ꠢꠎꠞꠔ ꠙꠣꠃꠟꠥꠍ ꠞꠥꠝ ꠐꠣꠃꠘꠞ ꠝꠥꠈꠣ ꠞꠅꠀꠘꠣ
২৭
১ ꠢꠣꠇꠤꠝꠞ ꠚꠄꠍꠣꠟꠣ ꠝꠣꠚꠤꠇ ꠎꠣꠎꠅ ꠇꠞꠤꠀ ꠀꠝꠞꠣꠞꠦ ꠁꠔꠣꠟꠤ ꠖꠦꠡꠅ ꠙꠣꠑꠣꠘꠤꠞ ꠡꠝꠄ ꠀꠁꠟꠦ,
ꠙꠣꠃꠟꠥꠍ ꠀꠞ ꠀꠞꠅ ꠇꠄꠎꠘ ꠇꠄꠅꠖꠤꠞꠦ ꠎꠥꠟꠤꠅ ꠘꠣꠝꠞ ꠄꠇꠎꠘ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠞ ꠀꠔꠅ ꠡꠝꠎꠣꠁ ꠖꠤꠟꠣ।
ꠎꠥꠟꠤꠅ ꠀꠍꠟꠣ ꠛꠣꠖꠡꠣ ꠇꠂꠍꠞꠞ ꠀꠙꠘ ꠍꠤꠙꠣꠁ ꠖꠟꠞ ꠄꠇꠎꠘ ꠍꠥꠛꠦꠖꠣꠞ।
২ ꠛꠣꠖꠦ ꠀꠝꠞꠣ ꠀꠖ꠆ꠞꠣꠝꠥꠔ꠆ꠔꠤꠅ ꠊꠣꠐꠞ ꠅꠃꠟꠣ ꠄꠇ ꠎꠣꠎꠅ ꠅꠁꠀ ꠞꠅꠀꠘꠣ ꠖꠤꠟꠣꠝ,
ꠎꠦꠈꠣꠘ ꠀꠍꠤꠀ ꠖꠦꠡꠞ ꠛꠃꠔ ꠎꠣꠎ ꠊꠣꠐꠅ ꠎꠣꠅꠀꠞ ꠟꠣꠉꠤ ꠎꠥꠁꠔ ꠇꠞꠣ ꠅꠁꠍꠦ।
ꠀꠞ ꠝꠣꠇꠤꠖꠘꠤꠀ ꠖꠦꠡꠞ ꠕꠤꠡꠟꠘꠤꠇꠤ ꠐꠣꠃꠘꠞ ꠀꠞꠤꠡ꠆ꠔꠣꠇꠥꠍ ꠀꠝꠞꠣꠞ ꠟꠉꠦ ꠀꠍꠟꠣ।
৩ ꠛꠣꠖꠞ ꠖꠤꠘ ꠀꠝꠞꠣꠞ ꠎꠣꠎ ꠉꠤꠀ ꠍꠤꠖꠘꠅ ꠜꠤꠠꠟ।
ꠍꠥꠛꠦꠖꠣꠞ ꠎꠥꠟꠤꠅꠄ ꠙꠣꠃꠟꠥꠍꠞ ꠟꠉꠦ ꠈꠥꠛ ꠜꠣꠟꠣ ꠛꠦꠛꠢꠣꠞ ꠇꠞꠟꠣ।
ꠔꠣꠁꠘ ꠔꠣꠘ ꠖꠥꠡ꠆ꠔ ꠅꠇꠟꠞ ꠉꠦꠍꠦ ꠉꠤꠀ,
ꠘꠤꠎꠞ ꠎꠞꠥꠞꠤ ꠉꠞꠎ ꠇꠥꠟꠣꠘꠤꠞ ꠁꠎꠣꠎꠔ ꠖꠤꠟꠣ।
৪ ꠛꠣꠖꠦ ꠢꠤ ꠎꠣꠉꠣ ꠕꠣꠇꠤ ꠢꠤꠞꠛꠣꠞ ꠎꠣꠎ ꠍꠣꠠꠟ,
ꠀꠞ ꠀꠝꠞꠣꠞ ꠃꠟꠐꠣꠝꠥꠈꠣ ꠛꠣꠔꠣꠡ ꠖꠦꠅꠀꠄ,
