꠝꠣꠘꠡꠞ ꠍꠥꠞꠔ ꠗꠞꠤꠀ ꠀꠝꠞꠣꠞ ꠉꠦꠍꠦ ꠟꠣꠝꠤꠀ ꠀꠁꠍꠂꠘ!”
১২ ꠀꠞ ꠝꠣꠘꠡꠦ ꠛꠣꠞꠘꠣꠛꠣꠍꠞ ꠘꠣꠝ ꠖꠤꠟ ‘ꠎꠤꠃꠍ ꠖꠦꠛ’ ꠀꠞ ꠙꠣꠃꠟꠥꠍ ꠛꠠ ꠛꠄꠀꠘ ꠇꠞꠞꠣ ꠉꠔꠤꠇꠦ,
ꠔꠣꠘ ꠘꠣꠝ ꠖꠤꠟ ‘ꠢꠣꠞ꠆ꠝꠤꠍ ꠖꠦꠛ’।
১৩ ꠡꠢꠞꠞ ꠛꠣꠁꠞꠣ ꠝꠥꠟ ꠉꠦꠁꠐꠞ ꠇꠣꠘ꠆ꠖꠣꠔ ꠎꠤꠃꠍ ꠖꠦꠛꠔꠣꠞ ꠝꠘ꠆ꠖꠤꠞꠞ ꠛꠣꠛꠘ ꠑꠣꠇꠥꠞꠦ ꠛꠤꠍꠣꠟ ꠀꠞ ꠝꠣꠟꠣ ꠟꠁꠀ ꠀꠁꠟ,
ꠇꠣꠞꠘ ꠢꠤ ꠑꠣꠇꠥꠞꠦ ꠀꠞ ꠢꠇ꠆ꠇꠟ ꠝꠣꠘꠡꠦ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍꠞ ꠘꠤꠅꠔꠦ ꠙꠡꠥ ꠛꠟꠤ ꠖꠤꠔ ꠌꠣꠁꠟ।
১৪ ꠅꠁꠟꠦ ꠍꠣꠢꠣꠛꠤ ꠛꠣꠞꠘꠣꠛꠣꠍ ꠀꠞ ꠙꠣꠃꠟꠥꠍꠦ ꠁꠔꠣ ꠢꠥꠘꠤꠀ ꠛꠦ-ꠇꠞꠣꠞ ꠛꠘꠤꠀ ꠎꠣꠞꠎꠤꠞ ꠚꠤꠘ꠆ꠘꠞ ꠇꠣꠙꠠ ꠍꠤꠠꠤꠀ ꠖꠃꠠꠤꠀ ꠝꠣꠘꠡꠞ ꠉꠦꠍꠦ ꠉꠦꠟꠣ,
ꠀꠞ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟꠣ,
১৫ “ꠅ ꠍꠣꠛ ꠅꠇꠟ,
ꠀꠙꠘꠣꠞꠣ ꠇꠦꠘꠦ ꠁꠔꠣ ꠇꠞꠞꠣ?
ꠀꠝꠞꠣ ꠔ ꠈꠣꠟꠤ ꠀꠙꠘꠣꠁꠘ꠆ꠔꠞ ꠟꠣꠈꠣꠘꠃ ꠖꠥꠈꠤ-ꠡꠥꠈꠤ ꠝꠣꠘꠥꠡ,
ꠀꠝꠞꠣ ꠀꠙꠘꠣꠁꠘ꠆ꠔꠞ ꠉꠦꠍꠦ ꠅꠃ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠞꠣꠝ,
ꠎꠣꠔꠦ ꠁ ꠅꠡꠣꠞ ꠢꠇꠟꠔꠣ ꠛꠣꠖ ꠖꠤꠀ ꠎꠤꠘ꠆ꠖꠣ ꠀꠟ꠆ꠟꠣꠞ ꠛꠣꠄ ꠚꠤꠞꠂꠘ,
ꠎꠦꠁꠘ ꠀꠍꠝꠣꠘ-ꠎꠝꠤꠘ,
ꠖꠞꠤꠀ ꠀꠞ ꠄꠞꠝꠣꠎꠦ ꠎꠔꠔꠣ ꠀꠍꠦ ꠢꠇ꠆ꠇꠟꠔꠣ ꠙꠄꠖꠣ ꠇꠞꠍꠂꠘ।
১৬ ꠀꠉꠞ ꠀꠝꠟꠞ ꠢꠇꠟ ꠎꠣꠔꠤꠞꠦ ꠔꠣꠁꠘ ꠎꠣꠞꠎꠤꠞ ꠁꠌ꠆ꠍꠣꠝꠔ ꠙꠕꠦ ꠌꠟꠔꠦ ꠖꠤꠍꠂꠘ;
