ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠀ ꠃꠑꠣ (১৫:১-৫৮)
ꠁꠍꠣ ꠀꠟ-ꠝꠍꠤ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍꠂꠘ
১৫
১ ꠅ ꠝꠥꠝꠤꠘ ꠜꠣꠁ ꠅꠇꠟ,
ꠀꠝꠤ ꠀꠉꠦ ꠎꠦ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠍꠤꠟꠣꠝ,
ꠢꠃ ꠇꠕꠣ ꠅꠈꠘ ꠁꠀꠖ ꠇꠞꠣꠁ ꠖꠤꠞꠣꠝ।
ꠔꠥꠝꠞꠣ ꠔ ꠁꠔꠣ ꠇꠛꠥꠟ ꠇꠞꠍꠟꠣꠄ ꠀꠞ ꠁꠝꠣꠘꠦ ꠐꠤꠇꠤꠀꠅ ꠞꠁꠍ।
২ ꠀꠝꠤ ꠎꠦ ꠇꠣꠟꠣꠝ ꠔꠛꠟꠤꠉ ꠇꠞꠍꠤ,
ꠁꠔꠣ ꠎꠥꠖꠤ ꠔꠥꠝꠞꠣ ꠝꠎꠛꠥꠔ ꠇꠞꠤ ꠗꠞꠤꠀ ꠞꠣꠈꠅ,
ꠔꠦ ꠅꠃ ꠈꠥꠡ-ꠈꠛꠞꠤꠞ ꠝꠣꠎꠖꠤ ꠘꠣꠎꠣꠔ ꠙꠣꠁꠞꠣꠄ,
ꠀꠞ ꠘꠣ ꠙꠣꠁꠟꠦ ꠔꠥꠝꠞꠣꠞ ꠁꠝꠣꠘ ꠀꠘꠣꠞ ꠛꠦꠇꠣꠝꠣ।
৩ ꠀꠍꠟꠦ ꠀꠝꠤ ꠘꠤꠎꠦ ꠎꠦ ꠔꠣꠟꠤꠝ ꠙꠣꠁꠍꠤ,
ꠅꠃ ꠔꠣꠟꠤꠝꠞꠦ ꠈꠥꠛ ꠎꠞꠥꠞꠤ ꠝꠘꠅ ꠇꠞꠤꠀ ꠔꠥꠝꠞꠣꠞꠦꠅ ꠎꠣꠘꠣꠁꠍꠤ।
ꠀꠟ꠆ꠟꠣꠞ ꠇꠣꠟꠣꠝ ꠝꠣꠚꠤꠇ ꠀꠝꠞꠣꠞ ꠉꠥꠘꠣꠞ ꠝꠣꠚꠤꠞ ꠟꠣꠉꠤ ꠀꠟ-ꠝꠍꠤꠄ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠤꠍꠂꠘ।
৪ ꠔꠣꠘꠞꠦ ꠖꠣꠚꠘ ꠇꠞꠣ ꠅꠁꠍꠤꠟ,
ꠀꠞ ꠀꠟ꠆ꠟꠣꠞ ꠇꠣꠟꠣꠝ ꠝꠣꠚꠤꠇ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠔꠣꠁꠘ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠅꠁꠍꠂꠘ।
৫ ꠎꠤꠘ꠆ꠖꠣ ꠅꠀꠞ ꠛꠣꠖꠦ ꠔꠣꠁꠘ ꠙꠄꠟꠣ ꠍꠣꠢꠣꠛꠤ ꠙꠤꠔꠞꠞꠦ,
ꠛꠣꠖꠦ ꠔꠣꠘ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠖꠦꠈꠣ ꠖꠤꠍꠂꠘ।
৬ ꠄꠞꠛꠣꠖꠦ ꠔꠣꠁꠘ ꠄꠇꠟꠉꠦ ꠙꠣꠌꠡꠞꠅ ꠛꠦꠡꠤ ꠝꠥꠝꠤꠘ ꠜꠣꠁꠞꠦ ꠖꠦꠈꠣ ꠖꠤꠍꠂꠘ।
ꠄꠞꠣꠞ ꠝꠣꠎꠦ ꠇꠦꠃ ꠇꠦꠃ ꠝꠣꠞꠣ ꠉꠦꠟꠦꠅ,
ꠅꠈꠘꠅ ꠛꠦꠡꠤꠞ ꠜꠣꠉ ꠎꠤꠘ꠆ꠖꠣ ꠀꠍꠂꠘ।
৭ ꠄꠞꠛꠣꠖꠦ ꠔꠣꠘ ꠜꠣꠁ ꠁꠀꠇꠥꠛꠞꠦ,
ꠛꠣꠖꠦ ꠢꠇꠟ ꠍꠣꠢꠣꠛꠤꠞꠦ ꠖꠦꠈꠣ ꠖꠤꠍꠂꠘ।
