ꠄꠇ ꠞꠁꠀꠅ ꠘꠣꠘꠣꠘ ꠇꠣꠝ
৪
১ ꠀꠝꠣꠞ ꠝꠣꠟꠤꠇ ꠀꠟ-ꠝꠍꠤꠞ ꠟꠣꠉꠤ ꠀꠝꠤ ꠎꠦꠟꠅ ꠛꠘ꠆ꠖꠤ ꠀꠍꠤ।
ꠅꠃ ꠛꠘ꠆ꠖꠤ ꠢꠣꠟꠔꠦ ꠀꠝꠤ ꠔꠥꠝꠞꠣꠞꠦ ꠝꠤꠘꠔ ꠇꠞꠤꠀꠞ,
ꠎꠦ ꠇꠣꠝꠞ ꠟꠣꠉꠤ ꠀꠟ꠆ꠟꠣꠄ ꠔꠥꠝꠞꠣꠞꠦ ꠖꠣꠅꠔ ꠖꠤꠍꠂꠘ,
ꠔꠥꠝꠞꠣ ꠄꠞ ꠃꠙꠎꠥꠇ꠆ꠔ ꠅꠁꠀ ꠌꠟꠅ।
২ ꠔꠥꠝꠞꠣꠞ ꠀꠌꠣꠞ-ꠛꠦꠛꠢꠣꠞ ꠎꠣꠘꠥ ꠙꠥꠞꠣꠙꠥꠞ ꠝꠤꠑꠣ ꠀꠞ ꠘꠞꠝ ꠅꠄ।
ꠙꠞꠔꠦꠇꠦ ꠍꠛꠞ ꠇꠞꠅ ꠀꠞ ꠖꠤꠟꠅ ꠝꠢꠛ꠆ꠛꠔ ꠞꠣꠈꠤꠀ ꠄꠇꠦ-ꠅꠁꠘ꠆ꠘꠞꠦ ꠡꠁꠎ꠆ꠎ ꠇꠞꠅ।
৩ ꠀꠟ-ꠝꠍꠤꠞ ꠎꠦ ꠡꠣꠘ꠆ꠔꠤꠄ ꠀꠝꠞꠣꠞꠦ ꠄꠇꠈꠣꠘꠅ ꠎꠥꠠꠣ ꠟꠣꠉꠣꠁꠍꠦ,
ꠢꠃ ꠡꠣꠘ꠆ꠔꠤꠞ ꠛꠟꠦ ꠙꠣꠇ ꠞꠥꠢꠥꠞ ꠖꠦꠅꠀ ꠄꠇꠔꠣ ꠞꠇ꠆ꠇꠣꠞ ꠟꠣꠉꠤ ꠖꠤꠟꠦ-ꠎꠣꠘꠦ ꠌꠦꠡ꠆ꠐꠣ ꠇꠞꠅ।
৪ ꠀꠟ꠆ꠟꠣꠄ ꠔꠥꠝꠞꠣꠞꠦ ꠔꠣꠘ ꠙꠕꠦ ꠖꠣꠅꠔ ꠖꠤꠍꠂꠘ ꠇꠞꠤꠀ ꠔꠥꠝꠞꠣꠞ ꠝꠣꠎꠦ ꠈꠣꠟꠤ ꠄꠇꠈꠣꠘ ꠀꠡꠣ ꠀꠍꠦ,
ꠈꠣꠟꠤ ꠄꠇ ꠡꠞꠤꠟ ꠀꠞ ꠄꠇꠎꠘ ꠙꠣꠇ ꠞꠥꠢꠥ ꠀꠍꠂꠘ।
৫ ꠄꠇ ꠁꠝꠣꠘ,
ꠄꠇ ꠔꠞꠤꠇꠣꠛꠘ꠆ꠖꠤ ꠀꠞ ꠄꠇꠎꠘ ꠝꠣꠟꠤꠇ ꠀꠍꠂꠘ।
৬ ꠢꠇꠟꠞ ꠀꠟ꠆ꠟꠣ ꠈꠣꠟꠤ ꠄꠇꠎꠘ,
ꠝꠣꠘꠤ ꠛꠦꠢꠦꠡ꠆ꠔꠤ ꠛꠣꠚ ꠄꠇꠎꠘꠃ ꠀꠍꠂꠘ।
ꠔꠣꠁꠘꠃ ꠢꠇꠟꠞ ꠃꠙꠞꠦ,
ꠢꠇꠟꠞ ꠝꠣꠎꠦ,
ꠢꠇꠟꠞ ꠖꠤꠟꠅ ꠀꠍꠂꠘ।