১৭ ꠔꠣ-ꠅ ꠔꠣꠁꠘ ꠢꠣꠝꠦꠡꠣ ꠘꠤꠎꠞꠦ ꠎꠣꠁꠞ ꠇꠞꠍꠂꠘ,
ꠔꠣꠁꠘ ꠀꠍꠝꠣꠘ ꠕꠣꠇꠤ ꠝꠦꠊ ꠖꠤꠀ,
ꠡꠝꠄ ꠝꠔ ꠚꠡꠟ ꠖꠣꠘ ꠇꠞꠤꠀ ꠔꠣꠘ ꠝꠦꠢꠦꠞꠛꠣꠘꠤ ꠖꠦꠈꠣꠁꠍꠂꠘ,
ꠀꠙꠘꠣꠁꠘ꠆ꠔꠞ ꠙꠦꠐ ꠜꠞꠣ ꠈꠣꠘꠤ ꠀꠞ ꠖꠤꠟꠞ ꠀꠞꠣꠝ ꠎꠥꠉꠣꠁꠍꠂꠘ।”
১৮ ꠁ ꠝꠣꠔ ꠅꠇꠟ ꠝꠣꠔꠣꠞ ꠛꠣꠖꠦꠅ ꠛꠃꠔ ꠇꠡ꠆ꠐ ꠇꠞꠤꠀ ꠄꠞꠣꠞ ꠙꠡꠥ ꠛꠟꠤ ꠖꠦꠅꠀ ꠛꠘ꠆ꠖ ꠇꠞꠣꠁꠟꠣ।
ꠘꠣꠘꠣꠘ ꠐꠣꠃꠘꠅ ꠔꠛꠟꠤꠉ
১৯ ꠛꠣꠖꠦ ꠀꠘ꠆ꠔꠤꠅꠈꠤꠀ ꠀꠞ ꠁꠇꠘꠤꠅ ꠕꠣꠇꠤ ꠇꠄꠎꠘ ꠁꠢꠥꠖꠤ ꠀꠁꠀ,
ꠙꠣꠃꠟꠥꠍꠞ ꠛꠤꠞꠥꠖ꠆ꠖꠦ ꠝꠣꠘꠡꠞꠦ ꠃꠍꠇꠣꠁꠀ ꠖꠤꠀ ꠔꠣꠘꠞꠦ ꠙꠣꠔ꠆ꠔꠞ ꠝꠣꠞꠟ,
ꠀꠞ ꠔꠣꠁꠘ ꠝꠞꠤꠉꠦꠍꠂꠘ ꠝꠘꠦ ꠇꠞꠤꠀ,
ꠐꠣꠃꠘꠞ ꠛꠣꠞꠦ ꠍꠦꠍꠠꠣꠁꠀ ꠟꠁꠀ ꠉꠦꠟ।
২০ ꠅꠁꠟꠦ ꠝꠥꠝꠤꠘ ꠅꠇꠟ ꠔꠣꠘ ꠌꠣꠁꠞꠅꠛꠣꠄ ꠄꠇꠟꠉꠦ ꠖꠟꠣ ꠅꠀꠞ ꠛꠣꠖꠦ,
ꠔꠣꠁꠘ ꠃꠑꠤꠀ ꠐꠣꠃꠘꠅ ꠚꠤꠞꠤꠀ ꠉꠦꠟꠣ।
ꠛꠣꠖꠞ ꠖꠤꠘ ꠔꠣꠁꠘ ꠛꠣꠞꠘꠣꠛꠣꠍꠞ ꠟꠉꠦ ꠅꠁꠀ ꠖꠞꠛꠤ ꠡꠢꠞꠅ ꠉꠦꠟꠣꠉꠤ।
২১ ꠖꠞꠛꠤꠔ ꠉꠤꠀ ꠢꠣꠞꠟꠦ ꠢꠘꠅ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠤꠀ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍꠦ ꠛꠃꠔ ꠝꠣꠘꠡꠞꠦ ꠁꠝꠣꠘꠖꠣꠞ ꠛꠣꠘꠣꠁꠟꠣ,
ꠛꠣꠖꠦ ꠔꠣꠞꠣ ꠟꠥꠡꠔ꠆ꠞꠣ,
ꠁꠇꠘꠤꠅ ꠀꠞ ꠀꠘ꠆ꠔꠤꠅꠈꠤꠀꠔ ꠚꠤꠞꠔ ꠉꠦꠟꠣ;
২২ ꠢꠘꠅ ꠉꠤꠀ ꠔꠣꠞꠣ ꠝꠥꠝꠤꠘ ꠅꠇꠟꠞ ꠁꠝꠣꠘꠤ ꠛꠟ ꠛꠣꠠꠣꠁꠀ ꠔꠣꠞꠣꠞꠦ ꠁꠝꠣꠘꠦ ꠝꠎꠛꠥꠔ ꠞꠅꠀꠞ ꠟꠣꠉꠤ ꠔꠣꠉꠤꠖ ꠖꠤꠟꠣ,