ꠀꠝꠞꠣ ꠍꠣꠁꠙ꠆ꠞꠣꠍ ꠖꠤꠙꠞ ꠎꠦꠛꠣꠄ ꠛꠣꠔꠣꠡ ꠀꠍꠤꠟ ꠘꠣ ꠢꠛꠣꠄꠖꠤ ꠉꠦꠟꠣꠝ।
৫ ꠉꠤꠀ ꠇꠤꠟꠤꠇꠤꠀ ꠀꠞ ꠙꠣꠝꠚꠥꠟꠤꠀꠞ ꠍꠣꠝꠘꠞ ꠡꠣꠉꠞ ꠙꠣꠞꠅꠁꠀ ꠟꠥꠇꠤꠀ ꠖꠦꠡꠞ ꠝꠥꠞꠣ ꠐꠣꠃꠘꠅ ꠀꠁꠀ ꠀꠎꠤꠟꠣꠝ।
৬ ꠍꠥꠛꠦꠖꠣꠞꠦ ꠢꠤꠈꠣꠘꠅ ꠁꠔꠣꠟꠤ ꠖꠦꠡꠅ ꠎꠣꠅꠞꠣ,
ꠀꠟꠦꠇꠎꠣꠘ꠆ꠖ꠆ꠞꠤꠀꠞ ꠄꠇꠈꠣꠘ ꠎꠣꠎ ꠙꠣꠁꠀ,
ꠢꠃ ꠎꠣꠎꠅ ꠇꠞꠤ ꠀꠝꠞꠣꠞꠦ ꠟꠁꠀ ꠞꠅꠀꠘꠣ ꠖꠤꠟꠣ।
৭ ꠀꠝꠞꠣꠞ ꠎꠣꠎꠈꠣꠘ ꠈꠥꠛ ꠀꠡ꠆ꠔꠦ ꠀꠡ꠆ꠔꠦ ꠌꠟꠤꠀ ꠛꠃꠔ ꠖꠤꠘ ꠛꠣꠖꠦ ꠇꠡ꠆ꠐ ꠇꠞꠤ ꠇ꠆ꠟꠤꠖ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠀ ꠀꠎꠤꠟ,
ꠅꠁꠟꠦ ꠛꠣꠔꠣꠡꠞ ꠟꠣꠉꠤ ꠀꠝꠞꠣ ꠀꠞ ꠡꠢꠎꠦ ꠀꠉꠥꠀꠁꠔꠣꠝ ꠙꠣꠞꠟꠣꠝ ꠘꠣ।
ꠔꠦꠃ ꠀꠝꠞꠣ ꠇꠝ ꠛꠣꠔꠣꠡꠦꠖꠤ ꠍꠣꠟꠝꠥꠘꠣꠞ ꠇꠣꠘ꠆ꠖꠣꠛꠣꠄ ꠉꠤꠀ ꠇ꠆ꠞꠤꠔꠤ ꠖꠤꠙꠞ ꠀꠅꠠꠦꠖꠤ ꠎꠣꠅꠀꠔ ꠟꠣꠉꠟꠣꠝ।
৮ ꠀꠞ ꠖꠞꠤꠀꠞ ꠙꠣꠞꠞ ꠇꠣꠘ꠆ꠖꠣꠛꠣꠄ ꠇꠡ꠆ꠐ ꠇꠞꠤꠀ ꠎꠣꠁꠔꠦ ꠎꠣꠁꠔꠦ,
‘ꠡꠥꠘ꠆ꠖꠞ ꠟꠋꠉꠞꠈꠣꠘꠣ’ ꠘꠣꠝꠞ ꠄꠇ ꠢꠥꠞꠥ ꠎꠣꠎ ꠊꠣꠐꠅ ꠀꠁꠟꠣꠝ,
ꠄꠞ ꠇꠣꠘ꠆ꠖꠣꠔ ꠀꠍꠤꠟ ꠟꠣꠍꠦꠀ ꠐꠣꠃꠘ।
৯ ꠅꠃ ꠟꠣꠈꠣꠘ ꠛꠃꠔ ꠖꠤꠘ ꠉꠥꠎꠞꠤ ꠉꠦꠟ,
ꠞꠥꠎꠣꠞ ꠁꠖꠞ ꠖꠤꠘ ꠡꠦꠡ ꠅꠁꠀ ꠕꠥꠠꠣ ꠕꠥꠠꠣ ꠡꠤꠔ ꠀꠁꠍꠦ।
ꠁ ꠡꠝꠄ ꠎꠣꠎꠦ ꠍꠚꠞ ꠇꠞꠣ ꠈꠥꠛ ꠛꠤꠙꠖ।