৮ ꠀꠞ ꠀꠝꠤ ꠔ ꠢꠇꠟꠞ ꠢꠦꠡꠞ ꠏꠥꠟꠤ-ꠏꠣꠠꠣ ꠙꠥꠔ,
ꠅꠃ ꠀꠝꠣꠞꠦꠅ ꠔꠣꠁꠘ ꠖꠦꠈꠣ ꠖꠤꠍꠂꠘ।
৯ ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠀꠝꠤꠃ ꠢꠇꠟ ꠕꠣꠇꠤ ꠘꠉꠁꠘ꠆ꠘ,
ꠀꠝꠤ ꠔ ꠍꠣꠢꠣꠛꠤ ꠇꠁꠀ ꠙꠞꠤꠌꠄ ꠖꠤꠛꠣꠞ ꠟꠣꠈ ꠘꠣꠄ,
ꠀꠉꠦ ꠀꠝꠤ ꠀꠟ꠆ꠟꠣꠞ ꠎꠝꠣꠔꠞ ꠃꠙꠞꠦ ꠎꠥꠟꠥꠝ ꠇꠞꠔꠣꠝ।
১০ ꠅꠁꠟꠦ ꠅꠈꠘ ꠀꠝꠤ ꠎꠦꠟꠣ ꠅꠁꠍꠤ,
ꠁꠔꠣ ꠀꠟ꠆ꠟꠣꠞ ꠞꠢꠝꠔꠦꠃ ꠅꠁꠍꠤ।
ꠀꠝꠣꠞ ꠃꠙꠞꠦ ꠔꠣꠘ ꠁ ꠞꠢꠝꠔ ꠛꠦꠇꠣꠝꠣ ꠉꠦꠍꠦ ꠘꠣ,
ꠀꠝꠤ ꠅꠁꠘ꠆ꠘ ꠍꠣꠢꠣꠛꠤ ꠅꠇꠟ ꠕꠣꠇꠤ ꠛꠦꠡꠤ ꠝꠦꠘꠔ ꠇꠞꠍꠤ।
ꠁ ꠝꠦꠘꠔ ꠔ ꠀꠝꠤ ꠘꠤꠎꠦ ꠘꠤꠎꠦ ꠇꠞꠔꠣꠝ ꠙꠣꠞꠍꠤ ꠘꠣ,
ꠛꠞꠋ ꠀꠟ꠆ꠟꠣꠞ ꠞꠢꠝꠔꠦꠃ ꠁꠔꠣ ꠇꠞꠣꠁꠍꠦ।
১১ ꠄꠞꠟꠣꠉꠤ ꠀꠝꠤ ꠛꠣ ꠅꠁꠘ꠆ꠘ ꠇꠥꠘꠥ ꠍꠣꠢꠣꠛꠤꠄ ꠎꠦꠁꠘꠃ ꠔꠛꠟꠤꠉ ꠇꠞꠤ ꠘꠣ ꠇꠦꠘꠦ,
ꠀꠝꠞꠣ ꠅꠃ ꠄꠇꠁ ꠛꠦꠙꠣꠞꠦꠃ ꠔꠛꠟꠤꠉ ꠇꠞꠤꠀꠞ,
ꠁꠔꠣ ꠢꠥꠘꠤꠀ ꠔꠥꠝꠞꠣꠅ ꠁꠝꠣꠘ ꠀꠘꠍ।
ꠀꠝꠞꠣ ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠁꠝꠥ
১২ ꠔꠦ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠦ ꠇꠁꠀ ꠎꠦꠛꠟꠣ ꠔꠛꠟꠤꠉ ꠇꠞꠣ ꠅꠄ,
ꠔꠣꠁꠟꠦ ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠇꠦꠝꠘꠦ ꠇꠄ,
ꠝꠣꠘꠥꠡ ꠝꠞꠤꠉꠦꠟꠦ ꠀꠞ ꠎꠤꠘ꠆ꠖꠣ ꠅꠁꠔꠣ ꠘꠣꠄ?
১৩ ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠔꠦ ꠘꠣ ꠙꠣꠞꠟꠦ ꠔ,
ꠀꠟ-ꠝꠍꠤꠅ ꠎꠤꠘ꠆ꠖꠣ ꠅꠁꠍꠂꠘ ꠘꠣ।
১৪ ꠀꠞ ꠀꠟ-ꠝꠍꠤ ꠎꠤꠘ꠆ꠖꠣ ꠅꠁꠀ ꠘꠣ ꠃꠑꠟꠦ ꠔ ꠀꠝꠞꠣꠞ ꠔꠛꠟꠤꠉꠅ ꠛꠦꠇꠣꠝꠣ ꠀꠞ ꠔꠥꠝꠞꠣꠞ ꠁꠝꠣꠘ ꠀꠘꠣꠅ ꠛꠦꠇꠣꠝꠣ।
১৫ ꠄꠝꠘꠇꠤ ꠅꠈꠣꠘꠅ ꠛꠥꠎꠣ ꠎꠣꠞ ꠎꠦꠘ,
ꠀꠟ꠆ꠟꠣꠞ ꠛꠦꠙꠣꠞꠦ ꠀꠝꠞꠣ ꠎꠦꠔꠣ ꠔꠛꠟꠤꠉ ꠇꠞꠤꠀꠞ ꠁꠔꠣ ꠝꠤꠍꠣ,
ꠇꠣꠞꠘ ꠀꠝꠞꠣꠞ ꠔꠛꠟꠤꠉ ꠅꠁꠟ,
