ꠙꠛꠤꠔ꠆ꠞ ꠀꠍꠝꠣꠘꠤ ꠇꠤꠔꠣꠛꠞ ꠅꠃ ꠍꠤꠙꠣꠞꠣ ꠀꠟ꠆ꠟꠣ ꠙꠣꠇꠞ ꠢꠥꠇꠥꠝꠦ ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠦ (ꠞꠣ꠩) ꠌꠤꠑꠤꠞ ꠀꠇꠣꠞꠦ ꠟꠦꠈꠍꠂꠘ।

ꠁꠈꠣꠘ ꠅꠁꠟ ꠇꠞꠤꠘ꠆ꠔ ꠎꠝꠣꠔꠞ ꠉꠦꠍꠦ ꠔꠣꠘ ꠟꠦꠈꠣ ꠙꠄꠟꠣ ꠍꠢꠤꠚꠣ।

ꠅꠘꠥꠝꠣꠘ ꠇꠞꠣ ꠅꠄ,

ꠢꠎꠞꠔ ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠦꠅꠀꠞ ২০ ꠛꠍꠞ ꠛꠣꠖꠦ ꠁꠈꠣꠘ ꠟꠦꠈꠣ ꠅꠁꠍꠦ।

ꠞꠥꠝꠣꠘ ꠛꠣꠖꠡꠣꠁꠞ ꠜꠤꠔꠞꠦ ꠉ꠆ꠞꠤꠍ ꠖꠦꠡꠞ ꠞꠣꠎꠗꠣꠘꠤ ꠇꠞꠤꠘ꠆ꠔ ꠀꠍꠤꠟ ꠇꠣꠄ-ꠇꠣꠞꠛꠣꠞꠞ ꠟꠣꠉꠤ ꠘꠣꠝꠤ-ꠖꠣꠝꠤ ꠐꠣꠃꠘ।

ꠁ ꠐꠣꠃꠘꠅ ꠛꠃꠔ ꠛꠦꠡꠣꠛꠣꠎꠤ ꠡꠢ ꠘꠣꠘꠣꠘ ꠘꠝꠥꠘꠣꠞ ꠎꠤꠘꠣꠞ ꠇꠣꠝ ꠀꠍꠤꠟ।

ꠍꠣꠢꠣꠛꠤ ꠢꠎꠞꠔ ꠙꠣꠃꠟꠥꠍꠦ ꠖꠥꠍꠞꠣꠛꠣꠞ ꠔꠛꠟꠤꠉꠤ ꠍꠚꠞꠞ ꠇꠣꠟꠅ ꠙꠄꠟꠣꠃ ꠅꠃ ꠐꠣꠃꠘꠅ ꠔꠡꠞꠤꠚ ꠀꠘꠍꠤꠟꠣ (ꠍꠣꠢꠣꠛꠤ ꠘꠣꠝꠣ ১৮ ꠞꠥꠇꠥ ꠖꠦꠈꠃꠇ꠆ꠇꠣ)।