ꠔꠦꠃ ꠙꠣꠃꠟꠥꠍꠦ ꠎꠣꠎꠞ ꠝꠣꠘꠡꠞꠦ ꠙꠞꠣꠝꠤꠡ ꠖꠤꠟꠣ।
১০ ꠔꠣꠁꠘ ꠇꠁꠟꠣ,
“ꠍꠣꠛ ꠅꠇꠟ,
ꠀꠝꠤ ꠖꠦꠈꠞꠣꠝ,
ꠁ ꠍꠚꠞꠅ ꠀꠝꠞꠣꠞ ꠛꠃꠔ ꠝꠍꠤꠛꠔ ꠀꠞ ꠈꠦꠔꠤ ꠅꠁꠛ।
ꠁꠔꠣ ꠈꠣꠟꠤ ꠎꠣꠎ ꠛꠣ ꠝꠣꠟ-ꠍꠣꠝꠣꠘꠣꠞ ꠘꠣꠄ,
ꠀꠝꠞꠣꠞ ꠎꠣꠘꠞꠅ ꠈꠦꠔꠤ ꠅꠁꠛ।”
১১ ꠅꠁꠟꠦ ꠍꠥꠛꠦꠖꠣꠞꠦ ꠙꠣꠃꠟꠥꠍꠞ ꠇꠕꠣ ꠘꠣ ꠝꠣꠘꠤꠀ,
ꠎꠣꠎꠞ ꠝꠣꠟꠤꠇ ꠀꠞ ꠇꠦꠙ꠆ꠐꠤꠘꠞ ꠇꠕꠣ ꠢꠥꠘꠟꠣ।
১২ ꠀꠞ ꠁ ꠟꠋꠉꠞꠈꠣꠘꠣꠔ ꠡꠤꠔꠞ ꠖꠤꠘꠅ ꠞꠁꠔꠦ ꠡꠥꠛꠤꠗꠣ ꠅꠁꠔ ꠘꠣꠄ ꠉꠔꠤꠇꠦ,
ꠛꠦꠡꠤꠞ ꠜꠣꠉ ꠝꠣꠘꠡꠦ ꠢꠤꠘ ꠕꠣꠇꠤ ꠎꠣꠅꠀꠞ ꠟꠣꠉꠤ ꠙꠞꠣꠝꠤꠡ ꠖꠤꠟꠣ।
ꠔꠣꠞꠣ ꠌꠣꠁꠟꠣ ꠇꠥꠘꠥꠝꠘ꠆ꠔꠦ ꠚꠤꠘꠤꠇ꠆ꠡ ꠊꠣꠐꠅ ꠙꠃꠍꠤꠀ ꠡꠤꠔꠞ ꠖꠤꠘ ꠇꠣꠐꠣꠁꠔꠣ।
ꠁ ꠊꠣꠐ ꠀꠍꠤꠟ ꠇ꠆ꠞꠤꠔꠤ ꠖꠤꠙꠅ,
ꠄꠞ ꠃꠔ꠆ꠔꠞ-ꠙꠌ꠆ꠌꠤꠝ ꠀꠞ ꠖꠇ꠆ꠇꠤꠘ-ꠙꠌ꠆ꠌꠤꠝ ꠖꠤꠇ ꠈꠥꠟꠣ ꠀꠍꠤꠟ।
ꠖꠞꠤꠀꠞ ꠔꠥꠚꠣꠘꠦ ꠛꠦꠖꠤꠡꠣ ꠎꠣꠎ
১৩ ꠛꠣꠖꠦ ꠎꠦꠛꠟꠣ ꠀꠡ꠆ꠔꠦ ꠀꠡ꠆ꠔꠦ ꠖꠃꠇꠘꠞ ꠛꠣꠔꠣꠡ ꠌꠣꠟꠥ ꠅꠁꠟ,
ꠅꠃ ꠔꠣꠞꠣ ꠝꠘꠅ ꠇꠞꠟꠣ,
ꠔꠣꠞꠣ ꠎꠦꠟꠣ ꠀꠡꠣ ꠇꠞꠍꠟꠣ ꠅꠟꠣꠃ ꠅꠁꠍꠦ।
ꠄꠞꠖꠣꠄ ꠔꠣꠞꠣ ꠎꠣꠎꠞ ꠟꠋꠉꠞ ꠈꠥꠟꠤꠀ ꠇ꠆ꠞꠤꠔꠤ ꠖꠤꠙꠞ ꠉꠣꠟꠣꠛꠣꠄ ꠞꠅꠀꠘꠣ ꠖꠤꠟ।