ꠀꠟ꠆ꠟꠣꠄ ꠀꠟ-ꠝꠍꠤꠞꠦ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠍꠂꠘ।
ꠅꠁꠟꠦ ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ,
ꠔꠦ ꠔ ꠔꠣꠁꠘ ꠀꠟ-ꠝꠍꠤꠞꠦꠅ ꠎꠤꠘ꠆ꠖꠣ ꠇꠞꠍꠂꠘ ꠘꠣ।
১৬ ꠀꠞ ꠝꠥꠞ꠆ꠖꠣ ꠅꠇꠟ ꠎꠥꠖꠤ ꠎꠤꠘ꠆ꠖꠣ ꠅꠁꠀ ꠘꠣ ꠃꠑꠂꠘ,
ꠔꠦ ꠔ ꠀꠟ-ꠝꠍꠤꠅ ꠎꠤꠘ꠆ꠖꠣ ꠅꠁꠀ ꠃꠑꠍꠂꠘ ꠘꠣ।
১৭ ꠀꠟ-ꠝꠍꠤꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠁꠀꠃ ꠕꠣꠇꠦ,
ꠔꠦ ꠔ ꠔꠥꠝꠞꠣꠞ ꠁꠝꠣꠘ ꠛꠦꠇꠣꠝꠣ,
ꠀꠞ ꠔꠥꠝꠞꠣ ꠅꠈꠘꠅ ꠉꠥꠘꠣꠞ ꠝꠣꠎꠦ ꠢꠣꠛꠥ-ꠒꠥꠛꠥ ꠈꠣꠁꠞꠣꠄ।
১৮ ꠔꠣꠁꠟꠦ ꠀꠟ-ꠝꠍꠤꠞ ꠔꠞꠤꠇꠣꠞ ꠎꠦꠞꠣꠞ ꠝꠃꠔ ꠅꠁꠉꠦꠍꠦ,
ꠔꠣꠞꠣꠅ ꠔ ꠛꠤꠘꠣꠡ ꠅꠁꠉꠦꠍꠂꠘ।
১৯ ꠀꠟ-ꠝꠍꠤꠞ ꠃꠙꠞꠦ ꠀꠝꠞꠣꠞ ꠎꠦ ꠀꠡꠣ,
ꠁ ꠀꠡꠣ ꠎꠥꠖꠤ ꠈꠣꠟꠤ ꠅꠃ ꠖꠥꠘꠤꠀꠛꠤ ꠎꠤꠘ꠆ꠖꠦꠉꠤꠞ ꠟꠣꠉꠤ ꠅꠄ,
ꠔꠦ ꠔ ꠢꠇꠟ ꠕꠣꠇꠤ ꠀꠝꠞꠣꠞꠃ ꠛꠦꠡꠤ ꠛꠖ ꠘꠍꠤꠛ।
২০ ꠅꠁꠟꠦ ꠀꠍꠟ ꠇꠕꠣ ꠅꠁꠟ,
ꠀꠟ-ꠝꠍꠤꠞꠦ ꠔ ꠢꠣꠍꠣꠃ ꠝꠥꠞ꠆ꠖꠣ ꠕꠣꠇꠤ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
ꠔꠣꠁꠘꠃ ꠙꠄꠟꠣ ꠚꠡꠟ,
ꠝꠥꠞ꠆ꠖꠣ ꠕꠣꠇꠤ ꠎꠔ ꠎꠘꠞꠦ ꠎꠤꠘ꠆ꠖꠣ ꠇꠞꠣ ꠅꠁꠛ,
ꠄꠞꠣꠞ ꠝꠣꠎꠦ ꠔꠣꠘꠞꠦꠃ ꠙꠄꠟꠣ ꠎꠤꠘ꠆ꠖꠣ ꠇꠞꠣ ꠅꠁꠍꠦ।
২১ ꠛꠥꠎꠞꠣꠄ ꠘꠤ,
ꠄꠇꠎꠘ ꠝꠣꠘꠡꠞ ꠝꠣꠎꠖꠤ ꠎꠦꠟꠣ ꠝꠃꠔ ꠀꠁꠍꠦ,
ꠅꠟꠣ ꠎꠤꠘ꠆ꠖꠣ ꠅꠁꠀ ꠃꠑꠣꠅ ꠄꠇꠎꠘ ꠝꠣꠘꠡꠞ ꠝꠣꠎꠖꠤ ꠀꠁꠍꠦ।
২২ ꠛꠣꠛꠣ ꠀꠖꠝꠞ ꠀꠅꠟꠣꠖ ꠢꠤꠡꠣꠛꠦ ꠢꠇꠟ ꠝꠣꠘꠡꠞ ꠎꠦꠟꠣ ꠝꠞꠘ ꠅꠄ,
ꠀꠟ-ꠝꠍꠤꠞ ꠃꠝ꠆ꠝꠔ ꠢꠤꠡꠣꠛꠦ ꠅꠃꠟꠣ ꠢꠇꠟꠞꠦ ꠎꠤꠘ꠆ꠖꠣ ꠇꠞꠣ ꠅꠁꠛ।
২৩ ꠅꠁꠟꠦ ꠄꠞ ꠝꠣꠎꠦ ꠇꠕꠣ ꠀꠍꠦ,
ꠀꠟ꠆ꠟꠣꠄ ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠗꠣꠙꠦ ꠗꠣꠙꠦ ꠢꠇꠟꠔꠣ ꠇꠞꠣꠁꠛꠣ।
ꠈꠦꠔꠅ ꠕꠣꠇꠤ ꠙꠄꠟꠣ ꠔꠥꠟꠣ ꠚꠡꠟꠞ ꠟꠣꠈꠣꠘ ꠙꠄꠟꠣ ꠗꠣꠙꠅ ꠀꠟ-ꠝꠍꠤꠞꠦ ꠎꠤꠘ꠆ꠖꠣ ꠇꠞꠣ ꠅꠁꠍꠦ,
