ꠝꠣꠝꠟꠣ-ꠝꠇꠖ꠆ꠖꠝꠣꠞ ꠛꠦꠙꠣꠞꠦ ꠢꠥꠡꠤꠀꠞ
৬
১ ꠔꠥꠝꠞꠣ ꠇꠦꠃꠞꠞ ꠎꠥꠖꠤ ꠇꠥꠘꠥ ꠁꠝꠣꠘꠖꠣꠞ ꠜꠣꠁꠞ ꠛꠤꠙꠇ꠆ꠇꠦ ꠘꠣꠟꠤꠡ ꠕꠣꠇꠦ,
ꠔꠦ ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠉꠦꠍꠦ ꠘꠣ ꠉꠤꠀ,
ꠢꠦ ꠇꠥꠘ ꠡꠣꠅꠡꠦ ꠛꠣꠁꠞꠣ ꠝꠣꠘꠡꠞ ꠉꠦꠍꠦ ꠛꠤꠌꠣꠞ ꠌꠣꠄ?
২ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠅꠃ ꠙꠣꠇ ꠛꠘ꠆ꠖꠣ ꠅꠇꠟꠦꠃ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠛꠣ?
ꠀꠞ ꠀꠡ꠆ꠔꠣ ꠎꠉꠔꠞ ꠛꠤꠌꠣꠞ ꠇꠞꠔꠦ ꠙꠣꠞꠟꠦ ꠅꠃ ꠝꠣꠝꠥꠟꠤ ꠛꠦꠙꠣꠞꠞ ꠚꠄꠍꠣꠟꠣ ꠇꠞꠔꠣꠄ ꠙꠣꠞ ꠘꠣ ꠘꠤ?
৩ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠀꠝꠞꠣ ꠚꠤꠞꠤꠡ꠆ꠔꠣ ꠅꠇꠟꠞꠅ ꠛꠤꠌꠣꠞ ꠇꠞꠝꠥ?
ꠔꠦ ꠖꠥꠘꠤꠀꠞ ꠛꠦꠙꠣꠞ ꠔ ꠇꠥꠘ꠆ꠔꠣꠃ ꠘꠣꠄ!
৪ ꠔꠥꠝꠞꠣꠞ ꠎꠦꠛꠟꠣ ꠅꠃ ꠟꠣꠈꠣꠘ ꠛꠤꠌꠣꠞ-ꠀꠌꠣꠞꠞ ꠎꠞꠥꠞ ꠅꠄ,
ꠅꠃ ꠡꠝꠄ ꠎꠝꠣꠔꠞ ꠛꠣꠁꠞꠣ ꠝꠣꠘꠡꠞꠦ ꠇꠦꠘꠦ ꠛꠤꠌꠣꠞꠞ ꠡꠣꠟꠤꠡ ꠛꠣꠘꠣꠅ?
৫ ꠀꠝꠤ ꠔ ꠔꠥꠝꠞꠣꠞꠦ ꠡꠞꠝ ꠖꠦꠅꠀꠞ ꠟꠣꠉꠤꠃ ꠟꠦꠈꠞꠣꠝ,
ꠔꠥꠝꠞꠣꠞ ꠝꠣꠎꠦ ꠁꠟꠣ ꠀꠈꠟꠖꠣꠞ ꠡꠣꠟꠤꠡ ꠄꠇꠎꠘꠅ ꠘꠣꠁ ꠘꠤ,
ꠎꠦꠁꠘ ꠔꠥꠝꠞꠣꠞ ꠘꠤꠎꠞ ꠝꠣꠎꠞ ꠉꠘ꠆ꠒꠉꠥꠟ ꠝꠤꠐ-ꠝꠣꠐ ꠇꠞꠔꠣ ꠙꠣꠞꠂꠘ?
৬ ꠀꠝꠤ ꠖꠦꠈꠞꠣꠝ,
ꠛꠤꠌꠣꠞꠞ ꠝꠎꠟꠤꠍꠅ ꠛꠁꠀꠅ ꠔꠥꠝꠞꠣ ꠜꠣꠁꠄ ꠜꠣꠁꠄ ꠇꠣꠁꠎ꠆ꠎꠣ ꠇꠞꠞꠣꠄ।
ꠔꠣ-ꠅ ꠀꠛꠣꠞ ꠅ-ꠁꠝꠣꠘꠖꠣꠞꠞ ꠍꠣꠝꠘꠦ!