৭ ꠅꠁꠟꠦ ꠀꠟ-ꠝꠍꠤꠄ ꠎꠦꠟꠣ ꠑꠤꠇ ꠇꠞꠤꠀ ꠞꠣꠈꠍꠂꠘ,
ꠢꠃ ꠝꠣꠚꠤꠇ ꠀꠝꠞꠣ ꠙꠞꠔꠦꠇꠦ ꠈꠣꠍ ꠞꠢꠝꠔ ꠙꠣꠁꠍꠤ।
৮ ꠄꠞꠟꠣꠉꠤ ꠎꠛꠥꠞ ꠡꠞꠤꠚꠅ ꠟꠦꠈꠣ ꠀꠍꠦ,
ꠔꠣꠁꠘ ꠉꠤꠀ ꠎꠦꠛꠟꠣ ꠛꠦꠢꠦꠡ꠆ꠔꠅ ꠃꠑꠤꠟꠣ,
ꠅꠃ ꠡꠝꠄ ꠛꠘ꠆ꠖꠤ ꠅꠇꠟꠞꠦ ꠛꠣꠘ꠆ꠖꠤꠀ ꠐꠣꠘꠤꠀ ꠘꠤꠟꠣ,
ꠀꠞ ꠔꠣꠘ ꠝꠣꠘꠡꠞꠦ ꠛꠃꠔ ꠖꠣꠘ ꠖꠤꠟꠣ।
৯ ꠔꠦ ꠛꠦꠢꠦꠡ꠆ꠔꠅ ꠉꠤꠀ ꠃꠑꠤꠟꠣ,
ꠁ ꠀꠄꠀꠔ ꠕꠣꠇꠤ ꠛꠥꠎꠣ ꠎꠣꠄ ꠘꠣ ꠘꠤ,
ꠀꠉꠦ ꠔꠣꠁꠘ ꠖꠥꠘꠤꠀꠞ ꠔꠟꠦ ꠟꠣꠝꠍꠤꠟꠣ।
১০ ꠀꠞ ꠎꠦꠁꠘ ꠟꠣꠝꠍꠤꠟꠣ,
ꠔꠣꠁꠘ ꠢꠇꠟꠔꠣ ꠙꠥꠞꠘ ꠇꠞꠣꠞ ꠟꠣꠉꠤ,
ꠀꠍꠝꠣꠘ ꠕꠣꠇꠤ ꠀꠞꠅ ꠃꠙꠞꠦ ꠉꠤꠀ ꠃꠑꠤꠍꠂꠘ।
১১ ꠔꠣꠁꠘ ꠝꠣꠘꠡꠞꠦ ꠅꠃ ꠖꠣꠘ ꠖꠤꠍꠂꠘ,
ꠇꠄꠎꠘꠞꠦ ꠍꠣꠢꠣꠛꠤ,
ꠇꠄꠎꠘꠞꠦ ꠘꠛꠤ,
ꠇꠄꠎꠘꠞꠦ ꠈꠥꠡ-ꠈꠛꠞꠤꠞ ꠔꠛꠟꠤꠉ,
ꠇꠄꠎꠘꠞꠦ ꠎꠝꠣꠔꠞ ꠁꠝꠣꠝ ꠀꠞ ꠃꠡ꠆ꠔꠣꠖ ꠢꠤꠡꠣꠛꠦ ꠛꠅꠀꠁꠟ ꠇꠞꠍꠂꠘ।
১২ ꠔꠣꠁꠘ ꠁꠟꠣ ꠇꠞꠣꠞ ꠇꠣꠞꠘ ꠅꠁꠟ,
ꠀꠟ꠆ꠟꠣꠞ ꠙꠣꠇ ꠛꠘ꠆ꠖꠣ ꠅꠇꠟꠦ ꠎꠣꠘꠥ ꠔꠣꠘ ꠄꠛꠣꠖꠔ-ꠛꠘ꠆ꠖꠦꠉꠤ ꠇꠞꠣꠞ ꠟꠣꠉꠤ ꠎꠥꠁꠔ ꠅꠄ,
ꠀꠞ ꠅꠃ ꠘꠝꠥꠘꠣꠄ ꠀꠟ-ꠝꠍꠤꠞ ꠡꠞꠤꠟ,
ꠎꠝꠣꠔ ꠢꠤꠡꠣꠛꠦ ꠉꠠꠤꠀ ꠃꠑꠦ।
১৩ ꠔꠣꠘ ꠈꠤꠀꠟ ꠅꠁꠟ,