ꠛꠣꠖꠦ ꠔꠣꠁꠘ ꠖꠥꠍꠞꠣꠛꠣꠞ ꠔꠡꠞꠤꠚ ꠀꠘꠣꠞ ꠇꠣꠟꠅ ꠔꠣꠘ ꠃꠝ꠆ꠝꠔ ꠅꠇꠟꠞꠦꠅ ꠎꠤꠘ꠆ꠖꠣ ꠇꠞꠣ ꠅꠁꠛ।
২৪ ꠄꠞꠛꠣꠖꠦ ꠇꠤꠀꠝꠔꠞ ꠇꠣꠟꠅ ꠀꠟ-ꠝꠍꠤꠄ ꠖꠥꠘꠤꠀꠛꠤ ꠢꠇꠟ ꠡꠣꠡꠘ,
ꠅꠗꠤꠇꠣꠞ ꠀꠞ ꠈꠦꠝꠔꠣꠞꠦ ꠛꠤꠘꠣꠡ ꠇꠞꠤꠀ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠀꠔꠅ ꠛꠣꠖꠡꠣꠁ ꠡꠝꠎꠣꠁꠛꠣ।
২৫ ꠇꠣꠞꠘ,
ꠀꠟ꠆ꠟꠣꠄ ꠎꠔ ꠡꠝꠄ ꠙꠞ꠆ꠎꠘ꠆ꠔ ꠀꠟ-ꠝꠍꠤꠞ ꠢꠇꠟ ꠖꠥꠡꠝꠘꠞꠦ ꠔꠣꠘ ꠙꠣꠅꠞ ꠔꠟꠣꠔ ꠘꠣ ꠚꠣꠟꠣꠁꠘ,
ꠅꠔ ꠡꠝꠄ ꠙꠞ꠆ꠎꠘ꠆ꠔ ꠔꠣꠁꠘ ꠛꠣꠖꠡꠣꠁ ꠇꠞꠔꠦ ꠅꠁꠛ।
২৬ ꠀꠞ ꠡꠦꠡ ꠖꠥꠡꠝꠘ ꠝꠃꠔꠞꠦꠅ ꠔꠣꠁꠘ ꠛꠤꠘꠣꠡ ꠇꠞꠛꠣ।
২৭ ꠙꠛꠤꠔ꠆ꠞ ꠎꠛꠥꠞ ꠡꠞꠤꠚꠅ ꠀꠍꠦ,
“ꠔꠣꠁꠘ ꠢꠇ꠆ꠇꠟꠔꠣꠞꠦꠃ ꠀꠟ-ꠝꠍꠤꠞ ꠙꠣꠅꠞ ꠔꠟꠣꠔ ꠞꠣꠈꠍꠂꠘ।”
ꠔꠦ ꠛꠥꠎꠣ ꠎꠣꠄ,
ꠢꠇ꠆ꠇꠟꠔꠣꠞꠦ ꠀꠟ-ꠝꠍꠤꠞ ꠅꠗꠤꠘꠦ ꠞꠣꠈꠣꠞ ꠝꠣꠘꠤ ꠅꠁꠟ,
ꠀꠟ꠆ꠟꠣꠄ ꠔꠣꠘ ꠘꠤꠎꠞꠦ ꠛꠣꠖ ꠞꠣꠈꠤꠀ ꠅꠁꠘ꠆ꠘ ꠢꠇꠟꠔꠣꠞꠦꠃ ꠀꠟ-ꠝꠍꠤꠞ ꠔꠟꠦ ꠞꠣꠈꠍꠂꠘ।
২৮ ꠀꠞ ꠢꠇ꠆ꠇꠟꠔꠣ ꠔꠣꠘ ꠅꠗꠤꠘꠦ ꠀꠁꠀ ꠢꠣꠞꠟꠦ,
ꠢꠇ꠆ꠇꠟꠔꠣꠞꠦ ꠟꠁꠀ ꠅꠃ ꠈꠣꠍ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠅ ꠀꠟ꠆ꠟꠣ ꠙꠣꠇꠞ ꠅꠗꠤꠘ ꠅꠁꠛꠣ।
ꠎꠣꠔꠦ ꠎꠦꠁꠘ ꠢꠇꠟꠔꠣ ꠔꠣꠘ ꠅꠗꠤꠘꠦ ꠞꠣꠈꠍꠤꠟꠣ,
ꠢꠃ ꠀꠟ꠆ꠟꠣ ꠙꠣꠇꠃ ꠢꠇ꠆ꠇꠟꠔꠣꠞ ꠃꠙꠞꠀꠟꠣ ꠅꠁꠘ।
২৯ ꠀꠁꠌ꠆ꠍꠣ ꠗꠞꠅ,
ꠝꠥꠞ꠆ꠖꠣ ꠅꠇꠟꠞ ꠟꠣꠉꠤ ꠎꠦꠞꠣ ꠔꠃꠛꠣꠞ ꠉꠥꠍꠟ ꠇꠞꠦꠞ,
ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠇꠥꠘꠥꠖꠤꠘꠃ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ,
ꠔꠦ ꠄꠞꠣꠞ ꠚꠣꠄꠖꠣ ꠇꠤꠔꠣ?
৩০ ꠀꠞ ꠀꠝꠞꠣ ꠍꠣꠢꠣꠛꠤ ꠅꠇꠟꠅ ꠇꠦꠘꠦ ꠊꠘ꠆ꠐꠣꠄ ꠊꠘ꠆ꠐꠣꠄ ꠛꠤꠙꠖꠞ ꠝꠥꠈꠣ-ꠝꠥꠈꠤ ꠅꠁꠀꠞ?
৩১ ꠅꠄ,
ꠜꠣꠁ ꠅꠇꠟ,
ꠀꠝꠤ ꠔ ꠙꠞꠔꠦꠇ ꠖꠤꠘꠃ ꠝꠃꠔꠞ ꠝꠥꠈꠣ-ꠝꠥꠈꠤ ꠅꠁꠀꠞ!
