ꠁꠍꠣꠄꠁ ꠝꠥꠝꠤꠘ ꠀꠞ ꠖꠦꠛ-ꠖꠦꠛꠤꠞ ꠙꠥꠎꠣ (৮:১-১১:১)
ꠖꠦꠛꠔꠣꠞ ꠘꠣꠝꠞ ꠙꠡꠣꠖ ꠈꠣꠅꠀ
৮
১ ꠢꠥꠘꠅ,
ꠅꠈꠘ ꠀꠝꠤ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖꠞ ꠝꠥꠍꠟꠣꠞ ꠇꠕꠣ ꠇꠁꠞꠣꠝ।
ꠀꠝꠞꠣ ꠔ ꠎꠣꠘꠤ,
ꠀꠝꠞꠣ ꠢꠇꠟꠞꠃ ꠀꠈꠟ-ꠛꠥꠖ꠆ꠖꠤ ꠀꠍꠦ।
ꠅꠁꠟꠦ ꠀꠈꠟꠦ ꠛꠠꠣꠁ ꠛꠣꠠꠦ,
ꠀꠞ ꠝꠢꠛ꠆ꠛꠔꠦ ꠝꠣꠘꠥꠡ ꠉꠠꠦ।
২ ꠇꠦꠃ ꠎꠥꠖꠤ ꠘꠤꠎꠞꠦ ꠡꠤꠀꠘ ꠝꠘꠅ ꠇꠞꠦ,
ꠔꠦ ꠎꠔꠈꠣꠘ ꠡꠤꠀꠘ ꠅꠀ ꠎꠞꠥꠞ,
ꠅꠔꠈꠣꠘ ꠔ ꠅꠁꠍꠦ ꠘꠣ।
৩ ꠅꠁꠟꠦ ꠎꠦ ꠎꠘꠦ ꠀꠟ꠆ꠟꠣꠞꠦ ꠝꠢꠛ꠆ꠛꠔ ꠇꠞꠦ,
ꠀꠟ꠆ꠟꠣ ꠙꠣꠇꠦ ꠔ ꠔꠣꠞꠦ ꠌꠤꠘꠂꠘ।
৪ ꠔꠦ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖꠞ ꠛꠦꠙꠣꠞꠦ ꠇꠁꠞꠣꠝ,
ꠀꠝꠞꠣ ꠎꠣꠘꠤ,
ꠖꠦꠛꠔꠣ ꠛꠟꠔꠦ ꠁ ꠎꠉꠔꠅ ꠇꠥꠘ꠆ꠔꠣꠃ ꠘꠣꠁ,
ꠄꠇ ꠀꠟ꠆ꠟꠣ ꠍꠣꠠꠣ ꠖꠥꠍꠞꠣ ꠇꠥꠘ꠆ꠔꠣꠃ ꠘꠣꠁ।
৫ ꠀꠍꠝꠣꠘꠅ ꠛꠣ ꠎꠝꠤꠘꠅ ꠎꠦꠇꠥꠘꠥ ꠎꠣꠉꠣꠔ,
ꠖꠦꠛ-ꠖꠦꠛꠤ ꠘꠣꠝꠦ ꠎꠥꠖꠤ ꠇꠥꠘ꠆ꠔꠣ ꠕꠣꠇꠤꠀ ꠕꠣꠇꠦ,
ꠔꠦ ꠛꠃꠔ ꠖꠦꠛꠔꠣ ꠀꠞ ꠛꠃꠔ ꠝꠥꠘꠤꠛ ꠀꠍꠂꠘ।
৬ ꠅꠁꠟꠦ ꠀꠝꠞꠣꠞ ꠎꠣꠘꠣ ꠝꠔꠦ ꠈꠣꠟꠤ ꠄꠇ ꠀꠟ꠆ꠟꠣ ꠀꠍꠂꠘ,
ꠔꠣꠁꠘꠃ ꠀꠝꠞꠣꠞ ꠉꠣꠁꠛꠤ ꠛꠣꠚ।
ꠔꠣꠘ ꠀꠔꠦ ꠢꠇ꠆ꠇꠟꠔꠣ ꠙꠄꠖꠣ ꠅꠁꠍꠦ,
ꠔꠣꠘ ꠟꠣꠉꠤꠃ ꠀꠝꠞꠣ ꠛꠣꠌꠤꠀ ꠀꠍꠤ।
ꠑꠤꠇ ꠅꠃꠟꠣ ꠀꠝꠞꠣꠞ ꠝꠣꠟꠤꠇꠅ ꠈꠣꠟꠤ ꠄꠇꠎꠘ,
ꠔꠣꠘ ꠘꠣꠝ ꠁꠍꠣ ꠀꠟ-ꠝꠍꠤ।
ꠔꠣꠘ ꠃꠍꠤꠟ꠆ꠟꠣꠄ ꠢꠇ꠆ꠇꠟꠔꠣ ꠙꠄꠖꠣ ꠅꠁꠍꠦ,
ꠀꠝꠞꠣ ꠈꠣꠟꠤ ꠔꠣꠘ ꠟꠣꠉꠤꠃ ꠐꠤꠇꠤꠀ ꠀꠍꠤ।
৭ ꠁꠔꠣ ꠛꠥꠎꠣꠞ ꠀꠈꠟ ꠔ ꠢꠇꠟ ꠝꠣꠘꠡꠞ ꠘꠣꠁ।