ꠀꠝꠞꠣ ꠢꠇꠟꠦ ꠎꠣꠘꠥ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ,
ꠁꠛꠘꠥꠟ꠆ꠟꠣꠞ ꠃꠙꠞꠦ ꠁꠝꠣꠘ ꠀꠘꠤꠀ,
ꠔꠣꠘꠞꠦ ꠜꠣꠟꠣ ꠇꠞꠤ ꠌꠤꠘꠤꠀ ꠄꠇꠈꠣꠘꠅ ꠅꠁ।
ꠀꠞ ꠀꠟ-ꠝꠍꠤ ꠎꠦꠟꠣ ꠢꠇꠟ ꠟꠣꠈꠣꠘ ꠉꠥꠘꠦ ꠙꠥꠞꠣꠙꠥꠞ ꠜꠞꠣ,
ꠀꠝꠞꠣꠅ ꠅꠟꠣ ꠢꠇꠟ ꠉꠥꠘꠦ ꠙꠥꠞꠣꠙꠥꠞ ꠅꠁꠀ ꠇꠣꠝꠤꠟ ꠅꠁ।
১৪ ꠔꠦꠃ ꠀꠝꠞꠣ ꠀꠞ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠞꠁꠔꠣꠝ ꠘꠣꠄ।
ꠝꠣꠘꠡꠦ ꠡꠄꠔꠣꠘꠤ ꠀꠈꠟ ꠈꠣꠐꠣꠁꠀ ꠛꠦ-ꠙꠕꠦ ꠘꠤꠛꠣꠞ ꠟꠣꠉꠤ ꠝꠣꠘꠡꠞꠦ ꠎꠦ ꠜꠥꠟ ꠔꠣꠟꠤꠝ ꠖꠦꠄ,
ꠅꠃ ꠜꠥꠟ ꠔꠣꠟꠤꠝꠦ ꠎꠣꠘꠥ ꠀꠝꠞꠣꠞꠦ ꠙꠣꠘꠤꠞ ꠀꠃꠟꠣ-ꠎꠣꠃꠟꠣ ꠓꠦꠃꠞ ꠟꠣꠈꠣꠘ ꠖꠥ-ꠖꠤꠟꠣ ꠘꠣ ꠛꠣꠘꠣꠄ।
১৫ ꠛꠞꠋ ꠀꠝꠞꠣꠞ ꠖꠤꠟꠞ ꠝꠢꠛ꠆ꠛꠔꠦ ꠢꠇ ꠝꠣꠔ ꠝꠣꠔꠤꠝꠥ,
ꠢꠇꠟ ꠘꠝꠥꠘꠣꠄ ꠛꠠ ꠅꠁꠀ ꠀꠟ-ꠝꠍꠤꠞ ꠟꠣꠈꠣꠘ ꠅꠁꠝꠥ।
ꠔꠣꠁꠘꠃ ꠔ ꠀꠡ꠆ꠔꠣ ꠡꠞꠤꠟꠞ ꠝꠣꠕꠣ।
১৬ ꠀꠡ꠆ꠔꠣ ꠡꠞꠤꠟ ꠅꠝꠟꠣ ꠛꠣꠘꠣꠁꠟ ꠅꠁꠍꠦ,
ꠎꠣꠔꠦ ꠡꠞꠤꠟꠞ ꠢꠇꠟ ꠅꠋꠉ ꠎꠣꠞꠎꠤꠞ ꠎꠣꠉꠣꠔ ꠞꠁꠀ ꠝꠥꠟ ꠇꠣꠄꠀꠞ ꠟꠉꠦ ꠎꠥꠠꠣ ꠟꠣꠉꠣꠁꠟ ꠞꠄ।
ꠙꠞꠔꠦꠇ ꠅꠋꠉ ꠎꠦꠛꠟꠣ ꠑꠤꠇ-ꠑꠣꠇ ꠇꠣꠝ ꠇꠞꠦ,