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠘꠣꠝꠦ ꠔꠥꠝꠞꠣꠞꠦ ꠟꠁꠀ ꠎꠦ ꠛꠠꠣꠁ ꠖꠦꠈꠣꠁ,
ꠅꠃ ꠛꠠꠣꠁꠞ ꠟꠣꠉꠤꠃ ꠀꠝꠤ ꠔꠥꠝꠞꠣꠞꠦ ꠁꠔꠣ ꠎꠣꠘꠣꠁꠞꠣꠝ।
৩২ ꠁꠚꠤꠍ ꠐꠣꠃꠘꠅ ꠎꠋꠟꠤ ꠎꠣꠘꠥꠀꠞ ꠙꠣꠟꠞ ꠟꠉꠦ ꠀꠝꠤ ꠎꠦ ꠟꠣꠠꠣꠁ ꠇꠞꠍꠤ,
ꠁꠔꠣ ꠎꠥꠖꠤ ꠈꠣꠟꠤ ꠖꠥꠘꠤꠀꠛꠤ ꠘꠤꠅꠔꠦ ꠇꠞꠤꠀ ꠕꠣꠇꠤ,
ꠔꠦ ꠀꠝꠣꠞ ꠇꠥꠘꠥ ꠟꠣꠜ ꠅꠁꠍꠦ ꠘꠤ?
ꠝꠥꠞ꠆ꠖꠣ ꠅꠇꠟꠞꠦ ꠎꠥꠖꠤ ꠎꠤꠘ꠆ꠖꠣ ꠇꠞꠣ ꠘꠣ ꠅꠄ,
ꠔꠦ ꠀꠅ,
ꠅꠟꠣ ꠇꠁ,
“ꠀꠅ,
ꠈꠣꠅ-ꠖꠣꠅ ꠚꠥꠞ꠆ꠔꠤ ꠇꠞꠅ,
ꠇꠣꠁꠟ ꠔ ꠘꠤꠌ꠆ꠌꠤꠔ ꠝꠞꠘ ꠅꠁꠛ।”
৩৩ ꠜꠣꠁꠀꠂꠘꠞꠦ,
ꠔꠥꠝꠞꠣ ꠜꠥꠟ ꠇꠞꠤꠅ ꠘꠣ,
ꠅꠟꠣ ꠄꠇ ꠍꠤꠟ꠆ꠟꠦꠈ ꠀꠍꠦ,
“ꠇꠥ-ꠡꠋꠉꠤꠄ ꠜꠣꠟꠣ ꠝꠣꠘꠡꠞꠦꠅ ꠘꠣꠐꠣꠁꠟꠣꠄ।”
৩৪ ꠄꠞꠟꠣꠉꠤ ꠔꠥꠝꠞꠣ ꠛꠖ ꠘꠤꠡꠣ ꠕꠣꠇꠤ ꠢꠎꠣꠉ ꠅꠅ,
ꠀꠞ ꠉꠥꠘꠣ ꠇꠞꠤꠅ ꠘꠣ।
ꠔꠥꠝꠞꠣꠞ ꠝꠣꠎꠞ ꠇꠦꠃ ꠇꠦꠃ ꠔ ꠡ꠆ꠛꠄꠅꠋ ꠀꠟ꠆ꠟꠣꠞꠦꠃ ꠌꠤꠘꠦ ꠘꠣ,
ꠁꠔꠣ ꠛꠠ ꠡꠞꠝꠞ ꠛꠦꠙꠣꠞ।
৩৫ ꠇꠥꠘꠥ ꠇꠥꠘꠥ ꠝꠣꠘꠡꠦ ꠎꠤꠇꠣꠁꠔ ꠙꠣꠞꠦ,
“ꠝꠥꠞ꠆ꠖꠣ ꠅꠇꠟ ꠇꠦꠝꠘꠦ ꠎꠤꠘ꠆ꠖꠣ ꠅꠁꠛꠣ?
ꠔꠣꠞꠣꠞ ꠡꠞꠤꠟꠞ ꠉꠑꠘ ꠇꠤꠟꠣꠈꠣꠘ ꠅꠁꠛ?”
৩৬ ꠢꠣꠄꠞꠦ ꠛꠦꠀꠈꠟ!