১৪ ꠅꠁꠟꠦ ꠕꠥꠠꠣ ꠛꠣꠖꠦꠃ ꠢꠤ ꠙꠣꠞꠅ ꠕꠣꠇꠤ ꠁꠀꠘ-ꠇꠥꠘꠤ ꠘꠣꠝꠞ ꠈꠥꠛ ꠛꠦꠎꠥꠁꠔꠣ ꠄꠇ ꠔꠥꠚꠣꠘ ꠀꠁꠟ।
১৫ ꠀꠝꠞꠣꠞ ꠎꠣꠎ ꠔꠥꠚꠣꠘꠞ ꠝꠣꠎꠦ ꠙꠠꠟ,
ꠔꠥꠚꠣꠘꠞ ꠑꠦꠟꠣ ꠝꠥꠇꠣꠛꠤꠟꠣ ꠇꠞꠔꠣꠝ ꠘꠣ ꠙꠣꠞꠤꠀ,
ꠎꠣꠎꠞꠦ ꠛꠣꠔꠣꠡꠞ ꠔꠣꠟꠦ ꠔꠣꠟꠦ ꠜꠣꠐꠤꠅꠟ ꠖꠤꠟꠣꠝ।
১৬ ꠛꠣꠖꠦ ꠇꠃꠖꠣ ꠘꠣꠝꠞ ꠄꠇ ꠢꠥꠞꠥ ꠖꠤꠙꠞ ꠀꠅꠠꠦꠖꠤ ꠉꠤꠀ,
ꠎꠣꠎꠞ ꠟꠉꠞ ꠛꠣꠞꠇꠤ ꠘꠣꠅꠈꠣꠘꠞꠦ ꠀꠝꠞꠣ ꠛꠃꠔ ꠇꠡ꠆ꠐ ꠇꠞꠤ ꠜꠣꠋꠉꠣ ꠕꠣꠇꠤ ꠛꠣꠌꠣꠁꠟꠣꠝ।
১৭ ꠝꠣꠘꠡꠦ ꠘꠣꠅꠞꠦ ꠐꠣꠘꠤꠀ ꠘꠤꠀ ꠎꠣꠎꠞ ꠃꠙꠞꠦ ꠔꠥꠟꠟꠣ,
ꠀꠞ ꠎꠣꠎꠞ ꠔꠇ꠆ꠔꠣꠁꠘꠞꠦ ꠖꠠꠤ ꠖꠤꠀ ꠖꠠ ꠇꠞꠤ ꠛꠣꠘ꠆ꠖꠤꠟꠣ,
ꠎꠣꠔꠦ ꠔꠥꠚꠣꠘꠦ ꠘꠣ ꠜꠣꠋꠉꠦ।
ꠛꠣꠖꠦ ꠍꠥꠞ꠆ꠔꠤ ꠘꠣꠝꠞ ꠡꠣꠉꠞꠞ ꠌꠞꠅ ꠎꠣꠎ ꠟꠣꠉꠤꠎꠤꠛꠣꠞ ꠒꠞꠦ,
ꠙꠣꠟ ꠟꠣꠝꠣꠁꠀ ꠎꠣꠎꠞꠦ ꠄꠝꠘꠦ ꠛꠣꠔꠣꠡ ꠜꠣꠐꠤꠅꠟꠦ ꠍꠣꠠꠤ ꠖꠤꠟꠣꠝ।
১৮ ꠔꠥꠚꠣꠘꠦ ꠎꠣꠎꠞꠦ ꠅꠝꠘ ꠟꠣꠈꠣꠘ ꠉꠠꠣ-ꠉꠠꠤ ꠡꠥꠞꠥ ꠇꠞꠟ,
ꠄꠞꠖꠣꠄ ꠔꠣꠞꠣ ꠛꠣꠖꠞ ꠖꠤꠘ ꠎꠣꠎꠞ ꠝꠣꠟ-ꠍꠣꠝꠣꠘꠣ ꠙꠣꠘꠤꠔ ꠚꠣꠟꠣꠁ ꠖꠤꠟꠣ।
১৯ ꠔꠤꠘ ꠖꠤꠘꠞ ꠖꠤꠘ ꠔꠣꠞꠣ ꠘꠤꠎꠞ ꠀꠔꠦ ꠎꠣꠎꠞ ꠡꠣꠎ-ꠡꠞꠘ꠆ꠎꠣꠝꠅ ꠙꠣꠘꠤꠔ ꠚꠣꠟꠣꠁ ꠖꠤꠟꠣ।
২০ ꠛꠃꠔ ꠖꠤꠘ ꠕꠣꠇꠤ ꠌꠣꠘ꠆ꠖ-ꠡꠥꠞꠥꠎ ꠇꠥꠘ ꠎꠤꠘꠤꠡ ꠁꠔꠣ ꠘꠣ ꠖꠦꠈꠣꠄ,
ꠀꠞ ꠔꠥꠚꠣꠘꠞ ꠎꠥꠞ ꠈꠥꠛ ꠛꠦꠡꠤ ꠅꠀꠄ,