ꠅꠃ ꠡꠝꠄ ꠀꠡ꠆ꠔꠣ ꠡꠞꠤꠟꠃ ꠝꠣꠕꠣꠞ ꠛꠟꠦ ꠛꠣꠠꠤꠀ ꠃꠑꠦ,
ꠀꠞ ꠝꠢꠛ꠆ꠛꠔꠞ ꠝꠣꠎꠖꠤ ꠘꠤꠎꠞꠦ ꠉꠠꠤꠀ ꠔꠥꠟꠦ।
ꠙꠥꠞꠣꠘ ꠎꠤꠘ꠆ꠖꠦꠉꠤ ꠛꠖꠟꠣꠅ, ꠘꠄꠀ ꠅꠅ
১৭ ꠄꠞꠟꠣꠉꠤ ꠀꠝꠤ ꠀꠝꠣꠞ ꠝꠣꠟꠤꠇꠞ ꠘꠣꠝꠦ ꠔꠥꠝꠞꠣꠞꠦ ꠢꠥꠡꠤꠀꠞ ꠇꠞꠤ ꠖꠤꠀꠞ,
ꠜꠤꠘ ꠗꠞ꠆ꠝꠞ ꠝꠣꠘꠡꠦ ꠎꠦꠟꠣ ꠛꠣꠎꠦ ꠌꠤꠘ꠆ꠔꠣ ꠇꠞꠤꠀ ꠎꠤꠘ꠆ꠖꠦꠉꠤ ꠇꠣꠐꠣꠁꠘ,
ꠔꠥꠝꠞꠣ ꠀꠞ ꠁꠟꠣ ꠎꠤꠘ꠆ꠖꠦꠉꠤ ꠇꠣꠐꠣꠁꠅ ꠘꠣ।
১৮ ꠔꠣꠞꠣꠞ ꠖꠤꠟ ꠔ ꠀꠘ꠆ꠖꠣꠁꠞꠞ ꠝꠣꠎꠦ ꠙꠠꠤ ꠞꠁꠍꠦ।
ꠁꠔꠣꠞ ꠖꠤꠟ ꠉꠥꠝꠞꠣ,
ꠄꠞꠟꠣꠉꠤꠃ ꠔꠣꠞꠣ ꠀꠟ꠆ꠟꠣꠞ ꠛꠦꠙꠣꠞꠦ ꠇꠥꠘ꠆ꠔꠣ ꠌꠤꠘꠦ ꠘꠣ,
ꠇꠥꠘ꠆ꠔꠣ ꠌꠤꠘꠔ ꠌꠣꠄꠅ ꠘꠣ,
ꠄꠞꠟꠣꠉꠤ ꠀꠟ꠆ꠟꠣꠞ ꠖꠦꠅꠀ ꠎꠤꠘ꠆ꠖꠦꠉꠤ ꠕꠣꠇꠤ ꠔꠣꠞꠣ ꠛꠃꠔ ꠖꠥꠞꠁ।
১৯ ꠔꠣꠞꠣꠞ ꠛꠤꠛꠦꠇ ꠅꠡꠣꠠ ꠅꠁꠉꠦꠍꠦ,
ꠅꠔꠣꠞ ꠖꠣꠄ ꠢꠞ-ꠢꠣꠝꠦꠡꠣ ꠘꠣꠙꠣꠇꠤ ꠇꠣꠝꠞ ꠗꠣꠘ꠆ꠖꠣ ꠇꠞꠦ,
ꠔꠣꠞꠣ ꠘꠤꠎꠞ ꠎꠤꠘ꠆ꠖꠦꠉꠤꠞꠦ ꠟꠣꠉꠣꠝ ꠍꠣꠠꠣ ꠛꠖ ꠈꠣꠁꠡꠞ ꠀꠔꠅ ꠍꠣꠠꠤ ꠖꠤꠍꠦ।
২০ ꠅꠁꠟꠦ ꠔꠥꠝꠞꠣ ꠔ ꠀꠟ-ꠝꠍꠤꠞ ꠛꠦꠙꠣꠞꠦ ꠁꠟꠣꠈꠣꠘ ꠔꠣꠟꠤꠝ ꠙꠣꠁꠍ ꠘꠣ।
২১ ꠔꠥꠝꠞꠣ ꠘꠤꠌ꠆ꠌꠄ ꠔꠣꠘ ꠛꠦꠙꠣꠞꠦ ꠢꠥꠘꠍ,
ꠢꠥꠘꠤꠀ ꠔꠣꠘ ꠟꠉꠦ ꠡꠞꠤꠇ ꠅꠁꠀ,