ꠔꠥꠝꠣꠞ ꠘꠤꠎꠞ ꠈꠦꠔꠞ ꠝꠣꠎꠦ ꠎꠦ ꠛꠤꠌꠤ ꠛꠣꠁꠘ ꠇꠞꠅ,
ꠁ ꠛꠤꠌꠤ ꠘꠣ ꠝꠞꠟꠦ ꠔ ꠌꠦꠞꠣ ꠃꠑꠦ ꠘꠣ।
৩৭ ꠀꠞ ꠔꠥꠝꠣꠞ ꠛꠣꠁꠘ ꠇꠞꠣ ꠛꠤꠌꠤ ꠕꠣꠇꠤ ꠎꠦ ꠌꠦꠞꠣ ꠛꠣꠞꠅꠄ,
ꠔꠥꠝꠤ ꠔ ꠁ ꠌꠦꠞꠣ ꠛꠣꠁꠘ ꠇꠞꠅ ꠘꠣ,
ꠔꠥꠝꠤ ꠈꠣꠟꠤ ꠛꠤꠌꠤ ꠛꠣꠁꠘ ꠇꠞꠅ ꠗꠣꠘ ꠛꠣ ꠅꠁꠘ꠆ꠘ ꠇꠥꠘꠥ ꠚꠡꠟꠞ,
ꠅꠉꠥ ꠝꠞꠤꠀꠃ ꠌꠦꠞꠣ ꠛꠣꠞꠅꠄ।
৩৮ ꠛꠣꠖꠦ ꠀꠟ꠆ꠟꠣꠄ ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠁꠔꠣꠞ ꠍꠥꠞꠔ-ꠀꠇꠣꠞ ꠉꠑꠘ ꠇꠞꠂꠘ।
ꠔꠣꠁꠘ ꠙꠞꠔꠦꠇ ꠛꠤꠌꠞꠦꠃ ꠔꠣꠞ ꠎꠣꠔ ꠝꠣꠚꠤꠇ ꠌꠦꠞꠣꠞ ꠍꠥꠞꠔ-ꠀꠇꠣꠞ ꠖꠦꠁꠘ।
৩৯ ꠛꠥꠎꠅ ꠘꠣ ꠘꠤ,
ꠢꠇꠟ ꠎꠣꠘꠖꠣꠞꠞ ꠉꠥꠡ꠆ꠔ ꠔ ꠄꠇ ꠡꠝꠣꠘ ꠘꠣꠄ।
ꠝꠣꠘꠡꠞ ꠉꠥꠡ꠆ꠔ ꠄꠇꠟꠣꠈꠣꠘ,
ꠙꠡꠥꠞ ꠄꠇꠟꠣꠈꠣꠘ,
ꠙꠣꠈꠤꠞ ꠄꠇꠟꠣꠈꠣꠘ ꠀꠞ ꠝꠣꠍꠞ ꠀꠞꠇ ꠟꠣꠈꠣꠘ।
৪০ ꠅꠃꠟꠣ ꠀꠍꠝꠣꠘꠅ-ꠅ ꠛꠃꠔ ꠘꠝꠥꠘꠣꠞ ꠡꠞꠤꠟ ꠀꠍꠦ,
ꠖꠥꠘꠤꠀꠔꠅ ꠛꠃꠔ ꠡꠞꠤꠟ ꠀꠍꠦ,
ꠔꠣ-ꠅ ꠛꠦꠢꠦꠡ꠆ꠔꠤ ꠡꠞꠤꠟꠞ ꠔꠦꠎ ꠄꠇꠟꠣꠈꠣꠘ,
ꠀꠞ ꠖꠥꠘꠤꠀꠛꠤ ꠡꠞꠤꠟꠞ ꠔꠦꠎ ꠀꠞꠇ ꠟꠣꠈꠣꠘ।
৪১ ꠡꠥꠞꠥꠎꠞ ꠔꠦꠎ ꠄꠇꠟꠣꠈꠣꠘ,
ꠌꠣꠘ꠆ꠖꠞ ꠔꠦꠎ ꠀꠞꠇ ꠟꠣꠈꠣꠘ ꠀꠞ ꠔꠦꠞꠣꠞ ꠔꠦꠎ ꠖꠥꠍꠞꠣ ꠟꠣꠈꠣꠘ।
ꠄꠝꠘꠇꠤ ꠄꠇ ꠔꠦꠞꠣ ꠕꠣꠇꠤ ꠀꠞꠇ ꠔꠦꠞꠣꠞ ꠔꠦꠎꠅ ꠀꠟꠣꠖꠣ।
৪২ ꠝꠞꠘ ꠛꠣꠖꠦ ꠎꠤꠘ꠆ꠖꠣ ꠅꠁꠀ ꠃꠑꠣꠅ ꠅꠃ ꠟꠣꠈꠣꠘ।
ꠟꠣꠡ ꠝꠣꠐꠤ ꠖꠤꠀ ꠢꠣꠞꠟꠦ ꠙꠌꠤꠎꠣꠄ,
ꠅꠁꠟꠦ ꠅꠃ ꠟꠣꠡꠞꠦ ꠎꠦꠛꠟꠣ ꠎꠤꠘ꠆ꠖꠣ ꠇꠞꠣ ꠅꠁꠛ,
ꠁꠔꠣ ꠀꠞ ꠙꠌꠔ ꠘꠣꠄ।
৪৩ ꠅꠡꠝ꠆ꠝꠣꠘꠤ ꠢꠣꠟꠔꠦ ꠝꠣꠐꠤ ꠖꠦꠅꠀ ꠅꠄ,
ꠡꠝ꠆ꠝꠣꠘꠤ ꠢꠣꠟꠔꠦ ꠔꠥꠟꠣ ꠅꠁꠛ।
ꠝꠣꠐꠤ ꠖꠦꠅꠀ ꠅꠄ ꠖꠥꠞꠛꠟ ꠢꠣꠟꠔꠦ,
ꠀꠞ ꠔꠥꠟꠣ ꠅꠁꠛ ꠛꠟꠛꠣꠘ ꠢꠣꠟꠔꠦ।
৪৪ ꠝꠣꠐꠤ ꠖꠦꠅꠀ ꠅꠄ ꠞꠇ꠆ꠔ-ꠝꠣꠋꠡꠞ ꠡꠞꠤꠟ,
ꠅꠁꠟꠦ ꠔꠥꠟꠣ ꠅꠁꠛ ꠞꠥꠢꠣꠘꠤꠇ ꠡꠞꠤꠟ।
ꠞꠇ꠆ꠔ-ꠝꠣꠋꠡꠞ ꠡꠞꠤꠟ ꠎꠦꠛꠟꠣ ꠀꠍꠦ,
ꠔꠦ ꠔ ꠞꠥꠢꠣꠘꠤꠇ ꠡꠞꠤꠟꠅ ꠀꠍꠦ।
৪৫ ꠎꠦꠟꠣ ꠛꠣꠛꠣ ꠀꠖꠝꠞ ꠛꠦꠙꠣꠞꠦ ꠙꠛꠤꠔ꠆ꠞ ꠔꠃꠞꠣꠔ ꠡꠞꠤꠚꠅ ꠀꠍꠦ,
“ꠅꠃ ꠙꠄꠟꠣ ꠀꠖꠝ ꠎꠤꠘ꠆ꠖꠣ ꠎꠣꠘꠖꠣꠞ ꠅꠁꠟꠣ।”
ꠔꠦ ꠡꠦꠡ ꠀꠖꠝ,
ꠎꠦꠁꠘ ꠀꠟ-ꠝꠍꠤ,
ꠔꠣꠁꠘ ꠇꠤꠔꠣ ꠅꠁꠟꠣ?