ꠀꠝꠞꠣ ꠎꠣꠘꠦ ꠛꠣꠌꠣꠞ ꠀꠡꠣ ꠍꠣꠠꠤ ꠖꠤꠟꠣꠝ।
২১ ꠎꠣꠎꠞ ꠝꠣꠘꠥꠡ ꠛꠃꠔ ꠖꠤꠘ ꠗꠞꠤ ꠃꠙꠣꠡ ꠞꠅꠀꠄ ꠙꠣꠃꠟꠥꠍꠦ ꠃꠛꠣꠁꠀ ꠔꠣꠞꠣꠞꠦ ꠇꠁꠟꠣ,
“ꠅ ꠜꠣꠁꠍꠣꠛ ꠅꠇꠟ,
ꠀꠝꠣꠞ ꠇꠕꠣ ꠢꠥꠘꠤꠀ ꠇ꠆ꠞꠤꠔꠤ ꠖꠤꠙ ꠕꠣꠇꠤ ꠎꠣꠎꠈꠣꠘꠞꠦ ꠘꠣ ꠍꠣꠠꠟꠦ,
ꠁ ꠝꠍꠤꠛꠔ ꠀꠞ ꠈꠦꠔꠤ ꠕꠣꠇꠤ ꠀꠙꠘꠣꠞꠣ ꠛꠣꠌꠟꠣ ꠅꠘꠦ।
২২ ꠅꠁꠟꠦ ꠅꠈꠘ ꠀꠝꠤ ꠀꠙꠘꠣꠞꠣꠞꠦ ꠅꠃ ꠙꠞꠣꠝꠤꠡ ꠖꠤꠞꠣꠝ,
ꠀꠙꠘꠣꠞꠣ ꠝꠘꠞ ꠝꠣꠎꠦ ꠛꠟ ꠞꠣꠈꠃꠇ꠆ꠇꠣ,
ꠀꠝꠞꠣ ꠇꠦꠃ ꠎꠣꠘꠦ ꠝꠞꠔꠣꠝ ꠘꠣꠄ,
ꠈꠣꠟꠤ ꠎꠣꠎꠈꠣꠘ ꠛꠤꠘꠣꠡ ꠅꠁꠎꠤꠛ।
২৩ ꠀꠝꠤ ꠎꠦ ꠀꠟ꠆ꠟꠣꠞ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠤ,
ꠢꠃ ꠀꠟ꠆ꠟꠣꠞ ꠄꠇ ꠚꠤꠞꠤꠡ꠆ꠔꠣꠄ ꠉꠔ ꠞꠣꠁꠔ ꠀꠝꠣꠞ ꠇꠣꠘ꠆ꠖꠣꠔ ꠃꠛꠣꠁꠀ ꠇꠁꠍꠂꠘ,
২৪ ꠙꠣꠃꠟꠥꠍ,
ꠒꠞꠣꠁꠅ ꠘꠣ,
ꠛꠣꠖꠡꠣ ꠇꠂꠍꠞꠞ ꠍꠣꠝꠘꠦ ꠔꠥꠝꠣꠞ ꠃꠛꠣꠘꠤ ꠟꠣꠉꠛ।
ꠀꠞ ꠁ ꠎꠣꠎꠅ ꠇꠞꠤ ꠎꠦꠞꠣ ꠔꠥꠝꠣꠞ ꠟꠉꠦ ꠅꠁꠀ ꠎꠣꠁꠞꠣ,
ꠀꠟ꠆ꠟꠣꠄ ꠔꠥꠝꠣꠞ ꠈꠣꠔꠤꠞꠦ ꠝꠦꠢꠦꠞꠛꠣꠘꠤ ꠇꠞꠤꠀ ꠄꠞꠣ ꠢꠇ꠆ꠇꠟꠞ ꠎꠣꠘ ꠛꠣꠌꠣꠁꠍꠂꠘ।
২৫ ꠔꠦ ꠍꠣꠛ ꠅꠇꠟ,
ꠀꠙꠘꠣꠞꠣ ꠝꠘꠞ ꠝꠣꠎꠦ ꠛꠟ ꠞꠣꠈꠃꠇ꠆ꠇꠣ।
ꠀꠝꠤ ꠄꠇꠤꠘ ꠇꠞꠤ,