ꠇꠥꠘꠥ ꠇꠥꠘꠥ ꠎꠘꠦ ꠀꠉꠦ ꠖꠦꠛꠔꠣꠞꠦ ꠜꠎꠘꠣ ꠇꠞꠔ,
ꠄꠞꠟꠣꠉꠤ ꠔꠣꠞꠣ ꠅꠈꠘ ꠖꠦꠛꠔꠣꠞ ꠘꠣꠝꠦ ꠛꠤꠟꠣꠁ ꠖꠦꠅꠀ ꠙꠡꠣꠖ ꠈꠣꠁꠟꠦ,
ꠔꠣꠞꠣꠞ ꠛꠤꠛꠦꠇꠞ ꠇꠝꠎꠥꠞꠤꠄ ꠔꠣꠞꠦ ꠇꠟꠋꠇꠤ ꠛꠣꠘꠣꠄ।
৮ ꠀꠍꠟꠦ ꠇꠥꠘꠥ ꠘꠝꠥꠘꠣꠞ ꠈꠣꠘꠤꠞ ꠛꠟꠦꠃ ꠀꠝꠞꠣ ꠀꠟ꠆ꠟꠣꠞ ꠖꠞꠛꠣꠞꠅ ꠇꠛꠥꠟ ꠅꠁ ꠘꠣ।
ꠈꠣꠘꠤ ꠘꠣ ꠈꠣꠁꠟꠦꠅ ꠀꠝꠞꠣꠞ ꠁꠝꠣꠘꠞ ꠈꠦꠔꠤ ꠅꠄ ꠘꠣ,
ꠀꠞ ꠈꠣꠁꠟꠦꠅ ꠇꠥꠘꠥ ꠟꠣꠜ ꠅꠄ ꠘꠣ।
৯ ꠅꠁꠟꠦ ꠢꠥꠡꠤꠀꠞ ꠞꠁꠅ,
ꠔꠥꠝꠞꠣꠞ ꠅꠃ ꠡ꠆ꠛꠣꠗꠤꠘꠔꠣ ꠇꠥꠘꠥꠝꠘ꠆ꠔꠦꠃ ꠎꠣꠘꠥ ꠇꠝꠎꠥꠞ ꠁꠝꠣꠘꠖꠣꠞꠞ ꠟꠣꠉꠤ ꠉꠥꠘꠣꠞ ꠇꠣꠞꠘ ꠘꠣ ꠅꠄ।
১০ ꠔꠥꠝꠣꠞ ꠔ ꠀꠈꠟ-ꠛꠤꠛꠦꠇ ꠀꠍꠦ,
ꠅꠁꠟꠦ ꠎꠣꠞ ꠛꠤꠛꠦꠇ ꠇꠝꠎꠥꠞ,
ꠢꠦ ꠎꠥꠖꠤ ꠔꠥꠝꠣꠞꠦ ꠖꠦꠛꠔꠣꠞ ꠝꠘ꠆ꠖꠤꠞꠅ ꠛꠁꠀ ꠙꠡꠣꠖ ꠈꠣꠅꠀꠔ ꠖꠦꠈꠦ,
ꠔꠦ ꠢꠦ-ꠅ ꠅꠃ ꠙꠡꠣꠖ ꠈꠣꠁꠔ ꠘꠣꠄ ꠘꠤ?
১১ ꠀꠞ ꠅꠃ ꠇꠝꠎꠥꠞ ꠜꠣꠁꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠔ ꠀꠟ-ꠝꠍꠤꠄ ꠎꠣꠘ ꠇꠥꠞꠛꠣꠘꠤ ꠖꠤꠍꠟꠣ,
ꠅꠈꠘ ꠔꠥꠝꠣꠞ ꠅꠃ ꠀꠈꠟꠦ ꠔꠣꠞ ꠁꠝꠣꠘꠞ ꠡꠞꠛꠘꠣꠡ ꠅꠞ।
১২ ꠅꠟꠣꠈꠣꠘ ꠔꠥꠝꠞꠣ ꠎꠦꠛꠟꠣ ꠔꠥꠝꠞꠣꠞ ꠝꠥꠝꠤꠘ ꠜꠣꠁꠀꠂꠘ꠆ꠔꠞ ꠟꠉꠦ ꠉꠥꠘꠣꠞ ꠇꠣꠝ ꠇꠞꠅ,
ꠔꠣꠞꠣꠞ ꠇꠝꠎꠥꠞ ꠛꠤꠛꠦꠇꠞꠦ ꠖꠥꠈ ꠖꠦꠅ,
ꠅꠃ ꠡꠝꠄ ꠔꠥꠝꠞꠣ ꠀꠟ-ꠝꠍꠤꠞ ꠛꠤꠞꠥꠖ꠆ꠖꠦꠃ ꠉꠥꠘꠣ ꠇꠞꠅ।
১৩ ꠄꠞꠟꠣꠉꠤ ꠀꠝꠤ ꠇꠁꠞꠣꠝ,
ꠈꠣꠘꠣ-ꠙꠤꠘꠣꠞ ꠇꠣꠞꠘꠦ ꠎꠥꠖꠤ ꠀꠝꠣꠞ ꠜꠣꠁꠞ ꠁꠝꠣꠘꠞ ꠈꠦꠔꠤ ꠅꠄ,
ꠔꠦ ꠔꠣꠞꠦ ꠉꠥꠘꠣ ꠕꠣꠇꠤ ꠛꠣꠌꠣꠘꠤꠞ ꠟꠣꠉꠤ ꠀꠝꠤ ꠉꠥꠡ꠆ꠔ ꠈꠣꠅꠀꠅ ꠄꠇ꠆ꠇꠦꠞꠦ ꠛꠣꠖ ꠖꠤꠟꠣꠁꠝꠥ।