ꠔꠣꠁꠘ ꠔ ꠅꠁꠟꠣ ꠎꠤꠘ꠆ꠖꠦꠉꠤ ꠖꠦꠅꠞꠣ ꠞꠥꠢꠥ।
৪৬ ꠅꠁꠟꠦ ꠞꠥꠢꠣꠘꠤꠇ ꠎꠦ ꠡꠞꠤꠟ,
ꠁꠈꠣꠘ ꠔ ꠙꠄꠟꠣ ꠅꠄ ꠘꠣ,
ꠙꠄꠟꠣ ꠅꠄ ꠞꠇ꠆ꠔ-ꠝꠣꠋꠡꠞ ꠡꠞꠤꠟ,
ꠛꠣꠖꠦ ꠅꠄ ꠞꠥꠢꠣꠘꠤꠇ ꠡꠞꠤꠟ।
৪৭ ꠎꠦꠟꠣ ꠙꠄꠟꠣ ꠀꠖꠝ ꠝꠣꠐꠤ ꠕꠣꠇꠤ ꠀꠁꠟꠣ,
ꠛꠣꠖꠦ ꠖꠥꠍꠞꠣ ꠀꠖꠝ,
ꠀꠟ-ꠝꠍꠤ ꠀꠁꠟꠣ ꠛꠦꠢꠦꠡ꠆ꠔ ꠕꠣꠇꠤ।
৪৮ ꠎꠉꠔꠞ ꠝꠣꠘꠥꠡ ꠅꠁꠟꠣ ꠅꠃ ꠝꠣꠐꠤꠞ ꠛꠣꠘꠣꠁꠟ ꠝꠣꠘꠡꠞ ꠟꠣꠈꠣꠘ,
ꠀꠞ ꠛꠦꠢꠦꠡ꠆ꠔꠤ ꠝꠣꠘꠥꠡ ꠅꠁꠟꠣ ꠢꠃ ꠛꠦꠢꠦꠡ꠆ꠔꠤ ꠎꠘ ꠀꠟ-ꠝꠍꠤꠞ ꠟꠣꠈꠣꠘ।
৪৯ ꠔꠦ ꠛꠣꠛꠣ ꠀꠖꠝꠞ ꠟꠣꠈꠣꠘ ꠀꠝꠞꠣ ꠎꠦꠟꠣ ꠝꠣꠐꠤꠞ ꠇꠣꠄꠀꠞ ꠍꠥꠞꠔ ꠙꠣꠁꠍꠤ,
ꠑꠤꠇ ꠅꠃꠟꠣ ꠢꠃ ꠛꠦꠢꠦꠡ꠆ꠔꠤ ꠎꠘꠞ ꠟꠣꠈꠣꠘ ꠛꠦꠢꠦꠡ꠆ꠔꠤ ꠍꠥꠞꠔꠅ ꠙꠣꠁꠝꠥ।
৫০ ꠜꠣꠁꠀꠂꠘꠞꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ,
ꠞꠇ꠆ꠔ-ꠝꠣꠋꠡꠞ ꠇꠥꠘꠥ ꠡꠞꠤꠟ ꠀꠟ꠆ꠟꠣꠞ ꠛꠣꠖꠡꠣꠁꠞ ꠅꠗꠤꠇꠣꠞ ꠙꠣꠄ ꠘꠣ।
ꠎꠦꠔꠣꠞ ꠛꠤꠘꠣꠡ ꠀꠍꠦ,
ꠁꠔꠣ ꠇꠥꠘꠥꠝꠘ꠆ꠔꠦꠃ ꠌꠤꠞꠡ꠆ꠕꠣꠄꠁ ꠛꠘꠦ ꠘꠣ।
৫১ ꠔꠦ ꠀꠝꠤ ꠔꠥꠝꠞꠣꠞꠦ ꠄꠇꠐꠣ ꠛꠣꠔꠥꠘꠤ ꠇꠕꠣ ꠎꠣꠘꠣꠁꠞꠣꠝ,
ꠎꠣꠘꠅ ꠘꠤ,
ꠀꠝꠞꠣ ꠢꠇꠟꠞ ꠔ ꠝꠃꠔ ꠅꠁꠔ ꠘꠣꠄ,
ꠅꠁꠟꠦ ꠢꠇꠟꠞꠃ ꠍꠥꠞꠔ ꠛꠖꠟꠤꠎꠤꠛ।
৫২ ꠇꠤꠀꠝꠔꠞ ꠇꠣꠟꠅ ꠄꠇ ꠝꠥꠢꠥꠞ꠆ꠔꠞ ꠝꠣꠎꠦ,
ꠌꠈꠥꠞ ꠙꠟꠇꠦ,
ꠡꠤꠋꠉꠣꠔ ꠚꠥ ꠖꠦꠅꠀꠞ ꠟꠉꠦ ꠟꠉꠦꠃ ꠀꠝꠞꠣ ꠛꠖꠟꠤꠎꠤꠝꠥ।
ꠅꠃ ꠡꠤꠋꠉꠣ ꠛꠣꠎꠤꠀ ꠢꠣꠞꠟꠦ,