ꠀꠟ꠆ꠟꠣꠄ ꠀꠝꠣꠞꠦ ꠎꠦꠟꠣ ꠇꠁꠍꠂꠘ,
ꠅꠟꠣꠃ ꠅꠁꠛ।
২৬ ꠅꠁꠟꠦ ꠀꠝꠞꠣ ꠇꠥꠘꠥ ꠖꠤꠙꠞ ꠃꠙꠞꠦ ꠉꠤꠀ ꠙꠠꠝꠥ।”
ꠎꠣꠎ ꠛꠥꠠꠤ ꠉꠦꠟ
২৭ ꠅꠃ ꠟꠣꠈꠣꠘ ꠇꠞꠤ ꠀꠝꠞꠣ ꠀꠖ꠆ꠞꠤꠀ ꠡꠣꠉꠞꠞ ꠃꠙꠞꠦꠖꠤ ꠎꠣꠅꠀꠔ ꠞꠁꠟꠣꠝ,
ꠛꠣꠖꠦ ꠔꠥꠚꠣꠘꠞ ꠌꠃꠖ꠆ꠖ ꠖꠤꠘꠞ ꠖꠤꠘ ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠘꠣꠁꠀ ꠅꠇꠟꠦ ꠀꠘ꠆ꠖꠣꠎ ꠇꠞꠟꠣ,
ꠔꠣꠞꠣ ꠙꠣꠞꠞ ꠇꠣꠘ꠆ꠖꠣꠔ ꠀꠁꠍꠂꠘ।
২৮ ꠔꠣꠞꠣ ꠙꠣꠘꠤ ꠝꠣꠙꠤꠀ ꠖꠦꠈꠟꠣ ꠈꠣꠟꠤ ꠀꠡꠤ ꠀꠔ ꠉꠁꠘ ꠀꠍꠦ,
ꠕꠥꠠꠣ ꠛꠣꠖꠦ ꠢꠤꠞꠛꠣꠞ ꠝꠣꠙꠤꠀ ꠖꠦꠈꠟꠣ,
ꠡꠣꠁꠐ ꠀꠔ ꠀꠍꠦ।
২৯ ꠄꠞꠖꠣꠄ ꠌꠞꠞ ꠙꠣꠔ꠆ꠔꠞꠞ ꠝꠣꠎꠦ ꠉꠤꠀ ꠎꠣꠎ ꠗꠣꠇ꠆ꠇꠣ ꠟꠣꠉꠣꠞ ꠒꠞꠦ,
ꠔꠣꠞꠣ ꠎꠣꠎꠞ ꠈꠞꠦꠖꠤ ꠌꠣꠁꠞꠉꠦꠍꠣ ꠟꠋꠉꠞ ꠚꠣꠟꠣꠁꠀ,
ꠡꠥꠞꠥꠎꠞ ꠚꠞ ꠖꠦꠈꠣꠞ ꠟꠣꠉꠤ ꠖꠥꠀ ꠇꠞꠣꠔ ꠛꠁꠟꠣ।
৩০ ꠘꠣꠁꠀ ꠅꠇꠟꠦ ꠎꠣꠎ ꠕꠣꠇꠤ ꠜꠣꠉꠤꠀ ꠎꠣꠅꠀꠞ ꠝꠔꠟꠛ ꠇꠞꠤ,
ꠍꠣꠝꠘꠞ ꠉꠟꠁꠞ ꠕꠥꠠꠣ ꠀꠉꠦ ꠟꠋꠉꠞ ꠚꠣꠟꠣꠘꠤꠞ ꠇꠕꠣ ꠇꠁꠀ,
ꠎꠣꠎꠞ ꠛꠣꠞꠇꠤ ꠘꠣꠅꠞꠦ ꠖꠞꠤꠀꠔ ꠟꠣꠝꠣꠁꠟꠣ।
৩১ ꠔꠦꠃ ꠙꠣꠃꠟꠥꠍꠦ ꠍꠥꠛꠦꠖꠣꠞꠞꠦ ꠀꠞ ꠍꠤꠙꠣꠁ ꠅꠇꠟꠞꠦ ꠇꠁꠟꠣ,
“ꠘꠣꠁꠀ ꠅꠇꠟ ꠎꠣꠎ ꠕꠣꠇꠤ ꠜꠣꠉꠤ ꠉꠦꠟꠦ ꠀꠙꠘꠣꠞꠣ ꠢꠇꠟ ꠝꠣꠞꠣ ꠎꠣꠁꠛꠣ।”