ꠔꠣꠁꠘ ꠇꠞꠤꠘ꠆ꠔ ꠐꠣꠃꠘ ꠕꠣꠇꠤ ꠚꠤꠞꠤꠀ ꠀꠅꠀꠞ ꠔꠤꠘ ꠛꠍꠞ ꠛꠣꠖꠦ ꠎꠦꠛꠟꠣ ꠁꠚꠤꠍ ꠐꠣꠃꠘꠅ ꠔꠛꠟꠤꠉ ꠇꠞꠣꠔ ꠀꠁꠟꠣ,

ꠅꠃ ꠡꠝꠄ ꠇꠞꠤꠘ꠆ꠔ ꠎꠝꠣꠔꠞ ꠝꠥꠞꠛ꠆ꠛꠤ ꠅꠇꠟꠦ ꠈꠛꠞ ꠖꠤꠟꠣ,

ꠎꠝꠣꠔꠞ ꠝꠣꠎꠦ ꠘꠣꠘꠣꠘ ꠘꠝꠥꠘꠣꠞ ꠉꠘ꠆ꠒꠉꠥꠟ ꠀꠞ ꠜꠥꠟ ꠔꠣꠟꠤꠝꠦ ꠜꠞꠤ ꠉꠦꠍꠦ।

ꠎꠝꠣꠔꠞ ꠄꠛꠣꠖꠔ-ꠛꠘ꠆ꠖꠦꠉꠤꠞ ꠝꠣꠎꠦ ꠄꠞꠣ ꠉꠣꠁꠛꠤ ꠜꠣꠡꠣꠄ ꠝꠣꠔꠣꠞꠦ ꠛꠃꠔ ꠖꠣꠝ ꠖꠤꠞꠣ।

ꠔꠦꠃ ꠢꠎꠞꠔ ꠙꠣꠃꠟꠥꠍꠦ ꠔꠣꠞꠣꠞꠦ ꠙꠞꠣꠝꠤꠡ ꠖꠤꠟꠣ ꠙꠤꠞꠣꠇꠤ ꠝꠣꠔ ꠝꠣꠔꠣꠞ ꠟꠣꠉꠤ।

ꠅꠃ ꠖꠥꠁꠅ ꠘꠤꠀꠝꠔꠃ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠖꠣꠘ,

ꠔꠣ-ꠅ ꠙꠤꠞꠣꠇꠤ ꠝꠣꠔ ꠝꠣꠔꠣꠞꠦ ꠔꠣꠁꠘ ꠛꠦꠡꠤ ꠖꠣꠝ ꠖꠤꠍꠂꠘ,

ꠇꠣꠞꠘ ꠅꠃ ꠝꠣꠔꠦ ꠝꠣꠘꠡꠦ ꠀꠟ꠆ꠟꠣꠁ ꠝꠥꠘꠡꠣ,

ꠢꠦꠖꠣꠄꠅꠔ ꠀꠞ ꠢꠥꠡꠤꠀꠞꠤ ꠙꠣꠄ।

ꠀꠞꠅ ꠈꠛꠞ ꠙꠣꠁꠟꠣ,

ꠁꠝꠣꠘꠖꠣꠞ ꠅꠇꠟꠞ ꠝꠣꠎꠦ ꠈꠥꠛ ꠛꠦꠡꠤ ꠖꠟꠣꠖꠟꠤ,

ꠎꠤꠘꠣꠞ ꠇꠣꠝ,

ꠝꠣꠝꠟꠣ-ꠝꠇꠖ꠆ꠖꠝꠣ,

ꠛꠤꠡ꠆ꠞꠤꠋꠈꠟꠣ,

ꠝꠖ ꠈꠣꠅꠀ,

ꠀꠞ ꠜꠘ꠆ꠒꠣꠝꠤ ꠌꠟꠦꠞ।

ꠔꠣꠁꠘ ꠅꠃ ꠎꠉꠁꠘ꠆ꠘ ꠇꠣꠝ-ꠇꠣꠎꠞꠦ,

ꠢꠎꠞꠔ ꠝꠥꠍꠣ (ꠀ꠩)-ꠅꠞ ꠎꠝꠣꠘꠣꠞ ꠘꠣꠚꠞꠝꠣꠘ ꠛꠘꠤ ꠁꠍꠞꠣꠁꠟꠞ ꠟꠉꠦ ꠔꠥꠟꠘꠣ ꠇꠞꠍꠂꠘ (১০ ꠞꠥꠇꠥ ꠖꠦꠈꠃꠇ꠆ꠇꠣ)।

ꠔꠣꠞꠣꠞꠦ ꠔꠃꠛꠣ ꠇꠞꠣꠞ ꠙꠞꠣꠝꠤꠡ ꠖꠤꠀ ꠅꠃ ꠝꠥꠟ꠆ꠟꠛꠣꠘ ꠌꠤꠑꠤ ꠟꠦꠈꠍꠂꠘ,

ꠎꠣꠔꠦ ꠁꠝꠣꠘꠖꠣꠞ ꠅꠇꠟꠦ ꠉꠥꠘꠣꠞ ꠇꠣꠝ ꠍꠣꠠꠤꠀ,

ꠀꠟ꠆ꠟꠣꠞ ꠒꠞ-ꠈꠚꠦ ꠙꠣꠇ-ꠙꠛꠤꠔ꠆ꠞ ꠎꠤꠘ꠆ꠖꠦꠉꠤꠞ ꠙꠕꠦ ꠚꠤꠞꠤꠀ ꠀꠁꠘ,

ꠀꠞ ꠔꠣꠞꠣ ꠙꠛꠤꠔ꠆ꠞ ꠝꠢꠛ꠆ꠛꠔꠞ ꠀꠡꠤꠇ ꠅꠁꠘ।

ꠝꠢꠛ꠆ꠛꠔꠃ ꠅꠁꠟ ꠢꠇꠟ ꠕꠣꠇꠤ ꠛꠠ ꠗꠘ।