ꠔꠣꠘ ꠝꠣꠎꠦ ꠎꠦ ꠢꠇ ꠀꠍꠦ,
ꠅꠃ ꠢꠇꠞ ꠔꠣꠟꠤꠝ ꠙꠣꠁꠍ।
২২ ꠔꠣꠘ ꠔꠣꠟꠤꠝ ꠅꠁꠟ,
ꠚꠤꠘ꠆ꠘꠞ ꠙꠥꠞꠣꠘ ꠇꠣꠙꠠ ꠝꠣꠘꠡꠦ ꠎꠦꠛꠟꠣ ꠄꠇ꠆ꠇꠦꠞꠦ ꠚꠣꠟꠣꠁ ꠖꠦꠄ,
ꠅꠃ ꠟꠣꠈꠣꠘ ꠔꠥꠝꠞꠣꠞ ꠜꠤꠔꠞꠞ ꠙꠥꠞꠣꠘ ‘ꠀꠝꠤ’ꠞꠦ ꠄꠇ꠆ꠇꠦꠛꠣꠞꠦ ꠚꠣꠟꠣꠁ ꠖꠦꠅ,
ꠇꠣꠞꠘ ꠅꠃ ‘ꠀꠝꠤ’ꠞ ꠛꠖ ꠈꠣꠁꠡꠦ ꠝꠣꠘꠡꠞ ꠎꠤꠘ꠆ꠖꠦꠉꠤꠞꠦ ꠛꠞꠛꠣꠖ ꠇꠞꠤꠟꠣꠄ।
২৩ ꠄꠞ ꠛꠖꠟꠣ ꠀꠟ꠆ꠟꠣ ꠙꠣꠇꠞꠦ ꠡꠥꠎꠥꠉ ꠖꠦꠅ,
ꠔꠣꠁꠘ ꠔꠥꠝꠞꠣꠞ ꠖꠤꠟꠞꠦ ꠘꠄꠀ ꠢꠣꠟꠔꠦ ꠉꠠꠤꠀ ꠔꠥꠟꠃꠇ꠆ꠇꠣ,
২৪ ꠔꠣꠘ ꠖꠦꠅꠀ ꠘꠄꠀ ‘ꠀꠝꠤ’ꠞꠦ ꠘꠄꠀ ꠇꠣꠙꠠꠞ ꠟꠣꠈꠣꠘ ꠚꠤꠘ꠆ꠖꠅ।
ꠅꠃ ꠘꠄꠀ ‘ꠀꠝꠤ’ꠞꠦ ꠀꠍꠟ ꠢꠇ-ꠙꠞꠦꠎꠉꠣꠞꠤ ꠀꠞ ꠙꠣꠇ-ꠙꠛꠤꠔ꠆ꠞ ꠇꠞꠤꠀ ꠀꠟ꠆ꠟꠣꠞ ꠍꠥꠞꠔꠦ ꠉꠠꠣ ꠅꠁꠍꠦ।
২৫ ꠄꠞꠟꠣꠉꠤ ꠔꠥꠝꠞꠣ ꠝꠤꠍꠣ ꠝꠣꠔꠣ ꠛꠣꠖ ꠖꠦꠅ,
ꠄꠇꠦ-ꠅꠁꠘ꠆ꠘꠦ ꠢꠣꠍꠣ ꠝꠣꠔꠅ,
ꠇꠣꠞꠘ ꠀꠝꠞꠣ ꠢꠇꠟꠃ ꠄꠇꠦ-ꠅꠁꠘ꠆ꠘꠦ ꠝꠤꠡꠤꠀ ꠀꠍꠤ।
২৬ ꠞꠣꠉ-ꠉꠥꠍꠣ ꠇꠞꠟꠦꠅ ꠁ ꠞꠣꠉꠞ ꠟꠣꠉꠤ ꠉꠥꠘꠣ ꠇꠞꠤꠅ ꠘꠣ,
ꠡꠥꠞꠥꠎ ꠒꠥꠛꠣꠞ ꠀꠉꠦꠃ ꠉꠥꠍꠣꠞ ꠇꠕꠣ ꠚꠣꠃꠞꠤꠟꠣꠅ,
২৭ ꠁꠛꠟꠤꠍ-ꠡꠄꠔꠣꠘꠞꠦ ꠇꠥꠘꠥ ꠡꠥꠎꠥꠉ ꠖꠤꠅ ꠘꠣ।
২৮ ꠌꠥꠞꠦ ꠔꠣꠞ ꠌꠥꠞꠤ ꠇꠞꠣ ꠛꠣꠖ ꠖꠦꠃꠇ,