৩২ ꠁꠈꠣꠘ ꠢꠥꠘꠤꠀ ꠍꠤꠙꠣꠁ ꠅꠇꠟꠦ ꠘꠣꠅꠞ ꠖꠠꠤ ꠇꠣꠐꠤ ꠖꠤꠟꠣ,
ꠔꠦꠃ ꠘꠣꠅ ꠙꠣꠘꠤꠔ ꠜꠣꠡꠤꠀ ꠉꠦꠟꠉꠤ।
৩৩ ꠙꠔꠣꠛꠣꠟꠣ ꠙꠣꠃꠟꠥꠍꠦ ꠢꠇꠟꠞꠦ ꠝꠤꠘꠔ ꠇꠞꠟꠣ ꠇꠥꠘ꠆ꠔꠣ ꠈꠣꠅꠀꠞ ꠟꠣꠉꠤ,
ꠔꠣꠁꠘ ꠇꠁꠟꠣ,
“ꠀꠁꠎ ꠌꠃꠖ꠆ꠖꠖꠤꠘ ꠗꠞꠤ ꠇꠤꠔꠣ ꠅꠁꠛ ꠘꠣ ꠅꠁꠛ ꠅꠃ ꠌꠤꠘ꠆ꠔꠣꠄ ꠀꠙꠘꠣꠞꠣ ꠇꠥꠘ꠆ꠔꠣ ꠈꠣꠁꠍꠂꠘ ꠘꠣ।
৩৪ ꠀꠝꠤ ꠀꠙꠘꠣꠞꠣꠞꠦ ꠝꠤꠘꠔ ꠇꠞꠞꠣꠝ,
ꠇꠥꠘ꠆ꠔꠣ ꠈꠣꠃꠇ꠆ꠇꠣ।
ꠎꠣꠘ ꠛꠣꠌꠣꠁꠔꠦ ꠅꠁꠟꠦ ꠔ ꠀꠙꠘꠣꠞꠣ ꠈꠣꠁꠔꠦ ꠅꠁꠛ।
ꠖꠦꠈꠛꠣꠘꠦ,
ꠀꠙꠘꠣꠁꠘ꠆ꠔꠞ ꠝꠣꠕꠣꠞ ꠄꠇꠍꠣ ꠌꠥꠟꠞꠅ ꠈꠦꠔꠤ ꠅꠁꠔ ꠘꠣꠄ।”
৩৫ ꠁꠈꠣꠘ ꠇꠁꠀ ꠢꠣꠞꠤ ꠙꠣꠃꠟꠥꠍꠦ ꠔꠣꠞꠣ ꠢꠇꠟꠞ ꠍꠣꠝꠘꠦ ꠞꠥꠐꠤ ꠀꠘꠤꠀ ꠀꠟ꠆ꠟꠣꠞ ꠡꠥꠇꠞꠤꠀ ꠎꠣꠘꠣꠁꠀ,
ꠞꠥꠐꠤ ꠍꠤꠠꠤꠀ ꠈꠣꠅꠀꠔ ꠟꠣꠉꠟꠣ।
৩৬ ꠔꠦꠃ ꠢꠇꠟꠦ ꠝꠘꠞ ꠝꠣꠎꠦ ꠛꠟ ꠙꠣꠁꠀ ꠈꠣꠘꠤ ꠈꠣꠁꠟꠣ।
৩৭ ꠁ ꠎꠣꠎꠞ ꠝꠣꠎꠦ ꠀꠝꠞꠣ ꠢꠇꠟꠦ ꠝꠤꠟꠤꠀ ꠖꠥꠁꠡ ꠍꠤꠅꠔ꠆ꠔꠁꠞ ꠎꠘ ꠀꠍꠟꠣꠝ।
৩৮ ꠢꠇꠟꠦ ꠙꠦꠐ ꠜꠞꠤꠀ ꠈꠣꠅꠀꠞ ꠛꠣꠖꠦ ꠎꠣꠎꠞ ꠜꠣꠞ ꠇꠝꠣꠘꠤꠞ ꠟꠣꠉꠤ ꠢꠇ꠆ꠇꠟ ꠉꠝ ꠖꠞꠤꠀꠔ ꠚꠣꠟꠣꠁ ꠖꠤꠟꠣ।
৩৯ ꠛꠤꠀꠘ ꠅꠁꠀ ꠢꠣꠞꠟꠦ ꠔꠣꠞꠣ ꠌꠤꠘꠟꠣ ꠘꠣ,
ꠁ ꠎꠣꠉꠣ ꠀꠍꠟꠦ ꠇꠥꠘ ꠎꠣꠉꠣ।
ꠅꠁꠟꠦ ꠅꠃꠟꠣ ꠄꠇ ꠛꠣꠈ ꠖꠦꠈꠣ ꠉꠦꠟ,