৭ ꠀꠍꠟꠦ ꠔꠥꠝꠞꠣ ꠜꠣꠁꠄ ꠜꠣꠁꠄ ꠅꠃ ꠎꠦꠟꠣ ꠛꠤꠌꠣꠞ ꠡꠣꠟꠤꠡ ꠌꠣꠟꠣꠁꠞꠣꠄ,
ꠁꠔꠣꠄ ꠔ ꠔꠥꠝꠞꠣꠞ ꠘꠤꠎꠞꠃ ꠈꠦꠔꠤ ꠅꠞ।
ꠔꠥꠝꠞꠣ ꠁꠔꠣ ꠡꠁꠎ꠆ꠎ ꠇꠞꠅ ꠘꠣ ꠇꠦꠘꠦ ꠛꠣ ꠘꠤꠎꠦ ꠘꠤꠎꠦ ꠐꠉꠣ ꠈꠣꠅ ꠘꠣ ꠇꠦꠘꠦ?
৮ ꠛꠞꠋ ꠔꠥꠝꠞꠣ ꠘꠤꠎꠦꠃ ꠔ ꠅꠁꠘ꠆ꠘꠣꠄ ꠇꠞꠞꠣꠄ,
ꠝꠣꠘꠡꠞꠦ ꠐꠉꠤꠞꠣꠄ,
ꠀꠞ ꠁꠔꠣ ꠘꠤꠎꠞ ꠜꠣꠁꠞ ꠟꠉꠦꠃ ꠇꠞꠞꠣꠄ!
৯ ꠀꠍꠟꠦ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠀꠟ꠆ꠟꠣꠞ ꠛꠣꠖꠡꠣꠁꠔ ꠘꠣꠚꠞꠝꠣꠘ ꠈꠛꠤꠍ ꠅꠇꠟꠞ ꠇꠥꠘꠥ ꠑꠣꠁ ꠘꠣꠁ।
ꠔꠦ ꠔꠥꠝꠞꠣꠞ ꠜꠥꠟ ꠌꠤꠘ꠆ꠔꠣ ꠖꠥꠞ ꠅꠃꠇ,
ꠎꠦꠔꠣ ꠝꠣꠘꠡꠞ ꠡ꠆ꠛꠜꠣꠛ ꠈꠣꠞꠣꠙ,
ꠎꠦꠔꠣꠄ ꠎꠤꠘꠣ ꠇꠞꠂꠘ,
ꠝꠥꠞ꠆ꠔꠤꠙꠥꠎꠣ ꠇꠞꠂꠘ,
ꠉꠣꠐꠥꠀ ꠘꠣꠌꠣꠁꠘ,
ꠡꠝꠇꠣꠝꠤ,
১০ ꠌꠥꠞꠤ,
ꠟꠥꠜ-ꠟꠣꠟꠌꠤ,
ꠝꠖꠈꠥꠞ,
ꠉꠤꠛꠔ ꠉꠣꠅꠞꠣ ꠀꠞ ꠖꠈꠟꠛꠣꠎ,
ꠁꠔꠣ ꠝꠣꠘꠡꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁꠔ ꠑꠣꠁ ꠙꠣꠁꠔꠣ ꠘꠣꠄ।
১১ ꠔꠥꠝꠞꠣꠞ ꠝꠣꠎꠞ ꠇꠥꠘꠥ ꠇꠥꠘꠥ ꠎꠘꠅ ꠀꠉꠦ ꠅꠟꠣ ꠀꠍꠟꠣꠄ,
ꠅꠁꠟꠦ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠀꠞ ꠀꠝꠞꠣꠞ ꠀꠟ꠆ꠟꠣꠞ ꠞꠥꠢꠦ ꠔꠥꠝꠞꠣꠞꠦ ꠗꠁꠀ ꠍꠣꠚ ꠇꠞꠍꠦ,