ꠢꠇꠟ ꠝꠥꠞ꠆ꠖꠣ ꠅꠟꠣ ꠍꠥꠞꠔꠦ ꠎꠤꠘ꠆ꠖꠣ ꠅꠁꠛꠣ,
ꠎꠦꠔꠣ ꠇꠥꠘꠥꠖꠤꠘ ꠛꠤꠘꠣꠡ ꠅꠁꠔ ꠘꠣꠄ,
ꠀꠞ ꠀꠝꠞꠣꠅ ꠢꠃ ꠍꠥꠞꠔꠦ ꠛꠖꠟꠤꠎꠤꠝꠥ।
৫৩ ꠄꠞꠟꠣꠉꠤ ꠎꠦ ꠡꠞꠤꠟ ꠛꠤꠘꠣꠡ ꠅꠁꠎꠣꠄ,
ꠁꠔꠣꠄ ꠅꠟꠣ ꠍꠥꠞꠔ ꠙꠣꠁꠔꠦ ꠅꠁꠛ,
ꠎꠦꠔꠣ ꠇꠥꠘꠥꠖꠤꠘ ꠙꠌꠤꠔ ꠘꠣꠄ,
ꠀꠞ ꠎꠦꠔꠣ ꠝꠞꠤꠎꠤꠛ,
ꠁꠔꠣꠄ ꠅꠟꠣ ꠍꠥꠞꠔ ꠙꠣꠁꠔꠦ ꠅꠁꠛ,
ꠎꠦꠔꠣ ꠇꠥꠘꠥꠖꠤꠘ ꠝꠞꠔ ꠘꠣꠄ।
৫৪ ꠀꠞ ꠎꠦ ꠡꠞꠤꠟ ꠙꠌꠤꠎꠣꠄ,
ꠁ ꠡꠞꠤꠟꠦ ꠎꠦꠛꠟꠣ ꠌꠤꠞꠡ꠆ꠕꠣꠄꠁ ꠍꠥꠞꠔ ꠙꠣꠁꠛ,
ꠎꠦ ꠡꠞꠤꠟꠞ ꠝꠃꠔ ꠅꠄ,
ꠁꠔꠣꠄ ꠎꠦꠛꠟꠣ ꠌꠤꠞꠇꠣꠟꠤꠘ ꠎꠤꠘ꠆ꠖꠦꠉꠤ ꠙꠣꠁꠛ,
ꠢꠃ ꠡꠝꠄ ꠀꠟ꠆ꠟꠣꠞ ꠇꠣꠟꠣꠝꠞ ꠅꠃ ꠟꠦꠈꠣ ꠚꠟꠤꠛ,
ꠝꠃꠔꠞ ꠛꠤꠘꠣꠡ ꠅꠁꠀ ꠎꠂ ꠀꠁꠍꠦ।
৫৫ ꠅ ꠝꠃꠔ,
ꠔꠞ ꠎꠂ ꠇꠥꠀꠁ?
ꠝꠃꠔꠞꠦ,
ꠔꠞ ꠛꠤꠡ ꠖꠣꠔ ꠇꠥꠀꠁ?
৫৬ ꠝꠃꠔꠞ ꠛꠤꠡ ꠖꠣꠔ ꠅꠁꠟ ꠉꠥꠘꠣ,
ꠀꠞ ꠉꠥꠘꠣꠞꠦ ꠈꠦꠝꠔꠣ ꠎꠥꠉꠣꠄ ꠝꠥꠍꠣ ꠘꠛꠤꠞ ꠡꠞꠤꠅꠔ।
৫৭ ꠅꠁꠟꠦ ꠀꠟ꠆ꠟꠣ ꠙꠣꠇꠞ ꠡꠥꠇꠞꠤꠀ ꠀꠖꠣꠄ ꠇꠞꠤ,
ꠀꠝꠞꠣꠞ ꠝꠣꠟꠤꠇ ꠁꠍꠣ ꠀꠟ-ꠝꠍꠤꠞ ꠃꠍꠤꠟ꠆ꠟꠣꠄ ꠔꠣꠁꠘ ꠀꠝꠞꠣꠞꠦ ꠎꠂ ꠖꠣꠘ ꠇꠞꠂꠘ।
৫৮ ꠔꠦ,
ꠅ ꠀꠝꠣꠞ ꠝꠣꠄꠀꠞ ꠜꠣꠁꠀꠂꠘ,
ꠔꠥꠝꠞꠣ ꠁꠝꠣꠘꠦ ꠝꠎꠛꠥꠔ ꠅꠅ,
ꠎꠣꠔꠦ ꠇꠥꠘ꠆ꠔꠣꠄ ꠔꠥꠝꠞꠣꠞꠦ ꠀꠟꠣꠝꠔ ꠘꠣ ꠙꠣꠞꠦ।
ꠝꠣꠟꠤꠇꠞ ꠈꠦꠎꠝꠔꠞ ꠟꠣꠉꠤ ꠘꠤꠎꠞꠦ ꠢꠞ-ꠢꠣꠝꠦꠡꠣ ꠙꠥꠞꠣꠙꠥꠞ ꠛꠤꠟꠣꠁ ꠖꠦꠅ,
ꠔꠥꠝꠞꠣ ꠔ ꠎꠣꠘꠅ,
ꠔꠣꠘ ꠟꠣꠉꠤ ꠝꠦꠘꠔ ꠇꠞꠟꠦ ꠁ ꠝꠦꠘꠔ ꠇꠥꠘꠥꠝꠘ꠆ꠔꠦꠃ ꠛꠦꠇꠣꠝꠣ ꠎꠣꠄ ꠘꠣ।