ꠁ ꠛꠣꠈꠞ ꠌꠞ ꠛꠣꠟꠥꠄ ꠜꠞꠣ।
ꠖꠦꠈꠤꠀ ꠔꠣꠞꠣ ꠙꠞꠣꠝꠤꠡ ꠇꠞꠟꠣ,
ꠙꠣꠞꠟꠦ ꠎꠣꠎꠞꠦ ꠘꠤꠀ ꠢꠃ ꠌꠞꠅ ꠔꠥꠟꠤꠟꠤꠔꠣ।
৪০ ꠔꠦꠃ ꠔꠣꠞꠣ ꠟꠋꠉꠞꠣꠁꠘ ꠇꠣꠐꠤꠀ ꠖꠞꠤꠀꠔ ꠚꠣꠟꠣꠁ ꠖꠤꠟꠣ,
ꠀꠞ ꠇꠣꠘ꠆ꠒꠣꠞꠤꠞ ꠛꠂꠑꠣꠞ ꠖꠠꠤꠘꠅ ꠇꠣꠐꠤ ꠖꠤꠟꠣ।
ꠛꠣꠖꠦ ꠛꠣꠔꠣꠡ ꠜꠣꠐꠤꠅꠟꠦ ꠍꠣꠝꠘꠞ ꠙꠣꠟ ꠐꠣꠋꠉꠣꠁꠀ ꠢꠃ ꠛꠣꠟꠥꠞ ꠌꠞꠞ ꠝꠥꠈꠣ ꠉꠦꠟꠣꠝ।
৪১ ꠅꠁꠟꠦ ꠎꠣꠎ ꠔꠟꠦ ꠟꠥꠇꠣꠁꠟ ꠇꠥꠘ꠆ꠔꠣꠔ ꠀꠐꠇꠤ ꠉꠦꠟ।
ꠀꠞ ꠍꠣꠝꠘ ꠉꠣꠟꠣ ꠀꠐꠇꠤ ꠎꠣꠅꠀꠄ,
ꠈꠞꠞ ꠉꠟꠁꠔ ꠓꠦꠃꠞ ꠛꠣꠠꠤ ꠟꠣꠉꠤꠀ ꠜꠣꠋꠉꠣ ꠗꠞꠟ।
৪২ ꠔꠦꠃ ꠍꠤꠙꠣꠁ ꠅꠇꠟꠦ ꠙꠞꠣꠝꠤꠡ ꠇꠞꠟꠣ ꠛꠘ꠆ꠖꠤ ꠅꠇꠟꠞꠦ ꠝꠣꠞꠤꠟꠤꠔꠣ,
ꠀꠞꠘꠣꠄ ꠇꠦꠃ ꠇꠦꠃ ꠢꠣꠔꠞꠣꠁꠀ ꠜꠣꠉꠤꠎꠤꠔ ꠙꠣꠞꠦ।
৪৩ ꠅꠁꠟꠦ ꠡ-ꠍꠤꠙꠣꠁꠞ ꠍꠥꠛꠦꠖꠣꠞꠦ ꠙꠣꠃꠟꠥꠍꠞꠦ ꠛꠣꠌꠣꠘꠤꠞ ꠈꠤꠀꠟꠦ ꠍꠤꠙꠣꠁ ꠅꠇꠟꠞ ꠁ ꠙꠞꠣꠝꠤꠡ ꠝꠣꠘꠟꠣ ꠘꠣ।
ꠔꠣꠁꠘ ꠢꠥꠇꠥꠝ ꠖꠤꠟꠣ,
ꠎꠦꠞꠣ ꠢꠣꠔꠣꠞ ꠎꠣꠘꠦ,
ꠔꠣꠞꠣ ꠀꠉꠦ ꠎꠣꠎ ꠕꠣꠇꠤ ꠚꠣꠟꠣꠁꠀ ꠙꠠꠤꠀ ꠢꠥꠇꠘꠣꠔ ꠃꠑꠃꠇ।
৪৪ ꠀꠞ ꠢꠣꠔꠣꠞ ꠘꠣ ꠎꠣꠘꠞꠣ ꠅꠇꠟꠦ ꠎꠣꠎꠞ ꠔꠇ꠆ꠔꠣ ꠛꠣ ꠀꠞꠅ ꠇꠥꠘ꠆ꠔꠣꠔ ꠗꠞꠤꠀ ꠢꠥꠇꠘꠣꠔ ꠙꠣꠞꠅꠃꠇ।
ꠅꠃ ꠟꠣꠈꠣꠘ ꠢꠇꠟꠦ ꠢꠥꠇꠘꠣꠔ ꠃꠑꠤꠀ ꠎꠣꠘ ꠛꠣꠌꠣꠁꠟꠣ।