ꠔꠥꠝꠞꠣꠞꠦ ꠙꠛꠤꠔ꠆ꠞ ꠇꠞꠣ ꠅꠁꠍꠦ ꠀꠞ ꠛꠦ-ꠇꠍꠥꠞ ꠈꠣꠟꠣꠍ ꠇꠁꠀ ꠉꠁꠘ꠆ꠘ ꠇꠞꠣ ꠅꠁꠍꠦ।
ꠢꠇꠟ ꠘꠝꠥꠘꠣꠞ ꠎꠤꠘꠣ ꠕꠣꠇꠤ ꠢꠥꠡꠤꠀꠞ
১২ ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ,
“ꠀꠝꠣꠞ ꠟꠣꠉꠤ ꠇꠥꠘ꠆ꠔꠣꠃ ꠢꠣꠞꠣꠝ ꠘꠣꠄ,
ꠢꠇ꠆ꠇꠟꠔꠣꠃ ꠎꠣꠁꠎ।”
ꠅꠁꠟꠦ ꠢꠇ꠆ꠇꠟꠔꠣ ꠎꠦꠘ ꠝꠣꠘꠡꠞ ꠟꠣꠉꠤ ꠃꠙꠇꠣꠞꠤ,
ꠁꠟꠣ ꠌꠤꠘ꠆ꠔꠣ ꠑꠤꠇ ꠘꠣꠄ।
ꠀꠝꠣꠞ ꠟꠣꠉꠤ ꠢꠇ꠆ꠇꠟꠔꠣ ꠎꠣꠁꠎ ꠅꠁꠟꠦꠅ,
ꠀꠝꠤ ꠇꠥꠘ꠆ꠔꠣꠞ ꠉꠥꠟꠣꠝ ꠅꠁꠔꠣꠝ ꠘꠣꠄ।
১৩ ꠇꠦꠃ ꠇꠦꠃ ꠇꠂꠘ,
“ꠙꠦꠐꠞ ꠟꠣꠉꠤ ꠈꠣꠘꠤ ꠀꠞ ꠈꠣꠘꠤꠞ ꠟꠣꠉꠤ ꠙꠦꠐ ꠖꠦꠅꠀ ꠅꠁꠍꠦ।”
ꠈꠥꠛ ꠡꠥꠘ꠆ꠖꠞ ꠇꠕꠣ,
ꠅꠁꠟꠦ ꠀꠟ꠆ꠟꠣꠄ ꠔ ꠁ ꠖꠥꠁꠅꠔꠣꠞ ꠛꠤꠘꠣꠡ ꠇꠞꠤꠟꠤꠛꠣ।
ꠝꠘꠅ ꠞꠣꠈꠤꠅ,
ꠡꠞꠤꠟ ꠔ ꠎꠤꠘꠣ ꠇꠞꠣꠞ ꠟꠣꠉꠤ ꠘꠣꠄ ꠛꠞꠋ ꠝꠣꠟꠤꠇ ꠁꠍꠣꠞ ꠟꠣꠉꠤꠃ,
ꠀꠞ ꠝꠣꠟꠤꠇ ꠁꠍꠣ ꠡꠞꠤꠟꠞ ꠟꠣꠉꠤ।
১৪ ꠀꠟ꠆ꠟꠣꠄ ꠔꠣꠘ ꠇꠥꠖꠞꠔꠤ ꠛꠟꠦ ꠝꠣꠟꠤꠇ ꠁꠍꠣꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ,
ꠀꠞ ꠅꠃ ꠛꠟꠦ ꠀꠝꠞꠣꠞꠦꠅ ꠎꠤꠘ꠆ꠖꠣ ꠇꠞꠛꠣ।
১৫ ꠔꠥꠝꠞꠣ ꠎꠣꠘꠅ ꠘꠣ ꠘꠤ,
ꠔꠥꠝꠞꠣꠞ ꠡꠞꠤꠟ ꠅꠁꠟ ꠀꠟ-ꠝꠍꠤꠞ ꠡꠞꠤꠟꠞ ꠅꠋꠉ?
ꠔꠦ ꠀꠟ-ꠝꠍꠤꠞ ꠡꠞꠤꠟꠞꠦ ꠀꠝꠤ ꠛꠖꠝꠣꠁꠡ ꠛꠦꠐꠤꠞ ꠡꠞꠤꠟꠞ ꠟꠉꠦ ꠝꠤꠟꠣꠁꠔꠣꠝ ꠘꠤ?