ꠘꠤꠎꠞ ꠀꠔꠦ ꠢꠣꠟꠣꠟ ꠙꠕꠦ ꠝꠦꠘꠔ ꠇꠞꠤꠀ ꠈꠣꠘꠣ ꠈꠣꠃꠇ,
ꠎꠣꠔꠦ ꠔꠣꠞ ꠈꠣꠅꠀ-ꠚꠤꠘ꠆ꠖꠣꠞ ꠛꠣꠖꠦꠅ ꠉꠞꠤꠛ-ꠖꠥꠈꠤꠞꠦ ꠖꠤꠛꠣꠞ ꠟꠣꠉꠤ ꠇꠤꠍꠥ ꠎꠝꠣ ꠞꠄ।
২৯ ꠔꠥꠝꠞꠣꠞ ꠝꠥꠈꠖꠤ ꠎꠣꠘꠥ ꠛꠣꠖ ꠇꠕꠣ ꠘꠣ ꠛꠣꠞꠅꠄ,
ꠛꠞꠋ ꠀꠞꠇ ꠎꠘꠞ ꠃꠙꠇꠣꠞꠤ ꠔꠣꠟꠤꠝꠞ ꠟꠣꠉꠤ ꠜꠣꠟꠣ ꠝꠣꠔ ꠝꠣꠔꠤꠅ,
ꠎꠣꠔꠦ ꠁꠔꠣ ꠢꠥꠘꠤꠀ ꠢꠥꠘꠞꠣ ꠎꠘꠞ ꠜꠣꠟꠣꠁ ꠅꠄ।
৩০ ꠔꠥꠝꠞꠣ ꠀꠟ꠆ꠟꠣꠞ ꠙꠣꠇ ꠞꠥꠢꠥꠞꠦ ꠖꠥꠈ ꠖꠤꠅ ꠘꠣ,
ꠀꠈꠦꠞꠤ ꠘꠣꠎꠣꠔꠞ ꠀꠉ ꠙꠞ꠆ꠎꠘ꠆ꠔ ꠅꠃ ꠞꠥꠢꠥ ꠖꠤꠀꠃ ꠀꠟ꠆ꠟꠣꠄ ꠔꠥꠝꠞꠣꠞꠦ ꠡꠤꠟ-ꠌꠣꠙ꠆ꠙꠠ ꠝꠣꠞꠤꠀ ꠕꠁꠍꠂꠘ।
৩১ ꠢꠇꠟ ꠘꠝꠥꠘꠣꠞ ꠛꠤꠞꠇ꠆ꠔꠤ ꠜꠣꠛ,
ꠝꠤꠎꠣꠎ ꠖꠦꠈꠣꠘꠤ,
ꠞꠣꠉ-ꠉꠥꠍꠣ,
ꠌꠤꠟ꠆ꠟꠣꠁꠀ ꠇꠣꠁꠎ꠆ꠎꠣ ꠇꠞꠣ,
ꠉꠣꠟꠣ-ꠉꠣꠟꠤ,
ꠀꠞ ꠢꠇꠟ ꠘꠝꠥꠘꠣꠞ ꠁꠋꠡꠣ-ꠘꠤꠘ꠆ꠖꠣ ꠔꠥꠝꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟꠣꠅ।
৩২ ꠛꠞꠋ ꠔꠥꠝꠞꠣ ꠄꠇꠦ-ꠅꠁꠘ꠆ꠘꠦ ꠖꠄꠀ ꠇꠞꠅ,
ꠅꠁꠘ꠆ꠘꠞ ꠖꠥꠈꠦ ꠖꠥꠈꠤ ꠅꠅ,
ꠀꠟ-ꠝꠍꠤꠞ ꠝꠣꠎꠖꠤ ꠀꠟ꠆ꠟꠣꠄ ꠎꠦꠟꠣ ꠔꠥꠝꠞꠣꠞꠦ ꠝꠣꠚ ꠇꠞꠍꠂꠘ,
ꠔꠥꠝꠞꠣꠅ ꠅꠟꠣ ꠄꠇꠦ-ꠅꠁꠘ꠆ꠘꠞꠦ ꠝꠣꠚ ꠇꠞꠅ।