ꠔꠣꠞꠣ ꠇꠁꠟꠣ,
ꠛꠃꠔ ꠖꠥꠈ-ꠔꠇꠟꠤꠚꠞ ꠙꠕ ꠙꠣꠞꠅꠁꠀ ꠀꠝꠞꠣ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠟꠣꠉꠛ।
২৩ ꠔꠣꠞꠣ ꠎꠝꠣꠔꠞꠦ ꠌꠣꠟꠣꠘꠤꠞ ꠟꠣꠉꠤ ꠙꠞꠔꠦꠇ ꠎꠝꠣꠔꠞ ꠝꠥꠞꠛ꠆ꠛꠤ-ꠇꠝꠤꠐꠤ ꠛꠣꠘꠣꠁꠟꠣ।
ꠀꠞ ꠎꠦ ꠝꠣꠟꠤꠇꠞ ꠃꠙꠞꠦ ꠔꠣꠞꠣ ꠁꠝꠣꠘ ꠀꠘꠍꠂꠘ,
ꠄꠘ ꠘꠣꠝꠦ ꠞꠥꠎꠣ ꠞꠣꠈꠤꠀ ꠖꠥꠀ ꠇꠞꠤꠀ ꠅꠃ ꠁꠍꠣꠞ ꠀꠔꠅ ꠄꠞꠣꠞꠦ ꠡꠙꠤꠀ ꠖꠤꠟꠣ।
২৪ ꠛꠣꠖꠦ ꠙꠣꠃꠟꠥꠍ ꠀꠞ ꠛꠣꠞꠘꠣꠛꠣꠍꠦ ꠙꠤꠡꠤꠖꠤꠀ ꠖꠦꠡꠞ ꠜꠤꠔꠞꠦꠖꠤ ꠙꠣꠝꠚꠥꠟꠤꠀ ꠖꠦꠡꠅ ꠉꠦꠟꠣ।
২৫ ꠔꠣꠞꠣ ꠙꠞ꠆ꠉꠣ ꠡꠢꠞꠅ ꠀꠟ꠆ꠟꠣꠞ ꠇꠣꠟꠣꠝ ꠔꠛꠟꠤꠉ ꠇꠞꠤꠀ ꠀꠘ꠆ꠔꠥꠟꠤꠀ ꠎꠣꠎ ꠊꠣꠐꠅ ꠉꠦꠟꠣ;
২৬ ꠀꠘ꠆ꠔꠥꠟꠤꠀ ꠕꠣꠇꠤ ꠎꠣꠎꠅ ꠃꠑꠤꠀ ꠀꠘ꠆ꠔꠤꠅꠈꠤꠀꠔ ꠚꠤꠞꠔ ꠀꠁꠟꠣ।
ꠔꠣꠞꠣ ꠁ ꠍꠚꠞꠅ ꠎꠦꠔꠣ ꠇꠣꠝ ꠅꠇꠟ ꠁꠘ꠆ꠎꠣꠝ ꠇꠞꠍꠤꠟꠣ,
ꠁ ꠇꠣꠝꠞ ꠟꠣꠉꠤ ꠔꠣꠞꠣꠞꠦ ꠅꠃ ꠀꠘ꠆ꠔꠤꠅꠈꠤꠀ ꠕꠣꠇꠤꠃ ꠀꠟ꠆ꠟꠣꠞ ꠞꠢꠝꠔꠞ ꠢꠦꠚꠣꠎꠔꠅ ꠡꠙꠤ ꠖꠦꠅꠀ ꠅꠁꠍꠤꠟ।
২৭ ꠀꠘ꠆ꠔꠤꠅꠈꠤꠀꠔ ꠙꠃꠍꠤꠀ ꠎꠝꠣꠔꠞ ꠢꠇꠟꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ,
ꠀꠞ ꠀꠟ꠆ꠟꠣꠄ ꠔꠣꠞꠣꠞ ꠁ ꠐꠣꠃꠘꠅ ꠔꠣꠞꠣꠞ ꠟꠉꠦ ꠞꠁꠀ ꠎꠦꠔꠣ ꠎꠦꠔꠣ ꠇꠣꠝ ꠅꠇꠟ ꠇꠞꠍꠂꠘ,
ꠀꠞ ꠔꠣꠁꠘ ꠇꠤꠟꠣ ꠅ-ꠁꠢꠥꠖꠤ ꠅꠇꠟꠞ ꠝꠣꠎꠦ ꠁꠝꠣꠘ ꠀꠘꠣꠞ ꠖꠥꠀꠞ ꠈꠥꠟꠤꠀ ꠖꠤꠍꠂꠘ,
ꠁ ꠢꠇ꠆ꠇꠟꠔꠣ ꠎꠣꠘꠣꠁꠟꠣ।
২৮ ꠢꠦꠡꠦ ꠔꠣꠞꠣ ꠝꠥꠝꠤꠘ ꠅꠇꠟꠞ ꠟꠉꠦ ꠢꠤꠈꠣꠘꠅ ꠛꠃꠔ ꠖꠤꠘ ꠞꠁꠟꠣ।