ꠘꠣꠃꠎꠥꠛꠤꠟ꠆ꠟꠣ,
ꠇꠥꠘꠥꠝꠘ꠆ꠔꠦꠃ ꠘꠣ!
১৬ ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠎꠦ ꠛꠦꠐꠣꠄ ꠛꠖꠝꠣꠁꠡ ꠛꠦꠐꠤꠞ ꠟꠉꠦ ꠝꠤꠟꠣ-ꠝꠤꠡꠣ ꠇꠞꠦ,
ꠔꠣꠞ ꠡꠞꠤꠟ ꠔ ꠅꠃ ꠛꠦꠐꠤꠞ ꠟꠉꠦ ꠄꠇꠈꠣꠘꠅ ꠝꠤꠟꠤꠎꠣꠄ।
ꠎꠦꠟꠣ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠅ ꠟꠦꠈꠣ ꠀꠍꠦ,
“ꠔꠣꠞꠣ ꠖꠥꠁꠅꠎꠘ ꠄꠇ ꠡꠞꠤꠟ ꠅꠁꠛꠣ।”
১৭ ꠅꠁꠟꠦ ꠎꠦ ꠎꠘ ꠝꠣꠟꠤꠇ ꠁꠍꠣꠞ ꠟꠉꠦ ꠝꠤꠟꠤꠎꠣꠄ,
ꠢꠦ ꠔꠣꠘ ꠟꠉꠦ ꠞꠥꠢꠦꠅ ꠄꠇ ꠅꠁꠎꠣꠄ।
১৮ ꠜꠣꠁꠀꠂꠘꠞꠦ,
ꠔꠥꠝꠞꠣ ꠢꠇꠟ ꠎꠣꠔꠞ ꠎꠤꠘꠣ ꠕꠣꠇꠤ ꠎꠣꠘ ꠛꠣꠌꠣꠅ।
ꠝꠣꠘꠡꠦ ꠛꠣꠖ-ꠛꠣꠇꠤ ꠎꠔ ꠉꠥꠘꠣ ꠇꠞꠦ,
ꠁꠔꠣ ꠡꠞꠤꠟꠞ ꠛꠣꠞꠦ ꠇꠞꠦ,
ꠅꠁꠟꠦ ꠎꠦꠉꠤꠄ ꠎꠤꠘꠣ ꠇꠞꠦ,
ꠢꠦ ꠔꠣꠞ ꠘꠤꠎꠞ ꠡꠞꠤꠟꠞ ꠛꠤꠞꠥꠖ꠆ꠖꠦ ꠉꠥꠘꠣ ꠇꠞꠦ।
১৯ ꠔꠥꠝꠞꠣ ꠛꠥꠎꠅ ꠘꠣ ꠘꠤ,
ꠔꠥꠝꠞꠣꠞ ꠡꠞꠤꠟ ꠅꠁꠟ ꠀꠟ꠆ꠟꠣꠁ ꠙꠣꠇ ꠞꠥꠢꠥꠞ ꠇꠣꠛꠣ ꠊꠞ,
ꠅꠃ ꠞꠥꠢꠥꠞꠦ ꠔꠥꠝꠞꠣ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠙꠣꠁꠍ,
ꠄꠁꠘ ꠔꠥꠝꠞꠣꠞ ꠖꠤꠟꠅ ꠛꠡꠔ ꠇꠞꠂꠘ।
ꠔꠥꠝꠣꠞ ꠡꠞꠤꠟ ꠔ ꠔꠥꠝꠣꠞ ꠘꠤꠎꠞ ꠡꠝ꠆ꠙꠖ ꠘꠣꠄ।
২০ ꠛꠃꠔ ꠖꠣꠝ ꠖꠤꠀ ꠔꠥꠝꠣꠞꠦ ꠈꠞꠤꠖ ꠇꠞꠣ ꠅꠁꠍꠦ।
ꠄꠞꠟꠣꠉꠤ ꠔꠥꠝꠣꠞ ꠡꠞꠤꠟꠞꠦ ꠀꠟ꠆ꠟꠣꠞ ꠉꠃꠞꠛꠞ ꠇꠣꠝꠅ ꠟꠣꠉꠣꠅ।